Author: K.B.

Edhe këtë verë, Shqipëria po vazhdon të mbetet destinacioni kryesor për pushimet e qytetarëve të Kosovës.

Përfaqësues të sektorit të turizmit dhe biznesit thonë se interesimi nuk ka rënë, ndërsa vlerësojnë se pas një periudhe kur shumë qytetarë provuan destinacione të tjera evropiane pas liberalizimit të vizave, një pjesë e madhe janë rikthyer sërish drejt bregdetit shqiptar.

Krahas lidhjeve familjare e kombëtare, faktorë si çmimet, afërsia, infrastruktura rrugore dhe oferta turistike po përmenden si arsyet kryesore që Shqipëria vazhdon të tërheqë pushues nga Kosova.

Kryetari i Shoqatës së Turizmit në Kosovë, Ruzhdi Kurtishaj, vlerëson se qytetarët e Kosovës përbëjnë pjesën më të madhe të turistëve që vizitojnë Shqipërinë gjatë sezonit veror.

“Unë besoj që shqiptarët e Kosovës bëjnë mbi 50 për qind të numrit të përgjithshëm të turistëve në Shqipëri”.

Sipas tij, rikthimi i qytetarëve të Kosovës drejt Shqipërisë është bërë edhe më i dukshëm këtë vit.

“Mendoj dhe tashmë kjo është e argumentuar se qytetarët e Kosovës e kanë parë që askund më mirë nuk ka se në Shqipëri. Këtë po e themi, pasi në dy vitet e kaluara, në 2024 dhe 2025, qytetarët panë dhe shijuan disa vende të tjera, pasi kjo u mundësua me liberalizimin e vizave, por tash këtë vit përsëri janë kthyer te Shqipëria”, u shpreh ai.

Kurtishaj tha se zgjedhja e Shqipërisë nuk lidhet më vetëm me aspektin patriotik apo lidhjet familjare.

“Tashmë në Shqipëri po shkojnë për kualitet dhe çmime. Po flas me kompetencë për këtë që e them, sepse kemi të bëjmë çdo ditë me qytetarët. Diaspora e Kosovës dhe qytetarët rezidentë po e shohin vetëm Shqipërinë si destinacion. Çmimet në Shqipëri janë të përballueshme për çdo qytetar. Kjo varet edhe nga pakot që merren, por nëse flasim për All Inclusive, atëherë kjo pako është mbi 20 për qind më e lirë në krahasim me Greqinë, Turqinë, Malin e Zi apo edhe Kroacinë”.

Ai shtoi se qytetarët e Kosovës vazhdojnë të jenë ndër faktorët kryesorë të turizmit shqiptar.

“Shqiptarët e Kosovës janë faktor kryesor në turizmin e Shqipërisë. Nëse flasim për këtë periudhë, vetëm në Shëngjin janë mbi 70 për qind e pushuesve qytetarë të Kosovës. Kur flasim për pushime më të gjata, prej shtatë deri në dhjetë ditë, qytetarët e Kosovës po zgjedhin jugun”.

Edhe nga Unioni i Turizmit të Kosovës vlerësojnë se Shqipëria vazhdon të mbetet ndër destinacionet kryesore të pushuesve nga Kosova, pavarësisht zgjerimit të mundësive për udhëtime jashtë rajonit.

Baki Hoti nga Unioni i Turizmit të Kosovës tha se bregdeti shqiptar vazhdon të ruajë pozitën e tij si një prej zgjedhjeve kryesore për qytetarët e Kosovës.

“Lidhur me pyetjen tuaj mund t’ju them se, prapëseprapë, bregdeti shqiptar është njëri ndër destinacionet kryesore të pushuesve nga Kosova, pavarësisht opsioneve të shumta që tashmë janë në dispozicion për qytetarët e Kosovës”, deklaroi Hoti.

Po ashtu edhe drejtori i Dhomës së Tregtisë dhe Industrisë Kosovë, Kushtrim Ahmeti, thotë se Shqipëria vazhdon të jetë destinacioni kryesor për pushuesit nga Kosova.

“Shqipëria vazhdon të mbetet destinacioni kryesor i shqiptarëve të Kosovës. Nga ato që janë parë dhe raportuar, shihet që ka një organizim më të mirë, kontroll më të madh sa i përket çmimeve, sidomos të shezllonëve. Nuk ka prishje të objekteve pa leje siç ka ndodhur në sezonin e kaluar, ku pushuesit janë përballur me zhurmë e pluhur”.

Lidhur me numrin e pushuesve këtë vit, ai tha se është ende herët për të nxjerrë përfundime përfundimtare.

“Shqiptarët nga Kosova tashmë kanë nisur pushimet e gjata verore në Shqipëri. Për të dalë me një përfundim për rritje apo rënie të pushuesve, kjo mbetet të shihet në fund të sezonit. Por duhet ta kemi edhe një gjë të qartë, shumë shqiptarë të Kosovës tashmë kanë blerë patundshmëri në Shqipëri dhe përpos pushimeve verore, ata shkojnë shumë shpesh, gati në çdo stinë të vitit”, u shpreh ai.

Ahmeti përmendi edhe disa vështirësi që janë shfaqur gjatë sezonit.

“Megjithëse edhe këtë vit vlen marrëveshja për lehtësimin e kalimit kufitar, në këtë periudhë kur Shqipëria po përballet me protesta, ka pasur disa shqetësime për kontrolle të shtuara në kufi, të cilat kanë shkaktuar vonesa dhe kolona në kalimet kufitare mes dy vendeve”.

Sipas Ahmetit, Shqipëria vazhdon të jetë tërheqëse për pushuesit nga Kosova për shkak të një kombinimi faktorësh.

“Po mbi të gjitha është gjuha dhe gjaku që na lidh, është vendi i përbashkët i shqiptarëve. Pavarësisht rritjes së çmimeve, Shqipëria në përgjithësi i ka ende çmimet e përballueshme për xhepin e qytetarëve nga Kosova. Ofron ujin e pastër dhe një diell natyral. E mira që ofron Shqipëria është se ka plazhe me çmime të ndryshme, pra secili pushues e zgjedh plazhin sipas mundësisë ekonomike që e ka. Edhe akomodimi është me çmime të ndryshme, pra kemi hotele, apartamente, vila apo resorte të ndryshme. Edhe gastronomia ka pësuar përmirësime të ndjeshme dhe është përshtatur me kërkesat e pushuesve nga Kosova. Për ata që nuk e duan vetëm detin, Shqipëria ofron mundësinë e eksplorimeve të pafundme të objekteve historike, parqeve, maleve e bjeshkëve. Lidhja e Kosovës me Shqipërinë përmes autostradës e ka bërë më të lehtë turizmin, megjithëse çmimet e pagesës së autostradës janë të larta dhe, përkundër kërkesave të vazhdueshme, qeveria shqiptare nuk ka lëvizur që t’i ulë ato”.

Ndikimi i qytetarëve të Kosovës në ekonominë turistike të Shqipërisë evidentohet edhe në studimin më të fundit të Aleancës Kosovare të Bizneseve (AKB). Sipas këtij studimi, vetëm gjatë fundjavave të sezonit turistik, nga maji deri në tetor 2026, qytetarët e Kosovës pritet të shpenzojnë rreth 195 milionë euro në Shqipëri.

Studimi tregon se gjatë pesë fundjavëve të monitoruara, mesatarisht rreth 25 mijë qytetarë nga Kosova kanë kaluar fundjavën në Shqipëri.

Sipas AKB-së, për një qëndrim prej dy deri në tre netësh, secili pushues shpenzon mesatarisht të paktën 300 euro, duke përfshirë akomodimin, ushqimin dhe pijet, karburantin, taksën rrugore, transportin, argëtimin dhe blerjet.

Bazuar në këto të dhëna, vetëm gjatë një fundjave ekonomia shqiptare përfiton rreth 7.5 milionë euro nga vizitorët e Kosovës.

Aleanca vlerëson se, gjatë gjithë sezonit turistik nga 1 maji deri më 30 tetor, që përfshin 26 fundjava, shpenzimet arrijnë në rreth 195 milionë euro. Në këtë llogaritje nuk janë përfshirë pushimet njëjavore apo më të gjata, çka nënkupton se kontributi real financiar është edhe më i madh.

Kryetari i Aleancës Kosovare të Bizneseve, Agim Shahini, ka treguar se studimi dëshmon rëndësinë e qytetarëve të Kosovës për ekonominë shqiptare.

“Rreth 195 milionë euro që shpenzohen vetëm gjatë 26 fundjavave të sezonit maj–tetor përbëjnë një kontribut të jashtëzakonshëm për ekonominë e Shqipërisë. Ky partneritet ekonomik duhet të vlerësohet dhe të zhvillohet më tej përmes politikave të përbashkëta dhe investimeve strategjike. Kur fiton turizmi shqiptar, fitojnë edhe bizneset dhe qytetarët në të dy anët e kufirit”.

Fluksi i lartë i qytetarëve të Kosovës drejt Shqipërisë pasqyrohet edhe në të dhënat e autoriteteve kufitare shqiptare. Gjatë muajve maj dhe qershor janë regjistruar mbi 2 milionë hyrje-dalje në pikat kufitare mes qarkut të Kukësit dhe Kosovës.

Kurse, për muajin korrik, qe tashmë veç sa ka nisur, vetëm gjatë katër orëve të një dite të shtunë, përmes pikës kufitare Morinë kanë hyrë në Shqipëri mbi 12 mijë qytetarë nga Kosova me rreth 2 mijë e 900 automjete.

Për automjetet me targa të Kosovës vazhdon të zbatohet regjimi i kalimit të lehtësuar, ndërsa për automjetet me targa të huaja po zbatohen procedura të përshpejtuara për të shmangur vonesat.

Pas rënies në 2025-n, hyrjet e shtetasve nga Kosova rriten 10% për 5 mujorin

Edhe shifrat e publikuara nga INSTAT e konfirmojnë tendencën e rikthimit të shtetasve nga Kosova. Për periudhën janar-maj 2025, në Shqipëri janë shënuar gati 127 mijë hyrje të shtetasve nga Kosova, me një rritje prej 10% në krahasim me të njëjtën periudhë të një viti më parë.

Tendenca është e kundërt në raport me vitin 2025, kur turistët nga Kosova ranë me 7% në janar-maj, në krahasim me 2024-n, teksa shumë prej tyre filluan te eksploronin destinacione të tjera, si Greqia, apo dhe shtete të tjera të Europës.

Kosova vijon të mbajë peshën kryesore të turizmit në Shqipëri, me mesatarisht 34% të hyrjeve totale për 5 mujorin 2026, po sipas INSTAT. Shteti i dytë me më shumë hyrje është Italia, me rreth 11%, ose tre herë më pak se Kosova.

Pas dyshimeve se disa qytetarë kanë helmuar pas konsumimit të ushqimit, është intervistuar pronari i një lokali në Han të Elezit.

Policia në raportin 24 orësh bën të ditur se rasti u iniciua si “Prodhimi dhe vënia në qarkullim e artikujve të dëmshëm ushqimor”.

“Hani i Elezit 13.07.2026 – NN. Me 15.07.2026 në cilësinë e të dyshuarit, në stacion policor është intervistuar një mashkull kosovar për shkak të dyshimit se në lokalin e tij pas konsumimit të ushqimit janë helmuar disa persona. Rasti është duke u hetuar për të cilin është njoftuar prokurori i cili ka autorizuar të iniciohet lënda e rastit”, thuhet në njoftim.

Një ditë më parë, Policia njoftoi se rreth 80 persona janë trajtuar nga 13 deri më 15 korrik në Qendrën Kryesore të Mjekësisë Familjare në Han të Elezit me simptoma të diarresë dhe vjelljes.

Presidenti i Ukrainës, Volodymyr Zelensky, e shkarkoi Mykhailo Fedorovin nga posti i ministrit të Mbrojtjes, pas një takimi me udhëheqjen ushtarake.

Shkarkimi i udhëheqësit të sektorit të mbrojtjes është në kuadër të një riorganizimi të kabinetit qeveritar, në të cilin edhe Yulia Svyrydenko u largua nga posti i kryeministres të Ukrainës.

Fedorovi, një burokrat i ri dhe i njohur për aftësitë e tij në teknologji, i cili ka udhëhequr përpjekjet për transformimin digjital në administratën shtetërore dhe ka promovuar inovacionin në përdorimin e dronëve si një armë të rëndësishme në luftë, konfirmoi më 15 korrik se ishte liruar nga detyra.

Në gjashtë muajt sa ishte ministër, Ukraina shënoi përmirësime në pozicionin e saj në fushëbetejë, duke goditur vazhdimisht rafineritë ruse të naftës, duke shkaktuar mungesa të karburanteve në Rusi dhe duke e turpëruar presidentin rus, Vladimir Putin.

“Ishte një nder i madh t’i shërbeja popullit ukrainas si ministër i Mbrojtjes”, shkroi ai në një postim në rrjetet sociale.

Zelensky nuk ka komentuar publikisht për këtë vendim.

Fedorovi përmendi disa nga arritjet gjatë kohës sa e drejtoi Ministrinë e Mbrojtjes, përfshirë bllokimin e qasjes së trupave ruse në satelitët e Starlink-ut, gjë që sipas tij, “ua reduktoi ndjeshëm aftësinë për të zhvilluar një luftë efektive me dronë”.

Ai shtoi se do të vazhdojë të punojë për “ta mposhtur armikun përmes veprimit asimetrik, shpejtësisë së inovacionit dhe forcës organizative”. Federov nuk dha detaje të tjera.

Mediat ukrainase kishin spekuluar se Fedorovi mund të shkarkohej, pasi thuhej se ishte në një “konflikt sistematik” me anëtarë të tjerë të kabinetit, të përfshirë në vendimmarrjen për shpenzimet në fushën e mbrojtjes.

Dan Rice, president i Universitetit Amerikan të Kievit dhe ish-këshilltar i posaçëm i komandantit të përgjithshëm të Forcave të Armatosura të Ukrainës, i tha Radios Evropa e Lirë se Fedorovi mund të emërohet në një post tjetër të lartë, përfshirë potencialisht atë të kryeministrit ose të ambasadorit të Ukrainës në Shtetet e Bashkuara, megjithëse theksoi se “askush nuk e di” se çfarë synimi ka Zelensky.

“Mendoj se ai ka bërë një punë të jashtëzakonshme në një periudhë shumë të shkurtër”, tha Rice lidhur me Federovin.

“Besoj se ai ka mundësi të ndihmojë jashtëzakonisht shumë në marrëdhëniet mes Ukrainës dhe SHBA-së. Por, koha do të tregojë se çfarë dëshiron presidenti Zelensky”.

Zelensky njoftoi më 12 korrik se po fillonte riorganizimin e Qeverisë, duke thënë se ndryshimet janë të nevojshme për zbatimin e një strategjie të përditësuar politike.

Ai tha se riorganizimi synon po ashtu ripërtëritjen e Kabinetit të Ministrave dhe se përgjegjësia për fushat kyç të politikës së jashtme do t’u besohet zyrtarëve me përvojë.

Më 15 korrik, Zelensky mbështeti emërimin e Serhiy Koretskiyt, drejtorit ekzekutiv të Naftogaz – kompanisë më të madhe shtetërore të naftës dhe gazit në Ukrainë – si kryeministrin e ardhshëm të vendit.

Naftogaz është një nga burimet kryesore të të ardhurave të Qeverisë dhe një korporatë që ka ndikim të madh politik.

Një nga ministrat më të rinj në Qeverinë e Zelenskyt, Fedorov, 34 vjeç, u emërua në vitin 2019 si ministri i parë i Transformimit Digjital të Ukrainës, një post që u krijua për të modernizuar shërbimet burokratike shtetërore, shumë prej të cilave datonin që nga epoka sovjetike.

Po aq e rëndësishme ishte edhe rritja e transparencës në proceset burokratike, duke ndihmuar në çrrënjosjen e praktikave korruptive.

Reformat – të përshkruara me frazën “shteti në një telefon të mençur” – u mirëpritën nga qytetarët ukrainas, ndërsa popullariteti dhe suksesi i Fedorovit çuan në promovimin e tij në kabinetin qeverisës, në postin e zëvendëskryeministrit, me një portofol më të zgjeruar.

Në janar, ai u emërua ministër i Mbrojtjes.

Megjithëse mungesa e përvojës ushtarake e Fedorovit shkaktoi pakënaqësi te disa pjesëtarë të Forcave të Armatosura të Ukrainës, emërimi i tij u shoqërua me një rritje të ndjeshme të përdorimit dhe prodhimit të dronëve – një fushë e inovacionit ushtarak në të cilën Ukraina ka spikatur gjatë luftës.

Javët e fundit, Ukraina ka përdorur dronë për të goditur një sërë caqesh thellë brenda territorit rus.

Sulmet ndaj infrastrukturës energjetike të Kremlinit, përfshirë terminalet e naftës dhe cisternat në det, janë pjesë e një fushate që Kievi e ka quajtur “sanksione me rreze të gjatë veprimi” kundër Rusisë.

Sulmet me dronë ndaj objekteve energjetike ruse kanë shkaktuar mungesa të mëdha të karburanteve në mbarë vendin. Edhe Moska – e cila shpesh ka qenë e paprekur nga krizat në pjesë të tjera të Rusisë – ka filluar t’i ndiejë pasojat, pasi ka radhë të gjata në pikat e furnizimit me karburant që kanë nxitur zemërim te shoferët. /REL

Një person është plagosur mbrëmë në fshatin Miradi e Epërme të Fushë Kosovës, si pasojë e të shtënave me armë zjarri.

Lajmin e ka konfirmuar zëdhënësi i Policisë së Kosovës për rajonin e Prishtinës Enis Pllana.

“Rreth orës 21:00, Policia ka pranuar informatën për plagosje në fshatin Miradi e Epërme në Fushë Kosovë. Njësitet policore kanë dalë menjëherë në vendin e ngjarjes, ku sipas informacioneve fillestare një person ka mbetur i lënduar, që dyshohet të jetë plagosur me armë zjarri”.

Pllana ka thënë se personi i plagosur, është dërguar për trajtim mjekësor.

“Personi i lënduar është dërguar për tretman mjekësor, ndërkohë që njësitet policore janë duke ndërmarrë veprimet e nevojshme hetimore për të sqaruar rrethanat e rastit”.

Sipas informacioneve i plagosuri është dërguar për tretman mjekësor dhe është jashtë rrezikut për jetë.

Po ashtu mësohet se personat e përfshirë në këtë ngjarje të rënda janë familjarë mes vete.

Me urdhër të prokurorit kompetent janë ndërmarrë veprimet e nevojshme procedurale, ndërsa Policia e Kosovës po vazhdon hetimet për të sqaruar plotësisht rrethanat e rastit dhe përgjegjësinë penale të personave të përfshirë.

Lidhur me rastin është iniciuar hetim për veprën penale “Vrasje në tentativë”, ndërsa i dyshuari ndodhet në arrati dhe është në kërkim nga organet e rendit.

Sekretari i Thesarit të SHBA-së, Scott Bessent, njoftoi se zyra e prerjes së monedhave një dollar do të fillojë të prodhojë monedha njëdollari me imazhin e Presidentit të SHBA-së, Donald Trump, në anën e përparme, si pjesë e festimeve të 250-vjetorit të Shteteve të Bashkuara.

Dizajni i ri përmban mbishkrimet “Liri”, “Në Zot Besojmë” dhe “17762026” në pjesën e përparme, ndërsa në anën e pasme shfaqet shqiponja tullace nga vula presidenciale. Kjo është një zgjidhje e modifikuar krahasuar me draftin e publikuar në tetor. Pjesa e pasme e atij propozimi të mëparshëm tregonte Trumpin me grushtin e ngritur dhe fjalët “luftë, luftë, luftë”, një aludim për një atentat ndaj tij në vitin 2024.

Donald Trump tha se ishte i nderuar që ishte në monedhë.

“Më dhanë një monedhë”, tha Trump në një intervistë me Fox Business..

“Për aq sa kuptoj unë, kjo është shumë e pazakontë”, shtoi ai.

Kritikët kanë vënë në pikëpyetje ligjshmërinë e një dizajni të tillë. Një ligj amerikan i vitit 1866 përcakton që portreti i një personi të gjallë nuk mund të vendoset në monedhën amerikane, por kjo dispozitë zbatohet për paratë letër të lëshuara nga Byroja e Gdhendjes dhe Shtypjes. Monedhat shtypen nga Monedha e SHBA-së.

Kongresi miratoi një ligj në vitin 2020 që i lejonte Sekretarit të Thesarit të lëshonte monedha përkujtimore një dollar për të përkujtuar 250-vjetorin e Shteteve të Bashkuara, por ligji ndalon posaçërisht që dizajni të përshkruajë një person të gjallë.

Në një intervistë me Fox News, e cila u transmetua të martën, Bessent theksoi se Presidenti i atëhershëm Calvin Coolidge ishte paraqitur në një monedhë për të përkujtuar 150-vjetorin e Shteteve të Bashkuara.

Sot do t’i jepet lamtumira e fundit Gent Maksutajt, 20-vjeçarit me prejardhje nga Kosova, i cili u vra më 5 korrik në Suedi në rrethana tragjike.

Varrimi i të ndjerit do të bëhet në varrezat e fshatit Banjë, në orën 16:00.

Sipas dyshimeve fillestare, i riu është privuar nga jeta aksidentalisht gjatë një përleshjeje mes bandave kriminale.

Për këtë rast të rëndë kanë raportuar edhe mediat suedeze, të cilat kanë publikuar detaje të reja lidhur me ngjarjen dhe hetimet që po zhvillohen.

Sipas Policisë suedeze, i dyshuari për të shtënat dyshohet se pas ngjarjes ka udhëtuar me tren drejt Stokholmit, ku më vonë është arrestuar gjatë mbrëmjes ose natës.

Si dyshohet se ndodhi ngjarja

Të shtënat kanë ndodhur në zonën Kvarngärdet në Uppsala.

Rreth orës 21:00 të së dielës, policia ka marrë një alarm për të shtëna me armë zjarri në këtë zonë. Menjëherë është ndërmarrë një operacion i madh policor, ku janë angazhuar disa patrulla, ndërsa zona është rrethuar plotësisht.

Në vendngjarje janë parë edhe dy autoambulanca.

Fillimisht, autoritetet nuk kanë dhënë shumë detaje për rastin, por më vonë është konfirmuar se një burrë në të njëzetat ka humbur jetën si pasojë e plagëve të marra nga arma e zjarrit.

Familjarët e viktimës janë njoftuar për ngjarjen e rëndë.

Hetimi: Rasti cilësohet si vrasje e rëndë

Policia suedeze e ka cilësuar rastin si vrasje dhe po vazhdon hetimet për të zbardhur rrethanat e sakta të ngjarjes.

Viktima është gjetur jashtë, ndërsa ende po hetohet vendi i saktë ku kanë ndodhur të shtënat.

“Ne kemi vendosur kordonë sigurie dhe po kërkojmë gjurmë që mund ta ndihmojnë hetimin. Po intervistojmë dëshmitarë dhe po kontrollojmë kamerat e sigurisë, si ato tona ashtu edhe private”, ka deklaruar zëdhënësi i policisë, Pelle Vamstad.

Nuk përjashtohet lidhja me krimin e organizuar

Në këtë fazë të hetimeve, policia nuk ka konfirmuar nëse ngjarja lidhet me krimin e organizuar, por ka theksuar se kjo mbetet një nga pistat kryesore që po shqyrtohet.

Hetimet për zbardhjen e plotë të rastit janë duke vazhduar.

Fluksi i qytetarëve dhe automjeteve në pikat kufitare të Kosovës vazhdon të mbetet i ulët, ndërsa pritjet për hyrje dhe dalje nga vendi janë minimale.

Sipas të dhënave të fundit, në shumicën e pikave kufitare qytetarët po presin vetëm nga tre deri në pesë minuta, pa u krijuar kolona apo ngarkesa të konsiderueshme në qarkullim.

Situata paraqitet e qetë në të gjitha vendkalimet kryesore, ndërsa autoritetet kufitare po e menaxhojnë lëvizjen pa vështirësi. Aktualisht nuk raportohet për fluks të shtuar të udhëtarëve, ndonëse sezoni veror ka rritur gradualisht numrin e atyre që hyjnë dhe dalin nga Kosova.

Megjithatë, pritet që gjatë ditëve në vijim qarkullimi në kufi të intensifikohet, për shkak të ardhjes së bashkatdhetarëve për pushimet verore, si dhe rritjes së numrit të qytetarëve që udhëtojnë drejt vendeve fqinje dhe destinacioneve turistike.

Për momentin, qytetarët mund t’i kalojnë pikat kufitare pa pritje të gjata.

Ministrja serbe, Snezana Paunovic, dy ditë më parë ka shokuar me një deklaratë të saj duke thënë se nëse do të ishte në vend të Sllobodan Millosheviqit do të “kishte spastruar etnikisht Kosovën qysh në vitin 1998”.

Lidhur me këtë deklaratë të Paunovic, në një intervistë për Gazetën Express ka folur politikani liberal serb, Cedomir Jovanovic.

Ai ka thënë se një deklaratë e tillë tregon se serbët janë armiqtë më të këqij të vetvetës dhe ka thënë se iu kërkon falje shqiptarëve dhe serbëve të Kosovës që janë viktima dhe pengje të nacionalizmit serb.

Jovanovic thotë se asnjë njeri normal nuk e mendon atë që thotë ministrja serbe Paunovic.

“Ministrja serbe Snezana Paunovic me deklaratën e saj vetëm sa konfirmoi se serbët janë armiqtë e tyre më të këqij. Unë u kërkoj sinqerisht falje shqiptarëve dhe gjithashtu serbëve të Kosovës, sepse të dy palët, secila në mënyrën e vet, janë viktima dhe pengje të budallallëkut, paaftësisë dhe monstruozitetit të politikës së çmendur të nacionalizmit serb, i cili historikisht është mposhtur edhe në vetë Serbinë, sepse asnjë njeri normal nuk mendon atë që thotë ministrja fatkeqe”, ka thënë Jovanovic për Gazetën Express.

Lidhur me këtë deklaratë të ministres serbe, të martën për Express ka folur Nenad Canak. Ai e ka quajtur idiote ministren serbe dhe ka thënë se qeveria aktuale në Serbi është simptomë e natyrës fashiste të shoqërisë serbe.

“Është e dukshme që qeveria aktuale në Serbi është një simptomë e natyrës fashiste të shoqërisë serbe në këtë moment. Kjo ishte e parashikueshme, sepse s’kemi pasur asnjëherë gjykim për politikën kohës së Sllobodan Millosheviqit përgjatë viteve të 90-ta”, ka thënë Canak.

Deputeti i Bundestagut gjerman nga radhët e Partisë Socialdemokrate të Gjermanisë (SPD), Adis Ahmetoviq, ka reaguar ndaj deklaratave të ministres serbe Snezhana Paunoviq, duke i cilësuar ato si të papajtueshme me vlerat evropiane.

Ahmetoviq ka thënë se shtetet e Ballkanit Perëndimor, përfshirë Serbinë, e kanë vendin në Bashkimin Evropian, por ka theksuar se nacionalizmi dhe gjuha e urrejtjes nuk kanë vend në komunitetin evropian të vlerave.

“Po, shtetet e Ballkanit Perëndimor i përkasin BE-së. Kjo përfshin edhe Serbinë. Por një frymë nacionalizmi dhe urrejtjeje, që vjen nga disa qeveri, nuk ka vend në komunitetin tonë evropian të vlerave”, ka shkruar Ahmetoviq.

Sipas tij, një qasje e tillë po dëmton procesin e zgjerimit të Bashkimit Evropian dhe përpjekjet për ta bërë Unionin më të fortë.

“Ky mentalitet e torpedon procesin që BE-ja të rritet dhe të bëhet edhe më e fuqishme. Shenja e duhur nga Beogradi do të ishte shkarkimi i menjëhershëm i ministres Paunoviq”, ka deklaruar deputeti gjerman.

Reagimi i tij vjen pas deklaratave të ministres serbe të Administratës Shtetërore dhe Vetëqeverisjes Lokale, Snezhana Paunoviq, për “spastrim etnik”, e cila ka shkaktuar reagime të shumta me qëndrimet e saj lidhur me Kosovën.