Author: K.B.

Përparim Gruda i Partisë Demokratike të Kosovës e ka cilësuar “anti-kushtetues” vendimin e qeverisë për shkarkimin e përbërjes së Komisionit për Dhënien e Provimit të Jurisprudencës.

Gruda, në një mbledhje të Komisionit për Legjislacion të martën, ka thënë se shkarkimi i kësaj trupe është anti-kushtetues. Ka thënë se për këtë çështje tashmë ekziston një precedent.

“Nëse i keni larguar ata prej detyre, është një vendim i Gjykatës Kushtetuese për rastin e Bordit të RTK-së kur ia ka kthyer kësaj shumice, a dini çfarë ka thënë? Vendimi duhet të përmbajë arsyet individuale për secilin për shkarkim. Nuk mund t’i shkarkosh kolektivisht sepse sot po flasim edhe dinjitetin e atyre veç e veç (anëtarëve të Komisionit)”, tha Gruda.

Ai e quajti të çuditshëm vendimin e Ministrisë së Drejtësisë për shkarkimin e përbërjes së kaluar të Komisionit për Provimin e Jurisprudencës dhe emërimin në krye të këtij komisioni të kryesuesit të Këshillit Prokurorial, Arian Gashi, të dyshuar për lidhje me Lëvizjen Vetëvendosje.

“Ndërrimi kaq i çuditshëm, më shumë lë shije që dikush s’ka kalu [provimin e jurisprudencës, v.j] sesa që s’u mbajt provimi”, tha deputeti i Partisë Demokratike. “Mos me shkru asnjë fjalë arsyetim, kjo veç në diktaturë në ndodhë. Vendim që afeton të drejtat e njeriut dhe nuk ka arsyetim, kjo vetëm në diktaturë ndodh. Çdo vendim që afekton të drejtat dhe liritë e njeriut duhet të arsyetohet saktë”.

Deputeti i Vetëvendosjes, anëtari i Komisionit për Legjislacion, Vigan Qorrolli tha se arsyeja e shkarkimit të komisionit është mosorganizimi i afateve të Provimit të Jurisprudencës.

“Komisioni ka dështuar të mbajë provimin e jurisprudencës për një vit rresht për arsye të mosbesimit të thellë të kandidatëve që i janë nënshtruar këtij provimi. Unë e kam dëgjuar ministren e Drejtësisë duke e arsyetuar këtë qëndrim dje dhe duke qenë se kredibiliteti i Komisionit në ikje është cenuar… edhe personat në shkuarje, edhe personat në ardhje, janë persona të cilët besohet se do ta rrisin kredibilitetin”, tha Qorrolli.

“Për një vit rresht ky komision nuk e ka mbajtur provimin dhe janë me mijëra kandidatë të cilët e kanë paraqitur provimin dhe nuk po arrijnë t’i nënshtrohen provimit”, sipas Qorrollit.

Komisioni për Provimin e Jurisprudencës, me në krye kryegjyqtarin e Gjykatës Supreme, Fejzullah Rexhepin u shkarkua rreth tetë muaj para skadimit të mandatit që i garantohet me Ligj.

Më shumë se 71 miliardë dollarë do të nevojiten gjatë 10 viteve të ardhshme për rimëkëmbje dhe rindërtim në Gaza pas luftës së Izraelit në këtë territor, thotë një raport i ri.

Në Vlerësimin e tyre të Shpejtë të Dëmeve dhe Nevojave në Gaza (RDNA), të publikuar të hënën, Bashkimi Evropian dhe Kombet e Bashkuara pohuan se konflikti ka pasur një “ndikim katastrofik në zhvillimin njerëzor” dhe e ka lënë enklavën në nevojë të madhe për shuma të mëdha parash në të ardhmen e afërt.

Raporti zbuloi se 26.3 miliardë dollarë do të kërkohen në 18 muajt e parë të rindërtimit të Gazës për të rivendosur shërbimet thelbësore, për të rindërtuar infrastrukturën kritike dhe për të mbështetur rimëkëmbjen e saj ekonomike.

“Dëmet fizike të infrastrukturës vlerësohen në 35.2 miliardë dollarë, me humbje ekonomike dhe sociale që arrijnë në 22.7 miliardë dollarë”, tha një deklaratë e përbashkët nga sponsorët e raportit, shkruan Al Jazeera, përcjell Telegrafi.

Gaza është nën një “armëpushim” të brishtë që u ra dakord në tetor.

Marrëveshja, për të cilën ushtria izraelite akuzohet se e ka shkelur vazhdimisht, pasoi dy vjet konflikti shkatërrues të shkaktuar nga sulmet e udhëhequra nga Hamasi më 7 tetor 2023 në Izraelin jugor.

Reagimi izraelit – i dënuar gjerësisht – ka vrarë më shumë se 72,500 njerëz, sipas Ministrisë së Shëndetësisë së Gazës.

Të paktën 777 njerëz janë vrarë që kur hyri në fuqi “armëpushimi”, sipas ministrisë, me 32 vrasje që kanë ndodhur vetëm që nga fillimi i prillit.

Zyra e Medias së Qeverisë së Gazës tha se Izraeli ka kryer 2,400 shkelje të “armëpushimit”. Këto përfshijnë vrasje, arrestime, bllokada dhe “politika urie”.

Prokuroria Themelore në Pejë, ka bërë të ditur se përgjatë tre muajve të parë të 2026-ës, ka ndaluar gjithsej 107 persona për vepra të ndryshme penale.

Nga departamenti i krimeve të rënda, departamenti i përgjithshëm dhe për të mitur, prokurorët e shtetit, ka ndaluar gjithsej 107 persona në kohëzgjatje prej 48 orësh për lloje të ndryshme të veprave penale nga Kodi Penal i Republikës së Kosovës.

Sipas njoftimit zyrtar, mesatarja për muaj e ndalimit të personave për 48 orë është 36 persona të ndaluar për një muaj pune.

“Prokuroria Themelore në Pejë, mbetet e përkushtuar në luftimin e dukurive negative gjithë atyre personave që bien ndesh me ligjin komfor dispozitave ligjore”.

Një foto që po qarkullon në rrjetet sociale, ku një ushtar izraelit shihet duke goditur me çekan një statujë të Jezusit në jug të Libanit, ka shkaktuar reagime të shumta nga figura politike dhe fetare ndërkombëtare. Autoritetet izraelite dhe ushtria kanë pranuar autenticitetin e pamjes dhe kanë deklaruar se rasti është duke u hetuar.

Sipas banorëve lokalë, statuja ndodhej mbi një kryq jashtë një shtëpie familjare në periferi të fshatit Debel, një nga zonat ku ende jetojnë civilë, pavarësisht luftës mes Izraelit dhe Hezbollahut. Kryetari i komunitetit lokal, prifti Fadi Flaifel, e ka cilësuar aktin si të papranueshëm dhe si një shkelje të rëndë të simboleve fetare, duke theksuar se veprime të tilla kanë ndodhur edhe më parë në zonë.

Ai ka deklaruar se “dëmtimi i kryqit dhe i simboleve të shenjta bie ndesh me parimet e të drejtave të njeriut dhe nuk përfaqëson qytetërimin”. Këto deklarata janë shoqëruar me thirrje për respekt të ndërsjellë ndërfetar në një rajon tashmë të tensionuar.

Ushtria izraelite (IDF) ka konfirmuar se po heton incidentin dhe ka thënë se sjellja e ushtarit është “plotësisht në kundërshtim me vlerat dhe standardet e pritura nga forcat e saj”. Sipas deklaratës zyrtare, do të merren masa disiplinore ndaj personave të përfshirë dhe po punohet gjithashtu me komunitetin e krishterë për restaurimin e statujës.

Ngjarja ka nxitur reagime edhe në nivel ndërkombëtar. Zyrtarë amerikanë dhe analistë politikë kanë kërkuar masa ndaj incidentit, duke e cilësuar atë si të papranueshëm. Debati është zgjeruar më tej në SHBA, ku disa figura politike kanë kritikuar aleancën me Izraelin.

Në të njëjtën kohë, kryeministri izraelit Benjamin Netanyahu ka reaguar duke shprehur tronditje dhe keqardhje për ngjarjen, ndërsa ministri i jashtëm Gideon Saar ka kërkuar falje për ndjesitë e lënduara të komunitetit të krishterë. Ai theksoi se Izraeli respekton lirinë e fesë dhe nuk e toleron këtë lloj sjelljeje.

Incidenti ndodh në një periudhë tensioni të lartë në kufirin jugor të Libanit, ku përplasjet mes Izraelit dhe Hezbollahut kanë vijuar prej muajsh, duke shkaktuar viktima dhe zhvendosje të mëdha të popullsisë. Të dyja palët kanë akuzuar njëra-tjetrën për shkelje të marrëveshjeve të armëpushimit dhe për përshkallëzim të situatës.

Ndërkohë, organizata ndërfetare dhe studiues të marrëdhënieve fetare në rajon kanë paralajmëruar për një rritje të tensioneve dhe të qëndrimeve ekstremiste, duke theksuar nevojën për mbrojtje më të fortë të vendeve dhe simboleve fetare.

Kryetari i Prishtinës, Perparim Rama, i është përgjigjur një komenti të një qytetareje e cila është ankuar për gjendjen e ambientit në kryeqytet.

Rama i është përgjigjur duke i treguar se kanë caktuar vendin për hedhjen e mbeturinave, përfshirë për ato të ngurta dhe gjithashtu është vendosur numri në dispozicion për të bërë bartjen e tyre.

Kreu i Prishtinës ka thënë se nuk mund të mbajnë edhe kurse për atë se si duhet të sillen qytetarët.

“Ne po mundohemi me kriju lehtesira dhe siguri per investitore. Po mundohemi me i pastru edhe deponite ilegale qe po krijohen nga qytetaret. Kemi caktuar vendin ku duhet te hidhen (dysheke e joga) pervec tjerave. Kemi treguar edhe kend duhet me thirr per me bo bartjen e tyre!!!Per bese, kurse te sjelljes ne qytet nuk po mundemi me mbajt!!”, ka shkruar Rama në koment.

Kosova ka hyrë në javën e fundit kushtetuese për zgjedhjen e Presidentit, ndërsa dështimi për të arritur një marrëveshje rrezikon ta çojë vendin në zgjedhje të parakohshme.

Në ditët e fundit, kryeministri dhe lideri i Lëvizjes Vetëvendosje, Albin Kurti, u ka ofruar dy partive më të mëdha opozitare, PDK dhe LDK, poste në qeveri dhe pozitën e kryetarit të Kuvendit, duke këmbëngulur që posti i Presidentit të mbetet në duart e VV-së. Megjithatë, ofertat janë refuzuar nga opozita.

Bekim Çollaku, ish-ministër i Jashtëm i Kosovës tha në një intervistë për Euronews Albania se Kurti nuk pasur asnjëherë qëllim të përfshihet në negociata serioze me opozitën.

Sipas tij, qëllimisht e ka lënë çështjen e presidentit për në fund pas votoi qeverinë, me shpresën për të arritur ndonjë “pazar me opozitën”.

“Ka qenë qëllim strategjik i Kurtit që të arrijnë në këtë situatë dhe ka pasur mungesë vullneti politik nga Kurti për të bërë marrëveshje të mirëfilltë politike me ndonjë nga subjektet politike. Sikur të kishte një vullnet minimal për partner qeverisës menjëherë pas zgjedhjeve të vitit të kaluar, duhet të kishte ftuar në biseda serioze një nga subjektet dhe të bisedonin për ndarje të qeverisjes. Ai ka thënë që nuk ka nevojë për partner qeverisjeje, ka votuar qeverinë dhe e ka lënë çështjen e presidentit qëllimisht në fund, ndoshta me mendimin që partitë opozitare nuk do kenë zgjidhje tjetër përveçse të pranojnë ndonjë ofertë të pazareve të orëve të fundit, por llogaritë i kanë dalë keq”, tha Çollaku.