Author: K.B.

Dhjetë persona u lënduan gjatë vrapimit të tetë dhe të fundit me dema në festivalin e famshëm San Fermín të Spanjës të martën, duke e çuar në 57 numrin total të personave të lënduar gjatë festimeve të këtij viti.

Një 18-vjeçar pësoi plagë nga briri i demit në kofshë, ndërsa një 46-vjeçar u godit nga briri në gjoks. Tetë persona të tjerë u dërguan në spital me mavijosje të shkallëve të ndryshme, njoftoi qeveria rajonale e Navarrës.

Demat përshkuan një pistë prej 848.6 metrash nga vendi ku mbaheshin deri te arena e qytetit për dy minuta e 25 sekonda.

Për tetë ditë radhazi, qindra persona, shumë prej tyre të veshur me këmisha të bardha tradicionale dhe shalle të kuqe rreth qafës, vrapojnë përpara tufës së demave në rrugët e ngushta të qytetit mesjetar, duke sfiduar rrezikun. Shumica e pjesëmarrësve janë burra.

Demat më pas përballen me një vdekje pothuajse të sigurt në ndeshjet e pasdites me matadorët më të njohur të Spanjës.

Festivali San Fermín, i bërë i famshëm nga romani i Ernest Hemingway-t i vitit 1926, “Dielli lind përsëri”, tërheq vizitorë nga e gjithë bota.

Gjatë vrapimeve të këtij viti, katër persona u goditën nga brirët e demave, përfshirë një 30-vjeçar spanjoll, i cili u plagos në fytyrë.

Nga 57 të lënduarit, pesë janë shtetas të huaj: dy britanikë, një australian, një amerikan dhe një gjerman, i cili u godit nga briri në krahun e majtë.

Që nga fillimi i regjistrimeve në vitin 1911, 16 persona kanë humbur jetën gjatë vrapimeve me dema. Vdekja e fundit ndodhi në vitin 2009, kur një dem vrau një 27-vjeçar spanjoll duke e goditur me brirë në qafë, zemër dhe mushkëri, shkruan Euronews.

Në Gjykatën Themelore në Prishtinë ka dështuar të mbahet procesi gjyqësor të martën ndaj katër mjekëve, Vjosa Zejnullahu, Myzeine Muja dhe Bashkim Sheholli, të cilët po akuzohen për trajtim të pandërgjegjshëm mjekësor, Seanca dështoi për shkak të mungesës së dëshmitares, Valbona Kelmendi-Gashi.

Rasti gjykohet nga trupi gjykues me këtë përbërje: Adnan Kamberi- kryetar i trupit gjykues, Sulltane Hoti dhe Alban Ajvazi- anëtarë, raporton “Betimi për Drejtësi”.

Fillimisht, gjykatësi Kamberi konstatoi se prezent në sallë ishin prokurororja Javorka Perlinçeviq, i dëmtuarit Nazmi Fazliu me avokatin, Redon Byqmeti. Po ashtu, i akuzuari Sheholli me avokatët Skender Musa dhe Faton Haziri, e akuzuara Zejnullahu me avokatin Florent Latifaj, e akuzuara Muja me avokaten Lindita Keqekolla-Gashi, si dhe i akuzuari Demolli, me avokatin Besnik Berisha.

Më pas, gjykatësi Kamberi tha se dëshmitarjaKelmendi-Gashi është kontaktuar nga sekretaria e gjykatës dhe se ka deklaruar se e ka ngatërruar datën e seancës, duke menduar se ka për të dhënë dëshmi më 16 korrik kur edhe është caktuar data tjetër për këtë gjykim.

Gjykatësi Kamberi më pas shtoi se anëtari i trupit gjykues, Alban Ajvazi është i angazhuar në sesionin e pasdites me një rast vrasje me paraburgim, andaj seanca nuk mund të zhvillohet për sesionin e pasdites.

Më pas, gjykatësi Kamberi konstatoi shtyrjen e seancës në mungesë të dëshmitares Kelmendi-Gashi.

“Në mungesë të dëshmitares, shtyhet seanca e shqyrtimit gjyqësor…”, tha gjykatësi Kamberi.

Ndryshe sipas aktakuzës së ngritur nga Prokuroria Themelore në Prishtinë, të akuzuarit Vjosa Zejnullahu, Selman Demolli, Myzeine Muja dhe Bashkim Sheholli, në cilësinë e mjekëve më 20 janar 2016 në Prishtinë në QKUK-KGJO, me rastin e dhënies së ndihmës mjekësore, duke vepruar me dashje të mundshme, të vetëdijshëm se veprimet e tyre mund të sjellin deri te vdekja pacientin, kanë përdorur metoda të papërshtatshme të trajtimit dhe me atë rast kanë shkaktuar përkeqësimin e gjendjes shëndetësore të së dëmtuarës – tani të ndjerës S.F.

Në aktakuzë thuhet se e akuzuara Zejnullahu nuk ka kërkuar mendimin e mjekëve të tjerë nëse e dëmtuara duhet të trajtohet fillimisht në emergjencë apo në terapi intensive, duke nënvlerësuar ankesën e pacientes për reagimin ndaj transfuzionit të gjakut dhe vazhdoi dhënien e gjakut, duke vlerësuar gabimisht gjendjen e pacientes dhe anashkaluar konsultimin e transfuziologut.

Siç thuhet në aktakuzë, e akuzuara Zejnullahu duke e ditur se përkeqësimi i gjendjes së pacientes ka ndodhur pas transfuzionit të gjakut, e ka dërguar pacienten në qendrën urgjente dhe nuk ka dërguar qesen me gjak, për të parë se cili gjak i është dhënë të dëmtuarës, duke ditur faktin se ka grupe të ndryshme të gjakut dhe duke e shkatërruar si provë kryesore në këtë rast.

Tutje sipas aktakuzës, të akuzuarit Demolli dhe Muja nuk kanë vepruar sipas protokolleve standarde për trajtimin e pacientit, sepse nuk kanë dhënë rekomandime për konsultim me transfuzuiologun pasi të dëmtuarës i është përkeqësuar gjendja dukshëm gjatë marrjes së gjakut në atë mënyrë që të gjithë ata nuk kanë ndërmarrë veprime për trajtimin e pacientes me antireaksion (terapi për reaksion post-tranzionit), pastaj dhanë konkluzione të gabuara duke vendosur që në vend që të thërrisnin për konsultë transfuziologun, kanë thirrur neurologun, tani të akuzuarin Sheholli.

Më tej, në aktakuzë thuhet se i akuzuari Sheholli, i cili nuk ishte mjek kompetent për këtë rast, urdhëroi diçka tjetër që nuk ishte në përputhje me protokollin, duke rekomanduar të bëhet CT e trurit të pacientes dhe anashkaloi konsultën me transfuziologun, ndërsa të gjithë si ekip nuk rekomanduan mbajtjen e qeses me gjak të cilën e ka marrë e dëmtuara për analiza të mëtutjeshme, ku në atë rast gjendja përkeqësohet dhe vjen deri te vdekja e të dëmtuarës S.F.

Në këtë rast, secili prej tyre akuzohet se ka kryer vepër penale “Trajtim i pandërgjegjshëm mjekësor” nga neni 260, par. 4 lidhur me par.1 të Kodit Penal. /BetimipërDrejtësi

Korporata Energjetike e Kosovës (KEK) tha se Njësia A4 e Termocentralit Kosova A ka përfunduar me sukses riparimin e rregullt vjetor dhe është rikthyer në operim.

“Startimi i njësisë ka filluar në orët e para të mëngjesit, rreth orës 01:00, ndërsa pas përfundimit të procedurave teknike dhe kontrolleve të nevojshme, Njësia A4 është sinkronizuar me rrjetin elektroenergjetik rreth orës 05:15”.

KEK tha se rikthimi i Njësisë A4 në operim forcon kapacitetet vendore të prodhimit dhe rrit gatishmërinë teknike të KEK-ut në kuadër të përgatitjeve për sezonin dimëror.

“KEK falënderon menaxhmentin, ekipet teknike, inxhinierët dhe të gjithë punonjësit e TC Kosova A për profesionalizmin, përkushtimin dhe angazhimin e treguar në realizimin me sukses të këtij riparimi”.

Shoqata për të Drejtat e Pacientëve në Kosovë (PRAK) ka reaguar lidhur me raportimet për kushtet në Klinikën e Pediatrisë të QKUK-së dhe pretendimet për presion ndaj një familjari të pacientit pas publikimit të shqetësimeve të tij.

PRAK-u ka shprehur shqetësim për situatën e raportuar, duke i uruar shërim të shpejtë fëmijës dhe duke shprehur solidaritet me familjet që përballen me vështirësi gjatë trajtimit në institucionet shëndetësore.

“Çdo pacient, e në veçanti fëmijët, kanë të drejtë për kujdes shëndetësor cilësor, të sigurt dhe me dinjitet. Këto të drejta garantohen me ligjin për të drejtat dhe përgjegjësitë e banorëve në sistemin shëndetësor, ligjin për shëndetësinë dhe kartën e të drejtave të pacientëve në Kosovë”, thuhet në reagimin e PRAK-ut.

Sipas kësaj shoqate, pretendimet për mungesë të kushteve elementare higjieno-sanitare, kontroll të infeksioneve, mjete bazike higjienike dhe komunikim jo të duhur me familjarët duhet të trajtohen me seriozitet.

“Këto nuk janë kërkesa për luks, por standarde minimale që çdo institucion shëndetësor është i obliguar t’i garantojë”, thuhet në reagim.

PRAK-a ka ngritur shqetësim edhe për pretendimet se familjari i një pacienti është përballur me presion pas shprehjes publike të shqetësimeve të tij.

“Çdo pacient dhe familjar ka të drejtë të raportojë parregullsitë dhe të kërkojë llogaridhënie pa frikë nga presioni apo intimidimi. Transparenca dhe zëri i pacientëve janë thelbësorë për përmirësimin e sistemit shëndetësor”, ka deklaruar PRAK-u.

Megjithatë, shoqata ka theksuar se mbrojtja e të drejtave të pacientëve nuk përbën sulm ndaj profesionistëve shëndetësorë.

“Shumica e tyre punojnë me profesionalizëm dhe përkushtim në kushte të vështira. Mangësitë e evidentuara duhet të trajtohen si probleme institucionale dhe sistemore”, thuhet në reagim.

PRAK u ka bërë thirrje institucioneve përgjegjëse që të verifikojnë në mënyrë të pavarur dhe transparente pretendimet e ngritura, si dhe të informojnë publikun për gjetjet.

Po ashtu, ka kërkuar ndërmarrjen e masave të menjëhershme për përmirësimin e kushteve dhe standardeve të sigurisë së pacientëve, forcimin e mekanizmave për trajtimin e ankesave dhe garantimin që asnjë pacient apo familjar të mos përballet me presion për shkak të ankesave të tij.

“Ky rast duhet të shërbejë si një moment reflektimi për të gjithë sistemin shëndetësor. Përmirësimi i cilësisë së kujdesit nuk arrihet duke heshtur kritikën, por duke dëgjuar pacientët, duke reflektuar mbi shqetësimet e tyre dhe duke ndërmarrë masa konkrete”, përfundon reagimi i PRAK-u.

Një person mbeti i plagosur si pasojë e të shtënave me armë zjarri mbrëmë në Pejë.

“Betimi për Drejtësi” mëson se i dyshuari është B.K., 28-vjeçar, i cili është ndaluar për 48 orë.

I pandehuri dyshohet se kishte në posedim dy armë, njërën prej tyre me leje. Në vendin e ngjarjes se u gjetën nëntë gëzhoja.

Prokuroria Themelore në Pejë ka njoftuar se rasti është iniciuar si “Vrasje në tentativë”.

Hoxhaj: Shqipëria dhe Mali i Zi po ecin përpara, Kosova qe 3 vjet në sirtarët e BE-së, s’po merret askush me të

Ish-ministri i jashtëm i Kosovës, Enver Hoxhaj, ka reaguar pas avancimit të Shqipërisë dhe Malit të Zi në procesin e integrimit evropian, duke thënë se zhvillimet e sotme duhet të shërbejnë si një thirrje për reflektim për Kosovën.

Hoxhaj ka uruar Shqipërinë për avancimin në negociatat e anëtarësimit me Bashkimin Evropian dhe Malin e Zi për mbylljen e dy kapitujve të tjerë negociues, duke vlerësuar se të dy shtetet po e shndërrojnë vizionin e tyre evropian në realitet.

“Sot është një ditë e rëndësishme për Ballkanin. Shqipëria po avancon në negociatat e anëtarësimit me Bashkimin Evropian, ndërsa Mali i Zi po mbyll edhe dy kapituj të tjerë në rrugën e tij drejt anëtarësimit. Urime të dy shteteve për këtë sukses dhe për vizionin evropian që po e shndërrojnë në realitet”, ka shkruar Hoxhaj.

Duke folur për pozitën e Kosovës, ai ka theksuar se vendi ka humbur ritmin në procesin e integrimit evropian.

“Deri para 7 vitesh, vendi ynë kishte një perspektivë shumë më të besueshme evropiane dhe gëzonte një mbështetje më të madhe nga partnerët tanë. Ndërkaq, qe 3 vjet Kosova pret që statusin e vendit kandidat ta shqyrtojë dikush, por ai ka mbetur në sirtarët e Bashkimit Evropian dhe askush nuk po merret me të”, ka deklaruar Hoxhaj.

Sipas tij, ndërsa vendet e tjera të rajonit po afrohen gjithnjë e më shumë me Bashkimin Evropian, Kosova rrezikon të mbetet prapa në procesin e integrimit.

“Sot, ndërsa Shqipëria dhe Mali i Zi po afrohen çdo ditë e më shumë me Bashkimin Evropian, Kosova rrezikon të mbetet e fundit në rajon në rrugën drejt anëtarësimit. Kosova meriton ta rikthejë vendin e saj në agjendën evropiane dhe të ecë përpara me besueshmëri e vizion”, ka përfunduar Hoxhaj.

Kryetari i Komunës së Prizrenit, Shaqir Totaj, ka vazhduar kritikat ndaj Qeverisë Kurti.

Ai ka numëruar disa vendime të Qeverisë që kanë ndikuar drejtpërdrejtë në financat e pushtetit lokal.

Në profilin e tij në Facebook, ai ka shkruar se njëra nder këto vendime është edhe shkurtimi i Grantit të Performancës Komunale.

“Përveç barrës së vazhdueshme financiare që komunat po përballojnë nga zbatimi i Kontratës Kolektive, e cila vetëm gjatë këtij viti arrin në dhjetëra milionë euro, gjatë periudhës së fundit janë ndërmarrë edhe disa vendime të tjera me ndikim të drejtpërdrejtë dhe të konsiderueshëm në financat e pushtetit lokal. Shqetësuese është se të gjitha këto vendime janë marrë pa asnjë konsultim me komunat, ndonëse pasojat financiare bien drejtpërdrejt mbi buxhetet komunale dhe ndikojnë në cilësinë e shërbimeve për qytetarët”, ka shkruara ai, duke përmendur vendime me radhë.

“1. Shkurtimi i Grantit të Performancës Komunale

Ligji për Ndarjet Buxhetore për vitin 2026 ka paraparë 4 milionë euro nga buxheti i shtetit për Skemën e Grantit të Performancës. Megjithatë, janë ndarë vetëm 2 milionë euro, duke e përgjysmuar fondin qeveritar në kundërshtim me ligjin dhe duke dëmtuar komunat që kanë përmbushur kriteret ligjore për përfitim. Për më tepër, edhe këto mjete ende nuk janë shpërndarë te komunat dhe nuk dihet se kur do të realizohet shpërndarja e tyre, duke krijuar pasiguri të mëtejshme për komunat përfituese. 2. Moszbatimi i aktgjykimit të Gjykatës Kushtetuese për përvojën e punës Moszbatimi nga Ministria e Financave i aktgjykimit të Gjykatës Kushtetuese lidhur me kompensimin e përvojës së punës (0.5% në vend të 0.25%) për periudhën nga fillimi i vitit 2023, gjatë vitit 2024 dhe vitit 2025 krijon obligime të konsiderueshme financiare. Si pasojë, barra financiare për zyrtarët publikë të nivelit lokal pritet t’u bartet komunave, duke rrezikuar seriozisht stabilitetin e financave komunale”, ka shkruar Totaj.