Ushtria amerikane të martën identifikoi katër nga ushtarët e parë amerikanë të vrarë në luftën kundër Iranit, ndërsa administrata Trump paralajmëroi se konflikti në përshkallëzim do të çojë në më shumë viktima amerikane.
Nga gjashtë vdekjet e deritanishme në radhët e ushtrisë amerikane, katër ushtarët ishin pjesë e një njësie nga Iowa e Rezervës së Ushtrisë së SHBA-së. Ata vdiqën të dielën kur një dron u përplas në një objekt ushtarak amerikan në Port Shuaiba, Kuvajt, njoftoi ushtria amerikane të martën.
Pentagoni tha se katër ushtarët ishin nga 20 deri në 42 vjeç dhe shërbenin në Komandën e 103-të të Mbështetjes nga Des Moines, Iowa, pjesë e operacioneve globale të logjistikës dhe furnizimit të ushtrisë.
Ushtria identifikoi katër ushtarët e Rezervës së Ushtrisë Amerikane si:
Kapiten Cody A. Khork, 35 vjeç, nga Winter Haven, Florida
Rreshter i Parë Noah L. Tietjens, 42 vjeç, nga Bellevue, Nebraska
Rreshter i Parë Nicole M. Amor, 39 vjeç, nga White Bear Lake, Minnesota
Rreshter Declan J. Coady, 20 vjeç, nga West Des Moines, Iowa
Gjeneralmajor Todd Erskine, i cili drejton Komandën e 79-të të Mbështetjes Teatrale, në një deklaratë shprehu “ngushëllimet më të thella dhe respektin” për familjarët dhe anëtarët e njësisë së katër ushtarëve.
Shumica e ushtarëve kishin përvojë të mëparshme në misione jashtë vendit. Khork ishte dislokuar në Arabinë Saudite në vitin 2018, në Guantanamo Bay, Kubë në vitin 2021 dhe në Poloni në vitin 2024. Amor ishte dislokuar në Kuvajt dhe Irak në vitin 2019. Tietjens kishte dy dislokime të tjera në Kuvajt në vitet 2009 dhe 2019.
Coady, i cili u promovua pas vdekjes nga specialist në rreshter, ishte regjistruar në Rezervën e Ushtrisë vetëm në vitin 2023.
Presidenti Donald Trump dhe zyrtarë të tjerë të lartë kanë paralajmëruar se konflikti me Iranin do të rezultojë në më shumë vdekje të ushtarëve amerikanë, ndërsa Teherani po hakmerret ndaj sulmeve amerikane dhe izraelite.
Komanda Qendrore e ushtrisë amerikane tha të martën se Irani ka lëshuar mbi 500 raketa balistike dhe më shumë se 2,000 dronë në sulmet e tij hakmarrëse në të gjithë Lindjen e Mesme deri tani.
Rreziqet për forcat amerikane në Lindjen e Mesme u diskutuan gjatë një informimi me dyer të mbyllura për ligjvënësit të martën nga Sekretari i Mbrojtjes Pete Hegseth, Gjenerali Dan Caine, kryetar i Shefave të Shtabit të Përbashkët, Drejtori i CIA-s, John Ratcliffe dhe Sekretari i Shtetit Marco Rubio.
“Ata na thanë në atë dhomë se do të ketë më shumë amerikanë që do të vdesin – se nuk do të jenë në gjendje t’i ndalojnë këta dronë,” tha senatori demokrat Chris Murphy.
Objekti në Kuvajt ku ndodhën katër vdekjet ishte i mbrojtur me mure betoni kundër shpërthimeve, por nuk kishte një çati të fortifikuar, thanë dy zyrtarë për Reuters.
Nuk ishte e qartë nëse kishte sisteme të mbrojtjes ajrore në vend, por sipas njërit prej zyrtarëve, nuk u dha asnjë alarm ndërsa droni po afrohej.
