Author: ATV

Kryetari i Drenasit, Ramiz Lladrovci, ka thënë se kryetari i Partisë Demokratike të Kosovës, Bedri Hamza, s’mund ta barazojë shkakun dhe pasojën pasi kjo nuk ndihmon në zhvillimin e partisë.

Një ditë më parë, Hamza mbajti konferencë për shtyp pas mbledhjes së Kryesisë së PDK-së, duke theksuar se askush nuk e ka përjashtuar Lladrovcin nga partia dhe që me të synojnë ta maksimalizojnë votën në zgjedhjet e parakohshme të 28 dhjetorit.

Por në një shkrim në Facebook, Lladrovci u shpreh se disa eksponentë të PDK-së po tentojnë të paraqesin disfatën si fitore. Ai ka theksuar se mjegulla rreth kësaj komune nuk po hiqet, pavarësisht deklarimeve të kryetarit të ri të PDK-së, Bedri Hamza.

Lladrovci theksoi se kushti i fitores për ta ndryshuar gjendjen në Kosovë është uniteti.

“Përkundër deklarimeve të mija, të qarta si rrezja e diellit, mjegulla rreth Drenasit nuk po hiqet. Për fat të keq, nga disa eksponentë, gjendja po promovohet normale dhe disfata po paraqitet fitore”, ka shkruar ai.

Ai u shpreh kritik për përpjekjet e Hamzës për të barazuar shkakun me pasojën, duke shtuar se kjo nuk është rrugë për ta fuqizuar partinë apo degën.

“Mësimi nga Drenasi, siç shihet, nuk pati efekt. Reflektimet në opinion nga ndonjë eksponent i lodhtë me ligjërata koti, apo nga Hamza që synon të barazoj shkakun dhe pasojën, nuk ndihmojnë zhvillimin e partisë”, ka shkruar ai.

Lladrovci thekson se PDK-ja duhet të reformojë qasjen dhe metodat e veprimit politik dhe organizativ, duke i shërbyer “gjuhës së fitimtarëve me vizion, pa kushte dhe pa hile”.

“Shkurtpamësinë politike do larguar nga partia e krijuar nga heronjtë tanë të luftës dhe paqes, duke përfaqësuar breza të tërë me përkushtim atdhetar, për Kosovën shtet me vlera euro-atlantike. Ndryshe, keqbërësit e bedelët politikë do të mbesin shenjë dalluese e partisë shteformuese dhe shtetndërtuese”, ka shkruar ndër të tjera Lladrovci.

Lladrovci i fitoi zgjedhjet lokale në Drenas me iniciativë të vetën, pasi PDK-ja vendosi të kandidonte me Petrit Hajdarin.

Eurodeputeti Thijs Reuten ka kërkuar që Komisioni Evropian të propozojë heqjen e menjëhershme të masave kundër Kosovës dhe të nisë procesin e aplikimit për anëtarësim në Bashkimin Evropian.

Në një reagim në profilin e tij në “X”, Reuten ka theksuar se Komisioni Evropian duhet t’u propozojë shteteve anëtare heqjen e masave për Kosovën.

“Komisioni Evropian duhet t’u propozojë shteteve anëtare heqjen e masave dhe të fillojë përpunimin e kërkesës për anëtarësim të Kosovës në BE.”

Për masat e vendosura, ka reaguar edhe kryeministri në detyrë, Albin Kurti, gjatë një takimi në Tiranë me Komisioneren Marta Kos dhe Drejtorin për Zgjerim, Gert Jan Koompan. Kurti ka thënë se është hera e fundit që adreson këtë çështje dhe ka kërkuar heqjen e menjëhershme të masave.

Përsa i përket aplikimit të Kosovës për anëtarësim në BE, Kurti dhe Osmani kanë kërkuar progres, por pas tre vitesh ende nuk ka asnjë veprim nga Bashkimi Evropian.

Presidentja e Kosovës, Vjosa Osmani, do t’i presë sot liderët partiakë për konsultime rreth datës së zgjedhjeve, pas dështimit të mandatarit të dytë të Lëvizjes Vetëvendosje për të siguruar shumicën e nevojshme për qeverinë e re të Kosovës.

Zëdhënësi i Lidhjes Demokratike të Kosovës, Besian Mustafa, ka konfirmuar se takimi do të nisë nga ora 10:30, dhe të njëjtit do të marrin pjesë.

Po ashtu edhe nga Lëvizja Vetëvendosje dhe NISMA kanë konfirmuar pjesëmarrjen.

Ky takim vjen një ditë pas dështimin të Glauk Konjufcës për t’u zgjedhur kryeministër i vendit.

Pro formimit të Qeverisë sipas propozimit të Lëvizjes Vetëvendosje votuan vetëm 56 deputetë, 4 abstenuan dhe 53 ishin kundër.

Pas dështimit për Qeverinë, vendi shkon në zgjedhje të parakohshme.

Ish-komandanti i NATO-s për Evropë, gjenerali Wesley Clark, gjatë dëshmisë në Hagë ka treguar për dallimet që kishte mes amerikanëve dhe francezëve për veriun e Kosovës.

Clark ka treguar se kishte shkuar të takonte ministrin e Jashtëm të Francës atëkohë dhe ministrin e Mbrojtjes, për të biseduar për këtë çështje.

“Jam ankuar, sepse ishte përpjekje e organizuar e serbëve për ta spastruar zonën në veri të lumit Ibër. Kam takuar ministrin Alain Richard që më tha, ‘jo ne u kemi dhënë urdhër trupave franceze t’i mbrojnë serbët në atë zonë, t’i mbështesin ata’. Kemi pasur disa vështirësi lidhur me këtë. Por, kjo është mënyra se si funksionojnë trupat e NATO-s. Ka lloj autoriteti e pushteti që i përket vet autoriteteve kombëtare, edhe pse janë nën kontrollin e komandës së NATO-s”, ka thënë Clark.

Ai tregon se ministrit francez Richard i kishte bërë thirrje për t’i ndryshuar urdhra, porse nuk i ndryshoi urdhrat.

“Më vonë kam çuar përforcime tjera atje, për ta ruajtur mundësinë që shqiptarët të mund të jetojnë atje. Raporti që po merrja tregonte se doktorët shqiptarë në spitale dhe njerëzit tjerë po detyroheshin të largoheshin e po dëboheshin nga aty. Mendova dhe e kuptova se ishin paraushtarakë serbë dhe forcat speciale serbe që po e bënin këtë. Kjo është mënyra se si Beogradi vepronte”, tha Clark.

Clark po dëshmon në Hagë, si dëshmitar i thirrur nga mbrojtja e ish-presidentit të Kosovës, Hashim Thaçi.

Ai është dëshmitari i fundit i mbrojtjes.

Ish-komandanti suprem i NATO-s, Wesley Clark gjatë dëshmisë së tij në Hagë dha detaje edhe rreth bisedës së tij me Sllobodan Millosheviqin.

Ai tha se personalisht kishte shkuar tri herë në Beograd dhe bashkë me Havier Solanën.

Ndonëse tha se Millosheviq i kishte premtuar se do t’i largonte forcat nga Kosova një gjë e tillë nuk kishte ndodhur.

“Shkova në një takim pas një jave, i thash presidentit Millosheviq duhet të tërheqësh forcat sepse nëse nuk i tërheq forcat atëherë NATO-ja do të më kërkoj që të zbatoj planin që kam në letër dhe do ta vazhdojmë me bombardimin dhe ai mu përgjigj: NATO-ja d ta bëjë atë çfarë ka për të bërë dhe unë iu përgjigja ne nuk duam ta bëjmë atë që mund të bëjmë dhe ai më tha që ke të drejtë, por bisedoni me gjeneralët dhe unë shkova bisedova me gjeneralët, ua tregova hartën ata më thanë se këta janë terroristë, aty – këtu janë të gjithë terroristë janë zona të Kosovës,. Dhe unë i thash nuk do e zgjidhësh kështu këtë bisedë duke i quajtur të gjithë terroistë dhe duke i shtypur njerëzit nga shtëpitë e tyre dhe t’i thërrasësh të gjithë terrositë, duhet të ndryshosh taktikën tënde, por as kjo bisedë nuk çoi në asgjë. Kur e takova herën tjetër Millosheviqin ai më tha se do të bënte çdo gjë që të mundej por asgjë nuk ndodhi, më pas shkova në takimin e tretë me gjeneralin Marlin në atë kohë u ulëm me të dhe i treguam presidentit Millosheviq se çfarë donim të bënim, ai më tha që personi që është përgjegjës është zotëri Stojanoviq me atë duhet të flisni, kështu që ai tha që nuk ishte personi përgjegjës. Ne shpenzuam të gjithë darkën për të nënshkruar marrëveshjen, të nesërmen ishte e dielë në mëngjes ishte koha për të nënshkruar marrëveshjen, presidenti Millosheviq erdhi në orë 10:00 në mëngjes dhe ai u soll sikur marrëveshja ishte vërtetë shumë e rëndësishme ai tha: ne e dimë se si t’i trajtojmë këta shqiptarët, këta vrasës, dhe e kemi bërë këtë gjë edhe përpara s’është hera e parë, unë i thash po zotëri president si i keni trajtuar, çfarë keni bërë, ai mu përgjigj: i kemi vrarë të gjithë. Dhe pastaj paraqita marrëveshjen që ishte shtypur me njerëzit e vet ku ishin disa – pak lidhur me çfarë do të bënin Shtetet e Bashkuara sa u përket forcave tërheqëse të negociatave. Unë i thash zotëri president se keni nënshkruar marrëveshjen, ai më tha nuk është e nevojshme, i thash sigurisht që është e nevojshme duhet ta nënshkruani, ai e nënshkroi”, tha Clark.