ATV

Author: K.B.

  • Dosja përfundimtare: “Duhet të lirohet” – si argumentoi Mbrojtja e Thaçit kundër kërkesës për dënim me 45 vjet

    Dosja përfundimtare: “Duhet të lirohet” – si argumentoi Mbrojtja e Thaçit kundër kërkesës për dënim me 45 vjet

    Luka Misetic, avokat i ish-presidentit të Kosovës, Hashim Thaçi, i ka kërkuar Gjykatës Speciale ta shpallë të pafajshëm dhe ta lirojë menjëherë klientin e tij, në versionin e dosjes përfundimtare gjyqësore, të dorëzuar fillimisht si konfidenciale më 19 janar 2026.

    Së fundmi, më 27 mars, mbrojtja e Thaçit e dorëzoi “versionin e redaktuar publik të dosjes gjyqësore përfundimtare”, që është publikuar edhe nga gjykata.

    Në konkluzionin e kësaj dosjeje, Misetic shkruan: “Trupit Gjykues i kërkohet ta shpallë THAÇI-n të pafajshëm për të gjitha pikat e Aktakuzës dhe të urdhërojë lirimin e tij të menjëhershëm”.

    Misetic shkruan se “rezultati i vetëm i drejtë i këtij gjykimi është shpallja e pafajësisë së THAÇI-t për të gjitha pikat e aktakuzës”.

    “ Nëse megjithatë Trupi Gjykues vendos të shqyrtojë çështjen e dënimit, THAÇI-t duhet t’i jepet lehtësim dënimi”, thuhet në dokument.

    Avokati i Thaçit argumenton se “dënimi maksimal i mundshëm është 15 vjet”.

    “Dhomat e Specializuara të Kosovës janë të lidhura nga Kushtetuta. Neni 33(2) i Kushtetutës përcakton: “Asnjë dënim për një vepër penale nuk duhet të tejkalojë dënimin e paraparë me ligj në kohën kur është kryer vepra penale.” Neni 33(4) përcakton: “Dënimet shqiptohen në përputhje me ligjin në fuqi në kohën kur është kryer vepra penale, përveç nëse dënimet në një ligj të mëvonshëm të zbatueshëm janë më të favorshme për kryerësin.” Është e panevojshme të thuhet se, në rast të ndonjë konflikti ndërmjet Ligjit dhe Kushtetutës, Kushtetuta mbizotëron. Rrjedhimisht, ky Trup Gjykues duhet të përcaktojë dënimin maksimal që ishte i paraparë me ligj në vitet 1998 dhe 1999”, thuhet në dosjen përfundimtare gjyqësore të dorëzuar nga mbrojtja e Thaçit.

    Në rastin e Sali Mustafës, mbrojtja e Thaçit thotë se Trupi Gjykues i Apelit, i cili sugjeroi se Gjykata Speciale ka të drejtë të shqiptojë dënim më të madh sesa ai i paraparë nga e drejta vendore, “është qartazi gabim”.

    “ Asgjë në Ligj nuk mund të mbizotërojë mbi ndonjë dispozitë kushtetuese që bie në kundërshtim me të. Thënë thjesht, Kuvendi i Kosovës nuk kishte autoritet ligjor për ta miratuar Ligjin, apo çfarëdo ligji tjetër, që është jokushtetues”, thuhet në dokument.

    Avokati i Thaçit, thotë në dosjen përfundimtare gjyqësore se Gjykata Speciale “është e ndaluar në mënyrë kushtetuese të shqiptojë një dënim më të madh se 15 vjet, edhe për krimet e së drejtës zakonore”.

    “Së paku, Trupi Gjykues është i detyruar të marrë parasysh diapazonin e dënimeve në fuqi në kohën përkatëse dhe çdo diapazon tjetër më të mëvonshëm më të butë për veprën, të parashikuar nga ligjet e Kosovës, gjatë përcaktimit të dënimit që duhet t’i shqiptohet një personi të shpallur fajtor për një krim sipas së drejtës ndërkombëtare, në përputhje me Nenin 44(2)”, thuhet në dokument. Kjo, thotë mbrojtja e Thaçit, përfshin Kodin Penal të ish-Jugosllavisë.

    “Rrjedhimisht, Trupi Gjykues duhet të marrë parasysh diapazonin e dënimit të zbatueshëm në kohën e kryerjes, prej 5 deri në 15 vjet,2240 i cili gjithashtu përbën diapazonin më të butë të dënimit në krahasim me versionet e mëvonshme të Kodit Penal të Kosovës. Trupi Gjykues duhet gjithashtu të marrë parasysh jurisprudencën e Kosovës bashkëkohore me veprën ose që lidhet me të njëjtën vepër dhe konflikt të armatosur, gjatë përcaktimit të dënimit të tij”, thuhet ndër tjerash në këtë dokument.

    Misetic i kërkon Trupit Gjykues që “të marrë në konsideratë disa faktorë lehtësues”. Aty, ai thekson ndër tjerash se “nuk do të kishte Dhoma të Specializuara të Kosovës, dhe as Zyrë të Prokurorit të Specializuar, po të mos ishin përpjekjet e THAÇI-t”.

    Avokati përmend edhe dorëheqjen e Thaçit nga pozita e presidentit të Kosovës më 5 nëntor 2020 dhe dorëzimin e tij vullnetar në Gjykatën Speciale.

    “Së treti, edhe gjatë kohës sa ishte Kreu i Shtetit, THAÇI dha intervista të plota për Zyrën e Prokurorit të Specializuar në disa raste, duke dëshmuar bashkëpunim të mëtejshëm me Dhomat e Specializuara të Kosovës”, thuhet në dokument.

    “Së katërti, Trupi Gjykues ka dëgjuar prova të konsiderueshme se THAÇI ka bërë deklarata të shumta në favor të bashkëjetesës paqësore të popujve dhe duke u bërë thirrje shqiptarëve të mos kërkojnë hakmarrje ndaj fqinjëve të tyre serbë në verën e vitit 1999, për çka ai ka marrë vlerësim nga shumë dëshmitarë në këtë gjykim. HILL dëshmoi se THAÇI nuk ishte lloji i personit që do të kryente dhunë ndaj të tjerëve,2250 ndërsa COVEY dëshmoi në mënyrë të ngjashme”, thuhet tutje në dosjen përfundimtare të mbrojtjes.

    Avokati thekson gjithashtu, ndër tjerash, se Thaçit “iu lejua lirimi i përkohshëm katër herë dhe në çdo rast respektoi urdhrat e Trupit Gjykues dhe shfaqi sjellje shembullore”.

    Hashim Thaçi, Kadri Veseli, Rexhep Selimi e Jakup Krasniqi kanë dëgjuar më 9 shkurt në Gjykatën Speciale në Hagë kërkesën e Prokurorisë së Specializuar që secili prej tyre të përballet me një dënim të gjatë me burgim, për akuzat për krime lufte dhe krime kundër njerëzimit. Kryeprokurorja e Specializuar, Kimberly West, në fillim të deklaratës përmbyllëse të Zyrës së Prokurorit të Specializuar kërkoi 45 vjet burgim për secilin prej ish-krerëve të Ushtrisë Çlirimtare të Kosovës.

    Thaçi, Veseli, Selimi e Krasniqi po qëndrojnë në paraburgimin e Gjykatës Speciale në Hagë prej fillimit të nëntorit të vitit 2020, të akuzuar për krime lufte dhe krime kundër njerëzimit. Prokuroria e Specializuar i akuzon ata se kanë qenë ose duhej të ishin në dijeni të këtyre krimeve.

  • Merr fund dilema për rastin tragjik të Festim Isufit, avokati Koci zbulon raportin zyrtar

    Merr fund dilema për rastin tragjik të Festim Isufit, avokati Koci zbulon raportin zyrtar

    Avokati Arianit Koci ka njoftuar se, bazuar në rezultatet e hetimeve zyrtare, vdekja e Festim Isufi është e natyrës personale dhe nuk lidhet me Rina Maloku.

    Sipas tij, Maloku është vendosur padrejtësisht në qendër të dyshimeve në një pjesë të opinionit publik.

    Ai ka kërkuar nga opinioni publik që ta trajtojë rastin me kujdes dhe përgjegjësi.

    Njoftimi i plotë:

    Rina Maloku u vendos padrejtësisht në qendër të dyshimeve në një pjesë të opinionit publik pas vdekjes tragjike së bashkëshortit të saj, Festim Isufi.

    Nga rezultatet e hetimeve zyrtare del se rrethanat e kësaj vdekjeje janë të natyrës personale dhe nuk e lidhin znj. Rina Maloku me këtë rast në asnjë formë.

    Pas një humbjeje të rëndë personale, znj. Rina Maloku është përballur edhe me një barrë të padrejtë publike.

    Kërkoj nga opinioni që të ketë parasysh plagët e rënda shpirtërore që ky rast tragjik i ka lënë, dhe të tregojë kujdes e përgjegjësi në mënyrën se si trajtohet kjo çështje.
    Arianit Koci
    Avokat i znj. Rina Maloku

  • Ish-Zotëria i Parë me mesazh për Osmanin: Nuk u përkule kurrë, hyre si lidere e po del si frymëzim

    Ish-Zotëria i Parë me mesazh për Osmanin: Nuk u përkule kurrë, hyre si lidere e po del si frymëzim

    Ish-Zotëria i Parë i Kosovës, Prindon Sadriu, ka publikuar një mesazh emocional për ish-Presidenten dhe bashkëshorten e tij, Vjosa Osmani pas përfundimit të mandatit të saj të parë, duke e cilësuar atë si një figurë që ka lënë gjurmë në historinë moderne të vendit.

    Në reagimin e tij, Sadriu vlerëson lart rolin dhe kontributin e saj në krye të shtetit.

    “Ti nuk e mbajte thjesht postin më të lartë të shtetit, atë të Kreut të Shtetit. Ti e mbushe atë me plot kuptim. E transformove rrënjësisht atë. Hyre si lidere dhe po del si frymëzim”, ka shkruar ai.

    Ai thekson se përballja me sfidat është bërë me vendosmëri dhe pa tërheqje.

    “Çdo sfidë që të është vënë përpara, dhe kanë qenë të shumta, e përballove jo me hezitim, por me atë zjarr të qetë e të pathyeshëm që të ka përkufizuar gjithmonë… Nuk u përkule kurrë. Nuk u tërhoqe kurrë. Thjesht vazhdove përpara, sepse Kosova kishte shumë nevojë për ty”, thuhet në mesazh.

    Sadriu vlerëson gjithashtu paraqitjen e saj në arenën ndërkombëtare, duke përmendur fjalimet dhe përfaqësimin në institucionet më të rëndësishme botërore.

    “ Të kam parë teksa qëndroje në foltoren e Parlamentit Evropian. Të kemi parë në Këshillin e Sigurimit të Kombeve të Bashkuar dhe ti bëre që bota të ndalet e të dëgjojë,” ka shkruar ai.

    Sipas tij, ish-Presidentja Osmani ka arritur ta shndërrojë emrin e saj në një simbol ndërkombëtar.

    “Vjosë, emri yt nuk është thjesht më një emër. Është një markë dhe një brend i njohur në të gjitha kontinentet. Është një simbol që politikanët e kërkojnë me vetëdije”, thekson Sadriu.

    Ai shton se gjatë mandatit të saj, Kosova ka fituar një imazh më dinjitoz dhe më të fuqishëm në botë.

    “Ti i dhe Kosovës një pamje që nuk e kishte pasur kurrë më parë; dinjitoze, sovrane dhe krenare me vetveten”, shkruan ai.

    Në mesazh nuk mungon as dimensioni personal, ku Sadriu e falënderon për rolin si nënë dhe bashkëshorte.

    “Ti mbete gruaja dhe nëna më e mrekullueshme, më e përkushtuar dhe më e dashur për mua dhe për dy vajzat tona,” shprehet ai.

    Në fund, ai thekson se ky nuk është fundi i rrugëtimit të saj politik.

    “Prandaj, ky nuk është fundi, por fillimi i një kapitulli të ri në rrugëtimin tënd publik mbi 20-vjeçar”, përfundon Sadriu.

  • Thashetheme për shtrimin e Trumpit në spital, reagon Shtëpia e Bardhë

    Thashetheme për shtrimin e Trumpit në spital, reagon Shtëpia e Bardhë

    A është dërguar me të vërtetë Donald Trump në Qendrën Ushtarake Mjekësore Kombëtare Walter Reed?

    Shëndeti i presidentit amerikan është një çështje kyçe në mandatin e tij të dytë, pasi ai është ndër banorët më jetëgjatë të Shtëpisë së Bardhë.

    Fjalët rreth vizitës së tij te ”Walter Reed” qarkulluan në rrjete sociale pasi Shtëpia e Bardhë njoftoi dje se presidenti nuk do të bënte asnjë paraqitje publike për pjesën tjetër të ditës.

    Thashethemet se ai u shtrua në spital u hodhën poshtë nga Drejtori i Komunikimit i Shtëpisë së Bardhë, Steven Cheung, i cili ndau një postim në X që ofroi një shpjegim të ndryshëm për vendndodhjen e Trumpit.

    “Nuk ka pasur kurrë një president që ka punuar më shumë për popullin amerikan sesa presidenti Trump,” shkroi Cheung.

    “Në këtë fundjavë të Pashkëve, ai ka punuar pa ndërprerje në Shtëpinë e Bardhë dhe Zyrën Ovale”, shtoi ai.

    Llogaria në X e Shtëpisë së Bardhë e rishpërndau postimin.

    Trump ka qenë gjithashtu aktiv në rrjetin e tij Truth Social, me paralajmërime për Iranin.

    Pra, sigurisht që nuk duket sikur ai është shtruar në spital.

  • Taksa 10€ për hyrje në Prishtinë – “Shpatë me dy tehe”, mund të shkaktojë “luftë” tarifash

    Taksa 10€ për hyrje në Prishtinë – “Shpatë me dy tehe”, mund të shkaktojë “luftë” tarifash

    Propozimi për vendosjen e një takse prej 10 euro për automjetet që hyjnë në Prishtinë nga komunat tjera ka nxitur reagime të shumta. Kjo madje po shihet si kufizim i të drejtave të qytetarëve të Kosovës, i cili mund të krijojë kaos duke i nxitur komunat tjera vendosjen e tarifave për qytetarët e Prishtinës.

    Vendosja e kësaj tarife parashihet sipas nenit 14 të rregullores për tarifat, ngarkesat dhe gjobat komunale, rregullore kjo e cila tanimë Komuna e Prishtinës e vendosur në dëgjim publik por që ka marrë kundërshtime të shumta si në Kuvendin komunal, ashtu edhe nga komunat tjera.

    Sipas propozimit të asaj rregullore, çdo automjet i regjistruar jashtë territorit të kryeqytetit, që hyn në zonën e përcaktuar nga kryeqytetit, i nënshtrohet pagesës së taksës në shumën prej 10 euro për hyrje.

    Drejtori i Këshillit për Mbrojtjen e të Drejtave dhe Lirive të Njeriut, Behxhet Shala ka kundërshtuar ashpër propozimin për vendosjen e një tarife prej 10 euro për automjetet që hyjnë në Prishtinë nga rajonet tjera, duke e cilësuar si kufizim i të drejtave të qytetarëve.

    “Pikë së pari, nuk ka ndonjë bazë ligjore me të cilën Komuna e Prishtinës mund ta vendosë këtë tarifë. Ajo mund të jetë në rregullore, sikur që ka bërë edhe me “Prishtina Parking” që me rregullore një kohë mbledhi para, shqiptoi gjoba, po tash ato gjykata i rrëzoi. Jam shumë i sigurt që edhe këtë tarifë të cilën do ta vendosë eventualisht Komuna e Prishtinës, Gjykata Supreme do ta rrëzojë sepse kjo nuk mund të shkojë në kushtetuese, sepse nuk ka ligj për këtë rregullore. Prandaj është kompetencë e Gjykatës Supreme të marrë një vendim përfundimtar për këtë tarifë”, tha Shala.

    Ai paralajmëroi se një vendim i tillë do të krijonte precedent për komunat tjera dhe do të sillte pasoja të shumta.

    “Nëse krijohet një precedent dhe lejohet një tarifë ,andaj edhe çdo qytet do të ketë të drejtë të vendosë tarifë. Ku do të shkojmë ne nëse çdo qytet në Kosovë vendos tarifë për hyrje në atë qytet? Krijohet një kaos, kështu që kjo nuk është asnjë zgjidhje, është zgjidhje kundërligjshme, është një zgjidhje e pazbatueshme. Nuk mundet kryetari i Prishtinës ta marrë modelin e Londrës e ta vendosë në Prishtinë. Londra është tjetër, Prishtina është tjetër”, deklaroi Shala.

    Sipas tij, problemet në trafik nuk zgjidhen me tarifa, por me investime në infrastrukturë dhe organizim më të mirë të qarkullimit.

    Ai shtoi se nuk ka njohuri për praktika të tilla në vendet e rajonit dhe paralajmëroi pasoja reciproke mes qyteteve.

    “Unë nuk e di ndonjë vend të rajonit i cili ka vendosur taksa për hyrje në qytet, sepse prapë kjo është shpatë me dy tehe. Në qoftë se ju e vendosni një taksë për qytetarët që vijnë nga jashtë në Prishtinë, edhe ata të tjerët mund ta vendosin taksën për veturat e Prishtinës që shkojnë atje”, tregoi Shala.

    Propozimi për vendosjen e një takse prej 10 euro për automjetet që hyjnë në Prishtinë nga komunat tjera ka nxitur reagime të shumta nga përfaqësues institucionalë dhe politikë.

    Asamblisti i Partisë Guxo në Kuvendin Komunal të Prishtinës, Jeton Mehmeti, ka theksuar se kjo masë cenon barazinë para ligjit.

    Sipas tij, propozimi për taksën e kryeqytetit prej 10 euro për automjetet e regjistruara jashtë Prishtinës, në aspektin juridik, është shkelje e parimit të barazisë.

    Po ashtu, Gëzim Sveçla nga Vetëvendosje ka ngritur shqetësime për ndikimin e kësaj takse dhe tarifave tjera të parapara.

    Ndërkohë, drejtori i Shërbimeve Publike, Luftar Braha, ka theksuar nevojën për ndryshim të rregullores ekzistuese.

    Së fundmi, kundërshtime ka pasur edhe nga kryetari i Fushë Kosovës, Valon Prebreza, i cili ka ironizuar me këtë propozim.

    “Nëse kjo kalon në Komunën e Prishtinës, atëherë unë do të vendos një taksë ditore prej 20 eurosh për të gjithë banorët e Prishtinës (vetëm) që hyjnë në territorin e komunës së Fushë Kosovës, si dhe një taksë për hyrjen në rrugën e aeroportit në vlerë prej 10 euro, etj. (çka t’na bjen n’mend ndërkohë)”-thuhet në njoftimin e tij.

    Kuvendi Komunal i Prishtinës më 31 mars e ka vendosur në dëgjim publik rregulloren për tarifa, ngarkesa dhe gjoba komunale, e cila daton nga viti 2011, ndërsa debati për këtë çështje pritet të vazhdojë.

  • Ulja e akcizës me 20% për naftën, Rama: Do mbetet në fuqi deri në stabilizimin e plotë të situatës

    Ulja e akcizës me 20% për naftën, Rama: Do mbetet në fuqi deri në stabilizimin e plotë të situatës

    Kryeministri Edi Rama njoftoi sot hyrjen në fuqi të aktit normativ për uljen e akcizës së naftës. Sipas vendimit, akciza do të ulet me 20% sapo çmimi i naftës të kalojë 220 lekë për litër dhe ai i benzinës 200 lekë për litër.

    Në podkastin e tij ‘Flasim’, Rama theksoi se masa synon të mbrojë qytetarët nga ndikimet e paqëndrueshme të tregjeve ndërkombëtare, pa rrezikuar stabilitetin e financave publike. Vendimi do të monitorohet nga Bordi i Transparencës, duke garantuar kontroll dhe zbatim të drejtë të masës.

    “Këtë javë kemi miratuar edhe aktin e premtuar normativ për uljen e akcizës së naftës, në momentin kur nafta, si pasojë e impaktit të luftës mbi tregjet ndërkombëtare, të kalojë limitin e 220 lekëve. Pra, ulja e akcizës me 20% është një masë që hyn në fuqi menjëherë kur çmimi i naftës kalon 220 lekë për litër dhe ai i benzinës 200 lekë për litër.

    Këto pragje janë paracaktuar për të garantuar një ndërhyrje të drejtë dhe të balancuar në raport me zhvillimet e tregut, të cilat janë zhvillime që ne nuk i kemi në dorë, nuk jemi shkaktarë të tyre dhe nuk kemi as fuqinë që t’i ndalojmë, përveçse kemi detyrimin që t’i trajtojmë në funksion të amortizimit të goditjes së menjëhershme mbi konsumatorët, pa cenuar, nga ana tjetër, stabilitetin e financave publike në një kohë kur pasiguria në tregjet ndërkombëtare mbetet e lartë dhe po aq edhe dinamike.

  • Kenan Gashi njofton për ndarjen nga jeta të mësimdhënëses Suzana Arifi, një figurë e përkushtuar në arsim

    Kenan Gashi njofton për ndarjen nga jeta të mësimdhënëses Suzana Arifi, një figurë e përkushtuar në arsim

    Drejtori i rrjetit të OJQ-ve AVONET, Kenan Gashi, ka njoftuar për ndarjen nga jeta të mësimdhënëses Suzana Arifi.

    “Në këtë mëngjes morëm lajmin e hidhur për ndarjen nga jeta të mësueses Suzana Arifi”, ka shkruar ai.

    Gashi ka kujtuar se mësuesja Suzana ishte mësuesja e Ajanit, i cili e kishte konsideruar gjithmonë si një anëtare të familjes, duke e përmendur edhe sot me shumë dashuri dhe respekt.

    Ai e ka përshkruar të ndjerën si një mësuese të jashtëzakonshme, të përkushtuar, të dashur dhe shumë profesionale, e cila me energjinë dhe përkushtimin e saj kishte arritur ta shndërronte klasën në një vend të ngrohtë e frymëzues për nxënësit.

    Sipas tij, edukata, qetësia dhe profesionalizmi i saj nuk ishin vetëm pjesë e disiplinës në klasë, por vlera që ajo ua kishte transmetuar nxënësve, duke ndikuar drejtpërdrejt në formimin e tyre si individë.

    “Ajo ishte një model i vërtetë për fëmijët tanë dhe ka lënë gjurmë të pashlyeshme në jetën e tyre”, ka theksuar Gashi, duke shtuar se kontributi i saj në edukimin e brezave do të kujtohet gjithmonë me respekt dhe mirënjohje.

    Në fund, ai ka shprehur falënderim dhe mirënjohje për kontributin e saj, si dhe ka ngushëlluar familjen, kolegët dhe të gjithë ata që patën fatin ta njohin.

    “Allahu e pastë mëshiruar dhe familjes i dhëntë durim”, ka përfunduar ai. 🤲

  • MINTI vendos çmimet maksimale të derivateve, reagon Ymeri: Mund të rriten në sekondë për shkak të mungesës së rezervave

    MINTI vendos çmimet maksimale të derivateve, reagon Ymeri: Mund të rriten në sekondë për shkak të mungesës së rezervave

    Sektori i naftës në Kosovë po përballet me mungesë të rezervave strategjike dhe kontroll të pamjaftueshëm të tregut, duke bërë që çmimet të ndryshojnë shpesh dhe pa paralajmërim.

    Si rrjedhojë e situatës së krijuar MINTI ka vendosur sot në fuqi çmimin maksimal ditor të derivateve, duke përcaktuar kështu një tarifë fikse me të cilën qytetarët do të mund të furnizohen në të gjitha pikat e derivateve.

    MINTI ka theksuar se çdo ditë do të publikoi çmimet e derivateve. Për sot çmimet maksimale janë: Nafta (dizel): 1.86 euro/litër dhe Benzina: 1.49 euro/litër.

    Lidhur me këtë deputetja e LDK-së, Janina Ymeri, ka reaguar duke theksuar se Ligji për Tregtinë e Naftës edhe Udhëzimet Administrative nuk kushtëzon që shitësi të ketë rezerva, kështu që çmimi mund të ngritët në sekondë nga një lajm.

    “Me qeverinë e re (VV), ligji i naftës u rregullu qysh ka dasht Shoqata e Naftarëve”, ka shkruar Ymeri.

    Ajo shton se Kosova nuk ka ende ligj për rezervat strategjike të naftës dhe nuk ka stok të deklaruar ndërkombëtarisht:

    “Jemi ndër të paktat vende që nuk kemi rezerva strategjike të naftës, bile as ligj për rezerva, vetëm për tregti. Kosova nuk ka as stok nafte të deklaruar ndërkombëtarisht edhe Komuniteti për Energji ka dërguar Kërkesë me Shqetësim për naftë po pa reagim nga Qeveria”, ka theksuar deputetja.

    Sipas saj, problemet përfshijnë edhe kontrollin e marzhave të fitimit dhe funksionimin e Autoritetit të Konkurrencës.

    “Sistemi i shitjes nuk është as digjital as i integruar dhe inspektorët nuk kanë mundësi me kontrollu naftarët… Autoriteti i Konkurrencës nuk funksionon si duhet dhe nuk ka mundësi të kontrolloj tregun,” shpjegon Ymeri.

    Ajo paralajmëron se ligji për çmimet tavan nuk mjafton. “Çmimet do kontrollohen asisoj që çmimi maksimal rritet sipas lajmeve, po nuk zbret se nuk kemi as kontroll as rezerva”, ka deklaruar deputetja e LDK-së.

    Ymeri ka shtuar se variacioni i çmimeve është i dukshëm edhe në nivel lokal.

    “Vetëm dje në rrugën Prishtinë-Ferizaj çmimi ka dallu 6-7 cent nga pompat në magjistrale edhe ato në qendër,” përfundon Ymeri.

  • Astronautët për herë të parë shohin anën e errët të Hënës

    Astronautët për herë të parë shohin anën e errët të Hënës

    Ekuipazhi i Artemis mbrëmë pa për herë të parë anën e largët të Hënës, ka njoftuar specialistja e misionit Christina Koch.

    “Ishte absolutisht spektakolare”, tha Koch.

    Ana e largët e hënës (e njohur edhe si “ana e errët”) është gjithmonë e kthyer nga Toka dhe mendohet se edhe ekipet e Apollos në vitet 1960 dhe 1970 nuk patën mundësi ta shihnin të gjithën.

    “Kjo është diçka që nuk e kemi parë kurrë më parë”, shtoi astronautja.

    NASA ka postuar një imazh të Hënës të bërë nga ekuipazhi, që tregon një krater të formuar nga goditja e një asteroidi.

    Thuhej se ishte “hera e parë që krateri është parë me sy njeriu”.

    Ekuipazhi do të shohë më shumë zona të papara më parë gjatë fluturimit të tyre historik.

  • Vuçiq: Është gjetur eksploziv pranë infrastrukturës së gazit në kufi me Hungarinë

    Vuçiq: Është gjetur eksploziv pranë infrastrukturës së gazit në kufi me Hungarinë

    Presidenti i Serbisë, Aleksandar Vuçiq, ka thënë të dielën se është gjetur një lëndë plasëse “me fuqi të madhe shkatërruese” gjatë një hetimi rreth kërcënimeve ndaj infrastrukturës së gazit në afërsi të kufirit me Hungarinë.

    Vuçiq theksoi se e ka njoftuar për këtë kryeministrin hungarez, Viktor Orban, përmes një bisede telefonike.

    “Ia paraqita atij rezultatet e para të hetimit nga autoritetet tona ushtarake dhe policore në lidhje me kërcënimin ndaj infrastrukturës kritike të gazit që lidh Serbinë dhe Hungarinë”, shkroi Vuçiq në Instagram të dielën.

    Orban tregoi më vonë se ishte njoftuar nga Vuçiqi për këtë.

    Kryeministri hungarez, i cili është aleat i Vuçiqit, tha në një postim në Facebook se “autoritetet serbe kanë gjetur eksplozivë shkatërrues dhe pajisjet e nevojshme për aktivizim në infrastrukturën kritike të gazit që lidh Serbinë dhe Hungarinë”.

    Vuçiq shtoi se përveç eksplozivit, u gjetën edhe fitila për aktivizimin e tij.

    Ai nënvizoi më pas në Beograd, gjatë një vizite në vendin e ndërtimit për ekspozitën Expo, se jo shumë larg vendbanimit Velebit në Vojvodinën veriore, disa qindra metra nga tubacioni i gazit Balkan Stream, u gjetën në dy çanta shpine dy pako të mëdha me eksplozivë me fitil.

    “Ato mund të kishin rrezikuar një numër të madh njerëzish dhe të kishin shkaktuar dëme të mëdha në furnizimin me gaz të Serbisë dhe Hungarisë”, tha ai.

    “Kemi të dhëna dhe një hetim është duke u zhvilluar. Sapo mbarova bisedën me Viktor Orbanin. Është e qartë se lojërat gjeopolitike nuk do të na lënë rehat”, tha Vuçiq.

    Ai shtoi se agjencitë e inteligjencës së Serbisë “bënë një punë të mirë”.

    “Mendojmë se e dimë se cilit grup i përkasin individët që supozohej të ndërmerrnin hapin e fundit në aktivizimin e eksplozivëve. Qëllimi ishte të dërgohej një mesazh politik. Do ta ndëshkojmë rëndë këdo që kapim”, tha Vuçiq.

    Portali hungarez Index raportoi se Orban ka planifikuar një takim të Këshillit të Mbrojtjes për të dielën pasdite për shkak të eksplozivit të gjetur pranë një tubacioni gazi në Serbi.

    Radio Televizioni i Serbisë (RTS) njoftoi më parë se policia dhe ushtria po kontrollonin zonën në veri të Serbisë në komunën e Kanjizhës, rreth pesëmbëdhjetë kilometra nga kufiri me Hungarinë.

    Sipas RTS-së, kërkimi po kryhej nga toka, me kontroll dhe koordinim nga ajri, dhe se helikopterët po fluturonin mbi zonën. Janë përdorur dronë, qen nuhatës, pajisje për imazhe termike dhe pajisje të tjera, si dhe ekipe kundërsabotimi.

    RTS deklaroi se kontrolli po kryhej me miratimin e Zyrës së Prokurorit të Lartë Publik në Suboticë.

    Autoritetet kompetente ende nuk kanë publikuar informacione rreth veprimit të forcave të sigurisë në veri të Serbisë.

    Më 19 mars, pjesëtarët e ushtrisë serbe filluan rritjen e sigurisë në stacionin e kompresorëve në Zhabar, në Serbinë lindore, në tubacionin e gazit Balkan Stream që transporton gazin rus nga Turqia në Hungari.

    Kjo erdhi pasi Vuçiq njoftoi se objekti do të ruhej nga ushtria për arsye sigurie për shkak të situatës në Lindjen e Mesme. /REL