Author: N.T.

Eliminimi dramatik i Anglisë nga Argjentina në gjysmëfinalen e Kupës së Botës 2026 ka shkaktuar reagime të forta në mediat britanike, të cilat janë fokusuar në dy tema kryesore: taktikat e trajnerit Thomas Tuchel dhe banderolën kontroverse të shfaqur nga futbollistët argjentinas pas ndeshjes.

Shumica e gazetave dhe portaleve në Mbretërinë e Bashkuar kritikuan ashpër trajnerin gjerman, duke e fajësuar për mënyrën se si e menaxhoi ndeshjen pas golit të Anthony Gordon. Sipas analistëve, Anglia hoqi dorë nga loja sulmuese shumë herët, u tërhoq në mbrojtje dhe ia dorëzoi iniciativën Argjentinës, e cila e shfrytëzoi këtë qasje për të shënuar dy herë në minutat e fundit dhe për të siguruar finalen.

Kritikave iu bashkuan edhe disa prej emrave më të njohur të futbollit anglez. Ish-kapiteni dhe legjenda e Anglisë, Gary Lineker, e cilësoi qasjen taktike të Tuchelit si “të pakuptueshme”, duke theksuar se ishte gabim t’i jepej kaq shumë hapësirë Lionel Messit, i cili asistoi në të dy golat e Argjentinës. Edhe Harry Kane pranoi pas ndeshjes se skuadra u tërhoq shumë herët dhe e lejoi kundërshtarin të merrte kontrollin e lojës.

Në të njëjtën kohë, një pjesë e madhe e shtypit britanik u përqendrua te festimi i futbollistëve argjentinas pas ndeshjes. Lisandro Martinez dhe Giovani Lo Celso u fotografuan duke mbajtur një banderolë me mbishkrimin “Las Malvinas son Argentinas” (“Malvinet janë argjentinase”), një mesazh që i referohet mosmarrëveshjes së gjatë mes Argjentinës dhe Britanisë për Ishujt Falkland. Veprimi u cilësua nga shumë media britanike si provokues dhe politik.

Reagimet nuk mbetën vetëm në media. Ministri britanik Peter Kyle e quajti gjestin “krejtësisht të papërshtatshëm”, ndërsa kërkoi që FIFA të shqyrtojë rastin, pasi rregulloret e saj ndalojnë shfaqjen e mesazheve politike në stadiume dhe gjatë aktiviteteve zyrtare të turneut.

Pavarësisht polemikave, kritikat më të mëdha në Angli vazhdojnë të drejtohen ndaj Thomas Tuchelit, i cili përballet me presion të madh pas një tjetër eliminimi në prag të finales. Përballë një Argjentine të udhëhequr nga Lionel Messi, strategjia mbrojtëse e teknikut gjerman u konsiderua nga shumë analistë si arsyeja kryesore që “Tre Luanët” humbën një avantazh të çmuar dhe mbetën jashtë finales së Botërorit 2026.

Lionel Messi vazhdon të thyejë rekorde dhe të shkruajë historinë e futbollit botëror. Kapiteni i Argjentinës është bërë lojtari më i vjetër që ka luajtur ndonjëherë në një gjysmëfinale të Kupës së Botës, pasi zbriti në fushë kundër Anglisë në moshën 39 vjeç e 21 ditë.

Rekordi i ri erdhi në një mbrëmje të paharrueshme për “Albicelestët”, të cilët përmbysën Anglinë me rezultat 2-1 dhe siguruan një vend në finalen e Kupës së Botës 2026. Edhe pse nuk shënoi, Messi ishte protagonist absolut i ndeshjes, duke dhënë dy asistime për Enzo Fernandez dhe Lautaro Martinez, autorët e golave që i siguruan Argjentinës kualifikimin.

Ky është vetëm një nga rekordet që sulmuesi argjentinas ka vendosur gjatë këtij Botërori. Para gjysmëfinales, ai kishte realizuar tetë gola dhe kishte regjistruar dy asistime, duke qenë një nga kandidatët kryesorë për fitimin e “Këpucës së Artë”.

Turneu nisi në mënyrë ideale për Messin, i cili shënoi një tregolësh ndaj Algjerisë në paraqitjen e tij të 200-të me fanellën e Argjentinës. Me atë performancë, ai u bë lojtari më i vjetër që realizon një “hat-trick” në historinë e Kupës së Botës.

Më pas, Messi shënoi dy gola kundër Austrisë, realizoi ndaj Jordanisë, si dhe gjeti rrjetën në fazën eliminatore përballë Kepit të Gjelbër dhe Egjiptit. Me golat e tij ndaj Austrisë, ai kaloi Miroslav Klosen dhe u ngjit në vendin e parë si golashënuesi më i mirë në historinë e Kupës së Botës.

Përveç golave, Messi ka vazhduar të jetë vendimtar edhe me asistime. Në çerekfinale ndaj Zvicrës, ai asistoi Alexis Mac Allister, duke arritur në kuotën e 10 asistimeve në Kupat e Botës. Që nga viti 1966, kur asistimet regjistrohen zyrtarisht, asnjë futbollist nuk ka dhënë më shumë pasime për gol në këtë kompeticion.

Gjithashtu, Messi mban rekordin për përfshirjen më të madhe direkte në gola në fazat eliminatore të Kupës së Botës gjatë 60 viteve të fundit. Në tetë ndeshjet e fundit me eliminim direkt, ai ka kontribuar në 13 gola, duke shënuar shtatë dhe asistuar gjashtë të tjerë.

Tani, legjenda argjentinase do të ketë mundësinë të shtojë një tjetër kapitull të artë në karrierën e tij, pasi Argjentina do të përballet me Spanjën në finalen e Kupës së Botës 2026, e cila do të zhvillohet të dielën, më 19 korrik, nga ora 21:00. Nëse arrin ta udhëheqë Argjentinën drejt triumfit, Messi do të fitojë titullin e dytë radhazi të kampionit të botës, duke forcuar edhe më tej trashëgiminë e tij si një nga futbollistët më të mëdhenj të të gjitha kohërave.

Shoqata Norvegjeze e Futbollit ka marrë një vendim me karakter humanitar, duke njoftuar se të gjitha të ardhurat nga shitja e biletave të ndeshjes kualifikuese për Kupën e Botës 2026 kundër Izraelit do të dhurohen për popullsinë civile në Rripin e Gazës.

Fondet e mbledhura do të destinohen për organizatat humanitare dhe mjekësore që veprojnë në terren, mes tyre edhe organizata “Mjekët pa Kufij”, e cila vazhdon të ofrojë kujdes shëndetësor dhe ndihmë emergjente për banorët e prekur nga konflikti.

Përmes një komunikate zyrtare, Federata Norvegjeze theksoi se kjo nismë synon të ofrojë mbështetje konkrete për njerëzit që po përballen me një krizë të rëndë humanitare, duke vënë në plan të parë solidaritetin dhe ndihmën ndaj civilëve.

Vendimi është pritur me reagime të shumta pozitive, si në opinionin publik ashtu edhe në rrjetet sociale, ku është vlerësuar si një shembull i rolit që sporti mund të luajë përtej fushës së lojës, duke u shndërruar në një mjet solidariteti dhe mbështetjeje për komunitetet në nevojë.

Përfundimi i turneut prestigjioz të Wimbledonit ka sjellë edhe ndryshime në renditjen botërore të tenisit. Italianti Jannik Sinner vazhdon të dominojë në krye të listës ATP, pasi mbrojti me sukses pikët e fituara një vit më parë dhe tani ka krijuar një epërsi prej afro pesë mijë pikësh ndaj ndjekësit më të afërt.

Në vendin e dytë është ngjitur gjermani Alexander Zverev, falë paraqitjes së tij në finalen e Wimbledonit, duke lënë pas spanjollin Carlos Alcaraz. Ky i fundit vazhdon të bjerë në renditje, pasi mungon në gara prej dy muajsh për shkak të një dëmtimi.

Ndërkohë, te femrat, triumfi në Wimbledon i ka sjellë një ngjitje të rëndësishme çekes Linda Noskova, e cila tashmë renditet në vendin e shtatë në botë.

Pavarësisht kësaj, bjellorusja Aryna Sabalenka vazhdon të mbajë kreun e renditjes WTA. Megjithatë, diferenca me rivalet është ngushtuar ndjeshëm. Elena Rybakina, që mban vendin e dytë, ndodhet vetëm rreth 400 pikë larg, ndërsa edhe Jessica Pegula, Coco Gauff dhe Mirra Andreeva mbeten në garë për pozitat më të larta.

Me sezonin që vazhdon drejt US Open, gara për vendin e parë në renditjen botërore pritet të bëhet edhe më e fortë, si në konkurrencën e meshkujve, ashtu edhe te femrat.

Argjentina do të paraqitet me fanellën e saj alternative në gjysmëfinalen e Kupës së Botës 2026 ndaj Anglisë, sfidë që do të zhvillohet të mërkurën në Atlanta.

Vendimi vjen pasi FIFA e ka përcaktuar Argjentinën si skuadrën mysafire, duke bërë që “Albicelestët” të zbresin në fushë me fanellën blu, të kombinuar me pantallona dhe çorape të zeza.

Për ekipin e Lionel Scalonit kjo nuk është hera e parë që përdor këtë komplet në këtë Botëror. Fanella blu u vesh edhe në ndeshjen e fundit të fazës së grupeve, ku Argjentina triumfoi 3 me 1 ndaj Jordanisë. Me të njëjtën uniformë pritet të paraqitet edhe portieri Emiliano “Dibu” Martinez.

Megjithatë, kjo fanellë mbart edhe një simbolikë të veçantë në historinë e futbollit argjentinas. Pikërisht me ngjyrën blu, Argjentina ka arritur disa nga fitoret më të paharrueshme ndaj Anglisë në Kupën e Botës.

Në Botërorin e vitit 1986 në Meksikë, Diego Maradona shkroi historinë me dy golat legjendarë në çerekfinale, ndërsa në Francë 1998, Argjentina eliminoi anglezët pas ekzekutimit të penalltive në fazën e 1/8-ës së finales.

Tashmë, fanella blu rikthehet në një tjetër përballje historike mes dy rivalëve të mëdhenj, me Argjentinën që synon ta shndërrojë edhe këtë herë në një ogur të mirë për të siguruar një vend në finalen e Kupës së Botës 2026.

Kupa e Botës 2026 dhuroi surpriza, drama dhe histori të paharrueshme, por për disa prej emrave më të mëdhenj të futbollit botëror turneu u shndërrua në një makth. Kombëtare që hynë në garë me objektiva të mëdha u larguan shumë më herët se sa pritej, duke lënë pas zhgënjim te tifozët dhe pasoja të menjëhershme brenda skuadrave.

Në fund të turneut, disa ekipe paguan çmimin e dështimit me dorëheqje trajnerësh, largime lojtarësh dhe ndryshime të mëdha në projektet sportive.

 

10. Republika Çeke

Botërori për çekët përfundoi që në fazën e grupeve, ku arritën të grumbullonin vetëm një pikë. Pas eliminimit, sulmuesi Patrik Schick i dha fund karrierës me kombëtaren, ndërsa trajneri Miroslav Koubek dha dorëheqjen.

 

9. Skocia

Një tjetër zhgënjim për skocezët, të cilët nuk arritën sërish të kalonin fazën e grupeve. Ky ishte eliminimi i tyre i 13-të radhazi në fazën e parë të një turneu madhor.

 

8. Ekuadori

Pavarësisht pritshmërive, Ekuadori zhvilloi një turne me shumë luhatje dhe nuk arriti të linte gjurmë. Dështimi solli edhe largimin e trajnerit Sebastian Beccacece.

 

7. Brazili

Një nga goditjet më të mëdha të Botërorit. Pesë herë kampionët e botës u eliminuan nga Norvegjia që në fazën e 1/16-ave, ndërsa projekti i Carlo Ancelottit u vu menjëherë nën presion.

 

6. Holanda

“Oranje” konsiderohej mes favoriteve për trofeun, por aventura e saj përfundoi shumë shpejt pas eliminimit nga Maroku në fazën e parë me eliminim direkt.

 

5. Portugalia

Edhe pse u ndal nga Spanja, zhgënjimi nuk lidhej vetëm me eliminimin. Portugezët nuk arritën të bindnin me lojën e tyre gjatë gjithë turneut dhe mbetën larg pritshmërive.

 

4. Koreja e Jugut

Eliminimi i Koresë së Jugut u përjetua si një dështim kombëtar. Reagimet ishin aq të forta, sa presidenti i vendit kërkoi hetim për paraqitjen e ekipit, ndërsa trajneri Hong Myung-bo u vu në qendër të kritikave.

 

3. Uruguai

Kombëtarja amerikano-jugore përjetoi një Botëror të trazuar, të shoqëruar me rezultate zhgënjyese, tensione të brendshme dhe largimin e trajnerit Marcelo Bielsa pas përfundimit të turneut.

 

2. Turqia

Me Vincenzo Montellën në stol, Turqia shihej si një nga kombëtaret që mund të surprizonte pozitivisht. Megjithatë, ajo nuk arriti të kalonte fazën e grupeve, duke u renditur mes dështimeve më të mëdha të turneut.

 

1. Gjermania

Në krye të listës qëndron Gjermania. Katër herë kampionët e botës u eliminuan nga Paraguai në fazën e 1/16-ave, në atë që u konsiderua surpriza më e madhe e Kupës së Botës 2026.

Ky eliminim tronditi futbollin gjerman dhe solli ndryshime të menjëhershme. Federata vendosi t’ia besojë drejtimin e kombëtares Jurgen Kloppit, me shpresën se ai do ta rikthejë “Pancerat” mes elitës së futbollit botëror.

Për shumë kombëtare, Botërori 2026 nuk do të mbahet mend për sukseset, por për dështimet që mund të shërbejnë si pikënisje për një kapitull të ri.

FIFA ka dalë me një reagim zyrtar pas polemikave të shumta që pasuan ndeshjen mes Argjentinës dhe Egjiptit në fazën e 1/8 së finales së Kupës së Botës 2026, duke mbështetur plotësisht vendimet e ekipit të arbitrimit.

Takimi i zhvilluar në Atlanta përfundoi me një rikthim spektakolar të kampionëve në fuqi. Argjentina përmbysi disavantazhin prej dy golash dhe triumfoi 3-2 falë realizimeve të Cristian Romeros, Lionel Messit dhe Enzo Fernandezit. Megjithatë, rezultati u la në hije nga debatet e forta rreth disa vendimeve të gjyqtarit dhe përdorimit të sistemit VAR.

Pas eliminimit, Federata Egjiptiane e Futbollit reagoi ashpër, duke kërkuar përjashtimin e gjyqtarit dhe ekipit të tij nga vazhdimi i Botërorit. Egjiptianët pretenduan se arbitrat kryen gabime të rënda dhe se refuzuan të rishikonin disa situata kyçe të ndeshjes.

Në qendër të polemikave ishin dy episode vendimtare: anulimi i golit të Mostafa Zikos, pasi VAR konstatoi një faull ndaj Lisandro Martinez në nisje të aksionit, si dhe pretendimi për një penallti ndaj Mohamed Salahut pak çaste para golit të fitores së Enzo Fernandezit në minutën e 93-të.

Për t’i dhënë fund spekulimeve, shefi i arbitrave të FIFA-s, Pierluigi Collina, mbrojti publikisht punën e gjyqtarëve dhe hodhi poshtë çdo pretendim për favorizim.

“Debatet mbi vendimet e arbitrave janë pjesë e futbollit, por akuzat e pabazuara nuk kanë vend në këtë sport. Integriteti i gjyqtarëve të Kupës së Botës nuk mund të vihet në dyshim”, deklaroi Collina.

Ai theksoi se gjyqtarët e FIFA-s punojnë në mënyrë të pavarur dhe se vendimet e tyre nuk ndikohen nga asnjë faktor i jashtëm.

Duke komentuar rastin e golit të anuluar të Egjiptit, Collina sqaroi se sistemi VAR kontrollon të gjithë fazën sulmuese që i paraprin një goli dhe se ndërhyrja ndaj Lisandro Martinez u vlerësua si faull i qartë.

“Një faull mbetet faull. Nëse arbitri nuk e vëren në moment, VAR ka detyrimin të ndërhyjë dhe ta korrigjojë vendimin”, u shpreh ai.

Sa i përket episodit ku Egjipti kërkoi penallti për Salahun, drejtuesi i arbitrave tha se si gjyqtari në fushë ashtu edhe ekipi i VAR-it arritën në përfundimin se Julian Alvarez preku fillimisht topin dhe se kontakti pasues ishte pjesë normale e lojës.

“Nuk u konstatua asnjë shkelje që të justifikonte akordimin e penalltisë”, shtoi Collina.

Në fund, italiani pranoi se futbolli vazhdon të ketë situata të interpretueshme, por nënvizoi se FIFA mbetet e kënaqur me standardin e arbitrimit dhe me mënyrën se si janë zbatuar protokollet e VAR-it gjatë gjithë turneut.

Pas këtij kualifikimi dramatik, Argjentina do të përballet me Zvicrën në çerekfinale të Kupës së Botës 2026. Fituesi i këtij dueli do të sigurojë një vend në gjysmëfinale, ku do ta presë skuadra që triumfon në përballjen mes Anglisë dhe Norvegjisë.

Barcelona nuk ka hequr dorë nga transferimi i Karim Adeyemit dhe po vazhdon negociatat me Borussia Dortmundin për të siguruar shërbimet e sulmuesit gjerman.

Sipas gazetarit Luca Bendoni, oferta e klubit katalunas është më e ulët nga sa ishte raportuar më herët. Blaugranët kanë vendosur në tavolinë 20 milionë euro si pagesë fikse, ndërsa edhe 10 milionë euro të tjera janë parashikuar në formë bonusesh të lidhura me paraqitjet dhe objektivat e lojtarit.

Megjithatë, propozimi nuk e ka bindur ende Borussia Dortmundin. Klubi gjerman vazhdon të kërkojë rreth 40 milionë euro për të lejuar largimin e 24-vjeçarit, duke mbajtur një diferencë të konsiderueshme mes palëve.

Në anën tjetër, Barcelona duket se ka bërë përparim me vetë futbollistin. Raportohet se Adeyemi ka arritur marrëveshje për kushtet personale dhe është i gatshëm të firmosë një kontratë pesëvjeçare, në momentin që klubet arrijnë akordin për shumën e transferimit.

Drejtuesit katalunas po punojnë për të ngushtuar diferencën financiare me Dortmundin dhe shpresojnë ta mbyllin marrëveshjen gjatë ditëve në vijim.

Pavarësisht qëndrimit të fortë të klubit gjerman, pozita e Dortmundit në negociata nuk është ideale. Kontrata e Adeyemit përfundon në verën e ardhshme dhe rreziku për ta humbur pa dëmshpërblim e detyron klubin të shqyrtojë me kujdes çdo ofertë. Për më tepër, sezoni i fundit i sulmuesit nuk ishte në nivelin që pritej, një faktor që mund të ndikojë në vlerën përfundimtare të transferimit.

Kombëtarja e Zvicrës po numëron orët para çerekfinales së madhe të Kupës së Botës, ku do të përballet me kampionen në fuqi, Argjentinën, në një duel që pritet të zhvillohet në Kansas City.

Në prag të kësaj sfide, kapiteni Granit Xhaka ka dërguar një mesazh të qartë: Zvicra nuk udhëton për t’u mbrojtur, por për të luftuar për një vend në gjysmëfinale dhe për të shkruar histori.

Mesfushori shqiptar theksoi se afrimi drejt fazave vendimtare të turneut ka rritur edhe më shumë besimin dhe ambicien brenda skuadrës.

“Sa më afër objektivit që jemi, aq më e madhe bëhet dëshira për ta arritur atë. E ndiejmë presionin, por është një presion pozitiv që na motivon të japim edhe më shumë për të vazhduar rrugëtimin në këtë Botëror”, deklaroi Xhaka.

Kapiteni zviceran foli edhe për përballjen me Lionel Messin, duke e cilësuar një privilegj mundësinë për të luajtur kundër një prej futbollistëve më të mëdhenj të të gjitha kohërave.

“Është një privilegj të jesh pjesë e epokës së Lionel Messit dhe Cristiano Ronaldos. Ende nuk kemi hyrë në analizën e detajuar të Argjentinës, por shumë shpejt do të përgatitemi me kujdes për këtë sfidë”, u shpreh ai.

Zvicrën e pret një mision jashtëzakonisht i vështirë. Përballë do të ketë një Argjentinë që ka shfaqur formë të jashtëzakonshme gjatë turneut, duke shënuar në secilën nga pesë ndeshjet e fundit dhe duke mbërritur në çerekfinale me plot vetëbesim.

Në qendër të vëmendjes mbetet Lionel Messi, i cili me tetë gola është golashënuesi më i mirë i këtij Botërori dhe arma kryesore e skuadrës së Lionel Scalonit.

Për të rrëzuar kampionët në fuqi dhe për të siguruar një vend mes katër kombëtareve më të mira në botë, Zvicra do të duhet të zhvillojë një paraqitje pothuajse perfekte në të dyja fazat e lojës. Përballë saj do të jetë një Argjentinë që vjen në këtë duel me një seri mbresëlënëse prej 12 fitoresh radhazi në të gjitha garat, çka e bën sfidën edhe më të vështirë, por njëkohësisht edhe më motivuese për skuadrën e Xhakës.

Futbolli italian do të hyjë në një epokë të re të arbitrimit nga sezoni 2026/27, pasi Serie A ka vendosur të zgjerojë kompetencat e sistemit VAR me ndryshime të rëndësishme që synojnë të reduktojnë gabimet e gjyqtarëve.

Sipas raportimit të Corriere dello Sport, teknologjia VAR nuk do të kufizohet më vetëm te rastet e golave, penalltive apo kartonëve të kuq direkt, por do të ketë rol edhe në korrigjimin e disa vendimeve të tjera që kanë shkaktuar polemika në vitet e fundit.

Një nga risitë më të rëndësishme është mundësia që VAR të ndërhyjë për të anuluar një goditje nga këndi të akorduar gabimisht. Kjo do të jetë e mundur vetëm nëse rishikimi nuk ndërpret një aksion që është ende në zhvillim, duke ruajtur kështu ritmin e lojës.

Një tjetër ndryshim me peshë lidhet me kartonët e verdhë. Për herë të parë, sistemi VAR do të ketë autoritetin të rishikojë vendimet që çojnë në kartonin e dytë të verdhë dhe, si pasojë, në përjashtimin e një futbollisti nga loja. Nëse konstatohet se vendimi ka qenë i gabuar, arbitri do të ketë mundësinë ta korrigjojë atë.

Megjithatë, VAR nuk do të ndërhyjë në rastet kur arbitri vendos të mos japë kartonin e dytë të verdhë, duke e lënë këtë vlerësim ekskluzivisht në dorën e gjyqtarit kryesor.

Ndërsa rregulli për korrigjimin e goditjeve nga këndi do të jetë në diskrecionin e secilës federatë kombëtare, ndërhyrja e VAR-it për kartonin e dytë të verdhë është një direktivë e IFAB-it dhe do të zbatohet detyrimisht në të gjitha garat që përdorin sistemin VAR.

Serie A ka konfirmuar se do t’i aplikojë menjëherë këto rregulla, ndërsa Serie B dhe Serie C ende po shqyrtojnë zbatimin e tyre, pasi numri më i kufizuar i kamerave në këto kategori paraqet vështirësi teknike.

Ndryshimet vijnë pas shumë polemikave të sezonit të kaluar, ku një nga rastet më të diskutuara ishte ai mes Pierre Kalulu dhe Alessandro Bastonit. Sipas rregullave të reja, një situatë e tillë do të mund të rishikohej nga VAR dhe pezullimi i lojtarit potencialisht do të shmangej.

Përveç zgjerimit të rolit të VAR-it, futbolli italian do të harmonizohet edhe më shumë me standardet e UEFA-s në aspektin disiplinor. Mbulimi i gojës gjatë debatit me një kundërshtar nuk do të ndëshkohet më automatikisht me karton të kuq, por me karton të verdhë. Po ashtu, një qasje më tolerante do të zbatohet edhe ndaj lojtarëve që largohen përkohësisht nga fusha si formë proteste.

Me këto ndryshime, Serie A synon ta bëjë arbitrimin më të drejtë, më të saktë dhe më në përputhje me zhvillimin modern të futbollit.