Një aksident i rëndë ka ndodhur në Gjermani, ku si pasojë një 29 vjeçare nga Kosova dhe djali i saj trevjeçar kanë humbur jetën.
Lidhur me vdekjen e tyre kanë raportuar edhe mediat gjermane, ndërsa kombësinë e viktimave e kanë bërë të ditur për Klan Kosova burime të afërta me familjen.
Bazuar në këto burime, nëna dhe djali i saj ishin nga Gjakova.
Ndërsa sipas raportimeve të mediave gjermane, ata u goditën nga një kamion në trotuar, teksa 29-vjeçarja po e çonte në kopsht të birin.
Filmi “Peaky Blinders: The Immortal Man” regjistroi 25.3 milionë shikime në tre ditët e para në Netflix.
Filmi është i disponueshëm në platformë që nga 20 marsi dhe është një vazhdim i serialit të njohur të BBC-së “Peaky Blinders”, me protagonist Cillian Murphy, i cili u transmetua për gjashtë sezone nga viti 2013 deri në vitin 2022.
Seriali tashmë kishte audiencën e pritur në Netflix, i cili mban të drejtat e transmetimit në SHBA dhe territore të ndryshme jashtë SHBA-së, dhe filmi i ri u bë shpejt titulli më i shikuar në Netflix gjatë javës 16-22 mars.
Titulli i dytë më i vlerësuar i javës, që kryeson listën e emisioneve speciale televizive (përmbajtje jo në anglisht), ishte “BTS The Comeback Live: Arirang”, i cili u shfaq premierë më 22 mars dhe arriti 13.1 milion shikime para përfundimit të periudhës së shikimit atë mbrëmje. Duke marrë parasysh të gjithë ditën e shikimit, koncerti special i drejtpërdrejtë i K-pop arriti 18.4 milion shikues.
Për javën e dytë radhazi, titulli numër një në listën e serialeve televizive në gjuhën angleze ishte sezoni i dytë i “One Piece”.
Seriali regjistroi 11.1 milionë shikime në javën e parë të publikimit, pasi debutoi me 16.8 milionë shikime në katër ditë. Sezoni i parë gjithashtu u rishfaq në renditje, në vendin e katërt, me 4.4 milionë shikime.
Seriali televiziv në gjuhën angleze i renditur i dyti këtë javë ishte sezoni i shtatë i “Virgin River” me 7.7 milionë shikime në javën e dytë në tabelë, i ndjekur nga sezoni i dytë i “Beauty in Black” me 5.3 milionë shikime në javën e katërt.
Ministria për Evropën dhe Punët e Jashtme se po ndjek me vëmendje të plotë rastin e ndalimit të katër shtetasve shqiptarë nga autoritetet serbe për shkak se mbanin simbole shqiptare në makinë.
MEPJ tha se republika e Shqipërisë pret që çdo veprim i autoriteteve serbe të zhvillohet në përputhje të plotë me shtetin e së drejtës, duke respektuar të drejtat themelore dhe garancitë procedurale për çdo qytetar.
“Ministria për Evropën dhe Punët e Jashtme, përmes Ambasadës së Republikës së Shqipërisë në Beograd po ndjek me vëmendje të plotë rastin e ndalimit të katër shtetasve shqiptarë nga autoritetet serbe.
Menjëherë pas marrjes së informacionit, Ambasada u është drejtuar zyrtarisht institucioneve përkatëse në Serbi dhe ka kërkuar informacion të plotë mbi rrethanat e ndalimit, si dhe për të garantuar respektimin e të drejtave të shtetasve shqiptarë, në përputhje me legjislacionin vendas dhe standardet ndërkombëtare.
Ambasada është në komunikim të vazhdueshëm me autoritetet kompetente, po ofron të gjithë asistencën e nevojshme konsullore, duke përfshirë edhe kontaktet me familjarët e të ndaluarve dhe mundësimin e kontakteve të tyre me avokatë.
Republika e Shqipërisë pret që çdo veprim i autoriteteve serbe të zhvillohet në përputhje të plotë me shtetin e së drejtës, duke respektuar të drejtat themelore dhe garancitë procedurale për çdo qytetar.
Situata po ndiqet nga afër dhe çdo zhvillim i mëtejshëm do të trajtohet me seriozitetin maksimal”, thuhet në reagimin e MEPJ për Euronews Albania.
Publikuan video me simbolet e Shqipërisë së Madhe, katër shqiptarë arrestohen në Serbi
Më 26 mars, në fshatin Pemishtë (ish-Padalishtë) të komunës së Skënderajt, do të shënohet përvjetori i rënies së dëshmorëve të kombit: Ajet Beqiri, Mustafë Qorraj, Shukri Qorri dhe Isuf Sadiku, si edhe i martirëve të familjes Imeri. Me këtë rast, do të bëhet edhe zbulimi i bustit të heroit të kombit, Mustafë Qorraj.
Ceremonia përkujtimore dhe nderimet në respekt të të rënëve për lirinë e Kosovës do të fillojnë nga ora 11:00 në fshatin Pemishtë.
Kështu ka bërë të ditur përmes një njoftimi ish-luftëtari i lirisë, Hektor Beqiri, i cili theksoi se pjesëmarrja në këtë përvjetor përbën një nderim të madh për veprën dhe sakrificën e dëshmorëve dhe martirëve të kombit.
Prokuroria Themelore në Prishtinë ka ngritur aktakuzë ndaj tetë personave, të cilët dyshohen për disa vepra penale, përfshirë ato të korrupsionit.
Në njoftimin e kësaj prokurorie, dy të pandehurit F.G. dhe M.G akuzohen për veprën penale “Pranimi i Ryshfetit në Sektorin Privat”.
Kurse, të pandehurit S.B., R.M., dhe H.N. akuzohen për falsifikim të dokumentit, derisa tre të tjerë, B.H., S.B., dhe B.G., ngarkohen me veprat penale “Keqpërdorimi i pozitës apo autoritetit zyrtar” dhe “Rastet e posaçme të falsifikimit të dokumentit”.
Në njoftim thuhet se i pandehuri F.G., në cilësinë e menaxherit në Poligonin “R….’’, me dashje dhe dijeni të plotë ka keqpërdorur detyrën e tij zyrtare duke pranuar përfitime të kundërligjshme.
“Gjatë zbatimit të masave të veçanta hetimore, i pandehuri në kundërshtim me detyrën e tij zyrtare ai ka pranuar shumën prej 600 euro, me qëllim që një kandidati t’i sigurojë çertifikatë për aftësim në përdorimin e armëve të zjarrit, pa iu nënshtruar trajnimit dhe provimit teorik dhe praktik. Ndërsa i pandehuri M.G., me dashje dhe dijeni të plotë në vazhdimësi ka ndihmuar në kryerjen e kësaj vepre penale, duke i mundësuar të pandehurit F.G., përfitimin e kundërligjshëm”, thuhet në njoftim.
Ndërkaq, sipas njoftimit, të pandehurit S.B., R.M., H.N., në cilësinë e instruktoreve/ ligjëruesve në Poligonin “D….”, në Prizren, me dashje dhe me qëllim të përfitimit të kundërligjshëm, kanë shënuar të dhëna të rreme në dokumente zyrtare, duke nënshkruar çertifikata për aftësimin në përdorimin e armëve të zjarrit, për persona që nuk i janë nënshtruar trajnimit teorik dhe praktik.
Kurse, e pandehura B.G., në cilësinë e administratores në Poligonin “D…..”, në mënyrë të kundërligjshme ka plotësuar “Kërkesën për provim profesional për armë” me të dhënat personale të kandidatit dhe më pas ka nënshkruar në emër të tij në dokumentin përkatës, pa qenë fare i pranishëm kandidati.
Visar Azemi nga Lidhja Demokratike e Kosovës ka thënë se njehsorët elektrikë janë duke matur gabimisht kohën.
Ai, ka thënë se ka bërë një hulumtim për energjinë elektrike ku si mostër kanë përdorur mbi 800 njehsor në Prishtinë dhe Ferizaj dhe në bazë të këtij hulumtimi kanë gjetur që rryma matet gabimisht dhe gjithmonë me të shtrenjtën.
“Sot jam para jush për me fol për një skandal, një ndër skandalet më të rënda të sektorit të energjisë, që ka të bëjë me regjistrimin njësor elektrik të konsumit të energjisë elektrike në tarifa të ndryshme dhe të një hulumtimi të cilin e kam bë në Prishtinë dhe Ferizaj. Me ju tregu kështu si kronologji, kam filluar e kam vërejt një anomali në njësorë të energjisë elektrike dhe pastaj kam filluar me e bë si hulumtim dhe kam inspektuar dhe kam hulumtuar dikund rreth 900 njësorë elektrikë në zonat e Prishtinës dhe Ferizajt, prej të cilëve pra 87% e këtyre njësorëve kanë rezultuar që nuk e masin kohën ashtu siç duhet, pra kanë gabim. Dhe këtu, të dashur gazetarë, të dashur qytetarë, nuk po flasim për një gabim teknik, po flasim për një mashtrim ose manipulim sistematik, sepse mostra prej 884 njësorëve nga të cilët 87% nuk është një rastësi, pra nuk mund të themi që ka një ‘glitch’ të sistemit, po po flasim që ka një manipulim ku ky skandal iu ka kushtuar qytetarëve të Republikës së Kosovës miliona euro. Pra, po i shihni disa njësorë të energjisë elektrike dhe po e shihni që nuk përkojnë me kohën reale. Pra koha në njësor këtu për shembull është 07:55 minuta në mëngjes, koha reale është 3:26 pas dite”, tha Azemi para medieve.
Sipas Azemit, qytetarët paguajnë gjithmonë me tarifa të shtrenjta edhe pse nga ora 22:00 tarifa është e caktuar me të lirën.
“Në momentin kur Zyra e Rregullatorit të Energjisë i aprovon tarifat dhe ne kemi tarifën e dimrit dhe të verës, kemi tarifën e ulët dhe të shtrenjtë në orën 22:00 në mbrëmje, gjatë muajve të dimrit, supozohet që qytetarët e Kosovës me përdorë tarifën e ulët të energjisë elektrike. Dhe në atë kohë ne i kemi ndezë pajisjet elektroshtëpiake, pra në orën 22:00 kemi lëshuar ndoshta nxemjen, kemi lëshuar lavatriçen, pajisjet për larjen e enëve, ku ta di unë, duke menduar që po faturohemi me të lirën, realisht energjinë jemi duke e paguar me të shtrenjtën. Dhe dallimi këtu në çmim e dini që është 6 e sa centë me të lirën dhe 13 centë është me të shtrenjtën, pra ka një dallim dikun prej 112% rritje. Pra ky është një mashtrim. Po i shihni këta katër njësorë, varion dallimi prej dy orë e tetë minuta në të parin, tre orë e gjysmë këtu, shtatë orë e gjysmë këtu, i fundit ka tetë orë e tetë, po ka edhe raste ku kjo diferencë shkon deri në 15 orë. Pra është komplet disbalancë dhe çakordim i komplet sistemit të faturimit të energjisë elektrike” tha Azemi.
Për këtë skandal siç e quan Azemi, kërkohet dorëheqja e bordit të ZRRE-së dhe hetim penal.
“Pra, këtu duhet me kërkua një përgjegjësi, sepse po shohim qartë që qytetari nuk paska abuzue, paska abuzua KEDS-i në këtë rast. Dhe KEDS-in e monitoron dikush: Zyra e Rregullatorit të Energjisë, që është bashkëfajtore në këtë mashtrim. Pra, nëse Zyra e Rregullatorit të Energjisë i ka aprovuar tarifat dhe ka tregu se kur qytetari duhet me u faturua me çmim të lirë dhe kur duhet me u faturua me çmim të shtrenjtë, atëherë ata është dashtë me u kujdesë që ai implementim i atyre rregulloreve, i atij ligji që kanë nxjerrë vetë Zyra e Rregullatorit të Energjisë, të zbatohet. Pra ata nuk janë kujdes dhe ka ardhë deri te kjo të cilën po e shohim në ekran, në fotografitë të cilat i paraqita edhe pak më herët. Dhe në fund tash, unë mendoj që këtu duhet të shikohet zinxhiri i përgjegjësisë. Pra, të gjithë ata që kanë përgjegjësi duhet të marrin dënimin e merituar. Ne si Lidhje Demokratike e Kosovës kërkojmë që të ketë hetim të pavarur, forenzik madje, dhe auditim të sistemit të faturimit të KEDS-it, me parë se sa është e madhe kjo humbje, sa duhet me e ditë qytetarët se sa para kanë paguar në formë jo të ligjshme në faturat e energjisë elektrike. Duhet dhe po kërkojmë tërheqjen e bordit të Zyrës së Rregullatorit të Energjisë, sepse këta kanë dështue me implementue vendimet e tyre, ligjet e Republikës së Kosovës, kodin e faturimit dhe kanë dështue me mbrojtë interesin e qytetarit. Pra Zyra e Rregullatorit të Energjisë është për me rregullue tregun dhe sistemin energjetik, është edhe me mbikëqyrë implementimin e vendimeve të veta, po është edhe me mbrojtë interesin e qytetarëve të Republikës së Kosovës. Prandaj kërkojmë tërheqjen e menjëhershme të bordi” tha Azemi. /Ekonomiaonline
Gripi i shpendëve ka infektuar pacientin e parë njerëzor në Evropë. Rasti me infeksionin A(H9N2) është identifikuar në rajonin e Lombardisë së Italisë.
Ministria e Shëndetësisë së vendit fqinj bën me dije se pacienti ka probleme shëndetësore, me sëmundje bashkëshoqëruese dhe e ka marrë infeksionin në një vend jo evropian. Ai aktualisht ndodhet i shtruar në spital.
“Të gjitha kontrollet e nevojshme u kryen menjëherë dhe kontaktet përkatëse u identifikuan, si pjesë e aktiviteteve të zakonshme të parandalimit dhe mbikëqyrjes“, njoftoi Ministria e Shëndetësisë e Italisë.
Sipas asaj që dihet aktualisht rreth gripit të shpendëve, infeksioni ndodh nëpërmjet ekspozimit të drejtpërdrejtë ndaj shpendëve të infektuar, por edhe nëpërmjet kontaktit me mjedise ose materiale të kontaminuara.
Rastet njerëzore klasifikohen si me patogjenitet të lartë ose të ulët, varësisht nga ashpërsia e sëmundjes. Rastet e para shkaktojnë infeksione të rënda sistemike me vdekshmëri të lartë, ndërsa rastet e dyta shkaktojnë simptoma të lehta ose aspak të frymëmarrjes, por mund të mutohen në forma më agresive.
Presidentja e Kosovës, Vjosa Osmani tha të mërkurën se marrja e detyrës si kryetare e Republikës, pesë vjet më parë, nuk ka qenë kulmi i karrierës së saj, por vetëm fillimi.
Këtë deklaratë ajo e bëri në një organizim për Javën e Gruas në Prishtinë, që rastis të jetë pak ditë para se ta përfundojë mandatin e saj si shefe e shtetit.
“Pesë vite më parë kur e mora detyrën nuk e pash si kulm të rrugëtimin tim por si fillim. Ishte ai moment kur filloi përgjegjësia dhe pushtetin nuk e mora si privilegj por shërbim”, tha Osmani.
Sipas Osmanit, pesëvjeçari i saj në krye të shtetit ishte periudhë kur u forcuan institucionet dhe u shtua hapësira për gratë.
Megjithatë, ajo përmendi edhe atë që e quajti fushatë baltosëse ndaj saj, për të cilën tha se u bë kohët e fundit, pasi shpërndau Kuvendin, me dekret presidencial.
Edhe pse nuk përmendi emra, e para e vendit tha se kur propaganda mund të kthejë, brenda natës, dikë si tradhtare, atëherë e tërë demokracia është në rrezik.
“Në javët e fundit puna ime është shfaqur me një fushatë baltosëse. Është përpjekja për të zhveshur një njeri nga dinjiteti njerëzor. Kur propaganda mund të kthejë këdo në tradhtare brenda natës atëherë e tërë demokracia është në rrezik”, tha ajo.
Deputeti i Partisë Demokratike të Kosovës, Arben Mustafa, ka kritikuar qeverinë e Kosovës lidhur me rritjen e çmimeve të fundit, që kanë prekur derivatet.
Mustafa ka thënë se çmimet e naftës sot, janë ‘’shumë’’ dhe ‘’ të përballueshme.
‘’Kosova ka hy në një valë të re të rritjes së çmimeve. Qytetarët po ballafaqohen me një valë të ashpër të rritjes së çmimeve. Sot çmimi ka arrit në rreth 1.80 cent. Kjo është shumë, e papërballueshme. Rritja e çmimit të naftës ndikon në rritjen e kostos së transportit, në atë të prodhimit, dhe çon në rritjen e nivelit të përgjithshëm të çmimit, pra çon në rritjen e çmimit të të gjitha produkteve që ne i konsumojmë’’, ka thënë ai.
Ai ka thënë edhe se ekonomia e vendit dhe qytetarët kanë nevojë ‘’për dorën e shtetit’’ kundër çmimeve të fundit të cilat, ka thënë ai, ‘po e gërryejnë standardin e jetesës’’.
‘’Ekonomia ka nevojë për dorën e shtetit, qytetarët kanë nevojë për mbrojtjen e shtetit kundrejt çmimeve që po gërryejnë standardin e tyre të jetesës. Mirëpo ajo dorë e shtetit nuk po shihet. Sepse ata që qeverisn sot janë po të njëjtit që kanë qeverisë edhe në vitin 2022, kur lejuan që vala e inflacionit të shpërthente lirshëm pa asnjë reagim nga qeveria. Këtë po e bëjnë edhe sot duke qëndruar spektatorë kundrejt një rritje të ashpër të çmimeve që po ndodh’’, ka thënë ai tutje.
Deputeti i PDK’së ka theksuar se kjo parti kërkon që të ketë ulje të taksave mbi derivatet e naftës.
‘’ Është momenti që ata që e qeverisin vendin të tregojnë përgjegjësi dhe të reagojnë ndaj sfidave reale. Sot ekonomia ka nevojë për ndërhyrjen emergjente të shtetit. Ne kërkojmë ulje të menjëhershme ulje të taksave mbi derivatet e naftës. Kërkojmë masa konkrete për mbrojtje të bujqve dhe prodhuesve vendor’’, ka thënë ai tutje.
Kryeministrja daneze Mette Frederiksen i paraqiti të mërkurën dorëheqjen e qeverisë së saj mbretit, pasi koalicioni i saj trepartiak pësoi një humbje të madhe në zgjedhjet e përgjithshme.
Kjo u bë e ditur përmes një deklarate nga pallati mbretëror.
Partitë janë gati të nisin negociata potencialisht të vështira dhe të gjata për të përcaktuar nëse qeveria e ardhshme do të formohet nga Frederiksen apo nga një udhëheqës tjetër partie, raporton Reuters.