Author: K.B.

Organizata e Veteranëve të Luftës së Ushtrisë Çlirimtare të Kosovës (OVL e UÇK-së), ka reaguar ashpër pas vendimeve të fundit të Kuvendit të Serbisë, duke i cilësuar ato si vazhdimësi të “narrativave që rehabilitojnë krimet e luftës”.

Në reagimin e tyre, OVL e UÇK-së thekson se ndërsa në Kosovë ende vazhdojnë kërkimet për persona të pagjetur nga periudha e luftës, Serbia po vazhdon të glorifikojë figura të lidhura me krimet e kryera gjatë luftës në Kosovë.

“Duke lartësuar figura që lidhen drejtpërdrejt me gjenocidin shtetëror ndaj popullit shqiptar, Kuvendi i Serbisë dëshmon se ky shtet nuk është penduar për të kaluarën e tij kriminale,” thuhet në reagim.

OVL e UÇK-së ka kërkuar gjithashtu reagim të qartë dhe të prerë nga Shtetet e Bashkuara të Amerikës dhe Bashkimi Evropian, duke paralajmëruar se heshtja ndaj këtyre veprimeve përbën bashkëfajësi morale.

“Kërkojmë që SHBA dhe BE të reagojnë prerë ndaj këtij vendimi të paparë, sepse heshtja përballë narrativave që rehabilitojnë krimet kundër njerëzimit është bashkëfajësi morale”, thuhet në reagimin e tyre.

Ndryshe ditë më parë në Kuvendin e Serbisë është hapur ekspozita kushtuar Njësive Speciale të Policisë dhe komandantit të tyre, Obrad Stevanoviq.

Pamjet nga hapja e saj kanë treguar edhe ministrin e Punëve të Brendshme të Serbisë, Ivica Daçiq, ish-zëdhënës i Slobodan Milosheviqit, duke shtrënguar duart dhe duke u buzëqeshur me veteranë, një gjest që është parë si anashkalim i fakteve të dokumentuara për krimet e luftës.

Nga organizatat për të drejtat e njeriut kjo ekspozitë po cilësohet si përpjekje për revizionizëm historik dhe shtrembërim të fakteve të luftës në Kosovë.

Aleanca Kosovare e Bizneseve ka shprehur shqetësim në lidhje me pagën e 13-të për sektorin publik, për çka ka thënë se janë shpenzuar 65 milionë euro.

Ata kanë thënë se ky vendim ndonëse mund të ketë pasur qëllim social, rezulton të jetë i paefektshëm dhe i patargetuar si duhet.

“Sipas vlerësimeve të AKB-së, rreth 40% e këtyre mjeteve kanë ikur gjatë festës dhe fundjavave jashtë Kosovës, kryesisht në Shqipëri, Maqedoni të Veriut,Mal të Zi dhe Greqi, duke bërë që një pjesë e konsiderueshme e parasë publike të mos ndikojë në zhvillimin e ekonomisë vendore. AKB vlerëson se këto mjete do të kishin dhënë efekt shumë më të madh nëse do të orientoheshin drejt mbështetjes së sektorit privat,rritjes së prodhimit vendor, subvencionimit të investimeve, apo përkrahjes së bizneseve që krijojnë vende të reja pune”, ka shkruar AKB në reagim.

Ata kanë thënë se trajtimi i pabarabartë mes sektorit publik dhe atij privat krijon disbalancë në treg dhe dëmonton konkurrencën e drejtë.

“Në një kohë sfidash ekonomike dhe rritjeje të çmimeve, institucionet duhet të fokusohen në politika që mbajnë kapitalin brenda vendit dhe gjenerojnë zhvillim të qëndrueshëm ekonomik”, thuhet në reagim.

Nevojiten veç të dhënat personale që nënshkrimi të pranohet.

Përmes kësaj platforme online tash e një muaj qytetarët mund ta nënshkruajnë peticionin kombëtar në mbështetje të krerëve të Ushtrisë Çlirimtare në Hagë.

Më shumë për numrin e nënshkrimeve që u mblodhën nga shkurti foli nënkryetari i OVL-UÇK-së, Fatmir Sopi.

“Deri më tani në bazë të informacioneve që i kemi nga terreni janë bërë rreth 100 mijë nënshkrime, prej tyre 28 mijë janë online ndërsa pjesa tjetër janë fizikisht”, ka deklaruar Sopi.

Sopi tregoi edhe hapat tjerë që do të ndërmerren për të kundërshtuar vendimet e Speciales për katërshen së UÇK-së në Hagë.

“Hapat tjerë që do i marrim ne si organizatë do të varet krejt nga vendimi dhe zhvillimet që do të jenë në gjykatën speciale”, ka theksuar ai.

Por, a mund të ketë ndikim ky peticion në vendimmarrjen e trupit gjykues?

“ky si mjet i presionit dhe ndikimit e deklarimit të një qëndrimi të një grupi të caktuar të interesave apo të shoqërisë mundet me pas një ndikim formal simbolik politik por jo ligjor sepse ky nuk është mjet që mundet me ndërhy në zhvillimin e procesit”, ka deklaruar Asdren Bytyqi, avokat.

Bytyqi tha se i gjithë procesi i gjykimit ka pasur shkelje të të drejtave themelore të njeriut.

“Mendoj që i tërë procesi që nga fillimi ka qenë i përcjellur me shkelje të të drejtave themelore të të pandehurve në procedurë pastaj me shkelje tjera si të burgosur që janë cënu, intimidu e kufizu në forma të ndryshme edhe të komunikimit”, ka deklaruar ai.

Dorëzimi i nënshkrimeve të peticionit kombëtar në Gjykatën Speciale në Hagës planifikohet të bëhet në fillim të muajit maj.

Në SPB, në orën 07:22 të mëngjesit, J.J. raportoi se në rrugën “Apostol Guslarot” në oborrin e një ndërtese fetare vuri re një bombol karburanti dhe gjurmë djegieje, njoftoi Ministria e Brendshme për AIM-n pasi Bashkësia Hebraike në Maqedoni raportoi për një përpjekje për t’i vënë flakën një ndërtese të Bashkësisë dhe sinagogës në Shkup.

“Menjëherë pas marrjes së njoftimit, oficerët e policisë shkuan në vendngjarje dhe po merren masa për zbardhjen e rastit”, thonë nga Ministria e Brendshme.

Bashkësia Hebraike në Maqedoni e dënoi këtë akt dhe u bëri thirrje autoriteteve kompetente për sqarim të plotë të rastit dhe zbatim konsistent të ligjeve, si dhe për një dënim të fuqishëm dhe të bashkuar nga të gjithë udhëheqësit fetarë, institucionet dhe qytetarët. Ambasadorja Vivienne Aisen gjithashtu u bëri thirrje autoriteteve që t’i nxjerrin përgjegjësit para drejtësisë.

“Më 12 prill, për herë të parë në historinë e afërt, u bë një përpjekje për t’i vënë flakën ndërtesës dhe sinagogës së bashkësisë hebraike. Ky akt nuk është vetëm një sulm ndaj një ndërtese fetare, por një goditje thellësisht shqetësuese ndaj vlerave themelore të një shoqërie të civilizuar – bashkëjetesës, dinjitetit dhe respektit të ndërsjellë. Komuniteti hebraik, si komuniteti më i vogël por historikisht i rrënjosur thellë në këto rajone, që nga koha e Antikitetit ka ndërtuar gjithmonë mbijetesën dhe kontributin e tij mbi parimet e paqes, solidaritetit dhe bashkëjetesës. Ne kemi jetuar veçmas në traditat tona fetare, por së bashku në jetën e përditshme – krah për krah me të gjithë bashkëqytetarët tanë, duke ndarë si gëzimet ashtu edhe hidhërimet e kësaj shoqërie”, thuhet në një njoftim për shtyp të nënshkruar nga kryetari i Komunitetit Hebraik në Maqedoni, Pepo Levi.

“Me shqetësim të veçantë”, thuhet në raport, “vërejmë se vitet e fundit ka pasur një rritje të incidencës së gjuhës së urrejtjes, intolerancës dhe një identifikimi të rrezikshëm të hebrenjve me zhvillimet komplekse gjeopolitike në Lindjen e Mesme. Tendenca të tilla jo vetëm që janë të gabuara, por edhe thellësisht të padrejta, dhe ato hapin rrugën për ringjalljen e antisemitizmit, një fenomen që njerëzimi duhet ta kishte lënë pas shumë kohë më parë”.

Pas humbjes së Viktor Orbán, juristja e medias Flutura Kusari ka rikujtuar gjendjen e rënduar të lirisë së medias gjatë 16 viteve të tij në pushtet.

Sipas saj, shumica e mediave në Hungaria përfunduan nën pronësi të njerëzve të lidhur me qeverinë, duke çuar në humbjen e pluralizmit mediatik që ekzistonte para vitit 2010.

Ajo thekson se edhe televizioni publik u vu nën kontroll politik, ndërsa ligjet për media dhe institucionet rregullatore u përshtatën në kundërshtim me standardet evropiane.

Postimi i plotë:

Mos-liria e medias në Hungari

Në 16 vitet e tij në pushtet, ja çfarë ka ba Orbani:

📍Shumica e mediave tashmë janë në pronësi të njerëzve të ndërlidhur me qeverinë. Rrjedhimisht, Hungaria e ka humbur pluralizmin e mediave që e gëzonte para vitit 2010.

📍 Televizionin publik e ka vendosur nën kontroll politik.

📍Ka ushtruar presion efektiv përmes ndryshimeve ligjore dhe institucionale. Ka miratu ligje për media në kundërshtim me standardet evropiane dhe e kontrollon rregullatorin shtetëror të mediave.

📍Qeveria e tij ka përdorë paratë publike për të reklamu në mediat e kontrollume nga ajo vetë.

📍I ka intimidu gazetarët duke përdorur forma të ndryshme presioni. Përmes gjuhës denigruese nga vetë ai, zëdhënësit, deputetët dhe të tjerë në pushtet, duke i portretizuar gazetarët si armiq. I kanë përgju kundërligjshëm dhe i kanë ataku me padi SLAPP.

Gazetarët në Hungari kanë vuajtë shumë, por një pjesë e tyre nuk janë dorëzu. Falë tyre, ne dimë se si ka qeverisë Orbani.

Gazetarët hungarezë kanë dhënë kontribut të jashtëzakonshëm në informimin e publikut dhe kanë pagu çmim të naltë për rezistencën e tyre.

Ish-inspektori i AKI-së dhe eksperti i sigurisë, Burim Ramadani, ka paralajmëruar një riorganizim të mundshëm të qytetarëve në rast se partitë politike në Kosovë nuk reflektojnë dhe nuk reformohen.

Sipas tij, situata politike në vend po shndërrohet në një “dramë të vazhdueshme”, ku aktorët kryesorë politikë po kontribuojnë në mbajtjen e një klime të tensionuar dhe të paqëndrueshme.

“Duket se e tëra është kthyer në njëlloj drame, sepse duket se politikanët kryesorë po duan që Kosova të mbetet në situata dramatike vazhdimisht. Por, një gjë e besoj: nëse partitë politike nuk riorganizohen, qytetarët do të riorganizohen!”, ka shkruar ai.

Ramadani thekson se ekziston një numër i madh qytetarësh, aktivistësh dhe të rinjsh të gatshëm për t’u angazhuar në krijimin e një platforme të re politike, e cila mund të marrë formë në periudhën e ardhshme.

“Pra, ka shumë qytetarë, aktivistë, kontribues dhe të rinj që janë të gatshëm të angazhohen për të ndërtuar diçka të re, për të formësuar një platformë të re që do të vjen në shprehje nëse partitë politike aktuale nuk riorganizojnë veten. Një lëvizje e re popullore politike do të formësohet në periudhën e ardhshme dhe do të lë në histori një pjesë të madhe të partive politike aktuale”.