Author: K.B.

Instituti Kombëtar i Shëndetësisë Publike të Kosovës ka njoftuar se në periudhën 16 prill – 12 maj 2026, në Kosovë janë konfirmuar katërmbëdhjetë raste të fruthit, dhe se, sipas komunave numër më i lartë i rasteve raportohet nga komuna e Ferizajt pesë raste, Prishtinës tre raste, Kaçanikut tre raste dhe me nga një rast komunat: Lipjan, Fushë Kosovë dhe Gjilan.

Tutje, shtohet se, të tha rastet e konfirmuara janë të pavaksinuar me vaksinën kundër fruthit, shytave dhe rubellës si dhe kanë marrë trajtim spitalor, që dëshmon për potencialin serioz të komplikimeve të mundshme që mund të shkaktojë fruthi.

‘’ Duke marrë parasysh natyrën shumë ngjitëse të fruthit dhe rrezikun për përhapje të mëtejshme, IKSHPK u bën thirrje urgjente prindërve që të kontrollojnë kartelën e vaksinimit të fëmijëve të tyre dhe t’i vaksinojnë fëmijët në qendrën më të afërt të Mjekësisë familjare në komunën përkatëse’’, thuhet në reagim.

Postimi:

Situata epidemiologjike me fruth – përditësim

Instituti Kombëtar i Shëndetësisë Publike të Kosovës njofton se në periudhën 16 prill – 12 maj 2026, në Kosovë janë konfirmuar katërmbëdhjetë (14) raste të fruthit.

Sipas komunave: numër më i lartë i rasteve raportohet nga komuna e Ferizajt pesë (5) raste, Prishtinës tre (3) raste, Kaçanikut tre (3) raste dhe me nga një (1) rast komunat: Lipjan, Fushë Kosovë dhe Gjilan.

Të gjitha rastet e konfirmuara janë të pavaksinuar me vaksinën MMR (kundër fruthit, shytave dhe rubellës) si dhe kanë marrë trajtim spitalor, që dëshmon për potencialin serioz të komplikimeve të mundshme që mund të shkaktojë fruthi.

Duke marrë parasysh natyrën shumë ngjitëse të fruthit dhe rrezikun për përhapje të mëtejshme, IKSHPK u bën thirrje urgjente prindërve që të kontrollojnë kartelën e vaksinimit të fëmijëve të tyre dhe t’i vaksinojnë fëmijët në qendrën më të afërt të Mjekësisë familjare në komunën përkatëse.

Gjithashtu, rekomandohet që të shmangen kontaktet e panevojshme me persona të dyshimtë në fruth që shfaqin simptoma, si temperaturë e lartë, skuqje, ndryshime në lëkurë, kollë apo rrufë. Çdo person me shenja të dyshimta në fruth, duhet të paraqitet menjëherë në institucionet shëndetësore.

IKSHPK dhe institucionet shëndetësore janë duke bërë mbikëqyrjen aktive të situatës epidemiologjike dhe në gatishmëri të plotë për të menaxhuar situatën përmes ofrimit të shërbimeve të nevojshme për qytetarët. Paralelisht, po zbatohen masa konkrete në terren, përfshirë identifikimin e fëmijëve të pavaksinuar, kontaktimin aktiv të prindërve për t’i sjellë fëmijët për vaksinim, si dhe angazhimin e ekipeve mobile për vaksinimin me bazë në komunitet (derë më derë), në zonat me mbulueshmëri më të ulët të vaksinimit.

IKSHPK rikujton se vaksinimi mbetet mënyra më efektive dhe më e sigurt për parandalimin e fruthit dhe mbrojtjen e shëndetit publik. Çdo vonesë në vaksinim e rrit rrezikun për përhapje të mëtejshme dhe komplikime serioze, veçanërisht tek fëmijët dhe personat me imunitet të dobësuar.

Mbrojtja e shëndetit publik është përgjegjësi e përbashkët, prandaj IKSHPK bën thirrje për bashkëpunim dhe përgjegjësi qytetare me qëllim të mbrojtjes së shëndetit të fëmijëve.

Arben Gashi nga Lidhja Demokratike e Kosovës ka bërë të ditur se në këto zgjedhje të kandidojë për deputet, me numrin 28.

Ai përmes një postimi në Facbook, tha se renditja ka rëndësinë e saj, por sipas tij, në fund më e rëndësishmja është lidhja që krijohet me qytetarin.

“Sot u publikuan numrat e kandidatëve në listën e Lidhja Demokratike e Kosovës. Renditja ka rëndësinë e saj, por besoj se në fund më e rëndësishmja është lidhja që krijohet me qytetarin, besimi që ndërtohet dhe puna që bëhet me përkushtim”.

“Demokracia është e bukur sepse i jep secilit mundësinë të zgjedhë me bindje dhe me zemër për Kosovën që dëshiron të shohë nesër. Unë do të garoj me numrin 28. Me shpresë, me energji pozitive dhe me vullnet për të vazhduar punën në shërbim të qytetarëve dhe të Kosovës sonë. Voto me bindje. Zgjedh me besim. Vendos me shpresë”, ka shkruar ai.

Kuvendi i Komunës së Zetës të Malit të Zi ka miratuar një deklaratë me të cilën është shfuqizuar vendimi për njohjen e Kosovës.

Sipas raportimeve të RTCG, këshilltarët e Kuvendit Komunal të Zetës kanë votuar pro kësaj deklarate, duke e konsideruar si një akt politik të bazuar në qëndrimet e tyre ndaj vendimeve të mëparshme shtetërore.

Në seancë është theksuar se institucionet e mëparshme të Malit të Zi, që nga shpallja e pavarësisë së vendit, kanë injoruar, sipas tyre, vullnetin e një pjese të qytetarëve lidhur me statusin e Kosovës, raporton rtcg.me.

pic.twitter.com/2nRN5Cow7X

— Milan Knežević (@MilanKnezevic80) May 12, 2026

Deklarata gjithashtu përmban vlerësime politike për situatën e serbëve dhe malazezëve në Kosovë, duke pretenduar se pozita e tyre është përkeqësuar nën institucionet aktuale në Prishtinë.

Me këtë akt, asambleja lokale e Zetës ka kërkuar simbolikisht anulimin e vendimit për njohjen e Kosovës nga ana e Malit të Zi, ndonëse vendime të tilla i takojnë nivelit shtetëror.

Ndryshe, Mali i Zi e ka njohur Kosovën më 9 tetor 2008.

Vendimi u mor nga Qeveria e atëhershme e Malit të Zi, e udhëhequr nga Milo Gjukanoviq, rreth shtatë muaj pas shpalljes së pavarësisë së Kosovës më 17 shkurt 2008.

Pal Lekaj ka njoftuar se nuk do të garojë për deputet në listën e Aleancës për Ardhmërinë e Kosovës në zgjedhjet e 7 qershorit.

Ai tha se vendimi i tij hap rrugë për anëtarë të rinj në parti.

Lekaj shprehu mbështetje për kandidatin për kryeministër Ardian Gjini dhe për Aleancën për Ardhmërinë e Kosovës, ndërsa theksoi se do të vazhdojë angazhimin për fitoren e partisë në zgjedhje.

Postimi i plotë:

Të nderuar/a struktura të Aleancës,

Të nderuar/a simpatizantë të Aleancës,

Të dashur votues e mbështetës të mi,

Aleanca për Ardhmërinë e Kosovës nuk është thjesht një grupim politik, por që nga themelimi i saj ka qenë dhe mbetet një familje politike që ka dhënë kontribut të jashtëzakonshëm në shtetformimin, zhvillimin dhe sigurinë e atdheut.

Në themel të kësaj rruge qëndron vizioni i Ramush Haradinajt, një burrështetas i cili që nga vitet ’90 artikuloi dhe ndërtoi ideologjinë e një Aleance për Liri dhe Pavarësi. Ai është ndër ideatorët dhe luftëtarët më të mëdhenj të historisë së lirisë dhe pavarësisë së Kosovës, duke i dhënë drejtim dhe forcë një projekti politik me rrënjë kombëtare dhe vizion shtetndërtues.
Unë besova në këtë ideologji që nga ditët e para dhe u rreshtova me zemër e mendje në familjen politike të Aleancës. Bashkë me Ramushin dhe shumë burra e gra të përkushtuar, në etapa të ndryshme të shtetit, përballuam sfida të mëdha dhe shpesh të paimagjinueshme për kohën.

Për më shumë se 26 vite, Ramush Haradinaj ndërtoi një familje të fuqishme politike, duke mbledhur rreth vetes njerëzit më të zotë dhe më të përkushtuar të vendit. Kosova pati fatin që në dy mandate ai, bashkë me familjen politike të Aleancës, të ishte në krye të Qeverisë. Gjatë atyre mandateve u realizuan projekte dhe vendime të rëndësishme, të cilat sot janë pjesë e historisë më të re të Kosovës.

Personalisht, kam pasur nderin të jem në krah të Ramushit gjatë gjithë rrugëtimit të tij politik. Të jesh pranë një udhëheqësi dhe burrështetasi si ai është fat dhe privilegj i veçantë.
Sot, pas 26 vitesh, unë kam vendosur që në zgjedhjet e 7 Qershorit të mos garoj në listën e Aleancës, duke hapur dyert për anëtarët e rinj, por duke dhënë mbështetjen time absolute dhe duke u angazhuar edhe më shumë se asnjëherë më parë që Aleanca, bashkë me kandidatin për Kryeministër z. Ardian Gjini, të dalë fuqishëm në këto zgjedhje, me listën dhe emrat më të mirë që mund të ketë një grupim politik.

Unë besoj se familja jonë politike, bashkë me kandidatin për Kryeministër z. Gjini, me përvojën e akumuluar ndër vite dhe me individët që kanë kaluar nëpër të gjitha etapat e shtetndërtimit, do të dalë faqebardhë në këto zgjedhje dhe do ta kthejë shpresën për qytetarët e vendit.

Kryetari ynë, Ramush Haradinaj, do të mbetet gjithmonë shtyllë dhe themel i familjes sonë politike, andaj ju ftoj të gjithëve që të punojmë për fitoren e datës 7 Qershor.

Lista Serbe e ka dorëzuar listën e kandidatëve të saj për deputetë për zgjedhjet parlamentare të 7 qershorit në Kosovë.

Mediumi lokal Zubin Potok Info e ka publikuar listën e plotë me 25 kandidatë të Listës Serbe, të cilës i prin kryetari i kësaj partie Zlatan Elek.

Ky medium shkruan se në listë ka edhe emra të rinj, por edhe funksionarë dhe anëtarë të njohur nga më herët.

Lista e plotë:

Zlatan Elek
Igor Simiq
Ljiljana Stevanoviq
Slavko Simiq
Sërgjan Popoviq
Jovana Radosavljeviq
Milan Joksimoviq
Branislav Nikoliq
Tanja Vujoviq
Ivica Ceniq
Zoran Goluboviq
Verica Geraniq
Milan Kostiq
Marko Arsiq
Ruzhica Bozhoviq
Nemanja Bishevac
Violeta Trajkoviq
Sreten Ivanoviq
Jelena Maksimoviq
Mirosllav Vukojeviq
Mirjana Barah
Dushan Markoviq
Filip Gjurgjeviq
Aleksandra Simonoviq
Ana Gjuriq

Në media u raportua se Kryetari i Lidhjes Demokratike të Kosovës, Lumir Abdixhiku ka lënë jashtë dhjetëshes së parë, Hykmete Bajramin dhe Avdullah Hotin.

Për këtë të fundit u raporua se ai është pozicionuar me numër 11 si kandidat për deputet nga LDK-ja, ndërsa Hykmete Bajrami me numër 12.

Për këtë ka reaguar vetë Hoti në Facebook, ku ka shkruar se rëndësi ka numri i LDK-së, pasi numrat tjerë i përcaktojnë qytetarët.

“Numri i vetëm që ka rëndësi është numri i Lidhjes Demokratike të Kosovës. Numrat e tjerë i përcaktojnë qytetarët. I juaji, Avdullah Hoti”, ka shkruar Hoti në Facebook.

Subjektet politike kanë veç edhe sot afat për dorëzimin e listave të kandidatëve për deputetë, me të cilët do të garojnë në zgjedhjet e parakohshme për Kuvendin e Kosovës, të cilat do të mbahen më 7 qershor 2026.

Zëdhënësi i KQZ-së, Valmir Elezi bëri të ditur se afati do të përfundojë të martën në mesnatë.

“Sot, në orën 24:00, përmbyllet afati 11-ditor për subjektet politike (partitë politike, koalicionet, nismat qytetare dhe kandidatët e pavarur) për të dorëzuar listën me emrat e kandidatëve për deputetë për t’u certifikuar për pjesëmarrje në zgjedhjet e parakohshme të 7 qershorit. Dorëzimi i listës me emrat e kandidatëve për deputetë, duhet të bëhet përmes platformës elektronike dhe procedura është e ngjashme me zgjedhjet e fundit që u mbajtën në dhjetor të vitit të kaluar”, tha Elezi.

Agjencia e Statistikave të Kosovës (ASK) bënë të ditur se shkalla vjetore e inflacionit në muajin prill 2026 ka arritur në 7.5 për qind, krahasuar me të njëjtën periudhë të vitit të kaluar, ndërsa inflacioni mujor ishte 1.1 për qind.

Sipas Indeksit të Harmonizuar të Çmimeve të Konsumit (IHÇK), rritja më e madhe e çmimeve në baza vjetore është regjistruar te grupi i transportit me 16.1 për qind, pasuar nga strehimi, uji, energjia elektrike, gazi dhe lëndët tjera djegëse me 15.2 për qind.

Po ashtu, ngritje e çmimeve është vërejtur edhe te restorantet dhe shërbimet e akomodimit me 5.8 për qind, ushqimi dhe pijet joalkoolike me 5.6 për qind, si dhe pijet alkoolike, duhani dhe narkotikët me 5.1 për qind.

ASK-ja njofton se çmimet janë rritur edhe në sektorët e shëndetësisë me 4.7 për qind, kujdesit personal dhe shërbimeve të ndryshme me 3.6 për qind, mobiljeve dhe pajisjeve shtëpiake me 3.1 për qind, rekreacionit, sportit dhe kulturës me 3.0 për qind, si dhe veshjeve dhe këpucëve me 2.3 për qind.

“Kjo kryesisht është shpjeguar me ngritjen e çmimeve të ndikuara te grupet kryesore të COICOP-it: transport (16,1 %); strehim, ujë, energji elektrike, gaz dhe lëndë të tjera djegëse (15,2 %); restorante dhe shërbime akomodimi (5,8 %); ushqim dhe pije joalkoolike (5,6 %); pije alkoolike, duhan dhe narkotikë (5,1 %); shëndetësi (4,7 %); kujdes personal, mbrojtje sociale dhe mallra e shërbime të ndryshme (3,6 %); mobile dhe pajisje shtëpiake dhe mirëmbajtje rutinore (3,1 %); rekreacion, sport dhe kulturë (3,0 %); dhe veshje dhe këpucë (2,3 %)”, thuhet në njoftimin e fundit të ASK-së.

Në anën tjetër, ulje e çmimeve është regjistruar në grupin e informacionit dhe komunikimit me 0.2 për qind dhe në sektorin e arsimit me 0.6 për qind.

Sa i përket ndryshimeve mujore, krahasuar me marsin 2026, ASK-ja bën të ditur se inflacioni prej 1.1 për qind është ndikuar kryesisht nga rritja e çmimeve në transport me 4.9 për qind, pijet alkoolike dhe duhani me 1.2 për qind, rekreacioni dhe kultura me 0.4 për qind, si dhe mobiljet dhe pajisjet shtëpiake me 0.3 për qind.

Rritje më të lehtë të çmimeve pati edhe te ushqimi dhe pijet joalkoolike, si dhe te veshjet dhe këpucët me nga 0.1 për qind.

Ndërkohë, rënie mujore e çmimeve është shënuar te grupi i kujdesit personal dhe shërbimeve të ndryshme me 0.2 për qind.

Ndërkohë, sipas ASK-së, inflacioni vjetor në mars 2026 ishte rritur mesatarisht 6.7%./KP/

Komuna e Deçanit ka organizuar Akademi Përkujtimore për vdekjen e drejtorit të Bujqësisë, Rifat Stojkaj.

35 vjeçari vdiq aksidentalisht pas një aksidenti rrugor.

Ceremonia e varrimit bëhet sot në ora 17:00 në varrezat e fshatit Lloqan.

Po vazhdon periudha e aplikimit për regjistrim të votuesve jashtë Kosovës, e cila ka filluar më 6 maj dhe do të përfundojë më 17 maj.

Zëdhënësi i Komisionit Qendror të Zgjedhjeve, Valmir Elezi ka treguar për Klankosova.tv se që nga fillimi i këtij procesi dhe deri më tani janë mbi 59 mijë aplikime.

“Në bazë të të dhënave, nga fillimi i këtij procesi dhe deri më tani (e martë, 12 maj 2026, ora 10:00, përmes platformës elektronike http://diapsora.kqz-ks.org janë pranuar 59,415 kërkesa për regjistrim, prej të cilave janë aprovuar 49,493, ndërsa 4,944 të tjera janë refuzuar dhe 4,957 janë në pritje për shqyrtim”.

“Nga 49,493 aplikime të aprovuara, 11,782 shtetas të Kosovës janë regjistruar për të votuar fizikisht në përfaqësi diplomatike, 1,325 janë regjistruar për të dërguar pakon me fletëvotim në kutinë postare të KQZ-në në Kosovë dhe 36,386 janë regjistruar për të dërguar pakon me fletëvotim në kutinë postare jashtë Kosovës”, deklaroi Elezi.

Siç bëri të ditur ai, vendet me numrin më të madh të votuesve të regjistruar për zgjedhjet e 7 qershorit janë: Gjermania pasuar nga Zvicra, Franca e Suedia.

“Shtetet me numrin më të madh të votuesve të regjistruar janë: Gjermani (24,624), Zvicër (11,063), Francë (2,172), Suedi (2,058), Austri (1,508) dhe Mbretëri e Bashkuar (1,337), ShBA (1,115) dhe Itali (1,046)”.

Kryetari i Partisë Demokratike të Kosovës, Bedri Hamza, ka njoftuar se listës së kandidatëve për deputetë i është bashkuar edhe Kolonel Skender Hoxha, një emër i njohur në fushën e sigurisë dhe mbrojtjes në Kosovë.

Hamza vlerësoi lart kontributin shumëvjeçar të Hoxhës, duke theksuar se ai ka shërbyer me dekada për vendin, që nga lufta çlirimtare e deri te ndërtimi dhe forcimi i institucioneve të sigurisë së Kosovës.

Sipas tij, Skender Hoxha ka mbajtur pozita të rëndësishme, si ish-komandant i Brigadës 124 të UÇK-së, ish-atashe ushtarak i Kosovës në Zagreb dhe Komandant i Gardës Kombëtare. Për kontributin e tij në shërbim të shtetit, ai është nderuar edhe me Medaljen e Karrierës.

“Në një kohë kur Kosova ka nevojë për njerëz me integritet, përvojë dhe ndjenjë të lartë përgjegjësie, ardhja e Kolonel Skender Hoxhës është një vlerë e shtuar për ekipin tonë”, ka deklaruar Hamza.