Kryeministri i Republikës së Kosovës, Albin Kurti, ka emëruar Fatban Bunjakun në pozitën e zëvendësministrit të parë në Ministrinë e Industrisë, Ndërmarrësisë, Tregtisë dhe Inovacionit, njofton ZKM.
Në njoftim thuhet se “Kryeministri Kurti e uroi z. Bunjaku për detyrën e re dhe i dëshiroi suksese në përmbushjen e përgjegjësive të reja”.
Kryetarja e komunës së Presheva, Ardita Sinani, ngriti alarmin nga Tirana, ku ndodhet për samitin e diasporës, për përkeqësimin e situatës së shqiptarëve në Luginën e Preshevës. Nga studio e Ditarit të pasdites me Pandi Gjatën në A2 CNN, Sinani theksoi se po përdoren metoda moderne të spastrimit etnik në heshtje, që po çojnë në zbrazjen e tre komunave Preshevë, Bujanoc dhe Medvegjë.
“Tani shtypja e shkeljes sistematike ka filluar me përmasë të madhe. Serbia po përdor metoda moderne të spastrimit etnik në heshtje, duke nxitur një shpërngulje të madhe jo vetëm me pasivizimin, por më e fundit që është shumë shqetësuese dhe shërbimi i detyrueshëm ushtarak” tha ajo.
Sipas saj, diskriminimi serb ndaj shqiptarëve të Luginës së Preshevës ëhstë edhe në aspektin ekonomik e financiar, teksa përmendi edhe mungesën e investimeve dhe pengesat për bizneset vendore dhe investitorët e huaj.
“Serbia tenton të përjashtojë shqiptarët nga çdo nivel aty ku kërkohet drejtësi, barazi, zhvillim ekonomik, kufizon me mjete financiare, nuk ka rritur transfertat në nivelin qeveritar ndaj komunave. Përkundrazi na obligon që të rrisim pagat. Është dashur që këtë vit edhe të rrisim diku 35% më tepër të shtohet pozicioni i pagave. Shpenzimet janë shtuar, ndërsa investimet kapitale, por edhe mjetet e dedikuara nga niveli qëndror jo vetëm që i kufizon, por edhe i shkurton. Realisht mund të them që vetëm në këtë periudhë diku prej 91 milionë dinarëve, kemi konkurruar si komunë e Preshevës në ministritë përkatëse të linjave me projekte të ndryshme infrastrukturore dhe nga ato vetëm 9.5% janë realizuar. Shifrat flasin vetë shkallën e diskriminimit jo vetëm të aspektit social, por edhe të atij ekonomik. edhe mospërfillja apo dhe mospërkrahje e bizneseve vendore. Dhe pavarësisht pozitës gjeostrategjike me të cilën gjendet komuna Preshevës shtypja vazhdon në çdo nivel të jetës, jo vetëm në këtë të drejtave, por edhe të atij ekonomik edhe financiar, por edhe nuk i siguron klimë të përshtatshme për tërheqjen e investitorëve të huaj”.
Sinani vlerësoi mbështetjen e Kosova dhe Shqipëria në ndërkombëtarizimin e çështjes, por kërkoi hapa më konkretë dhe koordinim më të madh mes Tiranës dhe Prishtinës për avancimin e të drejtave të shqiptarëve në jug të Serbia.
“Viteve të fundit kemi një ndihmë jashtëzakonisht shumë të madhe nga Republika e Kosovës, sidomos me funksionalizimin ose institucionalizimin e linjës buxhetore për luginën e Preshevës edhe Shqipëria, shteti shqiptar ka luajtur rol të rëndësishëm sidomos në afirmimin e pozitës së shqiptare të luginës së Preshevës në vendet kyçe, sidomos në Uashington, në Parlamentin e Evropës, në Këshillin e Evropës duke sensibilizuar pozitën tonë, duke paraqitur gjendjen e sidomos me pasivizimin e adresave që kanë ngritur zërin dhe kanë paraqitur, kanë argumentuar çështjen e pasivizimit. Por jo vetëm këto, të gjitha këto modele normal që duhet të jenë në koordinim dy shtetet tona. Dikur janë premtuar ndihma me libra në gjuhën shqipe. Pa dyshim edhe nga Shqipëria ka qenë një ndihmë për maternitetin e Preshevës. Mos gaboj unë pas vizitës së kryeministrit Rama. Çfarë ka nevojë në luginën e Preshevës nga Tirana edhe nga Prishtina apo kryesisht nga Tirana se dhe Prishtina është në është në një pozitë edhe të paqartë për shkak të raportit mes Kosovës edhe Serbisë për një marrëveshje të pambyllur. Raportet e miqësisë së mirë mes Shqipërisë dhe Serbisë normal që duhet të konkretizohen dhe në avancimin e të drejtave, pavarësisht aspektit financiar. Është shumë e rëndësishme dhe jetike ndihma të cilën po e jep shteti i Republikës së Kosovës, e cila nuk ka qenë asnjëherë më parë kaq intensive dhe në një vlerë kaq të lartë. Këto shembuj normal që duhet të merren jo vetëm nga shteti i Shqipërisë por edhe nga diaspora, apo dhe nga Maqedonia e Veriut domethënë është për t’u vlerësuar”, tha ajo.
Ajo paralajmëroi se, pavarësisht marrëveshjeve të nënshkruara ndër vite, Beogradi nuk i ka zbatuar ato, ndërsa situata aktuale është më e rëndë se dekada më parë.
“Kur e përmenda se Beogradi ka përfaqësuesit e zgjedhur të Luginës së Preshevës të nënshkruar me ndërmjetësim faktorin ndërkombëtar tre marrëveshje të vitit 2001, marrëveshjen e Konçurit të vitit 2009 të bashkërendimit të trupit koordinues dhe plani shtatë pikësh të 2013-s, jo që nuk ka implementuar, por gjendja është përkeqësuar realisht mund të themi se pozita shqiptare e luginës së Preshevës është më e vështirë, më e keqe dhe më e rënduar se në vitet ‘70”, tha ajo.
Në prag të zhvillimeve politike në Serbi, Sinani theksoi nevojën që faktori politik shqiptar të bashkohet për të siguruar përfaqësim më të fortë në parlament, ndërsa shprehu skepticizëm për ndryshime të shpejta në politikën serbe ndaj shqiptarëve.
Shqipëria synon të sigurojë financim nga Bashkimi Evropian për disa projekte strategjike në sektorin e energjisë, duke përfshirë zhvillimin e hidrocentralit të Moglicës dhe forcimin e linjës së interkonjeksionit me Kosovën.
Këto iniciativa janë përfshirë në listën e projekteve që Komuniteti i Energjisë ka nxjerrë në konsultim publik për Projektet me Interes të Komunitetit të Energjisë për vitin 2026.
Projekti me i madh eshte ai i Moglicës i cili synon krijimin e një “baterie” gjigante energjetike.
Me rëndësi edhe gjithashtu edhe rikonfigurimi i rrjetit 400 kV dhe ndërtimi i një interkoneksioni të ri me Kosovën.
Projektet e paraqitura par Komuniteti i Energjisë financohen nga burime të ndryshme, përfshirë BE-në, institucionet financiare dhe sektorin privat.
Nga këto para përfitojnë disa shtete njëkohësisht duke synuar rritjen e bashkëpunimit rajonal. Për Shqipërinë, ato përfaqësojnë një hap drejt modernizimit të sektorit energjetik. /rtsh.al
Policia e Kosovës ka lëshuar një njoftim zyrtar për vetaksidentin e ndodhur sot në fshatin Dobrushë të Istogut, ku mbeti i vdekur një 32-vjeçar. Sipas njoftimit të fundit të policisë, rasti ka ndodhur sot, rreth orës 05:54, në magjistralen Pejë–Mitrovicë.
Siç bëhet e ditur, në vendin e ngjarjes kanë dalë menjëherë njësitet përkatëse policore, zjarrfikësit dhe ekipi mjekësor.
Sipas dyshimeve fillestare, deri te aksidenti ka ardhur pasi drejtuesi i automjetit nuk e ka përshtatur shpejtësinë me kushtet e rrugës. Si pasojë, ai ka humbur kontrollin mbi veturën, ka devijuar nga rruga në anën e djathtë dhe është përplasur me një shtyllë betoni.
“Deri te aksidenti dyshohet se ka ardhur, deri sa automjeti ishte duke qarkulluar në magjistralen Pejë – Mitrovicë, saktësisht në fshatin Dobrushë- Istog, duke mos ju përshtatur shpejtësisë dhe kushteve të rrugës i njëjti humb kontrollin dhe me pas devijon djathtas dhe godet shtyllën e betonit”, njofton policia.
Për pasojë të aksidentit, vozitësi ka ndërruar jetë në vendin e ngjarjes, gjë që është konstatuar nga ekipi mjekësor.
“Me urdhër të Prokurorit shtetit trupi i pa jetë i viktimës dërgohet në Institutin e Mjekësisë Ligjore në Prishtinë, për Obduksion, rasti vazhdon të hetohet nga hetuesit e aksidenteve NJRKRR- DRP-Pejë”.
Kryetari i degës së OVL-UÇK-së në Istog Muhamet Demaj, në përvjetorin e Masakrës së Studenicës iu ka çuar një mesazh atyre që sipas tij po mundohen ta përçajnë popullin shqiptar.
Demaj deklaroi se kjo nuk do të ndodhë.
“Sot, s’ka dëshmi më të madhe se këto vajza e pleq që ndodhen këtu, që janë heroina për këtë vend. Andaj, kjo nuk do të ndodh”, tha ai.
Masakra e Lipajve në Studenicë ishte një nga më të tmerrshmet që ndodhi gjatë luftës në Kosovë.
Katër vajza nën moshën 15 vjeçare, katër gra e dy burra janë viktimat e kësaj ngjarje makabre.
9 janë nga familja Lipaj dhe një Zeqiraj.
Zëvendëskryeministri i Parë dhe Ministër i Punëve të Jashtme dhe Diasporës, Glauk Konjufca, ka bërë homazhe në New York në nderim të ish-kongresistit amerikan Eliot Engel, duke shprehur njëkohësisht ngushëllimet për familjen e tij në emër të Republikës së Kosovës.
Konjufca e cilësoi këtë moment si një rast për të nderuar jetën dhe veprën e një miku të madh të shqiptarëve dhe Kosovës. Ai theksoi se Engel, për dekada me radhë, ka qëndruar i përkushtuar në mbrojtje të të drejtës së popullit të Kosovës për çlirim, liri dhe pavarësi.
Sipas tij, kontributi i Engel mbetet thelbësor në ndërtimin dhe forcimin e miqësisë së përhershme ndërmjet Kosovës dhe Shteteve të Bashkuara të Amerikës.
“Lavdi jetës dhe veprës së mikut tonë të madh,” u shpreh Konjufca, duke vlerësuar rolin e rëndësishëm të Engel në mbështetjen ndërkombëtare për Kosovën.
Gjykata Themelore në Ferizaj, Departamenti i Përgjithshëm – Divizioni Penal, ka vendosur një muaj paraburgim për reperin Butrint Januzi i njohur si Buta, për shkak të dyshimit të bazuar se ka kryer veprën penale shkaktim i rrezikut të përgjithshëm dhe mbajtja në pronësi, kontroll ose posedim të paautoriz të armëve nga neni 366 paragrafi 1 të Kodit Penal të Republikës së Kosovës (KPRK).
Sipas njoftimit, pas mbajtjes së seancës dëgjimore dhe analizimit të shkresave të lëndës, gjyqtarja e procedurës paraprake në Departamentin e Përgjithshëm – Divizioni Penal, Alba Makolli, ka vlerësuar se:
I
Ndaj të pandehurit E.H., ekziston dyshimi i bazuar, se me 11 prill 2026, rreth orës 20:15, në një rrugë në Ferizaj, saktësisht në parkingu afer lokalit E., pas një fjalosje të atëçasshme i ka shkaktuar lëndime trupore të dëmtuarit/pandehurit B.J., ashtu që derisa i dëmtuari parkon veturën e tij mbrenda parkingut dhe derisa del nga vetura i pandehuri i drejtohet me fjalët se “ku je o B. mangupi”, pastaj e ka sulmuar me një thikë duke e goditur me dorëz të thikës në nofullën e majtë, pastaj ka tentuar ta godas me thikë në kokë, ndërsa duke u mbrojtue i dëmtuari me dorë e kap tehun e thikës me ç’rast e pren dorën dhe gjatë përleshjes rrezohet në tokë dhe lëndohet edhe në krahun e majtë me ç’rast i shkakton lëndime trupore për te cilat posedon raport mjekësor.
II
Ndaj të pandehurit B.J., ekziston dyshimi i bazuar se me datë, kohë dhe vend të njëjtë si në piken I, ka shkaktuar rrezik të madh për pasurinë dhe jetën e njerëzve, në një rrugë në Ferizaj, saktësisht në parkingu afer lokalit E., në atë mënyrë që derisa ishin duke u përleshur me të E.H., nga qanta e tij nxjerr një pistolet e llojit VD-9 4.0 gjuan/shkrep dy herë në drejtim të tokës dhe pasiqë vazhdon rrahja mes tyre, kjo pistolet i bei në tokë.
III
Gjithashtu, ekziston dyshimi i bazuar se nga data e pacaktuar e deri me datë 11 prill 2026, ka poseduar armë në mënyrë të paautorizuar dhe në kundërshtim me Ligjin e zbatueshëm për armët, ashtuqë ka poseduar një pistolet e llojit VD-9 4.0 Made in USA, nr.serik GM., cal 9 mm si dhe 13 fishek për të cilen nuk kishte autorizim dhe leje nga organet kompetente dhe e njëjta i sekuestrohet.
Gjyqtarja e procedurës paraprake, kërkesën e prokurorit të shtetit për caktimin e masës së paraburgimit kundër të pandehurve e ka aprovuar si të bazuar konform dispozitave të KPPRK-së, dhe të njëjtëve i`u është caktuar masa e paraburgimit në kohëzgjatje prej një (1) muaj.
Me këtë rast palët njoftohen se ankesa kundër këtij aktvendimi nuk e shtynë ekzekutimin e tij.
Kanë mbetur edhe 15 ditë deri në përfundimin e afatit kushtetues për zgjedhjen e Presidentit të Kosovës, ndërsa në mungesë të një marrëveshjeje politike, vendi rrezikon të shkojë në zgjedhje të reja.
Kryeministri i Kosovës, Albin Kurti, duhet të sigurojë mbështetjen e nevojshme në Kuvend deri më 28 prill, afat i përcaktuar nga Gjykata Kushtetuese e Kosovës. Megjithatë, pavarësisht kalimit të kohës, partitë politike ende nuk kanë arritur një dakordim për emrin e presidentit të ri, shkruan Reporteri
Kurti ka theksuar vazhdimisht gatishmërinë për të gjetur një zgjidhje politike që do të shmangte zgjedhjet e reja, të cilat, sipas tij, nuk do të sillnin ndryshime të ndjeshme në përbërjen e Kuvendit.
“Jemi të përcaktuar që t’i shmangim zgjedhjet e reja, sepse zgjedhjet e reja nuk do të ishin zgjidhje për numrin e nevojshëm prej 80 deputetësh. Me fjalë të tjera, është vështirë që ta paramendojmë një fushatë zgjedhore ku ne i risjellim platformat dhe programet tona, me po të njëjtat zotime kërkojmë sërish votën e të njëjtëve qytetarë për një rezultat që e dimë që nuk mund të jetë shumë ndryshe”, ka deklaruar ai.
Në kuadër të konsultimeve, javën që shkoi ai ka zhvilluar një takim me kryetarin e Lidhjes Demokratike e Kosovës, Lumir Abdixhiku, i cili është vlerësuar si konstruktiv, ndërsa janë paralajmëruar edhe takime të tjera gjatë ditëve në vijim.
Pas takimit, Abdixhiku ka bërë të ditur se nuk ka pasur zhvillime konkrete.
“Tani shohim gjatë javës së ardhshme për të parë mundësinë e takimeve të tjera. Kaq është e vërteta, nuk ka zhvillime të tjera. Nuk kemi propozuar emër, nuk kemi dhënë asgjë dhe nuk na është kërkuar ende asgjë.”
Ai ka theksuar se procesi duhet të fillojë me parimet dhe jo me emra konkretë, duke e cilësuar këtë çështje si konsensuale.
“Jo, s’ka gjasa të vetëpropozohem, sepse çështja e presidentit është çështje konsensuale. Pra, duhet të flasim për parimet njëherë… Në qoftë se jo, atëherë përgatitemi për zgjedhje të reja.”
Nga ana tjetër, Kurti ka paralajmëruar edhe një takim me kryetarin e Partisë Demokratike të Kosovës, Bedri Hamza, duke theksuar se posti i presidentit përfaqëson unitetin e qytetarëve dhe kërkon përfshirje më të gjerë politike.
Megjithatë, nga PDK-ja kanë bërë të ditur se nuk kanë pranuar ende një ftesë zyrtare për takim dhe kanë kërkuar që iniciativa e kryeministrit të konkretizohet përmes një letre zyrtare, para se të shqyrtohet në organet e partisë dhe të merret një qëndrim përfundimtar.
Ndërkohë sot, deputeti i LVV-së, Driton Hyseni, është shprehur optimist se brenda afatit kushtetues mund të gjendet një zgjidhje për zgjedhjen e presidentit.
Ai tha se të gjitha subjektet politike duhet të bëjnë përpjekje për evitimin e zgjedhjeve.
“Unë mendoj se takimet kanë këtë synim, të gjejmë një gjuhë të përbashkët dhe të dalim nga kriza e cila na ka përcjellë gjatë javëve të kaluara sa i takon çështjes së presidentit. Unë mendoj se jemi në rrugë të mbarë dhe do t’i shterojmë të gjitha mundësitë. Tani kemi kohën përpara, janë edhe shumë ditë në dispozicion dhe unë mendoj se secili nga akterët politikë duhet ta bëjë maksimumin e vet që të vijmë te një zgjidhje sa i takon kreut të shtetit dhe të evitohen zgjedhjet, të cilat nuk janë të dëshirueshme për askënd.”, tha ai për rtv21.
Në këto rrethana, ndërsa afati kushtetues po afrohet, mbetet e paqartë nëse spektri politik do të arrijë një marrëveshje për zgjedhjen e presidentit, apo vendi do të përballet me një proces të ri zgjedhor brenda 45 ditëve.
Autoriteti holandez i automjeteve RDW ka dhënë dritën jeshile për përdorimin e sistemit Tesla “Full Self-Driving (Supervised)” në Holandë, pas më shumë se 18 muaj testimesh dhe analizash.
Sipas RDW, sistemi “kontribuon pozitivisht në sigurinë rrugore”, por theksohet qartë se nuk bëhet fjalë për vozitje plotësisht autonome dhe shoferi mbetet përgjegjës në çdo moment.
Kështu, Tesla pritet ta nisë së shpejti përdorimin e teknologjisë në vend, si në rrugë urbane ashtu edhe në autostrada.
Vendimi i Holandës mund të hapë rrugën për miratim në të gjithë Bashkimin Evropian, por kjo ende kërkon votim nga shtetet anëtare.
Në raste të mungesës së vëmendjes së shoferit, sistemi mund të japë paralajmërime ose të çaktivizohet përkohësisht.
Gjykata e Tiranës e ka shpallur të larguar nga vendi palestinezin 49-vjeçar me inicialet F.A, të akuzuar për vrasjen e vajzës së tij, Rayyan Alwai, 22 vjeç, ngjarje e ndodhur në shkurt të vitit 2025 në Tiranë.
Vendimi u mor pas refuzimit të drejtësisë së Libanit për të ekstraduar në Shqipëri, autorin e dyshuar, i cili u arrestua në këtë shtet më 23 prill 2025.
Përmes një shkrese të datës 18.09.2025, Ministria për Europën dhe Punët e Jashtme ka informuar se Republika e Libanit ka refuzuar ekstradimin në Shqipëri të 49-vjeçarit.
Klan News, raporton se për shkak se nuk mund të ekzekutohet masa “arrest në burg” e drejtësisë shqiptare, gjykata ka deklaruar ikjen.