Author: K.B.

Komisioni Qendror i Zgjedhjeve (KQZ) ka njoftuar se nga sot, 21 maj, ka filluar periudha e votimit përmes postës për qytetarët e Kosovës që janë regjistruar për të votuar nga jashtë vendit, ndërsa procesi do të zgjasë deri më 6 qershor 2026.

Përmes një njoftimi në Facebook, KQZ ka sqaruar hapat që duhet ndjekur nga votuesit për realizimin e votimit me postë, ku planifikohet të shpërndahen rreth 105 mijë pako.

Sipas institucionit, pakoja me fletëvotim do të dërgohet në adresën e banimit të votuesit.

Pas pranimit të saj, qytetarët duhet të plotësojnë fletëvotimin, ta vendosin atë në zarfin e fshehtësisë dhe më pas bashkë me dëftesën e regjistrimit ta fusin në zarfin kthyes.

KQZ ka bërë të ditur se votuesit duhet të shënojnë adresën e kutisë postare përkatëse dhe ta dërgojnë zarfin përmes postës, duke theksuar se ai duhet të arrijë në kutinë postare të vendit përkatës jo më larg se 6 qershor 2026.

Ndiqni udhëzimet e plota:

Kryetari i Prishtinës Përparim Rama, do të mbajë sot nga ora 09:30 një konferencë për media në Ishullin Urban.

Konferenca do të fokusohet në bllokimin e punimeve nga Inspektorati për Trashëgimi Kulturore (ITK), ndërsa pritet të prezantohen qëndrimet dhe hapat e mëtejmë të Komunës së Prishtinës lidhur me këtë çështje.

Analisti politik Visar Ymeri ka deklaruar se qasja politike e kryeministrit Albin Kurti, sipas tij, nuk ka për qëllim ndërtimin e institucioneve stabile dhe funksionale, përveç në rastet kur ato kontrollohen nga pushteti.

Ymeri tha se qytetarët duhet të jenë të vetëdijshëm për mënyrën se si, sipas tij, po funksionon qeverisja aktuale.

“Qytetarët e Kosovës duhet me qenë të vetëdijshëm që sjellja politike e Kurtit nuk është për të bërë institucione dhe stabilitet institucional në Kosovë, përveç nëse i merr krejt nën kontroll”, deklaroi Ymeri.

Ai shtoi se kjo qasje duhet të merret parasysh nga qytetarët kur flitet për stabilitet institucional dhe funksionimin e shtetit.

“Kështu që në këtë drejtim, kur ta kesh këtë parasysh dhe në anën tjetër thu që po du institucione stabile, atëherë duhet me ndërru raportin mes forcave. Ose nëse po të pëlqen qekjo, atëherë në rregull jemi”, u shpreh ai.

Ish-luftëtari i UÇK-së, Lahi Brahimaj ka kujtuar me nder dhe krenari dëshmorët Myrte Zeneli dhe Faruk Zeneli.

Përmes një postimi në Facebook, Brahimaj thotë se data 21 maj ishte një datë e rëndë për UÇK-në, por edhe një pikë kthese që dëshmoi se lufta për çlirim do të barte sakrifica e humbje të mëdha, si rënia e djemve si Myrta e Faruku.

“Me Myrten ishim bashkëfshatarë, por edhe bashkërrugëtarë që nga fillimi i rezistencës. Myrta ishte model dhe frymëzim si luftëtar, me besimin e palëkundur se një ditë UÇK-ja do të triumfonte dhe ashtu doli. Edhe pse Myrta ra heroikisht, ne sot e gëzojmë lirinë falë gjakut dhe sakrificës së djemve si ai”.

“Faruk Zeneli, si një i ri që fatin e vendit e kishte vendosur para fatit personal, e njoha që në fillim të luftës në Jabllanicë, duke u rreshtuar me djemtë dhe vajzat më të zotë të kësaj ane. Lavdi e përjetshme dëshmorëve!”, ka shkruar ai.

Një stacion radiofonik ka kërkuar falje për pasi njoftoi gabimisht se Mbreti Charles kishte vdekur.

Njoftimi i gabuar u transmetua të martën pasdite për shkak të një gabimi kompjuterik në studion kryesore të Radio Caroline në Essex.

Menaxheri i stacionit, Peter Moore, shkroi në Facebook: “Për shkak të një gabimi kompjuterik në studion tonë kryesore, procedura për vdekjen e Monarkut, të cilën të gjitha stacionet në Mbretërinë e Bashkuar e mbajnë gati duke shpresuar të mos kenë nevojë ta përdorin, u aktivizua aksidentalisht të martën pasdite (19 maj), duke njoftuar gabimisht se Madhëria e Tij Mbreti Charles kishte ndërruar jetë.

“Radio Caroline më pas heshti, siç kërkohet në raste të tilla, gjë që na alarmoi për të rikthyer programin dhe për të dhënë një kërkimfalje në transmetim.

“Caroline ka pasur kënaqësinë të transmetojë mesazhin e Krishtlindjeve të Madhërisë së Saj Mbretëreshës dhe tani të Mbretit, dhe shpresojmë ta bëjmë këtë për shumë vite të tjera.

“I kërkojmë falje Madhërisë së Tij Mbretit dhe dëgjuesve tanë për çdo shqetësim të shkaktuar”, u tha në reagim, trasmeton gazeta online Reporteri.net

Postimi nuk tregonte sa kohë kaloi para se gabimi të zbulohej, por të mërkurën pasdite, regjistrimi i transmetimit të së martës nga ora 13:58 deri në 17:00 nuk ishte i disponueshëm në faqen e internetit të stacionit.

Incidenti ndodhi ndërsa mbreti dhe mbretëresha ndodheshin në Irlandën e Veriut, ku iu bashkuan një grupi folklorik për një performancë.

Charles dhe Camilla gjithashtu panë valltarë dhe provuan uiski irlandez në lagjen Titanic të Belfastit në ditën e parë të udhëtimit të tyre.

Pasi legjislacioni i vitit 1967 detyroi shumë transmetues piratë të mbylleshin, ai vazhdoi të funksiononte herë pas here para se t’i jepte fund transmetimeve detare në vitin 1990.

Caroline dhe stacione të tjera të ngjashme pirate frymëzuan filmin komedi të vitit 2009 “The Boat that Rocked”, me aktorët Bill Nighy dhe Philip Seymour Hoffman, për një grup DJ-sh ekscentrikë që jetonin dhe punonin së bashku në det.

Sot i jepet lamtumira e fundit, Alush Gashi, njërit prej emrave historikë të Lidhja Demokratike e Kosovës dhe bashkëpunëtorit të ngushtë të Presidentit historik Ibrahim Rugova.

Alush Gashi, i cili vdiq disa ditë më parë, ishte ndër themeluesit e strukturave institucionale të LDK-së në vitet ’90 dhe për shumë vite mbeti një nga figurat më të rëndësishme të krahut rugovist në skenën politike kosovare.

Ai dha kontribut të veçantë në proceset politike dhe shtetformuese të Kosovës, ndërsa përveç angazhimit politik, shërbeu edhe si ministër i Shëndetësisë, duke qenë pjesë e institucioneve të vendit në periudha të rëndësishme të pasluftës.

Në nderim të jetës dhe veprës së tij, sot mbahet mbledhje komemorative nën patronatin e kryetarit të LDK-së, Lumir Abdixhiku.

Ceremonia e varrimit do të zhvillohet në ora 15:00, në vendlindjen e tij, në varrezat e fshatit Prigodë të Istog, ku familjarë, miq, bashkëpunëtorë dhe qytetarë do t’i japin lamtumirën e fundit.

Shtetet e Bashkuara kanë njoftuar aleatët europianë për vendimin e tyre për të reduktuar praninë ushtarake në Europë. Administrata amerikane do të rikthejë në atdhe brigadën shtesë të dislokuar në Gjermani pas pushtimit rus në Ukrainë, duke e çuar numrin e brigadave amerikane në kontinent në vetëm tre, secila me rreth 5 mijë trupa.

Ky vendim e rikthen praninë ushtarake amerikane në nivelet e vitit 2021, kur Europa konsiderohej ende në një periudhë stabiliteti dhe tensionet në lindje nuk perceptoheshin si kërcënim real.

“America First” dhe sinjali politik ndaj Europës

Njoftimi u bë përmes një deklarate teknike të Pentagonit dhe jo nga vetë sekretari amerikan i Mbrojtjes, Pete Hegseth, gjë që sipas analistëve tregon distancimin dhe mungesën e interesit të Shtëpisë së Bardhë ndaj aleatëve europianë.

Reduktimi i trupave justifikohet me doktrinën “America First” të Donald Trump dhe me rritjen e kapaciteteve mbrojtëse të vendeve europiane. Megjithatë, Pentagoni ka lënë të kuptohet se do të vlerësojë individualisht kontributin e secilit aleat, duke krijuar ndarje mes “partnerëve të mirë” dhe atyre më pak të besueshëm.

Një nga pasojat konkrete është pezullimi i zëvendësimit të një brigade që duhej të qëndronte në Poloni, ndërsa po shqyrtohen alternativa të tjera për praninë amerikane në Europën Lindore.

“D-Day” në të kundërt

Megjithëse nga pikëpamja ushtarake Gjermania dhe Polonia kanë forcuar ndjeshëm kapacitetet e tyre, largimi i trupave amerikane konsiderohet një goditje e fortë politike për NATO-n.

Sipas raportimeve, vendimet janë marrë pa konsultim të plotë me aleatët europianë dhe pa një kalendar të qartë për ndryshimet, duke shkaktuar irritim në shtabet ushtarake të vendeve anëtare.

Në qarqet diplomatike dhe ushtarake po flitet tashmë për një “D-Day të kundërt”, ku SHBA po nis gradualisht tërheqjen nga Europa. Mes skenarëve të përfolur janë edhe rikthimi në SHBA i skuadroneve të avionëve F-16 nga baza gjermane Spangdahlem dhe transferimi i mjeteve detare amerikane nga baza spanjolle e Rotës.

Po ashtu, pritet të përshpejtohet kalimi i komandave të NATO-s nën drejtimin europian, përfshirë komandën e Napolit që do t’u kalojë italianëve deri në pranverën e vitit 2027.

Frika më e madhe: Më pak përforcime amerikane në rast lufte

Sipas burimeve pranë Pentagonit, administrata Trump po shqyrton edhe reduktimin e forcave që SHBA do të dërgonte në Europë në rast konflikti.

Aktualisht besohet se Uashingtoni ka planifikuar dërgimin e rreth 200 mijë ushtarëve, tankeve dhe armatimeve të rënda brenda 15-20 ditëve nga nisja e një lufte në Europë. Ky konsiderohet elementi kryesor parandalues ndaj çdo agresioni të mundshëm, veçanërisht nga Rusia.

Reduktimi i këtij “ombrellë sigurie” do të ndikonte drejtpërdrejt në balancat strategjike të NATO-s dhe do të shtonte shqetësimet në kryeqytetet europiane, ku Moska shihet gjithnjë e më shumë si kërcënim real.

Goditje edhe për Gjermaninë

Një tjetër vendim i Pentagonit lidhet me pezullimin e vendosjes në Gjermani të raketave amerikane me rreze të gjatë “Tomahawk”, të planifikuara nga administrata Biden si masë frenuese ndaj Rusisë.

Ky zhvillim konsiderohet veçanërisht problematik për Berlinin, pasi Gjermania nuk disponon sisteme raketore të ngjashme dhe mbetet më e ekspozuar përballë Moskës.

Europa përballë faturës së mbrojtjes

Ekspertët paralajmërojnë se mbrojtja e Europës pa mbështetjen amerikane do të ketë një kosto shumë të lartë. Vlerësimet flasin për nevojën e rekrutimit të 300 mijë ushtarëve shtesë dhe për shpenzime ekstra prej rreth 250 miliardë eurosh.

Në këtë situatë, vendet europiane po përpiqen të mbajnë gjallë Aleancën Atlantike, duke shpresuar se NATO do t’i mbijetojë një mandati të ri të Donald Trump. Megjithatë, kjo strategji pritet të shoqërohet me rritje të mëtejshme të buxheteve ushtarake, deri në 5% të Prodhimit të Brendshëm Bruto.

Sot më 21 maj do të fillojë votimi jashtë vendit për shtetasit jashtë Kosovës, të cilët janë regjistruar paraprakisht për të votuar përmes postës.

Bëhet fjalë për rreth 105 mijë votues, që gjenden në shete të ndryshme, por pjesa më e madhe e tyre është kryesisht në shtete evropiane.

Një ditë më herët, zëdhënësi i KQZ-së, Valmir Elezi, ka mbajtur konferencë për media nga Qendra e Numërimit dhe Rezultateve, ku shërbimi votues i këtij institucioni ishte duke bërë gati pakot e fundit me fletëvotime të cilat do t’ju dërgohen votuesve të regjistruar.

Sipas Elezit, para ditës së mërkurë, KQZ ka përgatitur 75,000 pako individuale dhe ato pritet që të fillojnë të shpërndahen nga data 21 maj, ndërsa rreth 30 mijë të tjera do të dërgohen në aeroport gjatë së enjtes dhe nga aty për t’u nisur jashtë vendit.

Sipas KQZ-së, çdo pako është individuale dhe secila prej tyre përmban: 1. Udhëzuesin për procedurën e votimit; 2. fletëvotimin; 3. zarfin e fshehtësisë; dhe zarfin kthyes.

Sipas KQZ-së, në çdo dërgesë postare operatori ekonomik ka vendosur nga një numër i veçantë gjurmimi dhe u është dërguar votuesve të regjistruar, të cilët mund të shohin vazhdimisht vendndodhjen e pakos me fletëvotim.

Votimi përmes postës do të përfundojë më 6 qershor, ndërsa KQZ u ka bërë thirje votuesve që të mos presin ditën e fundit për ta dërgar pakon e tyre me fletëvotim, në mënyrë që të arrijë me kohë në kutinë postare dhe më pas të tërhiqet për t’u sjellur në Kosovë për numërim.

Për votimin me postë jashtë Kosovës, KQZ ka funksionalizuar kutitë postare në 22 shtete, si: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kroaci, Mali të Zi, Maqedoni e Veriut, Mbretëri e Bashkuar, Norvegji, SHBA, Shqipëri, Slloveni, Suedi, Turqi dhe Zvicër. Po ashtu, është funksionale edhe kutia e përhershme postare KQZ-së në Kosovë.

Visar Azemi nga Lidhja Demokratike e Kosovës (LDK), ka shkruar për dënimet që Ministria e Tregtisë po i jep KEDS-it për shkak të njehsorëve.

Azemi ka thënë se nuk është dëmtuar Ministria por qytetarët, duke kërkuar që paratë t’i kthehen qytetarëve.

“Ministria po e denon KEDS-in, por paratë nuk po ua kthen qytetarëve. Nuk është dëmtuar ministria, janë dëmtuar qytetarët e Republikës. Kthejauni paret e vjedhura qytetarëve”, ka thënë ai.