Author: N.T.

Manchester City është gati të ndezë tregun e transferimeve me një lëvizje të bujshme për yllin e Real Madridit, Vinicius Jr. Kampionët anglezë thuhet se po përgatisin një ofertë prej 150 milionë eurosh për brazilianin, duke synuar të përfitojnë nga ngërçi në bisedimet për rinovimin e kontratës së tij.

Sulmuesi 25-vjeçar është i lidhur me klubin madrilen deri në verën e vitit 2027, por ende nuk ka arritur një marrëveshje të re me drejtuesit e “Los Blancos”. Me kontratën që po hyn në dy vitet e fundit, pasiguria për të ardhmen e tij është rritur ndjeshëm.

Presidenti Florentino Perez mbetet i vendosur ta mbajë Viniciusin në “Santiago Bernabeu”, megjithatë negociatat kanë hasur në vështirësi. Raportohet se lojtari kërkon një pagë neto prej rreth 30 milionë eurosh në sezon, shifër që klubi spanjoll nuk është i gatshëm ta pranojë.

Në anën tjetër, Manchester City po kërkon të rikthehet në majën e futbollit anglez dhe evropian pas dy sezoneve pa triumf në Ligën Premier. Trajneri Enzo Maresca e sheh Viniciusin si pjesën kyçe të projektit të tij të ri dhe beson se braziliani mund të transformojë repartin ofensiv të skuadrës.

Nëse transferimi realizohet, Vinicius do të krijonte një treshe spektakolare në sulm së bashku me Rayan Cherki dhe Erling Haaland, një kombinim që premton të jetë ndër më të frikshmit në futbollin evropian.

Ndërkohë, ardhja e Kylian Mbappes te Real Madridi mund të ndikojë në vendimin e brazilianit. Burime pranë klubit sugjerojnë se Vinicius nuk ndihet më qendra e projektit sportiv dhe nuk është plotësisht i kënaqur me rolin që ka marrë pas transferimit të francezit.

Një kalim në “Etihad Stadium” do t’i ofronte atij mundësinë të ishte lideri i padiskutueshëm i skuadrës, me një sistem loje të ndërtuar rreth cilësive të tij, shpejtësisë, driblimeve dhe kreativitetit.

Vinicius vjen pas një sezoni tjetër mbresëlënës me Real Madridin, ku regjistroi 22 gola dhe 14 asistime në 53 paraqitje në të gjitha garat, statistika që e konfirmojnë si një nga futbollistët më të kërkuar në botë.

Tani mbetet për t’u parë nëse Manchester City do ta formalizojë ofertën prej 150 milionë eurosh dhe nëse Real Madridi do të pranojë të negociojë largimin e një prej lojtarëve më të rëndësishëm të skuadrës.

Cristiano Ronaldo ka komentuar eliminimin e Portugalisë nga Kupa e Botës 2026, pas humbjes minimale 1-0 ndaj Spanjës në fazën e 1/8 së finales. Kapiteni portugez u shpreh se sfida ishte e ekuilibruar dhe u vendos nga një moment vendimtar në favor të rivalëve.

Portugalia u ndëshkua në minutat shtesë të takimit, duke i dhënë fund ëndrrës për të vazhduar më tej në turne. Sipas Ronaldos, fati buzëqeshi Spanjës në fund të ndeshjes.

“Ndeshja mund të shkonte në favor të secilës skuadër. Spanja pati fat që gjeti golin në minutat e fundit, por ky është futbolli. Në përgjithësi ishte një përballje shumë e barabartë”, deklaroi ai.

Veterani portugez pranoi se ekipi i tij mund të kishte bërë më shumë, por theksoi se u eliminua nga një prej skuadrave më të forta të turneut.

“Mund të kishim luajtur më mirë, por u eliminuam nga një ekip që besoj se do të arrijë në finale ose do të jetë shumë pranë saj. Ishte një ndeshje e luftuar deri në fund.”

Ronaldo vlerësoi angazhimin e bashkëlojtarëve, duke theksuar se Portugalia la gjithçka në fushën e lojës.

“Ne dhamë maksimumin dhe, kur e bën këtë, nuk ke asgjë për t’ia qortuar vetes.”

Megjithatë, 41-vjeçari nuk zbuloi nëse kjo ishte paraqitja e tij e fundit me fanellën e Portugalisë. E ardhmja e tij në kombëtare mbetet ende e paqartë.

Ndeshja mes Holandës dhe Marokut në Kupën e Botës 2026 solli emocione të mëdha jo vetëm për atë që ndodhi në fushë, por edhe për një histori prekëse që përfshiu sulmuesin holandez Cody Gakpo.

Pak para zhvillimit të takimit, futbollisti i Liverpoolit u përball me një humbje të rëndë në jetën personale, pasi partnerja e tij, Noa van der Bij, humbi foshnjën gjatë shtatzënisë.

Pavarësisht dhimbjes së madhe, Gakpo vendosi të mos e linte vetëm kombëtaren e tij dhe zbriti në fushë për të ndihmuar Holandën. Sulmuesi madje arriti të shënonte, por goli i tij nuk mjaftoi për të shmangur eliminimin.

Maroku barazoi rezultatin përmes Issa Diop, duke e çuar sfidën në kohën shtesë, ndërsa fituesi u vendos vetëm pas ekzekutimit të penalltive, ku marokenët siguruan kualifikimin.

Megjithatë, momenti që preku më shumë opinionin sportiv erdhi pas vërshëllimës së fundit. Futbollistët e Marokut iu afruan Gakpos për ta përqafuar dhe për t’i shprehur ngushëllimet për humbjen që kishte përjetuar ai dhe familja e tij.

Pamjet e këtij gjesti u shpërndanë me shpejtësi në rrjetet sociale, duke u vlerësuar si një shembull i respektit, solidaritetit dhe humanizmit që futbolli mund të dhurojë edhe në momentet më të vështira.

Edhe një herë u dëshmua se, përtej rivalitetit dhe rezultatit, futbolli mbetet një sport që bashkon njerëzit, ndërsa lojtarët e Marokut fituan admirimin e tifozëve jo vetëm për paraqitjen e tyre në fushë, por edhe për sjelljen e tyre fisnike jashtë saj.

Pas triumfit në Çmimin e Madh të Barcelonës dhe vendit të pestë në garën e zhvilluar fundjavën e kaluar në Austri, Lewis Hamilton është i bindur se fundjava në Silverstone mund t’i sjellë një tjetër rezultat të madh.

Piloti britanik i Ferrarit rikthehet në pistën e shtëpisë me objektivin e qartë për të luftuar për fitoren, në një cirkuit ku ka shkruar historinë e Formula 1. Hamilton është piloti më i suksesshëm në Silverstone, me plot nëntë fitore, një rekord që askush tjetër nuk e ka arritur.

Shtatë herë kampioni i botës pranon se Silverstone zë një vend të veçantë në karrierën e tij, jo vetëm për sukseset e arritura, por edhe për atmosferën që krijojnë tifozët britanikë.

“Nuk ka vend tjetër si Silverstone. Është një nga pistat më të shpejta dhe më sfiduese në kalendar. Çdo xhiro të vë në provë dhe kërkon maksimumin nga piloti dhe makina”, u shpreh Hamilton.

Britaniku theksoi se energjia që merr nga publiku vendas është një motivim shtesë, duke e bërë fundjavën në Silverstone krejtësisht të ndryshme nga çdo garë tjetër.

“Mbështetja e tifozëve është e jashtëzakonshme. Kur je në pistë, e ndien atë energji dhe kjo e bën përvojën unike”, shtoi ai.

Hamilton foli edhe për ecurinë e tij te Ferrari, duke theksuar se skuadra po ndërton një projekt afatgjatë dhe se rezultatet janë fryt i punës së vazhdueshme.

“Nuk ekziston një formulë magjike për të fituar. Suksesi vjen nga puna e përditshme, përkushtimi dhe bashkëpunimi i të gjithë ekipit. Pikërisht këtë po shoh te Ferrari dhe jam krenar për rrugëtimin që po ndërtojmë së bashku.”

Sipas 41-vjeçarit, skuadra italiane po fiton gjithnjë e më shumë qëndrueshmëri, ndërsa objektivi është që çdo fundjavë gare të shfrytëzohet në maksimum.

Me rekordin e nëntë fitoreve në Silverstone dhe mbështetjen e mijëra tifozëve vendas, Hamilton shpreson që fundjava në Britaninë e Madhe të jetë momenti ideal për t’u rikthyer në shkallën më të lartë të podiumit.

Eliminimi i hershëm i Gjermanisë nga Kupa e Botës 2026 mund t’i kushtojë shtrenjtë Julian Nagelsmannit, i cili është shumë pranë largimit nga posti i përzgjedhësit të “Pancerëve”.

Sipas asaj që raporton Bild, Federata Gjermane e Futbollit (DFB) i ka kërkuar trajnerit 38-vjeçar të shqyrtojë mundësinë e dorëheqjes, edhe pse kontrata e tij është e vlefshme edhe për dy vite të tjera.

Pas disfatës ndaj Paraguait në fazën e 1/8 së finales, krerët e DFB-së zhvilluan një takim maratonë që zgjati rreth tri orë me Nagelsmannin. Në takim morën pjesë presidenti Bernd Neuendorf, Hans-Joachim Watzke, Rudi Völler dhe Andreas Rettig, të cilët analizuan dështimin e kombëtares dhe diskutuan të ardhmen e bankinës gjermane.

Raporti mes palëve duket se ka hyrë në një fazë vendimtare. Federata i ka lënë kohë trajnerit që të marrë një vendim për të ardhmen e tij, duke i hapur rrugën një largimi me marrëveshje.

Në rast se Nagelsmann vendos të mos japë dorëheqjen, DFB ka në dispozicion mundësinë për të ndërprerë kontratën në mënyrë të njëanshme. Megjithatë, një vendim i tillë do t’i kushtonte federatës rreth 7 milionë euro, shumë që parashikohet si dëmshpërblim për prishjen e parakohshme të kontratës.

Ndërkohë, në Gjermani kanë nisur tashmë spekulimet për pasuesin e mundshëm të Nagelsmannit. Emri që po përmendet më së shumti është ai i Jürgen Klopp, i cili konsiderohet kandidati ideal për të marrë drejtimin e kombëtares dhe për të nisur një epokë të re pas zhgënjimit në Botëror.

Sipas mediave gjermane, vendimi përfundimtar mbi të ardhmen e Nagelsmannit pritet të merret në ditët e para të javës së ardhshme.

Albion Rrahmani është vetëm një hap larg aventurës së re në futbollin italian. Sulmuesi i Kosovës pritet të bëhet futbollisti më i ri i Venezias, duke i dhënë fund qëndrimit të tij te Sparta e Pragës.

Sipas gazetarit të njohur italian Matteo Moretto, marrëveshja mes të gjitha palëve është arritur dhe transferimi tashmë konsiderohet i mbyllur. Kanë mbetur vetëm procedurat përfundimtare, me Rrahmanin që pritet t’i nënshtrohet vizitave mjekësore, përpara se të firmosë kontratën me klubin italian.

Ky transferim do t’i japë 25-vjeçarit mundësinë të provojë veten në Serie A, një nga kampionatet më prestigjioze në Evropë, pas eksperiencave të tij në Kosovë, Rumani dhe Republikën Çeke.

Rrahmani e ndërtoi emrin e tij te Ballkani, ku shkëlqeu nën drejtimin e trajnerit Ilir Daja, para se të transferohej te Rapidi i Bukureshtit. Performancat e mira në Rumani i siguruan më pas kalimin te Sparta e Pragës, ndërsa tani karriera e tij pritet të vazhdojë në elitën e futbollit italian.

Gjatë karrierës, reprezentuesi i Kosovës ka veshur gjithashtu fanellat e Llapit, Bashkimit, Malishevës dhe Minatorit, duke ndërtuar gradualisht rrugën drejt një transferimi në një prej ligave më të forta në botë.

Kombëtarja e Kosovës në basketboll do të zbresë sonte në parket për sfidën ndaj Shqipërisë, e vlefshme për parakualifikimet e FIBA EuroBasket 2029.

Takimi do të zhvillohet në Prizren, me fillim nga ora 19:00, ndërsa “Dardanët” synojnë ta nisin me fitore rrugëtimin në këtë cikël kualifikues.

Përzgjedhësi i Kosovës ka publikuar tashmë listën zyrtare të 12 basketbollistëve që do të jenë në dispozicion për ndeshjen e sontme, pas përfundimit të përgatitjeve që kishin nisur më 17 qershor.

Nga lista fillestare prej 15 lojtarëve janë përzgjedhur 12 emrat që do ta përfaqësojnë Kosovën në këtë përballje, ndërsa ekipi do të paraqitet me disa mungesa të rëndësishme.

Valon Bunjaku nuk do të jetë në dispozicion për shkak të një lëndimi, ndërsa jashtë skuadrës kanë mbetur edhe Gëzim Morina dhe Rron Ukaj, të cilët gjithashtu nuk kanë arritur të rikuperohen në kohë.

Pavarësisht mungesave, te kampi i Kosovës mbretëron optimizëm se skuadra është e gatshme për të zhvilluar një paraqitje të mirë para tifozëve vendas dhe për ta nisur me rezultat pozitiv aventurën drejt EuroBasket 2029.

Lufta për “Këpucën e Artë” në Kupën e Botës 2026 po bëhet gjithnjë e më emocionuese, teksa katër prej emrave më të mëdhenj të futbollit botëror, Linoel Messi, Kylian Mbappe, Erling Haaland dhe Harry Kane, vazhdojnë të dominojnë listën e golashënuesve.

Me turneun që ka hyrë në fazën eliminatore, secili prej tyre jo vetëm që synon ta udhëheqë kombëtaren drejt trofeut më të madh në futboll, por edhe të rrëmbejë çmimin individual për golashënuesin më të mirë të Botërorit.

Në krye të renditjes qëndrojnë Lionel Messi dhe Kylian Mbappe, të cilët kanë realizuar nga gjashtë gola secili. Sulmuesi francez arriti këtë shifër pas dopietës ndaj Suedisë, duke konfirmuar edhe një herë statusin e tij si lideri i repartit ofensiv të Francës dhe një nga futbollistët më vendimtarë të këtij edicioni.

Në anën tjetër, Messi po zhvillon një tjetër Botëror të jashtëzakonshëm. Kapiteni i Argjentinës ka gjetur rrugën e rrjetës në çdo ndeshje të kombëtares së tij deri më tani, përfshirë tregolëshin ndaj Algjerisë dhe dy golat kundër Austrisë, duke mbetur në krye të garës për “Këpucën e Artë”.

Vetëm një gol më pak kanë Erling Haaland dhe Harry Kane, të cilët kanë realizuar nga pesë gola. Sulmuesi norvegjez ka impresionuar në debutimin e tij në Kupën e Botës, duke qenë figura kryesore e Norvegjisë në rrugëtimin drejt fazës eliminatore dhe duke dëshmuar edhe një herë instinktin e tij të jashtëzakonshëm për gol.

Edhe kapiteni i Anglisë, Harry Kane, po vazhdon të jetë vendimtar për “Tre Luanët”. Me pesë realizime deri tani, ai ka udhëhequr anglezët drejt fazës së 1/8 së finales dhe mbetet një nga kandidatët më seriozë për ta fituar çmimin e golashënuesit më të mirë të turneut.

Megjithatë, pavarësisht rivalitetit individual, protagonistët vazhdojnë të theksojnë se objektivi kryesor mbetet suksesi me kombëtaret e tyre. Mbappe e bëri të qartë këtë pas fitores së Francës ndaj Suedisë.

“Qëllimi ynë është të shkojmë sa më larg dhe të arrijmë finalen. Jemi të përqendruar vetëm te ndeshja e radhës dhe te suksesi i skuadrës,” deklaroi ylli francez.

Me fazën eliminatore që sapo ka nisur dhe ndeshjet që bëhen gjithnjë e më vendimtare, gara për “Këpucën e Artë” pritet të mbetet e hapur deri në fund të turneut. Çdo gol mund të ndryshojë renditjen, ndërsa Messi, Mbappe, Haaland dhe Kane vazhdojnë betejën e tyre për të shkruar emrin në historinë e Kupës së Botës 2026.

Kupa e Botës 2026 vazhdon sot me tri përballje mjaft interesante në kuadër të fazës eliminatore, ku kombëtaret do të synojnë të hedhin një tjetër hap drejt ëndrrës për titullin e kampionit të botës.

Programin e ditës e hap sfida mes Spanjës dhe Austrisë, e cila nis në ora 19:00. Spanjollët konsiderohen favoritë për këtë takim, falë përvojës, cilësisë së lartë në përbërje dhe paraqitjeve bindëse gjatë turneut. Megjithatë, Austria ka dëshmuar se është një skuadër e organizuar dhe e rrezikshme në kundërsulme, ndaj nuk pritet ta ketë aspak të lehtë kombëtarja iberike.

Nga ora 23:00, vëmendja do të jetë te supersfida mes Portugalisë dhe Kroacisë. Portugalia shihet si favorite e lehtë për të kaluar në çerekfinale, pasi ka zhvilluar një turne mjaft të mirë dhe disponon një ekip me shumë cilësi në të gjitha repartet. Në anën tjetër, Kroacia mbetet një kundërshtar i fortë dhe me përvojë në ndeshjet e mëdha, ndaj pritet një duel shumë i luftuar deri në minutën e fundit.

Ndeshja e fundit e ditës zhvillohet pas mesnate, në ora 03:00, ku përballen Zvicra dhe Algjeria. Në letër, Zvicra konsiderohet favorite falë stabilitetit dhe eksperiencës në turne të mëdha, por Algjeria ka qenë një nga surprizat më të këndshme të këtij Botërori dhe ka treguar se mund të rivalizojë me çdo kundërshtar.

Deri më tani, një vend në çerekfinale e kanë siguruar Kanadaja, Brazili, Paraguai, Maroku, Norvegjia, Franca, Meksika, Anglia, Belgjika dhe Shtetet e Bashkuara të Amerikës (SHBA).

Ndërkohë, garës i kanë dhënë fund Afrika e Jugut, Japonia, Gjermania, Holanda, Bregu i Fildishtë, Suedia, Ekuadori, Republika Demokratike e Kongos, Senegali dhe Bosnja e Hercegovina.

Tri përballjet e sotme pritet të ofrojnë spektakël dhe emocione të shumta, pasi bëhet fjalë për ndeshje me sistem eliminimi direkt, ku çdo gabim mund t’i kushtojë një kombëtare eliminimin nga gara. Në fund të mbrëmjes do të mësohen edhe tre çerekfinalistët e rinj, ndërsa gara për trofeun e Kupës së Botës 2026 hyn gjithnjë e më shumë në fazën vendimtare.

Kawhi Leonard do të veshë sërish fanellën e Toronto Raptors, shtatë vjet pasi u largua nga klubi për t’iu bashkuar Los Angeles Clippers.

Sipas raportimeve të gazetarit të njohur Shams Charania, Raptors kanë arritur marrëveshje me Clippers për rikthimin e 35-vjeçarit. Në këmbim, drejt Los Angelesit do të transferohen Brandon Ingram, Gradey Dick, dy zgjedhje të raundit të parë në draft, një e drejtë shkëmbimi në raundin e parë dhe dy zgjedhje të raundit të dytë.

Rikthimi i Leonardit ishte përfolur prej ditësh, pasi lojtari kishte shprehur gatishmërinë për të firmosur kontratë të re vetëm me Toronton. Tashmë palët pritet të nisin bisedimet për një marrëveshje afatgjatë.

Leonard mbetet një figurë historike për Raptors, pasi në sezonin 2018/19 i udhëhoqi drejt titullit të parë kampion në historinë e klubit, duke u shpallur edhe MVP i finaleve të NBA-së.

Edhe pse 35 vjeç, amerikani vjen pas një sezoni shumë të mirë me Clippers, ku regjistroi mesatarisht 27.9 pikë dhe 1.9 vjedhje topi për ndeshje.

Me rikthimin e Leonardit dhe praninë e Scottie Barnes, Raptors synojnë të rikthehen mes skuadrave pretendente për titull në sezonin e ri të NBA-së.