Author: K.B.

Departamenti Amerikan i Shtetit ka njoftuar një shpërblim deri në 15 milionë dollarë për informacione që lidhen me dërgesat e naftës të lidhura me Gardën Revolucionare Iraniane dhe rrjetet që lehtësojnë aktivitetet e saj.

Në një deklaratë të publikuar nga programi “Shpërblime për Drejtësi”, autoritetet amerikane u kanë bërë thirrje personave që disponojnë informacione mbi transportet e naftës bruto, anijet cisternë të përfshira, kompanitë e përdorura apo individët e lidhur me transferimet e cilësuara si “të paligjshme”, që të bashkëpunojnë me autoritetet amerikane.

Sipas Washingtonit, Irani prej kohësh përdor rrjete ndërkombëtare transporti dhe ndërmjetësimi për të shmangur sanksionet ekonomike të vendosura nga SHBA-ja dhe për të financuar aktivitete ushtarake si edhe grupe aleate në Lindjen e Mesme.

Autoritetet amerikane kanë shtuar përpjekjet për të goditur financimin e strukturave të lidhura me Gardën Revolucionare, të cilën SHBA e konsideron organizatë terroriste.

Lista Serbe ka publikuar listën e kandidatëve për zgjedhjet e ardhshme parlamentare.

Në listë gjenden 25 kandidatë, ndërsa i pari në listë është Zllatan Elek, kryetar i këtij subjekti. Në listë janë edhe Igor Simiq, Liljana Stevanoviq, Sllavko Simiq e të tjerë.

Ajo që është risi në këtë listë është Jovana Radosavleviq, e cila gjendet me numrin rendor gjashtë dhe pranë emrit të saj është shënuar se është “mastere e shkencave politike për çështje ndërkombëtare”.

Radosavleviq deri më tani ishte e njohur si aktiviste lokale në pjesën veriore të Kosovës dhe drejtoreshë ekzekutive e OJQ-së ( Iniciativa e Re Sociale) , një prej organizatave joqeveritare aktive të komunitetit serb në Kosovë.

Ajo gjithashtu, pothuajse në të njëjtën kohë me Listën Serbe, ka konfirmuar në rrjetet sociale se po largohet nga sektori civil dhe po hyn në politikë.

“Pas dhjetë vitesh përpjekjesh përmes sektorit civil, ndiej se ka ardhur momenti të vazhdoj më tej dhe ta vazhdoj atë luftë në një vend tjetër, përmes angazhimit politik, aty ku besoj se mund të kem ndikim më konkret dhe më të drejtpërdrejtë në proceset dhe vendimet që formësojnë jetën e njerëzve”, ka deklaruar ajo.

Ajo njoftoi gjithashtu se ka lënë pozitën e drejtoreshës ekzekutive të kësaj organizate që e kishte udhëhequr që nga themelimi, duke vlerësuar se vendimi është rezultat i “viteve të përvojës, bisedave, dilemave dhe bindjes së thellë”.

Sipas mediumit në gjuhën serbe Kossev, ajo nuk ka konfirmuar drejtpërdrejt se po i bashkohet Listës Serbe. Mediumi shkruan se ajo nuk i është përgjigjur mesazhit për ta konfirmuar këtë dhe për të sqaruar motivin e kandidimit në këtë listë, ndërsa nuk i është përgjigjur as thirrjes telefonike.

Më herët, në zgjedhjet e kaluara, Listës Serbe i ishte bashkuar si kandidat edhe babai i saj, kirurgu Zvonko Radosavleviq, shkruan ky medium.

Ndryshe, zgjedhjet e reja parlamentare do të mbahen më 7 qershor, ndërsa partitë politike shqiptare kanë deklaruar se nuk duan të bashkëpunojnë me këtë subjekt pas sulmit terrorist në Bansjkë ku përgjegjësinë kryesore e ka pranuar Millan Radoiqiç ish-nënkryetar i kësaj liste i cili vazhdon të mbetet i lirë në Serbi. Kjo listë mbështetet nga pushteti dhe Aleksandar Vuqiç i Serbisë.

Kryeministri i Shqipërisë, Edi Rama ka reaguar në platformën “X” për marrëveshjen me Italinë për refugjatët, duke u shprehur i prerë se pakti do të vazhdojë “për sa kohë vendi fqinj do të dojë”.

Ai ka sqaruar se qëndrimi zyrtar i Shqipërisë mbetet i pandryshuar dhe marrëveshja me Italinë do të vazhdojë të jetë në fuqi dhe nuk është në diskutim për t’u ndërprerë në mënyrë të njëanshme.

“Të gjithë gazetarëve nga Italia dhe më gjerë, që po kontaktojnë lidhur me një citim të pasaktë të raportuar nga një media pas një interviste me Ministrin e Jashtëm të Shqipërisë”.

“Më lejoni ta ritheksoj qartë, dhe shpresoj përfundimisht, se protokolli ynë me Italinë do të vazhdojë të jetë në fuqi, për aq kohë sa Italia e dëshiron atë.”, është shprehur Rama, duke nënvizuar se bashkëpunimi mes dy vendeve vijon normalisht dhe në respekt të marrëveshjes së nënshkruar.

Një rast jo shumë i zakonshëm ka ndodhur disa ditë më parë në Prishtinë.

Sipas policisë, një burrë dyshohet se makinën që e mori me qira, e ka shitur në Serbi, transmeton Klankosova.tv.

Në njoftimin zyrtar bëhet e ditur se njësitet policore janë duke hetuar rastin.

“Ankuesi mashkull kosovar me 12.05.2026 ka raportuar se, i dyshuari mashkull kosovar me datë 04.05.2026 nga ankuesi kishte marrë me qira veturën me targa vendore dhe sipas tij me të njëjtën veturë dyshohet se pasi është futur në territorin e Serbisë, të njëjtën e ka shitur atje në një auto servis. Lidhur me rastin është informuar edhe prokurori, ndërsa njësitet policore janë duke hetuar rastin”, thuhet në raportin e policisë.

Ehat Miftaraj nga Instituti i Kosovës për Drejtësi (IKD), ka reaguar ndaj listës së kandidatëve për deputetë që është publikuar nga Lëvizja Vetëvendosje për zgjedhjet e 7 qershorit.

Miftaraj, përmes një postimi në profilin e tij në rrjetin social Facebook, ka shkruar se në listën e kësaj partie ka persona që janë të dënuar për vepra penale dhe të akuzuar për vepra penale të korrupsionit.

Postimi i tij i plotë:

Lista e kandidateve te LVV per deputete ishte e mbushur me persona qe jane te denuar per vepra penale dhe te akuzuar per vepra penale te korrupsionit dhe vepra tjera penale.

Tash paramendo cfare vullneti ka kjo parti me kryer Vettingun ose me miratu Ligjin per Byrone per Konfiskimin e Pasurise se Fituar ne menyre te kunderligjshme. Me konfisku pasurine qe e kane vjedh ne gati shtate vite qe qeversin me vendin.

Opozita epiqender e fushates parazgjedhore per keto zgjedhje do te duhej te kishte vettingun, ligjin per Byrone, Strategjine per Parandalimin e Korrupsionit. Sa ka pas korrupsion ne vitet e fundit, vetem shikone pasurine e deputeteve, ministrave dhe keshilltareve te LVV.

Ne vitin 2020 shumica prej tyre rubriken e deklarimit te pasurise e kishte te zbrazet, kurse tani mbi 70% te tyre kane ne pronesi shtepi neper lagje te shtrenjta, banesa, lokale, vetura dhe jete te shtrenjte.

Me hajna nuk behet shteti.

BE-ja po negocion buxhetin e saj të ardhshëm afatgjatë, Kornizën Financiare Shumëvjeçare për vitet 2028-2034.

Komisioni Evropian propozoi 1.8 trilionë euro, por Parlamenti dëshiron 1.96 trilionë euro ndërsa bisedimet fillojnë në vitin 2025, duke lënë një boshllëk prej 175 miliardë eurosh që pasqyron prioritetet konkurruese.

Mbrojtja është fituesja. Buxheti ndan 131 miliardë euro për mbrojtjen, sigurinë dhe hapësirën, pesë herë më shumë se MFF-ja aktuale.

Financimi i mobilitetit ushtarak rritet dhjetëfish, i nxitur nga lufta e Rusisë në Ukrainë dhe dyshimet në lidhje me garancitë e sigurisë së SHBA-së.

Fermerët, rajonet më të varfra dhe organizatat e shoqërisë civile humbasin, duke u përballur me ndarje të reduktuara. Çekia, Sllovenia dhe Portugalia marrin më pak sipas formulës së re.

Shtetet kursimtare, Gjermania, Holanda, Suedia dhe Austria, duan një buxhet më të ligët pa borxh të përbashkët. Parlamenti kërkon rritje të fondeve për klimën, kohezionin dhe qytetarët.

Parlamenti voton për mandatin e tij negociues më 18 maj 2026. Arritja e një marrëveshjeje përfundimtare para vitit 2027 është e mundur, por larg të qenit e sigurt.

Sot shënohet 27 vjetori i Masakrës në Korishë, e cila është njëra ndër ngjarjet më tragjike të luftës në Kosovë, ku më 13 maj 1999 forcat ushtarake dhe policore serbe kryen një masakër të rëndë ndaj civilëve shqiptarë.

Në përkujtim të kësaj dite të dhimbshme, qytetarë, familjarë të viktimave dhe përfaqësues institucionalë rikujtojnë sakrificën e 77 civilëve të pafajshëm, të cilët u vranë gjatë sulmit të forcave serbe mbi popullsinë civile të Korishës dhe fshatrave përreth.

Masakra ndodhi në kohën kur banorët e fshatrave Korishë, Budakovë, Bllacë, Reshtan, Mushtisht dhe Grejkoc ishin ndaluar dhe grumbulluar nga ushtria dhe policia serbe. Sulmi i përgjakshëm la pas dhjetëra të vrarë dhe shumë familje të shkatërruara, duke u kthyer në një nga krimet më të rënda të kryera ndaj civilëve shqiptarë gjatë luftës në Kosovë.

“Dita e Martirëve” në Korishë vazhdon të kujtohet çdo vit si simbol i dhimbjes, sakrificës dhe kujtesës për viktimat e pafajshme që humbën jetën në pranverën e vitit 1999.

Zhdukja e një gruaje e cila është raportuar nga familjarët ditën e djeshme ka tronditur komunën e Deçanit.

Ndërkohë, operacioni për kërkimin e saj po vazhdon.

Kështu deklaroi për Klankosova Fadil Gashi, zëdhënësi i Policisë për rajonin e Pejës.

“Operacioni i kërkimit po vazhdon. Në terren kanë dal policia dhe ekipet e kërkim shpëtimit. Ende nuk kemi ndonjë gjurmë të saj”, deklaroi Gashi

Për rastin në fjalë, mbrëmë në Edicionin Special në Klan Kosova ka folur edhe Fidan Abazi nga Kërkim-Shpëtimi Malor i Kosovës.

Sipas tij, gjatë kërkimeve është gjetur një pjesë veshjeje që dyshohet t’i përkasë gruas së zhdukur, në afërsi të Manastiri i Deçanit.

“Ne jemi duke i zhvilluar aktivitetet tona të kërkimit edhe krejt çka mundemi me thanë deri më tani në këtë drejtim”, deklaroi ai

Ndërkaq për gjendjen e saj shëndetësore, thuhet se ajo vuante nga depresioni.