Author: K.B.

Numri një i BE-së për zgjerim, Marta Kos, do të qëndrojë në Kosovë, të premten.

Në fakt, komisionerja sllovene, vjen në Prishtinë, siç shkruan KosovaPress, të enjten mbrëma, direkt nga Londra, ku gjatë ditës ka paraparë të ketë dy takime.

Në Kosovë ndërkaq, ajo ka planifikuar të realizojë tri të tilla. Dy nga to janë me përfaqësuesit “në detyrë” të institucioneve.

Njëra nga to, sipas një agjende të bërë të ditur nga Komisioni Evropian, do të jetë më ushtruesen e detyrës së presidentes, Albulena Haxhiu.

I dyti me kryeministrin në detyrë, Albin Kurti. Me këtë të fundit, ka parapare edhe një dalje para medieve, në orën 11 e 30.

Takimi i tretë i Kos në Prishtinë nuk është planifikuar të jetë me përfaqësues të opozitës, por me ata të shoqërisë civile.

Vizita e së premtes në Kosovë do të jetë e para për komisioneren për zgjerim në BE, prejse ajo mori detyrën, në vitin 2024. Agjenda e saj nuk parasheh ndonjë vizitë në vendet tjera të rajonit, para ose pas qëndrimit në Prishtinë.

Kos kishte planifikuar një vizitë në Kosovë më 12 mars, por ajo u anulua për shkak të zhvillimeve politike të atyre ditëve – presidentja Vjosa Osmani pati nxjerrë një dekret për shpërndarje të Kuvendit, më 6 mars meqenëse ky organ shtetëror nuk ia doli ta zgjedh kryetarin e shtetit, një ditë me herët, kur ishte afati i fundit për ta bërë një gjë të tillë.

Vizita e së premtes i bie të realizohet tri javë para zgjedhjeve të reja që mbahen në Kosovë, më 7 qershor

Komisionerja për zgjerim e BE-së vjen në Prishtinë tri ditë pas deklaratës së fortë shpresëdhënëse që bëri gjatë një takimi të Grupit të Miqve të Ballkanit Perëndimor (ku bëjnë pjesë shtate vende anëtare të Unionit, përfshirë shtetet mosnjohëse të Kosovës – Sllovakinë dhe Greqinë) në Bratisllavë të Sllovakisë, ku tha që siguria evropiane është e lidhur ngushtë me stabilitetin e Ballkanit Perëndimor.

“Nëse nuk e integrojmë fqinjësinë tonë në Bashkimin Evropian në këtë situatë, po ta quaj, të çmendur gjeopolitike, ku për herë të parë kemi forca të jashtme destabilizuese që do të dëshironin të na shihnin të dështojmë në procesin e anëtarësimit, ato mund të ndërhyjnë dhe më pas t’i përdorin ato vende kundër nesh, ashtu siç po bën, për shembull, Rusia në Bjellorusi, duke i përdorur migrantët si armë kundër BE-së”, tha ajo.

Sot në Kosovë pritet përmirësim i motit. Parashihet mot me diell, por edhe me vranësira lokale.

Vranësira mund të marrin karakter zhvillimi orëve të pasdites me mundësi për rrebeshe të izoluara shiu me vetëtima dhe bubullimë.

Mëngjesi do të jetë i ftohtë me temperatura minimale deri në 4 gradë Celsius, kurse gjatë ditës rritje rapide e temperaturave me maksimalen që do të arrijë deri në 21 gradë Celsius

Politikani i Gjelbër gjerman Cem Özdemir është zgjedhur të mërkurën kryeministër i Landit të Baden-Württembergut. Prindërit e tij erdhën para shumë dekadave nga Turqia. Pak para se t’i fitonte zgjedhjet, Özdemir bëri publike martesën e tij me një juriste shqiptare. Özdemir është përkrahës i madh i shtetësisë së Kosovës.

Landi i Baden-Württembergut gjendet në jug të Gjermanisë, në kufi me Zvicrën. Nëse hartën e Gjermanisë e krahasojmë me trupin e një njeriu, i bie që Baden-Württembergu të jetë diku nga këmbët. E vërteta është: Baden-Württembergu është zemra e industrisë gjermane, një rajon i njohur me marka të famschme si Bosch, Mercedes, Porsche, Ritter. Vitin që shkoi Prodhimi i Brendshëm Bruto (PBB) i këtij Landi ishte rreth 670 miliardë euro. Kosova mezi arrin në 11 miliardë dollarë. PBB-ja është vlera e përgjithshme e të gjitha mallrave dhe shërbimeve të prodhuara brenda vendit.

Që nga e mërkura kryeministër i Baden-Württembergut është Cem Özdemir – dhe ky është një lajm historik jo vetëm për këtë regjion gjerman. 60-vjeçari Özdemir është i pari kryeministër i një Landi gjerman me origjinë turke. Si kryeministri i deritanishëm Winfried Kretschmann, edhe Özdemir vjen nga Partia e Gjelbër.

Prindërit e Özdemir erdhën në fillim të viteve 1960-të në Gjermani, pasi ky vend kishte nevojë për punëtorë. Atëbotë në Gjermani mërguan si gastarbajterë edhe shumë shqiptarë nga Jugosllavia. Zgjedhjen në postin e kryeministrit të Baden-Württembergut Özdemir e ka quajtur “kulmi absolut i jetës sime”. Nga një fëmijë punëtorësh të ardhur nga provinca turke në zyrën e kryeministrit – kjo karrierë tingëllon pak si ëndërr.

Özdemir u lind në Bad Urach panë Schwäbische Alb, një vargmal në Gjermaninë Jugore. Mund të thuhet, gjithsesi pa përçmim, se Özdemir është rritur në provincën gjermane. Nëna ishte rrobaqepëse, babai punëtor në fabrikë. E Cemi i vogël? Nxënës me vështirësi në shkollë. Edhe sot ai mban kontakte me një mësuese që e ndihmoi të marrë hapat e parë në shkollë. Përkundër barrierave, Özdemir arriti të studiojë për pedagogji sociale.

Partia e Gjelbër u themelua më 1980, në vitin vijues Cem Özdemir u bë anëtar i saj, duke u angazhuar për mbrojtjen e ambientit dhe kundër energjisë bërthamore. Një figurë udhëheqëse e të Gjelbërve ishte atëbotë Joschka Fischer, i cili më vonë u bë ministër i Jashtëm i Gjermanisë.

Özdemir përherë ishte i pari. Më 1994 u zgjodh për herë të parë në Bundestag (parlamentin gjerman) dhe ishte deputeti i parë me prejardhje turke. Për 10 vite (2008-2018) ishte kryetar i Partisë së Gjelbër të Gjermanisë. Në qeverinë e parafundit të kancelarit socialdemokrat Olaf Scholz, Özdemir ushtroi funksionin e ministrit të Bujqësisë. Ai është përmendur edhe si kandidat për ministër të Jashtëm të Gjermanisë. Özdemir është mbrojtës i fuqishëm i vlerave perëndimore dhe disa herë e ka kritikuar ashpër autoritarizmin e Rexhep Taip Erdoanit. Kjo nuk u pëlqen militantëve të Erdoanit në Gjermani. Özdemir ka treguar se shpesh ka pasur probleme kur ka marrë taksinë në Berlin. Shoferët turq e kanë fyer dhe trajtuar keq. Banesa e tij në Berlin është gjuajtur me gurë.

Por Özdemir nuk është dorëzuar. Ai e sheh veten si mbrojtës të të drejtave të njeriut. Dhe këtë e ka dëshmuar edhe në rastin e Kosovës, të cilën nuk e ka parë vetëm si çështje të të drejtave të njeriut, por edhe si betejë legjitime të një populli për liri, pavarësi dhe shtet të vetin.

Gjatë vizitës në Kosovë më 2024 Özdemir vizitoi edhe Krushën e Madhe. Ai shprehu pakënaqësinë e tij që nuk janë dënuar ende ata pjesëtarë të forcave serbe që kryen krime kundër popullsisë civile. Özdemir viteve të fundit ka qenë pjesëmarrës i rregullt në pritjet e Ambasadës së Kosovës në Berlin me rastin e përvjetorit të pavarësisë së Kosovës dhe ka marrë fjalën duke lavdëruar të arriturat e Kosovës përkundër trashëgimisë së rëndë të luftës. Në një fotografi Özdemir shihet gjatë një pritjeje për 17-vjetorin e pavarësisë duke mbajtur në dorë një kavanoz me ajvar të prodhuar në Kosovë.

Në zgjedhjet e 8 marsit për parlamentin e Landit të Baden-Württembergut, të Gjelbrit fituan me një epërsi të vogël ndaj konservatorëve të CDU-së së kancelarit Friedrich Merz. Një fitore e të Gjelbërve nuk pritej dhe kjo u arrit falë talentit politik të Özdemirit, por edhe gabimeve të kundërshtarëve të tij politikë. Në Baden-Württemberg jetojnë rreth 180 mijë shqiptarë dhe një pjesë e konsiderueshme e tyre në zgjedhjet e fundit kanë përkrahur Cem Özdemirin dhe partinë e tij.

Në librin e tij “Unë jam vendës” (Ich bin Inländer) Özdemir tregon se ishte entuziazmuar me politikën amerikane kur në Gjermani ishte gati e paimagjinueshme që një njeri me origjinë të huaj të marrë përgjegjësi të lartë politike. Më 1997 ai shkruante: „Fakti që një pasardhës i një familjeje emigrantësh synon postin më të lartë në shtet si kandidat për president, si Michael Dukakis në fund të viteve tetëdhjetë, në Shtetet e Bashkuara nuk përbën temë diskutimi. Unë vërtet nuk kam filluar të marshojë drejt zyrës së Kancelarit, as nuk i kam shkundur ndonjëherë rrethojat e selisë së Kancelarit pas nja dy gotave birrë duke thirrur: ‘Dua të hyj brenda!’, por në këtë aspekt, SHBA-të më kanë magjepsur që në udhëtimin tim të parë“.

Özdemir është politikan pragmatik. Ndërsa disa ideologë në partinë e tij veturën e quajnë si diçka vdekeprurëse për ambientin, ai kultivon afërsinë me industrinë e automobilave. Kur ishte kryetar i të Gjelbërve, Özdemir e ftoi që në vitin 2016 shefin e atëhershëm të Mercedesit, Dieter Zetsche, si folës në kongresin federal të partisë, gjë që shkaktoi pakënaqësi te një pjesë e delegatëve.

Para zgjedhjeve të marsit, Özdemir u martua me Flavia Zaka, një juriste shqiptare, familja e së cilës emigroi nga Shqipëria në Kanada. Në vitin 2008 Zaka studoi drejtësinë në Gjermani dhe pastaj u kthye në Kanada. Në vitin 2023 një shoqe e saj e ftoi në Stuttgart në një festë ditëlindjeje – aty Zaka u njoh me Özdemirin. Sipas mediave gjermane Zaka punonte në atë kohë në Toronto si avokate dhe këshilltare për ligjin mjedisor dhe të drejtat e njeriut për qeverinë kanadeze dhe organizata joqeveritare. Me zgjedhjen e Özdemirit në postin e kryeministrit të Baden-Württembergut, një shqiptare do të jetë zonjë e parë, një First Lady, siç thuhet në botën anglosaksone, ose: Landesmutter, siç thonë shvabët e Baden-Württembergut, që në shqip i bie: nëna e Landit. Në një intervistë Zaka ka thënë se e pëlqen qartësinë e gjuhës gjermane që nga rinia e saj dhe e çmon letërsinë gjermane, veçanërisht lirikën e Rainer Maria Rilkes.

Kryeministri i ri i Baden-Württembergut, Cem Özdemir, njihet si mbështetës i bizneseve, është vegjetarian dhe preferon të lëvizë me biçikletë. Jo përherë pajtohet me partinë e tij. Në politikën e migracionit ai është kritik ndaj atyre që vijnë në Gjermani dhe refuzojnë të integrohen. Özdemir prej vitesh ka kërkuar vigjilencë të shtuar të autoriteteve dhe të politikës ndaj fanatikëve islamistë. Një debat të gjerë publik zgjoi një editorial i Cem Özdemir, i botuar në shtator 2024 në gazetën “Frankfurter Allgemeine Zeitung”. Aty Özdemir përshkroi se si disa burra me prejardhje të huaj kishin ngacmuar vajzën e tij dhe shoqet e saj. Ai kërkoi një debat pa dorëza mbi “strukturat patriarkale dhe rolin e gruas në shumë vende me karakter islamik”.

Gjykata Themelore në Prizren e ka dënuar të akuzuarin, Sead Halilaj me 15 vjet burgim për kryerjen e veprës penale “Vrasje e rëndë”, të kryer në mënyrë mizore dhe dinake.

Aktgjykimi është marrë nga gjykatësi i Departamentit të Krimeve të Rënda në Prizren, Artan Sejranni- kryetar i trupit gjykues, dhe anëtarët- gjykatësit Teuta Krusha dhe Sadije Selmani, më 24 shkurt 2026.

Sipas aktgjykimit, Halilaj me dashje ka privuar nga jeta në mënyrë mizore dhe tinëzare viktimën I.K., më 4 qershor 2013.

Në vendim thuhet se vrasja është kryer bashkë me vëllanë e viktimës, Senad Kullaj, për motive të ulëta, pasi e njëjta punonte si këngëtare dhe valltare në një lokal nate në Mitrovicë.

“..në atë mënyrë që së bashku me Senad Kullaj nga Shkodra – Republika e Shqipërisë vjen për të vizituar I.in e cila ishte duke punuar si këngëtare – valltare në Mitrovicë në lokalin ,,Sh…” pronë e M.S.,, me ç ‘rast takohen në Prizren, ku qëndrojnë në shtëpinë e F.R., ku ajo ka banuar më herët, dhe diku në orët e mëngjesit pasi nuk është pajtuar I.K., të kthehet në shtëpi pasi familja nuk është pajtuar lidhur me punën e saj si valltare dhe këngëtare në lokalet e natës papritmas i akuzuari Sead Halilaj me thikë së bashku me Senad Kullaj fillojnë të godasin I.K në pjesë të ndryshme të trupit”, thuhet në aktgjykim.

Si rrjedhojë, aty thuhet se viktimës i kanë shkaktuar plagë prerëse në fyt duke ia dëmtuar rrugët e frymëmarrjes dhe këputur enët e gjakut.

“..duke shkaktuar plagë prerëse shpuese në anën e pasme të djathtë dhe të majtë të kokës, në pjesën e laprës së veshit të majtë, në anën e djathtë të regjionit të mjekrës, gërvishtje në anën e sipërme të majtë të përparme të kraharorit, në anën e majtë e sipërme të shpinës, në anën e pasme të krahut të majtë, në anën e pasme të dorës së majtë në bërryl, ndrydhje dhe gërvishtje në anën e pasme të parakrahut të dorës së majtë si dhe në anën e brendshme të dy shuplakave të duarve, si dhe plagë prerëse shpuese në anën e djathtë të qafës në pjesën e përparme të qafës e cila prerje kishte dëmtuar rrugët e ushqimit, të frymarrjes dhe kishte këputur enët e gjakut dhe nervat në këtë regjion që shkonte deri në indet e forta te unazat e qafës, me ç ‘rast ka ardhur deri te vdekja e dhunshme si pasoj e gjakderdhjes masive nga plagët e shumta prerëse e shpuese në qafë dhe pjesët të ndryshme të trupit të shkaktuar nga veprimi mekanik i mjetit të fortë dhe të prehtë”, thuhet më tej.

Si rrethanë lehtësuese, trupit gjykues e ka marrë “sjelljen korrekte pas kryerjes së veprës penale”, përkundër se i pandehuri nga viti 2013 për 11 vjet kishte qëndruar në arrati, dhe ishte arrestuar përmes bashkëpunimit ndërkombëtar.

Ndërsa, si rrethanë rënduese është marrë mënyra e kryerjes së veprës penale, rrezikshmëria shoqërore e veprës, dhe pesha e veprës penale.

Dënimi ndaj tij është shqiptuar bazuar në Kodin Penal të Kosovës të vitit 2013, i cili për kryerjen e veprës penale “Vrasje e rëndë” parasheh dënim nga 10 vjet e deri në burgim të përjetshëm.

Aktakuza ndaj Sead Halilajt është ngritur nga Prokuroria Themelore në Prizren, më 25 shtator 2024, ku thuhet se pasi i njëjti bashkë me vëllanë e viktimës kishin shkuar në Prizren nga Shkodra e Shqipërisë, duke i kërkuar viktimës që të takohen në Prizren, ku edhe kanë qëndruar bashkërisht natën kritike.

Më tej, thuhet se të njëjtit pas kryerjes së vrasjes, në orët e hershme të mëngjesit janë larguar me taksi në drejtim të Shkodrës. Ndërsa më pas janë larguar për në Mal të Zi dhe nga Podgorica përmes aeroplanit kanë udhëtuar për në Itali, më pas Belgjikë dhe në fund Angli, ku ka punuar dhe kur është paraqitur që të kthehet është kërkuar nga Interpoli.

Përveç Halilajt, Gjykata Themelore në Prizren kishte shqiptuar aktgjykim dënues edhe ndaj vëllait të viktimës, Senad Kualla, të cilin e dënoi me 19 vjet burgim, më 12 qershor 2020 për veprën penale “Vrasje e rëndë” të privimit nga jeta të anëtarit të familjes në mënyrë mizore dhe dinake. Aktgjykimi ndaj tij thuhet të jetë vërtetuar edhe nga Gjykata e Apelit dhe ajo Supreme. /Betimipërdrejtësi

Gjykata Supreme e ka shpallur të paligjshme tarifën prej 3-eurosh për personat shoqërues mbi 15-vjeç të pacientëve gjatë qëndrimit në Qendrën Klinike Universitare të Kosovës, shkruan Reporteri.net.

Në njoftimin e Supremes thuhet se pas administrimit të provave dhe shqyrtimit të dispozitave kushtetuese dhe ligjore, është vlerësuar se dispozitat e kontestuara nuk kanë bazë të mjaftueshme ligjore dhe se përmes tyre është zgjeruar në mënyrë të palejuar nocioni i “bashkëpagesës”.

Në aktgjykim, Gjykata thekson se bashkëpagesa mund të vendoset vetëm ndaj personave që janë përfitues të drejtpërdrejtë të një shërbimi shëndetësor. Sipas vlerësimit të Gjykatës, personi shoqërues nuk e plotëson këtë kriter, pasi prania e tij në institucionin shëndetësor lidhet me mbështetjen e pacientit dhe jo me marrjen e shërbimeve shëndetësore.

“Gjykata Supreme po ashtu ka vlerësuar se Ministria e Shëndetësisë, përmes Udhëzimit Administrativ nr.03/2024, ka tejkaluar autorizimin ligjor të dhënë nga Ligji për Shëndetësi, duke krijuar një detyrim të ri financiar pa bazë të qartë ligjore, në kundërshtim me parimin e legalitetit’, thuhet në njoftim.

Aty theksohet se tarifimi i personave shoqërues cenon të drejtat e qytetarëve në qasje të barabartë dhe efektive në kujdesin shëndetësor, “veçanërisht duke pasur parasysh praktikën faktike në institucionet publike shëndetësore, ku prania e familjarëve shpesh paraqet nevojë reale për mbështetje të pacientëve gjatë hospitalizimit”.

“Gjykata Supreme ka konstatuar se aktet nënligjore duhet të jenë në përputhje me ligjin dhe nuk mund të krijojnë kategori të reja tarifimi apo detyrime financiare që nuk janë të parapara me ligj”, theksohet tutje në njoftim.

Drejtori i Institutit të Kosovës për Drejtësi, Ehat Miftaraj ka ironizuar me përfshirjen e hoxhës Osman Musliu në listën e kandidatëve të Lëvizjes Vetëvendosje për deputetë.

Ai shkroi në një postim në Facebook se disa hoxhallarë “po tundohen nga pasuria në këtë jetë të rrejshme”.

“Kur po e shohin pasurine e njerezve te VV te fituar nga pozitat ne pushtet, do hoxhallare (fatmiresisht shume pak ne numer) po tundohen nga pasuria ne kete jete te rrejshme dhe po i futen politikes dhe pushtetit si duket per ta ngjyer edhe ata pak”, shkroi Miftaraj.

Ish-kryediplomati kosovar Petrit Selimi e ka quajtur marrëzi prezantimin që ia bëri Gjykata Speciale burgut në Hagë ku po mbahen ish-krerët e Ushtrisë Çlirimtare të Kosovës.

Ai shkroi në X se ka qenë disa herë për vizitë atje dhe se ata po qëndrojnë në paraburgim tash e 6 vjet.

“Është burg. Ndaleni këtë marrëzi. Kam qenë disa herë duke vizituar udhëheqësit e akuzuar të çlirimit të Kosovës. Ata kanë kaluar 6 vjet në paraburgim / arrest gjatë gjykimit, ndërkohë që ju keni refuzuar çdo lirim me kusht apo arrest shtëpiak edhe kur shtete të treta kanë garantuar qëndrimin në territoret përkatëse të tyre”, shkroi Selimi.

Specialja, në një video të publikuar dje paraqiti kushtet e burgut që përshkruheshin si shumë të mira.

“Paraburgimi para ose gjatë një gjyqi bëhet vetëm kur është e nevojshme për të parandaluar një rrezik të konsiderueshëm, p.sh. rreziku që i pandehuri të përpiqet të frikësojë ose të ndikojë në dëshmitarë. Çdo dy muaj, Gjyqtarët e Gjyqit të Specializuar të Kosovës do të rishikojnë paraburgimin për të shqyrtuar nëse paraburgimi është ende i nevojshëm dhe i arsyeshëm”, thuhej ndër tjerash në postimin e gjykatës.

It’s a jail. Stop this silliness. I’ve been several times visiting indicted leaders of Kosovo liberation. They’ve spent 6 years in pre-trial / trial detention, with you refusing any bail or house arrests even when third countries guaranteed stay in their respective territories. https://t.co/IrOVCo9qXe

— Petrit Selimi (@Petrit) May 12, 2026

Kandidatja e PDK’së për deputete, Ganimete Musliu, tha se numrat në listën zgjedhore nuk janë të rëndësishëm derisa përballë kanë kundërshtarë politikë si Albin Kurti e Vjosa Osmani.

Për këta dy, Musliu tha se janë “të gatshëm të shkelin gjithçka për të përmbushur apetitet e tyre për pushtet”.

“Prandaj në këtë përballje, numri në listën zgjedhore nuk është ai që ka rëndësi. Ajo që ka rëndësi janë kauzat për mbrojtjen e demokracisë dhe shtetësisë së Republikës së Kosovës. Dhe sot, jam më e gatshme se kurrë të përballem me betejën që na pret. Zgjedhjet zgjasin një ditë, por pasojat e rezultateve të tyre mbeten për vite me radhë”, ka shkruar Musliu.

Ajo tha se kanë pasë edhe një bisedë me kreun e partisë, Bedri Hamza, për renditjen e kandidatëve në listë.

“Edhe pse, në pesë zgjedhje radhazi, vota e qytetarëve më ka renditur ndër 10 kandidatët më të votuar, unë kurrë nuk kam këmbëngulur në një numër, sepse pa punë të sinqertë dhe angazhim maksimal, një numër mbetet vetëm një numër. Për mua, beteja nuk ka qenë kurrë për numra, privilegje apo rehati politike. Beteja dhe angazhimi im gjithmonë kanë qenë, dhe mbeten, për besimin e popullit, dinjitetin e përfaqësimit dhe rrugën që i duhet Kosovës”.

Postimi i plotë:

Në ditët e tij më të vështira, Hashim Thaçi ngriti grushtin lart si simbol se vetëm të bashkuar mund të mposhtim çdo kundërshtar, çdo padrejtësi dhe çdo përpjekje për të njollosur të kaluarën, të tashmen dhe të ardhmen e këtij vendi.

Edhe në këto zgjedhje, ashtu si në ato të mëparshmet, ka pasur shumë interesim nga profesionistë dhe kuadro të fushave të ndryshme për t’u bërë pjesë e listës së PDK-së.

Kjo mbart një rëndësi të veçantë sepse, pavarësisht degradimit ekstrem të politikës në Kosovë, PDK vazhdon të mbetet adresa më serioze për njerëzit që besojnë në një Kosovë demokratike dhe duan të kontribuojnë në zhvillimin e saj.

Në një bisedë të sinqertë me Kryetarin Hamza, u diskutua edhe renditja e kandidatëve brenda 10-shes së parë të partisë.

Edhe pse, në pesë zgjedhje radhazi, vota e qytetarëve më ka renditur ndër 10 kandidatët më të votuar, unë kurrë nuk kam këmbëngulur në një numër, sepse pa punë të sinqertë dhe angazhim maksimal, një numër mbetet vetëm një numër.

Për mua, beteja nuk ka qenë kurrë për numra, privilegje apo rehati politike. Beteja dhe angazhimi im gjithmonë kanë qenë, dhe mbeten, për besimin e popullit, dinjitetin e përfaqësimit dhe rrugën që i duhet Kosovës.

Bazuar në këto bindje, edhe nëse nuk do të isha fare pjesë e listës, do të isha përsëri e gatshme të jepja maksimumin tim për Partinë Demokratike të Kosovës, sepse është partia e kauzave dhe vlerave më të mëdha të kombit dhe shtetit.

Për mua, politika nuk është thjesht një garë personale; është një mision, një përgjegjësi dhe një detyrim ndaj njerëzve që më kanë besuar gjatë viteve. Besimi dhe respekti nuk mund të blihen ose të imponohen. Ato fitohen përmes përkushtimit, mirënjohjes dhe përulësisë ndaj të gjithë atyre që vazhduan të më mbështesnin edhe kur emri im u shfaq nën numrin 81 në listë.

Prandaj, pavarësisht se vlerësohem shumë nga votuesit e PDK-së dhe vlerësohem nga institucionet monitoruese të Kuvendit si një nga deputetët më aktivë të partisë, edhe këtë herë kam pranuar me krenari dhe përgjegjësi numrin 12.

Jam plotësisht e vetëdijshme se po përballemi me kundërshtarë politikë si Albin Kurti dhe Vjosa Osmani të cilët nuk njohin as moral politik, as rregulla, as ligje, as kufizime, dhe që janë të gatshëm të shkelin gjithçka për të përmbushur apetitet e tyre për pushtet.

Prandaj në këtë përballje, numri në listën zgjedhore nuk është ai që ka rëndësi.

Ajo që ka rëndësi janë kauzat për mbrojtjen e demokracisë dhe shtetësisë së Republikës së Kosovës. Dhe sot, jam më e gatshme se kurrë të përballem me betejën që na pret.

Zgjedhjet zgjasin një ditë, por pasojat e rezultateve të tyre mbeten për vite me radhë.

Prandaj, me përulësi, i ftoj të gjithë mbështetësit, anëtarët dhe strukturat udhëheqëse të PDK-së dhe përtej tyre edhe të gjithë qytetarët e Republikës së Kosovës që të bashkohen në mënyrë që më 7 qershor të dalim fitimtarë për Kosovën dhe për demokracinë.

Partia Demokratike është e dëshmuar. Të gjitha sukseset e Republikës së Kosovës, qoftë në politikën e brendshme qoftë në atë të jashtme mbajnë vulën e PDK-së.

Kjo është fakt dhe unë jam krenare që jam pjesë e këtyre sukseseve.