Author: K.B.

Ish-deputeti i Grupit Parlamentar të Lëvizjes Vetëvendosje, Haxhi Avdyli, ka folur sërish për procesin e zgjedhjes së presidentit.

Ai ka treguar se deri në momentet e fundit para kandidimit të Glauk Konjufcës, kishte besuar se bëhej fjalë për një strategji politike të Albin Kurtit.

Sipas tij, kishte menduar se Kurti nuk do ta kandidonte Konjufcën dhe se mund të kërkonte mbështetje nga LDK-ja përmes nënshkrimeve.

“Unë mendoj që deri ditët e fundit kur është kandiduar Glauku, akoma ne e kemi pasur një bindje që Albin Kurti është duke e bërë një politikë, është një taktikë e Albinit. Unë kam menduar që nuk e kandidon as Glaukun dhe shkon i thotë LDK-së “mi jep ato 15 nënshkrime”.

“Konkretisht një ditë apo dy para se të nominohet Glakuku, na është thënë që kandidat do të jetë Glauk Konjufca dhe një kandidat tjetër formal, që më vonë doli që është Fatmirja. Normalisht unë nuk isha i bindur pse nuk po bën Vjosa”, tha ai në Klan Kosova.

Avdyli ka theksuar se një ose dy ditë para nominimit, ishte bërë e ditur se kandidat do të ishte Konjufca, së bashku me një kandidat tjetër formal.

Sipas tij, zakonisht mosnominimi i një figure lidhet me performancë jo të mirë, por në rastin e Osmanit, sipas tij, ajo e kishte përfaqësuar Kosovën në mënyrë shumë të mirë.

“Zakonisht kur dikush nuk nominohet ose shkarkohet, bëhet kur nuk ka punuar mirë, askush në grup parlamentar, por as qytetarët nuk e kam hasur që kanë thënë që kjo nuk po punon mirë, kjo është shkarkuar që lka punuar shumë, e ka prezantuar Kosovën në mënyrën më të mirë të mundshme”, tha ai.

Avdyli ka përshkruar edhe atmosferën në momentin e nominimit, duke thënë se shumë deputetë dukeshin të pakënaqur.

“Në momentet e nominimit unë edhe i kam parë fytyrat e deputetëve që kanë qenë të ngrysura, deputetëve të tjerë, jo të Guxo-s, të gjithë janë ndjerë keq, sepse ata kanë besuar dhe akoma e di që shancat më të mëdha për t’u bërë kryetare e shtetit, me vazhdu, i ka pasur Vjosa Osmani, asnjëri tjetër nuk i ka pasur”, tha ai.

Ai ka treguar gjithashtu se kishte komunikime me disa deputetë që nuk ishin të informuar për zhvillimet dhe që shprehnin mbështetje për Osmanin.

Megjithatë, ai u shpreh i habitur që disa prej tyre më pas dolën publikisht me qëndrime kundër saj.

“Shumë më kanë thirrur çka po bëhet, as ata nuk kanë qenë të informuar çka po bëhet, “a po bëhet Vjosa, mirë është me shku Vjosa”, shumë deputetë 3-4 e di që kam komunikuar edhe përmes telefonit. Ata po ndihen shumë keq, por tash po çuditem kur të njëjtit po dalin e po bëjnë video kundër Vjosës”, tha ai.

Në fund, Avdyli theksoi se, sipas tij, në vitin 2021 ishte Vjosa Osmani ajo që ndikoi në ardhjen e Albin Kurti në postin e kryeministrit.

“Vjosa Osmani e ka bërë kryeministër Albin Kurtin, jo Albin Kurti, Vjosa Osmanin, po flasim për vitin 2021”, u shpreh ai.

Me shtatë vota për, asnjë kundër dhe asnjë abstenim Drita Morina është zgjedhur nënkryetare e Komisionit të Pavarur të Mediave.

Luljeta Aliu Krasniqi e propozoi Drita Morinën për nënkryetare dhe kjo e fundit nuk pati ndonjë kundërkandidat.

“Unë po mendoj që duke pasur parasysh përvojën që kemi momentalisht edhe përvojën e kandidatëve të cilët na i kanë shtru këtu si vërejtje natyrisht edhe anën gjinore tash se pa ta nuk bën po thonë, nuk bën, nuk bën. Mirëpo pa dashur me bë ndonjë dallim, megjithatë mendoj se zonja Drita Morina kishte me qenë një përzgjedhje e mirë, e ka po besoj edhe përvojën në këtë fushë. Edhe unë ia kisha besu këtë detyrë zonjës Drita Morina”, tha Aliu-Krasniqi raporton Ekonomia Online.

Ministria e Industrisë, Ndërmarrësisë, Tregtisë dhe Inovacionit (MINTI), përmes Inspektoratit Qendror të Mbikëqyrjes së Tregut (IQMT) dhe në bashkëpunim me Agjencinë e Ushqimit dhe Veterinarisë (AUV), ka intensifikuar kontrollet në tregun e produkteve të qumështit në gjithë territorin e Kosovës.

Sipas njoftimit, këto veprime kanë për qëllim mbrojtjen e konsumatorëve dhe rritjen e transparencës në treg, veçanërisht në lidhje me deklarimin dhe etiketimin e produkteve ushqimore.

Në kuadër të inspektimeve të realizuara, janë kryer gjithsej 7 kontrolle në 4 qytete të ndryshme të Kosovës. Nga këto, 6 raste janë dërguar në procedurë, ndërsa 1 rast është mbyllur.

MINTI ka rikujtuar të gjithë operatorët ekonomikë që veprojnë në prodhim, import, distribuim dhe shitje të produkteve të qumështit se janë të obliguar të respektojnë legjislacionin në fuqi, përfshirë Ligjin për Mbrojtjen e Konsumatorit dhe Ligjin për Tregtinë e Brendshme.

Në njoftim theksohet se çdo produkt duhet të ketë deklaracion të qartë dhe të saktë në gjuhët zyrtare, duke specifikuar nëse është me bazë shtazore, bimore apo me qumësht pluhur.

Po ashtu, subjektet tregtare obligohen të bëjnë ndarjen e qartë të produkteve në rafte sipas kategorive përkatëse.

Institucioni ka paralajmëruar se inspektimet do të vazhdojnë edhe në ditët në vijim, me qëllim parandalimin e praktikave mashtruese dhe garantimin e informimit të drejtë të konsumatorëve.

Në rast të mosrespektimit të kërkesave ligjore, operatorët ekonomikë do të përballen me masa ndëshkuese sipas legjislacionit në fuqi.

Ndërkohë, qytetarët janë ftuar të raportojnë çdo parregullsi në treg, duke ofruar edhe dëshmi përkatëse për institucionet përgjegjëse.

Aeroporti Ndërkombëtar i Prishtinës “Adem Jashari”, ka njoftuar udhëtarët për ndryshime të përkohshme në organizimin e hyrje/daljeve të terminalit, për shkak të punimeve që po zhvillohen në infrastrukturë.

Sipas njoftimit zyrtar, më 06.05.2026 hyrjet dhe daljet e reja të nisjeve dhe arritjeve do të jenë të mbyllura përkohësisht vetëm për një ditë, në kuadër të punimeve teknike.

Gjatë kësaj periudhe, udhëtarët për të gjitha fluturimet janë udhëzuar të përdorin hyrjen e vjetër të terminalit (Departures), ndërsa operimet do të kthehen në normalitet nga data 07.05.2026.

“Ju lutemi që për një ditë të përdorni hyrjen e vjetër të Nisjeve për të gjitha fluturimet. Kërkojmë mirëkuptimin tuaj për çdo shqetësim”, thuhet në njoftim.

Nga aeroporti është bërë e ditur se ndryshimet janë të përkohshme dhe lidhen vetëm me punimet në zhvillim, ndërsa pas përfundimit të tyre, shërbimet do të vazhdojnë normalisht në hyrje/daljet e reja të terminalit.

Kryetari i Aleancës për Ardhmërinë e Kosovës, Ramush Haradinaj ka thënë se pushteti i Albin Kurtit planifikon të ngulfas lirinë e shtypit.

Sipas tij, një kryeministër që “sulmon median, në thelb sulmon një nga shtyllat kryesore të shtetit demokratik. Ai linçon dhe tenton të drejtojë me qëllim të keq”.

“Media duhet të jetë e lirë, e pavarur dhe e mbrojtur. Gazetarët duhet të ndihen të sigurt në punën e tyre, të mbështetur në misionin e tyre. Dhe ne, si përfaqësues politikë, duhet të jemi garantues të këtij mjedisi”, ka shkruar mes tjerash Haradinaj në Facebook.

Postimi i plotë:

Liria e shtypit, hapësira që pushteti i Kurtit planifikon ta ngulfas.

Sot, kemi shumë pak gazeta të shtypura. Koha që na mungon na shfaqet në kujtesë si respekt.

Shkrimet dhe opinionet, sidoqoftë, sot janë prezente në një platformë tjetër, pra elektronike.

Dhe padyshim, ne duhet ta mbrojmë si dje, sot dhe të nesërmen, si kauzë edhe më tutje.

Liria e shtypit nuk është privilegj i mediave, por është themel i demokracisë. Ajo është zëri që mban përgjegjës pushtetin, pasqyra që i tregon shoqërisë të vërtetën, edhe kur ajo është e vështirë për t’u dëgjuar.

Një shtet që respekton median, respekton qytetarin e vet.

Respekti ndaj gazetarit nuk duhet të jetë selektiv, as i kushtëzuar nga pyetjet që bën apo temat që trajton. Gazetari nuk është kundërshtar, por partner në ndërtimin e një shoqërie transparente.

Nga reportazhet dhe hulumtimet në terren, te dokumentarët që sjellin histori të pathëna, nga kronikat e përditshme deri te hulumtimet që kërkojnë muaj pune e përkushtim, pra secili kontribut i tyre është shërbim publik.

Pas çdo lajmi që lexojmë apo shohim, qëndron një ekip njerëzish që shpesh punojnë në kushte të vështira, me orare të gjata dhe me përgjegjësi të madhe.

Një vlerësim i veçantë u takon edhe kameramanëve dhe ekipeve teknike, ata që janë gjithmonë në vijën e parë, në shi, në të ftohtë, në ngjarje të papritura, duke dokumentuar realitetin ashtu siç është. Pa ta, e vërteta shpesh do të mbetej e padukshme.

Për fat të keq, sot kemi krijuar një klimë ku nga maja e pushtetit shpesh dëgjojmë gjuhë ofenduese ndaj mediave. Kjo nuk i shërben as demokracisë, as besimit të qytetarëve. Kritika ndaj mediave është e drejtë, por ajo duhet të jetë argumentuese, jo denigruese.

Një kryeministër që sulmon median, në thelb sulmon një nga shtyllat kryesore të shtetit demokratik. Ai linçon dhe tenton të drejtojë me qëllim të keq.

Unë besoj në një qasje tjetër.

Në një raport të hapur, korrekt dhe të ndershëm me mediat. Nuk do të ketë mbyllje dyersh, nuk do të ketë shmangie nga pyetjet dhe, mbi të gjitha, nuk do të ketë gjuhë përçmuese. Sepse përgjegjësia jonë nuk është të zgjedhim pyetjet, por të japim përgjigje.

Media duhet të jetë e lirë, e pavarur dhe e mbrojtur. Gazetarët duhet të ndihen të sigurt në punën e tyre, të mbështetur në misionin e tyre. Dhe ne, si përfaqësues politikë, duhet të jemi garantues të këtij mjedisi.

Unë jam në krah të tyre, jo për t’i përdorur, por për t’i respektuar. Jo për t’i heshtur, por për t’i dëgjuar.

Sepse një shoqëri pa media të lirë është një shoqëri pa zë. Dhe unë besoj në një Kosovë ku zëri i së vërtetës nuk ndalet kurrë.

Dardan Beqiri, është zgjedhur kryetari i Bordit të Radio Televizionit të Kosovës.

Ai ishte i vetmi kandidat për këtë pozitë, njofton Klan Kosova.

Sipas anëtarëve të rinj të këtij bordi, ata nuk kanë përvojë në këto çështje.

Po ashtu në këtë mbledhje pritet të vendoset edhe për ushtruesin e detyrës së drejtorit të Përgjithshëm të RTK-së.

Kreu i LDK-së, Lumir Abdixhiku, në një paraqitje për media, pas mbledhjes së mbajtur me kryesinë e partisë tha se është diskutuar për përgatitje për zgjedhjet e reja dhe listën e LDK-së.

Kryetari i Lidhjes Demokratike të Kosovës (LDK), Lumir Abdixhiku, ka thënë se pa asnjë problem do të lironte numrin 1 të listës që asaj t’i prijë Vjosa Osmani.

Abdixhiku i pyetur nga gazetarët tha se beson që Vjosa Osmani është kandidatja më e shkëlqyeshme për Presidente.

Ai tha se populli i Kosovës do që Vjosa Osmani të jetë sërish Presidente e Kosovës.

“Pa asnjë problem, kjo çështje nuk është për mua. Besoj që Vjosa Osmani duhet të jetë kandidatja e shkëlqyeshme për Presidente dhe më e duhura, besoj që populli i Kosovës e do këtë”, ka thënë Abdixhiku.

U. D presidentja e vendit, Albulena Haxhiut, ka ftuar Bashkimin Evropian që të dërgojë Mision Vëzhgues për zgjedhjet e 7 qershorit.

Haxhiu, i është drejtuar me letër presidentes së Parlamentit Evropian, Roberta Metsola, dhe përfaqësueses së Lartë të Bashkimit Evropian për Punë të Jashtme dhe Politikë të Sigurisë, , Kaja Kallas, ku ka bërë ftesën për dërgimin e misionit vëzhgues të zgjedhjeve.

‘‘U.D. Presidentja Haxhiu ka theksuar se prania e Misionit Vëzhgues të BE-së do të kontribuonte në transparencën, kredibilitetin dhe integritetin e procesit zgjedhor, në përputhje me përkushtimin e vazhdueshëm të Republikës së Kosovës për standarde demokratike dhe zgjedhje të lira’’, thuhet mes tjerash në komunikatë.

Komunikata:

U.D. Presidentja Haxhiu fton Bashkimin Evropian të dërgojë Mision Vëzhgues për zgjedhjet e 7 qershorit

Ushtruesja e Detyrës së Presidentes së Republikës së Kosovës, Albulena Haxhiu, i ka dërguar letër Presidentes së Parlamentit Evropian, Roberta Metsola, dhe Përfaqësueses së Lartë të Bashkimit Evropian për Punë të Jashtme dhe Politikë të Sigurisë, njëherësh Zëvendëspresidente e Komisionit Evropian, Kaja Kallas, përmes së cilës ka ftuar Bashkimin Evropian të dërgojë Mision Vëzhgues të Zgjedhjeve për zgjedhjet e parakohshme për Kuvendin e Republikës së Kosovës, të caktuara për datën 7 qershor 2026.

Në letrën e saj, U.D. Presidentja Haxhiu ka theksuar se, në përputhje me përgjegjësitë kushtetuese, ka nxjerrë vendimin për caktimin e datës së zgjedhjeve të parakohshme. Duke pasur parasysh rëndësinë e këtij procesi, ajo ka ftuar Bashkimin Evropian që, përmes një Misioni të pavarur Vëzhgues, të përcjellë dhe vlerësojë zhvillimin e zgjedhjeve.

U.D. Presidentja Haxhiu ka theksuar se prania e Misionit Vëzhgues të BE-së do të kontribuonte në transparencën, kredibilitetin dhe integritetin e procesit zgjedhor, në përputhje me përkushtimin e vazhdueshëm të Republikës së Kosovës për standarde demokratike dhe zgjedhje të lira.

Republika e Kosovës e ka vlerësuar vazhdimisht rolin e Bashkimit Evropian në mbështetjen e institucioneve demokratike dhe në avancimin e standardeve zgjedhore. Ftesa për dërgimin e Misionit Vëzhgues është vazhdim i kësaj praktike institucionale dhe shprehje e përkushtimit të Kosovës për një proces zgjedhor të hapur, transparent dhe të besueshëm.

Kryeministrja e Italisë, Georgia Meloni, ka reaguar pasi në rrejte sociale janë shpërndarë fotografi të saj të krijuara me inteligjencë artificiale ku ajo shfaqet zhveshur.

Meloni ka thënë se këto fotografi të rreme janë duke u bërë nga ndonjë kundërshtar i zellshëm.

Kryeministrja italiane ka thënë se fotografi të tilla që njihen si “deepfakes” janë të rrezikshme.

“Deepfakes janë një mjet i rrezikshëm, sepse ato mund të mashtrojnë, manipulojnë dhe godasin këdo. Unë mund ta mbroj veten. Shumë të tjerë nuk munden.Për këtë arsye, një rregull duhet të zbatohet gjithmonë: verifiko para se të besosh dhe beso para se të ndash. Sepse sot më ndodh mua, nesër mund t’i ndodhë kujtdo”, shkruan ajo.

Girano in questi giorni diverse mie foto false, generate con l’intelligenza artificiale e spacciate per vere da qualche solerte oppositore.

Devo riconoscere che chi le ha realizzate, almeno nel caso in allegato, mi ha anche migliorata parecchio. Ma resta il fatto che, pur di… pic.twitter.com/or44qru2qj

— Giorgia Meloni (@GiorgiaMeloni) May 5, 2026