Author: K.B.

Njohësi i çështjeve të drejtësisë, Ehat Miftaraj, ka reaguar përmes një postimi në rrjetet sociale, duke krahasuar zhvillimet e fundit në procesin e integrimit evropian të Shqipërisë dhe Malit të Zi me situatën në Kosovë.

Sipas Miftarajt, ndërsa Departamenti Amerikan i Shtetit ka bërë të ditur se Dialogu Strategjik me Kosovën do të zhvillohet pasi të përmbushen kushtet dhe zotimet ndaj komunitetit serb, Shqipëria dhe Mali i Zi po vazhdojnë të shënojnë përparim në negociatat për anëtarësim në Bashkimin Evropian.

Ai rikujton se më 14 korrik 2026, Shqipëria mbylli përkohësisht tre kapituj të negociatave – Kapitullin 25 (Shkenca dhe Kërkimi), 26 (Arsimi dhe Kultura) dhe 30 (Marrëdhëniet me Jashtë), duke bërë që tashmë t’i ketë hapur të 33 kapitujt. Ndërkohë, Mali i Zi mbylli edhe dy kapituj të tjerë – Kapitullin 8 (Politika e Konkurrencës) dhe 29 (Bashkimi Doganor), duke arritur në 18 kapituj të mbyllur përkohësisht.

Në kontrast me këto zhvillime, Miftaraj ironizon se gjatë shtatë viteve të qeverisjes së Lëvizjes Vetëvendosje në Kosovë janë “mbyllur” procese të tjera.

Në postimin e tij, ai përmend blerjen e banesës së ish-ministres së Drejtësisë, Albulena Haxhiu, blerjen e një shtëpie nga ministrja Arbërie Nagavci, kontratat e konsulencës në Ministrinë e Drejtësisë, tenderët në KEK, blerjen ose marrjen me qira të veturave zyrtare për Kryeministrin, si dhe kritikon opozitën, për të cilën thotë se është e angazhuar më shumë në emisione televizive dhe vizita turistike sesa në ushtrimin e rolit të saj politik.

Postimi i Miftarajt përbën qëndrimin e tij personal dhe përmban akuza e vlerësime politike ndaj qeverisë dhe opozitës, të cilat nuk janë të verifikuara në mënyrë të pavarur.

Parlamenti i Ukrainës ka miratuar më 16 korrik emërimin e Serhii Koretskyi si kryeministër të ri të vendit.

Kandidatura e tij mori mbështetjen e 289 deputetëve, duke i hapur rrugën formimit të Qeverisë së re pas dorëheqjes së kabinetit të mëparshëm.

Procesi i riformatimit të qeverisë nisi këtë javë, pasi parlamenti pranoi më 15 korrik dorëheqjen e kryeministres Yuliia Svyrydenko, çka solli edhe dorëheqjen e të gjithë kabinetit të saj.

Serhii Koretskyi është një drejtues ukrainas me një karrierë të gjatë në sektorin energjetik dhe atë privat.

Që nga viti 2025 ai ka mbajtur postin e drejtorit ekzekutiv të Naftogaz, kompanisë më të madhe shtetërore të naftës dhe gazit në Ukrainë.

Para kësaj, Koretskyi kishte ndërtuar përvojë të gjerë në drejtimin e kompanive private dhe ndërmarrjeve shtetërore të energjisë.

Ai ka tre diploma universitare: në Automjete dhe Inxhinieri Automobilistike, Ekonomi Biznesi nga Universiteti Teknik i Lutskut, si dhe në Prodhimin e Naftës dhe Gazit nga Universiteti Teknik Kombëtar i Naftës dhe Gazit në Ivano-Frankivsk.

Në vitin 2019 përfundoi gjithashtu një program ekzekutiv ne administrim biznesi në Shkollën e Biznesit Kyiv-Mohyla.

Nga biznesi privat te drejtimi i kompanive shtetërore

Koretskyi punoi për afro dy dekada në kompaninë Continuum Group (1997–2018), ku në vitin 2013 u bë drejtues i rrjetit të pikave të karburantit WOG.

Gjatë drejtimit të tij, kompania zgjeroi shërbimet dhe zhvilloi modele të reja biznesi, përfshirë zgjerimin e sektorit të kafeneve.

Më pas ai krijoi sipërmarrjet e tij, përfshirë rrjetin e kafeneve IDEALIST dhe kompaninë zvicerane të tregtimit të energjisë Centurion Group SA.

Në nëntor 2022, Koretskyi u emërua drejtues i kompanive Ukrnafta dhe Ukrtatnafta, ku udhëhoqi projekte për modernizimin e pajisjeve dhe hapjen e projekteve të reja të shpimit.

Në prill 2025, bordi mbikëqyrës i Naftogaz e emëroi atë drejtor ekzekutiv të kompanisë.

Sfida në drejtimin e Ukrainës gjatë luftës

Koretskyi merr drejtimin e qeverisë ukrainase në një periudhë të vështirë, ndërsa Rusia ka intensifikuar sulmet me raketa dhe dronë ndaj infrastrukturës energjetike të Ukrainës.

Sulmet kanë shkaktuar dëme të mëdha në sektorin e gazit dhe kanë ndikuar në prodhimin ditor të vendit.

Emërimi i tij shihet si një zgjedhje që sjell në krye të qeverisë një profil me eksperiencë menaxheriale dhe energjetike, në një moment kur Ukraina përballet me sfida të mëdha ekonomike dhe të sigurisë. /ABCnews

Kryetari i Aleancës, Ardian Gjini, në emisionin “Context” në ATV, ka deklaruar se Kosova në tërë historinë e saj politike nuk është udhëhequr asnjëherë nga një qeverisje e pastër e krahut të djathtë.

Ai ka shprehur bindjen e plotë se qytetarët shumë shpejt do ta kuptojnë dhe do ta prekin ndryshimin që sjell ky model politik.

Gjini ka sqaruar se përvojat e deritanishme kanë qenë vetëm pjesëmarrje të pjesërishme nëpër koalicione, por asnjëherë një mandat i plotë ideologjik.
“Kosova në krejt historinë e vet, kurrë nuk ka pas qeverisje të pastër të djathtë, asnjëherë. Nuk ka pas. Ka pas parti të djathta në koalicion, po unë besoj që shumë shumë shpejtë Kosova ka me e kuptu çka nënkupton qendra e djathtë, e djathta e mirë,” ka thënë ai.

Kreu i Aleancës ka dhënë një garanci të fortë se sapo vendi të eksperimentojë me këtë model të ri qeverisës, qytetarët do të kërkojnë që ai të zgjasë për një kohë shumë të gjatë.

“Kanë me pa dallimin për një kohë shumë të shkurtë. E po ju garantoj që kanë me shku shumë vjet, e s’kanë me lyp me ndërru,” ka përfunduar Ardian Gjini.

Kryetari i Aleancës, Ardian Gjini, në një intervistë në emisionin “Context” në ATV, ka folur pwr zhvillimet e fundit politike në vend. Ai ka deklaruar se Kosova po përballet me një situatë të komplikuar pa asnjë nevojë, duke bërë thirrje për gjetjen e një zgjidhjeje që shmang shkuarjen e sërishme në zgjedhje.

Gjini ka prezantuar propozimin prej gjashtë pikave të Aleancës si rrugëdalje nga kjo krizë, duke thënë: “Ne mendojmë që gjashtë pikat që i kemi radhitë janë pika që janë jashtëzakonisht të nevojshme për Kosovën. Cilado qeveri që merr përsipër me i kry kish me i bo nder Kosovës, qytetarëve të Kosovës.”
Sipas tij, problemi kryesor i udhëheqjes aktuale është mungesa e një projekti apo ambicieje të madhe që shkon përtej interesave partiake. Ai ka bërë një krahasim me të kaluarën, kur partitë arrinin kompromise sepse kishin synime më të larta se pushteti.

“Ka pas periudha kohore kur ka qenë më lehtë me mbërri kompromise politike për shkak se Kosova i ka pasur caqet e veta. Kanë qenë shumë më të rëndësishme se me mbet në pushtet. Ka qenë koha e paraluftës, edhe pse një parti ka qenë shumë e madhe po caku ka qenë liria, pas luftës ka qenë pavarësia,” u shpreh Gjini.

Kreu i Aleancës kritikoi partinë fituese të zgjedhjeve për qasje totalizuese dhe mungesë të ideve shtetformuese.

“Partia që i ka fitu zgjedhjet nuk e ka një ide të madhe e cila është përtej partisë ose liderit. Sot nuk ka një cak të tillë, një ambicie të tillë. Ambicia është vetëm me kontrollu gjithçka. Për partinë politike që i ka fitu zgjedhjet gjëja më e rëndësishme është a e kontrollon kryeministri presidentin, edhe kaq.”

Në përmbyllje, Gjini bëri të ditur se Aleanca po punon për të ofruar një alternativë konkrete për të ardhmen e qytetarëve.

“Ne në Aleancë po e definojmë cakun e Kosovës në mënyrë që qytetarët e Kosovës me e pas një rrugë përpara, me e ditë ku po dojnë me shku, ku po dojmë me mbërri si vend. Cilat janë qëllimet tona, në mënyrë që me i mbërri ato fillimisht,” ka përfunduar Gjini.

Policia e Kosovës është duke hetuar një rast “rrezikimi të sigurisë së aviacionit civil” pasi aeroplanë që fluturuan nga Aeroporti i Prishtinës të hënën në mbrëmje u rrezikuan nga rreze laseri. Prokurori i Shtetit ka iniciuar rastin dhe ka autorizuar të gjitha njësitet përkatëse të Policisë të mbledhin provat për rastin.

Rasti është iniciuar te Policia tek të enjten, 16 korrik. Siç thuhet në raportin 24-orësh të PK-së, më 16 korrik në konsultim me prokurorin është iniciuar rasti i lartcekur, “pasi Policia kishte pranuar një informatë se më 13.07.2026 kishte ndodhur rasti”.

Nga Prokuroria Themelore në Prishtinë nuk u dhanë shumë informacione, por u tha se po grumbullohen prova e për zhvillime të mëtejmë do të njoftojë me kohë.

“Pas pranimit të informatës nga Policia e Kosovës, Prokurori i Shtetit ka iniciuar rastin si ‘Rrezikimi i sigurisë së aviacionit civil’. Me autorizim të Prokurorit të Shtetit, Policia e Kosovës dhe të gjithë njësitet e tjera përkatëse janë duke ndërmarr veprime për grumbullimin dhe mbledhjen e provave të nevojshme në lidhje me këtë rast. Për çdo zhvillim të mëtutjeshëm lidhur me këtë çështje, do të njoftoheni me kohë”, thuhet në përgjigjen e Prokurorisë.

Kosova dhe Mali i Zi do të nënshkruajnë sot një marrëveshje për njohjen e ndërsjellë të shërbimeve të besuara dhe identifikimit elektronik, me synim lehtësimin e përdorimit të shërbimeve digjitale ndërmjet dy vendeve.

Marrëveshja do të nënshkruhet nga ministri në detyrë i Digjitalizimit dhe Administratës Publike i Kosovës, Lulëzon Jagxhiu, dhe ministri i Administratës Publike i Malit të Zi, Marash Dukaj.

Pas ceremonisë së nënshkrimit, të dy ministrat do të mbajnë deklaratë për media, ku pritet të prezantojnë rëndësinë e marrëveshjes dhe përfitimet e saj për qytetarët, bizneset dhe bashkëpunimin institucional ndërmjet Kosovës dhe Malit të Zi.

Ceremonia zhvillohet në objektin e ish-Rilindjes, në katin e 18-të, në Sallën e Takimeve, me fillim në orën 14:00.

Drejtoresha ekzekutive e Lëvizjes FOL, Mexhide Demolli-Nimani ka vlerësuar se niveli i transparencës institucionale në Kosovë mbetet larg pritjeve, duke theksuar se, pavarësisht premtimeve për “transparencë radikale”, qytetarët dhe shoqëria civile vazhdojnë të përballen me vështirësi në sigurimin e qasjes në dokumente publike.

Demolli-Nimani për Ekonomia Online tha se edhe për dokumentet më bazike nevojiten kërkesa për qasje dhe pritje të gjata, ndërsa shpesh është e domosdoshme të bëhen ankesa në Agjencinë për Informim dhe Privatësi (AIP).

“Fatkeqësisht jo në nivelin që do duhej të ishin. Mos të harrojmë ne kemi një qeveri që kishte ardhur para pesë-gjashtë viteve në pushtet duke thënë që do të ketë transparencë radikale, fatkeqësisht ka ndodhur e kundërta. Në qoftë edhe për dokumentin më bazik ne vazhdojmë të bëjmë kërkesa për qasje në dokumente publike dhe të presim me javë e ndoshta edhe me muaj se duhet të bëjmë ankesa në AIP për të marrë qasje për një dokument, qoftë ndoshta edhe më bazik, që do duhej të publikohej në ueb-faqet e institucioneve, pa pasur nevojë të bëjmë kërkesë për qasje. Andaj duhet të punohet shumë në këtë drejtim, sepse në një kohë të digjitalizimit, në çfarë niveli ka arritur tani, ne të vazhdojmë të merremi me kërkesa për qasje për të pasur një dokument, vërtet është absurde”, tha ajo.

Sipas saj, Agjencia për Informim dhe Privatësi ka ndihmuar shoqërinë civile në sigurimin e qasjes në dokumente, por mungesa e kapaciteteve ndikon që trajtimi i ankesave të zgjasë.

“Është më mirë në një anë që e kemi një agjenci, e cila në këtë aspektin se sa kërkon prej institucioneve, neve si shoqëri civile na ka ndihmuar shumë, sepse falë ankesave që aty i bëjmë dhe pas trajtimit nga ana e agjencisë ne arrijmë t’i marrim këto dokumente. Mirëpo a është niveli i dëshiruar? Nuk është, sepse të merr kohë, me javë, ndoshta edhe me muaj sepse agjencia s’i ka kapacitetet ndoshta sa do duhej t’i kishte që të trajtojë një ankesë në kohë më të shkurtër, prandaj edhe e them këtë që është, është një përmirësim. A duhet të bëhet më shumë? Duhet të bëhet më shumë nga vetë institucionet, pa pasur nevojë që t’i kontaktojë AIP dhe t’i tregojë që duhet të jepen këto informata, këto dokumente palës që i ka kërkuar. Mirëpo vazhdon të jetë në vullnetin politik të shumë institucioneve se çfarë duan të publikojnë dhe çfarë jo”, u shpreh ajo, për Ekonomia Online.

Drejtoresha ekzekutive e Lëvizjes FOL theksoi se transparenca dhe llogaridhënia janë elemente kyçe për forcimin e besimit të qytetarëve në institucione dhe për parandalimin e keqpërdorimeve.

“Do të thotë shumë. Aty ku s’ka transparencë, aty menjëherë lindin dyshimet për keqpërdorime, për korrupsion. Prandaj çelësi i krejt kësaj do duhej të ishte transparenca. Nëse çdo punë kryhet sipas procedurave të kërkuara apo sipas kërkesave që i ka vetë një ligj i caktuar, nuk do duhej të kishte frikë që ato të publikohen dhe të jenë, sepse veç transparenca dhe llogaridhënia karshi publikut do të rriste besimin e vetë qytetarëve në institucione dhe jo fatkeqësisht çfarë jemi duke parë, që kemi vetëm një rënie të besimit të qytetarëve në institucionet e Kosovës”, deklaroi ajo./EO/

Njësia për Reagim të Shpejtë (NJRSh), në bashkëpunim me njësitë tjera policore, ka sekuestruar armë dhe mjete të tjera të kundërligjshme gjatë një aksioni të zhvilluar mbrëmjen e djeshme në zonën e Skenderajt.

Gjatë kontrolleve të automjeteve dhe personave të dyshuar, policia thotë se ka gjetur dhe sekuestruar një armë zjarri, tetë thika, një radiolidhje, një maskë, tri shufra metalike, si dhe sende të tjera që dyshohet se mund të jenë përdorur për kryerjen e veprave penale, transmeton Klankosova.tv.

“Lidhur me këto raste, personat e dyshuar janë shoqëruar në stacionin policor, janë intervistuar dhe ndaj tyre janë ndërmarrë veprimet procedurale, në koordinim me prokurorët kompetentë. Policia, apelon te qytetarët që të vazhdojnë bashkëpunimin me Policinë, duke raportuar çdo rast të dyshimtë përmes numrit emergjent 192, aplikacionit mobil “Lajmëro Policinë”, ose përmes adresës elektronike [email protected]”, thotë Policia.