Author: N.T.

Kombëtarja A e Kosovës në hendboll për femra ka nisur përgatitjet për sfidat e ardhshme ndërkombëtare. “Dardanet” janë grumbulluar të mërkurën për kampin përgatitor, ndërsa stërvitja e parë është zhvilluar në mbrëmje në palestrën sportive në Lipjan.

Seanca e parë është drejtuar nga përzgjedhësi i ri, Nenad Shoshtariq, i cili për herë të parë ka pasur në dispozicion grupin e plotë të lojtareve më të mira të Kombëtares A.

Në stërvitjen e parë, fokusi ishte te përgatitja dhe puna në elemente të ndryshme të lojës, ndërsa trajneri Shoshtariq ka nisur gradualisht të zbatojë idetë dhe sistemin që synon ta aplikojë me përfaqësuesen e Kosovës.

Atmosfera gjatë seancës së parë ishte pozitive dhe puna u zhvillua me intensitet të mirë. Lojtaret iu përgjigjën kërkesave të përzgjedhësit, duke dhënë maksimumin në këtë fazë të parë të përgatitjeve.

Kampi do të vazhdojë edhe gjatë ditëve në vijim. Të enjten janë të planifikuara dy seanca stërvitore, ndërsa grumbullimi do të zgjasë deri në fundjavë.

Përfaqësuesja e Kosovës po përgatitet për një sfidë të rëndësishme që e pret muajin e ardhshëm. “Dardanet” do të përballen me Estoninë në dy ndeshje, në kuadër të raundit të parë kualifikues për Kampionatin Botëror të vitit 2027.

Këto përballje do të jenë ndër testet e para të rëndësishme për Shoshtariqin në krye të Kombëtares së Kosovës dhe një mundësi për ekipin që të tregojë rezultatet e punës së nisur gjatë këtij kampi.

Atmosfera para ndeshjes Kosovë–Irlandë po merr gjithnjë e më shumë emocione. Tifogrupi zyrtar i Kosovës, “Dardanët”, u ka bërë thirrje të gjithë tifozëve që sonte të jenë të pranishëm dhe ta mbështesin përfaqësuesen gjatë 90 minutave në stadiumin “Fadil Vokrri”.

Përmes një postimi në rrjetet sociale, tifogrupi ka kërkuar mobilizim maksimal për sfidën e Ligës së Kombeve, duke vënë theksin edhe te rëndësia që ka rezultati dhe pozita e Kosovës në grup.

Sipas “Dardanëve”, një klasifikim sa më i mirë do t’i mundësonte Kosovës të sigurojë vendin në vazon e dytë për kualifikimet e rregullta, të cilat nisin në mars të vitit 2027.

“Dita e ndeshjes. Klasifikimi i mirë në grup na garanton vazon e dytë për kualifikimet e rregullta që nisin në mars 2027”, thuhet në mesazhin e tifogrupit.

Përveç rëndësisë sportive të sfidës, “Dardanët” kanë paralajmëruar edhe një atmosferë të veçantë në kryeqytet. Ata kanë bërë të ditur se janë marrë të gjitha masat që stadiumi “Fadil Vokrri” të jetë sonte në nivelin më të lartë dhe që përfaqësuesja ta ketë përkrahjen e fuqishme të tifozëve.

“Si ‘Dardanë’ kemi marrë të gjitha masat që sonte të jetë festë e vërtetë në ‘Fadil Vokrri’”, kanë shkruar ata.

Kosova dhe Irlanda do të përballen sonte nga ora 20:45, në ndeshjen që shënon startin e “Dardanëve” në këtë edicion të Ligës së Kombeve.

Me tribunat që pritet të jenë të mbushura dhe me tifozët të gatshëm për të krijuar atmosferë, mesazhi i “Dardanëve” është i qartë: përkrahja nuk duhet të mungojë nga minuta e parë deri në fund.

Dhe në fund, thirrja që pritet të jehojë fuqishëm në “Fadil Vokrri” mbetet ajo tradicionale: Hajde Kosovë!

Një ditë para përballjes mes Kosovës dhe Republikës së Irlandës në Ligën e Kombeve, presidenti i Federatës së Futbollit të Kosovës, Agim Ademi, ka pritur në një darkë zyrtare homologun e tij irlandez, Paul Cooke.

Në këtë takim ishte i pranishëm edhe delegati i UEFA-s për ndeshjen, Andrey Medintstev, ndërsa në fokus të bisedimeve ishte bashkëpunimi mes dy federatave dhe zhvillimi i futbollit.

Ademi ka bërë të ditur se gjatë darkës i ka uruar mirëseardhje presidentit Cooke dhe delegacionit irlandez, duke theksuar rëndësinë e mikpritjes dhe respektit të ndërsjellë, vlera që, sipas tij, futbolli duhet t’i përcjellë edhe jashtë fushës.

“Një ditë para ndeshjes Kosovë–Irlandë në kuadër të Ligës së Kombeve, pata kënaqësinë të shtroj darkën tradicionale për delegacionin e Federatës së Futbollit të Irlandës, të kryesuar nga presidenti Paul Cooke, si dhe për delegatin e ndeshjes nga UEFA, Andrey Medintstev”, ka shkruar Ademi.

Sipas presidentit të FFK-së, gjatë takimit është diskutuar për zhvillimin e futbollit në të dyja vendet, si dhe për rëndësinë e bashkëpunimit ndërmjet federatave anëtare të UEFA-s.

Në bisedë, presidenti irlandez Paul Cooke e ka përgëzuar Ademin për progresin dhe rezultatet e arritura nga futbolli kosovar në vitet e fundit, veçanërisht pas anëtarësimit të Kosovës në UEFA dhe FIFA.

Takimi është mbyllur me shkëmbimin e dhuratave simbolike mes dy federatave, në shenjë respekti dhe miqësie.

Në fund, Ademi ka uruar që përballja e Kosovës me Irlandën të zhvillohet në një atmosferë sportive, me respekt dhe korrektësi, duke shpresuar që ndeshja në “Fadil Vokrri” të jetë një spektakël i vërtetë për tifozët.

Kosova dhe Irlanda përballen sonte në Prishtinë, në kuadër të Ligës së Kombeve.

Kombëtarja e Kosovës rikthehet sonte në fushë për të nisur një tjetër kapitull në Ligën e Kombeve. “Dardanët” do ta zhvillojnë ndeshjen e parë në Ligën B përballë Republikës së Irlandës, në stadiumin “Fadil Vokrri”, me fillim nga ora 20:45.

Prishtina pritet të jetë e mbushur për këtë sfidë, ndërsa Kosova kërkon ta nisë ciklin e ri me rezultat pozitiv dhe tri pikë. Përballë do të jetë një përfaqësuese irlandeze që vjen me ambicie të qarta dhe me një seri pozitive në këtë garë. Irlanda ka triumfuar në dy ndeshjet e fundit të Ligës së Kombeve dhe sonte synon ta regjistrojë fitoren e tretë radhazi.

Kjo sfidë do të jetë njëkohësisht përballja e parë zyrtare mes Kosovës dhe Irlandës, duke i dhënë edhe më shumë rëndësi këtij dueli.

Në anën tjetër, “Dardanët” llogarisin shumë në avantazhin e shtëpisë. Kosova ka humbur vetëm një nga nëntë ndeshjet e fundit zyrtare në shtëpi ndaj përfaqësueseve evropiane, ndërsa në shtatë takimet e fundit zyrtare të zhvilluara në Prishtinë ka pranuar vetëm tri gola.

Megjithatë, trajneri Franco Foda do të duhet të bëjë llogaritë edhe me disa mungesa. Amir Rrahmani dhe Florent Hadërgjonaj nuk janë më pjesë e përfaqësueses, ndërsa Florent Muslija dhe Elvis Rexhbeçaj mungojnë për shkak të lëndimeve. Këto hapësira u kanë dhënë mundësinë disa lojtarëve të rinj për të marrë pjesë në këtë cikël, mes tyre Erblin Osmani, Dion Kaçuri dhe Milot Avdyli.

Një prej pikave kryesore të Kosovës pritet të jetë sërish Vedat Muriqi. Sulmuesi “dardan” mbetet një nga emrat më të rrezikshëm në këtë kompeticion dhe me 13 gola është ndër golashënuesit më të mirë në historinë e Ligës së Kombeve.

Edhe Irlanda ka problemet e veta. Përzgjedhësi Heimir Hallgrimsson nuk do të ketë në dispozicion katër lojtarë, ndërsa mungesat e Seamus Coleman dhe Nathan Collins janë ndër më të rëndësishmet.

Me stadiumin “Fadil Vokrri” që pritet të jetë i mbushur, Kosova është gati për një tjetër sfidë ndërkombëtare. Përballë është Irlanda, ndërsa çdo pikë mund të ketë rëndësi në një grup ku bën pjesë edhe Austria.

Tashmë gjithçka është gati. Në orën 20:45, topi kalon në fushë dhe “Dardanët” nisin misionin e tyre të ri në Ligën e Kombeve.

Përzgjedhësi i Kosovës, Franco Foda, ka konfirmuar se objektivi i “Dardanëve” në ndeshjen e parë të Ligës së Kombeve ndaj Irlandës është fitorja.

Kosova do të përballet me Irlandën të enjten nga ora 20:45 në stadiumin “Fadil Vokrri”, ndërsa Foda ka bërë të ditur se dy lojtarë, Florent Muslija dhe Elvis Rexhbeçaj, nuk do të jenë në dispozicion për shkak të lëndimeve.

“Mund të ketë ndonjë ndryshim eventual pasi Muslija mungon shkaku i lëndimit, njësoj si Rexhbeçaj. Kemi 27 lojtarë të ftuar dhe në dispozicion. Në futboll ndodh të ketë lëndime dhe mungesa. Këto mungesa mund të jenë një mundësi për lojtarët e rinj që duhet ta tregojnë veten dhe t’i dëshmojnë aftësitë e tyre.”

Foda ka vlerësuar edhe talentin e Bayern Munichut, Erblin Osmani, i cili është grumbulluar për herë të parë me përfaqësuesen A të Kosovës.

“Erblin Osmani ka treguar veten shumë mirë në ushtrime dhe ka dëshmuar pse e kemi ftuar në Kombëtare. Ka treguar aftësi të jashtëzakonshme teknike. Për moshën që e ka është shumë i fuqishëm fizikisht. Në seancat stërvitore e ka treguar veten shumë mirë.”

Foda ka konfirmuar gjithashtu se Osmani dhe Dion Kaçuri kanë marrë aprovimin e FIFA-s për të përfaqësuar Kosovën. Ndërkohë, mbetet e hapur mundësia që njëri prej lojtarëve të rinj të debutojë ndaj Irlandës.

“Do të shihet nesër”, u përgjigj Foda kur u pyet nëse Osmani, Kaçuri apo Milot Avdyli do të marrin minuta.

Përzgjedhësi gjerman foli edhe për Fisnik Asllanin, për të cilin tha se është në formë të mirë dhe se pret ta shohë në fushë.

“Fisnik Asllani është në top-formë dhe njëkohësisht e ka treguar veten shumë mirë në ushtrime. E dimë që në ekipin e tij ka pasur pak minuta në dispozicion. Por besoj që Fisnik Asllani do të dalë në fushë.”

Në prag të ndeshjes është konfirmuar edhe kapiteni i ri i Kosovës. Vedat Muriqi do ta mbajë shiritin, ndërsa Mërgim Vojvoda do të jetë zëvendëskapiten.

Kapiteni i Kombëtares do të jetë Vedat Muriqi. E kemi diskutuar këtë edhe me lojtarët. I dyti do të jetë Mërgim Vojvoda.”

Sa i përket sfidës me Irlandën, Foda ka thënë se Kosova e njeh mirë kundërshtarin, por avantazh e konsideron faktin që ndeshja zhvillohet në shtëpi.

“Sigurisht se i njohim kualitetet dhe cilësitë e Irlandës. E dimë se si ka luajtur në ndeshjet e fundit. Ne i kemi analizuar me shumë vëmendje të gjitha ndeshjet. Avantazhi është se luajmë në shtëpi.”

Foda ka theksuar se Kosova dëshiron t’i fitojë ndeshjet, edhe pse pranon se gjatë lojës mund të ketë skenarë të ndryshëm.

“Dëshirojmë t’i fitojmë të gjitha ndeshjet, por nesër do të shihet se si do të shkojë loja. Ndoshta mund të pajtohemi edhe me barazim. Por qëllimi është të fitojmë.”

Kosova bën pjesë në Grupin 3 të Ligës B së bashku me Irlandën, Austrinë dhe Izraelin. Pas ndeshjes me irlandezët, “Dardanët” do të përballen me Austrinë më 27 shtator, Izraelin më 1 tetor dhe sërish Austrinë më 4 tetor.

Foda ka bërë të qartë se objektivi i parë është mbetja në Ligën B, ndërsa më pas synohet ngritja nëse rezultatet dhe paraqitjet e lejojnë.

“Na presin lojë të vështira dhe dihet që në këtë grup Austria është favorite. Ne si Kombëtare kemi shumë qëllime të larta. Në radhë të parë dëshirojmë të mbesim në Ligën B. Pastaj, nëse paraqitemi mirë, të vazhdojmë dhe të ngrihemi”, përfundoi Foda

Boksierja kosovare Donjeta Sadiku ka siguruar medalje në Kampionatin Evropian, pasi ka triumfuar bindshëm në çerekfinale.

Sadiku ishte përballë holandezes Maud van der Toorn, ndaj së cilës shënoi fitore të pastër 5:0, duke siguruar kështu kalimin në gjysmëfinale dhe medaljen evropiane në kategorinë deri në 60 kilogramë.

Por rrugëtimi i saj nuk ndalet këtu. Për një vend në finale, Sadiku do të përballet me rusen Kristina Kuluhova, e cila garon për Serbinë.

Kjo do të jetë një tjetër përballje mes dy boksierëve që tashmë njihen mirë. Sadiku e kishte mposhtur Kuluhovën edhe në finalen e Lojërave Mesdhetare “Taranto 2026”.

Tani, boksierja kosovare do të kërkojë ta përsërisë suksesin dhe të sigurojë një tjetër fitore ndaj Kuluhovës, që do ta dërgonte në finalen e Kampionatit Evropian dhe do ta mbante në garë për medaljen e artë.

Sadiku tashmë e ka të garantuar medaljen, ndërsa synimi i radhës është finalja.

Sulmuesi i Kombëtares së Shqipërisë, Mirlind Daku, ka folur sot, të mërkurën, në konferencën zyrtare për media të mbajtur në “Shtëpinë e Futbollit”, ku ka komentuar grumbullimin e kuqezinjve, konkurrencën në repartin ofensiv dhe objektivat e skuadrës.

Daku u shpreh i lumtur që është pjesë e Kombëtares, duke theksuar se është gjithmonë një nder të përfaqësosh Shqipërinë. Sulmuesi kuqezi tha se synon të japë maksimumin nëse i jepet mundësia për të luajtur, ndërsa objektivi kryesor i skuadrës mbetet fitimi i ndeshjeve dhe sigurimi i vendit të parë në grup.

“Si gjithmonë, është nder të jesh pjesë e Kombëtares. Për këto arsye ftohemi edhe ne sulmuesit, për të shënuar gola dhe shpresoj që ta vazhdoj këtë cikël të ri. Të shënojmë gola, por më e rëndësishmja është të fitojmë dhe t’i kalojmë sa më mirë këto katër ndeshje”, u shpreh Daku.

Sa i përket konkurrencës në sulm, 27-vjeçari e konsideron atë pozitive për skuadrën. Ai vlerësoi paraqitjet e lojtarëve të tjerë ofensivë, duke theksuar se një konkurrencë e shëndetshme ndihmon Kombëtaren të ketë në dispozicion futbollistë në formën e tyre më të mirë.

“Është mirë kur ka konkurrencë brenda skuadrës. Edhe çunat që kanë ardhur vijnë pas një fillimi shumë të mirë të sezonit, kanë shënuar gola dhe kjo është gjë e mirë. Na duhet të kemi lojtarë që janë në momentin e tyre. Unë do të pres momentin tim dhe, nëse do të më jepet mundësia, do të jap më të mirën”, deklaroi sulmuesi.

Daku u ndal edhe te objektivat e Kombëtares, duke lidhur synimin për vendin e parë në grup me rrugëtimin drejt Euro 2028. Sipas tij, kuqezinjtë duhet të fokusohen maksimalisht te ndeshjet e ardhshme, të cilat i konsideron tepër të rëndësishme.

“Vetë fakti që ne synojmë vendin e parë flet për Euro 2028. Rruga në Nations League na çon drejt Euro 2028. Për ne objektivi kryesor është të jemi të parët dhe të vazhdojmë ato dy ndeshje që janë si finale”, tha Daku.

Sulmuesi shqiptar gjithashtu bëri të ditur se është në gjendje të mirë fizike dhe 100 për qind i gatshëm për të dhënë kontributin e tij për Kombëtaren. Ai sqaroi se mungesa e aktivizimit me ekipin e ri nuk ka ardhur për shkak të ndonjë dëmtimi, por është vendim i trajnerit.

“Unë jam 100% i gatshëm për Kombëtaren, kam qenë gjithmonë. Me ekipin e ri nuk kam luajtur, por nuk vij pas ndonjë dëmtimi. Është zgjedhja e trajnerit për të vazhduar me lojtarët që ka pasur”, u shpreh ai.

Në fund, Daku foli edhe për përshtypjet e para nga trajneri Maran, duke vlerësuar mënyrën se si po përfshihen të gjithë lojtarët në skuadër. Sipas tij, secili futbollist po e ndjen rëndësinë që ka brenda grupit.

“Tani po ndjejmë se secili lojtar ka rëndësinë e vet në skuadër dhe kjo më ka bërë të ndihem mirë. Për të tjerat, presim ndeshjet”, përfundoi Mirlind Daku.

Kombëtarja shqiptare synon të shfrytëzojë ndeshjet e radhës për të avancuar drejt objektivave të saj, me vendin e parë në grup si një prej synimeve kryesore.

Federata Irlandeze e Futbollit u ka drejtuar një sërë këshillash tifozëve të saj që do të udhëtojnë në Prishtinë për përballjen me Kosovën.

Në njoftimin e publikuar një ditë para ndeshjes në “Fadil Vokrri”, Prishtina dhe Kosova përshkruhen si destinacione të sigurta dhe mikpritëse për tifozët mysafirë. Megjithatë, federata ka kërkuar nga ta që të tregohen të kujdesshëm, sidomos në zonat me frekuentim të madh.

“Prishtina në përgjithësi konsiderohet qytet i sigurt dhe mikpritës për tifozët mysafirë. Si në çdo ngjarje të madhe sportive, tifozët këshillohen të tregohen të kujdesshëm me gjërat e tyre personale në zona me shumë njerëz”, thuhet në njoftim.

Vëmendje e veçantë i është kushtuar edhe flamujve që tifozët irlandezë mund të shfaqin gjatë qëndrimit në kryeqytet.u

“Flamuri i Kosovës dhe i vendit motër, Shqipërisë, është shumë i spikatur në Prishtinë. Këshillohet të mos shfaqen flamuj të tjerë të rajonit, aktualë ose të kaluar”, thuhet më tej.

Kosova dhe Irlanda përballen të enjten në stadiumin “Fadil Vokrri”, nga ora 20:45, në kuadër të Ligës së Kombeve. Ndeshja pritet të sjellë në Prishtinë edhe një numër të konsiderueshëm të tifozëve irlandezë.

Pas kësaj sfide, Dardanët do të përballen në udhëtim me Austrinë në Vjenë dhe Izraelin në Debrecen, para se të rikthehen në Prishtinë për ndeshjen e radhës ndaj Austrisë.

Përzgjedhësi i Irlandës, Heimir Hallgrimson, dhe mbrojtësi Dara O’Shea kanë folur në konferencën për media para përballjes me Kosovën në stadiumin “Fadil Vokrri”, në kuadër të Ligës së Kombeve.

Hallgrimson ka vlerësuar lart zhvillimin e Kosovës ndër vite, duke theksuar se nga vendi i 190-të në renditjen e FIFA-s në vitin 2016, tash është ngjitur në vendin e 78-të.

“Është një rritje e jashtëzakonshme. Shumë mirë për federatën këtu për mënyrën se si i kanë zhvilluar lojtarët e tyre”, ka thënë ai.

Trajneri irlandez e ka cilësuar Kosovën si kundërshtar të vështirë dhe ka pranuar se edhe një barazim do ta kënaqte.

“Padyshim që do të jetë një ndeshje e vështirë. I kemi analizuar mirë dhe i kemi shqyrtuar pikat e tyre të forta, të cilat i kanë shumë. Do të ishim të lumtur edhe me një barazim”, është shprehur Hallgrimson.

Ai veçoi Vedat Muriqin si një nga lojtarët që Irlanda duhet ta ketë nën vëmendje, duke përmendur edhe Fisnik Asllanin dhe lojtarët kosovarë që aktivizohen në klube të mëdha evropiane.

Ndërkohë, O’Shea foli për zhurmën e krijuar gjatë javës, duke thënë se lojtarët janë munduar të qëndrojnë të bashkuar dhe larg rrjeteve sociale.

“Ka pasur shumë zhurmë këtë javë. Jemi përpjekur të qëndrojmë larg rrjeteve sociale dhe të qëndrojmë të bashkuar. Kemi një ndeshje të madhe nesër dhe ky ka qenë fokusi ynë. Kosova ka qenë një skuadër e shkëlqyer dhe jemi të përgatitur”, ka deklaruar O’Shea.

Kosova dhe Irlanda përballen të enjten nga ora 20:45 në “Fadil Vokrri”.

Real Madridi ka konfirmuar shkallën e dëmtimit të Federico Valverdes, i cili u lëndua gjatë derbit të humbur 2-1 ndaj Atletico Madridit.

Klubi madrilen ka publikuar raportin mjekësor për mesfushorin uruguaian, duke bërë të ditur se ai ka pësuar ndrydhje të shkallës së tretë në kyçin e këmbës së majtë.

“Pas testeve të kryera sot ndaj lojtarit tonë Fede Valverde nga Shërbimet Mjekësore të Real Madridit, ai është diagnostikuar me një ndrydhje të shkallës së tretë në kyçin e këmbës së majtë. Evolucioni i tij do të monitorohet”, thuhet në njoftimin e klubit.

Valverde u detyrua të largohej nga fusha gjatë pjesës së dytë të derbit, pas një ndërhyrjeje të fortë nga Kang-in Lee. Ekzaminimet e kryera më pas konfirmuan shkallën e dëmtimit.

Sipas vlerësimeve të para, 27-vjeçari pritet të mungojë rreth dy deri në tri javë, megjithëse koha e rikuperimit do të varet nga mënyra se si do të evoluojë lëndimi.

Pushimi i ardhshëm ndërkombëtar mund t’i japë Valverdes kohën e nevojshme për rikuperim, me synimin për t’u kthyer sa më shpejt në dispozicion të trajnerit.

Mungesa e uruguaianit është një goditje për Real Madridin, duke marrë parasysh rëndësinë e tij në mesfushë dhe kontributin që jep në të dyja fazat e lojës.