ATV

Author: K.B.

  • BE prezanton sistemin e ri të hyrjes/daljes, çfarë ndryshon për udhëtarët

    BE prezanton sistemin e ri të hyrjes/daljes, çfarë ndryshon për udhëtarët

    Bashkimi Evropian po përgatitet të zbatojë një nga reformat më të mëdha në menaxhimin e kufijve: sistemin e hyrjes/daljes (Entry/Exit System – EES). Ky mekanizëm dixhital pritet të hyjë në fuqi në të gjitha portet dhe pikat kufitare deri më 10 prill 2026, duke sjellë ndryshime të ndjeshme për vizitorët që nuk janë shtetas të BE-së.

    Sistemi i ri do të zëvendësojë vulat tradicionale të pasaportës me regjistrim elektronik. Udhëtarët do të duhet të regjistrojnë të dhënat e pasaportës dhe biometrike, përfshirë gjurmët e gishtave dhe skanimin e fytyrës, gjatë vizitës së parë. Në udhëtimet pasuese, të dhënat e ruajtura do të përdoren për verifikim, duke e bërë procesin më të shpejtë dhe më të sigurt. Qëllimi kryesor është të gjurmohet me saktësi hyrja dhe dalja e vizitorëve jo nga vendet e BE, si dhe respektimi i kufirit 90 ditë brenda çdo periudhe 180-ditore.

    Megjithatë, zbatimi i EES nuk ka qenë i lehtë. Aeroporte si Gjeneva dhe Lisbona kanë raportuar radhë të gjata dhe probleme teknike gjatë testimeve, ndërsa autoritetet paralajmërojnë se periudhat e pikut, si Pashkët dhe vera, mund të sjellin vonesa të ndjeshme. Disa vende kanë kërkuar pezullim të përkohshëm për të shmangur kaosin në udhëtime.

    Në Mbretërinë e Bashkuar, pikat e kontrollit në Dover, Folkestone dhe London St Pancras do të pajisen me kioska EES përpara nisjes drejt Francës dhe vendeve të tjera të BE-së. Ndërkohë, Irlanda dhe Qipro nuk do ta zbatojnë sistemin, duke vazhduar me kontrollet manuale.

    Pas EES, pritet të hyjë në fuqi edhe Etias, një autorizim elektronik udhëtimi i ngjashëm me ESTA në SHBA. Ky sistem do të nisë në tremujorin e fundit të 2026 dhe do të ketë një tarifë prej 20 euro për hyrje në Evropë. /rtsh.al

  • Komisioni miraton projektligjin për Lojërat Mesdhetare Prishtina 2030

    Komisioni miraton projektligjin për Lojërat Mesdhetare Prishtina 2030

    Komisioni për Kulturë, Turizëm dhe Sport ka votuar në parim Projektligjin nr.10/L-027 për Lojërat Mesdhetare Prishtina 2030, me shtatë vota për dhe një abstenim.

    Ministri i Kulturës, Rinisë dhe Sportit, Kujtim Gashi, gjatë raportimit tha se Ministria, në kuadër të mandatit të saj, ka paraparë hartimin e këtij projektligji, duke theksuar rëndësinë historike të organizimit të kësaj ngjarjeje në Kosovë.

    Gashi theksoi se qëllimi i ligjit është përcaktimi i rregullave dhe procedurave, si dhe i detyrave dhe përgjegjësive të institucioneve për organizimin e këtij eventi, ndërsa shtoi se qeveria do të ndajë fonde publike për këtë qëllim në shumë prej të paktën 253 milionë e 445 mijë e 501 euro.

    “Ministria e Sportit dhe Rinisë, në kuadër të mandatit të saj, ka paraparë hartimin e këtij projektligji. Për herë të parë në historinë e saj, Kosova do të jetë nikoqire e Lojërave Mesdhetare, ngjarja më e madhe sportive e organizuar deri më sot në vendin tonë. Ky projektligj është në interes të lartë publik dhe kombëtar, i cili përveç fuqizimit të infrastrukturës sportive dhe zhvillimit ekonomik, e vendos Kosovën në hartën ndërkombëtare si një vend që organizon ngjarje të mëdha, si dhe përfaqëson një investim të rëndësishëm në zhvillimin e të rinjve, avancimin e sportit dhe fuqizimin e imazhit të shtetit”.

    “Ky ligj ka për qëllim përcaktimin e rregullave dhe procedurave, si dhe të detyrave e përgjegjësive të institucioneve shtetërore dhe subjekteve të tjera në lidhje me organizimin dhe funksionimin e edicionit 21 të Lojërave Mesdhetare Prishtina 2030. Përmes këtij ligji, qeveria e Republikës së Kosovës do të miratojë shfrytëzimin e fondeve publike për organizimin e Lojërave Mesdhetare në shumë prej të paktën 253 milionë e 445 mijë e 501 euro”.

    “Ky projektligj rregullon gjithashtu kompetencat e Komitetit Olimpik të Kosovës, të Komunës së Prishtinës, si dhe të komunave të tjera, të cilat do të përmbushin obligimet e tyre në raport me organizimin e Lojërave Mesdhetare Prishtina 2030. Në përputhje me mbështetjen financiare të garantuar nga qeveria e Republikës së Kosovës në dokumentin e kandidaturës, burimi kryesor i financimit për organizimin e Lojërave Mesdhetare do të jetë buxheti i shtetit të Republikës së Kosovës. Republika e Kosovës, përkatësisht Ministria e Sportit dhe Rinisë, e ka sportin prioritet. Duke pasur parasysh se Kosova tashmë ka marrë përsipër organizimin e këtyre lojërave që do të mbahen në vitin 2030, është e domosdoshme adresimi i një sërë kërkesash obligative, ndër të cilat është krijimi i kushteve sa më të mira për zhvillimin e ngjarjes sportive në vend. Gjithashtu, konsiderojmë se përmes këtij projektligji do të krijohen mekanizma adekuatë për organizimin e ngjarjes sportive, duke paraparë bashkëpunimin institucional dhe duke siguruar që të ndërmerren të gjitha masat e nevojshme për realizimin sa më të suksesshëm të tyre”, tha ai.

  • Haxhiu thotë se është e hapur për të ndihmuar për çështjen e Presidentit “nëse mundet”

    Haxhiu thotë se është e hapur për të ndihmuar për çështjen e Presidentit “nëse mundet”

    Albulena Haxhiu, është shprehur e hapur që të ndihmojë ‘‘nëse mundet’’ në çështjen e zgjedhjes së presidentit të ri të vendit.

    Këti komente, Haxhiu i ka bërë gjatë një takimi që ajo ka zhvilluar me avokatin e Popullitt ë Shqipërisë, Endrit Shabani.

    “Tashmë takimet po vazhdojnë ka pasur edhe dje takim, do të ketë edhe ditëve në vijim. Unë jam shumë e hapur që me iu ndihmu nëse mundem në këtë drejtim”, ka deklaruar Haxhiu.

  • Aktori turk në telashe, Ibrahim Çelikkol përfundon në polici

    Aktori turk në telashe, Ibrahim Çelikkol përfundon në polici

    Një lajm i bujshëm ka pushtuar ditën e sotme të gjitha mediat turke, duke tronditur botën e televizionit dhe muzikës. Në orët e para të mëngjesit, autoritetet kanë ndërmarrë një operacion të gjerë policor, duke ndaluar disa nga emrat më të famshëm të ekranit dhe estradës atje.

    Ky aksion i papritur ka tërhequr menjëherë vëmendjen e opinionit publik, duke u kthyer në kryefjalën e ditës.

    Sipas informacioneve të bëra publike, ky operacion ka ardhur në kuadër të një hetimi të thelluar nga autoritetet. Bëhet e ditur se personazhet e njohur janë ndaluar për shkak të dyshimeve dhe akuzave të ngritura ndaj tyre lidhur me përdorimin e lëndëve të ndaluara.

    Policia ka vepruar në orët e para të ditës për të shoqëruar të dyshuarit, duke nisur kështu procedurat zyrtare.

    Në listën e personave të ndaluar janë plot nëntë emra shumë të njohur të showbiz-it turk. Mes tyre bie në sy aktori İbrahim Çelikkol, i cili është jashtëzakonisht i dashur edhe për publikun shqiptar përmes roleve të tij kryesore në disa nga serialet më të ndjekura.

  • Haradinaj refuzoi të takohet me Abdixhikun, Lushaku: Ky qëndrim pengon dialogun ndërpartiak

    Haradinaj refuzoi të takohet me Abdixhikun, Lushaku: Ky qëndrim pengon dialogun ndërpartiak

    Shefja e Grupit Parlamentar të Lidhjes Demokratike të Kosovës (LDK), Jehona Lushaku, ka komentuar refuzimin e kreut të Aleancës për Ardhmërinë e Kosovës (AAK), Ramush Haradinaj, për një takim me kryetarin e LDK‑së, Lumir Abdixhiku, në kuadër të përpjekjeve për dialog politik dhe zgjidhje të situatës për zgjedhjen e presidentit të ri.

    Sipas Lushakut, kërkesa e Abdixhikut ka qenë një akt i zakonshëm i komunikimit politik dhe institucional, në funksion të dialogut dhe bashkëpunimit të nevojshëm në rrethanat aktuale.

    “Fatkeqësisht, në vend të një qasjeje që do të kontribuonte në frymën e bashkëpunimit, kemi parë interpretime që nuk i shërbejnë dialogut të domosdoshëm ndërpartiak,” ka thënë Lushaku.

    Ajo ka shtuar se në momentet e rëndësishme për vendin, “komunikimi politik duhet të karakterizohet nga maturia, respekti reciprok dhe përgjegjësia publike.”

    Refuzimi i takimit nga Haradinaj erdhi pasi ai u shpreh se nuk e sheh të arsyeshëm një takim me Abdixhikun për të diskutuar rreth asaj që ky i fundit ka biseduar me kryeministrin Albin Kurti.

    “Unë s’mundem me shku me taku Lumirin me fol për çka ka fol ai me Albinin… s’është pjesë e imja,” tha Haradinaj, duke vënë në dukje qëndrimin e tij kundërshtues ndaj nismës.

    Kjo zhvillim ndodh në një kohë kur partitë politike janë duke u angazhuar në takime për të gjetur një zgjidhje për zgjedhjen e presidentit të ri.

  • Përfundon restaurimi i Hanit të familjes Zajmi në Prizren

    Përfundon restaurimi i Hanit të familjes Zajmi në Prizren

    Ministria e Kulturës dhe Turizmit ka njoftuar për përfundimin e restaurimit të Hanit të familjes Zajmi, një nga monumentet më të rëndësishme historike dhe arkitekturore të qytetit të Prizrenit, që i përket fundvitit të shekullit XVIII.

    Ky monument ka shërbyer tradicionalisht si vend strehimi dhe tregtie për udhëtarët dhe tregtarët që kalonin në qytet, duke pasqyruar jetën ekonomike dhe kulturore të kohës.

    Restaurimi i tij ka përfshirë rikonstruksionin e strukturës, ruajtjen e elementeve autentike arkitekturore dhe trajtimin e materialeve tradicionale që e bëjnë Hanin unik në kontekstin e trashëgimisë kulturore të Kosovës.

    Ministria e Kulturës dhe Turizmit thekson se restaurimi i plotë i këtij objekti jo vetëm që ruan vlerat historike, por gjithashtu e integron atë në rrjetin e destinacioneve kulturore dhe turistike të Prizrenit.

    “Ky hap është një investim i rëndësishëm në ruajtjen e identitetit historik dhe promovimin e trashëgimisë sonë kulturore, duke e bërë Hanin e familjes Zajmi një pasqyrë të gjallë të historisë së qytetit,” thuhet në njoftim.

    Hani tashmë do të jetë i hapur për vizitorët dhe komunitetin lokal, duke ofruar një hapësirë ku historia dhe kultura bashkohen, si dhe një shembull të ruajtjes së trashëgimisë kulturore për brezat e ardhshëm.

    Restaurimi i Hanit të familjes Zajmi është pjesë e një programi më të gjerë të Ministrisë për mbrojtjen dhe promovimin e monumenteve historike dhe kulturore në të gjithë Kosovën, duke theksuar rëndësinë e ruajtjes së objekteve që pasqyrojnë identitetin dhe historinë e vendit.

  • Gjykata do të lëshojë urdhërarrest për Egzon Azemin, mungoi në seancën për kanosjen e gjyqtarit dhe prokurorit në rastin e Dejan Pantiq

    Gjykata do të lëshojë urdhërarrest për Egzon Azemin, mungoi në seancën për kanosjen e gjyqtarit dhe prokurorit në rastin e Dejan Pantiq

    Deputeti i Lëvizjes Vetëvendosje, Egzon Azemi, nuk është paraqitur në gjykatë më 07.04.2026, në rastin në të cilin po akuzohet së bashku me Arlind Manxhukën, Qerim Elshanin dhe Edi Zenelajn, për kanosjen ndaj gjyqtarit Mentor Bajraktari dhe ish-prokurorit, Afrim Shefkiu.

    Mentor Bajraktari si gjyqtar i procedurës paraprake dhe prokurori Afrim Shefkiu kishin ndërmarrë veprim për ndryshim të masës së paraburgimit në rastin ku i dyshuari për sulm terrorist në zyrat e Komisionit Komunal Zgjedhor në Mitrovicë të Veriut ishte Dejan Pantiq.

    Në këtë rast, mbi të akuzuarit rëndojnë veprat penale, kansoje dhe nxitje e urrejtes dhe përçarjes.

    Me të hyrë në sallën e gjykimit, gjyqtari Kushtrim Shyti konstatoi mungesën e të akuzuarit Egzon Azemi, për të cilin avokatja e tij Teuta Xhema tha se para dy ditësh ka komunikuar me klientin e saj dhe se i është konfirmuar nga Azemi se do të marrë pjesë në seancën e sotme.

    Gjyqtari Shyti njoftoi të pranishmit se seanca do të shtyhet për sesionin e pasdites ndërsa për të akuzuarin Egzon Azemi do të lëshojë urdhërarrest.

    “Nuk ka kushte për t’u mbajtur seanca, andaj merr aktvendim: seanca e sotme e paraparë të mbahet në ora 9:30 nuk do të mbahet, e njëjta caktohet për në ora 13:15, ku për të pandehurin Egzon Azemi gjykata do të lëshojë urdhërarrest”- tha gjyqtari Shyti më 07.04.2026.

    KALLXO.com ka bërë përpjekje që të kontaktojë Azemin përmes thirrjes telefonike dhe më pas përmes mesazhit telefonik, por i njëjti nuk ka kthyer përgjigje deri në publikimin e këtij artikulli.

    Gjykata e Prishtinës më 07.03.2025 e kishte liruar nga akuza Arlind Manxhukën, ndërsa Egzon Azemin, Qerim Elshanin edhe Edi Zenelajn i kishte shpallur fajtorë.

    Sipas këtij aktgjykimi, Egzon Azemi ishte dënuar me burgim prej 6 muajsh, pasi ishte bërë rikualifikimi i veprës penale nga “nxitja e përçarjes dhe mosdurimit” në “kanosje”.

    Qerim Elshanit i kishte shqiptuar dënim me burgim prej 6 muajsh për veprën penale “kanosje”, ndërsa Edi Zenelajt i kishte shqiptuar dënim me burgim, në kohëzgjatje prej 6 muajsh.

    Ndaj Edi Zenelajt ishte bërë poashtu rikualifikimi i veprës penale nga “kanosje” në “nxitje e përçarjes dhe mosdurimit”.

    Ky vendim ishte marrë nga trupi gjykues i përbërë nga Arben Hoti (Kryetar i trupit gjykues), Kushtrim Shyti dhe Valon Kurtaj (anëtarë).

    Ndërsa Gjykata e Apelit me aktgjykimin e datës 27.11.2025 e ka anuluar aktgjykimin e Themelores dhe rastin e ka kthyer në rigjykim.

    Dy zyrtarët e Lëvizjes Vetëvendosje, Arlind Manxhuka dhe Egzon Azemi, së bashku me dy të akuzuarit e tjerë, Qerim Elshani dhe Edi Zenelaj, po akuzohen nga Prokuroria për kanosje dhe nxitje të përçarjes për shkak të reagimeve të tyre ndaj ish-prokurorit të Prokurorisë Speciale, Afrim Shefkiut, dhe gjyqtarit të Gjykatës së Apelit, Mentor Bajraktarit.

    Seanca në Gjykatën e Apelit për këtë rast ishte mbajtur më 27.10.2025 ndërsa aktgjykimi mban datën 27.11.2025.

    Vendimi i Gjykatës së Apelit është marrë nga kolegii gjykues i përbërë nga Ferit Osmani (kryetar i kolegjit), Avni Mehmeti dhe Mentor Hajraj (anëtarë).

    Në shkallën e parë trupi gjykues i cili ka trajtuar këtë rast ka qenë i përbërë nga Arben Hoti (kryetar), Kushtrim Shyti dhe Valon Kurtaj (anëtarë).

    Ndërsa aktakuza është përfaqësuar nga prokurorja Fikrije Zejnullahu.

    Në seancën e datës 21.11.2024, prokurorja Fikrije Fejzullahu kishte bërë precizmin e aktakuzës sa u përket të pandehurve Egzon Azemi dhe Arlind Manxhuka lidhur me pozitën për të cilën të njëjtit akuzoheshin atëkohë “si persona zyrtarë”. Prokurorja në këtë seancë kishte thënë se në kohën kur ishte kryer vepra penale, të njëjtit nuk kishin ndonjë pozitë zyrtare por që ishin në cilësinë e aktivistëve të Lëvizjes Vetëvendosje.

    Shqyrtimi fillestar lidhur me këtë rast ishte mbajtur më 03.04.2024, kur katër të akuzuarit nuk e kishin pranuar fajësinë.

    Më 27.11.2024 ishin dëgjuar në cilësi të dëmtuarit ish-prokurori i Prokurorisë Speciale, Afrim Shefkiu, dhe gjyqtari i Gjykatës së Apelit, Mentor Bajraktari.

    Në seancën e datës 03.03.2025, të akuzuarit kishin dhënë mbrojtjen e tyre, ndërsa më 04.03.2025 palët në procedurë kishin dhënë fjalën përfundimtare.

    Çfarë thotë dosja e Prokurorisë?

    Sipas aktakuzës së siguruar nga KALLXO.com, Arlind Manxhuka dhe Egzon Azemi akuzohen se kanë kryer veprën penale të nxitjes së përçarjes dhe mosdurimit.

    Dosja e Prokurorisë tregon se dy të akuzuarit, secili veç e veç, kanë nxitur dhe përhapur publikisht urrejtje dhe mosdurim përmes profileve të tyre në rrjetin social Facebookut ndaj gjyqtarit Mentor Bajraktari dhe prokurorit Afrim Shefkiu, më 28.12.2022.

    Mentor Bajraktari si gjyqtar i procedurës parapake dhe prokurori Afrim Shefkiu kishin ndërmarrë veprim për ndryshim të masës së paraburgimit në rastin ku i dyshuari për sulm terrorist në zyrat e Komisionit Komunal Zgjedhor në Mitrovicë të Veriut është Dejan Pantiq.

    Lidhur me këtë veprim të gjyqtarit dhe prokurorit kishin reaguar publikisht dy të akuzuarit, Arlind Manxhuka dhe Egzon Azemi.

    Sipas Prokurorisë, i akuzuari Arlind Manxhuka kishte shpërndarë postime në rrjetin e tij social Facebook me mbishkrimin “Ky aktlirim është akttradhëti” duke vazhduar me postime të tjera nxitëse “Për kë punon kjo Gjykatë!?”

    Kurse i akuzuari tjetër, Egzon Azemi, sipas Prokurorisë kishte bërë postime me mbishkrime “Pas atentatit që kreu në Paris, ndaj Esat Pashë Toptanit, ndër të tjera Avniu tha:” e këtij shkrimi ia kishte bashkëngjiur fotografitë me përshkrimin “Tradhtarët plumbin e kanë hak”.

    Kurse të pandehurit e tjerë Qerim Elshani dhe Edi Zenelaj akuzohen për veprën penale të kanosjes, secili veç e veç.

    Në postimet e lartcekura kishin komentuar fillimisht i akuzuari Qerim Elshani, në postimin e Egzon Azemit ishte shprehur: “Atij jo plumbin, po bumen n’goj po dashke me ja lshu qe mos mi jet as copza me hy n’dhe ne token tone!”.

    Kurse i akuzuari Edi Zenelaj kishte ndërmarrë aksione duke vendosur grafite në muret më mbishkrimin “Shtyll e Turpit Gjyqtari Mentor Bajraktari dhe Prokurori Afrim Shefkiu”. /KALLXO/

  • 30 ditë paraburgim ndaj pjesëtarit të MUP-it të dyshuar për krime lufte në Kaçanik

    30 ditë paraburgim ndaj pjesëtarit të MUP-it të dyshuar për krime lufte në Kaçanik

    Gjykata Themelore në Prishtinë ka aprovuar kërkesën e Prokuroria Speciale, duke i caktuar masën e paraburgimit prej 30 ditësh të pandehurit A.D., i dyshuar për “krim lufte kundër popullsisë civile”.

    Lajmi është konfirmuar për Betimi për Drejtësi nga zëdhënësja e gjykatës, Mirlinda Gashi.

    Sipas Prokurorisë, i dyshuari, si pjesëtar i MUP-it në Ferizaj dhe polic trafiku në rajonin e Kaçanikut, dyshohet se më 9 mars 1999, gjatë një aksioni policor-ushtarak në fshatin Ivajë dhe zonat përreth, ka detyruar banorët shqiptarë të largohen nga shtëpitë e tyre, të cilat më pas janë djegur dhe shkatërruar.

    Tutje, bëhet e ditur se 91 burra janë ndarë nga civilët e tjerë dhe janë dërguar në stacionin policor në Kaçanik.

    Sipas prokurorisë 13 civilë janë ndaluar, rrahur dhe torturuar në mënyrë çnjerëzore nga i dyshuari, duke pësuar lëndime të rënda trupore.

    Rasti është në procedurë hetimore.

  • Përplasje në komision, deputetja Musliu kritikon raportin e Agjencisë për Informim dhe Privatësi

    Përplasje në komision, deputetja Musliu kritikon raportin e Agjencisë për Informim dhe Privatësi

    Me përplasje, mospajtime e kritika të ndërsjella ka kaluar raportimi i komisioneres së Agjencisë për Informim dhe Privatësi, Krenare Sogojeva Dermaku në Komisionin për Çështje të Sigurisë dhe Mbrojtjes.

    Ka qenë deputetja e PDK-së, Ganimete Musliu që e ka kritikuar raportin e kësaj agjencie, që sipas saj, ka pasur vetëm lëvdata dhe jo përmbajtje.

    “Mendoj se raporti është tërësisht vetëlavdërues. Flitet për arritje, angazhim dhe profesionalizëm, por mungon një analizë e sinqertë e dështimeve. Nuk dëgjova asnjë rast ku agjencia ka dështuar ta mbrojë qytetarin, ndërkohë që ka shumë njerëz që flasin për këtë. Numra pa kontekst: Janë paraqitur shumë statistika (1085 ankesa, 167 inspektime), por nuk dihet sa prej tyre kanë prodhuar efekt real. Nuk ka analizë mbi cilësinë e vendimeve dhe as krahasim me vitet paraprake. Numrat pa analizë janë më shumë propagandë sesa llogaridhënie.”, ka thënë deputetja Musliu.

    Sipas saj, raporti ka fokus aktivitetet, por jo rezultatet, duke hedhur edhe një mori kritikash tjera.

    Por, këtyre kritikave u është përgjigjur komisionerja Krenare Sogojeva-Dermaku, duke përmendur institucionet që janë gjobitur nga AIP-ja.

    “Më vjen shumë keq, kërkoj shumë falje, por sinqerisht jam shumë keq për këtë mënyrë të qasjes tuaj personale, duke e ditur që njihemi edhe në raporte të tjera edhe njihemi shumë mirë edhe profesionalisht…Janë gjobitur Ministria e Jashtme, janë gjobitur komunat, janë gjobitur institucionet publike, të gjitha ato që nuk kanë dhënë qasje. Janë gjobitur kontrollues privatë, janë gjobitur OJQ-të, është gjobitur ujësjellësi. Krejt ato institucione të cilat kanë shkelje. Nën një s’kanë ofruar qasje, ose që nuk i kanë mbrojtur të dhënat”, ka thënë ajo.

    Kurse, sa i përket kritikave se në raport ka pasur vetëm lavdada, Sogojeva-Dërmaku ka mohuar të ketë ndodhur një gjë e tillë.

  • Sulmi para konsullatës izraelite në Stamboll, një sulmues i vrarë dhe dy të tjerë “neutralizuar”

    Sulmi para konsullatës izraelite në Stamboll, një sulmues i vrarë dhe dy të tjerë “neutralizuar”

    Guvernatori i Stambollit, Davut Gül, tha se një sulmues u vra dhe dy të tjerë janë “neutralizuar”, sipas një deklarate të transmetuar nga CNN Turk.

    “Ndodhi një sulm ndaj forcave tona policore. Dy nga oficerët tanë të policisë u plagosën. Një nga terroristët u vra dhe dy të tjerët u neutralizuan duke pësuar plagë”.

    “Kjo sulm i madh u mposht me dëme minimale falë masave paraprake të marra nga policia jonë”.

    Mediet turke raportuan më herët se të paktën dy sulmues u vranë.