Author: K.B.

Ministri i Punëve të Jashtme dhe Diasporës, Glauk Konjufca do të pres nesër në takim Ministren për Evropën dhe Punë të Jashtme të Republikës së Shqipërisë, Elisa Spiropali.

Sipas njoftimit të MPJD-së, Konjufca dhe Spiropali pritet të takohen në objektin e kësaj ministrie në ora 10:00.

Njoftimi:

Zëvendëskryeministri i Parë dhe Ministri i Punëve të Jashtme dhe Diasporës i Republikës së Kosovës, z. Glauk Konjufca, pret nesër në takim Ministren për Evropën dhe Punë të Jashtme të Republikës së Shqipërisë, znj. Elisa Spiropali.

Datë: 25 shkurt 2024

Ora: 10:00

Vendi: Objekti i MPJD-së.

Emri i modeles shqiptare Misse Beqiri është rikthyer fuqishëm në fokusin e mediave ndërkombëtare. Pjesëmarrja e saj në sezonin e ri të Ladies of London: The New Reign përkon me përmendjen e saj në dokumente të lidhura me financierin amerikan Jeffrey Epstein, duke ndërthurur rikthimin televiziv me jehonën e një çështjeje që vijon të trazojë opinionin publik.

Sipas raportimit të publikuar nga The Sun, emri i 39-vjeçares është përfshirë në dokumentet e bëra publike së fundmi, ku rikujtohet një takim i vitit 2011 me Epstein, i cili më pas u përball me akuza të rënda për trafikim dhe shfrytëzim seksual.

Burime pranë saj shprehen se përmendja e emrit në këto dokumente ka qenë një tronditje. “Ajo ishte shumë e re kur e takoi dhe në atë kohë nuk e dinte kush ishte ai”, citohet të ketë thënë një person i afërt. Sipas të njëjtit burim, Beqiri ishte në fillimet e karrierës dhe kishte pranuar takimin pasi i ishin premtuar mundësi në fushën e modelingut. “Asgjë nuk ndodhi. Ajo sot pendohet që e takoi dhe ndjen keqardhje për viktimat, duke besuar se drejtësia duhet të vihet në vend”, thuhet më tej.

Raportimet theksojnë se Epstein kishte shfaqur interes të veçantë për modelen shqiptare. Ai i kishte propozuar një udhëtim me avion privat drejt Parisit për një sfilatë mode dhe kishte shprehur dëshirën t’i dhuronte një automjet luksoz me vlerë rreth 100 mijë paund. Takimi i parë mes tyre thuhet se ishte zhvilluar në rezidencën e tij në Manhattan, me vlerë rreth 37 milionë paund. Brenda vilës shtatëkatëshe, Beqiri ishte habitur nga prania e një klase të improvizuar me banka shkollore, por kishte qëndruar me shpresën për të përfituar profesionalisht.

Ky takim kishte ndodhur vetëm pak muaj pasi Epstein kishte përfunduar një dënim prej 13 muajsh burg dhe një vit arrest shtëpie, pas vendimit të vitit 2008 për sigurimin e një të miture për prostitucion. Sipas një miku të saj, në atë periudhë Beqiri nuk kishte dijeni për dënimin e tij.

Jeta personale dhe sfidat

Misse Beqiri u bë e njohur ndërkombëtarisht edhe si bashkëshortja e ish-portierit të Manchester United, Anders Lindegaard, me të cilin u martua në vitin 2016. Nga kjo martesë ata kanë një djalë, Julian, 11 vjeç.

Më pas, ajo përjetoi një lidhje të trazuar me Jake Hall, që përfundoi përfundimisht në vitin 2021. Nga kjo marrëdhënie lindi vajza e tyre, River, 8 vjeç.

Një nga ngjarjet më të rënda në jetën e saj mbetet vrasja e vëllait, Flamur Beqiri, i cili u qëllua për vdekje jashtë banesës së tij në Battersea, në prag të Krishtlindjes 2019. Sipas gjykatës, ai ishte i përfshirë në krim të organizuar dhe kishte konflikte me grupe rivale në Skandinavi. Për këtë ngjarje, Anis Hemissi u dënua me burgim të përjetshëm, me minimum 35 vite.

“Një kapitull i ri”

Në prag të transmetimit të sezonit të ri të Ladies of London: The New Reign, Beqiri është shprehur optimiste. Ajo e cilësoi si “surreal” momentin kur pa billboardin me imazhin e saj, duke theksuar se rrugëtimi i saj nuk ka qenë i lehtë.

“Jeta nuk më është dhënë në një pjatë të artë. Nuk jam perfekte, por e di vlerën time dhe jam rritur si person”, është shprehur ajo, duke falënderuar ata që i kanë qëndruar pranë në momentet më të vështira.

Rikthimi në ekran përfaqëson për të një mundësi të re, mes famës, polemikave dhe plagëve personale. Megjithatë, ndërsa hap një kapitull të ri profesional, e kaluara vijon të mbetet pjesë e narrativës që e shoqëron.

Është mbajtur takimi i parë i Këshillit Organizativ për manifestimin me rastin e shënimit të 28-vjetorit të Epopesë së Ushtrisë Çlirimtare të Kosovës, që do të mbahet më 5, 6 dhe 7 mars 2026.

Takimi është kryesuar nga ministri i Mbrojtjes, Ejup Maqedonci, në cilësinë e bashkëkryesuesit, së bashku me ministrin për Punë, Familje dhe Vlerat e Luftës Çlirimtare, Andin Hoti.

Në mbledhje morën pjesë edhe anëtarë të Këshillit Organizativ, si dhe përfaqësues nga Zyra e Presidentes, Kuvendi i Kosovës, Zyra e Kryeministrit dhe Asociacioni i Komunave të Kosovës.

Gjatë takimit u diskutua gjerësisht për agjendën e aktiviteteve që do të zhvillohen përgjatë tri ditëve të manifestimit, si dhe për ndarjen e detyrave dhe përgjegjësive ndërmjet institucioneve përkatëse, me qëllim organizimin sa më dinjitoz të kësaj ngjarjeje me rëndësi të veçantë shtetërore.

Pas konsultimeve, Këshilli Organizativ miratoi agjendën zyrtare për datat 5, 6 dhe 7 mars, si dhe logon zyrtare të manifestimit.

Institucionet përgjegjëse do të vijojnë koordinimin e ngushtë në ditët në vijim, për të siguruar realizimin e suksesshëm të të gjitha aktiviteteve të parapara në kuadër të shënimit të Epopesë së UÇK-së.

Ish-kryeministri i Norvegjisë Thorbjørn Jagland, ka tentuar të bëjë vetëvrasje. Kështu raportojnë mediat atje, ku shtohet se ish-kryeministri u shtrua në spital një javë më parë pas një tentative për vetëvrasje.

Shtypi pranë Shoqatës Norvegjeze të Redaktorëve dhe redaktorë të përzgjedhur norvegjezë kanë bërë një marrëveshje menjëherë më 17 me avokatin e Jaglandit, Anders Brosveet, që kjo ngjarje dramatike të mos përmendej.

Duke u mbështetur në një burim tejet të besueshëm, iNyheter ka zgjedhur të publikojë atë që ndodhi një javë më parë. Sipas burimit, gjendja e Jaglandit është e rëndë. Burimi nuk dëshiron të tregojë se në cilin spital po trajtohet aktualisht politikani i lartë.

Më 12 shkurt, Thorbjørn Jagland u vu nën hetim për korrupsion të rëndë në lidhje me marrëdhënien e tij të ngushtë me Jeffery Epstein. Në të njëjtin moment kur Jagland u akuzua, policia kreu kontrolle të gjera në pronat e tij, përfshirë një apartament në Oslo dhe në Risør. Kur policia ndërhyri në apartamentin në Oslo, ishte mbledhur një numër i madh gazetarësh. NRK shkroi këtë paraditen e 12 shkurtit:

– Kam vetëm një gjë për të thënë, dhe ajo është se jam shumë i kënaqur që çështja po sqarohet. Nuk kam asgjë më shumë për të thënë, tha Jagland.

– Si e shihni çështjen? A keni diçka për të thënë?

– Avokati im ka thënë mjaftueshëm, u përgjigj Jagland.

Për të zbardhur çështjen e korrupsionit, Økokrim ndërmori hapin serioz duke i dërguar një letër Këshillit të Evropës, ku kërkohej heqja e imunitetit të Jaglandit.

Ky imunitet u ho një ditë para se të kryheshin kontrollet. Në letrën e Økokrim drejtuar Këshillit të Evropës thuhej se Jagland dhe familja e tij e ngushtë, disa herë gjatë periudhës 2011–2018, kishin përdorur apartamentet private të Epstein në Paris dhe Nju Jork, si dhe kishin qëndruar në vilën e Epstein në Palm Beach, Florida.

Më tej thuhej se Epstein me gjasë kishte mbuluar shpenzimet e udhëtimit për gjashtë të rritur gjatë një prej këtyre qëndrimeve. Përveç kësaj, Jagland kishte pranuar një ofertë për mbulimin e shpenzimeve të udhëtimit dhe hotelit në Karaibe për gjashtë të rritur. Ky udhëtim përfundimisht nuk u realizua. Sipas letrës, Jagland gjithashtu i kishte kërkuar Epstein ndihmë për një kredi bankare, por nuk është e qartë nëse kjo u realizua.

Në Kodin Etik të Shtypit (“Vær Varsom-plakaten”) thuhet se është e drejta e shtypit të informojë për atë që ndodh në shoqëri. Ngjarjen dramatike që ndodhi javën e kaluar, iNyheter konsideron se edhe lexuesit kanë të drejtë ta dinë. Në etikën e medias thuhet gjithashtu se “ajo nuk mund t’i nënshtrohet presionit nga askush që dëshiron të pengojë debatin e hapur, shpërndarjen e lirë të informacionit dhe qasjen e lirë në burime.”

Sekretarja e përgjithshme e Shoqatës Norvegjeze të Redaktorëve, Reidun Kjelling Nybø, shkruan në një email drejtuar iNyheter, pasi artikulli u publikua, se “NR dhe redaktorët nuk kanë hyrë në asnjë marrëveshje me avokatin e Jaglandit për të mos shkruar për Jaglandin. U dha informacion si sfond (…) në mënyrë që të bëheshin vlerësime të mira etike në gazetari.”

Ajo shton më tej se ajo që shkruan iNyheter nuk është “në përputhje me informacionin që ne [Shoqata Norvegjeze e Redaktorëve dhe redaktorët] morëm” nga avokati.

Është vetëdorëzuar në polici i shoqëruar nga avokati i tij 64-vjeçari shqiptar, i cili tentoi të përdhunonte një vajzë 25-vjeçare me aftësi të kufizuara, në Kypseli të Greqisë pas ditë më parë, dhe më pas u arratis nga banesa pas përleshjes me nënën e vajzës.

Nëna e 25-vjeçares e raportoi incidentin në policinë greke, kur kuptoi se çfarë kishte ndodhur përmes kamerave brenda shtëpisë, dhe sapo u kthye në shtëpi, pa vajzën e saj duke qarë.

Ajo e goditi shqiptarin në kokë me një tigan dhe më pas e ndoqi me thikë, por 64-vjeçari arriti të shpëtonte. Ekzaminimi mjeko-ligjor, sipas saj, tregoi se nuk kishte ndodhur përdhunim, një fakt që, siç u shpreh, nuk e priste.

Sipas mediave greke, shqiptari ishte një person i besuar për familjen pasi i ndihmonte për blerjet, ndërsa me nënën e vajzës ishte njohur në kafenenë e kishës. E reja 25-vjeçare mësohet se ka edhe një motër binjake, po ashtu me aftësi të kufizuara.

Në të njëjtën kohë, vajza biologjike e 64-vjeçarit pretendon se babai i saj e përdhunoi në moshën shtatë vjeç. Duke folur për MEGA, vajza zbuloi se 64-vjeçari e përdhunoi kur ishte vetëm shtatë vjeç në shtëpinë e tyre në Shqipëri.

“Kur isha shtatë vjeçe, babai im më përdhunoi një herë në Shqipëri, kur të gjithë mungonin nga shtëpia. Nuk e denoncova kurrë, sepse kisha frikë. Sot nuk kam asnjë marrëdhënie me këtë njeri, jemi zënë shumë keq”, deklaron ajo fillimisht.

“Ia përmenda para disa kohësh gjatë një sherri se më kishte abuzuar seksualisht dhe ai u përpoq të më nxirrte të çmendur, duke thënë se nuk di çfarë flas dhe se i kam sajuar nga mendja”, ka deklaruar ajo për mediat greke.

Sipas raportimeve, e reja e mbajti për vite me radhë si një sekret të errët makthin që, siç thotë, përjetoi në duart e babait të saj. Kur vendosi ta denonconte, pothuajse e gjithë familja dhe rrethi i afërt i kthyen shpinën.

“Doja ta denoncoja, por më thanë se kishin kaluar shumë vite dhe se nuk do të çonte askund, pasi nuk mund ta provoja tani. Nëna ime e dinte çfarë kishte bërë dhe nuk bëri asgjë për këtë. Nuk dua asnjë kontakt me asnjërin prej tyre. Ajo që më lëndoi më shumë ishte kur ua tregova vëllezërve dhe motrave të mi… Edhe ata mbajtën anën e tyre dhe që atëherë kam ndërprerë çdo kontakt me ta”, ka treguar ajo.

Instituti Kombëtar për Shëndetin Publik ka ofruar disa këshilla për ruajtjen e shëndetit gjatë muajit të shenjtë të Ramazanit.

Siç theksohet nga IKSHPK, muaji i Ramazanit sjell ndryshime të mëdha në përditshmërinë e individëve, duke ndikuar në stilin e jetesës, ushqyerjen dhe ritmet biologjike të trupit. Gjatë agjërimit, metabolizmi, hidratimi, oraret e gjumit dhe aktiviteti fizik mund të preken, prandaj është e rëndësishme të merren masa për ruajtjen e shëndetit.

Rekomandimet e IKSHPK-së përfshijnë:

Dieta e balancuar: Konsumoni ushqime të shëndetshme dhe qëndroni të hidratuar. Pini mjaftueshëm ujë dhe përfshini ushqime të lëngshme si supë, gjellë dhe sallatë. Shmangni pijet me kafeinë dhe ato të gazuara me sheqer për të parandaluar dehidratimin dhe kaloritë e tepërta.

Iftari: Filloni vaktin e iftarit me hurma dhe ujë, më pas shtoni perime, drithëra integrale dhe proteina si pulë, mish pa yndyrë ose peshk. Kufizoni ushqimet e skuqura dhe ato të përpunuara. Hani ngadalë për të shmangur tejngopjen.

Syfyri: Konsumoni një vakt të lehtë me perime, bukë integrale, produkte bulmeti ose vezë, dhe yndyra të shëndetshme si avokado. Shmangni ëmbëlsirat e tepërta, kripën dhe brumërat me yndyrë. Zgjidhni fruta të freskëta si ëmbëlsirë. Syfyri nuk duhet anashkaluar dhe as zëvendësuar vetëm me ujë, pasi kjo mund të ndikojë negativisht në shëndet, duke ulur nivelin e sheqerit në gjak dhe duke bërë personin më pak energjik dhe produktiv.

Mënyrat e gatimit: Përdorni metoda të shëndetshme si avullimi, pjekja ose gatimi me pak vaj. Përdorni më pak kripë dhe erëza për të përmirësuar shijen e ushqimeve.

Aktiviteti fizik: Qëndroni aktivë, sidomos pas mbrëmjes. Një ecje e rregullt ndihmon në menaxhimin e peshës dhe ruajtjen e shëndetit gjatë Ramazanit.

Konsultimi me profesionistë shëndetësorë: Para se të bëni ndonjë ndryshim në regjimin e ilaçeve gjatë Ramazanit, bisedoni me mjekët ose specialistët.

Agjërimi për personat me diabet dhe hipertension
IKSHPK thekson se agjërimi mund të sjellë komplikime për personat me diabet, si ulje të sheqerit në gjak, rritje të sheqerit në gjak, dehidrim dhe ketoacidozë diabetike, veçanërisht te ata me diabet të tipit 1. Këta individë zakonisht këshillohen të mos agjërojnë.

Personat me diabet të tipit 2 dhe ata me hipertension, të cilët kanë gjendjen nën kontroll (përmes dietës apo medikamenteve), mund të agjërojnë. Megjithatë, ky vendim duhet marrë vetëm pas një vlerësimi të kujdesshëm dhe në konsultim me mjekët, për të siguruar që agjërimi nuk do të rrisë rrezikun për shëndetin.

Agjërimi gjatë shtatzënisë dhe gjidhënies
Nënat shtatzëna dhe ato që ushqejnë me gji, nëse janë të shëndetshme, mund të marrin parasysh mundësinë e agjërimit. Sidoqoftë, vendimi duhet të merret në mënyrë individuale dhe vetëm pas konsultimit me mjekët, duke marrë parasysh rreziqet që mund të ndodhin për nënën dhe fëmijën.

Presidenti amerikan, Donald Trump do të mbajë fjalimin mbi Gjendjen e Kombit për vitin 2026 para një sesioni të përbashkët të Kongresit të martën, duke paraqitur agjendën e tij për vitin e ardhshëm dhe duke lavdëruar arritjet e tij që nga kthimi në detyrë.

Fjalimi vjen disa ditë pasi Gjykata Supreme vendosi se ai nuk ka autoritetin për të vendosur tarifa gjithëpërfshirëse sipas një ligji për fuqitë emergjente, duke i dhënë një goditje të konsiderueshme agjendës së tij tregtare. Presidenti është zotuar të anashkalojë vendimin e gjykatës dhe të përdorë autoritete të tjera për të vendosur tarifa mbi importet.

Fjalimi vjen gjithashtu mes tensioneve në rritje në Lindjen e Mesme midis SHBA-së dhe Iranit. Bisedimet mbi programin bërthamor të Iranit dhe çështje të tjera pritet të vazhdojnë këtë javë. Presidenti nuk e ka përjashtuar përdorimin e forcës ushtarake kundër vendit nëse negociatat dështojnë.

Fjalimi mbi Gjendjen e Kombit është planifikuar të fillojë në orën 21:00 të mbrëmjes, por mund të fillojë më vonë në varësi të kohës kur presidenti mbërrin në Capitol.

Kohëzgjatja e fjalimeve të Trump në Kongres ka ndryshuar me kalimin e viteve. Trump ka mbajtur tre fjalime për Gjendjen e Kombit dhe dy fjalime në një seancë të përbashkët të Kongresit, të cilat vijnë menjëherë pas inaugurimit të një presidenti, por nuk janë fjalime zyrtare për Gjendjen e Kombit.

Fjalimi i tij i vitit 2025 ishte fjalimi më i gjatë në një seancë të përbashkët të Kongresit që nga të paktën viti 1964.

Në Shtëpinë e Bardhë të hënën, Trump e parapriu fjalimin duke thënë: “Do të jetë një fjalim i gjatë sepse kemi kaq shumë për të folur.”

Fjalimi për Gjendjen e Kombit zhvillohet në Dhomën Përfaqësuesve në Capitolin e SHBA-së në Washington. Dhoma është mjaft e madhe për të mbajtur anëtarë të Dhomës së Përfaqësuesve dhe Senatit, përveç zyrtarëve të Kabinetit dhe anëtarëve të Gjykatës Supreme.

Albin Kurti, kryeministër i vendit, ka shkruar për takimin e djeshëm që ka pasur me përfaqësuesin special të Bashkimit Evropian për dialogun Kosovë-Serbi, Peter Sorensen.

Në postimin e tij të bërë në rrjetin social ‘’X’’, Kurti ka thënë se në takim kanë diskutuar për rrugën e integrimit evropian të Kosovës, sundimin e ligjit dhe procesin e dialogut të lehtësuar nga BE-ja, përcjell Express.

Ai ka shkruar edhe se, Kosova mbetet e përkushtuar për normalizimin e plotë të marrëdhënieve me Serbinë përmes njohjes së ndërsjellë.

‘‘Dje mirëprita Përfaqësuesin Special të BE-së për Dialogun Kosovë–Serbi, Peter Sørensen. Diskutuam për rrugën e integrimit evropian të Kosovës, sundimin e ligjit dhe procesin e dialogut të lehtësuar nga BE-ja. Ne mbetemi të përkushtuar për normalizimin e plotë të marrëdhënieve me Serbinë përmes njohjes së ndërsjellë’’, ka shkruar Kurti.

Yesterday, I welcomed the EU Special Representative for the Kosova–Serbia Dialogue, Peter Sørensen. We discussed Kosova’s European integration path, the rule of law, and the EU-facilitated dialogue process. We remain committed to the full normalization of relations with Serbia… pic.twitter.com/93buN8jb0c

— Albin Kurti (@albinkurti) February 24, 2026

Juristja e medias, Flutura Kusari, ka raportuar nga mbledhja e Komisionit parlamentar për Media.

Ajo ka thënë se kryetarja e komisionit nga PDK, Ariana Shoshi Musliu, ka përsëritur propozimin për organizimin e një dëgjimi publik për dy gazetaret e larguara nga RTK-ja.

Sipas Kusarit, deputeti i Vetëvendosjes Fitim Haziri e ka kundërshtuar këtë ide me arsyetimin se nuk ka bord funksional dhe se duhet të priten vendimet e Inspektoratit.

Po ashtu, zëvendëskryetari i komisionit nga VV, Alban Bajrami, ka deklaruar se përgjegjësia bie mbi bordin e RTK-së, i cili aktualisht mungon, dhe se fillimisht duhet të ketë një vendim nga Inspektorati.

Kusari thekson se kjo është hera e dytë që çështja e dëgjimit publik diskutohet në komision dhe kundërshtohet nga VV-ja.

Opinionistja Aida Dërguti, ka folur mbi çështjen e presidentit , zhvillim ky që ka hyrë në javën vendimtare.

Dërguti tha se kryeministri Albin Kurti është komod si në zgjedhjen e një presidenti, ashtu edhe në shkuarjen në zgjedhje të reja.

Pos tjerash, ajo shtoi se nëse ka konsensus për shefin e shtetit, kjo figurë, siç tha ajo, duhet të jetë e pranueshme për Kurtin.

“Mendoj që fituesi i këtyre zgjedhjeve e ka komoditetin për cilindo opsion. Nëse ka konsensus për president, së pari duhet të jetë i pranueshëm për Albin Kurtin, apo jo? Dhe kjo do të jetë në rregull për të mos shkuar në zgjedhje. Apo në versionin e dytë, ku shpreson që edhe çështjen e presidentit duhet ta ketë në duar, ku ka një situatë të përsosur ku faji do t’i mbetet opozitës”, tha Dërguti.