ATV

Author: K.B.

  • Publikohen 10 këngë të padëgjuara nga karriera e hershme e David Bowie

    Publikohen 10 këngë të padëgjuara nga karriera e hershme e David Bowie

    Dhjetë këngë të papublikuara të David Bowie do të ofrohen së shpejti për publikun, të regjistruara në fillim të karrierës së tij, kur ai njihej si Davie Jones, shkruan BBC.

    “David Bowie: The Shel Talmy Recordings” është cilësuar si koleksioni më i plotë i këngëve të regjistruara nga “një David Bowie i sapolindur” me producentin e tij të atëhershëm Shel Talmy.

    Koleksioni përfshin materiale nga kitaristi Jimmy Page, i cili do të vazhdonte të krijonte “Led Zeppelin”, dhe pianisti Nicky Hopkins, i cili gjithashtu punoi me grupe si “Beatles”, “The Who” dhe “The Rolling Stones”.

    Një nga këngët e padëgjuara, “I Want Your Love”, u lançua dje në shërbimet “streaming”, përpara publikimit të koleksionit të plotë, më 18 shtator.

    Këngë të tjera të padëgjuara më parë, që do të publikohen përfshijnë, “Cupid”, “Leave Her to Me”, “You Gotta Tell Her”, “Certain Woman”, “Today”, “I Live in Dreams” dhe “I Do Believe I Love You”.

    Disa këngë nga kjo periudhë e karrierës së Bowie, janë bërë të disponueshme më parë – duke përfshirë “Can’t Help Thinking About Me” dhe “Do Anything You Say”.

    Këngë të tjera që do të përfshihen në përmbledhjen e re titullohen, “You’ve Got A Habit Of Leaving” dhe “Baby Loves That Way”.

    David Bowie, artisti, duke shkruar në shënimet e kopertinës që shoqërojnë albumin, historiani i muzikës Alec Palao tha: “David Bowie, artisti, është një libër me kapituj, ku kthimi i çdo faqeje ofron diçka krejtësisht të ndryshme dhe të papritur nga i mëparshmi”.

    “Çdo fazë interesante në karrierën e tij, duhet të konsiderohet plotësuese. Ky koleksion, një kapitull kryesor, nëse jo kësti më i hershëm në udhëtimin muzikor të David, meriton konsideratë legjitime”, shtoi ai.

    Producenti Sheldon Talmy, i cili vdiq në vitin 2024, është më i njohur për hitet e tij “You Really Got Me” me “The Kinks” dhe “My Generation” nga “The Who”.

    Talmi dhe Bowie u takuan për herë të parë, ndërsa frekuentonin Rrugën “London’s Denmark”, në Londër – e cila ishte qendra e industrisë muzikore britanike të kohës.

    Rruga Soho ishte vendi ku kompozitorët, ua shisnin këngët e tyre botuesve të mëdhenj të muzikës, në atë kohë.

    Eksportuesi amerikan Talmy nënshkroi kontratë me “Bowie and the Manish Boys” në dhjetor 1964, por këngëtari tashmë kishte ecur përpara dhe kishte formuar “Davie Jones & The Lower Third”.

    Shumica e regjistrimeve që Bowie, bëri me Talmy përfshinin “The Lower Third” ose ishin demo solo.

    Një vit pasi u regjistruan këto këngë, këngëtari e ndryshoi emrin e tij në David Bowie për të shmangur ngatërrimin me Davy Jones të “Monkees”.

    Ai e shijoi rritjen e karrierës së tij në vitin 1969 me “Space Oddity”, përpara se të krijonte alter-egon e tij “Ziggy Stardust” në… 1972, dhe vazhdoi të bëhej një nga yjet më të suksesshëm dhe me ndikim në historinë e muzikës.

  • Paunoviq tenton të arsyetohet për deklaratën e saj: “Duhej të kisha thënë deportim, jo spastrim etnik”

    Paunoviq tenton të arsyetohet për deklaratën e saj: “Duhej të kisha thënë deportim, jo spastrim etnik”

    Ministrja serbe e Administratës Shtetërore dhe Vetëqeverisjes Lokale, Snezhana Paunoviq, ka tentuar të arsyetohet për deklaratën e saj se, po të ishte në vend të Sllobodan Millosheviqit në vitin 1998, do ta kishte “spastruar etnikisht Kosovën”.

    Ajo pretendon se një pjesë prej vetëm shtatë sekondash nga intervista e saj ishte nxjerrë jashtë kontekstit dhe keqpërdorur, por njëkohësisht përsëriti thelbin e qëndrimit të saj, duke shtuar se ndoshta do të ishte më mirë të kishte përdorur termin “deportim” në vend të “spastrimit etnik”, për të shmangur, siç u shpreh, “linçimin” publik, raporton N1.

    “Po, ndoshta do të thosha deportim, thjesht për të shmangur që të më sulmonin nga të gjitha anët. Por kushdo që është normal dhe e kupton se për çfarë po flas, e di se mund të të shpëtojë një term i papërshtatshëm. Në fund të fundit, kur je spastruar etnikisht – dhe ne pothuajse kemi qenë, apo çdo ditë bëhen përpjekje që kjo të ndodhë – atëherë është e natyrshme që në mendje të të mbetet termi spastrim etnik si përshkrim i asaj që ke përjetuar”, tha Paunoviq.

    Ajo u përpoq ta justifikojë edhe më tej deklaratën, duke thënë se nuk kishte nënkuptuar një spastrim etnik me dhunë, por, sipas saj, largimin “me vullnet të lirë”.

    “Jo me likuidimin e kujtdo, por thjesht me vullnet të lirë”, tha ministrja.

    Sipas saj, ajo që duhej të kishte bërë Millosheviqi ishte që “çdokush që nuk respektonte Kushtetutën dhe ligjet e atëhershme të Republikës Federale të Jugosllavisë të kthehej në vendin amë, të cilin e konsideronte më të mirë për veten, ndërsa me terroristët të merreshin forcat zyrtare të armatosura, ashtu si ndodh kudo në botë”.

    Deklarata e saj ka ngjallur shumë reagime, si në Kosovë, ashtu edhe jashtë saj – në Evropë e më gjerë.

    Kosova madje e ka shpallur Paunoviqin “persona non grata”.

  • Japonia ndryshon rregullat e trashëgimisë perandorake, gratë ende jashtë linjës së pasardhësve

    Japonia ndryshon rregullat e trashëgimisë perandorake, gratë ende jashtë linjës së pasardhësve

    Parlamenti i Japonisë miratoi një projektligj për të rishikuar Ligjin e Shtëpisë Perandorake të vendit, i cili përcakton linjën e trashëgimisë së fronit perandorak japonez.

    Ndryshimet do t’i lejojnë familjes perandorake të adoptojë të afërm të largët meshkuj mbi moshën 15 vjeç dhe që bijtë e tyre të ardhshëm të bëhen të kualifikuar për të marrë fronin.

    Gjithashtu, u mundëson princeshave të ruajnë statusin e tyre mbretëror pasi të martohen jashtë familjes.

    Megjithatë, ndalimi i perandoreshave femra mbetet në fuqi, pavarësisht popullaritetit të vajzës 24-vjeçare të Perandorit Naruhito, Princeshës Aiko, dhe shqetësimeve për tkurrjen e linjës perandorake.

    Rregullat nënkuptojnë se linja perandorake do të kalojë te vëllai më i vogël i Naruhito-s, Princi i Kurorës 60-vjeçar Fumihito, dhe më pas te nipi i tij, Princi Hisahito, 19 vjeç.

    Pa ndryshime të mëtejshme në ligj, linja aktuale e gjakut do të merrte fund nëse Hisahito nuk do të kishte djalë.

    Ligji i trashëgimisë vetëm për meshkuj daton që nga Ligji i Shtëpisë Perandorake i vitit 1889, i cili përcaktoi se vetëm burrat që vinin nga linja atërore mund të bëheshin perandor.

    Kjo u mbart në ligjin e përditësuar të vitit 1947. Amendamenti i ri është i pari në tekstin kryesor që nga viti 1949.

    Një sondazh mbarëkombëtar i kryer nga gazeta japoneze Mainichi Shimbun në fund të marsit zbuloi se 61% e njerëzve të anketuar mbështetën idenë e një perandoreshe femër, me 9% që thanë se ishin kundër kësaj ideje.

    Një sondazh i mëtejshëm me më shumë se 2,000 njerëz i kryer nga 20 deri më 21 qershor tregoi se 73% votuan në favor të një perandoreshe femër.

    Disa figura politike konservatore në Japoni, përfshirë Sanae Takaichi, kryeministrja e parë grua e vendit, mbeten kundër trashëgimisë femërore.

  • Ambasada e Kosovës: Më 23 korrik mbahet ceremonia për zbulimin e pllakës për viktimat e aksidentit në Slavonski Brod

    Ambasada e Kosovës: Më 23 korrik mbahet ceremonia për zbulimin e pllakës për viktimat e aksidentit në Slavonski Brod

    Ambasada e Kosovës në Kroaci ka njoftuar se më 23.07. 2026, në Slavonski Brod të Kroacisë do të mbahet ceremonia e zbulimit të pllakës përkujtimore kushtuar viktimave që humbën jetën në aksidentin tragjik rrugor të ndodhur me 25.07.2021.

    Ceremonia pritet të filloj në ora 10:30

    Sipas njoftimit, ceremonia do të zhvillohet në shenjë nderimi dhe kujtimi të përhershëm për viktimat e kësaj tragjedie, duke përçuar njëkohësisht mesazhin e respektit, solidaritetit dhe kujtesës institucionale.

    “Në këtë ngjarje do të marrin pjesë një delegacion i Ministrisë së Punëve të Brendshme të Republikës së Kosovës, përfaqësues të autoriteteve lokale të qytetit të Slavonski Brod-it, si dhe përfaqësues të Prefekturës Brod-Posavinë, së bashku me përfaqësues të Ambasadës së Republikës së Kosovës në Republikën e Kroacisë”- thuhet në njoftim.

    Mëngjesin e 25 korrikut 2021, një aksident tragjik mori jetën e 10 kosovarëve në Sllavonski Brod të Kroacisë.

    Një autobus i cili po barte rreth 60 persona nga Frankfurti i Gjermanisë drejt Kosovës doli nga rruga, ku përveç të vdekurve, u lënduan mbi 30 persona të tjerë.

    Për aksidentin u arrestua shoferi i kompanisë kosovare ‘Deva Tours’, i cili tha para policisë kroate, se për një moment e kishte zënë gjumi.

  • Kosova dhe Shqipëria në konferencën e SHBA-ve kundër terrorizmit të së majtës ekstreme

    Kosova dhe Shqipëria në konferencën e SHBA-ve kundër terrorizmit të së majtës ekstreme

    Kosova dhe Shqipëria ishin mes 66 vendeve që morën pjesë në konferencën ndërkombëtare të organizuar nga Departamenti amerikan i Shtetit për atë që administrata e Presidentit Donald Trump e cilëson si “ringjalljen e terrorizmit politik”.

    Takimi u drejtua nga Sekretari amerikan i Shtetit, Marco Rubio, i cili u bëri thirrje vendeve pjesëmarrëse të forcojnë bashkëpunimin për t’iu përgjigjur kërcënimit që, sipas tij, paraqesin grupet terroriste të së majtës ekstreme.

    “Kjo është një konferencë ndërkombëtare sepse po përballemi me një kërcënim ndërkombëtar, një kërcënim ndërkufitar. Nuk kemi zgjidhje tjetër veçse ta përballojmë së bashku. Ose do të bashkëpunojmë përtej kufijve tanë, ose terroristët do të vazhdojnë të shfrytëzojnë boshllëqet mes tyre”, deklaroi Rubio në fjalën hapëse.

    Sipas Departamentit amerikan të Shtetit, konferenca synonte të siguronte mbështetje ndërkombëtare për luftën kundër asaj që e përshkroi si “kërcënimi në ringritje” i terrorizmit të së majtës ekstreme.

    Në mesin e vendeve pjesëmarrëse ishin Shqipëria, Kosova, Kanadaja, Mbretëria e Bashkuar, Gjermania, Franca, Italia, Japonia, Australia, Izraeli dhe dhjetëra shtete të tjera nga Evropa, Azia dhe Amerika.

    Gjatë konferencës, Rubio argumentoi se dhuna ekstremiste e së majtës është nënvlerësuar për vite me radhë në politikat kundër terrorizmit.

    “Për një kohë shumë të gjatë, doktrina jonë kundër terrorizmit ka pasur një pikë të verbër kur bëhet fjalë për dhunën ekstremiste të së majtës politike”, tha ai.

    Sekretari amerikan i Shtetit shtoi se komuniteti ndërkombëtar duhet të rindërtojë mekanizmat e bashkëpunimit kundër terrorizmit, ashtu siç bëri në fillim të shekullit XXI përballë ekstremizmit islamik.

    Edhe zëvendës shefi i stafit të Shtëpisë së Bardhë, Stephen Miller, e cilësoi ekstremizmin e së majtës si një kërcënim në rritje ndaj institucioneve demokratike, ndërsa Sekretari i Thesarit, Scott Bessent, foli për forma të ndryshme të këtij fenomeni, duke përfshirë fushatat e frikësimit politik, sabotimin e institucioneve dhe aktet e dhunës.

    Në një deklaratë të publikuar pas konferencës, Shtëpia e Bardhë tha se administrata Trump kishte nisur “një ofensivë globale të paprecedentë kundër kërcënimit ndërkombëtar të terrorizmit radikal të së majtës”, duke shtuar se ky fenomen do të trajtohet me të njëjtën seriozitet si terrorizmi xhihadist.

  • Hovenier: Kosova rrezikon ta humbasë besimin e Uashingtonit nëse nuk vepron

    Hovenier: Kosova rrezikon ta humbasë besimin e Uashingtonit nëse nuk vepron

    Kosova nuk mund të ecë përpara me prioritetet e saj kryesore pa institucione të qëndrueshme, thotë ish-ambasadori amerikan në Prishtinë, Jeffrey Hovenier.

    Në një intervistë për Radion Evropa e Lirë, ai paralajmëron se ngërçi politik po e dëmton pozitën e Kosovës në raport me Shtetet e Bashkuara, Bashkimin Evropian dhe partnerët e tjerë.

    Hovenier thotë se pezullimi i Dialogut Strategjik me Uashingtonin është tashmë një pasojë konkrete për Kosovën.

    Sipas tij, Prishtina duhet të veprojë më shpejt në çështjet e energjisë dhe të komunitetit serb, nëse synon ta rikthejë marrëdhënien me administratën e presidentit Donald Trump.

    Ai thekson se vëmendja e Uashingtonit “nuk është e pafundme”.

    “Prandaj, mendoj se është e rëndësishme të shfrytëzohen mundësitë që ofrohen dhe të mos shpenzohet shumë kohë duke u menduar apo reflektuar, por, përkundrazi, të përpiqesh të gjesh fusha të përbashkëta bashkëpunimi dhe përparimi”, thotë Hovenier.

    I pyetur se kush e mban përgjegjësinë më të madhe për ngërçin aktual, ai tha “Është e vështirë për mua të them se kush mban përgjegjësinë më të madhe për ngërçin aktual. Ajo që do të theksoja është se sa i dëmshëm është ky ngërç për qytetarët e Kosovës.

    Kosova nuk mund të ecë përpara me prioritetet e saj më të rëndësishme strategjike për aq kohë sa qeveriset nga një qeveri në detyrë ose përballet me kërcënimin e zgjedhjeve të reja.

    Prandaj, mendoj se ka shumë përgjegjësi për situatën aktuale. Po të isha ende ambasador i SHBA-së në Kosovë, do të bëja gjithçka për t’i inkurajuar të gjithë liderët politikë – qoftë nga Vetëvendosje, PDK, LDK, AAK apo partitë e tjera – që të gjenin një rrugëdalje, për të mirën e vendit dhe të qytetarëve.

    Ata duhet të krijojnë një qeveri të re, të zgjedhin presidentin dhe t’u ofrojnë Shteteve të Bashkuara, Bashkimit Evropian dhe partnerëve të tjerë një bashkëbisedues të besueshëm dhe legjitim”.

  • Serbia nënshkruan Marrëveshjen Artemis me SHBA-në

    Serbia nënshkruan Marrëveshjen Artemis me SHBA-në

    Departamenti Amerikan i Shtetit ka njoftuar se Serbia i është bashkuar Marrëveshjes Artemis, një nismë ndërkombëtare që përcakton parime për eksplorimin dhe përdorimin paqësor të hapësirës. Me këtë, Serbia bëhet shteti i 69-të nënshkrues i marrëveshjes.

    Marrëveshja u nënshkrua më 16 korrik 2026 nga ministri i Punëve të Jashtme të Serbisë, Marko Gjuriq, në një ceremoni të mbajtur në selinë e NASA-s “Mary W. Jackson” në Uashington, ku morën pjesë edhe përfaqësues të NASA-s dhe të Departamentit Amerikan të Shtetit.

    Në reagimin e tij, Departamenti Amerikan i Shtetit e përshëndeti anëtarësimin e Serbisë dhe tha se ky hap konfirmon angazhimin e saj për parimet e eksplorimit paqësor të hapësirës.

    Marrëveshja Artemis u iniciua nga Shtetet e Bashkuara në vitin 2020, së bashku me shtatë shtete partnere, si një kornizë bashkëpunimi për aktivitetet civile në hapësirë. Aktualisht, asaj i janë bashkuar 69 vende.

    Departamenti Amerikan i Shtetit dhe NASA koordinojnë promovimin dhe zbatimin e kësaj marrëveshjeje në bashkëpunim me shtetet nënshkruese.

  • Gjithçka që duhet të kontrolloni përpara se të niseni për një pushim me makinë

    Gjithçka që duhet të kontrolloni përpara se të niseni për një pushim me makinë

    Mijëra njerëz nisen çdo vit me makinat e tyre për një aventurë pushimesh.

    Qoftë për të hipur në një traget drejt një destinacioni të largët apo për të bërë një udhëtim në një vend fqinj, përdorimi i makinës si mjet kryesor për pushime do të thotë se udhëtoni gjithmonë me ritmin tuaj dhe mund të zgjidhni vetë se ku do të përfundoni.

    Megjithatë, këto udhëtime në distanca të gjata ushtrojnë më shumë ngarkesë mbi makinën, prandaj disa kontrolle para nisjes mund të ndihmojnë shumë. Më poshtë do të shqyrtojmë disa nga pjesët kryesore të makinës që duhet t’i kontrolloni përpara se të niseni.

    Gomat

    Gomat janë një nga elementet që duhet t’i kontrolloni patjetër me kujdes përpara një udhëtimi të gjatë. Sigurohuni që të inspektoni anët e secilës gomë për prerje ose çarje të vogla, pasi nëse ato përkeqësohen, mund të shkaktojnë plasjen e gomës – gjëja e fundit që do të dëshironit kur ndodheni larg shtëpisë.

    Mos harroni t’i fryni gomat sipas presionit të rekomanduar nga prodhuesi. Nëse planifikoni të mbani shumë bagazhe ose të udhëtoni me më shumë persona se zakonisht, mund të jetë e nevojshme të rregulloni presionin e gomave për t’iu përshtatur kësaj ngarkese.

    Lëngjet

    Shumë njerëz i planifikojnë pushimet në periudha me temperatura më të larta, në varësi të vendit ku jetojnë. Kjo është veçanërisht e vërtetë nëse po udhëtoni drejt pjesëve më jugore të Evropës, për shembull. Prandaj është thelbësore të siguroheni që lëngjet e makinës të jenë në nivelin e duhur, pasi elemente si lëngu ftohës ndihmojnë motorin të ruajë temperaturën e tij normale.

    Gjithashtu, duhet të kontrolloni nëse sistemi i ajrit të kondicionuar funksionon siç duhet. Nëse nuk fryn ajër mjaftueshëm të ftohtë, mund të ketë nevojë për rimbushje me gaz – një proces i thjeshtë, por që bën një ndryshim të madh.

    Devijuesit e dritave të përparme

    Meqenëse do të vozisni në anën tjetër të rrugës, duhet të siguroheni që fenerët e makinës suaj të mos verbojnë drejtuesit e automjeteve që vijnë përballë. Në shumë makina moderne, kjo mund të bëhet përmes ekranit kryesor të sistemit multimedial, duke ndryshuar cilësimet. Konsultoni manualin e makinës për të mësuar se si kryhet kjo.

    Nëse makina juaj nuk e ofron këtë funksion, përdorni devijues për fenerët. Ato janë ngjitëse të vogla që vendosen mbi fenerë dhe e drejtojnë rrezen e dritës larg automjeteve që vijnë nga drejtimi i kundërt.

    Mbulimi në rast defekti

    Edhe nëse keni mbulim për asistencë rrugore në vendin tuaj, duhet të siguroheni që ai të vlejë edhe në vendin ku po udhëtoni përpara se të dilni jashtë shtetit. Nëse nuk është i vlefshëm, mund t’ju duhet të merrni një policë të veçantë për të mbuluar automjetin gjatë kohës që jeni jashtë.

    Kjo ju jep shumë më tepër qetësi, pasi një defekt i makinës në një vend të huaj mund t’jua prishë shpejt pushimet.

    Jelekët reflektues

    Në shumë vende evropiane, për shembull, është kërkesë ligjore që të ketë një jelek reflektues për secilin pasagjer të makinës. Prandaj sigurohuni që t’i keni me vete.

    Lajmi i mirë është se ato mund të blihen me çmim të ulët në internet dhe nuk zënë shumë hapësirë.

    Në varësi të vendit nga vini, nëse targa e automjetit tuaj përfshin, për shembull, simbolin e Mbretërisë së Bashkuar (UK) në anën e saj, nuk do të keni nevojë për një ngjitëse shtesë që tregon vendin e origjinës.

    Megjithatë, nëse targa juaj nuk ka fare simbolin e Mbretërisë së Bashkuar ose të ndonjë shteti tjetër, atëherë do t’ju duhet të vendosni një ngjitëse ose magnet në makinë që tregon vendin e regjistrimit.

    Dokumentet

    Kur udhëtoni jashtë vendit, sigurohuni gjithmonë që të merrni me vete patentën e drejtimit, së bashku me dokumentin V5C, i cili vërteton se jeni pronari i regjistruar i automjetit.

    Edhe pse në shumicën e vendeve nuk është një kërkesë ligjore, është gjithashtu e këshillueshme të keni një kopje të printuar ose një fotografi në telefon të sigurimit të makinës, si edhe të dhënat kryesore dhe numrat e telefonit të kompanisë që ju ofron asistencë rrugore në rast defekti./DPA News

  • Pse interneti po bëhet gjithnjë e më i bezdisshëm për t’u përdorur

    Pse interneti po bëhet gjithnjë e më i bezdisshëm për t’u përdorur

    Po përpiqeni të hyni në një faqe interneti dhe në vend që ajo të hapet menjëherë ju del përpara një test irritues.

    Testi shfaq shtatë fotografi të vogla me cilësi të dobët të kafshëve dhe ju kërkon të gjeni atë që ka të njëjtat zakone ushqimore si kafsha në një fotografi të tetë, një lopë me sfond të kuq.

    Ju shikoni me kujdes imazhet e paqarta. “Është kalë apo luan? Po pelikani çfarë ha?” Më në fund zgjidhni fotografinë e deles.

    Urime, sapo provuat se jeni njeri, edhe pse tani pak më i irrituar. Në rastin më të mirë keni humbur disa sekonda. Në rastin më të keq, një klikim i gabuar ose një moment hutimi ju detyron ta filloni gjithë procesin nga e para.

    Këto teste “A jeni robot?”, të njohura si CAPTCHA, kanë qenë pjesë e internetit pothuajse që nga fillimet e tij. Motori i kërkimit Altavista, tashmë i mbyllur, prezantoi një test të thjeshtë kundër robotëve në vitin 1997. Versionet e para të CAPTCHA-ve kishin edhe një qëllim të dobishëm: u kërkonin përdoruesve të shkruanin një fjalë të skanuar nga një tekst i vjetër, duke ndihmuar kështu në digjitalizimin e librave.

    Por rritja e robotëve që kryejnë sulme kibernetike dhe, së fundmi, e sistemeve të avancuara të inteligjencës artificiale, ka përshpejtuar garën mes sulmuesve dhe mbrojtësve. Si rezultat, këto teste janë bërë më të vështira, ndërsa interneti është bërë më i ngadaltë dhe më irritues për përdoruesit.

    Sipas kompanisë së sigurisë kibernetike Imperva, në vitin 2024 trafiku i krijuar nga robotët në internet tejkaloi për herë të parë trafikun e krijuar nga njerëzit. Kompania thotë se këtë e kanë nxitur chatbot-et që mbledhin informacion nga interneti, si edhe inteligjenca artificiale që ndihmon robotët të shmangin zbulimin.

    “Vëllimi i madh i agjentëve të IA-së që mbledhin të dhëna për të trajnuar modelet e mëdha gjuhësore ka ndryshuar plotësisht rregullat e lojës,” thotë BryanBecker, drejtor produkti në Cloudflare, kompani që zhvillon sisteme mbrojtëse kundër robotëve.

    Robotët po u shmangen CAPTCHA-ve

    Pronarët e faqeve të internetit, në përgjithësi, nuk i pëlqejnë robotët. Ata mund të përdoren për të mbingarkuar një faqe me trafik dhe për ta nxjerrë jashtë funksionit. Shpesh përdoren edhe nga konkurrentët për të mbledhur të dhëna mbi çmimet ose nga spekulantët për të blerë bileta apo për të rezervuar vende në testet e patentës së drejtimit.

    Gjithnjë e më shumë po përdoren edhe “agjentë IA-je”, që kryejnë detyra në emër të përdoruesve të tyre. Kjo do të thotë se nuk ka njeri që të shohë reklamat apo të bëjë blerje spontane, ndërsa të dhënat mblidhen shpesh pa pëlqimin e pronarëve të tyre.

    CAPTCHA-t dhe testet e tjera kundër robotëve janë bërë të kudondodhura. Cloudflare, e cila përdor edhe metoda të tjera si kutitë “Verifiko që je njeri”, thotë se tani kryen 7.7 miliardë kontrolle në ditë, nga 2.1 miliardë që ishin në vitin 2023.

    Megjithatë, robotët janë bërë më të aftë për t’i kaluar këto pengesa. Dy vjet më parë, studiues të Universitetit të Cyrihut zbuluan se sistemet e të mësuarit automatik mund të zgjidhnin 100% të testeve të reCaptcha-s, sistemi CAPTCHA i Google. Ky është sistemi që ju kërkon të klikoni të gjitha katrorët ku shfaqen autobusë, ura ose hidrantë në një rrjet me 16 kuti.

    Si përgjigje, kompanitë i kanë bërë testet edhe më të ndërlikuara. ArkoseLabs, e përdorur nga shumë kompani teknologjike, u kërkon vizitorëve të zgjedhin çiftin e zareve që bën shumën shtatë ose të zhvendosin një personazh vizatimor në vendin e duhur në avion. Kompania i reklamon këto teste si “rezistente ndaj IA-së”.

    Kompania rivale hCaptcha u tregon përdoruesve nëntë fotografi ushqimesh dhe pijesh, duke u kërkuar të zgjedhin cilat prej tyre përbëjnë një pjatë kryesore. “Mendoj se këto teste janë bërë për të penguar njerëzit, jo robotët,” shkruan një përdorues në internet.

    Një zëdhënës i hCaptcha tha se të dhënat e kompanisë tregojnë se njerëzit nuk po marrin më shumë kohë për t’i përfunduar testet, “por larmia e pyetjeve është rritur me kalimin e kohës, pasi edhe sulmet janë bërë më të sofistikuara”. Kompania shton se duhet t’i përditësojë vazhdimisht testet për të përballuar automatizimin.

    Megjithëse shumica e njerëzve nuk kanë vështirësi për t’i zgjidhur këto teste, organizatat që mbrojnë personat me aftësi të kufizuara thonë se ato shpesh përjashtojnë njerëzit me probleme të shikimit. Dhe koha e humbur nuk është e vogël. Cloudflare vlerësoi pesë vjet më parë se një CAPTCHA kërkon mesatarisht 32 sekonda për t’u plotësuar, çka do të thotë se njerëzimi humbet gjithsej rreth 500 vite çdo ditë vetëm duke zgjidhur këto teste.

    Masat gjithnjë e më të ndërlikuara të mbrojtjes rrezikojnë gjithashtu ta ngadalësojnë internetin, pasi çdo faqe shton shtresa të reja sigurie.

    “I gjithë koncepti i CAPTCHA-së është, në fund të fundit, një betejë e humbur. Mund të duket si një garë armatimi, por ne, njerëzit, e kemi humbur tashmë,” thotë profesori GeneTsudik nga Universiteti i Kalifornisë në Irvine.

    Disa faqe po marrin masa edhe më drastike, duke u kërkuar përdoruesve të krijojnë llogari ose të identifikohen më shpesh për të provuar se janë njerëz. Reddit njoftoi këtë muaj se përdoruesit do të duhet të jenë të identifikuar për të parë postimet e vjetra, me qëllim që “të kufizojë mënyrën se si sistemet e automatizuara kanë qasje te Reddit”.

    Nuk ka shenja se robotët do të zhduken, as se nevoja për t’u mbrojtur prej tyre do të pakësohet.

    “Nëse nuk ndalojmë robotët, situata do të jetë edhe më e keqe, sepse një valë e pakontrolluar trafiku të automatizuar do t’i mbingarkojë serverët dhe do t’i nxjerrë faqet jashtë funksionit,” thotë BryanBecker nga Cloudflare.

    Njerëzit tashmë janë pakicë në internet. Dhe të provosh se je njëri prej tyre do të bëhet gjithnjë e më e vështirë. /Telegraph

  • Ministri Hoxha takon Gjuriqin, ia përmend deklaratën skandaloze të ministres serbe

    Ministri Hoxha takon Gjuriqin, ia përmend deklaratën skandaloze të ministres serbe

    Ministri i Jashtëm i Shqipërisë, Ferit Hoxha, ka njoftuar ditur se është takuar në Uashington me homologun e tij serb, Marko Gjuriq.

    Përmes një postimi në X, Hoxha tha se gjatë bisedës, ia ka përmendur edhe deklaratën e ministres serbe për spastrim etnik të Kosovës.

    “Rikonfirmova qëndrimin e qartë dhe të palëkundur të Shqipërisë lidhur me deklaratat e papranueshme dhe të papërgjegjshme të bëra së fundmi nga një anëtare e Qeverisë së Serbisë, duke theksuar nevojën për të refuzuar pa asnjë mëdyshje retorikën që nxit tensione, cenon stabilitetin dhe bashkëpunimin rajonal, si dhe bie ndesh me frymën e marrëdhënieve të mira fqinjësore dhe me vlerat Evropiane”, shkroi Hoxha në X.

    Ai tha se “pikërisht këtë përfaqëson diplomacia: zhvillimin e një dialogu të hapur, ballafaqimin sy më sy, përballjen me realitetin dhe trajtimin me përgjegjësi të dallimeve”.

    Ditë më parë, ministrja e qeverisë së Serbisë, Snezhana Paunoviq, tha se po të kishte qenë në vend të Sllobodan Millosheviqit në vitin 1999, do ta spastronte etnikisht Kosovën.