Author: K.B.

Seanca për zgjedhjen e presidentit të Kosovës u ndërpre mbrëmë për shkak të mungesës së kuorumit, ndërsa pritet të vazhdojë sot në orën 10:00, mes përplasjeve të forta politike për ligjshmërinë e procesit.

Në raundin e parë të votimit morën pjesë 64 deputetë. Kandidatja Feride Rushiti mori 63 vota, ndërsa një votë rezultoi e pavlefshme. Kandidatja tjetër, Hatixhe Hoxha, nuk arriti të sigurojë asnjë votë.

Shefja e Grupit Parlamentar të Lëvizjes Vetëvendosje, Arbërie Nagavci, deklaroi se propozimi i dy kandidateve erdhi në mungesë të alternativave nga opozita.

“Në mungesë të iniciativave nga partitë tjera, kemi vazhduar me dy nominime të reja, me dy aktiviste, gra të denja dhe profesioniste, në mënyrë që të vazhdojmë procesin dhe të shmangim zgjedhje të reja”, tha Nagavci.

Ajo theksoi se seanca kishte kuorum për nisje.

“Kemi pasur kuorum për të filluar seancën e jashtëzakonshme, sepse seanca ftohet me 40 nënshkrime. Ishin të pranishëm më shumë se 61 deputetë për të filluar seancën”, tha ajo.

Sipas saj, në sallë ishin 64 deputetë dhe asnjë nga opozita nuk kishte njoftuar për mungesën.

“U pa që zonja Feride Rushiti kishte mbështetjen e deputetëve, me 63 vota nga deputetët e pranishëm”, shtoi ajo, duke i ftuar deputetët opozitarë që të marrin pjesë në vazhdimin e seancës.

Në anën tjetër, opozita e ka cilësuar procesin si antikushtetues.

Kryetari i PDK-së, Bedri Hamza, tha se zhvillimet përbëjnë “puç kushtetues”.

“Po vërehet që kjo kohë vendin po e kalon në një situatë bukur komplekse, por sonte mosserioziteti dhe papërgjegjshmëria e kanë mbërritur kulmin. Ky është një puç kushtetues”, deklaroi ai.

Hamza insistoi se Kushtetuta kërkon prezencën e 80 deputetëve për votim.

“Kushtetuta është e qartë, duhet të jenë 80 deputetë prezentë në sallë dhe të votojnë që të konsumohet raundi i parë”, tha ai, duke shtuar se procedura është zhvilluar në kundërshtim me rendin kushtetues.

Edhe kryetari i LDK-së, Lumir Abdixhiku, kritikoi zhvillimet, duke i cilësuar si të rënda për demokracinë.

“Është një natë bukur e rëndë për Republikën e Kosovës… një rast pa precedent, jodemokratik dhe antikushtetues”, tha ai.

Abdixhiku theksoi se zgjedhja e presidentit duhet të bëhet përmes marrëveshjes politike.

“E vetmja mënyrë për të zgjedhur presidentin është nëpërmjet një marrëveshjeje politike”, u shpreh ai, duke bërë të ditur se LDK ka siguruar 15 nënshkrime për kandidatin e saj.

Ndërkohë, shefi i grupit parlamentar të AAK-së, Besnik Tahiri, e cilësoi seancën si “sulm ndaj Kushtetutës”.

“Ky akt shënon një ndër shkeljet më të mëdha kushtetuese dhe një sulm të drejtpërdrejtë ndaj rendit kushtetues”, deklaroi ai, duke e quajtur situatën edhe “tentim për grusht-shtet”.

Një deputet i Lëvizjes Vetëvendosje është fotografuar nga Ekonomia Online gjatë seancës së jashtëzakonshme për zgjedhjen e presidentes, teksa dërgonte një mesazh lidhur me zhvillimet në këtë proces.

Në mesazhin e dërguar, deputeti ka përdorur edhe shprehjen “karate”, duke përmendur më pas edhe mundësinë e interpretimit nga Gjykata Kushtetuese lidhur me situatën e krijuar në seancë.

“Po e zgjedhim “karate”, pastaj të shofim çfarë thotë Kushtetusja”, ka shkruar ai.

E, lidhur me këtë mesazh të deputetit të VV-së, Ekonomia Online ka pyetur edhe shefen e grupit parlamentar të këtij subjekti politik, Arbërie Nagavcin.

Ajo, ka thënë se nuk mund të jep përgjigje në lidhje me këtë çështje, duke shtuar se nuk ka pare se çfarë është shkruar në atë mesazh.

“Tani unë nuk di çfarë kanë shkruar aty apo çfarë raportimi, nuk mund të jap përgjigje për gjërat që nuk i kam parë”, tha ajo.

Sot në Kosovë pritet të mbajë mot i ngrohtë, me diell dhe vranësira lokale të cilat rrallë në disa rajone kryesisht kodrinore-malore do të kushtëzojnë rrebeshe të izoluara shiu.

Temperaturat do të lëvizin nga 5 minimalja deri në 25 gradë Celsius ajo maksimale.

Deputeti i PDK-së, Artan Behrami, tha se LVV-ja po tenton që të prodhojë “artificialisht fajtorë të paqenë” për një proces, që sipas tij, vetë Qeveria është përgjegjëse.

“Paramendo, i ka pasur 75 ditë që nga seanca e parë konstituive për të gjetur konsensus për një emër të presidentit”, shkroi ai në Facebook.

“Qeveria e minutave të fundit, e territ dhe izolimit po mundohet të prodhojë artificialisht fajtorë të paqenë për një proces që përgjegjës është vetë!”, vijon ai.

Kuvendi i Kosovës ka filluar propozuar për zgjedhjen e Presidentit

Emrat e propozuar për President ishin Feride Rushiti dhe Hatixhe Hoxhën.

Komisioni për këtë çështje u votua pasi ishin 64 deputetë në sallë.

Për t’u përmbushur kuorumi në dy raunde nevojiten 80 deputetë në sallë.

Derisa seanca për zgjedhjen e Presidentit po vonohet, deputetja e Partisë Demokratike të Kosovës , Eliza Hoxha, ka ngritur dyshime serioze mbi ligjshmërinë e procedimit të kandidaturave të reja nga Lëvizja Vetëvendosje.

Përmes një reagimi në “Facebook”, Hoxha ka drejtuar pyetje direkte ndaj Kryeministrit Albin Kurti, duke pretenduar se nënshkrimet e përdorura për kandidatët e kaluar nuk mund të riciklohen për emrat e rinj Feride Rushitin dhe Hatixhe Hoxhën.

“Shumë po më intereson ku i ka Kurti 30 + 30 nënshkrime të reja për këto dy kandidatura për presidente… Sepse 60 nënshkrime veç i ka shpenzu, u tërhoqën kandidatët e kaluar apo jo – nëshkrimet e njëjta nuk vlejnë për të nominuar kandidatë të rinj”, ka shkruar deputetja Hoxha.

Sipas saj, kjo lëvizje e mazhorancës është një tentativë për të “blerë kohë” dhe përbën një akt tjetër kundërkushtetues.

Ajo e ka cilësuar Kurtin si “mashtrues par excellence”.