Author: N.T.

Presidenti i FIFA, Gianni Infantino, ka reaguar publikisht pas incidentit të raportuar mes Vinícius Júnior dhe Gianluca Prestiannit gjatë përballjes së UEFA Champions League ndërmjet SL Benfica dhe Real Madrid CF.

Takimi i parë përfundoi me fitoren 1-0 të madrilenëve, me gol të realizuar nga vetë Vinicius. Pas shënimit, loja u ndërpre për disa minuta, pasi braziliani njoftoi gjyqtarin për një incident të dyshuar me përmbajtje raciste.

Në deklaratën e tij, Infantino u shpreh i tronditur nga ajo që pa në fushë.

“Isha i tronditur dhe i trishtuar kur pashë incidentin e dyshuar të racizmit ndaj Vinícius Júnior. Nuk ka absolutisht asnjë vend për racizëm në sportin tonë dhe në shoqëri. Të gjitha palët duhet të ndërmarrin veprime dhe të mbajnë përgjegjës ata që janë fajtorë”, theksoi kreu i FIFA-s.

Ai shtoi se institucioni që drejton është i angazhuar përmes programeve globale kundër racizmit dhe përmes panelit të zërit të lojtarëve, me synimin që futbollistët, zyrtarët dhe tifozët të jenë të mbrojtur dhe të respektohen.

Infantino përgëzoi edhe gjyqtarin francez François Letexier për aktivizimin e protokollit anti-racizëm dhe ndalimin e menjëhershëm të ndeshjes për të trajtuar situatën.

“FIFA dhe futbolli botëror qëndrojnë në solidaritet të plotë me viktimat e racizmit dhe çdo forme diskriminimi. Do ta përsëris gjithmonë: Jo racizmit! Jo çdo forme diskriminimi!”, përfundoi ai.

Sulmuesi nigerian, Victor Osimhen, po kalon një sezon mbresëlënës në UEFA Champions League, duke u shndërruar në figurën kyçe të Galatasaray në arenën evropiane.

Në shtatë paraqitje këtë edicion, Osimhen ka realizuar gjashtë gola dhe ka kontribuar me dy asistime, duke regjistruar tetë përfshirje direkte në gola, një mesatare që e konfirmon si “game changer” për kampionët turq.

Forma e tij ka qenë vendimtare në ndeshje të rëndësishme, ku shpejtësia, forca fizike dhe instinkti para portës kanë bërë diferencën. Çdo herë kur Galatasaray ka pasur nevojë për një moment vendimtar, sulmuesi 25-vjeçar ka qenë aty për të marrë përgjegjësinë.

Statistikat e tij flasin qartë, tetë kontribute në shtatë ndeshje në kompeticionin më elitar evropian janë shifra që e vendosin ndër sulmuesit më produktivë të këtij sezoni.

Me këtë ritëm, Osimhen jo vetëm që po udhëheq Galatasarayn drejt objektivave ambicioze në Champions, por po forcon edhe më shumë statusin e tij si një nga sulmuesit më të rrezikshëm në futbollin evropian.

Drita është në prag të një prej ndeshjeve më të rëndësishme të sezonit, teksa nesër mbrëma përballet me NK Celje në kuadër të fazës “play-off” të UEFA Europa Conference League. Takimi zhvillohet nga ora 21:00 në stadiumin Fadil Vokrri Stadium, ku pritet një atmosferë e zjarrtë nga tifozët vendas.

Në konferencën për shtyp para ndeshjes, trajneri i gjilanasve, Zekirija Ramadani, foli me optimizëm, duke theksuar se forca e skuadrës së tij qëndron te loja kolektive dhe uniteti në fushë.

“E rëndësishme është të mos devijojmë nga identiteti ynë si ekip. Sa herë kemi funksionuar si grup, kemi arritur rezultate. Nuk jemi skuadër që mbështetemi te individët, por te forca e përbashkët”, u shpreh Ramadani.

Ai zbuloi se pas përballjes së fundit në kampionat, stafi teknik ka zhvilluar analiza të detajuara me futbollistët, duke kërkuar reagim të menjëhershëm dhe përqendrim maksimal për sfidën evropiane.

“Duhet të mbështesim njëri-tjetrin në çdo moment. Jemi në një pikë ku shumë skuadra do të dëshironin të ishin. Nëse ndodh humbja, duhet të largohemi me kokën lart, por jo si skuadër që frikësohet”, shtoi ai.

Ramadani theksoi se kundërshtari është studiuar me kujdes, ndërsa ekipi është përgatitur në aspektin fizik, psikologjik dhe taktik. Sipas tij, Celje ruan të njëjtin stil loje pavarësisht ndryshimeve në stol, ndërsa kualifikimi mbetet i arritshëm.

“Do të jetë sfidë e vështirë, por jo e pamundur. Duhet ta shfrytëzojmë faktorin fushë dhe përkrahjen e tifozëve. Një epërsi, qoftë edhe minimale, do të ishte shumë e rëndësishme”, theksoi tekniku.

Ai konfirmoi mungesat e Mesës, Manajt dhe Brojës, por shprehu besim të plotë te pjesa tjetër e skuadrës, duke siguruar se Drita do të japë maksimumin për të realizuar ëndrrën evropiane.

Trajneri i Benfica, Jose Mourinho, ka reaguar ashpër pas humbjes 1-0 ndaj Real Madrid në ndeshjen e së martës mbrëma, duke lënë të kuptohet se skuadra e tij nuk u trajtua në mënyrë të barabartë nga gjyqtari. Megjithatë, ai pranoi se madrilenët e merituan fitoren për paraqitjen në fushë.

Portugezi, i cili ka drejtuar më parë “Los Blancos”, e kishte ngritur edhe më herët çështjen e vendimeve të diskutueshme në Spanjë dhe Evropë, por këtë herë fokusi i tij ishte i dyfishtë: gjykimi dhe akuza për racizëm që përfshiu talentin e ri Gianluca Prestianni dhe yllin brazilian të Realit, Vinícius Júnior.

Në konferencën për shtyp pas ndeshjes, Mourinho mbrojti lojtarin e tij, duke theksuar se situata mbetet e paqartë për shkak të versioneve të ndryshme të ngjarjes. Ai shmangu marrjen e një qëndrimi të prerë, por insistoi se duhet kujdes para se të bëhen akuza të rënda.

Një tjetër moment tensioni ishte përjashtimi i tij në minutat e fundit. Mourinho u ndëshkua me dy kartonë të verdhë brenda pak çastesh nga gjyqtari francez François Letexier, pasi protestoi për një ndërhyrje të Vinicius që, sipas tij, duhej të ishte ndëshkuar me karton të dytë.

“U përjashtova sepse i thashë gjyqtarit diçka shumë të qartë. Duket sikur kishte lojtarë që nuk mund të ndëshkoheshin. Ia thashë këtë hapur”, deklaroi Mourinho, duke shtuar se përvoja e tij mbi 1,400 ndeshje në stol i jep të drejtën të shprehë mendimin e tij.

Ai kritikoi gjithashtu festimin e Viniciusit, duke sugjeruar se duhej të ishte më i përmbajtur dhe të festonte me bashkëlojtarët, jo përballë tribunave.

Në fund, pavarësisht polemikave, tekniku portugez pranoi superioritetin e kundërshtarit: “Real Madridi ishte më i fortë. E merituan fitoren”, përfundoi ai.

Kylian Mbappé ka dalë hapur në mbrojtje të sulmuesit të Real Madrid CF, Vinícius Jr., pas incidentit të ndodhur të martën mbrëma gjatë përballjes në UEFA Champions League midis Benfica dhe Real Madridit në Estádio da Luz.

Mbappé theksoi se edhe nëse Vinícius ka provokuar apo ka bërë gabime në të kaluarën, askush nuk e meriton kurrë të sulmohet racialisht. Ylli i Paris Saint-Germain kritikoi ashpër ata që justifikojnë sulmet ndaj brazilianit me arsyen se “provokon”.

Fjalët e Mbappé shërbejnë si një mesazh i qartë kundër racizmit dhe mbështetje e fortë për Vinícius, duke rikujtuar rëndësinë e mbrojtjes së lojtarëve nga sulmet diskriminuese në futbollin evropian.

Feronikeli ’74 është ekipi i fundit që siguroi vendin në çerekfinale të Kupa e Kosovës, pas një fitoreje të ngushtë 2-1 ndaj Dinamo Ferizaj në stadiumin Rexhep Rexhepi.

Pjesa e parë e ndeshjes ishte e barabartë, me mysafirët që shënuan të parët në minutën e 15-të përmes Almedin Klinaku nga pika e bardhë. Vendasit reaguan mirë dhe barazuan në minutën e 42-të me golin e Muhamed Llapashtica, duke dërguar rezultatin në 1-1 para pushimit.

Në pjesën e dytë, Feronikeli dominoi lojën, krijoi më shumë raste dhe gjeti golin vendimtar në minutën e 87-të. Kreshnik Bahtiri realizoi për 2-1, duke siguruar jo vetëm fitoren, por edhe kualifikimin e skuadrës në fazën çerekfinale.

Me këtë fitore, lista e çerekfinalistëve të Kupës së Kosovës plotësohet: Llapi, Ballkani, Dukagjini, Ferizaj, Malisheva, Vushtrria, Gjilani dhe tashmë edhe Feronikeli ’74.

Fitorja e Feronikelit vjen në një moment të rëndësishëm të sezonit dhe e bën ekipin një nga pretendentët kryesorë për të shkuar deri në finale të Kupës.

Gjiganti bavarez Bayern Munich po planifikon me kujdes të ardhmen e repartit ofensiv dhe në listën e dëshirave ka përfshirë emrin e Fisnik Asllani. Sulmuesi 23-vjeçar i TSG Hoffenheim shihet si një alternativë premtuese dhe si zëvendësues afatgjatë i mundshëm për Harry Kane.

Sipas raportimeve nga mediat gjermane, drejtuesit e Bayernit e konsiderojnë reprezentuesin e Kosovës si një investim strategjik, që fillimisht do të ofronte thellësi në sulm, por me potencial për të marrë rol më të madh në të ardhmen. Klauzola e lirimit të Asllanit, që raportohet të jetë nën 30 milionë euro, e bën operacionin financiarisht të arsyeshëm për kampionët e Gjermanisë.

Asllani ka spikatur këtë sezon në Bundesliga, ku në 21 paraqitje ka realizuar shtatë gola dhe ka dhënë gjashtë asistime. Shpejtësia, lëvizjet inteligjente pa top dhe efikasiteti para portës e kanë kthyer atë në një nga sulmuesit e rinj më të komentuar në kampionat.

Interesimi për të nuk vjen vetëm nga Mynihu. Edhe Borussia Dortmund po ndjek nga afër zhvillimin e tij, çka mund të ndezë një garë të fortë në merkato.

Me Bayernin që synon të ndërtojë gradualisht tranzicionin në repartin ofensiv, vera pritet të jetë vendimtare për të ardhmen e Asllanit, i cili mund të bëjë hapin më të madh të karrierës nëse transferimi konkretizohet.

Mbrojtësi uruguaian José María Giménez, pjesë e skuadrës që nga viti 2013 pas transferimit nga Danubio FC për më pak se një milion euro, duket se është drejt fundit të aventurës së tij në “Wanda Metropolitano”.

Giménez ishte pjesë thelbësore e brezit të artë të Atleticos, duke kontribuar në sezonin që u kurorëzua me titullin në La Liga dhe arritjen në finalen e UEFA Champions League, ku konkurroi për një vend titullari me brazilianin Miranda. Gjatë më shumë se një dekade, ai ka qenë simbol i qëndrueshmërisë dhe luftës në mbrojtjen e ekipit madrilen.

Sipas raportimeve nga Radio Marca, 31-vjeçari pritet të largohet në fund të sezonit, edhe pse kontrata e tij aktuale është e vlefshme deri në vitin 2028. Drejtuesit e klubit thuhet se i kanë premtuar lojtarit se do ta lejojnë të largohet si lojtar i lirë, në rast se ai zgjedh destinacionin e dëshiruar.

Vendimi lidhet me disa faktorë, përfshirë moshën, rënien e vazhdimësisë për shkak të dëmtimeve të shpeshta dhe pagën e lartë, që raportohet të jetë mes 6 dhe 7 milionë euro neto në sezon.

Interesimi për shërbimet e tij nuk mungon. Në Argjentinë, Boca Juniors po monitoron situatën, me presidentin Juan Román Riquelme që thuhet se ka zhvilluar kontakte me lojtarin për një transferim të mundshëm në Buenos Aires pas Kupës së Botës.

Nga ana tjetër, interes ka pasur edhe nga Italia. AC Milan më herët ishte përmendur si klub i gatshëm të investonte deri në 30 milionë euro për mbrojtësin uruguaian, ndërsa mundësia për ta siguruar pa kosto transferimi e bën operacionin edhe më tërheqës. Edhe klube të tjera të Serie A po ndjekin me vëmendje zhvillimet.

E ardhmja e Giménez pritet të qartësohet në muajt e ardhshëm, ndërsa një rikthim në Amerikën Latine apo një sfidë e re në Evropë mbeten opsionet më të mundshme për fazën përmbyllëse të karrierës së tij.

UEFA ka nisur procedurat zyrtare për të hetuar incidentin e ndodhur të martën mbrëma gjatë përballjes së SL Benfica dhe Real Madrid CF në kuadër të UEFA Champions League, pas dyshimeve për fyerje me përmbajtje raciste.

Sipas raportimeve të Sky Sports, incidenti ndodhi në stadiumin Estádio da Luz, kur sulmuesi i Real Madridit, Vinícius Júnior, raportoi te gjyqtari i ndeshjes, François Letexier, një fyerje të dyshuar raciste nga lojtari i Benficës, Gianluca Prestianni.

Ngjarja ndodhi në minutën e 49-të, menjëherë pasi Vinícius realizoi golin për 0-1 dhe gjatë festimit të tij. Pas ankesës së brazilianit, u aktivizua protokolli kundër racizmit i UEFA-s, duke sjellë një ndërprerje të përkohshme të ndeshjes për rreth tetë minuta, kohë gjatë së cilës u analizuan pamjet dhe u vlerësua situata në fushë.

Në një deklaratë zyrtare, UEFA konfirmoi se raportet e delegatëve dhe zyrtarëve të ndeshjes janë në shqyrtim.

“Raportet zyrtare nga ndeshjet e mbrëmshme janë duke u shqyrtuar aktualisht. Kur raportohen incidente, iniciohen procedurat dhe, nëse këto çojnë në sanksione disiplinore, ato publikohen në faqen zyrtare disiplinore të UEFA-s. Për momentin nuk kemi informacione të mëtejshme për të ndarë”, thuhet në reagimin e organit qeverisës të futbollit evropian.

Nga ana tjetër, mediat portugeze raportojnë se Benfica ka paraqitur prova për të mbrojtur Prestiannin dhe për të vënë në pikëpyetje versionin e paraqitur nga lojtarët e Real Madridit.

Hetimet pritet të sqarojnë plotësisht rrethanat e incidentit dhe, nëse konstatohen shkelje, UEFA mund të ndërmarrë masa disiplinore ndaj palëve të përfshira.

Emocione, tension dhe përballje me peshë të madhe zhvillohen edhe sonte në fazën play-off të UEFA Champions League, aty ku çdo gabim mund të kushtojë shtrenjtë dhe çdo gol mund të përcaktojë fatin e kualifikimit.

Në orën 18:45, Qarabağ FK pret në shtëpi Neëcastle United, në një duel ku vendasit synojnë të shfrytëzojnë maksimalisht përkrahjen e publikut dhe terrenin e njohur. Nga ana tjetër, anglezët kërkojnë të konfirmojnë ambiciet e tyre evropiane me një rezultat pozitiv në transfertë, duke hedhur hap të sigurt drejt fazës tjetër.

Një tjetër përballje intriguese zhvillohet mes FK Bodø/Glimt dhe Inter. Entuziazmi dhe ritmi i lartë i norvegjezëve do të sfidojnë përvojën dhe cilësinë e “Nerazzurrëve”, të cilët në letër konsiderohen favoritë, por që janë të vetëdijshëm se çdo nënvlerësim mund të ndëshkohet.

Në Belgjikë, Club Brugge KV përballet me Atlético Madrid në një ndeshje që pritet të dominohet nga disiplina taktike dhe lufta fizike. Spanjollët njihen për organizimin dhe pragmatizmin e tyre, ndërsa Brugge do të tentojë të imponojë ritmin dhe energjinë e publikut vendas për të ndërtuar një avantazh para sfidës së kthimit.

Spektakël pritet edhe në Greqi, ku Olympiacos F.C. mirëpret Bayer Leverkusen. Gjermanët vijnë me ambicie të mëdha dhe dëshirë për të dëshmuar pjekurinë e tyre në arenën evropiane, ndërsa vendasit synojnë të hedhin themelet e kualifikimit që në ndeshjen e parë.

Me rivalitet të fortë dhe diferenca minimale mes skuadrave, mbrëmja e sotme premton spektakël dhe dramë deri në minutën e fundit.