Author: K.B.

Komisioni Qendror i Zgjedhjeve ka vijuar me zbatimin e planit operacional për organizimin e zgjedhjeve të parakohshme, të caktuara për 7 qershor.

Sipas këtij plani, nga dita e sotme hapet periudha për akreditimin e vëzhguesve të subjekteve politike. Paralelisht, nis edhe procesi i akreditimit për vëzhguesit nga organizatat joqeveritare dhe përfaqësuesit e mediave.

Ky afat do të zgjasë deri më 30 maj, duke ofruar gjithsej 26 ditë për aplikim.

Në të njëjtën kohë, të gjitha partitë politike të regjistruara në Kosovë janë të obliguara të informojnë KQZ-në nëse do të marrin pjesë apo jo në zgjedhjet e parakohshme parlamentare. Për më tepër, deri më 7 maj, subjektet politike duhet të deklarojnë nëse synojnë të garojnë në kuadër të ndonjë koalicioni.

Ndërkohë, sipas njoftimit të KQZ-së, fushata zgjedhore pritet të fillojë më 28 maj. Kostoja totale e organizimit të këtyre zgjedhjeve vlerësohet të arrijë në rreth 10.8 milionë euro.

Komuna e Deçanit sot do të mbajë aktivitete përkujtimore me rastin e 5 dhe 6 Majit, Ditët e Dëshmorëve dhe Martirëve të Komunës së Deçanit.

Homazhet do të mbahen në shumë vende të komunës.

Agjenda e plotë:

-09:00 – Homazhe në Deçan.

-10:00 – Homazhe në Gllogjan.

-10:20 – Homazhe në Irzniq.

-10:30 – Homazhe në Prilep.

-10:40 – Homazhe në Carrabreg i Ulët.

-10:50 – Homazhe në Llukë e Epërme.

-11:00 – Ekspozitë dhe program i përgatitur nga nxënësit e Gjimnazit “Vëllezërit Frashëri”. (Qendra rinore, Deçan).

-13:00 – Homazhe në Lëbushë.

-13:10 – Homazhe në Strellc i Epërm.

-13:20 – Homazhe në Strellc i Ulët.

-13:40 – Homazhe në Dubovik.

-13:50 – Homazhe në Propoqan.

-14:00 Homazhe në Isniq.

-14:20 – Homazhe në Lumbardh.

-14:30 – Homazhe në Pozhar.

-14:40 – Homazhe në Kodrali.

-14:50 – Homazhe në Boleg.

-15:00 – Homazhe në Ratishë e Ulët.

-15:10 – Homazhe në Doshinoc.

-15:20 – Homazhe në Maznik.

-15:30 – Homazhe në Vranoc i vogël.

Ish-deputeti i Guxo-s, pjesë e ish-grupit parlamentar të Lëvizjes Vetëvendosje, Fatos Geci, ka bërë një tjetër koment të rëndë ndaj ish-presidentit Hashim Thaçi.

Këtë e ka bërë në ‘Facebook’, nën një postim për intervistën e Thaçit nga Haga në emisionin “Opinion” të Blendi Fevziut.

Në postimin ku citohej deklarata e Thaçit se “më është mbyllur goja për të folur dhe më janë lidhur duart për të shkruar”, Geci komentoi: “Mire qe koke pergadit se tash me 19 maj lidhesh per krjet jeten”.

Në ambientet e Pallatit të Drejtësisë në Prishtinë, sot do të mbahet ceremonia zyrtare e hapjes së Gjykatës Administrative.

Në këtë ngjarje të rëndësishme institucionale do të marrë pjesë edhe Ushtruesja e Detyrës së Presidentes së Republikës së Kosovës, Albulena Haxhiu.

Sipas njoftimit zyrtar, ceremonia do të fillojë në orën 09:00, ku pritet të theksohet rëndësia e kësaj gjykate në forcimin e sundimit të ligjit dhe avancimin e sistemit të drejtësisë në vend.

Sot parashikohet të mbajë mot me diell në pjesën e parë të ditës, ndërsa më pas priten vranësira të pakta të shtresave të larta.

Era do të fryjë kryesisht nga drejtimi i jugperëndimit, e cila herë pas here pritet të jetë e fuqishme, konkretisht në regjionin e Gjakovës, me shpejtësi prej 15-48 km/h.

Temperaturat do të shënojnë ngritje të mëtejshme, me minimale që do të lëvizin prej 3 deri në 7°C, ndërsa ato maksimale prej 24 deri në 26°C.

Ndërmarrja publike Trepça Sh.A. ka njoftuar largimin e përkohshëm nga puna të tre punonjësve, pas dy rasteve të raportuara të vjedhjes së trafove gjatë shkurtit dhe majit të vitit 2026.

Sipas njoftimit, vendimi është marrë nga Kryeshefi Ekzekutiv dhe bazohet në raportet që lidhen me dëme materiale dhe shkelje të rëndë të detyrave të punës gjatë ndërrimeve përkatëse.

Njoftimi:

Me datën 04.05.2026, Kryeshefi Ekzekutiv ka nxjerrë Vendimin nr. prot. 3814 për largimin e përkohshëm nga puna të punonjësve

1. z. M.U.,
2. z. K.K. dhe
3. z. S.M.

Vendimi është bazuar në raportet përkatëse, sipas të cilave gjatë ushtrimit të detyrës kanë ndodhur dy raste vjedhjeje (10.02.2026 dhe 01.05.2026), ku janë shkaktuar dëme materiale, përfshirë kabllo elektrike, komponente dhe pjesë të trafove.

Nga shqyrtimi i rasteve rezulton se ngjarjet kanë ndodhur gjatë kohës kur punonjësit në fjalë kanë qenë në ndërrim, duke bartur përgjegjësi për mbikëqyrjen dhe sigurinë e aseteve.

Këto veprime përbëjnë shkelje të rëndë të detyrave të punës dhe cenim të disiplinës në vendin e punës.

Për të qëndruar në plazhet publike edhe në Lezhë qytetarët do të duhet të paguajnë për çadra dhe shezlongë nga 300 lekë (3 euro).

Po ashtu këshilli bashkiak ka miratuar me shumicë votash vendimin për të përcaktuar çmime të diferencuara sipas zonës dhe nivelit të shërbimit, që shkon deri në 2000 lekë (20 euro) në plazhet private.

Sipas kryetarit të bashkisë, Pjerin Ndreu, unifikimi i tarifave synon gjithashtu të shmangë abuzimet e konstatuara në sezonet e mëparshme, duke vendosur rregulla të qarta edhe për strukturat hoteliere që operojnë në vijën bregdetare.

Ndërkohë, përfaqësues të opozitës në këshill, i cilësuan tarifat të larta, duke argumentuar se ato mund të rëndojnë mbi buxhetin e pushuesve.

Pavarësisht debatit, autoritetet lokale bëjnë me dije se 30% e hapësirës përgjatë vijës bregdetare të Shëngjinit dhe Tales do të mbetet pa pagesë, duke garantuar akses për të gjithë qytetarët, përfshirë ata me mundësi më të kufizuara ekonomike./Top Channel

Anëtarja e Kryesisë së Partisë Demokratike të Kosovës, Vlora Çitaku ia ka mbyllur derën mundësisë për përfshirjen e kryetarit të Nsimsës Socialdemokrate, Fatmir Limaj në listë për zgjedhjet parlamentare të 7 qershorit.

Çitaku tha në Frontal në T7 se synimi i PDK-së është që të bëjnë “një listë sa më gjithpërfshirëse”. Në këtë pikë, ajo tha skena politike ka nevojë për figura të reja.

“Synimi ynë është që ta bëjmë një listë sa më gjithpërfshirëse… Unë po besoj që skena politike në Kosovë ka nevojë për figura të reja, ka nevojë për personalitete të reja. Shumë prej nesh – po e fus edhe veten këtu – kemi një jetë të tërë në politikë. Nuk është diskutuar fare çështja e zotit Limaj dhe nuk pres që të ketë një epilog ndryshe nga ai që ishte në zgjedhjet e fundit”, tha ajo.

Çështja e përfshirjes së Limajt në listë, Çitaku tha se diskutohet nëpër studio televizive, por në strukturat drejtuese të partisë, tha se “nuk është çështje fare”.

Anëtari në Komisionin Qendror të Zgjedhjeve nga Lëvizja Vetëvendosje, Alban Krasniqi, ka thënë se krahas organizimit të një procesi sa më të mirë zgjedhor është marrë vendim edhe që të rritet për 10 euro pagesa për të gjithë ata që angazhohen në zgjedhjet e parakohshme të 7 qershorit.

Krasniqi në emisionin “60 Minuta” në KTV, ka thënë po ashtu se kjo vlen për secilin prej funksioneve që ka të bëjë me Këshillet e Vendvotimit, që nënkupton komisionerë e vëzhgues.

Anëtari i LVV-së në KQZ ka deklaruar po ashtu se në buxhetin e paraparë për një proces zgjedhor, 60 për qind e buxhetit parashihen për pagesat e të angazhuarve në zgjedhje.

“Ne kemi marrë një masë shtesë, duke e parë nivelin e jetesës në vazhdimësi, e kemi peshuar pagesën e tyre kundrejt standardeve, ne e kemi rritur për 10 euro secilin prej funksioneve që ka të bëjë me Këshillet e Vendvotimit dhe vetë numëruesit. Pagesa është për të mbuluar shpenzimet e tyre për këtë proces por për kah rëndësia s’ka mjete që mund ta vlerësojnë këtë proces. Në planifikimin buxhetor, 60% janë të parapara për paga dhe pagesa të tjera që kanë të bëjnë për trupa zgjedhore që përfshihen gjatë këtij procesi”, ka thënë Krasniqi.

Për zgjedhjet e parakohshme të 7 qershorit, KQZ-ja ka planifikuar gati 11 milionë euro shpenzime për organizim.

Në mbledhjen që KQZ-ja e mbajti më 1 maj ka miratuar edhe planin e aktiviteteve. Bazuar në të, fushata zgjedhore e partive politike do të zgjasë 10 ditë, duke nisur nga 28 maji e deri më 7 qershor në orën 7:00 kur edhe hapen vendvotimet.

Kryetari i AAK-së, Ramush Haradinaj ka realizuar ecje në Qafë Mullar, në vendin ku ra heroikisht vëllai i tij, dëshmori Luan Haradinaj.

Në këtë aktivitet, Haradinajt iu bashkua edhe kreu i Drenasit, Ramiz Lladrovci.

Pos kësaj, lideri i AAK-së ndau edhe një video rreth këtij aktiviteti të tij.