Author: K.B.

Grupi Parlamentar i Partia Demokratike (PD) ka dërguar një letër zyrtare Ambasadave të huaja në Tirana, duke kërkuar monitorimin e procesit në Gjykata e Lartë e Shqipërisë.

Në letrën e firmosur nga Gazment Bardhi, demokratët shprehin shqetësimin se vendimmarrjet e pritshme mund të çojnë në lirimin nga burgu të zyrtarëve të akuzuar për korrupsion dhe të cenojnë besimin e publikut tek sistemi i drejtësisë.

Kjo lëvizje nënvizon tensionet politike dhe shqetësimet për integritetin e drejtësisë në vend, ndërkohë që vëmendja e aktorëve ndërkombëtarë kërkohet për të garantuar transparencë në vendimet e Gjykatës së Lartë.

Letra e plotë:

Nëpërmjet kësaj letre, dëshirojmë të shprehim shqetësimin tonë lidhur me zhvillimet e fundit në sistemin e drejtësisë në Shqipëri, veçanërisht mbledhjen e Kolegjeve të Bashkuara të Gjykatës së Lartë më 9 prill, për të shqyrtuar çështje që lidhen me masën e sigurisë “arrest në burg” (paraburgim). Kjo paraqet një nismë personale të kryetarit Sokol Sadushi, pa një justifikim ligjor mbi bazën e saj.

Kjo nismë vjen në një moment delikat për luftën kundër korrupsionit në vend, ku një numër zyrtarësh të lartë dhe ish-zyrtarësh janë aktualisht nën hetim ose subjekt i masave të sigurisë për akuza të rënda, përfshirë korrupsionin dhe shpërdorimin e detyrës. Aktualisht, i vetmi zyrtar i lartë në detyrë që ndodhet në burg është Kryetari i Bashkisë së Tiranës, Erion Veliaj. Gjithashtu, ky vendim mund të ndikojë edhe disa figura të profilit të lartë të krimit të organizuar që aktualisht ndodhen në paraburgim.

Në të njëjtën kohë, deklaratat e fundit publike nga përfaqësues të lartë të pushtetit ekzekutiv, përfshirë Kryeministrin, kanë shprehur kritika ndaj përdorimit të “arrestit në burg” dhe praktikës më të gjerë të paraburgimit. Këto deklarata kanë ngritur shqetësime shtesë lidhur me perceptimin e mundshëm të ndikimit ose presionit ndaj institucioneve të drejtësisë në një moment kaq të ndjeshëm.

Ekziston një shqetësim i arsyeshëm publik se një interpretim i ri ose më i butë i kësaj mase sigurie mund të çojë në ndryshime në statusin e personave të ndaluar, përfshirë figura të profilit të lartë politik dhe të krimit të organizuar. Një zhvillim i tillë mund të ndikojë ndjeshëm besimin e publikut në pavarësinë e gjyqësorit dhe seriozitetin e përpjekjeve për të luftuar korrupsionin në nivelet më të larta.

Lufta kundër korrupsionit dhe mbajtja përgjegjëse e zyrtarëve të lartë janë shtylla thelbësore për procesin e integrimit të Shqipërisë në Bashkimin Evropian. Çdo përpjekje që cenon luftën kundër korrupsionit, punën e Prokurorisë së Posaçme Kundër Korrupsionit (SPAK), apo ndjekjen dhe ndëshkimin e duhur të figurave të larta politike, rrezikon gjithashtu të minojë rrugën e integrimit evropian të vendit.

Në këtë kontekst, ju bëjmë thirrje me mirësi që:
* Të monitoroni nga afër procesin dhe vendimmarrjen e Kolegjeve të Bashkuara të Gjykatës së Lartë;
• Të inkurajoni transparencën dhe respektimin e standardeve ndërkombëtare të shtetit të së drejtës;
• Të mbështesni institucionet shqiptare në garantimin e një sistemi drejtësie të paanshëm, të pavarur dhe konsistent.

Besimi i publikut në sistemin e drejtësisë është një element kyç për stabilitetin demokratik dhe integrimin evropian të Shqipërisë. Për këtë arsye, çdo vendim me ndikim të gjerë duhet të bazohet në parime të forta ligjore dhe të mbrohet nga çdo perceptim i ndikimit politik.

Ju falënderojmë për vëmendjen dhe angazhimin tuaj të vazhdueshëm në forcimin e shtetit të së drejtës në Shqipëri.

Inspektorati Policor i Kosovës ka arrestuar një zyrtar policor jashtë detyrës, i dyshuar për “lëndim të rëndë trupor” pas një incidenti në rrugën “Dervish Qollaku” në Prishtinë.

Sipas njoftimit të IPK-së, rasti fillimisht ishte raportuar si rrahje në progres mes disa personave, ku dyshohej se ishte i përfshirë edhe polici.

“Hetuesit e IPK-së janë njoftuar nga Policia e Kosovës për një incident në Prishtinë pas mesnatës ku dyshohej se ishte përfshirë një zyrtar policor jashtë detyrës zyrtare. Incidenti fillimisht ishte raportuar në Polici si rrahje në progres në rrugën “Dervish Qollaku” në Prishtinë në mes disa personave e ku dyshohej se në këtë rast është përshirë edhe zyrtari policor. Pas pranimit të informacioneve hetuesit e Inspektoratit Policor i janë përgjigjur thirrjes dhe kanë dalë në vendin e ngjarjes”, thuhet në njoftim.

Me vendim të Prokurorisë Themelore në Prishtinë, të dyshuarit i është caktuar masa e ndalimit prej 48 orësh.

IPK ka rekomanduar suspendimin e përkohshëm të tij dhe ka paralajmëruar veprime të tjera hetimore për zbardhjen e plotë të rastit.

“Pas ndërmarrjes së disa veprimeve hetimore, është arrestuar zyrtari policor (jashtë detyrës zyrtare dhe në rroba civile) me dyshimin se ka kryer veprën penale “Lëndim i rëndë trupor” të cilit me vendim të Prokurorisë Themelore në Prishtinë i është caktuar masa e ndalimit për 48 orë. IPK ka rekomanduar edhe suspendimin e përkohshëm ndaj zyrtarit në fjalë me qëllim të mos-ndikimit në procesin hetimor dhe garantimit të pavarësisë dhe paanshmërisë së hetimeve”, thuhet në njoftimin e IPK-së.

Kryeministri australian Anthony Albanese ka paralajmëruar se muajt e ardhshëm mund të jenë të vështirë për shkak të një krize energjitike të shkaktuar nga lufta në Lindjen e Mesme.

“Muajt ​​në vijim mund të mos jenë të lehtë. Dua ta them këtë hapur. Asnjë qeveri nuk mund të premtojë se do të heqë presionet që po shkakton kjo luftë”, tha ai në një fjalim të rrallë drejtuar kombit.

Ai shtoi se qeveria do të bënte gjithçka që mundet për të zbutur pasojat. “Mund të premtoj se do të bëjmë gjithçka që mundemi për të mbrojtur Australinë nga pasojat më të këqija”, tha Albanese.

Kryeministri u bëri thirrje qytetarëve që sa herë që është e mundur, të përdorin transportin publik në vend të makinave.

“Nëse do të udhëtoni, mos merrni më shumë karburant sesa ju nevojitet – mbusheni siç do të bënit normalisht. Mendoni për të tjerët në komunitetin tuaj, veçanërisht në zonat rurale dhe në sektorët kyç”, tha ai.

My Address to the Nation. pic.twitter.com/Iaqts9Rd4X

— Anthony Albanese (@AlboMP) April 1, 2026

Komisioni për Buxhet ka aprovuar Projektligjin për ratifikimin e Marrëveshjes së kredisë ndërmjet Republikës së Kosovës, e përfaqësuar nga Ministria e Financave, dhe Asociacionit Ndërkombëtar për Zhvillim për projektin e Zhvillimit të Sektorit Financiar të Kosovës. Ky projektligj mori 6 vota për, dy kundër dhe një abstenim.

Kundër kësaj marrëveshje votuan deputetët e PDK-së, Kujtim Gashi dhe Mërgim Lushtaku.

ministri i Financave, Hekuran Murati i cili dha sqarimet se pse duhet të votohet Projektligji për ratifikimin e Marrëveshjes së kredisë ndërmjet Republikës së Kosovës, e përfaqësuar nga Ministria e Financave, dhe Asociacionit Ndërkombëtar për Zhvillim për projektin e Zhvillimit të Sektorit Financiar të Kosovës. Murati këtë e konsideroi si mundësi për forcim të stabilitetit financiar në vend.

Ai përmendi katër projekte të rëndësishme që i parasheh ky projekt, përfshirë integrimin e Kosovës në SERA.

“Marrëveshja parasheh themelimin dhe financimin e kapitalit fillestar të Bankës Zhvillimore një projekt tepër i rëndësishëm dhe prioritet për qeverinë tonë, gjithashtu parasheh shtimin e kapitalit në Fondin për Garanci Kreditore për dritare të reja shtesë që të përmirësohet qasja në financim për ndërmarrjet e vogla mikro, të vogla dhe të mesme. Marrëveshja parasheh edhe mbështetje e Fondit për sigurim të depozitave në ndryshim të kornizës ligjore po ashtu edhe me shtimin e kapitalit shtesë në mënyrë që depozita në bankat e Kosovë niveli të ngritët nga 5 mijë euro aktualisht që është i depozitave të siguruara në 10 mijë euro. Komponenta e katërt kyçe ka të bëjë me integrimin e Kosovës në SERA që nënkupton kosto të transfereve tepër më të ulëta sesa këto që janë aktualisht… Shuma totale e marrëveshje është 49.3 milionë euro dhe periudha e kthimit për 35 milionë euro për komponentën A është 5 vite grejs periudhë dhe 25 vite kthim. Për kompenntën B është 14 milionë euro dhe 5 vite grejs periudhë dhe 5 vite kthim”, tha ai.

Deputeti i PDK-së, Kujtim Gashi konsideron se Kosova nuk ka nevojë për një borxh të tillë, prandaj theksoi se deputetët e kësaj partie që janë anëtarë të Komisionit për Buxhet nuk e mbështesin këtë marrëveshje.

“Ne mendojmë se Kosova nuk ka nevojë ta marr një borxh të tillë një kredi për asistencë teknike për të cilën jemi të bindur që mund të mbulohet nga vetë ju për shkak se buxheti e mundëson një gjë të tillë duke pas parasysh shumë marrëveshje dhe shumë kredi”, tha ai.

Edhe anëtari i Komisionit për Buxhet nga radhët e LDK-së, Besian Mustafa u interesua të di më shumë për dallimin mes Bankës Zhvillimore dhe Fondi për Garanci Kreditore.

E ministri i Financave dha sqarime në këtë drejtim.

“Banka Zhvillimore parasheh që përmes ofrimit të instrumenteve ët reja shtesë e këto ndërlidhet a do ketë konkurrshmëri me sektorin shtesë. Në situata ku ka mungesë likuiditeti apo në situata ku bankat kanë arritur ekspozimin maksimal këtu hyn Banka Zhvillimore… Ideja është të ofrohen instrumente tjera të pagesave apo instrumenteve të quajtura për garantime të pagesave për import apo eksport të cilat bankat aktuale mund të kenë kufizime sa i përket ekspozimit dhe Fondi nuk ofron një gjë të tillë, synimi është tek ndërmarrjet e vogla dhe të mesme të arrihet edhe përmes partneriteti aktual bankar” ,theksoi ai .

E, deputeti i Lidhjes Demokratike të Kosovës, Besian Mustafa qysh në fillim të mbledhjes të këtij Komisioni kërkoi që në rend dite të shtohet edhe çështja e rritjes së çmimeve të produkteve përfshirë ato të naftës dhe energjisë.

“Propozoj çështja e çmimeve të naftës dhe energjisë që kanë reflektim tek çmimet e të gjitha produkteve tjera dhe vështirësimi i standardeve të jetesës. Pra, thjesht kërkojmë raportim nga ministri i Financave se çka ka bërë qeveria e Kosovës dhe çka po planifikon që të bëjë për të mbrojtur dhe përkrahur qytetarët e Kosovë ndaj këtyre çmimeve”, tha ai.

E kryetari i Komisionit për Buxhet, Enver Haliti tha se për këto pika tashmë LDK ka ftuar një seancë të jashtëzakonshme ditën e premte dhe temë diskutimi janë pikat që kërkoi të diskutohen nga deputeti, Mustafa.

Në rend dite të Komisionit për Buxhet janë edhe Shqyrtimi i Projektligjit nr.10/L-016 për Ratifikimin e Marrëveshjes së Kredisë ndërmjet të Republikës së Kosovës dhe Agjencisë Franceze për Zhvillim për Programin e Kredisë të bazuar në Politika, Shqyrtimi i Projektligjit nr.10/L-017 për ratifikimin e marrëveshjen së kredisë ndërmjet Republikës së Kosovës, përfaqësuar nga Ministria e Financave, dhe KfW, Frankfurt Main, për Programin e Kredisë të Bazuar në Politika në sektorin e Energjisë dhe Klimës për Kosovën, Shqyrtimi i Projektligjit nr.10/L-018 për Ratifikimin e Marrëveshjes së Kredisë ndërmjet republikës së Kosovës, përfaqësuar nga Ministria e Financave dhe Asociacionit Ndërkombëtar për Zhvillim për Projektin ”Lehtësimi i Tregtisë dhe Transportit në Ballkanin Perëndimor 2.0”. /kp/

Një rast i rëndë ka ndodhur sot në një shkollë në Deçan ku një 11-vjeçar është sulmuar nga një burrë i rritur.

Lidhur me këtë, Shkodran Nikçi, nga Prokuroria në Pejë, për Kosova Live, ka njoftuar se burri është arrestuar, dhe është dërguar në mbajtje për 48 orë.

Ai ka njoftuar edhe se i mituri ka pranuar tretman mjekësor, ndërsa ndaj të dyshuarit është iniciuar vepër penale.

‘’Një rast në oborrin e shkollës, me ç’rast dyshohet se një prind ka sulmuar fizikisht një nxënës, ku për fat të mirë më vonë kanë intervenu mësimdhënësit e kësaj shkolle dhe kanë shmang prind. Më pas është njoftuar policia e Kosovës, të cilët e kanë arrestuar personin e dyshuar, i cili më pas është ndaluar për 48 orë, dhe ndaj tij është iniciuar rast penal ndaj tij për veprën penale ‘’lëndim i lehtë trupor’’, ndërkaq i mituri ka pranuar tretman mjekësor.

Sa i përket motiveve për këtë, ai ka thënë se: Nga informatat që kemi ne, nuk ka pasur konflikt fizik vetëm ka pasur konflikt verbal para disa kohësh.

Pavarësisht se Gjykata Kushtetuese e Kosovës ka përcaktuar afatin për zgjedhjen e presidentit të vendit, partitë politike nuk kanë arritur ende një marrëveshje konkrete për këtë çështje.

Deputeti i Lëvizjes Vetëvendosje, Artan Abrashi, ka deklaruar se subjekti i tij nuk i ka numrat për ta zgjedhur si të vetëm presidentin e Kosovës, duke theksuar se zgjidhja e kësaj çështjeje kërkon marrëveshje me partitë opozitare.

Abrashi, u shpreh se LVV nuk ka mundësi për ta zgjedhur vet presidentin, duke shtuar se vullneti i tyre për të gjetur një kompromis ekziston.

“Po, tashmë edhe me anulimin e dekretit, të cilin pati tentativë për me e shpërnda në kundërshtim me Kushtetutën Kuvendin e Republikës së Kosovës, është kthyer tashmë rrjedha normale e funksionimit të Kuvendit. Kryesia e Kuvendit tashmë ka caktuar seancën e rregullt, e cila do të mbahet të enjten, do të thotë pasnesër. Në kuadër të asaj seance janë paraparë pikat e rregullta, në këtë rast janë disa marrëveshje ndërkombëtare, të cilat tashmë ne duhet t’i votojmë si Kuvend i Kosovës. Sa i përket çështjes së Presidentit, natyrisht kjo çështje mbetet ende e hapur. Si Vetëvendosje, po e them edhe njëherë, ne kemi vullnetin dhe gatishmërinë që të gjejmë një kompromis sa i përket kësaj çështjeje, sepse rezultati nga zgjedhjet e fundit neve na ka dhënë mundësinë që me e kryer konstituimin e Kuvendit dhe Qeverisë, mirëpo jo për ta zgjedhur vet”, tha ai.

Abrashi thotë se opozita po e mban peng çështjen e zgjedhjes së presidentit.

“Pra, çka po dua të them është se ne jemi të detyruar të ulemi të diskutojmë me partitë opozitare, të cilat fatkeqësisht për arsye të tyre po e mbajnë peng çështjen e zgjedhjes së Presidentit të Kosovës. Prandaj, krejt kjo do të varet gjatë takimeve që do t’i kemi në ditët në vijim me përfaqësuesit e partive opozitare dhe uroj që do të reflektojnë pozitivisht dhe Kosova ta tejkalojë këtë krizë të panevojshme, e cila ka rrezik që të na çojë në zgjedhje, prapë po them të panevojshme”, u shpreh Abrashi.

Kurse, sa i përket paralajmërimeve të kryeministrit Albin Kurti për ftesa ndaj partive opozitare, Abrashi tha se janë të hapur për emra të kandidatëve të rinj për president.

“Janë tema të hapura, gjithçka është e mundur. Ne nuk është se kemi ndonjë pozicion kështu këmbëngulës. Natyrisht, do të donim që propozimet tona të merreshin parasysh, por se duhet t’i dëgjojmë edhe ata se çka thonë njëherë. Deri më tani nuk kemi parë vullnet konstruktiv, fatkeqësisht, për me e tejkalua këtë krizë nga ana e partive opozitare, por urojmë që kjo çështje do të ndryshojë në këto ditë dhe se do të reflektojnë pozitivisht”, theksoi ai.

Ai shtoi se është herët për të folur për qëndrime konkrete lidhur me emrat e mundshëm për president që PDK pati thënë se kandidati duhet të jetë nga ky subjekt.

“Po, është herët të flasim për këtë çështje, meqenëse nuk kanë ndodhur takimet. Këto diskutime do të bëhen në momentin kur përfaqësuesit e të dy subjekteve do të takohen dhe se pastaj, konform këtyre takimeve, do ta shohim se si do të reflektojë kjo në grupet respektive parlamentare që i kemi, pra si deputetë. Por, çka mund të them është se jemi të gatshëm të ulemi, të diskutojmë dhe të gjejmë një zgjidhje. Kjo është ajo çka i përket anës tonë si Vetëvendosje”, potencon ai.

Sipas tij, Lëvizja Vetëvendosje tashmë ka propozuar emra konkretë, por mungon përkrahja nga partitë e tjera.

“Tashmë ne kemi emrat, i kemi propozuar. Pra, janë emra të cilët kanë kredibilitet dhe mbështetjen e fuqishme të grupit parlamentar të Lëvizjes Vetëvendosje. Pra, zotëri Konjufca dhe zonja Mulhaxha kanë përkrahjen tonë, por krejt çka duhet është edhe përkrahja e subjekteve të tjera, të cilën fatkeqësisht për momentin nuk e kemi. Por, prapë po them, është herët të paragjykojmë se si do të shkojë rrjedha, sepse krejt kjo varet nga qëndrimet e partive opozitare”, thotë tutje ai.

Gjykata Kushtetuese u ka dhënë kohë ligjvënësve të Kosovës mbi një muaj kohë për ta zgjedhur presidentin e ri të vendit, pasi e rrëzoi një dekret të presidentes së tanishme, Vjosa Osmani, më 25 mars për shpërndarjen e Kuvendit pas moszgjedhjes së presidentit në një seancë më 5 mars.

Dekreti, sipas Gjykatës Kushtetuese, nuk ka efekt juridik. Nga Presidenca e Kosovës e mirëpritën vendimin dhe thanë se është konstatuar se Osmani nuk ka bërë shkelje kushtetuese.

Gjykata Kushtetuese e publikoi aktgjykimin e plotë lidhur me dekretin e Osmanit të nxjerrë më 6 mars, duke vendosur se në rast se brenda 34 ditësh, nga kur ka hyrë në fuqi aktgjykimi, deputetët nuk zgjedhin presidentin, Kuvendi shpërndahet.

Sipas vendimit, pas shpërndarjes ‘ex constitutione’ (shpërndahet në mënyrë automatike në bazë të Kushtetutës) së organit ligjvënës, Kosova duhet të mbajë zgjedhje të reja brenda 45 ditësh. /Ekonomiaonline