ATV

Author: K.B.

  • Prokuroria në Pejë: 100 raste ndërmjetësimi brenda 4 muajve, 4 mijë euro detyrim për të dyshuarit

    Prokuroria në Pejë: 100 raste ndërmjetësimi brenda 4 muajve, 4 mijë euro detyrim për të dyshuarit

    Prokuroria Themelore në Pejë ka njoftuar opinionin publik se gjatë periudhës janar-prill ka shënuar progres në trajtimin e procedurave alternative.

    Sipas njoftimit, janë regjistruar gjithsej 100 raste të procedurave të ndërmjetësimit me 183 persona të përfshirë.

    Në tri raste ku është bërë pezullimi i përkohshëm i procedurës, të dyshuarit janë detyruar të deponojnë 4.000 euro në xhirollogarinë e fshatit Sos.

    Po ashtu, në kuadër të marrëveshjeve për pranimin e fajësisë, gjatë kësaj periudhe janë arritur 4 marrëveshje të pranimit të fajësisë nga 4 persona.

    Ndërkohë, në rastet ku ndjekja penale nuk është e detyrueshme, për katër muajt e parë të vitit janë trajtuar 2 raste ndaj 2 personave, thuhet në njoftimin e Prokurorisë Themelore në Pejë.

  • Përparim Rama merr vendim për ndryshimin e qarkullimit të mjeteve në Dardani

    Përparim Rama merr vendim për ndryshimin e qarkullimit të mjeteve në Dardani

    Bazuar në vendimin e Kryetarit të Kryeqytetit të Prishtinës, nga sot është bërë ndryshimi i qarkullimit të mjeteve motorike në rrugën “Ilaz Kodra”, në lagjen Dardania, duke e kthyer këtë rrugë në gjendjen e mëparshme të qarkullimit pas përfundimit të punimeve dhe riparimeve infrastrukturore në këtë zonë.

    Rruga “Ilaz Kodra” do të jetë me një kah të qarkullimit, duke filluar nga kryqëzimi me rrugën “Sali Çeku”, në drejtim të rrugëve “28 Nëntori” dhe “Ise Boletini”. Rrugët “28 Nëntori” dhe “Ise Boletini” vazhdojnë të jenë me dy kahje të qarkullimit.

    Këto ndryshime janë bërë me qëllim të përmirësimit të rrjedhës së trafikut dhe rritjes së sigurisë në këtë zonë, si dhe pas përfundimit të punimeve infrastrukturore.

  • Mësimdhënësi dyshohet për ngacmim seksual ndaj nxënëses në Klinë, pritet masa e paraburgimit

    Mësimdhënësi dyshohet për ngacmim seksual ndaj nxënëses në Klinë, pritet masa e paraburgimit

    Një mësimdhënës është ndaluar për 48-orë nën dyshimin se ka ngacmuar përmes mesazheve me përmbajtje seksuale një nxënëse në qytetin e Klinës.

    Siç mëson Klankosova, ndaj tij pritet të caktohet masa e paraburgimit.

    Sakaq, në raportin 24-orësh, thuhet se rasti dyshohet se ka ndodhur më 30 prill të këtij viti, ndërsa viktima e ka raportuar në polici më 3 maj.

  • Gati dy mijë gjoba për 24 orë ndaj shoferëve që s’respektuan rregullat në trafik

    Gati dy mijë gjoba për 24 orë ndaj shoferëve që s’respektuan rregullat në trafik

    Gjatë 24-orëve të fundit, siguria në trafik dhe rendi publik në vend vazhdojnë të mbeten sfidë, pavarësisht angazhimit të vazhdueshëm të Policisë së Kosovës në zbatimin e ligjit dhe parandalimin e incidenteve. Statistikat e publikuara tregojnë për dhjetëra aksidente trafiku dhe një numër të lartë gjobash të shqiptuara ndaj shkelësve

    Gjatë 24-orëve të fundit, sipas statistikave zyrtare të Policisë së Kosovës, në vend janë regjistruar gjithsej 41 aksidente trafiku.

    Prej tyre, 25 aksidente kanë përfunduar me persona të lënduar, ndërsa 16 të tjera kanë shkaktuar vetëm dëme materiale.

    Nuk është raportuar asnjë aksident me fatalitet.

    Në kuadër të aktiviteteve të sigurisë në trafik, policia ka shqiptuar 1929 tiketa trafiku ndaj shkelësve të rregullave.

    Ndërkohë, 9 persona janë arrestuar për vepra të ndryshme, ndërsa 8 prej tyre janë dërguar në mbajtje.

  • Fahrije Hoti i bashkohet Vjosa Osmanit në zgjedhje

    Fahrije Hoti i bashkohet Vjosa Osmanit në zgjedhje

    Fahrije Hoti do t’i bashkohet politikës, duke kandiduar për deputete në Kuvendin e Kosovës në zgjedhjet e 7 qershorit. Lajmi është bërë i ditur nga ish-Presidentja e Kosovës, Vjosa Osmani, përmes një njoftimi në Facebook.

    Sipas Osmanit, Hoti do të jetë pjesë e listës së kandidatëve për deputetë, duke përfaqësuar një figurë të fuqishme të grave dhe një histori të njohur të qëndresës dhe punës në Kosovë.

    “Nëse një grua vendos të ngrihet, ajo e bën këtë për të gjithë”, është shprehur Osmani, duke e cilësuar Hotin si një grua “të fortë si guri, të pastër si loti dhe punëtore si askush tjetër”.

  • Sa kohë mund të zgjatë zemra e transplantuar?

    Sa kohë mund të zgjatë zemra e transplantuar?

    Çfarë mund të presin pacientët pas transplantimit, cilët faktorë ndikojnë në jetëgjatësinë e organit dhe si mund të ruhet sa më mirë shëndeti afatgjatë

    Sa gjatë mund të zgjasë zemra e transplantuar dhe çfarë mund të presin pacientët pas transplantimit të këtij organi, e shpjegon kirurgu i transplantimit të zemrës, dr. Raymond Lee, nga University of Southern California.

    Dr. Lee tregon se çfarë mund të presin pacientët me zemër të re pas transplantimit, cilët faktorë bëjnë dallimin dhe si mund ta shfrytëzojnë sa më mirë jetën me zemrën e tyre të re.

    Çfarë mund të presë pacienti që ka zemër të transplantuar?

    “Ka shumë arsye pse zemrat e disa pacientëve zgjasin më shumë, ndërsa te disa të tjerë më pak”, thotë dr. Raymond Lee, drejtor i Programit për Transplantimin e Zemrës në University of Southern California.

    Sipas tij, jetëgjatësia mesatare e zemrës së transplantuar është rreth 10 vjet, megjithëse rezultatet ndryshojnë nga pacienti në pacient.

    Në tre muajt e parë pas transplantimit të zemrës, pacientët duhet të presin kontrolle të shpeshta mjekësore.

    “Do të thosha se ndjekja e kujdesshme gjatë tre muajve të parë është thelbësore, vetëm për t’u siguruar që pacientët nuk shfaqin shenja të refuzimit të organit. Gjithashtu sigurohemi që ata po i tolerojnë mirë barnat, që rezultatet laboratorike janë stabile dhe që rikuperimi pas operacionit, si edhe steroidet imunosupresive, nuk po ndikojnë shumë në mirëqenien e tyre emocionale”, shpjegon dr. Lee.

    Ulja e rrezikut dhe sigurimi i shëndetit afatgjatë

    Dr. Lee thotë se pacientët mund të ndërmarrin hapa për të ulur rrezikun nga komplikimet dhe për të mbështetur shëndetin afatgjatë të zemrës, si:

    • Kontrolli i sëmundjeve shoqëruese, si diabeti ose tensioni i lartë i gjakut
    • Marrja e të gjitha barnave sipas përshkrimit të mjekut
    • Kryerja e kontrolleve të rregullta te specialistët
    • Mbajtja e një stili jetese të shëndetshëm për zemrën, sipas rekomandimeve të mjekut

    Ka disa lloje specialistësh që marrësi i organit do t’i takojë gjatë këtij rrugëtimi. Në veçanti, punonjësit socialë dhe fizioterapeutët mund të bëjnë dallim të madh në përgatitjen e pacientit për operacion dhe në rikuperimin e tij.

    “Punonjësit socialë mund t’i vlerësojnë pacientët para operacionit për të parë gatishmërinë e tyre të shëndetit mendor për rrugën që i pret, ose për të parë nëse pacienti ka mbështetje sociale. Pas transplantimit, ata mund të vazhdojnë të ndihmojnë në respektimin e terapisë me barna ose në luhatjet e humorit që mund të shkaktohen nga steroidet”, thekson dr. Lee.

    Pacientët mund të vazhdojnë të jenë plotësisht aktivë pas transplantimit

    Sa u përket fizioterapeutëve, ata mund ta ndihmojnë kirurgun e transplantimit të krijojë një pasqyrë më të qartë për gjendjen fizike të pacientit gjatë përgatitjes për një ndërhyrje të madhe. Fizioterapeutët e specializuar për transplantimin e zemrës mund të ndihmojnë shumë edhe në rehabilitim.

    Për rikuperim nevojitet bashkëpunimi i disa profesionistëve shëndetësorë.

    Familja dhe miqtë mund të kenë rol shumë të rëndësishëm në kujdesin në shtëpi pas operacionit, në mbështetjen emocionale, madje edhe në ndihmën që pacientët t’i përmbahen orareve ndonjëherë të lodhshme të marrjes së barnave.

    Dr. Lee thotë se shumë nga pacientët e tij vazhdojnë të jenë plotësisht aktivë, ndërsa disa madje bëhen edhe sportivë.

    “Kemi kryer transplantime te njerëz të të gjitha moshave. Kam parë disa prej tyre duke vrapuar 5 kilometra dhe maratona. Shumë prej atyre që na vijnë nga ishujt e Paqësorit janë surfistë. Me kujdesin e duhur pas transplantimit, me zgjedhje të shëndetshme të stilit të jetesës dhe me respektim të terapisë, shumë pacientë me transplantim të zemrës mund të vazhdojnë të jetojnë një jetë aktive dhe të përmbushur”, thekson dr. Lee.

  • Aksidenti tragjik, pezullohen nga detyra krerët e Policisë së Durrësit

    Aksidenti tragjik, pezullohen nga detyra krerët e Policisë së Durrësit

    Policia e Shtetit ka pezulluar nga detyra tre drejtues të lartë të Policisë në Durrës, pas aksidentit të rëndë të ndodhur një ditë më parë, ku humbën jetën dy të mitur dhe u plagos një tjetër.

    Vendimi është marrë nga Drejtori i Përgjithshëm i Policisë së Shtetit, Skender Hita, i cili, në zbatim të rregullores, ka argumentuar pezullimet me “performancë të dobët në përmbushjen e detyrave”.

    Të pezulluarit janë: drejtori i Drejtorisë Vendore të Policisë Durrës, Afrim Tafa; zëvendësdrejtori për Rendin dhe Sigurinë Publike, Zija Sulaj; si dhe shefi i Sektorit të Policisë Rrugore, Kreshnik Skëndo.

    “Gjithashtu, menjëherë pas ngjarjes, Drejtori i Përgjithshëm i Policisë së Shtetit urdhëroi Drejtorinë e Policisë Rrugore për të ngritur një grup ekspertësh të cilët shkuan në vendngjarje për të analizuar shkaqet dhe rrethanat e aksidentit”, thuhet në njoftimin e policisë.

    Ndërkohë, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur hetimin disiplinor për të vlerësuar nëse ka apo jo përgjegjësi në radhët e punonjësve të Policisë, për këtë rast.

  • Dy ngjyrat e mureve që nuk duhet t’i përdorni kurrë në dhomën e gjumit

    Dy ngjyrat e mureve që nuk duhet t’i përdorni kurrë në dhomën e gjumit

    Dizajnerët e enterierit paralajmërojnë se disa nuanca mund ta bëjnë hapësirën më stimuluese, të nxisin ndjenja të forta dhe ta vështirësojnë gjumin

    Muret e dhomës së gjumit janë ndër gjërat e para që shihni kur zgjoheni në mëngjes dhe ndër të fundit para se të flini. Prandaj është e kuptueshme pse shumica e njerëzve dëshirojnë që ato të jenë të lyera me një ngjyrë që i fut butësisht në ditën e re dhe, njëkohësisht, i ndihmon të qetësohen në fund të ditës.

    Megjithatë, duket se ekzistojnë dy ngjyra që nuk e kryejnë mirë këtë rol. Vazhdoni të lexoni për të kuptuar cilat janë ato dhe cilat nuanca dizajnerët i pëlqejnë vërtet për dhomat e gjumit.

    Ngjyrat më të papërshtatshme për dhomat e gjumit

    Shumica e dizajnerëve të enterierit pajtohen se portokallia e ndezur dhe e kuqja janë dy ngjyra që nuk duhet të përdoren në dhomën e gjumit.

    “Dhomat e gjumit, në përgjithësi, duhet të jenë strehë të qeta, prandaj përpiqem të shmang lyerjen e sipërfaqeve të mëdha me ngjyra shumë stimuluese, si e kuqja e ndezur dhe portokallia”, shpjegon Madelaine Mayer, themeluese e ADROIT Architecture & Interior Design.

    Sipas Mayer, këto ngjyra shpesh lidhen me emocione të forta, si pasioni dhe zemërimi, por edhe me shenja paralajmëruese, si shenja “stop”, automjetet e zjarrfikësve dhe dritat e kuqe të semaforit.

    Megjithatë, rregullat gjithmonë mund të thyhen.

    “Kur bëhet fjalë për dhomat e gjumit të fëmijëve, nuk ka ngjyrë që nuk e kam përdorur, përfshirë edhe portokallinë dhe të kuqen”, shton Nina Seed nga Nina Seed Interiors.

    Ajo shpjegon se çelësi qëndron te përdorimi i kujdesshëm i ngjyrave të ndezura dhe në doza më të vogla. Seed thotë se tonet e forta i fut përmes detajeve në korniza dhe elemente dekorative, gjë që e konsideron zgjidhje më afatgjatë sesa lyerja e një muri të theksuar.

    A do të thotë kjo se duhet ta merrni menjëherë kovën me bojë portokalli? Jo domosdoshmërisht.

    “Një nuancë korale e ndezur mund t’i shtojë interes vizual dhe thellësi dhomës së gjumit me tone të errëta blu. Por mos e lyeni të gjithë murin me të”, thotë Mayer.

    Ngjyrat e preferuara për dhomat e gjumit, sipas dizajnerëve të enterierit

    Ekzistojnë disa ngjyra që dizajnerët i miratojnë pothuajse gjithmonë.

    “Bluja mund të jetë qetësuese, prandaj funksionon mirë, por tonet e ngrohta janë gjithmonë më të këndshme”, thotë Sarat Scales nga studioja Sarah Scales Design Studio.

  • Sukses i jashtëzakonshëm – “The Devil Wears Prada 2” kryeson me mbi 230 milionë euro

    Sukses i jashtëzakonshëm – “The Devil Wears Prada 2” kryeson me mbi 230 milionë euro

    Filmi “The Devil Wears Prada 2” ka shpërthyer duke siguruar mbi 230 milionë euro në fundjavën e parë të shfaqjes.

    Sipas të dhënave, filmi u rendit i pari në arkëtimet e Amerikës së Veriut pas debutimit, me rreth 71 milionë euro të ardhura në ShBA dhe Kanada si dhe rreth 144 milionë euro në total në mbarë botën.

    “The Devil Wears Prada 2” u shfaq në 4.150 kinema në Amerikën e Veriut dhe, sipas anketës së PostTrak, gratë përbënin rreth 76 për qind të publikut.

    Ndërkohë, 74 për qind e shikuesve thanë se do ta rekomandonin patjetër filmin te miqtë.

    Kritikat për vazhdimin kanë qenë të ndara, ndërsa në histori Anne Hathaway, në rolin e Andy Sachs, rikthehet sërish në ambientin e punës së Meryl Streep (Miranda Priestly) në revistën “Runway”.

    Produksioni i filmit ka kushtuar rreth 92 milionë euro, shumë më tepër se buxheti i filmit të parë të vitit 2006, i cili ishte rreth 32 milionë euro.

    Regjisori David Frankel ka thënë për AP se, pasi paguhen yjet më të mëdha të filmit, për xhirimet në fund mbetet praktikisht i njëjti buxhet si te filmi i parë.

    Meryl Streep, Anne Hathaway, Emily Blunt dhe Stanley Tucci e kanë promovuar filmin për javë të tëra në Tokio, Londër dhe New York.

    Fushatës iu bashkua edhe Anna Wintour, e cila u shfaq me Hathaway në ceremoninë e Oscars dhe me Streep në kopertinën e revistës “Vogue”.

    Në vendin e dytë u rendit mjuzikali biografik “Michael”, me rreth 50 milionë euro në fundjavën e dytë të shfaqjes në Amerikën e Veriut, ndërsa fitimet e tij globale u rritën në rreth 390 milionë euro.

    Sezoni veror i kinemasë u shoqërua edhe me filmat: “The Super Mario Galaxy Movie” me rreth 11 milionë euro, “Project Hail Mary” me rreth 8 milionë euro dhe horror-i “Hokum” me rreth 5.9 milionë euro.

  • Mos i shtrydhni puçrrat në këtë pjesë të fytyrës: Pse “trekëndëshi i rrezikut” kërkon kujdes të veçantë

    Mos i shtrydhni puçrrat në këtë pjesë të fytyrës: Pse “trekëndëshi i rrezikut” kërkon kujdes të veçantë

    E ashtuquajtura zonë e rrezikut shtrihet nga hunda deri te cepat e gojës. Mjekët paralajmërojnë se infeksionet në këtë pjesë, edhe pse rrallë, mund të përhapen më thellë dhe të bëhen të rrezikshme

    Edhe pse, kur përmenden trekëndëshat, shumica mendojnë fillimisht për format gjeometrike, shenjat e komunikacionit ose ushqimet me formë trekëndëshi, në fytyrën e njeriut ekziston një zonë e veçantë që kërkon shumë kujdes.

    Bëhet fjalë për pjesën ku nuk rekomandohet të shtrydhen puçrrat, sepse në raste të rralla mund të hapet rrugë për infeksione serioze.

    Çfarë është “trekëndëshi i rrezikut” në fytyrë?

    Pjesa e fytyrës që shtrihet nga ura e hundës deri te cepat e buzëve në mjekësi njihet si “trekëndëshi i rrezikut”. Në media shpesh quhet edhe “trekëndëshi i vdekjes”, por ky është një emërtim më dramatik.

    Arsyeja pse kjo zonë konsiderohet më e ndjeshme nuk ka të bëjë me pamjen estetike, por me anatominë e enëve të gjakut, të cilat e lidhin këtë pjesë të fytyrës me struktura më të thella brenda kafkës.

    “Pjesa e fytyrës që lidh hundën me cepat e gojës konsiderohet veçanërisht e rrezikshme për shkak të afërsisë me trurin”, ka shpjeguar për revistën Health dr. Joshua Zeichner, profesor i asociuar i dermatologjisë në spitalin Mount Sinai në New York.

    Pse kjo zonë është më e rrezikshme?

    Rreziku lidhet me sinusin kavernoz, një rrjet venash që ndodhet thellë pas syve dhe merr pjesë në qarkullimin e gjakut nga zona e trurit. Ndryshe nga disa vena të tjera në trup, venat në këtë pjesë të fytyrës mund të mos kenë mekanizma të fortë mbrojtës që pengojnë kthimin e gjakut në drejtim të kundërt.

    Për këtë arsye, një infeksion që mund të shfaqet pas shtrydhjes së puçrrës, pas dëmtimit të lëkurës ose pas një shpimi të pasigurt në hundë, teorikisht mund të përhapet drejt strukturave më të thella.

    Dr. Alok Vij, dermatolog në Cleveland Clinic, paralajmëron se çdo traumë ose infeksion në këtë zonë duhet marrë seriozisht, sepse, edhe pse rrallë, mund të shkaktojë komplikime që nuk mbeten vetëm në sipërfaqe të lëkurës.

    A mund të jetë vërtet e rrezikshme shtrydhja e një puçrre?

    Mundësia që një puçërr e zakonshme të shkaktojë komplikime të rënda është e vogël. Megjithatë, mjekët theksojnë se rreziku ekziston, sidomos kur lëkura dëmtohet, puçrra shtrydhet me thonj të papastër ose kur infeksioni përhapet.

    Infeksioni i një puçrre në hundë ose në zonën përreth saj ka një rrugë më të afërt drejt strukturave të thella të kokës. Prandaj, çdo infeksion në këtë pjesë të fytyrës bart pak më shumë rrezik sesa në zona të tjera.

    Fatmirësisht, komplikimet e tilla janë të rralla, por sa herë që lëkura dëmtohet dhe vjen në kontakt me baktere, ekziston mundësia e infeksionit.

    Nga një puçërr e thjeshtë deri te komplikimet serioze

    Në raste të rralla dhe të rënda, infeksioni i fytyrës mund të çojë në trombozë septike të sinusit kavernoz. Kjo është gjendje kur formohet një mpiksje e infektuar e gjakut, e cila mund të pengojë qarkullimin normal të gjakut dhe të shkaktojë komplikime serioze.

    Ndër ndërlikimet e mundshme janë:

    • abscesi i trurit, grumbullim i qelbit që mund të shkaktojë ënjtje të indit të trurit
    • meningjiti, inflamacion i cipave mbrojtëse që rrethojnë trurin dhe palcën kurrizore
    • dëmtimi i nervave të fytyrës, përfshirë nervat që kontrollojnë lëvizjen e syve
    • goditja në tru, për shkak të çrregullimit të qarkullimit të gjakut
    • embolia septike, kur mpiksjet e infektuara mund të përhapen përmes qarkullimit të gjakut

    Shenjat që kërkojnë kujdes të menjëhershëm mjekësor

    Para zbulimit të antibiotikëve, infeksionet në këtë zonë të fytyrës konsideroheshin shumë më të rrezikshme. Sot, falë mjekësisë moderne, trajtimi është shumë më efikas, por njohja e hershme e simptomave mbetet shumë e rëndësishme.

    Shenjat që kërkojnë konsultë urgjente me mjekun janë:

    • temperaturë
    • dhimbje e fortë koke
    • ënjtje rreth syve
    • dhimbje ose skuqje që përhapet
    • vështirësi në lëvizjen e syve
    • ndjenjë e përgjithshme e rënduar, ethe ose të dridhura

    Është e rëndësishme të ndiqet gjendja e përgjithshme në ditët pas shfaqjes së një infeksioni në fytyrë, sepse shenjat e përhapjes mund të paraqiten disa ditë pas irritimit të parë.

    Nëse infeksioni fillon të zgjerohet, nëse fytyra ënjtet, shfaqen ethe, të dridhura ose ndiheni të sëmurë në gjithë trupin, duhet të kërkoni ndihmë mjekësore sa më shpejt.

    Pse nuk duhet të shtrydhen puçrrat?

    Përveç rrezikut nga infeksioni, shtrydhja agresive e puçrrave dëmton edhe vetë lëkurën. Kur ushtrohet presion me thonj, bakteret, qelizat e vdekura dhe yndyra mund të shtyhen më thellë në pore.

    Rezultati mund të jetë ënjtje më e madhe, skuqje më e fortë, dhimbje dhe inflamacion më i theksuar. Në disa raste, mund të mbeten edhe njolla të errëta ose shenja në lëkurë.

    Dr. Alok Vij këshillon që, në përgjithësi, shtrydhja e puçrrave duhet shmangur, sepse mund të shkaktojë inflamacion, hiperpigmentim pas inflamacionit, shenja dhe infeksion.

    Si të trajtohen puçrrat pa rrezik?

    Specialistët rekomandojnë metoda më të sigurta për trajtimin e puçrrave, veçanërisht në zonën e rrezikut:

    • Kompresa të ngrohta: Një leckë e pastër, e lagur me ujë të ngrohtë, mund të mbahet mbi zonën e inflamuar për 10 deri në 15 minuta. Nxehtësia mund të ndihmojë që përmbajtja të dalë më natyrshëm dhe të lehtësohet shërimi.
    • Ngjitëse për puçrra: Nëse puçrra është hapur vetë, ngjitëset për akne mund të ndihmojnë në thithjen e lëngut dhe në mbrojtjen e zonës nga bakteret e jashtme.
    • Trajtime lokale: Produkte me acid azelaik, peroksid benzoili ose acid salicilik mund të ndihmojnë në uljen e baktereve dhe yndyrës së tepërt.
    • Ndihmë profesionale: Dermatologu mund ta trajtojë ndryshimin në lëkurë në mënyrë të sigurt dhe, në raste të caktuara, të përdorë trajtime që ulin shpejt inflamacionin.

    Nëse nuk i rezistoni dot tundimit

    Më e sigurta është që puçrrat të mos shtrydhen fare, sidomos në zonën nga hunda deri te cepat e gojës. Por nëse dikush megjithatë vendos ta bëjë këtë në zona të tjera të fytyrës, duhet të ketë shumë kujdes.

    Duart duhet të lahen mirë me sapun, thonjtë duhet të jenë të shkurtër dhe të pastër, ndërsa fytyra duhet pastruar paraprakisht. Mund të përdoret edhe kompresë e ngrohtë për të zbutur lëkurën.

    Nuk duhet të përdoren thonjtë për ta çarë puçrrën. Në vend të kësaj, nëse përmbajtja nuk del lehtë me një presion shumë të butë, duhet ndalur menjëherë. Shtypja e fortë vetëm sa mund ta përkeqësojë inflamacionin dhe të rrisë rrezikun për shenja.

    Pas çdo dëmtimi të lëkurës, zona duhet mbajtur e pastër. Nëse shfaqen skuqje që përhapet, dhimbje e fortë, ënjtje, temperaturë ose gjendje e përgjithshme e rënduar, duhet kërkuar ndihmë mjekësore.