Author: K.B.

Pas zhvillimeve në Degën e Deçanit, dorëheqje nga strukturat e tyre kanë dhënë edhe anëtarë të Kryesisë së Partisë Guxo në Pejë.

Në një njoftim, anëtari i kësaj partie Ruzhdi Blakaj, bëri të ditur se vendimi për largim nga partia lidhet me, siç thonë, mungesën e përkrahjes ndaj Presidentes Vjosa Osmani nga ana e strukturave të kësaj partie në Pejë.

Në reagim thuhet se është shqetësues qëndrimi i zëvendëskryeministres dhe bashkëkryetares së Guxo-s, Donika Gërvalla, për të cilën pretendohet se ka lobuar kundër rizgjedhjes së Osmanit në postin e presidentes.

Sipas deklaratës së tyre, është e papranueshme që brenda të njëjtit subjekt politik të mos ketë mbështetje për një presidente që, sipas tyre, ka treguar integritet dhe angazhim të vazhdueshëm për shtetin, veçanërisht në fushën e politikës së jashtme.

“Për këto arsye, në shenjë kundërshtimi ndaj kësaj qasjeje dhe në mbrojtje të parimeve që përfaqësojmë, kemi vendosur të japim dorëheqje nga Partia Guxo – Pejë dhe të vazhdojmë ta mbështesim Presidenten Osmani në çdo vendim të saj të mëtejmë”, thuhet në njoftim.

Ish-kandidati i AAK-së për deputet, Arton Demhasaj, ka reaguar pasi kryeministri Albin Kurti ka thënë se s’ka nevoje për zgjedhje të reja.

Demhasaj ka lënë të kuptohet se Kurti po frikësohet nga zgjedhjet e reja, duke përdorur një shprehje popullore.

“Tuta han dardha të buta!””, ka shkruar ai.

Shtetet e Bashkuara të Amerikës po zhvendosin pjesë të një sistemi mbrojtës nga raketat të instaluar në Korenë e Jugut në Lindjen e Mesme, sipas zyrtarëve të cituar nga Washington Post dhe mediat e Koresë së Jugut.

Lëvizja e raportuar vjen 12 ditë pas fillimit të luftës SHBA-Izrael kundër Iranit dhe vjen pas raportimeve që sugjerojnë se Irani kishte shkatërruar një radar kyç të përdorur nga sistemi Terminal High-Altitude Area Defense, ose Thaad, në Jordani.

Sistemi Thaad u vendos për herë të parë në Korenë e Jugut në vitin 2017 për t’u mbrojtur nga kërcënimet nga Koreja e Veriut e armatosur me armë bërthamore.

Ky veprim u prit me zemërim dhe protesta nga koreano-jugorët, të cilët kishin frikë se kjo do t’i bënte ata një objektiv më të madh, ndërsa Kina paralajmëroi se kjo mund të destabilizonte rajonin.

Çfarë është Thaad dhe pse mund të zhvendoset?

Më herët këtë javë, gazeta Ëashington Post raportoi se pjesë të sistemit Thaad po zhvendoseshin në Lindjen e Mesme, duke cituar dy zyrtarë. Raportet vijnë ndërsa SHBA-të dhe Izraeli vazhdojnë të sulmojnë Iranin, dhe Irani përgjigjet me një breshëri dronësh dhe raketash balistike që synojnë bazat ushtarake izraelite dhe amerikane në rajon.

Nuk është e qartë saktësisht se sa raketa ka Irani, deri më tani ka lëshuar më shumë se 500 raketa balistike, sipas një llogaritjeje të New York Times. Shumica e tyre janë kapur, por volumi i zjarrit që vjen mund të jetë duke e tendosur inventarin ushtarak të Uashingtonit, thonë vëzhguesit.

Dhe ka të ngjarë që kjo të vazhdojë sepse Irani, besojnë ata, po përgatitet për një luftë rraskapitëse që përfshin më shumë vende të Lindjes së Mesme, përfshirë aleatët e SHBA-së.

Kjo do të shpjegonte pse sistemi Thaad, i cili është projektuar posaçërisht për të kapur raketa në lartësi të madhe, është thelbësor për forcimin e sistemit mbrojtës të SHBA-së. Raportet e mëparshme të këtij muaji pohuan se një sulm iranian shkatërroi radarin prej 300 milionë dollarësh të një sistemi ekzistues Thaad në Jordani.

I prodhuar nga kompania amerikane Lockheed Martin, sistemi anti-raketor përfshin gjashtë lëshues të montuar, me tetë interceptorë në secilin lëshues dhe një sistem radari për zbulim.

Mund të rrëzojë raketa balistike me rreze të shkurtër dhe të mesme veprimi, duke përdorur teknologjinë “goditje për të vrarë”. Kjo do të thotë që energjia kinetike shkatërron kokën bërthamore që vjen. Mund ta bëjë këtë në një lartësi të madhe, përtej atmosferës së Tokës, gjë që u pa si veçanërisht e dobishme në Korenë e Jugut, pasi mund të përdoret për të kapur dhe shkatërruar një kokë bërthamore.

Një sistem i vetëm, ose bateri siç njihet ndryshe, kushton afërsisht 1 miliard dollarë (766 milionë paund) dhe kërkon një ekuipazh prej rreth 100 personash për ta operuar. SHBA-të operojnë vetëm tetë prej tyre në nivel global, dy prej të cilëve janë në Lindjen e Mesme – në Jordani dhe Izrael. Emiratet e Bashkuara Arabe dhe Arabia Saudite së bashku zotërojnë tre të tjera.

Rivendosja e mundshme nga Koreja e Jugut ishte një “masë paraprake”, tha një zyrtar amerikan për Ëashington Post, por analistë të tjerë e shohin një sistem të tendosur.

Ky veprim do të sugjeronte fuqimisht “nevojën që SHBA-të të kompensojnë përdorimin e saj të rëndë të aftësive ekzistuese të mbrojtjes nga raketat në Lindjen e Mesme”, tha për BBC-në profesori John Nilsson-Wright i Universitetit të Kembrixhit.

Arrestohet 18-vjeçari nga rajoni i Tetovës i cili dërgoi kërcënime për vendosje bombash dhe vrasje në shkollën e mesme të Tetovës
Sektori për Punë të Brendshme në Tetovë njofton se mbrëmë (12/13 mars 2026) në Departamentin e Policisë së Tetovës, disa profesorë nga Shkolla e Mesme e Mjekësisë “Nikolla Shtejn” në Tetovë raportuan se kishin marrë informacione nga prindërit e nxënësve, se M.R. u kishte dërguar mesazhe nxënësve, përkatësisht duke u kërcënuar se do të vendoste bomba dhe do të kryente vrasje në shkollë.

“Menjëherë nga oficerët e policisë së Sektorit të Punëve të Brendshme Tetovë u ndërmorën masa dhe aktivitete përkatëse dhe pas marrjes së urdhrit gjyqësor, u krye kontroll në fshatin Pallaticë, rajoni i Tetovës, në shtëpinë dhe ambientet ndihmëse të R.R. (49)”.

“Gjatë kontrollit, u gjetën disa sende që i përkisnin djalit të tij M.R. (18), të cilat dyshohet se burojnë nga një vepër penale. M.R. është i privuar nga liria dhe pas dokumentimit të plotë të rastit, do të ngrihen akuza përkatëse”, thonë nga SPB Tetovë.

Në faqen e sistemit të prokurimit publik prej dje është publikuar marrëveshja e Ministrisë së Punëve të Jashtme me operatorin për evakuimin e qytetarëve të RMV-së nga Lindja e Mesme.

Bëhet fjalë për një marrëveshje të negociuar pa publikuar njoftim për prokurim publik, të arritur me Avialog Dooel për shumën prej 59,799,900 denarë.

Më parë, Ministri Timço Mucunski tha se qytetarëve të RMV-së nuk do t’u ngarkohej tarifa për transportin ajror për evakuim.
Deri më tani, një pjesë e madhe e qytetarëve të RMV-së që kërkuan ndihmë për t’u larguar nga vendet e rrezikshme janë evakuuar.
Dje, në Aeroportin Ndërkombëtar të Shkupit mbërriti grupi i dytë i qytetarëve, të cilët fluturuan shëndoshë e mirë nga Dubai dhe u larguan nga territori i Emirateve të Bashkuara Arabe.

“Lidhur me situatën aktuale në Lindjen e Mesme, për shkak të së cilës një numër i madh qytetarësh të RMV-së gjenden në vendet nën sulm ose në rrezik sulmesh të mëtejshme nga Irani, që nga fillimi i konfliktit, gjithsej 473 qytetarë të RMV-së kanë kontaktuar misionet diplomatike dhe konsullore të Republikës së Maqedonisë së Veriut në Tel Aviv, Doha dhe Abu Dhabi dhe kanë kërkuar evakuim, prandaj Ambasadat komunikojnë çdo ditë me qytetarët tanë dhe mbledhin të dhëna dhe kërkesa për evakuim nga rajoni, pra nga Izraeli, Emiratet e Bashkuara Arabe, Katari, Kuvajti dhe Bahreini, por aktualisht nuk ka mundësi për evakuim nga ajri”, thonë nga Ministria e Punëve të Jashtme.

Kryetarja e Kuvendit të Kosovës, Albulena Haxhiu ka mirëpritur vendimin e Komitetit Evropian të Rajoneve për të hequr nga përdorimi i fusnotës krahas emrit të Kosovës, si Kosovo.

Haxhiu përmes një postimi në rrjetin social në Facebook ka shkruar se Republika e Kosovës për një kohë të gjatë është përfaqësuar padrejtësisht në organizata ndërkombëtare me një emërtim të tillë jozyrtar.

“Vendimi i Komitetit Evropian të Rajoneve për të hequr nga përdorimi fusnotën krahas emrit të vendit tonë, pra si ‘Kosovo’, është një zhvillim shumë i mirë dhe i shumëpritur. Republika jonë për një kohë të gjatë është përfaqësuar padrejtësisht në organizata ndërkombëtare me një emërtim të tillë jozyrtar, i cili erdhi si rezultat i dialogut të dikurshëm ndërmjet Kosovës dhe Serbisë. Heqja e kësaj padrejtësie përbën një hap të rëndësishëm përpara në fuqizimin dhe afirmimin e shtetit tonë në arenën ndërkombëtare”, ka shkruar Haxhiu.

Bondsteel-i Amerikan ka dhënë tre shtretër spitalorë si donacion për Qendrën e Mjekësisë Familjare në Lagjen e Muhaxherëve.

Ky donacion, njofton kryetari i Prishtinës, Përparim Rama, se u realizua me ndërmjetësimin e KFOR-it Italian.

Ndër të tjera, i pari i Prishtinës theksoi se çdo mbështetje që forcon shërbimet shëndetësore në lagjet e kryeqytetit,është një hap më shumë drejt një qyteti që kujdeset për mirëqenien e qytetarëve të tij.

“Qendra e Mjekësisë Familjare në Lagjen e Muhaxherëve u pajis me 3 shtretër spitalorë, donacion nga Bondsteel Amerikan, i realizuar me ndërmjetësimin e KFOR-it Italian (LMT Italiane). Çdo mbështetje që forcon shërbimet shëndetësore në lagjet tona është një hap më shumë drejt një Kryeqyteti që kujdeset për mirëqenien e qytetarëve të tij”, ka shkruara Rama.

Punëtorët teknikë dhe atë të sigurimit fizik në Universitetin e Prishtinës “Hasan Prishtina” kanë paralajmëruar se do të hyjnë në grevë.

Sipas tyre, rektori i UP-së, Arben Hajrullahu u ka thënë se pagat e tyre nuk do të ndryshojnë deri në gusht të vitit 2027.

“Pas takimit të djeshëm të kryesisë se Sindikatës me Rektorin e Universitetit të Prishtinës, ku Rektori i UP-së u deklarua se pagat e punëtorëve teknik dhe ato të sigurimit fizik nuk do të ndryshojnë deri në gusht të vitit 2027, kryetari i Shoqatës së punëtorëve të sigurimit fizik në UP, Arsim Xhinovci, njofton Federatën Sindikale te Punëtorëve të Sektorit Privat të Kosovës se do të fillojnë me protesta dhe greva të menjëhershme”, thuhet në njoftimin në njoftim.

Tutje thuhet se nëse nuk arrihet marrëveshja për rritjen e pagës, punëtorët deklarohen se në mënyrë kolektive do të largohen nga shërbimi për sigurim të Universitetit të Prishtinës pasi që pagat e tyre janë paga qesharake.

Një raketë e lëshuar nga Irani është shkatërruar nga mbrojtja ajrore e NATO-s, sipas ministrisë së mbrojtjes së Turqisë.

“Një municion balistik i lëshuar nga Irani dhe që hyri në hapësirën ajrore turke u neutralizua nga asete të mbrojtjes ajrore dhe raketore të NATO-s të vendosura në Mesdheun lindor,” thuhet në një deklaratë të ministrisë të postuar në X.

Deklarata shton “të gjitha masat e nevojshme po merren me vendosmëri” ndaj kërcënimeve kundër vendit dhe hapësirës së tij ajrore.

Nato kishte shkatërruar edhe ditë më parë një raketë të nisur drejt Turqisë.