Author: N.T.

Granit Xhaka është në qendër të një hetimi në Zvicër lidhur me një certifikatë vaksinimi kundër COVID-19, ndërsa kapiteni i Kombëtares zvicerane ka pranuar tashmë se kishte siguruar një dëshmi vaksinimi gjatë periudhës së pandemisë.

Prokuroria e Lucernës ka hapur procedurë ndaj Xhakës dhe një mjekeje nga ky kanton, për të sqaruar nëse është kryer vepër penale lidhur me një certifikatë të rreme të COVID-19. Xhaka pritet të merret në pyetje nga autoritetet në fillim të tetorit.

Në një deklaratë të bërë publike sot, Xhaka ka pranuar se kishte siguruar një certifikatë vaksinimi dhe e ka cilësuar këtë si një gabim.

Ai ka thënë se në atë periudhë, për shkak të frikës dhe pasigurisë, kishte zgjedhur një rrugë të gabuar në vend që të kërkonte sqarime përmes kanaleve përkatëse. Xhaka është shprehur i penduar dhe ka thënë se do të bashkëpunojë plotësisht me autoritetet.

Çështja kishte nisur të bëhej publike ditë më parë, kur u raportua se Prokuroria e Lucernës po hetonte dyshimet për përdorim ose sigurim të një certifikate të falsifikuar. Autoritetet kanë theksuar se procedura synon të përcaktojë nëse ka pasur shkelje penale, ndërsa në fazat fillestare Xhaka dhe mjekja përkatëse konsideroheshin të pafajshëm deri në një vendim përfundimtar.

Sipas ekspertit të së drejtës penale të cituar nga “Blick”, falsifikimi i dokumenteve në Zvicër mund të dënohet me gjobë ose me burgim deri në pesë vjet. Megjithatë, kjo është vetëm masa maksimale e paraparë nga ligji dhe nuk nënkupton se Xhaka do të dënohet me pesë vjet burg. Dënimi eventual do të varej nga rrethanat dhe vendimi i autoriteteve gjyqësore.

Ndërkohë, Federata Zvicerane e Futbollit ka njoftuar se Xhaka nuk do të jetë pjesë e grumbullimit të ardhshëm të Kombëtares.

Federata ka bërë të ditur se vendimi është marrë pas një diskutimi mes Xhakës dhe drejtuesve të saj, me qëllim që situata të sqarohet dhe skuadra të fokusohet te ndeshjet e ardhshme.

Kombëtarja e Zvicrës po përgatitet në Belek të Turqisë për ndeshjet e Ligës së Kombeve, ndërsa pas përfundimit të kësaj periudhe federata ka paralajmëruar se do ta rishikojë situatën së bashku me Xhakën dhe do të diskutojë hapat e mëtejshëm.

Kapiteni zviceran, ndërkohë, pritet të paraqitet para autoriteteve të Lucernës në fillim të tetorit, kur do të merret në pyetje lidhur me këtë çështje.

Vedat Muriqi ka lënë gjurmë të forta në javën e fundit të futbollit turk, duke u përfshirë në formacionin më të mirë të javës pas një paraqitjeje spektakolare me Fenerbahçen.

Sulmuesi i Kosovës ishte protagonist absolut në fitoren e thellë 8-0 të Fenerbahçes ndaj Eyüpsporit, duke realizuar plot katër gola dhe duke udhëhequr skuadrën e tij drejt një triumfi bindës.

Paraqitja e jashtëzakonshme e Muriqit është vlerësuar maksimalisht edhe nga “SofaScore”, i cili i ka dhënë notën perfekte 10.0.

Interesant është fakti se Muriqi nuk ishte i vetmi futbollist në Superligën turke që mori këtë vlerësim. Notën 10.0 e regjistruan edhe portieri Fofana, Mohamed Salah i Trabzonsporit dhe Mason Greenwood, bashkëlojtar i Muriqit te Fenerbahçe.

Kështu, pas një jave të paharrueshme me fanellën e klubit, Muriqi tashmë është bashkuar me Kombëtaren e Kosovës.

Sulmuesi pritet të jetë një prej figurave kryesore të “Dardanëve” në ndeshjet e ardhshme të Ligës së Kombeve, ndërsa të hënën, Kosova do ta zhvillojë stërvitjen e parë në kuadër të përgatitjeve për katër përballjet e radhës.

Mesfushori Dion Kacuri ka treguar se vendimi për të përfaqësuar Kosovën ka qenë i natyrshëm dhe i marrë me zemër.

22-vjeçari është grumbulluar për herë të parë me “Dardanët” nga përzgjedhësi Franco Foda, për ndeshjet e Ligës së Kombeve. Kacuri iu bashkua Kosovës pasi më parë ishte kapiten i Zvicrës U21.

Pas mbërritjes në Prishtinë, ku sot kanë arritur edhe disa prej futbollistëve të tjerë të Kombëtares, Kacuri ka folur për zgjedhjen e tij.

“Ka qenë një vendim me zemër dhe ka qenë e lehtë për mua. Jam shumë i lumtur që mund të luaj për Kosovën. Provoj gjithnjë të jap maksimumin”, ka thënë Kacuri.

Mesfushori ka treguar se lidhja familjare me Kosovën ka qenë një prej arsyeve kryesore që zgjedhja e tij të ishte e lehtë.

“Ka qenë e lehtë sepse prindërit kanë lindur dhe janë rritur këtu. Familjen e kam këtu gjithashtu. Një ose dy herë në vit vijmë për pushime, prandaj ka qenë vendim me zemër”.

Ndërkohë, grumbullimi i Kosovës tashmë ka nisur. Në Prishtinë kanë mbërritur edhe Vedat Muriqi, Lumbardh Dellova, Milot Rashica dhe Ermal Krasniqi, të cilët janë mirëpritur nga drejtuesit e Federatës së Futbollit të Kosovës.

“Dardanët” do ta zhvillojnë sot stërvitjen e parë në kuadër të përgatitjeve për katër ndeshjet e Ligës së Kombeve, ndërsa seanca e parë nën drejtimin e Franco Fodës është paraparë të nisë nga ora 17:00.

Kacuri beson se Kosova ka një skuadër të fortë dhe synon rezultate pozitive në këtë cikël.

“Kemi një ekip të fortë, lojtarët luajnë në top klubet dhe shpresoj që të fitojmë secilën ndeshje. Të shohim”.

Kosova e nis aventurën në Ligën e Kombeve këtë të enjte në stadiumin “Fadil Vokrri”, ku përballë do të ketë Irlandën.

Kanë dalë në shitje biletat për ndeshjen mes Kosovës dhe Irlandës, e cila zhvillohet më 24 shtator 2026, në stadiumin “Fadil Vokrri” në Prishtinë.

Takimi, në kuadër të Ligës së Kombeve, nis në ora 20:45, ndërsa tifozët tashmë mund t’i blejnë biletat online.

Çmimet janë të ndara sipas sektorëve të stadiumit: Veriu dhe Jugu kushtojnë 20 euro, Lindja 30 euro, ndërsa Perëndimi 50 euro. Për sektorin VIP, bileta kushton 150 euro.

Biletat mund të blihen online në platformën zyrtare të shitjes së biletave.

Biletat kanë çmime më të larta se në ndeshjet e kaluara. Në tribunat e veriut dhe të jugut, biletat tani kushtojnë 20 euro, ndërsa më herët kishin çmimin prej 10 eurosh.

Në tribunën e lindjes, bileta më herët kushtonte 20 euro, ndërsa tani çmimi është 30 euro. Ndërkaq, në tribunën e perëndimit, bileta do të kushtojë 50 euro, krahasuar me 30 euro sa kushtonte më parë.

Biletat VIP kanë çmimin prej 150 eurosh, që është 50 euro më shumë se në ndeshjet e kaluara.

Kosova i luan dy ndeshje në shtëpi dhe dy si mysafir në shtator dhe janar.

Përfaqësuesja e Izraelit ka bërë publike listën e futbollistëve të grumbulluar për katër ndeshjet e radhës në Ligën e Kombeve, ku njëra prej sfidave më të rëndësishme do të jetë ajo ndaj Kosovës.

Përzgjedhësi Ran Ben Shimon ka përfshirë 27 futbollistë në listën e tij, me Kosovën që do ta ketë përballë më 1 tetor në Debrecen të Hungarisë.

Izraeli do ta hapë këtë seri ndeshjesh më 24 shtator, me duelin ndaj Austrisë në Linz. Më 27 shtator, izraelitët do të përballen me Irlandën në Debrecen, ndërsa katër ditë më vonë, po në qytetin hungarez, do të jetë radha e përballjes me Kosovën. Serinë e ndeshjeve do ta mbyllin më 4 tetor, sërish ndaj Irlandës, por këtë herë në Baçka Topola të Serbisë.

Në listën e Ben Shimonit janë përfshirë emrat kryesorë të futbollit izraelit. Mes tyre spikasin portierët Daniel Peretz dhe Omri Glazer, mbrojtësi Eli Dasa, si dhe futbollistët Oscar Gloukh, Gabi Kanikovski, Dor Peretz, Manor Solomon, Dor Turgeman, Tai Baribo, Yarden Shua dhe Liel Abada.

Në grumbullim ka edhe risi. Një prej tyre është 18-vjeçari Noam Shteifman, mbrojtës i Maccabi Haifës, i cili për herë të parë është përfshirë në këtë grup të lojtarëve. Ndërkohë, në skuadër është rikthyer edhe Ilay Feingold.

Lista e plotë e Izraelit

Portierë: Daniel Peretz, Omri Glazer, Asaf Tzur.

Mbrojtës: Eli Dasa, Guy Mizrahi, Roy Revivo, Anan Khalaili, Idan Nachmias, Ilay Feingold, Raz Shlomo, Nikita Stoinov, Noam Shteifman.

Mesfushorë dhe sulmues: Yarin Levi, Eliel Peretz, Oscar Gloukh, Gabi Kanikovski, Dor Peretz, Omri Gandelman, Eitan Azoulay, Mohamed Abu Fani, Manor Solomon, Dor Turgeman, Idan Toklomati, Tai Baribo, Sa’id Abu Farhi, Yarden Shua, Liel Abada.

E ardhmja e Alexis Mac Allister te Liverpooli ka qenë në qendër të disa spekulimeve ditët e fundit, por babai i mesfushorit argjentinas ka dalë për t’i qartësuar gjërat.

Carlos Mac Allister ka bërë të ditur se familja e lojtarit nuk po ushtron asnjë presion ndaj klubit anglez për një kontratë të re. Mac Allister aktualisht ka marrëveshje me Liverpoolin deri në vitin 2028.

Sipas babait të tij, deri tani nuk ka pasur kontakte nga drejtuesit e klubit për një rinovim të kontratës.

“Askush nga drejtuesit e Liverpoolit nuk na ka kontaktuar ende për rinovimin. Ne kemi një kontratë që është ende në fuqi dhe jemi të përkushtuar ndaj saj me Liverpoolin.”

Carlos shtoi se Liverpooli është plotësisht në të drejtën e tij nëse vendos të mos i ofrojë menjëherë një marrëveshje të re djalit të tij.

“Nëse klubi nuk ofron rinovim të kontratës, kjo është e drejta e tyre.”

Ndërkohë, ai ka mohuar edhe një tjetër raportim që e lidhte Mac Allister me një transferim te Real Madridi.

“Askush nga Real Madridi nuk na ka kontaktuar në asnjë moment gjatë gjithë karrierës së Alexis”, deklaroi ai.

Në fushë, argjentinasi po kalon një moment pozitiv. Mesfushori ka realizuar dy gola në dy ndeshjet e fundit në të cilat ka qenë titullar.

Mac Allister pritet të jetë sërish në dispozicion për Liverpoolin në sfidën e radhës ndaj Bournemouthit në ‘Anfield’.

Për momentin, kontrata deri në vitin 2028 e mban të lidhur argjentinasin me Liverpoolin, ndërsa çdo vendim për të ardhmen e tij duket se do të merret në tavolinën e drejtuesve të klubit.

Superkupa e Spanjës për vitin 2027 do të zhvillohet në një tjetër destinacion spektakolar.

Stambolli i Turqisë është përzgjedhur si nikoqir i turneut, ndërsa katër skuadra të mëdha të futbollit spanjoll do të zbresin në fushë për trofeun.

Në edicionin e vitit 2027 do të marrin pjesë Barcelona, Real Madridi, Atletico Madridi dhe Real Sociedad.

Ndeshjet do të zhvillohen në stadiumin olimpik “Ataturk”, ndërsa turneu është planifikuar në fillim të muajit shkurt.

Gjysmëfinalja e parë do të luhet më 2 shkurt, ku Real Sociedad do të përballet me Real Madridin. Po atë ditë, në gjysmëfinalen tjetër, Barcelona do të sfidojë Atletico Madridin.

Finalja e madhe është programuar për 7 shkurt, ku dy fituesit do të përballen për trofeun e Superkupës.

Barcelona hyn në këtë garë me synimin për të vazhduar dominimin, pasi ka fituar dy edicionet e fundit.

Por përveç trofeut, në Stamboll do të jetë në lojë edhe një shumë e konsiderueshme parash.

Sipas raportimeve, katër klubet pjesëmarrëse do të ndajnë mes tyre 40 milionë euro, në bazë të marrëveshjes së turneut.

Stambolli u përzgjodh pasi Arabia Saudite, e cila ka organizuar edicionet e fundit, do të ketë një tjetër angazhim të madh sportiv në atë periudhë.

Superkupa pritet të transmetohet në më shumë se 150 vende të botës, duke e kthyer turneun në një spektakël të madh ndërkombëtar.

Katër skuadra, dy gjysmëfinale dhe vetëm një trofe. Stambolli po bëhet gati për Superkupën e Spanjës 2027!

Përzgjedhësi i Kosovës, Franco Foda, ka reaguar pas vendimit të kapitenit Amir Rrahmani për t’u tërhequr nga Kombëtarja, duke mohuar mundësinë që ky vendim të pasohet edhe nga futbollistë të tjerë.

Foda ka bërë të ditur se Rrahmani e ka njoftuar personalisht për vendimin e tij, i cili erdhi pas zhvillimeve të fundit në Federatën e Futbollit të Kosovës.

“Gjithçka është shumë emocionale në Kosovë. Fakti është se Amir Rrahmani ka dhënë dorëheqjen. Ai më informoi personalisht për këtë”, ka deklaruar Foda për CANAL+.

Megjithatë, tekniku gjerman insiston se pjesa tjetër e futbollistëve do t’i përgjigjet ftesës së Kombëtares.

“Të gjithë lojtarët që janë në formë dhe që do t’i ftoj, do të jenë të hënën aty dhe do të përgatiten me mua për ndeshjet”, ka shtuar ai.

Foda ka mohuar gjithashtu raportimet për një bojkot të mundshëm nga futbollistë të tjerë.

“Ka shumë dramë që po ekzagjerohet. Ideja se edhe më shumë lojtarë duan të bojkotojnë ekipin kombëtar nuk është e vërtetë”, ka theksuar përzgjedhësi i Kosovës.

Deklaratat e Fodës u raportuan të enjten nga mediumi austriak “Laola1”, ndërsa Kombëtarja e Kosovës pritet të nisë të hënën përgatitjet për ndeshjet e radhës.

Rrahmani, i cili ka 66 paraqitje dhe shtatë gola me Kosovën, e mbajti shiritin e kapitenit për rreth shtatë vjet, para se të njoftonte për tërheqjen e tij nga Kombëtarja.

Kombëtarja e Irlandës ka publikuar listën e futbollistëve të grumbulluar për ndeshjet e ardhshme në Ligën e Kombeve, ku është përfshirë edhe Rocco Vata, djali i ish-kapitenit të Kombëtares së Shqipërisë, Rudi Vata.

Irlanda do ta nisë këtë cikël pikërisht ndaj Kosovës. “Dardanët” do ta presin Kombëtaren irlandeze më 24 shtator, në ndeshjen hapëse të Grupit B3.

Vëmendja e tifozëve shqiptarë do të jetë te Rocco Vata, i cili është pjesë e listës së përzgjedhësit të Irlandës, Heimir Hallgrimsson.

Sulmuesi 20-vjeçar është djali i Rudi Vatës, ish-futbollistit dhe kapitenit të Kombëtares shqiptare.

Pas përballjes me Kosovën, Irlanda do të luajë ndaj Izraelit më 27 shtator, ndërsa më 1 tetor do të përballet me Austrinë. Cikli i parë i ndeshjeve do të mbyllet më 4 tetor, me një tjetër sfidë ndaj Izraelit.

Ndërkohë, Kosova pas ndeshjes me Irlandën do të përballet me Austrinë më 27 shtator, Izraelin më 1 tetor dhe sërish Austrinë më 4 tetor.

Të shohësh nga afër natën e kampionëve të rinj të NBA-së nuk do të jetë aspak e lirë.

Një biletë për ndeshjen hapëse të sezonit të ri mes Kampionit në fuqi Neë York Knicks dhe Philadelphia 76ers po shitet në tregun e rishitjes me një çmim mesatar prej rreth 2 mijë e 560 dollarësh.

Bëhet fjalë për ndeshjen që do të zhvillohet më 20 tetor në Madison Square Garden, në startin e sezonit të ri të NBA-së.

Kjo nuk do të jetë një mbrëmje e zakonshme për Knicks.

Pas triumfit në sezonin e kaluar, ekipi i New Yorkut do ta nisë mbrojtjen e titullit para tifozëve të vet, me ngritjen e flamurit të kampionatit në tavanin e Madison Square Garden, si dhe me ceremoninë e dorëzimit të unazave të kampionëve.

Knicks e fituan titullin e NBA-së për herë të parë pas 53 vjetësh, duke i dhënë kësaj nate një rëndësi të veçantë për tifozët e skuadrës.

Përballë do të jetë Philadelphia 76ers, ndërsa kjo ndeshje do të shënojë edhe debutimin e LeBron James me fanellën e Philadelphia-s në sezonin e ri.

Sezoni 2026/27 i NBA-së nis zyrtarisht më 20 tetor, me një program të trefishtë në natën hapëse.

Përveç Knicks dhe 76ers, në aksion do të jenë edhe Boston Celtics ndaj Detroit Pistons, si dhe Oklahoma City Thunder kundër San Antonio Spurs.

Ndërkohë, për ata që duan ta përjetojnë nga afër ceremoninë në New York, çmimi i biletës tregon se festa e kampionëve këtë vit do të ketë një kosto shumë të lartë.