Author: K.B.

Në takimin e 371-të të Këshillit Gjyqësor të Kosovës (KGJK), është zhvilluar debat mes anëtarit Bashkim Hyseni dhe kryesuesit Rrustem Thaqi lidhur me trajtimin e dorëheqjeve të gjyqtarëve dhe prokurorëve serbë që kanë lënë sistemin e drejtësisë.

Hyseni ka kërkuar nga kryesuesi Thaqi sqarime se mbi çfarë baze kushtetuese dhe ligjore janë mbajtur këto dorëheqje për rreth katër vite.

“Me çfarë baze kushtetuese, ligjore janë mbajtur katër vite? Kjo i bie sikur kapiteni i anijes ta lëshojë timonin për shkak të valëve. Mund ta shpëtojë momentin, por do ta dëmtojë të nesërmen dhe të ardhmen. Cila është përgjigjja juaj, meqenëse ju jeni kryesues dhe duhet ta dini për shkak të kontinuitetit institucional që kanë këto organe?”, ka thënë Hyseni.

Në përgjigje, Thaqi ka thënë se nuk mund të mbahet përgjegjës për këtë çështje dhe ka theksuar se edhe Hyseni, si anëtar i KGjK-së, ka pasur mundësi të paraqesë iniciativa apo propozime.

“Nuk mundesh me më mbajt përgjegjës për këtë pikë. Edhe unë edhe ti jemi anëtarë. Nuk kam obligim as përgjigje me të dhënë, sepse ti po do me i dhënë kontest tjetër kësaj çështjeje dhe po do me marrë vëmendje për këtë çështje, që nuk është korrekte nga ana juaj”, ka deklaruar Thaqi.

Ai ka shtuar se kjo çështje është aktualizuar pas kërkesës së ushtrueses së detyrës së presidentes, Albulena Haxhiu, drejtuar KGjK-së.

“Unë vetëm mund të të pyes: prej kur je zgjedhur anëtar i Këshillit, cila ka qenë iniciativa, kërkesa dhe propozimi yt konkret? Kjo çështje është aktualizuar nga momenti kur ushtruesja e detyrës së presidentes ka paraqitur kërkesë në Këshill, për të cilën ju kam njoftuar me kohë”, ka thënë Thaqi.

Hyseni i është kundërpërgjigjur duke thënë se kryesuesi duhet të japë përgjigje për çështjen.

“Je kryesues dhe duhesh me ditë. Nëse drejtësia duhet t’i shërbejë vetëm drejtësisë, nëse i shërben qëllimeve tjera nuk quhet drejtësi”, tha Hyseni.

Ndërsa Thaqi është përgjigjur se do të jetë i përkushtuar në kryerjen e detyrës së tij.

“Do të jem i përkushtuar që të kryej detyrën time. Por jo duke i shërbyer agjendës ditore”, tha kryesuesi.

Pas kësaj, për shkak të përplasjeve verbale mes anëtarëve Ahmeti Imami dhe Bashkimn Hyseni, kjo mbledhje u ndërpre.

U.d. së presidentes së Republikës së Kosovës, Albulena Haxhiu, priti sot në takimin lamtumirës ambasadorin e Republikës së Turqisë në Kosovë, Sabri Tunç Angılı, me rastin e përfundimit të mandatit të tij diplomatik.

Gjatë takimit, Haxhiu e falënderoi ambasadorin Angılı për bashkëpunimin e ngushtë, qasjen konstruktive dhe kontributin e tij në forcimin e marrëdhënieve ndërmjet Kosovës dhe Turqisë.

Ajo vlerësoi rolin e tij si një bashkëbisedues i hapur dhe partner të përkushtuar në avancimin e bashkëpunimit dypalësh në fusha me interes të përbashkët.

Me këtë rast, u.d. së presidentes i uroi ambasadorit suksese në angazhimet e tij të ardhshme, duke shprehur bindjen se miqësia dhe partneriteti ndërmjet Republikës së Kosovës dhe Republikës së Turqisë do të vazhdojnë të thellohen edhe në të ardhmen.

Drejtori i Drejtorisë Vendore të Policisë Fier, Erion Ahmeti në një deklaratë për mediat ka zbuluar detaje lidhur me operacionin që po zhvillohet në fshatin Vidhisht pas vrasjes së 58-vjeçarit, Kosta Plaka nga 35-vjeçari Refit Buzi.

Pas vrasjes së ish-vjehrrit dhe plagosjes së ish-vjehrrës, autori është arratisur dhe ka marrë me vete ish-bashkëshorten e tij.

Ahmeti ka njoftuar se është bërë i mundur lirimi i vajzës dhe është në spital jashtë rrezikut për jetën. Ndërkohë ai theksoi se po vijon puna për të bindur të riun që të dorëzohet, raporton euronews.al.

“Sot, rreth orës 06:00, ndodhi një ngjarje e rëndë kriminale në fshatin Vidhisht, Roskovec, ku shtetasi R. B., 35 vjeç, vrau me armë gjahu, babanë e ish të dashurës së tij, plagosi nënën e saj, mori peng ish-të dashurën dhe u largua me automjet nga vendi i ngjarjes.

Menjëherë pas marrjes së njoftimit, shërbimet e Policisë shkuan në vendngjarje, rrethuan zonën, organizuan ndjekjen e autorit, ngritën pika kontrolli dhe koordinuan veprimet me të gjitha strukturat policore të angazhuara.

Për shkak të rrezikshmërisë së lartë të autorit dhe dinamikës së ngjarjes, u kërkua ndërhyrja e Forcës Speciale “RENEA”.

Pas lokalizimit të autorit, shërbimet e Policisë e rrethuan atë dhe nisën negociatat, pasi ai kërcënonte se do të vriste veten dhe ish të dashurën, të cilën e mbante peng.

Falë profesionalizmit, qetësisë dhe veprimeve të mirëkoordinuara të efektivëve të Policisë, fillimisht u bë i mundur lirimi i shtetases që mbahej peng në automjet, kundër vullnetit të saj. Ajo u transportua menjëherë në spital dhe është jashtë rrezikut për jetën.

Negociatat me autorin vijojnë, me qëllim që ai të dorëzohet pa shkaktuar pasoja të tjera.

Grupi hetimor, në drejtimin e Prokurorisë, vijon veprimet për dokumentimin e plotë ligjor të ngjarjes, si dhe për sqarimin e të gjitha rrethanave dhe zbardhjen e motivit”, tha ai.

Hodhën sende të forta dhe mjete piroteknike në drejtim të punonjësve të Policisë, gjatë tubimit të zhvilluar dje, pranë Parlamentit, identifikohen 32 shtetas.

Më datë 23.07.2026, rreth orës 09:30, në rrugën “George W. Bush”, pranë Parlamentit, u zhvillua një tubim gjatë të cilit, disa prej pjesëmarrësve kanë kundërshtuar punonjësit e Policisë së Shtetit të planëzuar me shërbim për garantimin e rendit dhe sigurisë publike, si dhe kanë hedhur në drejtim të tyre, sende të forta, mjete piroteknike dhe sende të tjera.

Si rezultat i veprimeve hetimore, u identifikuan 32 shtetas që dyshohet se kanë kryer këto veprime të kundërligjshme gjatë tubimit. Në vijim:

-u arrestuan në flagrancë shtetasit O. P., 41 vjeç dhe A. I., 44 vjeçe, për veprat penale “Pengimi i qarkullimit të mjeteve të transportit”, “Prishja e qetësisë publike”, “Organizimi dhe pjesëmarrja në grumbullime dhe manifestime të paligjshme”, “Kundërshtimi i punonjësit të Policisë së rendit publik”, “Goditja për shkak të detyrës” dhe “Shkelja e rregullave mbi lëndët plasëse dhe djegëse”;
-nisi procedimi në gjendje të lirë për shtetasit P. D., A. M., E. K., E. K., V. H., K. P., A. P., D. D., J. A., E. K., Y. T., M. R., V. M., A. B., S. D., E. I., A. S., E. H., E. S., I. D., E. P., C. M., D. T., E. L., F. A., A. Ç., A. Zh., F. S., A. B. dhe I. M., për veprat penale “Organizimi dhe pjesëmarrja në grumbullime dhe manifestime të paligjshme”, “Prishja e qetësisë publike”, “Kundërshtimi i punonjësit të Policisë së rendit publik” dhe “Pengimi i qarkullimit të mjeteve të transportit”.

Në cilësinë e provës materiale u sekuestruan kapsolla të cilat u gjetën në një qese plasmasi që e mbante shtetasja e arrestuar A. I.

6 punonjësit e Policisë që mbetën të dëmtuar gjatë tubimit morën mjekim në spital dhe janë jashtë rrezikut për jetën.

Materialet procedurale iu referuan Prokurorisë, për veprime të mëtejshme hetimore.

Gjykata Themelore në Prishtinë ka refuzuar kërkesën e Prokurorisë Themelore për caktimin e paraburgimit ndaj dy zyrtareve të Ministrisë së Punëve të Brendshme, Gylsen Jahiri dhe Fatma Shufta, duke u caktuar atyre masën e arrestit shtëpiak për një muaj, ndërsa shtetasit turk Dervis Keleci i është caktuar paraburgim. Aktvendimin e Gjykatës e ka siguruar “Betimi për Drejtësi”.

Sipas aktvendimit, Gylsen Jahiri, zyrtare për pranimin e kërkesave për lejeqëndrim në Drejtorinë për Shtetësi, Azil dhe Migrim të MPB-së, dhe Fatma Shufta, zyrtare e lartë për financa në MPB, dyshohen se në cilësinë e personave zyrtarë kanë kryer në vazhdimësi veprën penale “Keqpërdorimi i pozitës apo autoritetit zyrtar”, ndërsa Dervis Keleci dyshohet për veprën penale “Falsifikimi i dokumenteve”.

Gjykata ka vendosur që dy zyrtaret të qëndrojnë në arrest shtëpiak deri më 21 gusht 2026, ndërsa u janë konfiskuar edhe dokumentet e udhëtimit.

Sipas Prokurorisë, ekziston dyshimi i bazuar se veprat janë kryer në koordinim ndërmjet personave zyrtarë dhe një personi privat, me qëllim të sigurimit të dobisë pasurore. Në kërkesën për paraburgim thuhet se gjatë hetimeve janë siguruar deklarata dëshmitarësh, raporte të vëzhgimit, dokumente të sekuestruara dhe prova të mbledhura përmes masave të veçanta hetimore.

Gjithashtu, janë sekuestruar telefonat mobilë të të dyshuarve për ekzaminim forenzik, si dhe dokumente të tjera që do t’i nënshtrohen analizës gjatë vazhdimit të hetimeve.

Sipas Prokurorisë, Fatma Shufta në deklarimin e saj ka pranuar kryerjen e veprës penale, ndërsa Gylsen Jahiri dhe Dervis Keleci kanë shfrytëzuar të drejtën për t’u mbrojtur në heshtje.

Prokuroria kishte kërkuar paraburgim për të tre të dyshuarit, duke argumentuar se ekziston rreziku i arratisjes, ndikimit në dëshmitarë dhe prova, si dhe rreziku i përsëritjes së veprës penale.

Sipas prokurorit, hetimet ndodhen në fazën fillestare dhe të dyshuarit, nëse mbrohen në liri, mund të ndikojnë në dëshmitarë, të koordinojnë deklaratat ose të pengojnë zhvillimin e mëtejmë të procedurës penale.

Në seancë, avokati Ilir Tahiri, mbrojtës i Gylsen Jahirit, e kundërshtoi kërkesën për paraburgim, duke argumentuar se vetë ekzistimi i dyshimit të bazuar nuk mjafton për caktimin e masës më të rëndë dhe se Prokuroria nuk ka paraqitur rrethana konkrete që e bëjnë të domosdoshëm paraburgimin.

Tahiri tha se provat materiale tashmë janë administruar nga organet e hetimit dhe se klientja e tij nuk ka asnjë mundësi reale të ndikojë në dëshmitarë apo të tjetërsojë provat, duke i cilësuar pretendimet e Prokurorisë si hipotetike.

Ai propozoi që, në vend të paraburgimit, Gjykata të caktojë arrest shtëpiak, duke ofruar dorëzani prej 5 mijë eurosh, dorëzimin e pasaportës dhe të gjitha dokumenteve të udhëtimit, si garanci se Jahiri do t’i përgjigjet çdo ftese të organeve të drejtësisë.

Sipas Tahirit, një rrethanë me rëndësi të veçantë është edhe gjendja e rënduar shëndetësore e klientes së tij, për të cilën tha se paraburgimi do të ndikonte drejtpërdrejt në përkeqësimin e saj.

Ai u thirr edhe në parimin e proporcionalitetit, duke argumentuar se qëllimi i procedurës penale mund të arrihet me masa më të buta, ndërsa theksoi se Jahiri nuk ka rënë asnjëherë më parë ndesh me ligjin.

Gjykata nuk e aprovoi kërkesën e Prokurorisë për paraburgim ndaj Jahirit dhe Shuftës, duke vlerësuar se, edhe pse ekziston dyshim i bazuar dhe rrezik potencial për ndikim në procedurë, masa e paraburgimit është shumë e rëndë dhe se qëllimi i sigurimit të pranisë së tyre dhe mbarëvajtjes së procedurës mund të arrihet përmes arrestit shtëpiak.

Ndryshe, për Dervis Kelecin, Gjykata konstatoi se ekziston rrezik i arratisjes, ndikimit në dëshmitarë dhe përsëritjes së veprës penale, duke vlerësuar se asnjë masë më e butë nuk do të ishte e mjaftueshme. Për këtë arsye, ndaj tij u caktua paraburgim në kohëzgjatje prej një muaji.

Ministri i Administrimit të Pushtetit Lokal, Elbert Krasniqi, ka bërë të ditur se ka nënshkruar Rregulloren e Brendshme për Mbrojtjen e të Dhënave Personale, pas përfundimit të procesit të konsultimit publik.

Sipas Krasniqit, ky dokument përmbush një obligim që buron nga legjislacioni në fuqi dhe përcakton procedurat organizative dhe teknike për përpunimin e të dhënave personale të të punësuarve në Ministrinë e Administrimit të Pushtetit Lokal.

“Me nënshkrimin e këtij dokumenti, riafirmoj përkushtimin e MAPL-së për zbatimin e obligimeve ligjore, mbrojtjen e të dhënave personale, forcimin e sigurisë së informacionit, transparencën institucionale dhe respektimin e privatësisë së zyrtarëve dhe qytetarëve”, ka deklaruar Krasniqi.

Ministri ka bërë të ditur se rregullorja e plotë është publikuar në ueb-faqen zyrtare të Ministrisë së Administrimit të Pushtetit Lokal.

Anëtarët e Këshillit Gjyqësor të Kosovës kanë lëshuar mbledhjen në të cilën do të shqyrtohej kërkesa e u.d. presidentes Albulena Haxhiu për tërheqjen e ofruara nga ish-gjyqtarët serbë të Gjykatës në Mitrovicë të Veriut.

Gjatë diskutimit, anëtari i KGJK-së, Bashkim Hyseni, ka kërkuar që kjo çështje të jetë pika e parë e rendit të ditës, duke kërkuar përgjigje se pse trajtimi i dorëheqjeve të gjyqtarëve dhe stafit nga komuniteti serb është vonuar për kaq gjatë.

Haxhiu në konferencën e sotme i ka bërë thirrje KGJK’së që të veprojë njësoj si Këshilli Prokurorial për t’ia dërguar për dekretim emrat e gjyqtarëve të dorëhequr, të cilët më pas i tërhoqën ato.

Bashkimi Europian dje bëri thirrje që të mos i bëhet presion KGJK’së për këtë çështje nga asnjë parti politike pasi zyrtarë të Vetëvendosjes dje kërkuan këshilli të marrë vendim për moskthimin në punë të gjyqtarëve serbë.

EO ka publikuar videon nga ky moment.

Komandanti i misionit të KFOR-it të udhëhequr nga NATO në Kosovë, gjeneralmajor Özkan Ulutaş, ka pritur në selinë e KFOR-it në Camp Film City në Prishtinë gjeneralmajorin Alexander Krone, komandant i Divizionit të Parë të Blinduar të Gjermanisë.

Sipas KFOR-it, gjatë takimit është diskutuar për situatën e sigurisë në rajon, ndërsa gjeneralmajor Ulutaş ka rikonfirmuar përkushtimin e misionit për të garantuar një mjedis të sigurt dhe të qetë për të gjithë njerëzit që jetojnë në Kosovë, në çdo kohë dhe në mënyrë të paanshme.

Komandanti i KFOR-it prezantoi gjithashtu aktivitetet në zhvillim dhe prioritetet kryesore të misionit.

Me këtë rast, gjeneralmajor Ulutaş shprehu mirënjohjen e tij për kontributin e kahershëm dhe të çmuar të Gjermanisë në misionin e KFOR-it të udhëhequr nga NATO në Kosovë.