Author: K.B.

Partia Demokratike e Kosovës ka mbajtur sot mbledhjen e rregullt të Kryesisë, ku u diskutua lidhur me zhvillimet aktuale politike dhe institucionale në vend, si dhe procesin e organizimit të brendshëm të partisë.

Në këtë mbledhje, Kryetari Hamza dhe kryesia vendosën që të thërrasin mbledhjen e Këshillit Drejtues të PDK-së të hënën, më 20 prill.

Pas kësaj mbledhje, PDK do të dalë me një Deklaratë Politike, përmes së cilës do të formalizohen qëndrimet dhe veprimet e partisë lidhur me aktualitetin politik dhe çështjet me rëndësi për qytetarët.

Gjatë diskutimeve u theksua rëndësia e organizimit të brendshëm dhe mobilizimit të strukturave të partisë për angazhim më të madh në proceset politike, në shërbim të qytetarëve dhe për adresimin e nevojave të tyre.

Analisti Albert Krasniqi tha se deklarimi i pasurisë së zyrtarëve të lartë publikë po shpërfaq mjaftueshëm se çfarë sektori fitimprurës është politika.

Ai këtë deklaratë e bëri pas raportimit të fundit të pasurisë së zyrtarëve publikë.

Krasniqi tha se kjo pasqyrë tregon paga e shtetit është me shumë “bereqet”.

“Me një rrogë arrin të jetosh në luks, të blesh prona dhe të kursesh pa problem. Ndërkohë, me të njëjtën rrogë në sektorë të tjerë, njerëzit mezi e mbyllin muajin. Pastaj, sapo hyn në pushtet, rritet edhe dashuria familjare. Papritmas trashëgon dy-tri prona këtu, disa asete atje – edhe kur familjarët nuk janë fort të njohur për ndonjë aktivitet ekonomik”.

Me ironi, Krasniqi thotë se këto deklarime të pasurisë tregojnë se prindërit e zyrtarëve publikë paskan qenë koleksionues arti.

“Deklarimet na zbulojnë edhe një dimension kulturor të panjohur: prindërit tanë, në kushte të rënda jetese dhe të rritur nën okupim, paskan qenë koleksionistë të mëdhenj arti. Në mes të varfërisë, kanë arritur të lënë trashëgimi piktura me vlera milionëshe – për lakmi edhe nga baronët më të mëdhenj europianë!”.

Zëdhënësja e Policisë së Kosovës për rajonin e Prishtinës, Flora Ahmeti, ka dhënë detaje lidhur me rastin tragjik të ndodhur sot në Podujevë, ku ka vdekur një person.

Ahmeti ka thënë se është iniciuar rasti si hetim i vdekjes.

‘Rasti ka ndodhë rreth orës 11:00, në fshatin Revuqë të Podujevës, ku viktima mashkull dyshohet të jetë lënduar rëndë pasi që ishte rrokullisur me traktor derisa ishte duke punuar”, ka thënë Ahmeti.

“Personi i lënduar është dërguar në QKUK për ndihmë mjekësore, nga ku jemi njoftuar se personi ka ndërruar jetë.Policia në koordinim me prokurorinë po heton rastin si vdekje të dyshimtë dhe po ndërmerr të gjitha veprimet e duhura hetimore që do ti kontribuonin hetimit të ngjarjes përderisa trupi i pajetë i viktimës është dërguar për obduksion”, ka përfunduar ajo

Derisa Shërbimi Korrektues i Kosovës ka bërë të ditur se bëhet fjalër për Granit Sherifitn, i cili ka punuar në këtë institucion.

“Me pikëllim të thellë morëm lajmin për ndarjen tragjike nga jeta të kolegut tonë të çmuar, Granit Sherifi.

Lajmi i hidhur për humbjen e tij na ka thyer zemrat të gjithëve. Për ne, ai nuk ishte thjesht një koleg, por një mikë dhe një njeri me shpirt të madh.

Në emër të të gjithë kolektivit të Shërbimit Korrektues të Kosovës shprehim ngushëllimet tona më të sinqert familjes, miqëve dhe të gjithë atyre që e njohën.

Sherifi ishte një model përkushtimi dhe integriteti, i cili la gjurmë të pashlyeshme në mesin tonë.

Humbja e tij lë një zbrazëti të madhe jo vetëm në familjen tuaj, por edhe në institucionin tonë!”, thuhet në njoftim.

Komisioni Qendror i Zgjedhjeve në mbledhjen e sotme mori vendim për regjistrimin e partisë politike “Partia Qytetare për Mirëqenie Sociale”.

Kjo parti është iniciativë qytetare e cila udhëhiqet nga Sali Salihu.

“Pas pranimit të aplikacionit për regjistrim të iniciativës politike, Zyra ka shqyrtuar dhe verifikuar të gjithë dokumentacionin e dorëzuar, duke filluar nga: Statuti, programi, akti i themelimit, simboli, raporti financiar, libreza e nënshkrimeve të përkrahjes së votuesve të regjistruar dhe taksën e regjistrimit në vlerën 500 Euro. Pas pranimit të këtyre dokumenteve, Zyra ka komunikuar me palët, duke i dërguar shkresën që përmban komentet për ndryshim. Iniciativës politike i është dhënë afat prej 5 ditësh për të dërguar ndryshimet në statut dhe numrin e mbështetësve. Para përfundimit të këtij afati, iniciativa politike ka aplikuar ndryshimet e kërkuara dhe ka dorëzuar materialet në Zyrë”, thuhet në njoftim të KQZ-së.

Asnjëri kandidat për gjyqtarë në Kushtetuese, s’i ka marrë votat e mjaftueshme nga deputetët Kuvendi i Kosovë, për t’u propozuar në këtë pozitë.

Kështu ka bërë të ditur kryetarja e Kuvendit, Albulena Haxhiu, e cila ka shtuar se duhet përsëritur konkursi.

Kjo e fundit i ka bërë thirrje komisionit që të ndërmerr veprimet e nevojshme për publikimin e thirrjes, ftesës, për propozimin e dy kandidatëve për gjyqtarë në Kushtetuese.

Votat për kandidatët nga raundi i katërt ishin:

Emine Avdyli Pozhari, – 60 vota

Jonida Xhafa – 62 vota

Flamur Mrasori, – 51 vota

Deputeti i LDK-së, Ermal Sadiku, në Kuvendin e Kosovës ka kritikuar Lëvizjen Vetëvendosje që s’po e sjellin për ta ratifikuar në Kuvend marrëveshjen për Bordin e Paqes.

Sadiku ka thënë se partia në pushtet vetëm për këtë Ligj nuk po ngutet.

Ai ka shtuar se nuk po mund t’i kualifikojë LVV-në si anti-amerikanë, megjithatë thekson se partia e Kurtit po japin të dhëna të mjaftueshme për t’i quajtur të tillë.

“Vetëm çështjen e Bordit të Paqes po e vononi. Po kërkohet në maksimum që të shpenzohet koha. I vetmi proces që ju s’jeni për t’ngutë është Bordi i paqes. Nuk po mundem me iu thanë anti-amerikan se s’muj, as nuk mendoj që jeni, por që po na jepni të dhana të mjaftueshme me iu thanë e s’po muj, vërtetë po na jepni”, ka deklaruar Sadiku.

Deputetja e PDK-së, Vlora Çitaku, ka reaguar pasi kryeministri Albin Kurti ka udhëtuar për herë të dytë jashtë vendit brenda pak ditësh.

Çitaku ka thënë se Kurti pas Londrës, tashmë do të kalojë edhe tri ditë të tjera në Spanjë, pa bërë asnjë përpjekje për të zgjidhur problemin për zgjedhjen e presidentit.

“Pas tri ditësh në Londër, Kryeministri Kurti paska ka vendosur t’i kalojë edhe tri të tjera në Spanjë, pa asnjë rezultat konkret për Kosovën.

Ndërkohë, afati 34-ditor i Gjykatës Kushtetuese për zgjedhjen e Presidentit po shkon drejt fundit, pa asnjë përpjekje serioze për konsensus”, ka shkruar ajo.

“Kjo qasje dëshmon mungesë të vullnetit për stabilitet institucional dhe lë të kuptohet një orientim drejt krizave të njëpasnjëshme, në vend të zgjidhjeve për qytetarët.Kryeministër, kthehu e kryej punët e shtëpisë, ku të presin hallet e qytetarëve dhe shtetit. Lëri shëtitjet e samitet pa rezultat, se ke dëshmu që nuk është hajri yt në diplomaci!”, ka shkruar Çitaku.