Author: N.T.

Kombëtarja e Kosovës U20 në konkurrencën e meshkujve ka mësuar kundërshtarët e saj në fazën e grupeve të FIBA U20 EuroBasket 2026, Divizioni B, pas shortit të hedhur për turneun që do të zhvillohet në Bratislavë të Sllovakisë.

“Dardanët” e rinj janë pozicionuar në Grupin C, ku i presin përballje të forta ndaj Portugalisë, Bosnjë e Hercegovinës, Islandës, Armenisë dhe Qipros, në garën për një vend në fazën tjetër të kampionatit.

Evropiani do të zhvillohet nga 10 deri më 19 korrik, ndërsa në Bratislavë do të mblidhen disa nga talentet më premtues të basketbollit evropian, të cilët do të luftojnë për promovimin në Divizionin A.

Kosova e nis këtë edicion me synimin për të bërë paraqitje sa më dinjitoze dhe për të konkurruar në nivel të lartë ndaj kundërshtarëve të grupit. Federata e Basketbollit e Kosovës dhe stafi teknik shpresojnë që brezi aktual të konfirmojë potencialin e tij dhe të sjellë rezultate pozitive në arenën ndërkombëtare.

Për “Dardanët” e rinj, EuroBasket U20 do të jetë një mundësi e rëndësishme për të fituar përvojë në nivel kontinental, por edhe për të dëshmuar cilësitë e tyre përballë disa prej përfaqësueseve më konkurruese të Divizionit B.

Jannik Sinner po konfirmon statusin e favoritit kryesor në Wimbledon. Tenisti italian, që mban vendin e parë në renditjen botërore, ka siguruar një vend në gjysmëfinale pas një paraqitjeje solide ndaj gjermanit Jan-Lennard Struff, të cilin e mposhti me rezultat të pastër 3-0 në sete (7-5, 7-6, 6-3).

Edhe pse Struff i bëri rezistencë të fortë në dy setet e para, Sinner tregoi qetësi në momentet vendimtare, duke fituar fillimisht 7-5 dhe më pas setin e dytë pas një “tie-break”-u të luftuar. Në setin e tretë, italiani dominoi lojën dhe e mbylli ndeshjen me rezultatin 6-3, duke siguruar kualifikimin mes katër tenistëve më të mirë të turneut.

Me këtë fitore, 24-vjeçari vazhdon ëndrrën për ta fituar për herë të parë trofeun e Wimbledonit, pasi deri më tani ka zhvilluar një turne pothuajse perfekt dhe mbetet një nga pretendentët kryesorë për titull.

Në konkurrencën e femrave janë mësuar gjithashtu gjysmëfinalistet e para. Amerikania Coco Gauff përmbysi rezultatin ndaj bashkëkombases Jessica Pegula, duke triumfuar 2-1 me sete (4-6, 6-3, 6-3) dhe duke siguruar një tjetër paraqitje në mesin e katër më të mirave.

Rivalja e saj në gjysmëfinale do të jetë çekja Karolina Muchova, e cila eliminoi ish-numrin një të botës, Naomi Osaka. Muchova fitoi në dy sete, 7-6 dhe 6-4, pas një ndeshjeje me ritëm të lartë dhe shumë rivalitet.

Ndërkohë, në garën e meshkujve u zhvillua edhe çerekfinalja e mbetur, ku Alexander Zverev kaloi me sukses pengesën e çekut Jiri Lehecka. Gjermani triumfoi me rezultat 3-1 në sete, duke kompletuar kështu listën e gjysmëfinalistëve në Wimbledon.

Turneu më prestigjioz i tenisit po hyn në fazën vendimtare, ndërsa tifozët presin përballje spektakolare në luftën për një vend në finalen e madhe.

Mesfushori i Kombëtares së Shqipërisë, Ylber Ramadani, i ka dhënë fund aventurës së tij në futbollin italian, duke u transferuar zyrtarisht te ARCA Çorum FK, klub që garon në Superligën e Turqisë.

Lajmi është konfirmuar nga vetë klubi turk, i cili ka bërë të ditur se ka arritur marrëveshje me Lecce për transferimin përfundimtar të 29-vjeçarit, ndërsa me futbollistin shqiptar është firmosur një kontratë dyvjeçare me opsion rinovimi edhe për një sezon tjetër.

Në deklaratën zyrtare, ARCA Çorum FK i uroi mirëseardhje Ramadanit, duke shprehur besimin se ai do të jetë një përforcim i rëndësishëm për skuadrën.

“Klubi ynë ka arritur marrëveshje me US Lecce për transferimin përfundimtar të futbollistit profesionist Ylber Ramadani. Me lojtarin është nënshkruar një kontratë 2+1-vjeçare. Besojmë se ai do të ketë një karrierë të suksesshme me fanellën e ARCA Çorum FK dhe i urojmë mirëseardhje e shumë suksese në rrugëtimin e ri”, thuhet në komunikatën e klubit.

Për Ramadanin, ky transferim shënon një etapë të re në karrierë, pas dy sezoneve të kaluara në Serie A me Leccen, ku u dallua për paraqitjet e tij të qëndrueshme dhe rolin kyç në mesfushë.

Tashmë, reprezentuesi shqiptar do të synojë të lërë gjurmë edhe në futbollin turk, ku pritet të ketë një rol të rëndësishëm në planet e skuadrës së re.

Sipas raportimeve, ARCA Çorum FK ka paguar rreth 1 milion euro për të siguruar kartonin e mesfushorit shqiptar, duke e bërë Ramadanin një nga investimet më të rëndësishme të klubit në këtë afat kalimtar.

Lionel Messi edhe një herë dëshmoi pse konsiderohet një nga futbollistët më të mëdhenj të të gjitha kohërave, duke vendosur një rekord të ri historik në Kupën e Botës FIFA gjatë fitores dramatike 3-2 të Argjentinës ndaj Egjiptit në fazën e 1/8-tës së finales.

Kapiteni i “Albiceleste” ishte protagonisti absolut në një mbrëmje të paharrueshme, ku Argjentina përmbysi disavantazhin 0-2 për të siguruar kualifikimin në çerekfinale me tre gola të shënuar në pjesën e mbetur të ndeshjes.

Messi fillimisht shërbeu Cristian Romeron për golin që hapi rikthimin e argjentinasve, më pas gjeti vetë rrugën e rrjetës për të barazuar shifrat, ndërsa Enzo Fernández vulosi përmbysjen në minutat shtesë pas asistimit të Lautaro Martínez.

Falë një goli dhe një asistimi në këtë sfidë, ylli argjentinas hyri sërish në librat e historisë. Në moshën 39 vjeç e 13 ditë, Messi u bë futbollisti më i vjetër që arrin të shënojë dhe të japë një asistim në të njëjtën ndeshje të fazës eliminatore të një Kampionati Botëror.

Ky është vetëm një tjetër kapitull në karrierën e jashtëzakonshme të tetë herë fituesit të “Topit të Artë”, i cili vazhdon të thyejë rekorde edhe në Botërorin 2026.

Messi tashmë ka zgjeruar edhe më tej epërsinë si golashënuesi më i mirë në historinë e Kupës së Botës, ndërsa mbetet figura kyçe e Argjentinës në synimin për të mbrojtur titullin e kampionit të botës.

Federata Egjiptiane e Futbollit ka reaguar ashpër pas eliminimit dramatik nga Argjentina në fazën e 1/8-tës së Kupës së Botës 2026, duke dorëzuar një ankesë zyrtare në FIFA për arbitrimin e sfidës që përfundoi me fitoren 3-2 të argjentinasve.

Sipas raportimeve të RMC Sport dhe TyC Sports, drejtuesit e futbollit egjiptian janë të bindur se skuadra e tyre u dëmtua nga vendime të rënda të arbitrave dhe kanë kërkuar nisjen e një hetimi të menjëhershëm, si dhe masa disiplinore ndaj trupës gjykuese.

Në qendër të kritikave është arbitri francez François Letexier, për të cilin Egjipti kërkon pezullim deri në përfundim të Botërorit, së bashku me asistentët e tij.

Në ankesën e paraqitur në FIFA, egjiptianët theksojnë dy momente që, sipas tyre, ndikuan drejtpërdrejt në fatin e ndeshjes.

I pari lidhet me golin e shënuar nga Mostafa Ziko në minutën e 58-të, i cili do t’i jepte Egjiptit epërsinë 2-0. Gjyqtari e anuloi realizimin për një faull të pretenduar të Marëan Attia në nisje të aksionit, vendim që pala egjiptiane e cilëson të pabazuar.

Momenti i dytë ka të bëjë me aksionin që parapriu golin e tretë dhe vendimtar të Argjentinës, të realizuar nga Enzo Fernández. Sipas Egjiptit, Mohamed Salah u pengua në mënyrë të parregullt, por arbitri nuk akordoi penallti, ndërsa VAR-i nuk ndërhyri për ta rishikuar situatën.

Eliminimi i Egjiptit ka ndezur debat të madh në opinionin sportiv, me shumë diskutime rreth rolit të arbitrimit në një nga ndeshjet më dramatike të këtij Botërori.

Tashmë topi është në fushën e FIFA-s, e cila pritet të shqyrtojë ankesën dhe të vendosë nëse do të ndërmarrë masa ndaj gjyqtarit Letexier dhe ekipit të tij apo do t’i konsiderojë vendimet e marra si pjesë e interpretimit të lojës.

Kapiteni shqiptar i Kombëtares së Zvicrës, Granit Xhaka, ka ndarë një mesazh plot emocion në rrjetet sociale pas triumfit dramatik ndaj Kolumbisë, që i siguroi helvetikëve një vend në çerekfinalen e Kupës së Botës 2026.

Zvicra shkroi histori duke eliminuar Kolumbinë në fazën e 1/8-tës së finales. Pas një përballjeje të luftuar deri në fund, fituesi u vendos nga penalltitë, ku zviceranët triumfuan me rezultat 4-3 dhe vazhduan rrugëtimin në turneun më prestigjioz të futbollit botëror.

Menjëherë pas përfundimit të ndeshjes, Xhaka reagoi në llogarinë e tij në Instagram, duke shprehur krenarinë dhe besimin për atë që e pret skuadrën në vazhdim.

“Rrugëtimi vazhdon… Ëndrra është ende gjallë. Jemi në çerekfinale. Le të vazhdojmë të besojmë,” shkroi kapiteni i Zvicrës.

Ky sukses e rendit Zvicrën mes tetë kombëtareve më të mira të Botërorit, ndërsa skuadra e drejtuar nga Xhaka tashmë synon një tjetër befasi në fazën çerekfinale.

Sfida e radhës nuk do të jetë aspak e lehtë, pasi helvetikët do të përballen me kampionët e botës, Argjentinën. Takimi do të zhvillohet në orën 03:00 të mëngjesit të së dielës, në një duel që pritet të dhurojë spektakël dhe emocione.

Një kapitull i madh i futbollit brazilian ka marrë fund. Pas eliminimit të Brazilit nga Kupa e Botës, me humbjen 1-2 ndaj Norvegjisë, Neymar Jr. ka vendosur të mbyllë aventurën e tij me fanellën e kombëtares.

Sulmuesi 34-vjeçar i Santosit ka njoftuar tërheqjen nga futbolli ndërkombëtar, duke i dhënë fund një rrugëtimi të gjatë me “Selecaon”, ku për vite me radhë ishte figura kryesore dhe një nga shpresat më të mëdha të Brazilit për të rikthyer trofeun e Botërorit.

Pas këtij vendimi, babai i tij, Neymar Sr., ka reaguar me një mesazh emocional në rrjetet sociale, duke shprehur krenarinë për rrugëtimin e të birit, por edhe duke i bërë një kërkesë të veçantë që të vazhdojë të luajë futboll.

“Oh, bir… Çfarë udhëtimi. Një ëndërr që ende nuk është realizuar nuk do të thotë se ka vdekur.”

Neymar Sr. kujtoi rrugën e jashtëzakonshme të djalit të tij, nga një talent i ri deri te një prej futbollistëve më të mëdhenj të brezit të tij.

“E pashë djaloshin të rritej dhe të bëhej një nga lojtarët më të mëdhenj të gjeneratës së tij. Më i miri nuk përcaktohet nga mosha apo rrethanat.”

Në fund, ai i kërkoi Neymarit të vazhdojë të shijojë atë që ka dashur gjithmonë.

“Bir, vazhdo të luash futboll. Rizbulo gëzimin e topit në këmbët e tua. Zoti të ka dhënë një mundësi tjetër për të bërë atë që gjithmonë ke dashur. Shijoje futbollin.”

Mesazhi i Neymar Sr. ishte një përkrahje e fuqishme nga një baba që beson se talenti dhe pasioni i djalit të tij ende nuk janë shuar.

Edhe pse aventura me Brazilin ka përfunduar, Neymar mbetet një nga figurat më të rëndësishme të futbollit brazilian në dekadat e fundit, me gola, magji dhe momente që do të mbeten gjatë në kujtesën e tifozëve.

Pas një mungese të gjatë nga oktagoni, Conor McGregor është gati të rikthehet në skenën më të madhe të arteve marciale të përziera. Ish-kampioni i dyfishtë i UFC-së do të ngjitet sërish në kafaz këtë të shtunë në T-Mobile Arena në Las Vegas, ku do të përballet me Max Holloway në eventin kryesor të UFC 329, në kategorinë welter.

Kjo do të jetë ndeshja e parë e irlandezit që nga korriku i vitit 2021, kur pësoi një frakturë të rëndë në këmbë gjatë përballjes me Dustin Poirier në UFC 264. Pas një rikuperimi të gjatë, McGregor beson se është gati të nisë një kapitull të ri në karrierën e tij.

Luftëtari me rekord 22 fitore dhe 6 humbje deklaroi se rikthimi i tij nuk ka të bëjë vetëm me një ndeshje, por me ambicien për të dominuar sërish sportin.

“Ndjej se kam ende shumë për të arritur. Dua më shumë tituj, më shumë rripa kampioni, më shumë nokaut, më shumë rekorde dhe më shumë fitore. Kam punuar shumë për të ndërtuar këtë trashëgimi dhe tani dua të përfitoj nga gjithçka që kam krijuar.”

McGregor shtoi se vazhdon ta konsiderojë veten një nga figurat më të mëdha të sporteve luftarake dhe është i bindur se mund ta dëshmojë këtë edhe një herë.

“Bota e arteve marciale të përziera është bota ime. Jam këtu për ta treguar sërish se çfarë jam në gjendje të bëj dhe këtë do ta shihni të shtunën.”

Edhe pse në korrik mbush 37 vjeç, irlandezi nuk mendon ende për tërheqjen. Ai pranoi se ndodhet në fazën e fundit të karrierës, por jo në fundin e ambicieve të tij. Pas sfidës me Holloway, McGregor do të ketë edhe një ndeshje të mbetur në kontratën aktuale me UFC-në, çka e bën këtë duel edhe më të rëndësishëm për të ardhmen e tij.

Nga ana tjetër, Max Holloway nuk do të jetë aspak një kundërshtar i lehtë. Ish-kampioni dhe një nga emrat më të respektuar të UFC-së synon t’i japë fund rikthimit të bujshëm të McGregorit dhe të rikthehet në garën për titujt më të rëndësishëm.

Pavarësisht sfidës që e pret, McGregor mbetet i bindur se është gati të dëshmojë edhe një herë vlerat e tij.

“Fjalët nuk kanë më rëndësi. Tani është radha ime ta tregoj në kafaz, dhe pikërisht këtë do të bëj.”

Portieri i Belgjikës, Thibaut Courtois, nuk e fshehu kënaqësinë pas fitores së thellë 4-1 ndaj Shteteve të Bashkuara në Kupën e Botës 2026, por përveç analizës së ndeshjes, ai pati edhe disa deklarata të forta në adresë të kundërshtarëve.

Gardiani belg iu rikthye polemikave që paraprinë sfidën, të lidhura me vendimin e FIFA-s për t’i lejuar sulmuesit amerikan Folarin Balogun të luante pavarësisht pezullimit, një çështje që kishte shkaktuar pakënaqësi te Federata e Futbollit e Belgjikës.

“Në një farë mënyre, ia dolëm t’i përgjigjemi në fushë mungesës së respektit që amerikanët treguan ndaj nesh gjatë ditëve të fundit”, u shpreh Courtois pas përfundimit të takimit.

Portieri belg minimizoi gjithashtu forcën e përfaqësueses amerikane, duke theksuar se sfida ndaj Senegalit kishte qenë shumë më e vështirë sesa ajo ndaj SHBA-së.

“Kam lexuar shumë gjëra këto ditë dhe vetëm më kanë bërë të buzëqesh. E kuptoj se donin të krijonin sa më shumë vëmendje rreth SHBA-së, por sinqerisht isha më i bindur për fitoren në këtë ndeshje sesa në përballjen me Senegalin, i cili, sipas mendimit tim, ka një ekip më të fortë”, deklaroi ai.

Belgjika tashmë ka siguruar një vend në çerekfinale, ku e pret një përballje shumë e vështirë ndaj Spanjës. Megjithatë, Courtois kërkoi që skuadra të mos ushtrojë presion të panevojshëm mbi veten.

“Objektivi ynë ishte të arrinim në çerekfinale. Tani e kemi përmbushur atë dhe gjithçka që do të vijë nga ky moment e tutje do të jetë një bonus”, përfundoi portieri belg.

Raundi i katërt i turneut prestigjioz Wimbledon ka dhuruar emocione dhe rezultate interesante, me shumicën e biletave për në çerekfinale që tashmë kanë gjetur pronarët. Megjithatë, njëra nga sfidat më të rëndësishme mbetet ende e hapur dhe do të përfundojë gjatë ditës së sotme.

Tenisti gjerman Alexander Zverev është shumë pranë kualifikimit, pasi kryeson me sete 2-0 ndaj çekut Jiri Lehecka. Takimi u ndërpre për shkak të errësirës, në momentin kur seti i tretë ishte në barazim 3-3, duke lënë gjithçka për t’u vendosur në vazhdimin e ndeshjes.

Ndërkohë, italiani Flavio Cobolli vazhdon paraqitjet mbresëlënëse në barin londinez. Ai dominoi australianin Alex de Minaur, duke triumfuar me rezultat të pastër 3-0 dhe duke siguruar një vend mes tetë tenistëve më të mirë të turneut.

Në çerekfinale ka kaluar edhe amerikani Taylor Fritz, i cili zhvilloi një ndeshje shumë të mirë ndaj kazakut Alexander Bublik, duke fituar gjithashtu me rezultat 3-0 dhe duke konfirmuar formën e tij të shkëlqyer.

Një tjetër duel spektakolar ishte ai mes britanikut Arthur Fery dhe bullgarit Grigor Dimitrov. Pas një beteje të gjatë me pesë sete, Fery arriti të triumfojë me rezultat 3-2, duke i dhuruar publikut vendas një tjetër arsye për festë.

Në konkurrencën e femrave, italiania Jasmine Paolini hasi më shumë vështirësi sesa pritej, por në fund arriti të siguronte kualifikimin. Ajo mposhti filipinasen Alexandra Eala me rezultat 2-1, duke treguar karakter në momentet vendimtare të takimit.

Biletën për në çerekfinale e prenë edhe ukrainasja Marta Kostyuk dhe belgia Elise Mertens, të cilat vazhdojnë rrugëtimin e tyre në turneun më prestigjioz në fushat me bar.

Surpriza më e madhe e ditës erdhi me eliminimin e amerikanes Madison Keys. Një nga favoritët e turneut u mposht në dy sete nga çekja Linda Noskova, e cila siguroi një fitore të rëndësishme dhe një vend në mesin e tetë tenisteve më të mira të Wimbledonit.