ATV

Author: K.B.

  • Kunati i Albulena Haxhiut garon në listën e AAK-së!

    Kunati i Albulena Haxhiut garon në listën e AAK-së!

    Dardan Krasniqi prite të garojë përsëri në zgjedhje për deputet. Ai këtë e ka bërë të ditur përmes një postimi në Facebook.

    Kujtojmë se Krasniqi, i cili, njëherësh është kunat i Albulena Haxhiut, në zgjedhjet e fundit mori 3047 vota.

    Postimi i plotë:

    Krah për krah!
    Në këtë garë hyjmë me vizion të qartë dhe me dashuri të sinqertë për vendin tonë.
    Me koncept për zhvillim, mirëqenie dhe mundësi për secilin qytetar. Me përkushtim për sportin, kulturën, shëndetësinë dhe arsimin si shtylla të një shoqërie të fortë e të shëndoshë. Hyjmë duke mbrojtur vlerat çlirimtare, sakrificën dhe idealin për të cilin u ndërtua liria jonë. Me punë, ndershmëri dhe përgjegjësi ndaj qytetarëve, për një të ardhme më të mirë për të gjithë.

    Po ua kërkojmë krahun tuaj si mbështetje për ne, e ne për ju zë i fuqishëm!

  • Dëshmitarja e ZPS-së thotë se nga mbi 300 dosje të audiove, ka përfshirë një numër të vogël në raportin e saj

    Dëshmitarja e ZPS-së thotë se nga mbi 300 dosje të audiove, ka përfshirë një numër të vogël në raportin e saj

    Dëshmitarja Helen Fraser duke u përgjigjur në pyetjet e Prokurorisë pranoi se ka marrë një përqindje të vogël të dosjeve të audiove nga mbrojtje e Hashim Thaçit për analizim, e që pastaj janë përfshirë në raportin e saj lidhur me interpretimin e tingujve.

    Përpara kësaj, prokurori Joshua Hafetz i tha dëshmitares së në këtë çështje gjyqësore janë pranuar në prova 348 dosje të audiove që mbulojnë 28 orë të audio-incizimeve.

    Por sipas prokurorit, dëshmitarja ka thënë në raport që ka marrë vetëm tetë dosje audio ose përreth kësaj shifre. Rrjedhimisht, sipas tij, kjo i bie që në raportin e saj janë përfshirë më pak se 3% e dosjeve të audiove.

    Pas kësaj, Hafetz pyeti dëshmitaren se a i bie kjo që ajo nuk di asgjë lidhur me 97% e mbetur të audiove në këtë çështje gjyqësore. Lidhur me këtë, Helen Fraser e pohoi.

    Por, ajo tha se nuk e ka pyetur mbrojtjen e Thaçit që t’i japë më shumë dosje të audiove për t’i përfshirë në raportin e saj.

    Përveç kësaj, ajo tha se nuk i kujtohet se çfarë udhëzimesh dhe pyetjesh i bëri mbrojtja e Thaçit të cilat më pas sollën raportin e Fraser.

    Ndër tjerash, ajo tha se me mbrojtjen ka komunikuar përmes zoom, e po ashtu edhe përmes e-mailit.

    Fraser shtoi se mbrojtja i ka thënë që këto materiale që janë nga vizita e 3 shtatorit dhe ajo e 6 tetorit 2023, janë përfaqësuese.

    “Unë nuk kam pasur materiale tjera dhe përfundimet e mia i kam mbështetur në këto dy vizita”, tha Fraser.

    Në Dhomat e Specializuara të Kosovës (DhSK) në Hagë po vazhdon dëshminë dëshmitarja e mbrojtjes së Hashim Thaçit, ekspertja Helen Fraser në gjykimin në të cilin Thaçi akuzohet së bashku me Bashkim Smakajn, Isni Kilajn, Fadil Fazliun dhe Hajredin Kuçin për vepra penale kundër administrimit të drejtësisë.

    Gjatë kundërpyetjeve të prokurorit Joshua Hafetz, dëshmitarja Fraser tha se disa interpretime që u janë bërë tingujve në transkriptat e Prokurorisë shkojnë përtej asaj që është objektivisht e transkriptueshme, raporton “Betimi për Drejtësi“.

    “Unë besoj që disa nga komentet që janë bërë për shembull; persona që hyjnë e dalin nga dhoma- interpretimi që iu është bërë disa tingujve shkon përtej asaj që është objektivisht e transmetueshme nga një audio”, tha ajo.

    Përpara kësaj, pyetjet prokurori i nisi duke thënë se Fraser në raport thotë se transkriptat përmbajnë shumë komente kontestuese lidhur me personat që hyjnë dhe dalin nga dhoma, interpretim të tingujve të ndryshëm si fëshfërima të letrave apo tinguj të kthimit të faqeve dhe të gjitha këto shkojnë përtej asaj që është objektivisht e transkriptueshme nga vetë audio.

    Ndërsa, për sa i takon zhurmës së letrës për të cilën ka shkruar ekspertja në raportin e saj, Hafetz pyeti se kjo pjesë a pajtohet se nuk vlen dhe është e pasaktë.

    Por, në pyetje paqartësi pati ekspertja dhe prokurori vazhdoi me sqarim ndërkohë që përgjigja e Fraser ishte se është dakord me atë që ka shkruar në atë paragraf.

    “Nuk e kuptoj këtë. Mbase unë po keqkuptoj. Nuk mund të them që nuk jam dakord me këtë që kam shkruar në paragrafin e fundit”, tha ajo.

    Veç kësaj, sa i përket zhurmës së letrave për të cilën flet transkripta e Prokurorisë, Fraser tha se është e paqartë se nga e dinin përkthyesit e ZPS-së që po ktheheshin faqet, pra si e kanë dalluar.

    “Unë e kuptoj ku është keqkuptimi. Unë këtu kam dashur t’i referohem që kam thënë që mund të ketë pasur zhurmë që është kthimi i faqeve apo zhurmë letrash por ka qenë e paqartë nga ta dinë këta persona që ktheheshin faqet, që ktheheshin fletët, si e kanë dalluar këtë gjë”, tha ajo.

    Më pas, prokurori pyeti se a është duke thënë dëshmitarja që nuk mund të transkriptohet tingulli si tingull i kthimit të fletëve.

    “Është çështje tek terminologjia që disa tinguj janë objektivisht të transkriptueshëm dhe disa jo. Mendoj që është e vështirë të kuptohet se çfarë është vërtetë të transkriptohet në mënyrë objektive nga një audio. Koncepti në vetvete është i vështirë”, tha ajo.

    Fraser shtoi se për këtë pjesë ka thënë që shkon përtej asaj që është objektivisht e transkriptueshme dhe jo që është objektivisht e transkriptueshme.

    “Unë besoj që disa nga komentet që janë bërë për shembull; persona që hyjnë e dalin nga dhoma- interpretimi që iu ësht ëbërë disa tingujve shkon përtej asaj që është objektivisht e transmetueshme nga një audio”, tha ajo.

    Ndërsa, kur u pyet se a qëndron edhe kjo për zhurmën e letrës, Fraser u përgjigj se nëse dëgjon një fëshfërimë si mund të dihet që është tingull i një letre apo një zhurme tjetër.

    Pas kësaj, Fraser u pyet se a mendon që transkriptuesit e ZPS-së e kanë shënuar në transkriptë tingullin e zhurmës së letrës siç e kanë dëgjuar dhe kanë qenë objektiv. Ajo u përgjigj me po.

    Të gjithë të akuzuarit janë të pranishëm në sallën e gjyqit përmes video-lidhjes.

  • Miftar Kurti në listën e PDK’së për deputet, Hamza: Mirë se vjen Profesor

    Miftar Kurti në listën e PDK’së për deputet, Hamza: Mirë se vjen Profesor

    Kreu i PDK’së, Bedri Hamza, ka njoftuar se Miftar Kurti do të jetë pjesë e listës të kandidatëve për deputetë nga kjo parti.

    Hamza prezantoi profilin e tij dhe tha se “Kosova ka nevojë për njerëz me dije, përvojë dhe integritet”.

    “Sot i urova mirëseardhje në listën tonë të kandidatëve për deputetë Prof. ass. dr. Miftar Kurtit, profesor, studiues, shkrimtar dhe luftëtar të UÇK-së. Me kontribut në arsim, kulturë, histori dhe shtetndërtim, ai përfaqëson figurën e intelektualit të angazhuar që i ka shërbyer Kosovës në kohë lufte dhe paqe”, shkroi Hamza.

    “Mirë se vjen, Profesor!”.

  • Arrestohet në Shqipëri Anton Allakaj, i dënuar me 11 vjet burgim për vrasje, pritet ekstradimi drejt Kosovës

    Arrestohet në Shqipëri Anton Allakaj, i dënuar me 11 vjet burgim për vrasje, pritet ekstradimi drejt Kosovës

    Policia e Shtetit ka finalizuar arrestimin e një shtetasi të shpallur në kërkim ndërkombëtar, me qëllim ekstradimin drejt Kosovës.

    Sipas njoftimit zyrtar, i arrestuari është Anton Allakaj i cili ishte i dënuar nga Gjykata e Pejës.

    Mësohet se Allakaj u dënua me mbi 11 vite burgim për vrasje, nga të cilat i kanë mbetur për të vuajtur edhe rreth 10 vite.

    Gjatë arrestimit, policia sekuestroi dokumente të falsifikuara që i kërkuari përdorte për t’u fshehur nën emrat Naser Muja dhe Ded Dedaj. Mësohet se tashmë, kanë nisur procedurat për ekstradimin e tij drejt Kosovës./Ora News/

  • Haradinaj zyrtarizon kandidimin e Arifit për deputet

    Haradinaj zyrtarizon kandidimin e Arifit për deputet

    Ramush Haradinaj ka zyrtarizuar kandidimin e Avni Arifit për deputet në zgjedhjet e 7 qershorit.

    Përmes një postimi në Facebook, Haradinaj tha se me Arifin ka rrugëtuar gjatë bashkë politikisht, në kohë sfidash, vendimesh të rëndësishme dhe angazhimi të pandalshëm për forcimin e shtetit të Kosovës.

    “Ai ka qenë gjithmonë ndër njerëzit më lojalë, më korrektë dhe më profesionalë, jo vetëm brenda Aleancës, por edhe në secilin institucion që ka përfaqësuar”, ka shkruar ai.

    Haradinaj shtoi se rikthimi i ish-diplomatit në listën e AAK-së vjen natyrshëm.

    “Avniu i përket brezit të njerëzve që politikën nuk e kanë parë si privilegj personal, por si shërbim ndaj qytetarëve dhe shtetit. Përvoja e tij e gjatë institucionale, bagazhi politik dhe aftësia për të ndërtuar ura bashkëpunimi kanë qenë vlerë e madhe për Kosovën në periudha të rëndësishme të zhvillimit të saj politik dhe shtetëror”.

    “Nga secili pozicion që ka mbajtur, kontributi i tij ka qenë me vlerë dhe gjithmonë në funksion të interesit publik. Ai ka dëshmuar se stabiliteti politik, partneriteti me aleatët ndërkombëtarë dhe forcimi i institucioneve janë rruga e vetme për një Kosovë më të zhvilluar dhe më të fuqishme. Rikthimi i tij në listën e Aleancës vjen natyrshëm, ashtu si çdo herë në momentet kyçe për Republikën e Kosovës. Sot më shumë se kurrë kemi nevojë për njerëz me përvojë, integritet dhe vizion politik, të cilët dinë ta mbrojnë interesin shtetëror dhe ta çojnë përpara vendin”, shkroi ai.

  • Partia e Drejtësisë njofton se ka bërë marrëveshje për të garuar në listën e LDK’së

    Partia e Drejtësisë njofton se ka bërë marrëveshje për të garuar në listën e LDK’së

    Partia e Drejtësisë në krye me Ferid Aganin ka njoftuar për një marrëveshje të arritur me Lidhjen Demokratike të Kosovës për të garuar në listën e saj për zgjedhjet e 7 qershorit.

    “Pas zhvillimeve të fundit politike dhe marrëveshjes së arritur për bashkëpunim në kuadër të zgjedhjeve të 7 qershorit 2026, vlerësojmë se ky bashkëpunim përfaqëson një hap të rëndësishëm drejt forcimit të stabilitetit politik, përgjegjësisë shtetërore dhe rikthimit të besimit qytetar në institucionet e Republikës së Kosovës”, tha PD.

    Kjo parti tha se ky nuk është vetëm një bashkim elektoral, por “një angazhim për krijimin e një fryme të re bashkëpunimi politik, dialogu institucional dhe mobilizimi të potencialeve më të mira profesionale e kombëtare në shërbim të qytetarëve dhe të shtetit”.

    “Në këtë frymë, konsiderojmë se Lidhja Demokratike e Kosovës ka dëshmuar gatishmëri për reflektim, hapje dhe bashkim të energjive shtetformuese të vendit, duke konfirmuar kapacitetin e saj për ndryshim dhe për marrjen e përgjegjësive të mëdha shtetërore në periudhën që kemi përpara. Po ashtu, Partia e Drejtësisë ka vendosur që në këto zgjedhje të mbështesë këto procese pozitive dhe të japë kontributin e saj maksimal në funksion të suksesit të përbashkët politik dhe shtetëror.

    PD tha se Kosova ka nevojë për “më shumë bashkëpunim, maturi politike, stabilitet institucional dhe vizion të qartë zhvillimor”.

    “Qytetarët presin zgjidhje konkrete, përgjegjësi dhe përkushtim serioz ndaj interesit publik. Në këtë rrugëtim, do të angazhohemi me përkushtim të plotë për t’i shërbyer Republikës së Kosovës dhe qytetarëve të saj”.

  • Tahiri i AAK-së: Kjo legjislaturë ka nisur dhe ka përfunduar mbrapsht

    Tahiri i AAK-së: Kjo legjislaturë ka nisur dhe ka përfunduar mbrapsht

    Besnik Tahiri, ish-deputet i Aleancës për Ardhmërinë e Kosovës (AAK), ka thënë se nëse do e pyeste dikush për një vlerësim për legjislaturën e X-të, do përgjigjej se e ka nisur punën mbrapsht dhe e përfundoi edhe më mbrapsht.

    “Në ditën e nisjes së Kuvendit, është kërkuar votë prej deputetëve pa e pasur përpara deputeti së paku ekspozenë, së paku një orientim të politikave strategjike që Qeveria e ka bë. Për më keq nuk e kemi pasur as listën e ministrive dhe as emrat ministrave që vinë”, ka thënë ai, raporton Betimi për Drejtësi.

    Tahiri shtoi se legjislatura ka nisur mbrapsht pasi që të gjithë e kanë ditur që detyra e parë është formimi i Qeverisë dhe zgjedhja e presidentit. Dhe gjatë kësaj kohe kanë ndodhur momente që më shumë ka pasur tendencë të dominimit të agjendës së Kuvendit sesa rolin e Kuvendit pë ta zhbllokuar situatën.

    “Nëse bëjmë një analizë të kësaj legjislature, janë dy momente “historike”, parlamentare. E para kjo është legjislatura më e shkurtër në histori të Kosovës dhe e dyta më së shumti ka kërkesa për seanca të jashtëzakonshme shumica, në të kaluarën e ka pasur opozita”, është shprehur Tahiri.

    Sipas tij, agjenda politike ka qenë të zgjidhet një president që i shkon për shtati shumicës.

    Karakteristikë tjetër, sipas tij, është se askush nuk ka bërë asgjë për të mos shkuar në zgjedhje dhe kjo sipas tij është shumë interesante.

    “Vetëm qëllim me zgjedh president nuk ka pasur”, ka thënë Tahiri.

    Tahiri ka thënë në fund se AAK-ja kanë qenë të përjashtuar prej diskutimeve, por performancën në këtë legjislaturë e kanë bërë dhe dalin të jenë partia me aktive në Kuvend.

    “Jam krenar, është viti i katërt ku zgjedhem deputeti me aktiv”, tha ai.

    Ndryshe, Instituti i Kosovës për Drejtësi (IKD), të martën organizoi konferencë diskutimi me temën: “Legjislatura e X-të e Kuvendit të Kosovës: Sfidat, krizat dhe mësimet për të ardhmen”, në kuadër të së cilës u publikua raporti monitorues për punën e Legjislaturës së X-të të Kuvendit të Kosovës.

  • Mustafa i PDK’së: VV ka pasur synimin përgatitje për zgjedhje, u dhanë premtimet e njëjta

    Mustafa i PDK’së: VV ka pasur synimin përgatitje për zgjedhje, u dhanë premtimet e njëjta

    Arben Mustafa, ish-deputet i Partisë Demokratike të Kosovës (PDK), në konferencën e organizuar nga Instituti i Kosovës për Drejtësi (IKD), tha se nga fillimi i Legjislaturës së X-të, shumica parlamentare e ka pasur synim përgatitjet për zgjedhje të reja sesa që ka pasur një agjendë serioze legjislative apo qeverisëse.

    “I kishim të njëjtat premtime që ishin dhanë edhe para gjashtë viteve dhe në atë ekspoze paraqiteshin sikur premtime të reja pa dhanë asnjë llogari se çka është bë këto gjashtë vjet që nuk është realizuar të paktën ndonjëra prej tyre”, u shpreh ai.

    Tutje, Mustafa shtoi se Kryeministri Kurti atë ditë kur paraqiti këtë ekspoze foli sikur po dilte për herë të parë dhe po paraqiste vizionin e tij si kryeministër.

    “Pra, pa dhënë asnjë llogari, asnjë përgjigje pse nuk është realizuar të paktën një nga ato projektet e mëdha, u prezantoheshin aty sikur të ishte një vizion i ri dhe kjo ishte joserioze”, shtoi ai.

    Mustafa tha se kishte shkëputje mes asaj që tha Kurti në ekspoze dhe buxhetit që e solli në Kuvend.

    “Asnjë nga premtimet e mëdha që u paraqitën në ekspoze, nuk ishin të buxhetuara. Pra, kishim një shkëputje totale mes asaj që paraqiti Kryeministri në ekspoze dhe buxhetit që e solli në Kuvend për votim”, ka theksuar ai.

    Lidhur me debatin në Kuvend, ai tha se pushteti ka parë Kuvendin si makineri dhe nuk e kanë parë rolin e deputetëve në Kuvendc duke shtuar se shumë ligje sikur si për shëndetësinë, çmimet tavan, i kanë kaluar pa pasur debat parlamentar.

    “Asnjë mundësi nuk iu është dhënë deputetëve për të ushtruar rolin e tyre”, ka thënë Mustafa.

    Ndryshe, Instituti i Kosovës për Drejtësi (IKD), të martën organizoi konferencë diskutimi me temën: “Legjislatura e X-të e Kuvendit të Kosovës: Sfidat, krizat dhe mësimet për të ardhmen”, në kuadër të së cilës u publikua raporti monitorues për punën e Legjislaturës së X-të të Kuvendit të Kosovës.

  • Flokët biondë ju janë bërë si kashtë? Pesë hapa që ua kthejnë butësinë dhe shkëlqimin

    Flokët biondë ju janë bërë si kashtë? Pesë hapa që ua kthejnë butësinë dhe shkëlqimin

    Pas zbardhjes agresive, flokët kanë nevojë për pushim nga kimikatet, më pak nxehtësi, maska ushqyese, vajra dhe prerje të rregullt të majave të dëmtuara

    Dëshira e thjeshtë për ta freskuar pak pamjen ndonjëherë mund të kthehet në zhgënjim të madh. Pas zbardhjes së flokëve, në vend të nuancës së ftohtë bionde që keni pritur, në pasqyrë mund të shihni flokë të zbehtë, të brishtë, të thatë dhe pa jetë.

    Megjithatë, nuk duhet të shqetësoheni menjëherë. Rikuperimi i plotë nuk ndodh brenda një dite, por me kujdes të rregullt mund t’u ktheni flokëve butësinë, shkëlqimin dhe një pamje shumë më të shëndetshme. Gjëja më e rëndësishme është të mos e përkeqësoni më tej gjendjen.

    Harrojeni zbardhjen e përsëritur

    Gabimi më i madh pas një ngjyrosjeje të pasuksesshme është t’i nënshtroheni menjëherë një trajtimi tjetër zbardhues. Kjo vetëm e thellon dëmtimin e korteksit, shtresës së brendshme të flokut.

    Jepini flokëve pushim nga kimikatet të paktën dy deri në tre muaj. Në vitin 2026, stilistët gjithnjë e më shpesh po u japin përparësi nuancave natyrale dhe strukturës së shëndetshme të flokut. Flokët platin të dëmtuar duken të parregullt dhe të lodhur, ndërsa flokët e shëndetshëm, edhe në ngjyrën e tyre natyrale, gjithmonë duken më bukur.

    Zgjidhni modelim pa nxehtësi

    Tharësja, figaroja dhe piastra janë sfidë e vërtetë për flokët e dobësuar. Temperaturat e larta e avullojnë lagështinë dhe i bëjnë flokët edhe më të brishtë.

    Në modë janë valëzimet e lehta pa nxehtësi: gërsheta të buta, mbledhje të lirshme, bigudi me ngjitje ose forma të tjera të thjeshta që nuk e dëmtojnë flokun.

    Nëse nuk mund të hiqni dorë nga modelimi me nxehtësi, ulni temperaturën në minimum, jo më shumë se 120 gradë Celsius, përdorni mbrojtës termik dhe kufizojeni përdorimin në një ose dy herë në javë.

    Përdorni rregullisht maska ushqyese dhe vajra

    Flokët e dëmtuar kanë nevojë për hidratim intensiv. Kujdesi në shtëpi bëhet pothuajse po aq i rëndësishëm sa trajtimet në sallon.

    Përdorni vajra për gjatësinë dhe majat e flokëve, si vaji i kokosit, arganit ose jojobës. Mund t’i vendosni 20 deri në 30 minuta para larjes, ose gjatë natës, nëse flokët i tolerojnë mirë.

    Të dobishme janë edhe maskat rigjeneruese me keratinë dhe pantenol. Produktet që nuk shpëlahen, me silikone dhe proteina, mund t’u japin flokëve më shumë butësi, lëmim dhe shkëlqim.

    Shpëlarja e lehtë me uthull molle, e holluar mirë me ujë, mund të ndihmojë në mbylljen e kutikulës së flokut dhe në përmirësimin e shkëlqimit.

    Prisni rregullisht majat e thata

    Çdo tri deri në katër javë, prisni majat e dëmtuara për një deri në dy centimetra. Kjo nuk e ngadalëson rritjen e flokëve, por ndihmon që dëmtimi të mos përhapet më tej përgjatë gjatësisë.

    Flokët do të duken më të rregullt, ndërsa thyerja do të jetë më e vogël.

    Kujdes pa agresivitet

    Flokët e zbardhur dhe të dëmtuar kërkojnë trajtim shumë të butë.

    Lajini me ujë të vakët, jo me ujë të nxehtë, sepse temperatura e lartë e largon shtresën mbrojtëse natyrale.

    Përdorni shampon për flokë të dëmtuar, me shënime si “repair” ose “reconstruct”. Shamponin vendoseni kryesisht në rrënjë, ndërsa gjatësinë pastrojeni vetëm me shkumën që zbret gjatë shpëlarjes.

    Pas larjes, mos i fërkoni flokët me peshqir. Thjesht thajini lehtë duke i prekur me peshqir.

    Krehini flokët me kujdes, duke nisur nga majat. Nëse janë shumë të ndjeshëm, përdorni krehër me dhëmbë të rrallë dhe shmangni tërheqjen e fortë.

    Mbrojini edhe nga dielli. Përdorni sprej me filtër UV ose mbani kapelë, sidomos gjatë ekspozimit të gjatë.

    Çfarë nuk duhet të bëni pas zbardhjes së pasuksesshme

    Mos përdorni piling për lëkurën e kokës ose eksfoliantë agresivë, sepse mund ta irritojnë ose dëmtojnë lëkurën.

    Mos vendosni vajra dhe maska në flokë shumë të papastër, sepse mund të rëndojnë rrënjën dhe të bllokojnë poret.

    Mos e anashkaloni mbrojtjen nga nxehtësia, edhe kur përdorni tharësen në temperaturë më të ulët.

    Mos bëni gërsheta shumë të shtrënguara dhe mos përdorni kapëse metalike, sepse ato mund t’i thyejnë më lehtë flokët e tharë.

    Mos e teproni me maskat me proteina. Mjafton një herë në shtatë deri në dhjetë ditë, sepse proteina e tepërt mund t’i bëjë flokët të fortë dhe të brishtë.

    Sa zgjat rikuperimi pas zbardhjes agresive?

    Përmirësimet e para të dukshme, si zvogëlimi i thyerjes dhe rikthimi i shkëlqimit, zakonisht vërehen pas tri deri në katër javësh kujdes të rregullt.

    Megjithatë, rikuperimi i plotë i strukturës së flokut, sidomos kur ai është bërë poroz, nuk është gjithmonë i mundur. Pjesët e dëmtuara nuk mund të rikthehen plotësisht në gjendjen e mëparshme, por me kujdes të duhur flokët e rinj do të rriten më të shëndetshëm.

    Durimi, kujdesi i butë dhe prerja e rregullt e majave janë çelësi për ta kthyer pamjen e shëndetshme, butësinë dhe shkëlqimin e flokëve.

  • Ndërhyrja që tremb shumë gra shtatzëna: Kur është e nevojshme epiziotomia dhe si ta lehtësoni shërimin

    Ndërhyrja që tremb shumë gra shtatzëna: Kur është e nevojshme epiziotomia dhe si ta lehtësoni shërimin

    Dikur përdorej më shpesh, ndërsa sot rekomandohet vetëm kur ka arsye mjekësore. Organizata Botërore e Shëndetësisë thekson se epiziotomia nuk duhet të bëhet në mënyrë rutinore gjatë lindjes vagjinale

    Epiziotomia është një ndërhyrje kirurgjikale obstetrike që bëhet gjatë lindjes vagjinale, kur mjeku ose mamia bën një prerje të kontrolluar në perineum, pjesën e indeve ndërmjet hapjes vagjinale dhe anusit.

    Qëllimi është të zgjerohet dalja e kanalit të lindjes, të lehtësohet dalja e foshnjës dhe, në disa raste, të shmanget çarja e pakontrolluar e indeve. Prerja zakonisht bëhet në momentin kur foshnja është duke dalë, ndërsa pas lindjes qepet, më së shpeshti me penj që shpërbëhen vetvetiu.

    Megjithatë, epiziotomia nuk konsiderohet më ndërhyrje që duhet bërë në çdo lindje. Organizata Botërore e Shëndetësisë thekson se përdorimi rutinor ose i gjerë i epiziotomisë nuk rekomandohet te gratë që lindin në mënyrë vagjinale spontane. Sipas OBSH-së, nëse bëhet epiziotomia, duhet të ketë arsye të qartë mjekësore, anestezi lokale efektive dhe pëlqim të informuar të gruas.

    Kur dhe pse bëhet epiziotomia

    Sot epiziotomia bëhet në mënyrë përzgjedhëse, vetëm kur ekipi mjekësor vlerëson se përfitimi është më i madh se rreziku.

    Ajo mund të merret parasysh kur foshnja duhet të lindë më shpejt për shkak të gjendjes së saj, kur përdoret instrument obstetrik, si forcepsi ose vakuumi, kur perineumi nuk zgjerohet mjaftueshëm, ose kur ekziston rrezik për çarje më të rëndë të indeve. Mayo Clinic po ashtu thekson se profesionistët shëndetësorë nuk e rekomandojnë më epiziotominë për shumicën e lindjeve, por ajo mund të jetë e nevojshme në rrethana të caktuara, sidomos kur foshnja duhet të lindë shpejt.

    Sipas udhëzimeve të ACOG, përdorimi i kufizuar i epiziotomisë është më i favorshëm sesa përdorimi rutinor, sepse ndërhyrja e panevojshme mund të rrisë dhimbjen, nevojën për qepje dhe rrezikun e komplikimeve të caktuara pas lindjes.

    Si duket shërimi pas epiziotomisë

    Shërimi ndryshon nga një grua te tjetra. Dhimbja dhe parehatia zakonisht janë më të theksuara në ditët e para pas lindjes, ndërsa përmirësimi vërehet gradualisht.

    Në shumë raste, shërimi i plotë zgjat rreth katër deri në gjashtë javë, megjithëse koha mund të ndryshojë varësisht nga madhësia e prerjes, mënyra e qepjes, kujdesi pas lindjes dhe gjendja e përgjithshme e gruas. Mayo Clinic thekson se çarjet më të rënda vagjinale mund të kërkojnë katër deri në gjashtë javë ose më shumë për t’u shëruar.

    Gjatë kësaj periudhe mund të ndihen dhimbje gjatë uljes, ecjes ose urinimit, ndjesi djegieje, tërheqje në zonën e plagës dhe parehati gjatë lëvizjes. Këto shqetësime janë të zakonshme, por duhet të zbuten me kalimin e ditëve, jo të përkeqësohen.

    Kujdesi që ndihmon shërimin

    Higjiena është shumë e rëndësishme. Zona duhet të mbahet e pastër, të shpëlahet me ujë të vakët dhe të thahet butë, pa fërkim. Kujdesi i rregullt ndihmon në uljen e rrezikut për infeksion.

    Pushimi po ashtu ka rëndësi, sidomos ditët e para. Shmangia e qëndrimit të gjatë ulur dhe përdorimi i një pozicioni më të rehatshëm mund ta zvogëlojnë presionin mbi perineum.

    Dhimbja nuk duhet të injorohet. Nëse është e nevojshme, mund të përdoren barna kundër dhimbjes, por gjithmonë sipas këshillës së mjekut, veçanërisht nëse nëna ushqen foshnjën me gji.

    Ushtrimet e dyshemesë së legenit mund të ndihmojnë në rikthimin e tonusit muskulor dhe në uljen e presionit mbi plagën, por ato duhet të nisin vetëm kur gruaja ndihet gati dhe kur mjeku ose mamia e këshillon. NHS Wales thekson se forcimi i muskujve rreth vagjinës dhe anusit mund të ndihmojë shërimin dhe të zvogëlojë presionin mbi zonën e prerjes.

    Kur duhet të kërkohet ndihmë mjekësore

    Kontrolli mjekësor është i nevojshëm nëse dhimbja shtohet në vend që të ulet, nëse shfaqet skuqje, ënjtje, rrjedhje me erë të pakëndshme, qelb, temperaturë ose ndjesi se qepjet janë hapur.

    NHS këshillon që gruaja të kontaktojë maminë ose mjekun nëse qepjet bëhen më të dhimbshme, nëse ka rrjedhje me erë të pakëndshme ose nëse lëkura rreth prerjes është e kuqe dhe e ënjtur, sepse këto mund të jenë shenja infeksioni.

    Epiziotomia nuk është diçka nga e cila duhet pasur frikë paraprakisht, por është ndërhyrje për të cilën gruaja duhet të jetë e informuar. Në mjekësinë moderne ajo nuk bëhet si procedurë rutinore, por vetëm kur ka arsye të qartë për ta mbrojtur nënën, foshnjën ose ecurinë e lindjes.

    Biseda e hapur me gjinekologun ose maminë para lindjes mund të ndihmojë që gruaja ta kuptojë më mirë kur epiziotomia është e nevojshme, si bëhet dhe çfarë duhet të presë gjatë shërimit.