Author: N.T.

Një ditë para publikimit të listës zyrtare të Kosovës, Amedspor ka konfirmuar ftesat e dy futbollistëve kosovarë për ndeshjet e ardhshme të përfaqësueses në Ligën e Kombeve.

Klubi turk ka bërë të ditur se Lumbardh Dellova dhe Ermal Krasniqi janë grumbulluar nga Kosova, duke i përfshirë të dy në listën e lojtarëve të Amedspor që do t’u bashkohen përfaqësueseve të tyre.

“Urojmë suksese për lojtarët tanë të ftuar në përfaqësueset kombëtare”, ka shkruar klubi turk në njoftimin e tij.

Konfirmimi nga Amedspor vjen një ditë para se Federata e Futbollit të Kosovës të publikojë listën zyrtare të futbollistëve të ftuar nga përzgjedhësi Franco Foda.

Dellova dhe Krasniqi pritet t’i bashkohen Kosovës për një seri prej katër ndeshjesh, të cilat “Dardanët” do t’i zhvillojnë brenda vetëm dhjetë ditësh.

Kosova do ta nisë këtë cikël më 24 shtator, në Prishtinë, ndaj Irlandës.

Më 27 shtator, “Dardanët” do të udhëtojnë në Austri, ndërsa më 1 tetor do të përballen me Izraelin në Hungari.

Cikli i parë i ndeshjeve do të mbyllet më 4 tetor në Prishtinë, sërish ndaj Austrisë.

Dellova dhe Krasniqi, nëse konfirmohen edhe në listën zyrtare të FFK-së, do të jenë kështu pjesë e skuadrës së Franco Fodës për këto katër përballje të Ligës së Kombeve.

Topi i Artë 2026 pritet të jetë një nga edicionet më të luftuara të viteve të fundit. Ceremonia do të zhvillohet më 26 tetor në Londër dhe do të shënojë 70-vjetorin e këtij çmimi prestigjioz.

Votimi do të përfshijë të gjithë sezonin, nga gushti i vitit 2025 deri më 19 korrik 2026, duke përfshirë edhe performancat në Kupën e Botës.

Sipas rregullores, kriteri kryesor është paraqitja individuale e futbollistit, ndërsa më pas vlerësohen sukseset kolektive dhe trofetë, si dhe klasa dhe loja e pastër sportive. Pra, fitimi i një trofeu madhor nuk garanton automatikisht Topin e Artë.

Në garë spikasin disa emra të mëdhenj.

Kylian Mbappe realizoi 25 gola në La Liga, fitoi Pichichin, ndërsa në Ligën e Kampionëve shënoi 15 gola. Në Kupën e Botës, francezi realizoi plot 10 herë dhe fitoi Këpucën e Artë të turneut.

Harry Kane pati një sezon spektakolar me Bayern Munichun, duke shënuar 61 gola në 51 ndeshje. Ai realizoi 36 gola në Bundesliga dhe fitoi Këpucën e Artë evropiane.

Lamine Yamal, ndërkohë, kombinoi statistikat personale me sukseset e skuadrës. Talenti i Barcelonës shënoi 16 gola dhe dhuroi 12 asistime në La Liga, ndërsa Barcelona fitoi kampionatin dhe Spanja triumfoi në Botëror.

Në garë vlerësohet edhe Rodri, i cili u shpall lojtari më i mirë i Kupës së Botës.

Fituesi do të përcaktohet nga votat e gazetarëve të 100 vendeve të para në renditjen e FIFA-s.

Përgjigjja përfundimtare do të merret më 26 tetor, kur Londra do të presë ceremoninë e 70-të të Topit të Artë.

Inter Miami ka mbyllur një tjetër natë të paharrueshme, duke triumfuar 2-0 ndaj Cruz Azulit dhe duke ngritur në duar trofeun e Campeones Cup. Në qendër të vëmendjes ishte sërish Lionel Messi, i cili regjistroi një tjetër arritje të veçantë me klubin amerikan.

Ylli argjentinas ishte ai që zhbllokoi takimin në minutën e 24-t. Messi përfitoi nga një krosim i Luis Suarezit dhe me kokë e dërgoi topin në rrjetë, duke i dhënë avantazhin skuadrës së tij.

Për Messin, ky nuk ishte thjesht një gol i radhës. Ishte goli i 100-të me fanellën e Inter Miamit, në paraqitjen e tij të 115-të në të gjitha kompeticionet.

Edhe më e veçantë është mënyra se si u lidh ky jubile me fillimin e aventurës së tij në SHBA. Pikërisht ndaj Cruz Azulit, Messi kishte shënuar golin e parë për Inter Miamin në korrik të vitit 2023. Në atë debutim, argjentinasi i dha skuadrës fitoren 2-1 me një goditje spektakolare nga gjuajtja e lirë në minutat shtesë.

Inter Miami e vulosi suksesin në minutën e 81-të. Casemiro shënoi me kokë pas një korneri të ekzekutuar nga vetë Messi, duke vendosur rezultatin përfundimtar 2-0.

Edhe mesfushori brazilian po kalon një periudhë të jashtëzakonshme para portës. Në pesë ndeshjet e fundit, Casemiro ka realizuar katër gola dhe të gjithë kanë ardhur me goditje me kokë.

Trofeu i Campeones Cup i shtohet një liste gjithnjë e më të gjatë suksesi për Inter Miamin në epokën e Messit. Klubi nga Florida më herët kishte fituar Kupën e Ligës në vitin 2023, Supporters’ Shield në 2024 dhe MLS Cup në 2025.

Pas festës së radhës, Inter Miami do t’i rikthehet kampionatit amerikan. Të dielën, skuadra e Messit do të presë San Diegon në “Nu Stadium”, në një takim që do ta nisë nga pozita e dytë në Konferencën Lindore.

Për Messin, ndërkohë, festa vazhdon: 100 gola me Inter Miamin dhe një tjetër trofe në një aventurë që tashmë ka hyrë në historinë e klubit.

Përzgjedhësi i ri i Gjermanisë, Jürgen Klopp, ka bërë të ditura listat e para për katër ndeshjet e ardhshme të Ligës së Kombeve, ndërsa në mesin e 44 futbollistëve të përzgjedhur gjendet edhe talenti me prejardhje shqiptare, Brajan Gruda.

Klopp ka zgjedhur një mënyrë të veçantë për organizimin e skuadrës, duke i ndarë futbollistët në dy grupe. Në grupin e parë, të përbërë nga 24 lojtarë, janë ata që do të jenë në dispozicion për dy ndeshjet e para, kundër Holandës më 24 shtator dhe Greqisë më 27 shtator.

Gruda është përfshirë në grupin e dytë, ku bëjnë pjesë 20 futbollistë. Ky grup do të grumbullohet për sfidën ndaj Serbisë, më 1 tetor, si dhe për duelin e dytë kundër Greqisë, që zhvillohet më 4 tetor.

Për 22-vjeçarin, kjo është një mundësi e rëndësishme për të bërë hapin e radhës në karrierën ndërkombëtare. Gruda synon të bindë Kloppin dhe të fitojë gradualisht një vend të qëndrueshëm në ekipin e parë të Gjermanisë.

Sulmuesi është pjesë e Brightonit, ndërsa aktualisht është i huazuar te Leipzigu. Ai e ka kaluar një pjesë të rëndësishme të zhvillimit të tij në futbollin gjerman dhe ka qenë pjesë e disa prej grupmoshave të përfaqësueses së Gjermanisë.

Ftesa e Grudës merr rëndësi të veçantë edhe për shkak të ndryshimit në stolin e kombëtares. Klopp ka nisur zyrtarisht punën si përzgjedhës i “Panzerëve”, me objektivin për të ndërtuar një skuadër të re dhe konkurruese pas përfundimit të Botërorit 2026.

Debutimi i tij në stolin e Gjermanisë do të jetë më 24 shtator, në Amsterdam, ku “Panzerët” do të përballen me Holandën. Më 27 shtator, Gjermania do të presë Greqinë në Augsburg.

Programi vijon me duelin ndaj Serbisë më 1 tetor në Mynih, ndërsa katër ditë më vonë gjermanët do të udhëtojnë drejt Selanikut për ndeshjen e dytë kundër Greqisë.

Për Brajan Grudën, grumbullimi përbën një tjetër hap të rëndësishëm në rrugëtimin e tij, ndërsa tani mbetet të shihet nëse talenti shqiptar do të arrijë të bindë Kloppin dhe të bëhet pjesë e rëndësishme e Gjermanisë në vazhdim.

Përzgjedhësi i Zvicrës, Murat Yakin, ka bërë publike listën e futbollistëve të grumbulluar për ndeshjet e ardhshme të Ligës së Kombeve, ku nuk mungon prania shqiptare.

Në mesin e lojtarëve të përzgjedhur janë tre futbollistë me prejardhje shqiptare: Granit Xhaka, Ardon Jashari dhe Adrian Bajrami. Të tre do të jenë pjesë e skuadrës helvetike në sfidat e radhës, duke konfirmuar edhe një herë kontributin e futbollistëve shqiptarë në përfaqësuesen zvicerane.

Granit Xhaka vazhdon të mbajë një rol të rëndësishëm në formacionin e Zvicrës, ndërsa Ardon Jashari po fiton gjithnjë e më shumë besimin e Yakin dhe po konsolidohet në planet e përfaqësueses.

Në një moment të rëndësishëm të karrierës së tij ndodhet edhe Adrian Bajrami. I lindur në Zvicër dhe me prejardhje shqiptare nga Maqedonia e Veriut, mbrojtësi kishte përfaqësuar më herët Shqipërinë, por në vitin 2025 vendosi të vazhdonte karrierën ndërkombëtare me Zvicrën. Ndryshimi i përfaqësimit u miratua nga FIFA, ndërsa më pas Bajrami mori edhe ftesën e Yakin për ndeshjet kualifikuese të Botërorit.

Zvicra e pret një kalendar i ngjeshur në Ligën e Kombeve. Përfaqësuesja helvetike do të përballet dy herë me Maqedoninë e Veriut, ndërsa në program janë edhe takimet me Skocinë dhe Slloveninë.

Me një ekip që po kalon një fazë të re dhe me synimin për të ndërtuar një grup sa më konkurrues për sfidat e ardhshme, Yakin do të kërkojë përgjigje nga secili prej lojtarëve të tij.

Në këtë kuadër, Xhaka mbetet një prej pikave kryesore të ekipit, Jashari synon të konsolidojë edhe më tej pozitën e tij, ndërsa Bajrami do të kërkojë ta shfrytëzojë maksimalisht mundësinë për të fituar hapësirë dhe për të bindur përzgjedhësin zviceran.

Toni Kroos ka zgjedhur ironinë për të komentuar paraqitjet e disa prej yjeve të rinj të Kombëtares së Gjermanisë, në prag të publikimit të listës së parë të Jurgen Kloppit.

Gjatë podcastit “Einfach Mal Luppen”, të cilin e drejton së bashku me vëllain e tij Felix, ish-mesfushori gjerman u sfidua të përmendte tre futbollistë që nuk kishin qenë pjesë e Botërorit të fundit.

Kroos e shfrytëzoi menjëherë mundësinë për një batutë, duke përmendur emrat e Jamal Musialës, Florian Wirtzit dhe Aleksandar Pavlovicit.

Problemi ishte se të tre futbollistët kishin qenë pjesë e Gjermanisë në atë turne. Fillimisht, vëllai i tij Felix nuk e kuptoi menjëherë ironinë e Kroosit dhe e pyeti se për cilin Botëror po fliste.

Vetëm pak sekonda më vonë, ai e kuptoi se bëhej fjalë për një thumbim ndaj paraqitjeve të treshes, duke e vazhduar edhe më tej shakanë me idenë se ata thjesht nuk ishin vënë re gjatë turneut.

Në fakt, Kroos iu referua paraqitjeve zhgënjyese të Musialës, Wirtzit dhe Pavlovicit me Gjermaninë, e cila u eliminua nga Paraguai në raundin e 32-të.

Më pas, ish-kampioni i botës i vitit 2014 kaloi nga ironia te emrat që, sipas tij, do të meritonin të ishin në listën e parë të Jurgen Kloppit.

Kroos përmendi Tom Bischof dhe Lennart Karl të Bayern Munichut, si dhe talentin e Kolnit, Said El Malan, si tre futbollistë që do të dëshironte t’i shihte në grumbullimin e ri të Kombëtares gjermane.

Tashmë mbetet të shihet se cilët emra do të përfshijë Klopp në listën e tij të parë dhe nëse ndonjëri prej talenteve të përmendur nga Kroos do të marrë një ftesë nga trajneri i ri i “Die Mannschaft”.

Sulmuesi i Kombëtares shqiptare, Rey Manaj, ka reaguar në rrjetet sociale pas aktgjykimit të Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës.

Gjykata në Hagë ka shpallur aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, të cilët janë dënuar me gjithsej 81 vjet burgim. Vendimi ka sjellë reagime të shumta publike në Kosovë dhe jashtë saj.

Në mesin e personave që kanë reaguar ka qenë edhe futbollisti i Kombëtares shqiptare. Manaj, aktualisht pjesë e Sivassporit, ka publikuar në rrjetet sociale një fotografi me simbolin e UÇK-së, të shoqëruar me një mesazh për sakrificën dhe luftën për liri.

Në postimin e tij, sulmuesi kuqezi ka shkruar se UÇK-ja nuk është thjesht një emër i historisë, por lidhet me sakrificën dhe lirinë, duke nënvizuar se kjo e fundit nuk është arritur pa kosto.

Manaj e ka shoqëruar reagimin edhe me një fotografi nga ndeshja e Kombëtares shqiptare ndaj Serbisë, e zhvilluar në kuadër të kualifikimeve për Kupën e Botës 2026. Në fokus të postimit ka qenë edhe momenti i golit të fitores së Shqipërisë në atë përballje.

Reagimi i futbollistit vjen në një ditë kur vendimi i Hagës ka shkaktuar diskutime dhe reagime të shumta publike. Ndaj aktgjykimit të shkallës së parë palët kanë të drejtë të ushtrojnë ankesë, në përputhje me procedurat përkatëse.

Postimi i Manajt ka tërhequr vëmendjen e ndjekësve të tij në rrjetet sociale, duke u bërë pjesë e reagimeve publike pas vendimit të gjykatës në Hagë.

Luis de la Fuente do të vazhdojë të jetë në krye të Kombëtares së Spanjës, pasi trajneri ka arritur marrëveshjen për zgjatjen e kontratës deri në vitin 2030.

Tekniku spanjoll, i cili fillimisht kishte kontratë deri në vitin 2028, ka bindur me rezultatet e arritura në krye të “La Roja”, duke udhëhequr skuadrën drejt dy trofeve të rëndësishëm.

Nën drejtimin e tij, Spanja triumfoi në Euro 2024, ndërsa më pas siguroi edhe Kupën e Botës, duke krijuar një periudhë të suksesshme për përfaqësuesen iberike.

Kontrata e re do ta mbajë De la Fuenten në stol deri në vitin 2030, çka i jep atij mundësinë të jetë pjesë e projektit të Spanjës edhe gjatë përgatitjeve për Kupën e Botës 2030. Ky turne do të zhvillohet në Spanjë, Portugali dhe Marok.

Bilanci i trajnerit që prej marrjes së drejtimit të përfaqësueses është mjaft pozitiv. Në 41 ndeshje zyrtare, Spanja nën drejtimin e De la Fuentes ka regjistruar vetëm dy humbje.

Rinovimi i kontratës tregon edhe vazhdimësinë e projektit të nisur nga trajneri spanjoll, i cili tashmë ka përpara vetes një cikël të ri dhe një objektiv madhor: ta udhëheqë Spanjën në Kupën e Botës që do të zhvillohet në shtëpi në vitin 2030.

Me rezultatet e deritanishme dhe besimin e federatës, De la Fuente do të ketë mundësinë të ndërtojë mbi sukseset e arritura dhe të synojë trofe të tjerë me “La Roja”.

Karim Adeyemi ka nisur të lërë gjurmë te Barcelona, duke treguar se përshtatja me filozofinë e Hansi Flickut nuk ka qenë aspak problem për të.

Sulmuesi gjerman ka gjetur rrjetën në dy ndeshjet e fundit, duke realizuar gola spektakolarë ndaj Feyenoordit dhe Levantes dhe duke tërhequr vëmendjen me paraqitjet e tij në repartin ofensiv.

Pas golit të jashtëzakonshëm ndaj Levantes, Adeyemi ka rrëfyer se aksioni erdhi pothuajse tërësisht në mënyrë instinktive. Ai ka pranuar se gjithçka ndodhi shumë shpejt dhe se, për shkak të distancës nga porta, nuk kishte një pozicion ideal për të goditur. Megjithatë, sulmuesi gjerman ka shpjeguar se në atë moment vendosi të vepronte shpejt dhe të gjente një zgjidhje.

Adeyemi ka theksuar se paraqitjet e tij më të mira vijnë pikërisht atëherë kur nuk mendon shumë dhe lejon që lëvizjet në fushë t’i vijnë natyrshëm.

Pavarësisht formës së mirë, sulmuesi gjerman ka insistuar se ende mund të japë më shumë. Ai ka bërë të ditur se është i kënaqur me çdo minutë të luajtur, me golat dhe fitoret e ekipit, ndërsa objektivi i tij kryesor mbetet të ndihmojë Barcelonën në çdo mënyrë të mundshme.

Adeyemi ka theksuar gjithashtu se ambiciet e Barcelonës janë të mëdha dhe se skuadra synon të luftojë për çdo trofe të mundshëm.

Paraqitjet e fundit duket se kanë rritur edhe besimin e Flickut tek sulmuesi 23-vjeçar. Shpejtësia, teknika dhe aftësia për të krijuar raste në aksione individuale e bëjnë Adeyemin një alternativë të rëndësishme në sulmin katalanas.

Nëse vazhdon me këtë ritëm, gjermani mund të shndërrohet në një prej protagonistëve kryesorë të Barcelonës gjatë këtij sezoni.

Carlo Ancelotti ka folur për situatën aktuale të futbollit italian, duke ngritur shqetësime për mungesën e një gjenerate të fuqishme lojtarësh që mund të bëhen liderë të Kombëtares.

Trajneri i Brazilit ka theksuar se Italia, sipas tij, në vitet e fundit nuk ka arritur të prodhojë mjaftueshëm futbollistë të nivelit të lartë. Ai ka veçuar në mënyrë të posaçme repartin ofensiv, duke vënë në dukje mungesën e një sulmuesi italian të spikatur në skuadrat kryesore të Serie A.

Ancelotti ka përmendur Milanin, Interin dhe Juventusin si shembuj, duke theksuar se aktualisht këto klube nuk kanë në dispozicion një sulmues italian të nivelit të lartë.

Megjithatë, pavarësisht shqetësimeve për gjendjen aktuale, Ancelotti ka shfaqur optimizëm për të ardhmen e “Azzurrëve”. Ai ka vlerësuar paraqitjet e futbollistëve të rinj italianë në kategoritë U-20 dhe U-17, të cilët, sipas tij, po tregojnë potencial dhe po paraqiten mirë në arenën evropiane.

Tekniku italian beson se kjo gjeneratë mund të sjellë një ndryshim të rëndësishëm dhe të ndihmojë Kombëtaren të rikthehet në Kupën e Botës.

Ancelotti ka theksuar se Italia duhet të jetë pjesë e turneut të ardhshëm botëror dhe ka shprehur besimin se lojtarët e rinj mund të jenë baza e një ekipi më konkurrues në vitet që vijnë.

Sipas tij, nëse kjo gjeneratë vazhdon zhvillimin në mënyrën e duhur, Italia do të ketë mundësinë të ndërtojë një ekip më të fortë dhe të sigurojë kualifikimin në Kupën e Botës.

Kështu, Ancelotti sheh një problem të qartë te mungesa e lojtarëve të afirmuar, por njëkohësisht beson se e ardhmja e futbollit italian mund të jetë më premtuese falë talenteve të rinj.