Policia e Kosovës ka njoftuar për një rast të vrasjes në tentativë në Prishtinë.
Rasti ka ndodhur të martën, në ora 00:40.
“Prishtinë / 05.05.2026 – 00:40. Është raportuar se i dyshuari mashkull kosovar ka shtënë me armë zjarri në drejtim të dy viktimave meshkuj kosovarë”, thuhet në raport.
Përveç dëmtimeve të veturës viktimat nuk janë lënduar.
Në vendin e ngjarjes janë gjetur dhe sekuestruar 4 gëzhoja, ndërkaq rasti po hetohet.
Juristja e medias, Flutura Kusari, ka njoftuar se sot bordi i RTK-së, do të mbajë mbledhje.
Në këtë mbledhje do të zgjidhet kryetari i bordit dhe do të emërohet ushtruesi i detyrës së drejtorit të përgjithshëm.
Kusari, përmes një postimi në profilin e saj në rrjetin social Facebook, ka shkruar se pavarësia e bordit të RTK-së fillon të testohet që nga sot, në orën 17:30.
Postimi i saj i plotë:
Pavarësia e bordit të RTK-së fillon të testohet që nga sot, në orën 17:30.
Bordi i RTK-së e publikoi njoftimin për mbledhje, jo tri ditë më herët, por vetëm një ditë më herët. Shnosh, kanë mujtë edhe mos me na lajmëru hiç.
Atëherë, sot mbledhja e bordit të RTK-së mbahet në orën 17:30. Do të zgjidhet kryetari i bordit dhe do të emërohet ushtruesi i detyrës së drejtorit të përgjithshëm.
Ju ftoj të mos paragjykoni derisa t’i shohim vendimet e para të bordit.
Unë, sigurisht, do të shkoj ta monitoroj dhe do t’ju mbaj të informum, tha Kusari.
Bordi i Këshillit për Akreditimin e Arsimit të Lartë (CHEA) në SHBA e ka pranuar për shtatë vjet (deri me 31.12.2033) Agjencinë e Kosovës për Akreditim, me statusin e “autoritetit akreditues” në Shtetet e Bashkuara të Amerikës.
Siç njofton kjo agjenci, në njoftimin zyrtar të dërguar Drejtorit të Përgjithshëm të AKA-së, Naim Gashi, Loretta C. Waldron, Zëvendëspresidente për Shërbime të Njohjes në Këshillin për Akreditimin e Arsimit të Lartë në SHBA, konfirmon se “Bordi i Drejtorëve të CHEA-s ka miratuar rekomandimin e Komitetit dhe e ka njohur Agjencinë e Kosovës për Akreditim si autoritet akreditues”.
Bëhet e ditur se Kosova është shteti i parë dhe i vetëm aktualisht në Evropë me këtë status të rëndësishëm në Shtetet e Bashkuara të Amerikës.
Njoftimi i plotë:
Bordi i Këshillit për Akreditimin e Arsimit të Lartë (CHEA) në SHBA e ka pranuar për shtatë vjet (deri me 31.12.2033) Agjencinë e Kosovës për Akreditim, me statusin e “autoritetit akreditues” në Shtetet e Bashkuara të Amerikës.
Në njoftimin zyrtar të dërguar Drejtorit të Përgjithshëm të AKA-së, Naim Gashi, Loretta C. Waldron, Zëvendëspresidente për Shërbime të Njohjes në Këshillin për Akreditimin e Arsimit të Lartë në SHBA, konfirmon se “Bordi i Drejtorëve të CHEA-s ka miratuar rekomandimin e Komitetit dhe e ka njohur Agjencinë e Kosovës për Akreditim si autoritet akreditues”.
Kosova bëhet shteti i parë dhe i vetëm aktualisht në Evropë me këtë status të rëndësishëm në Shtetet e Bashkuara të Amerikës.
Kjo njohje nga SHBA-të vjen më pak se një vit pasi Agjencia e Kosovës për Akreditim u regjistrua në Regjistrin Evropian për Sigurimin e Cilësisë në Arsimin e Lartë (EQAR), duke e bërë Kosovën shtetin e vetëm në Ballkanin Perëndimor me këtë status. Ky vendim vjen si rezultat i një procesi të gjerë dhe të kujdesshëm vlerësimi dhe përbën një dëshmi të
qartë të reformave të ndërmarra, profesionalizmit institucional dhe përkushtimit të vazhdueshëm të AKA- së për sigurimin e cilësisë në arsimin e lartë. Kjo njohje forcon kredibilitetin ndërkombëtar të sistemit të akreditimit në Kosovë, rrit besueshmërinë e
programeve të studimit dhe hap mundësi të reja për studentët, institucionet e arsimit të lartë dhe diasporën tonë.
Për studentët, kjo nënkupton më shumë mundësi për vazhdim të studimeve, mobilitet akademik dhe lehtësim në njohjen dhe vlerësimin e diplomave të tyre jashtë vendit.
Për institucionet e arsimit të lartë në Kosovë, ky është një nxitje e rëndësishme për thellim të
bashkëpunimit me universitetet ndërkombëtare, veçanërisht ato amerikane, si dhe për avancim të mëtejshëm të standardeve akademike dhe cilësisë së programeve studimore.
Kryetarja e Këshillit Shtetëror të Cilësisë (KShC), profesoresha Hasnije Ilazi, dhe Drejtori i Përgjithshëm Naim Gashi, shprehin mirënjohje për partnerët dhe aleatët amerikanë për këtë njohje të rëndësishme të arritjeve të saj. Po ashtu, falënderojnë të gjithë partnerët institucionalë, stafin akademik, studentët dhe shoqërinë civile për bashkëpunimin dhe mbështetjen e vazhdueshme. Ky është një moment krenarie për Kosovën dhe një hap i madh përpara për sistemin e arsimit të lartë në
vend.
Tashmë e kemi dëshmuar: Cilësia është standardi ynë!
Ministria e Industrisë, Ndërmarrësisë dhe Tregtisë ka bërë të ditur çmimet tavan për derivatet e naftës që do të jenë në fuqi gjatë ditës së sotme.
Sipas këtij vendimi, çmimi maksimal për naftën (dizel) është caktuar në 1.68 euro për litër, një cent më lirë se dje, ndërsa benzina do të tregtohet deri në 1.49 euro për litër.
Ndërkaq, çmimi i gazit është përcaktuar në 0.82 euro për litër.
Policia është deklaruar lidhur me një ngjarje të rëndë që ka ndodhur në orët e para të mëngjesit në Gjakovë, ku një person ka humbur jetën si pasojë e plagëve të marra nga një mjet i mprehtë.
Sipas njoftimit zyrtar, rreth orës 02:20, pas një mosmarrëveshjeje në rrugën “Mbretëresha Teutë”, viktima, person i moshës madhore, është sulmuar nga një tjetër person, po ashtu i rritur, i cili aktualisht ndodhet në arrati.
Fillimisht, i lënduari është dërguar për trajtim në QKMF, ndërsa më pas është transferuar në Spitalin e Përgjithshëm në Gjakovë, ku fatkeqësisht nuk ka arritur t’u mbijetojë plagëve dhe ka ndërruar jetë.
Njësitë policore kanë dalë menjëherë në vendin e ngjarjes dhe, në konsultim me Prokurorin e Shtetit, rasti është iniciuar si “vrasje”. Ndërkohë, autoritetet janë duke zhvilluar hetime intensive për zbardhjen e plotë të rrethanave të ngjarjes dhe kapjen e të dyshuarit.
“Sot, në orët e hershme të mëngjesit jemi njoftuar se një person i moshës madhore është dërguar për trajtim mjekësor si pasojë e lëndimeve të shkaktuara nga një mjet i mprehtë. Fillimisht ishte dërguar në QKMF dhe më pas në Spitalin e Përgjithshëm në Gjakovë, ku edhe ka ndërruar jetë. Bazuar në hetimet fillestare dyshohet se rreth orës 02:20 pas një mosmarrëveshje në rrugën “Mbretëresha Teutë” në Gjakovë, viktima është sulmuar nga një person, po ashtu i moshës madhore, i cili ndodhet në arrati. Njësitë kompetente policore menjëherë kanë dalë ne vendin e ngjarjes dhe, në konsultim me Prokurorin e Shtetit, është iniciuar rast “vrasje”. Aktualisht janë duke u ndërmarrë të gjitha veprimet e nevojshme operative dhe hetimore për zbardhjen e plotë të rrethanave të kësaj ngjarjeje”.
Shqiptarët kanë rritur investimet në pasuri të paluajtshme jo vetëm brenda vendit, por edhe jashtë vitet e fundit.
Sipas të dhënave zyrtare të Eurostat mbi pozicionet e Investimeve të Huaja Direkte, stoku i investimeve që rezidentët shqiptarë zotërojnë në pronat jashtë kufijve ka kapur vlerën rekord me një stok 766.5 milionë euro në fund të vitit 2023.
Siç shihet nga të dhënat në tabelën e mëposhtme fluksi ka qenë shumë i lartë në vitin 2023 me 760 milionë euro, pasi deri në vitin 2022, stoku i investimeve të shqiptarëve në pasuri të paluajtshme jashtë vendit ka qenë vetëm 6.5 milionë euro, sipas Eurostat.
Të dhënat tregojnë se shqiptarët kanë dërguar jashtë vendit rreth 760 milionë euro për blerje pronash, një vlerë kjo sa 2.5% të PBB-së së vendit. Kjo shifër dëshmon për një akumulim të lartë kapitali në duart e individëve dhe kompanive shqiptare, të cilët po e zhvendosin pasurinë e tyre jashtë.
Në krahasim me vendet e rajonit, Shqipëria paraqet një profil krejtësisht të ndryshëm dhe shumë më agresiv në raport me investimet jashtë vendit. Maqedonia e Veriut raporton shifra modeste që nuk i kalojnë 3 milionë eurot, dhe vende si Serbia apo Mali i Zi nuk kanë të dhëna të publikuara.
Ky ekspansion ngre pyetje mbi burimet e këtij likuiditeti dhe arsyet që po i shtyjnë investitorët shqiptarë të zhvendosen jashtë, pasi tregu i brendshëm është në një fazë bumi çmimesh.
Ekspertët e tregut pohojnë se ka një vale reale ku individët e pasur po blejnë prona apo shtëpi pushimi në vende si Greqia, Italia apo Spanja, nisur nga kursi i favorshëm i euros dhe rregullat më të qarta të pronësisë. Gjithashtu mësohet se ka rol përmirësimi i metodologjisë nga Banka e Shqipërisë dhe rritja e shkëmbimit të informacionit.
Gjithashtu rritja e çmimeve të pronave në vendi tonë sidomos në Tiranë ka kaluar nivelet mesatare të çmimeve ë disa zona të Mesdheut, duke shtyrë gjithnjë e më shumë kapitalin vendas jashtë.
Nëse një apartament në Tiranë kushton afërsisht sa një apartament në një qytet europian, shumë blerës zgjedhin të dytin, duke e parë si një investim me kthim më të mirë nga qiraja.
Gjithashtu grupet e mëdha të biznesit shqiptare kanë blerë asete të rëndësishme jashtë vendit, si hotele, resorte ose ndërtesa zyrash.
Nëse një kompani shqiptare blen një pronë të tillë në emër të saj, e gjithë vlera regjistrohet si investim dalës. Pronat jashtë vendit ofrojnë siguri më të madhe ligjore dhe mbrojtje nga luhatjet e mundshme të ekonomisë tonë. Monitor.al
I devijuar nga misioni i drejtësisë.
Kështu e përshkroi ish-Presidenti i Kosovës Hashim Thaçi procesin gjyqësor në Hagë ndaj tij dhe ish-krerëve të tjerë të Ushtrisë Çlirimtare të Kosovës, në një intervistë me shkrim për emisionin “Opinion” me Blendi Fevziun. Ai tha se gjykata duhet të ofrojë drejtësi dhe jo“hakmarrje të bazuar në mashtrim”.
Thaçi ka thënë se bërthama e Kosovës, duke iu referuar Ushtrisë Çlirimtare të Kosovës është subjekti i procesit të gjykimit nga Dhomat e Specializuara në Hagë por ajo po goditet rëndë e çdo ditë.
“ Kosova është subjekti i këtij procesi, pasi unë jam vetëm objekti. Bërthama e subjektit është duke u goditur ditë për ditë, rëndë e më rëndë. Por diçka harrohet. Rezistenca kosovare është pika më e lartë e identiteti kombëtar dhe shtetëror. Rezistenca ndaloi rrjedhën e mëtutjeshme të robërisë. Legjitimiteti i saj buron nga vullneti dhe qëllimi i drejtë i qytetarëve për liri. Është rrjedhojë e historisë me shkaqe e rrethana socio-ekonomike, kulturore, politiko-ushtarake, kombëtare dhe ndërkombëtare”, ka thënë Thaçi në intervistën e tij.
Thaçi shprehu besimin se, pas dëgjimit të dëshmitarëve të Prokurorisë dhe atyre të mbrojtjes, gjykatësit do të nxjerrin një vendim të drejtë dhe meritor. Ai kujtoi se ky proces nuk lidhet vetëm me fatin e tij personal, por edhe me historinë e rezistencës dhe lirisë së Kosovës.
“Në izolim po kaloj vitin e gjashtë pa vendim gjyqësor. Siç theksoi së fundmi eksperti politik amerikan Daniel Serwer, ky proces ka devijuar nga misioni. Duhet të ofrohet drejtësi e jo hakmarrje e bazuar në mashtrim. Nga ana ime, nuk kam çfarë t’i shtoj këtij konstatimi”, tha Thaçi.
“Të ishte transparent, llogaridhënës, me mekanizëm kujdestarie, të respektohej barazia e palëve, të drejtat e njeriut e, mbi të gjitha, legjislacioni i Kosovës, mbi bazën e të cilit është themeluar kjo gjykatë. Ndjekja penale të respektonte parimet themelore të kodit të etikës, që të ndiqej e vërteta kudo që të çon ajo, duke përfshirë edhe dëshmitë shfajësuese”, shtoi ai.
Thaçi u shpreh se megjithatë, beson se do të nxirret një vendim meritor dhe i drejtë në rastin e tij dhe ish krerëve të tjerë të UÇK-së.
“ Plotësisht. Historia e lirisë së Kosovës prej fillimeve të viteve 1980 e deri sot është thelbi i këtij procesi. Unë jam vetëm instrument në këtë eksperiment juridik. Nxjerrja e aktgjykimit është në duart e gjykatësve, por unë kam besim që, pas dëgjimit të dëshmitarëve të Prokurorisë e, në veçanti, atyre të mbrojtjes, të profilit dhe kredibilitetit më të lartë ndërkombëtar, ata do të nxjerrin vendim të drejtë dhe meritor. Shumëçka lidhur me legjitimitetin e së drejtës penale ndërkombëtare varet nga rezultati i këtij procesi”. tha ai.
Duke folur për jetën në Hagë, ai tha se po kalon vitin e gjashtë në izolim pa vendim gjyqësor, ndërsa qëndrimin atje e përshkroi si shkëputje të gjatë nga jeta familjare, publike dhe institucionale.
Ish-presidenti i Kosovës ka rrëfyer edhe momentet më të vështira që nga viti 2020, ku ai shkoi në paraburgim në Hagë.
Teksa bën një kthim pas në kohë, duke treguar përjetimet dhe kontributin e tij për Kosovës, një nga momentet që ai e cilëson si drama e jetës së tij është se nuk ndodhej pranë gjatë kohës që babai i tij ishte i sëmurë në spital dhe që më pas ndërroi jetë.
“Moment tjetër të cilin nuk do ta harroj kurrë ka qenë viti 2025 kur vizitova babanë në spital- nën ruajtjen e DHSK-së. Autoritetet gjyqësore më kishin refuzuar disa herë vizitën… Në fund më për arsye humanitare më lejuan të udhëtoja disi. Babai tani po lëngonte në shtrat, po kalonte orët e fundit të jetës; derisa po çmalleshim,… Përjetova çastet më të shpejta e më të rënda të jetës. Ato momente kisha veç një dëshirë, ta ndalja tik-takun e akrepave të orës…E dija se ishte hera e fundit që po e shihja të gjallë. Nuk mund të imagjinoja atë që përjetova, mbetet dramë në jetën time. Derisa po largohesha zemra po më rrihte fort, sikur po ma çante gjoksin. Truri më gjëmonte. Shikimi mu mjegullua. Trupi më ishte këputur. Duke u larguar, me të dalë në korridor takova dy motrat; ishim në distancë tre-katër metra. U përshëndetëm sikurse me lëvizje koke robotike; e kishim të ndaluar të ndërronim fjalë, të shtrëngonim duart e lere më të përqafoheshim. Por nuk ka ndalesë ligjore, urdhër apo fuqi tjetër gë mund t’i ndalojë përjetimet… shikimi i fliste shikimit. Në sytë e motrave pashë rrëketë e lotëve të dy zemrave të pastra dhimbshmërie shpirti për babanë që po i linte, si dhe për vëllanë me të cilin nuk mund ta ndanin dhimbjen dhe ngushëllimin. Atë ditë mu mohua e drejta të takoja Endritin; qëndronte para hyrjes së spitalit. U përshëndetëm në distancë. Babai kishte punuar dhe luftuar gjithë jetën për lirinë time; paradoksalisht mu privua liria dhe e drejta të qëndroj afër tij në çastet e fundit të jetës së tij. Gjatë ceremonisë së varrimit, në mungesë time, Endriti hodhi një grusht dheu edhe për mua mbi varr. Unë nuk jam rritur në kopsht fëmijësh; mënyrën si jam edukuar gjatë fëmijërisë e kam nga prindërit dhe miedisi social Megjithatë, edukatën familjare nuk ka çerdhe apo akademi që e zëvendëson apo e plotëson”, ka thënë ai.
Thaçi deklaroi me bindje se, pavarësisht faktit që ai po “tretet” në burg, rrugëtimi i Republikës së Kosovës drejt progresit është tashmë një proces i pakthyeshëm.
“E përcjell çka po ndodh në Ukrainë, Lindje të Mesme apo ngjarje të tjera botërore. E kam të përjetuar edhe sjellën “për dikë nënë e për dikë njerkë”. Nuk ka forcë fizike apo furtunë politike, e cila mund të më lëkundë besimin për qytetarët e Kosovës. Edi, sot ndonjë zyrtar apo ish-zyrtar nëpër botë edhe mund të jetë penduat krejt padrejtësisht për pavarësinë e Kosovës. Por, me ose pa Thaçin në Kosovë, ky proces i meritueshëm tashmë ka marrë fund. OK. Thaçi vazhdon të tretet në burg, por për Republikën e Kosovës jam i bindur që do të ketë progres.”
Ai hodhi akuza ndaj përpjekjeve të Serbisë për të kriminalizuar filozofinë e shtetbërjes shqiptare përmes proceseve gjyqësore aktuale. Sipas tij, liria dhe pavarësia janë fitore që nuk mund të zhbëhen më, pavarësisht lëkundjeve të mundshme diplomatike nëpër botë.
“Serbia luftoi shumë ta pengojë lirinë dhe pavarësinë – ka dështuar ta arrijë këtë për mbi tri dekada. Tani përpjekja është si ta kriminalizojë filozofinë e shtet-bërjes. A do të arrijë përmes kësaj gjykate? Nuk dua as ta mendoj. Shpresoj ende ka njerëz me vlerë morale dhe integritet profesional. Gjyqtarët gjatë procesit kanë parë të vërtetën. Të vërtetën e ka parë edhe bota. Vendimi është në dorën e tyre.”
Duke folur për zhvillimet në dialogun Kosovë-Serbi, Thaçi ka shprehur kritika ndaj Marrëveshjes së Ohrit. Ai ka thënë se ajo defunksionalizon shtetin e Kosovës.
“Dialogu Kosovë-Serbi; kështu siç duken gjërat në dy kryeqendrat, bllokada mund të vazhdojë. Është befasi si me aneksin e Ohrit, Serbia arriti të sigurojë ‘autonominë politike dhe territoriale’. Kjo defunksionalizon shtetin e Kosovës, integrimi e jo autonomia është çelësi i ecjes përpara edhe për serbët e Kosovës”.
Me keqardhje foli për një ftohje të marrëdhënieve të Prishtinës zyrtare me Tiranën.
“Do duhej të jenë më të bashkuar, bashkëpunim të ngushtë me Shqipërinë, rikthimin e raporteve speciale me SHBA-të, bashkëpunim më serioz me NATO-n dhe Bashkimin Evropian.”
Është i bindur gjithashtu se pa heqjen e plotë të sanksioneve nga SHBA-të dhe BE-ja për Kosovën, nuk mund të ecet përpara në planin e brendshëm e as atë jashtëm.
Me ardhjen e Albulena Haxhiut në krye të Presidencës si ushtruese e detyrës, janë bërë disa ndryshime në misionet diplomatike të Kosovës.
Presidenca thotë se veprimet që janë ndërmarrë lidhur me përfaqësimin diplomatik dhe konsullor janë procedura të rregullta institucionale.
“Ato [veprimet] lidhen me plotësimin e pozitave të paplotësuara, përfundimin e mandateve, propozimet dhe rikonfirmimet e MPJD-së, si dhe me funksionalizimin e përfaqësimit diplomatik e konsullor të Republikës së Kosovës”- shpjegoi Presidenca përmes përgjigjeve zyrtare.
Për KALLXO.com, Presidenca ka dhënë edhe hollësi lidhur me ndryshimet që janë bërë nëpër misione.
Lirije Berisha është emëruar ambasadore e Republikës së Kosovës në Mbretërinë e Tajlandës, njëherësh Shefe e Misionit.
Sipas Presidencës, ky mision nuk ka pasur ambasador që nga data 24.06.2020, ndërsa rekomandimi i MPJD-së për emërimin e Berishës është bërë më 05.06.2024.
Heroina Telaku është liruar nga detyra pas përfundimit të mandatit si ambasadore e Republikës së Kosovës në Panama dhe është emëruar ambasadore e Republikës së Kosovës në Republikën e Kolumbisë.
Suzan Novobrdaliu ka përfunduar mandatin dhe është kthyer në MPJD, ndërsa në vend të saj është emëruar Kenan Tora, pas përmbushjes së kritereve të kërkuara, thotë Presidenca.
Presidenca ka shpjeguar se Vehbi Miftari është liruar nga detyra “pas konstatimit të shkeljeve të etikës profesionale dhe të cenimit të integritetit e reputacionit të shërbimit diplomatik”.
KALLXO.com ka dërguar pyetje te Miftari në lidhje me këtë arsye që ka dhënë Presidenca për lirimin e tij nga detyra, dhe është në pritje të përgjigjes.
Në vend të Miftarit, Presidenca ka njoftuar se është emëruar Ruvelt Frrokaj.
Në anën tjetër, Enis Xhemajli është emëruar ambasador i Republikës së Kosovës në Panama pas përfundimit të mandatit të Telakut.
Dy riorganizimet në përfaqësimin konsullor lidhen me funksionalizimin e Konsullatës së Përgjithshme në Dyseldorf dhe Konsullatës së Përgjithshme në Gjenevë, pas procedurave përkatëse dhe rikonfirmimeve nga MPJD.
Behar Isma është emëruar Konsull i Përgjithshëm i Republikës së Kosovës në Republikën Federale të Gjermanisë, me seli në Dyseldorf.
Sipas arsyetimit të Presidencës, propozimi është pranuar në Presidencë më 12.08.2024 dhe, pas përmbushjes së procedurave të përcaktuara me aktet përkatëse nënligjore, është rikonfirmuar nga MPJD.
Një riorganizim tjetër është bërë në Gjenevë.
Floreta Kabashi është emëruar Konsulle e Përgjithshme e Republikës së Kosovës në Konfederatën e Zvicrës, me seli në Gjenevë.
Sipas Presidencës, edhe ky propozim është pranuar në Presidencë më 12.08.2024 dhe, pas përmbushjes së procedurave të përcaktuara me aktet përkatëse nënligjore, është rikonfirmuar nga MPJD.
“Pra, bëhet fjalë për vendime të bazuara në procedurë, në përfundim mandatesh, në propozime të MPJD-së dhe në nevojën që përfaqësimi diplomatik e konsullor i Republikës së Kosovës të jetë funksional dhe profesional”- tha Presidenca.
Këto ndryshime u bënë ditura pasi që u lirua nga detyra Vehbi Miftari i cili ka qenë shef i Misionit të Posaçëm diplomatik të Kosovës në Selinë e Shenjtë.
Haxhiu tha ditë më parë se në shërbimet diplomatike të Kosovës janë bërë tetë emërime të reja, tri lirime nga detyra dhe riorganizime të misioneve konsullore.
“Unë kam trashëguar një numër të madh lëndësh nga Presidentja Osmani dhe aty ku gjithçka është në rregull në raport me procedurat, natyrisht që do t’i shtyj përpara dhe në këtë drejtim janë bërë 8 emërime, 3 lirime dhe 2 riorganizime të misioneve konsullore”- tha kur u pyet nga KALLXO.com në lidhje me lirimin nga detyra e Miftarit.
Miftari, kishte njoftuar se është liruar nga pozita e tij me urdhër të ushtrueses të detyrës së presidentes, Albulena Haxhiu.
“Ju njoftoj se këto ditë kam pranuar dekretin e U.D. Presidentes Haxhiu për lirim nga detyra e shefit të Misionit në Selinë e Shenjtë. Ky dekret shënon përfundimin e mandatit tim në Vatikan. Sigurisht, jo angazhimin tim për Republikën, së cilës i kam shërbyer çdo herë me përkushtim, pa kërkuar kurrë shpagim”- ka njoftuar Miftari në Facebook, duke e përfunduar njoftimin e tij “Me përvujtni!”.
Miftari tha se “ka qenë nderi jetësor që më është bërë”, duke qenë i pari shef i Misionit në Vatikan.
Me këtë rast, ai ka falënderuar ish-presidenten Vjosa Osmani për besimin.
“Kanë qenë dy vjet plot angazhim e sfida të njëpasnjëshme, ndonjëherë të pakuptimta, me më shumë a më pak përkrahje, por të bukura e frytdhënëse, gjithsesi”- ka shkruar Miftari.
Krejt në fund, ai tha se do të sigurohet që kur t’ia dorëzojë mandatin pasardhësit a pasardhëses, të sigurohet “që vendimet tona të mos lëndojnë raportet e krijuara me aq mund”. /Kallxo.com
Dy raste të hantavirusit janë konfirmuar pasi tre persona vdiqën dhe një shtetas britanik u sëmur rëndë pas një shpërthimi të dyshuar në një anije turistike në Oqeanin Atlantik.
Operatori i anijes MV Hondius, Oceanwide Expeditions, tha se një burrë dhe një grua holandeze, si dhe një shtetas gjerman, kishin vdekur, shkruan BBC.
Hantavirusi është konfirmuar në rastin e shtetasit 69-vjeçar britanik i cili është në kujdes intensiv në një spital në Afrikën e Jugut dhe ishte i pranishëm te gruaja holandeze që vdiq.
Shkaqet e vdekjeve të pasagjerëve të tjerë po hetohen.
Në selinë e misionit të KFOR-it të udhëhequr nga NATO, në Kampin Film City në Prishtinë është mbajtur dje ceremonia zyrtare e ndërrimit të komandës së kontingjentit grek, në kuadër të misionit të NATO-s në Kosovë.
Sipas njoftimit zyrtar, ceremonia u kryesua nga Shefi i Shtabit të misionit të NATO-s, Admirali Maximilian Clark, dhe u zhvillua në praninë e ambasadores së Greqisë, Heleni Vakali, si dhe përfaqësuesve të tjerë ushtarakë dhe diplomatikë të misionit ndërkombëtar.
Gjatë fjalës së tij, Admirali Clark ka vlerësuar lart profesionalizmin, disiplinën dhe përkushtimin e kontingjentit grek që përfundon misionin e tij në kuadër të KFOR-it, duke theksuar kontributin e tij në ruajtjen e sigurisë dhe stabilitetit në rajon.
Ai i ka uruar mirëseardhje njësisë së re greke që do të vazhdojë detyrën në kuadër të forcës paqeruajtëse të NATO-s në Kosovë.
Në shenjë mirënjohjeje për angazhimin dhe shërbimin e tyre, pjesëtarët e kontingjentit grek u dekoruan me Medaljen e Nenit 5 të NATO-s, e cila jepet për kontribut në operacionet e Aleancës.