Author: K.B.

Pa përfshirjen e saj, Partia Demokratike e Kosovës është vendosur sërish në qendër të përplasjes politike mes Lëvizjes Vetëvendosje dhe Lidhjes Demokratike të Kosovës.LDK ka lëshuar akuza ndaj LVV-së për bashkëpunim të fshehtë me PDK-në.

Ish-deputeti i Lidhjes Demokratike të Kosovës, Paris Guri tha sot se Vetëvendosje, e cila sipas tij, nuk donte të zgjidhte presidentin “pa aminin e Sami Lushtakut”, tani ka hyrë në diskutime të fshehta me PDK-në për koalicion pas zgjedhjeve nacionale.

“Partia e cila nuk guxonte me zgjedhe President pa aminin e Sami Lushtakut sepse nuk donte assesi ta bente kete pa PDK-ne e ankohej pse Vjosa nuk eshte e pranueshme per PDK-ne, sot paska dale me qendrim qe kinse LDK, Lumiri e Vjosa jane bashke me PDK”, tha Guri në një postim në Facebook të martën.

“Mosni o te mjerë se krejt Kosova e din që ju publikisht e lutët PDK-ne për koalicion ne nivel qendror e mos te flasim për diskutimet e fshehta që po i bëni për koalicione pas 7 qershorit. Jeni nje brum qe sado qe tenton me nda, ai prap ngjitet”.

Ish-deputeti i PDK-së, Artan Behrami ka deklaruar se ish-presidenti Hashim Thaçi, përgjatë pesë vjetëve të fundit, sipas tij, ka frymëzuar shqiptarët nga 12 metra/katrorë të qelisë së tij.

Ai shton se ish-kreu i UÇK-së ka frymëzuar më shumë shqiptarë nga qelia e Hagës, sesa shumë liderë politikë me 11 mijë km² të Kosovës së lirë.

“Hashim Thaçi, në këto pesë vjet, më shumë ka frymëzuar shqiptarët nga 12 m² të qelisë së tij, sesa shumë liderë politikë me 11 mijë km² të Kosovës së lirë!”, ka shkruar ai.

Partia Socialdemokrate ka nisur një iniciativë për të mbledhur nënshkrimet nga qytetarët.

Përfaqësuesit e PSD-së kanë ngritur një stendë në sheshin e Prishtinës, për të kërkuar pjesëmarrjen e këtij subjekti në zgjedhjet e parakohshme.

Tashmë nënshkrimet e para janë hedhur.

Komiteti për Politikë të Jashtme i Parlamentit Evropian miratoi raportin vjetor për Malin e Zi, në të cilin vendi cilësohet si shteti më i avancuar në procesin e anëtarësimit në Bashkimin Evropian.

Raporti bën thirrje për forcimin e mëtejshëm të pavarësisë dhe efikasitetit të sistemit të drejtësisë, si dhe për rezultate të qëndrueshme në luftën kundër korrupsionit në nivel të lartë dhe krimit të organizuar.

Aty theksohet edhe nevoja për uljen e numrit të lëndëve të mbetura gjyqësore dhe për harmonizimin e plotë të politikës së vizave me atë të Bashkimit Evropian.

Autori i raportit, eurodeputeti Marjan Sharec, paralajmëroi se Mali i Zi përballet me një vit shumë sfidues.

“Koha është e kufizuar, ndërsa punë ka ende. Ky raport duhet të shërbejë si njohje e progresit të deritanishëm dhe si inkurajim për periudhën në vazhdim. Para së gjithash, duhet të kuptohet si një thirrje për të gjitha palët e interesuara që të tregojnë urtësi dhe përgjegjësi, në mënyrë që mosmarrëveshjet e vogla të mos e errësojnë – apo devijojnë – përparimin drejt objektivave më të gjera strategjike”, tha Sharec pas votimit.

Raporti u bën thirrje të gjitha institucioneve shtetërore që dallimet politike të mos e vonojnë miratimin dhe zbatimin e reformave që lidhen me Bashkimin Evropian.

Theksohet se anëtarësimi në BE duhet të mbetet prioritet i përbashkët kombëtar, mbi interesat partiake, ndërsa Parlamentit dhe Qeverisë së Malit të Zi u kërkohet që çështjet e identitetit të mos e largojnë vëmendjen nga procesi evropian.

Në dokument thuhet se, megjithëse Mali i Zi është vendi më i avancuar në procesin e integrimit dhe afër mbylljes së kapitujve negociues, përparimi nuk varet vetëm nga reformat teknike, por edhe nga zhvillimet e përditshme politike dhe tensionet e brendshme, të cilat shpesh e ngadalësojnë procesin e përafrimit me standardet e BE-së.

Deri tani, Mali i Zi ka mbyllur përkohësisht 14 nga 33 kapituj negociues në procesin e anëtarësimit në BE.

Synim i vendit është që t’i mbyllë të gjithë kapitujt deri në fund të këtij viti, me qëllim që të hapet rruga për anëtarësim të mundshëm deri në fund të vitit 2028.

Për përmbylljen me sukses të negociatave, thuhet në raport, është thelbësore ruajtja e konsensusit politik për rrugën evropiane dhe sigurimi i bashkëpunimit konstruktiv mes Qeverisë dhe opozitës.

Rezultatet e qëndrueshme në fushën e sundimit të ligjit dhe zbatimi efektiv i reformave janë përcaktuar si kushte kryesore për mbylljen e kapitujve 23 dhe 24.

Muajin e kaluar, Bashkimi Evropian mori vendim për krijimin e një grupi punues që do të punojë në hartimin e projekttekstit të Marrëveshjes së Anëtarësimit me Malin e Zi.

Nga Mali i Zi pritet emërimi më i shpejtë dhe më transparent i bartësve të funksioneve në sistemin e drejtësisë, përfshirë gjyqtarët e Gjykatës Kushtetuese dhe anëtarët e Këshillit Gjyqësor dhe atij Prokurorial.

Po ashtu, theksohet nevoja për përafrim të mëtejshëm të legjislacionit me standardet e BE-së, në lidhje me pavarësinë dhe profesionalizmin e sistemit të drejtësisë, si dhe për uljen e numrit të lëndëve të pazgjidhura gjyqësore – veçanërisht në rastet e korrupsionit dhe krimit të organizuar.

Në raport shprehet shqetësim edhe për ndërhyrjet e huaja, dezinformimin dhe kërcënimet hibride, ndërsa Malit të Zi i bëhet thirrje që të forcojë më tej qëndrueshmërinë e institucioneve të tij.

Dokumenti vlerëson përputhjen e politikës së jashtme dhe të sigurisë së Malit të Zi me atë të Bashkimit Evropian.

Pas votimit në Komitetin për Politikë të Jashtme të Parlamentit Evropian, ky raport pritet të votohet në seancën plenare gjatë muajit qershor, kur edhe do të marrë formën e një rezolute të këtij institucioni. /REL

Opinionisti Avni Arifi, deklaroi se flitet që Lëvizja Vetëvendosje ka krijuar rreth 40 mijë profile të rreme në rrjetet sociale.

Ai u shpreh se këto profile janë krijuar me qëllimin e vetëm, siç tha, për të sharë dhe për të fyer.

Arifi deklaroi gjithashtu se këto sharje bëhen ndaj çdo kujt dhe ndaj çdo vlere.

“Prej ardhjes së Vetëvendosjes, ka fjalë që edhe Lëvizja Vetëvendosje ka krijuar rreth 40 mijë faqe anonime në Facebook, flitet nga njerëz që kanë qenë në Vetëvendosje që paguhen njerëz me para, për të na shajtur e për të na fyer. Fyerjet më të rënda ndaj çdo kujt, ndaj çdo vlere”, tha ai në Klan Kosova.

Ministrja në detyrë e Drejtësisë, Donika Gërvalla dhe kryetarja e Partisë Guxo nuk ka komentuar deklaratën e radhës së ish-deputetit të Guxo, Fatos Geci i cili tha se “më 19 maj lidhesh për krejt jetën”, koment ky drejtuar ish-presidentit Hashim Thaçi, i cili po gjykohet në Hagë.

Ajo madje nuk u distancua as kur u pyet se a mendon njëjtë si bashkëpartiaku i saj, por tha se kot e keni se sot ka ardhur për Gjykatën Administrative dhe nuk hapin tema të reja.

Këto komente Gërvalla i bëri pas inaugurimit të Gjykatës Administrative.

“A e dini që kemi ardhur me inaugurimin e Gjykatës Administrative për çështje të tjera a ka mundësi qe pyetje e duhura ti shtrojmë në vendin e duhur… Kot e ke sepse kemi ardhur për gjykatë administrative nuk e kemi plan me hap tema të reja”, tha ajo.

Ish-deputeti nga radhët e Lëvizjes Vetëvendosje, Fatos Geci, ka bërë edhe një koment karshi ish-presidentit, Hashim Thaçi në një intervistë të dhënë me shkrim.

Komenti i tij ishte “Mirë që koke përgatit se tash me 19 maj lidhesh për krejt jetën”.

Burgim të përjetshëm për Thaçin, ish-deputeti i Guxo kishte uruar edhe nga Kuvendi i Kosovës. Nga kjo deklaratë ishte distancuar kryetarja e Kuvendit të Kosovës, Albulena Haxhiu./KP/