Kryetari i Prizrenit, Shaqir Totaj ka akuzuar qeverinë në detyrë se e njëjta është e korruptuar.
Përmes një postimi në Facebook, Totaj tha se nga marsi 2021, deri në korrik të vitit të kaluar, sipas tij, Qeveria Kurti ka dhënë 2555 kontrata pa tender në vlerë prej 300 milion euro.
“Korrupsioni masiv ka adresë. Vlerësoni vet!”, ka shkruar ai.
Në prag të festës së Kurban Bajramit, Bashkësia Islame e Kosovës, ka njoftuar se ka ndihmuar 76 jetimë me nga 100 euro.
Sipas njoftimit zyrtar, qëllim ishte sjellja e buzëqeshjes dhe gëzimit në këto ditë feste.
“Kjo ndihmë vjen në kuadër të aktiviteteve humanitare dhe solidarizuese që organizohen tradicionalisht gjatë ditëve të festave fetare, e të cilat do të vazhdohen edhe në të ardhmen, duke treguar kështu një ndër prioritetet e institucionit për t’i ndihmuar jetimët dhe kategoritë në nevojë”, thuhet në njoftim.
Në një ceremoni solemne të organizuar nga Bashkia e Përmetit, shkrimtari i njohur shqiptar me renome ndërkombëtare, Prof. Dr. Jeton Kelmendi, është nderuar me titullin “Qytetar Nderi” i qytetit të Përmetit.
Ky vlerësim i lartë i është dhënë në shenjë mirënjohjeje për kontributin e tij të jashtëzakonshëm në letërsinë bashkëkohore dhe për përfaqësimin dinjitoz të kulturës shqiptare në arenën ndërkombëtare.
Në motivacionin e dhënies së këtij titulli u theksua se Jeton Kelmendi është një ndër shkrimtarët më të njohur të Evropës, i përkthyer në 42 gjuhë të botës dhe laureat i dhjetëra çmimeve prestigjioze ndërkombëtare, duke u shndërruar kështu në një ambasador të shquar të kulturës shqiptare.
Akademik Jeton Kelmendi është gjithashtu profesor universitar, i cili ligjëron në Kolegji AAB në Prishtinë, si dhe ka mbajtur ligjërata në disa universitete në Shtetet e Bashkuara të Amerikës.
Ceremonia u zhvillua në një atmosferë festive, me pjesëmarrjen e personaliteteve të kulturës, institucioneve vendore dhe dashamirësve të letërsisë.
Franca po përballet me një skandal abuzimi me fëmijët, ndërsa “monitoruesit” në dhjetëra çerdhe shtetërore dhe shkolla fillore po hetohen për dhunë, sulm seksual dhe përdhunim.
Prokurorët kanë konfirmuar se policia e Parisit po shqyrton më shumë se 100 akuza për keqtrajtim, dhunë fizike dhe përdhunim të fëmijëve deri në tre vjeç nga monitoruesit e shkollave gjatë pushimeve të drekës, kohës së gjumit dhe aktiviteteve pas shkolle, shkruan The Guardian.
“Kemi hetime në proces në 84 parashkollore, rreth 20 shkolla fillore dhe rreth 10 qendra kujdesi ditore”, tha kryeprokurorja e Parisit, Laure Beccuau.
Avokatët thanë se hetimet përfshinin përdhunimin e dyshuar të fëmijëve deri në tre dhe katër vjeç.
Grupet e prindërve thanë se kishin luftuar me vite që akuzat të merreshin seriozisht. Ata thanë se dështimet në procesin e rekrutimit dhe kontrollimin e monitoruesve të shkollave kishin lejuar që abuzimi të vazhdonte.
Policia në Gjakovë ka vazhduar me aktivitete shtesë policore në trafik, me qëllim ngritjen e sigurisë në komunikacionin rrugor dhe parandalimin e aksidenteve.
Gjatë fundjavës, Njësia Rajonale e Komunikacionit Rrugor në kuadër të DRP-së në Gjakovë ka zbatuar Planin Operativ “Alkooli”, përmes kontrolleve të shtuara në terren.
Sipas policisë, brenda dy ditëve janë identifikuar 602 kundërvajtje të ndryshme në trafik. Në mesin e tyre janë evidentuar gara shpejtësie, tejkalime të ndaluara, tejkalime të shpejtësisë së lejuar, si dhe drejtim i mjetit nën ndikimin e alkoolit.
Si masë mbrojtëse, policia ka ndaluar 33 patentë shoferë, prej të cilëve 21 për drejtim të automjetit nën ndikimin e alkoolit.
Nënkryetari i OVL-së së UÇK-së, njëherësh ish-komandant i Brigadës 153, Fatmir Sopi, në një deklaratë për rtv21 e ka quajtur denigruese gjuhën e Kurtit dhe të zyrtarëve të LVV-së kundër krerëve dhe pjesëtarëve të tjerë të UÇK-së.
Sipas tij, një gjuhë e tillë i shërben më së shumti Serbisë. Ish-komandanti i UÇK-së u bëri thirrje përfaqësuesve politikë që të merren me programet e tyre dhe të lënë anash përfshirjen e përfaqësuesve të UÇK-së në fushatë për përfitime elektorale.
“Është për të ardhur keq për njerëz të tillë, të cilët UÇK-në dhe luftën e drejtë çlirimtare e keqpërdorin në fushata parazgjedhore, kur dihet se UÇK-ja nuk i takon asnjë partie politike dhe asnjë individi, por buron nga populli si nevojë për çlirimin nga pushtuesi. Një gjuhë e tillë ndaj komandantëve të UÇK-së, denigruese, është e ligë dhe qyqare, sepse ata e kanë kryer detyrën ndaj atdheut që sot ta kemi Kosovën e lirë dhe të pavarur. Kjo i shërben më së shumti Serbisë. Jam i bindur se nuk i shërben popullit dhe shtetit. Partitë është mirë të merren me programet e tyre dhe jo të merren me të kaluarën tonë të ndritshme.”, tha ai për RTV21
Komanda e Forcave të Përbashkëta Aleate në Napoli njoftoi se ka përfunduar “me sukses” stërvitja ushtarake NATO-Serbi 2026.
“Misioni u përmbush!”, shkruan JFCNP.
“Stërvitja NATO-Serbi 2026 ka përfunduar me sukses me një demonstrim përfundimtar të jashtëzakonshëm të kapaciteteve dinamike”, thuhet në njoftim.
Gjatë dy javëve plot aksion, njoftohet se “600 trupa nga shumë vende u stërvitën krah për krah në skenarë të ruajtjes së paqes dhe reagimit ndaj krizave”.
NATO njoftoi se “stërvitja u zhvillua me respekt të plotë ndaj politikës së deklaruar të neutralitetit ushtarak të Serbisë dhe pasqyron bashkëpunimin praktik afatgjatë ndërmjet NATO-s dhe Serbisë”.
“Stërvitja e këtij viti NATO-Serbi përfaqëson një demonstrim të prekshëm të asaj se sa shumë janë zhvilluar marrëdhëniet NATO-Serbi. Se sa shumë është zhvilluar partneriteti i Serbisë me NATO-n. Dhe se sa shumë kanë përparuar dialogu ynë politik dhe bashkëpunimi praktik”, tha Ndihmës-Sekretari i Përgjithshëm i NATO-s për Çështje Politike dhe Politikë të Sigurisë, Ambasadori Kevin Hamilton. “Teksa shikojmë përpara, NATO mbetet e gatshme të zhvillojë më tej marrëdhëniet tona me Serbinë. Me respekt të plotë për politikën e saj të deklaruar të neutralitetit ushtarak”, shtoi ai.
Policia ka shoqëruar regjisorin e njohur Petri Bozo në lidhje me aksidentin e ndodhur mëngjesin e sotëm në fshatin Mengel, në aksin Librazhd-Elbasan, mëson A2CNN.
Bozo ka qenë në drejtimin e automjetit që përplasi për vdekje të miturin 7-vjeçar. I ndjeri ishte duke kaluar rrugën bashkë me të ëmën.
Për një moment ai i është shkëputur nga duart nënës dhe është goditur nga makina. Aksidenti i sotëm vjen 3 javë pas tragjedisë së ndodhur në zonën e ish-Kënetës, ku humbën jetën dy të mitur.
“Rreth orës 08:00, në aksin rrugor “Elbasan-Librazhd”, automjeti me drejtues shtetasin P. B., 61 vjeç, ka përplasur një fëmijë rreth 7 vjeç, i cili si pasojë ka humbur jetën. Drejtuesi i automjetit është shoqëruar në Komisariat, për veprime të mëtejshme. Grupi hetimor në vendngjarje po punon për zbardhjen e rrethanave të aksidentit“, njoftoi sot policia.
Honda po tërheq 59,887 SUV sepse kamerat e tyre të pasme mund të kenë defekt.
Tërheqja prek Acura ZDX të vitit 2024 dhe SUV-të elektrike Honda Prologue të viteve 2024-2025 , të cilat lidhen me automjetet elektrike të General Motors.
Honda filloi të hetonte problemin e mundshëm për herë të parë në maj 2024 dhe filloi të bashkëpunonte me General Motors një muaj më vonë.
Që atëherë, të dy palët e kanë monitoruar problemin e mundshëm, duke analizuar të dhënat e tregut.
Në fillim të majit 2026, Honda përcaktoi se ekzistonte një defekt në sigurinë e automjetit dhe vendosi të kryente një tërheqje sigurie.
Prodhuesi japonez thotë se është në dijeni të 2,411 kërkesave të garancisë që lidhen me problemin, por nuk është në dijeni të ndonjë aksidenti, lëndimi ose vdekjeje të shkaktuar nga kamera me defekt.
Honda do ta zëvendësojë kamerën me një pjesë të përmirësuar, sipas raportit të tërheqjes së automjeteve.
Ligji i ri për Shtetësinë e Republikës së Kosovës ka hyrë në fuqi nga dita e sotme.
Kështu ka bërë të ditur, ministri në detyrë i Punëve të Brendshme, Xhelal Sveçla, sot përmes një video-mesazhi drejtuar bashkatdhetarëve.
Sveçla ka njoftuar bashkatdhetarët se Ligji i ri për shtetësinë e Kosovës sjell proceduar më të shpejta, më të thjeshta dhe më moderne për aplikuesit.
“Një nga lehtësimet kryesore është rifitimi i shtetësisë për ju bashkatdhetarët, që për arsye objektive jeni detyruar të liroheni nga shtetësia e Republikës së Kosovës. Nga 9 dokumente që kërkoheshin më parë, tani mjafton kërkesa e plotësuar nga ju si dhe dëshmia se nuk jeni të dënuar për vepër penale me vendim të formës së prerë në shtetin ku jetoni”, ka thënë ai.
Ai ka njoftuar se për shtetësinë mund të bëhet edhe online përmes platformës e- Kosova, ndërsa, sic ka thënë ai, afati i shqyrtimit të kërkesës nga 6 muaj është shkurtuar në 30 ditë.
Ligji i ri për shtetësinë e Kosovës është miratuar nga Kuvendi i Kosovës në seancën e 23 prillit 2026.
Bashkatdhetarët tanë mund të aplikojnë online për rifitimin e shtetësisë së Republikës së Kosovës përmes platformës e-Kosova, në vegëzën: https://ekosova.rks-gov.net/Service/12.