Author: K.B.

Aleatët e NATO-s thanë të hënën se nuk do të përfshiheshin në planin e presidentit të SHBA-së Donald Trump për të bllokuar portet iraniane, duke propozuar të ndërhyjnë vetëm pasi të mbarojnë luftimet, në një veprim që ka të ngjarë ta zemërojë Trumpin dhe të rrisë tensionet në aleancë.

Trump tha se ushtria amerikane do të eliminojë çdo anije iraniane që do t’i afrohej bllokadës që filloi të hënën, pasi bisedimet e fundjavës dështuan të arrinin një marrëveshje për t’i dhënë fund konfliktit gjashtë-javor me Iranin, shkruan Reuters.

Trump fillimisht theksoi se SHBA-të do të punonin me vendet e tjera për të bllokuar anijet që kalojnë nëpër Ngushticën e Hormuzit, por ushtria amerikane më vonë specifikoi se bllokada do të zbatohej vetëm për anijet që shkojnë në ose nga portet iraniane.

Që kur filloi lufta më 28 shkurt, Irani ka bllokuar kryesisht rrugën ujore për të gjitha anijet përveç të vetave.

Ai ka kërkuar ta bëjë kontrollin e tij mbi ngushticën të përhershëm dhe ndoshta të mbledhë taksa nga anijet që e përdorin atë.

“Bllokada do të fillojë së shpejti. Vende të tjera do të përfshihen në këtë bllokadë”, tha Trump në një postim në Truth Social të dielën.

Por aleatët e NATO-s, përfshirë Britaninë dhe Francën, thanë se nuk do të “tërhiqeshin në konflikt” duke marrë pjesë në bllokadë, duke thënë se në vend të kësaj po punonin për një iniciativë për të hapur ngushticën, përmes së cilës normalisht kalon një e pesta e furnizimeve globale me naftë.

Dhe sipas Reuters, refuzimi i tyre për të marrë pjesë është një tjetër pikë fërkimi me Trump, i cili ka kërcënuar të tërhiqet nga aleanca ushtarake dhe po shqyrton tërheqjen e disa trupave amerikane nga Evropa pasi disa vende u mohuan avionëve ushtarakë amerikanë përdorimin e hapësirës së tyre ajrore për sulme ndaj Iranit.

Një person ka humbur jetën pasi ka rënë nga një objekt në ndërtim në rrugën “Remzi Hoxha” në Ferizaj.

Rasti ka ndodhur më 13 prill 2026 rreth orës 11:45, kur policia ka pranuar informatën për një person që kishte rënë nga një ndërtesë në ndërtim.

E pas këtij rasti kanë reaguar nga Shoqata e Ndërtimtarëve të Kosovës.

“Sektori i ndërtimit përfaqëson një nga shtyllat themelore të zhvillimit ekonomik dhe të punësimit në vend, duke kontribuar drejtpërdrejt në transformimin dhe modernizimin e infrastrukturës kombëtare. Në këtë kontekst, siguria në vendin e punës mbetet një prioritet i panegociueshëm që kërkon angazhim të vazhdueshëm, standarde të larta profesionale dhe bashkërendim efektiv institucional.

Humbja e 7 punëtorëve vetëm gjatë muajve të parë të vitit 2026 përbën një tregues serioz dhe një thirrje të qartë për veprim të menjëhershëm në drejtim të forcimit të zbatimit të standardeve të sigurisë në çdo vendpunishte, pa përjashtim”, thuhet në reagim.

Shoqata e Ndërtimtarëve të Kosovës ka shprehur ngushëllime për familjet e viktimave.

“Në të njëjtën kohë, theksojmë se trajtimi i këtyre rasteve duhet të bazohet në analiza profesionale, të balancuara dhe të çliruara nga çdo tendencë për përgjithësim apo fajësim të njëanshëm të sektorit. Ndërtimtarët, kompanitë dhe investitorët janë drejtpërdrejt të interesuar në garantimin e kushteve të sigurta të punës dhe nuk mund të trajtohen si burim i rrezikut, por si partnerë kyç në menaxhimin dhe minimizimin e tij”, thuhet në njoftim.

Tutje në reagim thuhet se fokusi duhet të orientohet në mënyrë të qartë drejt zbatimit rigoroz të standardeve të sigurisë dhe përgatitjes së plotë teknike dhe organizative të çdo kantieri ndërtimor, në përputhje me legjislacionin dhe normat profesionale në fuqi.

“Po aq e rëndësishme është edhe përgjegjësia individuale në vendin e punës. Shoqata apelon që çdo punëtor të respektojë në mënyrë rigoroze rregullat e sigurisë dhe të përdorë pajisjet mbrojtëse personale në çdo moment, si një element thelbësor për mbrojtjen e jetës dhe shëndetit të tij.

Në këtë drejtim, Shoqata e Ndërtimtarëve të Kosovës kërkon intensifikim të bashkëpunimit të drejtpërdrejtë me institucionet relevante, në veçanti me Inspektoratin e Punës, për të ndërtuar një qasje të përbashkët dhe të qëndrueshme që promovon standarde reale sigurie në praktikë.

Qasja jonë është e qartë dhe e vendosur: jo fajësim, por parandalim, ku mbrojtja e jetës dhe shëndetit të punëtorëve është prioritet absolut”, thuhet në reagim.

Tutje, Shoqata e ndërtimtarëve thekson se siguria në punë nuk mund të reduktohet në masa ndëshkuese; ajo ndërtohet mbi përgjegjësi profesionale, përgatitje të duhur dhe bashkëpunim të sinqertë ndërmjet kompanive, punëtorëve dhe institucioneve.

Inspektorët e Komunës së Gjilanit kanë shqiptuar gjobë ndaj një subjekti afarist, pasi kamionët e tij kanë ndotur rrugën dhe kanë dëmtuar trotuarin në rrugën “Marie Shllaku”.

Sipas njoftimit të Drejtorisë së Inspekcionit, veprimet janë ndërmarrë pas ankesave të qytetarëve, të cilët kanë raportuar për bartje të baltës nga kamionët, duke shkaktuar ndotje të rrugës dhe dëmtime në anësore dhe trotuar.

Autoritetet komunale bëjnë të ditur se inspektorët kanë konstatuar shkeljet në terren dhe kanë ndërmarrë masa ndëshkuese ndaj subjektit përkatës.

“Ftojmë të gjithë shoferët dhe operatorët që të respektojnë detyrimet ligjore dhe të tregojnë kujdes të shtuar në ruajtjen e mjedisit dhe pastërtisë publike. Rrugët dhe hapësirat publike janë pasuri e përbashkët dhe mirëmbajtja e tyre është përgjegjësi e secilit prej nesh”, thuhet në njoftim.

Drejtoria e Inspekcionit ka theksuar se inspektorët do të vazhdojnë kontrollet në terren dhe do të shqiptojnë gjoba ndaj të gjithë atyre që cenojnë mjedisin dhe hapësirat publike.

Policia e Kosovës ka bërë të ditur se një rast i raportuar si aksident trafiku në Prishtinë ka rezultuar të jetë i rremë, pas verifikimeve të kryera nga njësitet policore.

Sipas njoftimit, gjatë ditës së djeshme policia ka pranuar informatën për një aksident në kryeqytet, me ç’rast njësitet kanë reaguar menjëherë duke dalë në vendin e ngjarjes dhe duke ndërmarrë veprimet e nevojshme hetimore.

Pas ekzaminimit të vendit dhe analizimit të provave, përfshirë kamerat e sigurisë, njësitet e Stacionit Policor Jugu në Prishtinë kanë konstatuar se nuk kishte ndodhur asnjë aksident trafiku dhe se rasti ishte raportuar në mënyrë të rreme.

Personi i dyshuar është intervistuar nga organet e rendit, ndërsa në koordinim me Prokurorin e Shtetit ndaj tij është iniciuar rast për veprën penale “Deklarim i rremë”.

Policia ka rikujtuar se raportimet e rreme përbëjnë shkelje ligjore dhe pengojnë angazhimin e resurseve në raste reale që kërkojnë ndërhyrje urgjente.

Ushtruesja e detyrës së Presidentes Albulena Haxhiu, bashkë me kryeministrin Albin Kurti ka bërë homazhe te memoriali “Heroinat”, në nderim të të mbijetuarve të dhunës seksuale gjatë luftës së fundit në Kosovë.

Ata ishin të shoqëruar me dy nga të mbijetuarit, Vasfije Krasniqi- Goodman dhe Ramadan Nishorin.

14 prilli është shpallur zyrtarisht si Dita Memoriale e të Mbijetuarve të Dhunës Seksuale gjatë luftës së fundit në Kosovë, një vendim që synon të ruajë kujtesën kolektive dhe të nxisë solidaritetin me të mbijetuarit.

Ushtruesja e detyrës së presidentes, Albulena Haxhiu bashkë me kryeministrin Albin Kurti, Vasfije Krasniqi – Goodman, Feride Rushitin e Ramadan Nishorin, bënë homazhe pranë memorialit “Heroinat” për të nderuar sakrificën dhe dinjitetin e të mbijetuarve të dhunës seksuale gjatë luftës në Kosovë.

Para mediave, Haxhiu njoftoi se gjatë kohës së fundit janë ngritur edhe 12 aktakuza për dhunën seksuale gjatë luftës në Kosovë.

“Kemi tri vendime të gjykatave, vendime dënuese për raste të dhunës seksuale gjatë luftës në Kosovë, dy prej tyre janë në Gjykatën Themelore, ndërsa një ka marrë vendimin e formës së prerë”, deklaroi Haxhiu.

Po ashtu, ajo theksoi se vajzat dhe gratë, djemtë e burrat që i mbijetuan kësaj dhune, tregojnë që institucionet kanë shumë punë për të bërë.

“Kemi shumë punë për adresimin e përgjegjësive tona si institucione të Kosovës, sidomos në adresimin e drejtësisë”, shtoi kryetarja e Kuvendit

Kryesia e Kuvendit të Kosovës do të mblidhet sot në orën 13:00, ku pritet të përcaktojë rendin e ditës për seancën e radhës plenare.

Në këtë mbledhje do të shqyrtohet miratimi i procesverbalit nga seanca e kaluar, deklarimet jashtë rendit të ditës dhe pyetjet parlamentare.

Pikë kyçe e diskutimit do të jetë edhe propozimi i dy kandidatëve për gjyqtarë në Gjykatën Kushtetuese të Republikës së Kosovës.

Po ashtu, Kryesia do të trajtojë edhe propozime dhe kërkesa të tjera që lidhen me punën e Kuvendit.

Ish-deputeti i Lëvizjes Vetëvendosje, Florin Krasniqi, në RTV Dukagjini, ka kritikuar ashpër kryeministrin Albin Kurti për qasjen e tij ndaj kërkesave të partive opozitare për çështjen e TVSh-së për derivate në kohën kur janë ngritur çmimet.

Ai ka thënë se po të bënte një veprim të tillë PDK apo LDK sa ishte në pushtet, Kurti do të bënte ‘namin’ duke bërtitur për ‘plaçkitje’.

“Merr me mend po të ishte Isa Mustafa kryeministër e ky (Kurti) në opozitë, i kish qu duart njëherë si shqiponjë ‘plaçkitje masive’, po qyky është mashtrues se i ka dy gjuhë, dy personalitete, 20 mënyra me mashtru, ky është mashtrimi… s’ka nevojë me komentu këtë”.

Ai tutje ka thënë se nuk të përcaktojnë votat se a je mashtrues apo jo, por faktet.

“Faktet e përcaktojnë mashtruesin, jo numri i votuesve”, ka thënë Krasniqi.

Izraeli shënoi dje Ditën e Përkujtimit të Holokaustit Në fjalimin e tij, kryeministri Benjamin Netanyahu kritikoi ashpër Evropën, duke thënë se ishte “e prekur nga një dobësi e thellë morale” dhe se Izraeli tani po mbronte një kontinent “që ka harruar kaq shumë për Holokaustin”, raporton The Times of Israel.

Ai e akuzoi Evropën se “po humbet kontrollin mbi identitetin e vet, vlerat e saj dhe përgjegjësinë e saj për të mbrojtur qytetërimin nga barbarizmi”.

“Ata kanë shumë për të mësuar nga ne”, tha kryeministri izraelit, “veçanërisht mësimin e rëndësishëm të dallimit të qartë moral midis së mirës dhe së keqes, i cili në momentet e së vërtetës kërkon të shkosh në luftë për atë që është e mirë, për jetën. Izraeli, nga ana tjetër, nuk e harron këtë përgjegjësi të përjetshme”

“ Së bashku me SHBA-në dhe vendet e tjera me të cilat po krijojmë aleanca për të cilat ende nuk është folur, ne po mbrojmë veten – dhe kështu të gjithë botën”, tha ai, duke shtuar se “Izraeli qëndron me Shtetet e Bashkuara të Amerikës në krye të botës së lirë”.

Ai tha se të dy vendet “i dhanë një goditje shkatërruese regjimit të lig në Iran” në operacionet e përbashkëta vitin e kaluar.

Kosova ka hyrë në 15 ditët vendimtare për zgjedhjen e Presidentit, sipas afatit të caktuar nga Gjykata Kushtetuese. Nëse përgjatë këtyre dy javëve nuk arrihet marrëveshje mes partive, do të shkohet sërish në zgjedhje.

Deri më tani ka pasur vetëm një takim për çështjen e presidentit, mes kryeministrit Albin Kurti dhe kreut të LDK-së, Lumir Abdixhiku. Kurti paralajmëroi se do ta ftojë për takim edhe kreun e PDK-së, Bedri Hamza, por ky i fundit ftesë ende nuk ka marrë.

Kurti, akoma nuk ia ka dërguar ftesën zyrtare për takim Hamzës, ashtu siç kërkoi ky i fundit.

Sekretarja e Përgjithshme e PDK-së, Vlora Çitaku, ka deklaruar për Reporteri.net, se nuk do të marrin pjesë në takim pa letër zyrtare.

“Jo nuk kemi letër. Nuk shkojmë pa letër zyrtare”, thuhet në përgjigjen e Çitakut.

Nga kabineti qeveritar thanë javën e kaluar se gatishmëria e kryetarit të LDK-së Lumir Abdixhiku për takime me Albin Kurtin, jep shpresa se çështja e presidentit mund të zgjidhet.

Kështu deklaroi, Ministri i Punëve të Jashtme të Kosovës, Glauk Konjfuca. Konjufca tha se vullneti i shfaqur nga Abdixhiku është lajm i mirë meqë hapen perspektiva për mundësinë e zgjedhjes së presidentit.

“Siç e keni parë, ka ndodhur takimi tjetër i radhës mes kryeministrit Kurti dhe kryetarit të LDK-së, Lumir Abdixhiku. Kryeministri Kurti i ka drejtuar letër edhe PDK-së. Do të specifikohet edhe më tutje nëse ky takim mund të ndodhë apo jo. Me z. Abdixhiku me sa e pash dhe përgjigja e tij ishte që ai është i vullnetit që takimet të vazhdojnë. Ky është një lajmi mirë sepse i jep do perspektiva për mundësinë e zgjedhjes së një presidenti. Gjithmonë do të shpresojmë se kemi kapacitet dhe mençuri që të shmangim disa zgjedhje që u mbajtën vetëm katër muaj më parë. Para katër muajve populli foli. Nuk është se ka ndodhur ndonjë ndryshim shumë i madh që populli të mos e ketë mendimin e njëjtë në zgjedhje. Populli ndryshon mendimin vetëm kur ndodhin transformime të mëdha. “, ka deklaruar Glauk Konjufca.

E kreu i LDK-së, Lumir Abdixhiku e ka përsëritur gjatë së shtunës se partia e tij është kundër që një partie t’i takojnë tri pozicionet shtetërore, presidenti, kryeministri e kryetari i Kuvendit.

Abdixhiku ka deklaruar se nëse nuk ka marrëveshje, atëherë do të shkohet në zgjedhje të reja.

Ai theksoi se nuk mund të vetëpropozohet për postin e presidentit, pasi shton se çështja është konsensuale.

“Jo, s’ka gjasa të vetëpropozohem sepse çështja e presidentit është çështje konsensuale. Pra, duhet të flasim për parimet njëherë. Mos t’i ngatërrojmë. Nuk po flasim për akomodime individuale në këtë fazë. Aq më pak për një pozicion kaq të rëndësishme shtetërore. Pra flasim për interesa ndërpartiake. Pra a ka mundësi që partitë të akomodohen rreth një marrëveshjeje shumë më të madhe. Në qoftë se jo, atëherë përgatitemi për zgjedhje të reja”, tha Abdixhiku.

VV i ka propozuar dy emra për pozitën e presidentit: Glauk Konjufcën, ministrin e Punëve të Jashtme dhe Diasporës dhe deputeten Fatmire Mullhaxha -Kollçaku. Në mungesë kuoromi, procesi ka mbetur në gjysmë.

Më 4 prill, Vjosa Osmanit i ka përfunduar mandati presidencial. Të njëjtën ditë, pozitën e ushtrueses së detyrës e ka marrë Albulena Haxhiu, kryetare e Kuvendit, ashtu siç parashihet me Kushtetutë.