Author: K.B.

Ish-presidentja e Kosovës, Vjosa Osmani, ka vizituar sot familjen e Afrim Bunjakut, policit të Kosovës që ra heroikisht në Banjskë.

Kjo vizitë e Osmanit ka ndodhur pas vendimit që është marrë sot nga Gjykata Themelore e Prishtinës, e cila ka dënuar me burgim të përjetshëm dy prej të akuzuarve për sulmin, dhe një të tretë me 30 vite burg.

Në bisedë e sipër në familjen e Afrim Bunjakut, një prej familjarëve flet pak me Osmanin edhe për politikë.

Ai ankohet se dikush ishte gati t’i prishte raportet e Kosovës me miqtë, por një gjë e tillë s’ndodhi falë Osmanit.

“Edhe me miqtë tanë mos të ishte ti, gati na prishën vallahi. Po vallahi”, shprehet një nga familjarët në shtëpinë e Afrim Bunjakut gjatë bisedës me Osmanin.

Avokati kosovar, Arianit Koci, në një intervistë në FRONTAL të T7 ka folur për vendimin e Gjykatës Themelore të Prishtinës për dënimin e tre anëtarëve të grupit terrorist të Milan Radojcicit.

Koci ka thënë se pjesëtarët tjerë të grupit të Radojçiqit s’mund të dalin jashtë Serbisë, meqë ata tashmë janë në kërkim ndërkombëtar.

Berat Rukiqi nga Lidhja Demokratike e Kosovës, ka reaguar ndaj kryeministrit Albin Kurti, pasi që ky i fundit fajësoi partitë opozitare që vendi po shkon drejt zgjedhjeve.

Rukiqi, në reagimin e tij, i ka kërkuar Kurtit që të mos e kërkojë fajin askund, nëse ai ‘’s’din me punu me tjerë dhe me qenë i gatshëm për marrëveshje’’.

Postimi:

Kryeministër

Republika dhe aftësia me qeverisë nuk është matematikë e %.

Edhe 51% me i pas, prapë s’po din me qeveris. Kjo s’osht punë numrash, po punë zotësie.

Kur nuk din me i bo punët, ma lehtë osht me i fajsu tjerët. Këtë e ka ba zanat.

Nuk është kjo Republikë për me i pas krejt pushtetet një parti.

Kështu s’funksionon ky shtet

Nëse s’din me punu me tjerë dhe me qenë i gatshëm për marrëveshje. mos e lyp fajin tjetërkund.

Ministria e Kulturës dhe Turizmit, ka njoftuar se sot kanë nisur punimet për restaurimin e Xhamisë së Vjetër të Orllanit, një nga objektet me vlera historike dhe kulturore në Komunën e Podujevës.

Në ceremoninë e fillimit të punimeve ishte e pranishme ministrja Saranda Bogujevci me bashkëpunëtorë, kryetari i Komunës së Podujevës, Shpejtim Bulliqi e kryeimami i Bashkësisë Islame të Kosovës, Vedat Sahiti.

“Xhamia e Vjetër e Orllanit është ndërtuar fillimisht në shekullin XVIII, ndërsa struktura ekzistuese daton nga vitet ’60. Ajo u dogj tërësisht gjatë luftës së fundit në vitin 1999 dhe mbeti për vite në gjendje të rënduar”, u tha në njoftimin e Ministrisë.

Sipas njoftimit, projekti për restaurimin e kësaj xhamie do të jetë me vlerën rreth 500 mijë euro.

Policia e Kosovës, ka njoftuar se, disa zyrtarë policorë nga Njësiti për Dronë dhe Antidronë kanë përfunduar me sukses trajnimin për ngritje të kapaciteteve.

Në njoftimin e PK’së, njoftohet edhe se, trajnimi është zhvilluar gjatë periudhës mars – prill, në kohëzgjatje prej dy javësh dhe është organizuar në dy faza, ku faza e parë, e mbajtur nga 23 deri më 27 mars, ka shërbyer si fazë përgatitore, duke u fokusuar në aspektin akademik dhe zhvillimin e kurrikulës për instruktorët e rinj. Ndërkaq, faza e dytë, e realizuar nga 13 deri më 24 prill, ka përfshirë trajnimin e trajnerëve (TiT) si dhe njëkohësisht trajnimin bazik për kandidatët e rinj, përcjell Gazeta Express.

‘’ Trajnimi është mbajtur në Kampin e Njësive Speciale “Vrella”, në afërsi të Aeroportit të Prishtinës dhe është realizuar në përputhje me agjendën e paraparë dhe objektivat e përcaktuara’’, thuhet mes tjerash.

Postimi:

Zyrtarët policorë nga Njësiti për Dronë dhe Antidronë përfunduan me sukses trajnimin për ngritje të kapaciteteve

Zyrtarë policorë të Njësisë për Dronë dhe Antidronë kanë përfunduar me sukses trajnimin për trajnerë (TiT) për përdorimin e dronëve, i cili është realizuar në kuadër të mbështetjes nga Projekti HAPE, me qëllim të ngritjes së kapaciteteve të Njësisë për Dron dhe Antidronë.

Trajnimi është zhvilluar gjatë periudhës mars – prill, në kohëzgjatje prej dy (2) javësh dhe është organizuar në dy faza. Faza e parë, e mbajtur nga 23 deri më 27 mars, ka shërbyer si fazë përgatitore, duke u fokusuar në aspektin akademik dhe zhvillimin e kurrikulës për instruktorët e rinj. Ndërkaq, faza e dytë, e realizuar nga 13 deri më 24 prill, ka përfshirë trajnimin e trajnerëve (TiT) si dhe njëkohësisht trajnimin bazik për kandidatët e rinj.

Në kuadër të këtij aktiviteti, janë certifikuar gjithsej dymbëdhjetë (12) pjesëmarrës, përkatësisht:

gjashtë (6) pjesëmarrës (pesë zyrtarë policorë dhe një zyrtar doganor) kanë përfunduar me sukses trajnimin e trajnerëve (TiT), duke fituar kompetencat e nevojshme për të zhvilluar trajnime të mëtejshme brenda institucioneve përkatëse;gjashtë (6) zyrtarë policorë kanë përfunduar trajnimin bazik për përdorimin e dronëve.

Trajnimi është mbajtur në Kampin e Njësive Speciale “Vrella”, në afërsi të Aeroportit të Prishtinës dhe është realizuar në përputhje me agjendën e paraparë dhe objektivat e përcaktuara.

Ky aktivitet përfaqëson një hap të rëndësishëm drejt fuqizimit të kapaciteteve të brendshme trajnuese dhe garanton qëndrueshmëri në zhvillimin e mëtejmë të aftësive profesionale në fushën e përdorimit të dronëve, si në Policinë e Kosovës ashtu edhe në Doganat e Kosovës.

Shfrytëzojmë rastin të shprehim mirënjohjen dhe falënderimin tonë për instruktorët francezë për profesionalizmin dhe kontributin e tyre gjatë realizimit të këtij trajnimi, si dhe për Projektin HAPE për mbështetjen dhe mundësinë e ofruar në zhvillimin e këtyre kapaciteteve.

Jehona Lushaku-Sadriu, deputete dhe shefe e grupit parlamentar të Lidhjes Demokratike të Kosovës, ka reaguar ndaj Xhevdet Pozharit pasi që ky i fundit tha se, deputetja e ka shitur një banesë 9 milionë euro.

Lushaku-Sadriu, në postimin e saj, e ka cilësuar ‘’shpifje’’ deklarimin e Pozharit, duke thënë se ky i fundit është ‘’propagandues’’.

‘’ Ky propagandues, që sot shpif mbi gabime teknike (për të cilën Agjencia Kundër Korrupsionit është njoftuar) bëhet me qëllim dhe vetëdije të plotë.’’, ka thënë ajo mes tjerash.

Postimi:

Paska shpifur sërish propaganduesi i Vetëvendosjes, Xhevdet Pozhari duke u munduar që me gënjeshtra të mbulojë pamundësinë që ta rehatoj gruan e tij në Gjykatën Kushtetuese.

Të dashur qytetarë,

Në deklarimin tim të pasurisë kam deklaruar një transfer nga shitja e banesës që e kemi pasur si familje në Qerret në vlerë prej 94 mijë eurosh, e jo 9 milionë siç po mashtron qëllimshëm dhe me vetëdije propaganduesi Pozhari.

Në gazetar profesionist do të konfirmonte informacionin dhe hiq pa konfirmim, do të ia merrte mendja që një banesë nuk ka mundësi me kushtu 9 milionë!

Ky propagandues, që sot shpif mbi gabime teknike (për të cilën Agjencia Kundër Korrupsionit është njoftuar) bëhet me qëllim dhe vetëdije të plotë.

Mjerë vendi kur njerëz të tillë, me qëllim të pastër propagandistik, ndërtojnë narrativa mbi pavërtetësi, vetëm për të larguar vëmendjen nga realiteti me të cilin përballen qytetarët çdo ditë.

Një oficer i Forcës së Sigurisë së Kosovës ka përfunduar me sukses një nga trajnimet më sfiduese të këmbësorisë në Ushtria Britanike.

Bëhet fjalë për nëntogerin Endi Sherifi, i cili ka përmbyllur kursin PCBC (Platoon Commander Battle Course), të mbajtur në Brecon, Uells, në Mbretëria e Bashkuar.

Sipas njoftimit të FSK-së, gjatë këtij kursi intensiv, oficeri kosovar ka treguar nivel të lartë përkushtimi dhe profesionalizmi.

“ Gjatë këtij kursi intensiv, ai ka demonstruar përkushtim të lartë, profesionalizëm dhe aftësi të shkëlqyera udhëheqëse”, thuhet në njoftim.

Për performancën e tij, Sherifi është vlerësuar me Mirënjohje të Veçantë nga komandanti i Shkollës së Këmbësorisë, çmim që iu dorëzua nga Carl Boswell, Shef i Shtabit të Forcave Tokësore.

“Si rezultat i performancës së tij, Nëntoger Sherifi është vlerësuar me Mirënjohje të Veçantë”, thekson më tej njoftimi.

FSK-ja ka shprehur krenari për arritjet e pjesëtarëve të saj në arenën ndërkombëtare.

“Forca e Sigurisë së Kosovës është krenare për arritjet e pjesëtarëve të saj, të cilët vazhdojnë të përfaqësojnë denjësisht vendin dhe të ngritin standardet profesionale të forcës sonë”, thuhet në njoftim.