Author: N.T.

Federata e Futbollit e Kosovës, në bashkëpunim me sponsorin zyrtar të Superligës, Albi Mall, ka vazhduar me ndarjen e çmimit tradicional “Ylli i Javës”, i cili i dedikohet futbollistit më të spikatur të javës në elitën e futbollit kosovar.

Për javën e 20-të të këtij edicioni, ky vlerësim i ka takuar sulmuesit të FC Prishtina, Mario Ilievski, i cili ishte protagonisti kryesor në fitoren bindëse 4-1 ndaj FC Llapi.

Ilievski shkëlqeu në këtë përballje duke realizuar dy gola dhe duke kontribuar me një asistim, paraqitje kjo që u vlerësua maksimalisht nga Komisioni i Veteranëve të Futbollit.

Pas pranimit të çmimit, Ilievski u shpreh i lumtur për vlerësimin e marrë, duke theksuar se ky sukses përbën një motivim shtesë për të dhe për skuadrën.

“Është kënaqësi e veçantë të shpallesh lojtari më i mirë i javës. Ky çmim më motivon edhe më shumë, por njëkohësisht është meritë e gjithë ekipit. Pas ndeshjes me Ballkanin ishim të zhgënjyer, por penalltitë janë gjithmonë çështje fati”, deklaroi ai.

Sulmuesi theksoi ambiciet e larta të klubit kryeqytetas për vazhdimin e sezonit, dukem thenë se do të luftojnë deri ën fund.

Europa troket sërish për FC Drita, që këtë të enjte mbrëma do të zbresë në fushën e stadiumit Fadil Vokrri për sfidën e madhe ndaj skuadrës sllovene NK Celje, në kuadër të Play-Off-it të UEFA Europa Conference League.

Gjilanasit kanë shkruar histori këtë sezon, duke u renditur mes 24 skuadrave më të mira në fazën e ligës dhe duke siguruar një vend në fazën me eliminim direkt. Tani, synimi është i qartë: të hedhin një hap tjetër drejt kualifikimit dhe të mbajnë gjallë ëndrrën evropiane.

Atmosfera në kryeqytet pritet të jetë elektrizuese, me tifozët që do të mbështesin ekipin e tyre në një nga ndeshjet më të rëndësishme të sezonit. Një rezultat pozitiv në ndeshjen e parë do të ishte një kapital i madh për përballjen e kthimit në Slloveni.

Dueli do të gjykohet nga një treshe angleze, me Chris Kavanagh si arbitër kryesor, i asistuar nga Simon Bennett dhe Neil Davies.

40-vjeçari Kavanagh konsiderohet një nga gjyqtarët më të vlerësuar në Angli. Vetëm këtë sezon ai ka drejtuar 19 ndeshje në Premier League, si dhe katër përballje në UEFA Champions League, përfshirë takime të nivelit të lartë si Inter – Slavia Prague dhe Slavia Prague – Barcelona.

Prania e tij garanton një standard të lartë arbitrazhi në një mbrëmje ku çdo detaj mund të bëjë diferencën.

Drita e di se përballë ka një kundërshtar të fortë dhe me eksperiencë evropiane, por besimi në kampin bardhekaltër është i madh. Një paraqitje solide dhe një rezultat pozitiv do ta vendosnin skuadrën kosovare në pozicion të favorshëm për ndeshjen e kthimit.

Të enjten mbrëma, sytë e futbollit kosovar do të jenë te “Fadil Vokrri”. Europa pret, dhe Drita është gati për sfidën.

Trajneri i njohur, José Mourinho, ka rikujtuar lidhjen e tij të veçantë me Real Madrid, duke deklaruar se gjithmonë do të mbetet pjesë e historisë së klubit spanjoll.

Në një intervistë të fundit, Mourinho tha:

“Kam dhënë gjithçka nga vetja për Real Madrid. Prandaj njerëzit më respektojnë. Do të jem Madridista PËRGJITHMONË. Kjo lidhje kurrë nuk do të përfundojë.”

Fjalët e tij vijnë pas periudhës së suksesshme si trajner i “Los Blancos”, ku arriti të fitonte trofe të rëndësishëm dhe të vendoste emrin e tij mes figurave më të respektuara të klubit.

Mourinho ka treguar gjithmonë një respekt të veçantë për historinë dhe kulturën e Real Madrid, duke nënvizuar se përkushtimi dhe pasioni i tij për klubin nuk do të shuhet kurrë, pavarësisht se tashmë ndodhet larg “Santiago Bernabéu”.

Komentet e tij kanë rikthyer kujtimet e tifozëve për kohën kur Mourinho drejtoi skuadrën spanjolle, duke fituar La Liga, Copa del Rey dhe duke sfiduar me sukses në Champions League.

Ky deklarim i Mourinho-s rikujton se lidhja mes një trajneri dhe një klubi të madh nuk është thjesht e punës, por edhe e zemrës dhe historisë.

Barcelona pësoi një humbje surprizuese 2-1 ndaj Girona në një ndeshje që shkaktoi polemika të forta për vendimet e gjyqtarit.

Pas ndeshjes, presidenti i Barcelona-s, Joan Laporta, u shpreh i zemëruar për mënyrën se si u drejtua takimi:

“Ka gjyqtarë që zakonisht gjithmonë i dëmtojnë Barcelonën. Historikisht ka qenë gjithmonë kështu!”

Laporta kritikoi vendimet që sipas tij penalizuan skuadrën në momente kyçe dhe theksoi se edhe VAR-i, që është krijuar për të ndihmuar arbitrat, nuk u përdor në mënyrë korrekte.

Kujtojmë që ajo cfardh ndodhi në dneshje ishte se goli vendimtar i Girona-s erdhi pas një aksioni ku lojtarët e Barcelonës pretenduan se kishte faull të qartë, pastaj Barcelona kërkoi ndërhyrje nga VAR, por arbitri la lojën të vazhdojë.

Po ashtu edhe një penallti e mundshme e humbur nga Lamine Yamal shkaktoi debat dhe pakënaqësi te klubi katalanas.

Trajneri i Girona-s, Michel, tha se vendimet e arbitrit janë pjesë e lojës dhe se VAR-i nuk kishte detyrë të ndërhynte në rastin konkret. Ai e konsideroi gjithçka si pjesë normale të futbollit.

Humbja ndaj Gironës e detyron Barcelonën të bjerë në vendin e dytë në renditjen e La Liga, duke lënë vendin e parë në duart e rivalëve të tyre. Klubi tashmë ka paralajmëruar se do të dërgojë një letër zyrtare tek Federata Spanjolle e Futbollit, duke kërkuar sqarime për vendimet që sipas tyre ishin të padrejta.

Barcelona dhe tifozët e saj presin me padurim reagimet e arbitrazhit dhe të federatës, ndërsa polemikat rreth ndeshjes pritet të vazhdojnë për ditë të tëra.

Kur mendon Haiti, imazhi i parë nuk është dëbora. Por Richardson Viano, skiatori 23-vjeçar, po sfidon çdo pritshmëri duke përfaqësuar vendlindjen e tij tropikale në Lojrat Olimpike Dimërore 2026.

I lindur në Port-au-Prince, Viano jetoi aty vetëm deri në moshën dy vjeçare, para se të adoptohej nga një çift italian nga Torino, guidë alpine profesioniste, që i transmetuan dashurinë për dëborën dhe sportet dimërore.

“Kur përfundoi gara dhe pashë kohën time mendova se mos kishin gabuar me kronometrin. Por më pas kuptova që gjithçka ishte e vërtetë. Jam shumë i lumtur për këtë rezultat”, tha Viano pas sllallomit për meshkuj, ku arriti vendin e 29-të në zbritjen e parë dhe e përsëriti këtë rezultat edhe në finalen.

Ky sukses është më shumë se një vend në garë, është një histori inspiruese përtej sportit, një simbol se origjina nuk vendos kufij për ëndrrat dhe arritjet.

Por Richardson nuk është i vetëm në këtë aventurë olimpike. Një tjetër atlet nga Haiti, Stevenson Saavart, i lindur gjithashtu në Port-au-Prince dhe i adoptuar nga një familje franceze, po përfaqëson vendin e tij në ski nordik, duke treguar se pasioni dhe talenti mund të lindin kudo dhe të sfidojnë çdo klimë.

Historitë e tyre kanë tërhequr vëmendjen e mediave ndërkombëtare, duke treguar se Olimpiada nuk është vetëm për vendet e ftohta, por edhe për ata që guxojnë të ëndërrojnë dhe të sfidojnë stereotipet.

Personaliteti italian i medias, Fabrizio Corona, ka hedhur akuza të forta ndaj mbrojtësit të Inter, Alessandro Bastoni, duke pretenduar se lojtari ka vendosur baste në ndeshjet ku ai vetë ka luajtur. Corona tha se posedon biseda dhe prova që mbështesin akuzat e tij.

Gjatë intervistës në emisionin Peppi Night në Canale 21, Corona deklaroi se ka zhvilluar një hetim mbi aktivitetin e dyshuar të basteve në futbollin italian, të cilin e cilësoi të injoruar nga mediat dhe autoritetet sportive. Ai kritikoi ashpër sanksionet e mëparshme, duke thënë se ishin shumë të lehta.

“I kam bisedat, i kam provat. Në fund u gjobitën me 250 mijë euro. Çfarë vendi është ky? Bastoni, po e them, ai po luante. Jua kam thënë dhe i kam provat,” tha Corona.

Ai shtoi se lojtarët po vinin baste madje edhe për situata të vogla gjatë lojës, si rivënie anësore, dhe se kjo është e neveritshme, duke shtuar:

“Kur sheh djem milionerë që vënë baste dhe manipulojnë një lojë për të cilën miliona njerëz investojnë shpirtin e tyre, është e neveritshme.”

Kjo është një deklaratë publike e Fabrizio Corona, por asnjë hetim zyrtar ndaj Bastonit nuk është konfirmuar nga autoritetet sportive ose nga Inter.

Mbrojtësi italian vazhdon të jetë një nga figurat kryesore të ekipit në Serie A dhe Champions League.

Në të kaluarën, disa lojtarë të përmendur nga Corona kanë reaguar ligjërisht për shpifje dhe dëmtim reputacioni.

Për momentin, mbetet të shihet nëse Federata Italiane e Futbollit ose organet hetimore do të ndërmarrin masa të mëtejshme.

Futbollisti i Kombëtares së Kosovës, Edon Zhegrova, ka uruar qytetarët e vendit të tij në përvjetorin e 18-të të pavarësisë së Kosovës, ndërsa ndodhet me skuadrën e Juventus në Turqi.

Zhegrova është duke u përgatitur për ndeshjen e sotme në UEFA Champions League, ku Juventus përballet me Galatasaray. Pavarësisht fokusit te loja, ai nuk harroi vendlindjen e tij.

“Gëzuar këtë ditë të veçantë!”, ka shkruar lojtari kosovar në rrjetet sociale, duke ndarë urimin e tij për gjithë qytetarët e Kosovës.

Ky veprim i Zhegrovës ka marrë vëmendje të madhe nga tifozët kosovarë, të cilët e përshëndetën për respektin dhe dashurinë që tregon për vendin e tij, edhe gjatë karrierës në klubet e mëdha evropiane.

Entuziazmi për finalen e Kupës së Kosovës në basketboll mes KB Bashkimi dhe KB Trepça është në kulm, teksa biletat për këtë spektakël sportiv janë shitur me shpejtësi rekord, duke dëshmuar sërish se basketbolli në Kosovë ka një fansatë tepër të zjarrtë.

Që në momentet e para të shitjes, një numër i madh adhuruesish është mbledhur duke pritur në radhë për të siguruar një vend, duke sfiduar edhe motin e ftohtë për të qenë prezent në finalen e madhe të kupës. Ky interes i jashtëzakonshëm tregon pasionin e madh të tifozëve kosovarë për sportin e basketbollit dhe rivalitetin e klubëve më të mëdhenj në vend.

Finalja e madhe është caktuar të luhet më 18 shkurt me fillim nga ora 19:30 në palestrën e sportit “Mizahir Isma” në Rahovec, ku presin një atmosferë të zjarrtë dhe emocionuese. Vendimi i Federatës së Basketbollit të Kosovës për të zhvilluar përballjen në Rahovec u mor për të siguruar një ambient profesional dhe komod për tifozët dhe ekipet e përfshira.

Analistët dhe dashamirësit e basketbollit presin një përballje të fortë mes dy rivalëve, ku secili ekip do të luftojë me gjithë fuqinë për të fituar trofeun e Kupës së Kosovës, duke sjellë emocionet maksimale për tifozët që së fundmi kanë bërë rekord me rezervimet e biletave.

Atmosfera pritet të jetë e jashtëzakonshme, teksa tifozët nga të gjitha anët e vendit do të mbështesin skuadrat e tyre në një finale që premton të mbetet në kujtesë për shumë kohë.

Legjenda italiane e futbollit, Francesco Totti, ka konfirmuar vetë se po diskuton me drejtuesit e AS Roma për një rikthim të mundshëm në klubin verdhekuq. Ky zhvillim vjen pas javësh spekulimesh dhe deklaratave të ish-trajnerit Klaudio Ranieri, i cili theksoi se familja Friedkin, pronarët e klubit, e sheh me seriozitet rikthimin e ikonës romane.

“Po, po flasim, dhe kam qenë edhe në darkë me Gasperinin,” ka deklaruar Totti për Sky Sport, duke konfirmuar se bisedimet janë reale dhe në zhvillim, edhe pse ende nuk ka detaje për zyrtarizimin e rolit të tij.

Totti u largua nga Roma në vitin 2019, dy vite pas tërheqjes nga futbolli aktiv, pas një periudhe të vështirë si drejtues, ku kishte keqkuptime mbi kompetencat reale. Tani, situata duket më e qartë dhe rikthimi i mundshëm duket më konkret se kurrë.

Familja Friedkin po mendon t’i ofrojë Tottit një rol me ndikim real në strukturën e klubit, duke e përfshirë në vendimmarrje dhe në koordinimin midis stafit teknik dhe drejtuesve, jo vetëm një pozicion ceremonial.

Lajmi ka ndezur entuziazmin e tifozëve të Giallorossi, të cilët prej vitesh ëndërrojnë rikthimin e Tottit në “Olimpico”. Disa e shohin këtë hap si një rikthim emocionues që do të fuqizojë identitetin dhe historinë e klubit, ndërsa të tjerë presin të shohin rolin konkret që ish-kapiteni do të ketë.

Edhe pse ende nuk ka një zyrtarizim, bisedimet mes Tottit dhe drejtuesve të AS Roma janë reale dhe po avancojnë. Rikthimi i tij konsiderohet një mundësi konkrete që mund të bëhet realitet në javët në vijim, duke rikthyer jo vetëm një simbol, por edhe një figurë me peshë të vërtetë në të ardhmen e klubit.

Pas deklaratës së agjentit të Jurgen Klopp, i cili tha se Chelsea kishte shfaqur interes për trajnerin gjerman për të marrë drejtimin e klubit në Stamford Bridge, klubi londinez ka dalë me një reagim zyrtar, duke mohuar çdo kontakt.

Sipas burimeve të brendshme të klubit, nuk ka pasur asnjë negociatë ose bisedë konkrete në këtë drejtim, dhe lajmi për një mundësisë të ardhshme të Klopp te Chelsea cilësohet i pabazuar. Po ashtu, edhe Manchester United ka mohuar çdo kontakt me agjentin e trajnerit, duke sqaruar spekulimet që qarkulluan në media ditët e fundit.

Ky reagim vjen në një periudhë kur spekulimet mbi të ardhmen e Klopp janë rritur, pas disa rezultateve jo të qëndrueshme të Liverpool, si dhe thashethemeve për trajnerë të mëdhenj që mund të ndryshojnë skuadrat në Premier League. Për momentin, trajneri gjerman vazhdon të jetë në krye të Liverpool, dhe nuk ka asnjë sinjal zyrtar që tregon ndryshim të ardhshëm në karrierën e tij.

Ekspertët dhe analistët e futbollit nënvizojnë se shpesh thashethemet për trajnerë të profilit të lartë janë të zakonshme, sidomos gjatë periudhave kur klubet kanë rezultate të diskutueshme ose kërkojnë rinovim të stafit teknik.