Author: K.B.

Zëdhënësi i Komisioni Qendror i Zgjedhjeve i Kosovës, Valmir Elezi, ka bërë të ditur se po vazhdon periudha e regjistrimit të votuesve jashtë Kosovës, e cila ka nisur më 6 maj dhe përfundon më 17 maj 2026.

Sipas tij, të dhënave të përditësuara deri të premten, më 8 maj në orën 09:00, përmes platformës elektronike http://diapsora.kqz-ks.org, janë pranuar gjithsej 21,378 kërkesa për regjistrim.

“Prej tyre, 9,149 aplikime janë aprovuar, 1,037 janë refuzuar, ndërsa 11,187 mbeten në proces shqyrtimi”.

Nga aplikimet e aprovuara, Elezi thotë se 2,284 shtetas janë regjistruar për të votuar fizikisht në përfaqësitë diplomatike, 239 për të votuar përmes kutisë postare në Kosovë, ndërsa 6,626 për të votuar përmes postës nga jashtë vendit.

Ai ka bërë të ditur se procesi i votimit jashtë vendit do të organizohet në 48 përfaqësi diplomatike, me gjithsej 70 vendvotime, prej të cilave 33 ambasada dhe 15 konsullata. Numri maksimal i votuesve që mund të regjistrohen për votim fizik është 66,450.

“Ky kufizim vlen vetëm për votimin në përfaqësi diplomatike, ndërsa regjistrimi për votim përmes postës mbetet i pakufizuar. Në rast të arritjes së kufirit maksimal në një përfaqësi, aplikuesit do të udhëzohen të zgjedhin mënyra alternative të votimit përmes postës, sipas parimit të kohës së aplikimit”.

Po ashtu, KQZ ka përcaktuar një prag minimal prej 50 votuesish të regjistruar për organizimin e votimit në një përfaqësi diplomatike. Nëse ky numër nuk arrihet, votimi fizik në atë përfaqësi nuk do të organizohet dhe votuesit do të kalojnë automatikisht në votim përmes postës.

Sipas KQZ-së, shtetasve të regjistruar për votim me postë do t’u dërgohet paketa me fletëvotim në adresat e tyre, siç është praktikuar edhe në proceset e mëparshme zgjedhore.

Kryetari i PDK-së, Bedri Hamza u ka bërë thirrje përmes një video-mesazhi qytetarëve të cilët synojnë të kontribuojnë politikisht duke thënë se lista e partisë është e hapur për njerëz të ndershëm që punojnë me përkushtim dhe e duan vendin.

Hamza në postimin e tij në Facebook tha se ka ardhur koha që njerëzit e mirë të mos rrinë anash.

Ai madje ka lënë edhe kontaktin e tij për të gjithë ata që dëshirojnë të kontaktojnë me kryetarin e PDK-së.

“Kosova ka nevojë për ju!”, ka shkruar ai.

Një burrë 52-vjeçar është dërguar pa shenja jete mëngjesin e sotëm në emergjencën e Suharekës.

Policia tha se doli në vendngjarje dhe se “janë vërejtur edhe rrethana që ngrisin dyshime për vdekje të dyshimtë”.

Lajmin p e ka konfirmuar zëdhënësi i policisë për rajonin e Prizrenit, Shaqir Bytyqi.

“Sot, më 08.05.2026, rreth orës 08:20, Policia ka pranuar informacion nga Emergjenca në Qendrën Komunale të Mjekësisë Familjare (QKMF) në Suharekë se një person mashkull, rreth 52 vjeç, është sjellë pa shenja jete. Policia ka dalë menjëherë në vendngjarje dhe nga personeli mjekësor është konfirmuar se viktima ishte pa shenja jete, ndërsa janë vërejtur edhe rrethana që ngrisin dyshime për vdekje të dyshimtë. Në konsultim me prokurorin e shtetit, Policia ka nisur hetimet lidhur me rastin, duke siguruar prova dhe dëshmi nga vendi i ngjarjes në Suharekë, si dhe duke intervistuar dëshmitarë”.

Bytyqi shtoi se me urdhër të prokurorit, trupi i pajetë i viktimës është dërguar në Instituti i Mjekësisë Ligjore për obduksion.

*Fotografia në lajm ilustruese

Ish-deputetja e LVV-së, Shqipe Mehmeti Selimi ka qëndruar në Hagë pasi ka vizituar bashkëshortin e saj, Rexhep Selimi, i cili po përballet me proces gjyqësor në Dhomat e Specializuara.

Selimi këtë e bëri të ditur përmes një postimi në rrjetin social në Facebook.

“Nuk ka shtyerje e as vonesë që na lodhë! Krenarë”, ka shkruar Selimi.

Ndryshe, Gjykata Speciale ka shtyrë shpalljen e aktgjykimit për rastin ndaj ish-krerëve të UÇK-së deri më 20 korrik.

Dibran Hoxha, i njohur si “Kobra”, Arlind Dakaj dhe Mirsat Hajredini janë dënuar me vetëm nga 5 mijë euro gjobë për kryerjen e veprës penale “lëndim i rëndë trupor”.

Gjykata Themelore në Prizren, në seancën e 7 prillit, ka marrë aktgjykim ndaj tyre duke shqiptuar dënim me 6 muaj burgim, i cili është zëvendësuar me gjobë me kërkesë të avokatëve mbrojtës.

Dënimi ndaj tyre rezulton të jetë nën minimumin e paraparë me ligj.

Bazuar në përgjigjen e gjykatës, rezulton se dënimi është bazuar në nenin 186 të Kodit Penal të Kosovës, paragrafi 3, nënparagrafi 3.1, i cili parasheh dënim me burgim nga 1 deri në tetë vjet.

“APROVOHET kërkesa e mbrojtësve të të akuzuarve Dibran Hoxhaj av. Avni Berisha, Arlind Dakaj av. Driton Shehu dhe Mirsad Hajredini av. Klodian Krasniqi, në kuptim të nenit 44 të KPRK-së, që dënimi me burgim t’i zëvendësohet me dënim me GJOBË, ashtu që Gjykata, dënimin me burg në kohëzgjatje prej 6 (gjashtë) muajsh për secilin të akuzuar veç e veç, e ka zëvendësuar me DËNIM ME GJOBË në shumën prej 5,000 (pesëmijë) eurosh, për secilin të akuzuar veç e veç, të cilën gjobë do ta paguajnë në afat prej 15 ditësh pas plotfuqishmërisë së aktgjykimit”, thuhet në përgjigjen e gjykatës për “Betimin për Drejtësi”.

Mirëpo, duke qenë se të njëjtit kanë qëndruar në paraburgim nga 19 qershori 2018 deri më 23 korrik 2018, atëherë do të paguajnë nga 4,260 euro.

Në aktakuzën e ngritur ndaj tyre nga Prokuroria Themelore në Prizren thuhet se më 15 qershor 2018, Hoxha, Dakaj e Hajredini i kishin shkaktuar lëndime të rënda trupore të dëmtuarit Hulusi Badallaj.

Badallaj thuhet se, pas mosmarrëveshjes me të dyshuarit, kishte shkuar për ta paraqitur rastin në stacion policor dhe, duke u kthyer, të njëjtit i kishin ndërprerë rrugën.

Të njëjtit i kishin shkaktuar tronditje në tru dhe shtatë plagë në trup nga përdorimi i mjeteve të forta.

“I njëjti sulmohet në pjesë të ndryshme të trupit nga ana e të akuzuarve dhe me grushta dhe shufra metalike ndërsa i akuzuari merr briskun në veturën e të dëmtuarit dhe ia jep të akuzuarit, i cili brisk e godet në krahun e majtë dhe në këmbë të dëmtuarin me c’rast shkaktojnë lëndime të rënda trupore ndrydhje të indeve të buta të kokës, me plagë shqyese në kokë të shoqëruar me tronditje trunore dhe me 7 plagë në trup, të shkaktuar nga veprimi mekanik i mjetit të fort si dhe plagë prerëse në regjionin e supit të majtë i shkaktuar nga veprimi mekanik i mjetit të prehtë të përshkruar si në ekspertizën mjekësor”, thuhet në aktakuzë.

Ndryshe, për Kobrën “Betimi për Drejtësi” ka raportuar në vazhdimësi se shteti është duke dështuar duke shqiptuar dënime të “buta” ndaj tij.

Ndërsa, i njëjti është dënuar edhe me 24 vjet burgim lidhur me vrasjen e 31 vjecarit tek lokali “Kobra City”.