Policia e Kosovës ka dhënë detaje lidhur me dy shpërthime që kanë ndodhur në Prizren.
Rasti ka ndodhur në rrugën “Brigada 128” në Prizren, më 16.06.2026-03:15.
“Raportohet se si pasojë e dy shpërthimeve janë dëmtuar një veturë dhe fasada e një shtëpie pronë e dy viktimave meshkuj kosovarë”, thuhet në raport.
Në vendngjarje kanë dalë njësitet përkatëse.
Policia nuk raporton për të lënduar, ndërsa rasti po hetohet.
Komisioni Qendror i Zgjedhjeve ka bërë të ditur se deri sot në mesditë pritet të përfundojë numërimi i të gjitha fletëvotimeve të ardhura nga votimi jashtë Kosovës, përkatësisht përmes postës.
Zëdhënësi i KQZ-së, Valmir Elezi, ka thënë se shtatë kutitë e mbetura pritet të fillojnë të numërohen në orët e mëngjesit të së mërkurës, duke e çuar drejt përmbylljes një nga fazat kryesore të procesit zgjedhor pas ditës së votimit.
Paralelisht me numërimin e votave të diasporës, KQZ do të nisë edhe procesin e numërimit të votave me kusht, i cili është zhvilluar në 52 vendvotime me kusht në mbarë vendin. Në këtë kategori janë evidentuar gjithsej 8,751 votues.
Po ashtu, do të fillojë edhe numërimi i votave të personave me nevoja të veçanta.
Me përfundimin e numërimit të votave nga diaspora dhe fillimin e trajtimit të votave me kusht dhe atyre të personave me nevoja të veçanta, procesi i numërimit të rezultateve zgjedhore po hyn në fazën përmbyllëse.
Presidenti i SHBA-së, Donald Trump, është sërish në qendër të vëmendjes për shkak të stilit të tij karakteristik të shtrëngimit të duarve, por këtë herë në qendër të vëmendjes nuk është një udhëheqës botëror, por zonja e parë e Francës, Brigitte Macron. Një takim i pazakontë u zhvillua të hënën në samitin e 52-të të grupit G7 në Évian-les-Bains të Francës.
Pas një shtrëngimi duarsh të shkurtër dhe të fortë me Presidentin francez ,Emmanuel Macron, Trump u kthye nga gruaja e tij. Pasoi një shtrëngim duarsh jashtëzakonisht i gjatë dhe paksa i sikletshëm, që zgjati gati 15 sekonda. Videoja tregon Brigitte Macron duke hezituar për një moment, sikur të ishte e pasigurt nëse përshëndetja kishte mbaruar vërtet, përpara se të tërhiqte më në fund dorën.
Trump dhe Presidenti francez Emmanuel Macron njihen për shtrëngimet e tyre intensive të duarve që kanë karakterizuar takimet e tyre, por kjo është hera e parë që një përshëndetje e tillë i është drejtuar Zonjës së Parë të Francës.
🇺🇸🇫🇷 Trump and Brigitte Macron shook hands for 13 seconds.
The US president typically uses handshakes with world leaders as a form of nonverbal dominance. However, he has never used such a gesture with women… pic.twitter.com/hutTwN2fWF
— Маrina Wolf (@volkova_ma57183) June 15, 2026
Historia e tyre e gjatë e garës simbolike të shtrëngimit të duarve daton që nga viti 2017, kur takimi i tyre i parë në Bruksel rezultoi në një shtrëngim duarsh të gjatë dhe të fortë, të cilin shumë e interpretuan si treguesin e parë të rivalitetit që do të shënonte marrëdhënien e tyre.
Ky përshëndetje e pazakontë vjen pasi Trump u tall me çiftin Macron në një aktivitet privat në prill, duke akuzuar Brigitte se e kishte trajtuar burrin e saj “jashtëzakonisht keq”.
Ambasadori Eric Wendt është konfirmuar nga Senati i SHBA-së me 51 vota pro dhe 47 kundër, duke marrë miratimin përfundimtar për detyrën e tij diplomatike.
Votimi në seancë plenare vjen pas miratimit të mëhershëm në komisionin përkatës të Senatit, ku kandidatura e tij mori mbështetjen e shumicës së anëtarëve.
Më herët, kandidatura e tij kishte marrë mbështetjen e Komiteti për Marrëdhëniet me Jashtë i Senatit Amerikan me votim 19-3, duke hapur rrugën për miratimin përfundimtar në seancën plenare të Senatit.
Me këtë votim, procedura e konfirmimit përfundon dhe pritet që ambasadori të marrë detyrën në ditët në vijim, sipas afateve të përcaktuara nga administrata amerikane, raporton euroenews.al.
Kush është Wendt?
Wendt ka një karrierë të gjatë mbi tri dekada në ushtri dhe në struktura ndërkombëtare të sigurisë.
Ai është oficer i pensionuar i Ushtrisë së Shteteve të Bashkuara me mbi 34 vjet shërbim.
Wendt ka shërbyer si komandant i Komandës së Operacioneve Speciale të NATO-s, si dhe ka mbajtur poste kyç në Lindjen e Mesme dhe rajonin e Paqësorit.
Gjatë karrierës së tij, Wendt ka qenë koordinator i Sigurisë i SHBA-së për Autoritetin Izraelito-Palestinez në periudhën 2017–2019, si dhe shef i Shtabit në Komandën e Paqësorit të SHBA-së.
Wendt është diplomuar në Universitetin e Kalifornisë në Santa Barbara dhe ka përfunduar studimet pasuniversitare në fushën e sigurisë kombëtare në Shkollën Pasuniversitare
Gjykata Supreme e Kosovës të hënën ka aprovuar kërkesën për masë të përkohshme të sigurimit dhe ka vendosur pezullimin e procedurës së gradimit në Policinë e Kosovës, e cila ishte shpallur më 28 maj 2026 mbi bazën e Udhëzimit Administrativ nr. 01/2026 për Procedurën e Gradimit të Zyrtarëve Policorë.
Lidhur me këtë, eksperti i sigurisë, Burim Ramadani, tha për Ekonomia Online se Gjykata me këtë vendim ka parandaluar ndërhyrjet politike brenda Policisë së Kosovës.
“Qartësisht gjykata në këtë rast e ka shpëtuar policinë, respektivisht e ka mbrojtur policinë nga një ndërhyrje edhe politike edhe e padrejtë, edhe e gabueshme për strukturën e policisë. Ka qenë e habitshme fakti dhe mënyra sesi është nxjerrë ai udhëzim administrativ në ditët e fushatës kur praktikisht kishte filluar fushata zgjedhore edhe me arsyetimin se policia s’ka pasur 10 vite proces gradimi, thu që këta individë nuk janë në udhëheqje të policisë dhe të ministrisë e qeverisë që 6 vitet e fundit dhe si e tillë është fatkeqësi, sa herë që tentohet që përmes ndërhyrjeve të tilla të dëmtohet policia së brendshmi dhe të dëmtohet struktura e policisë dhe përshëndes aktvendimin e Gjykatës Supreme me shpresën që askush më nuk do të nxjerrë udhëzime të tilla që janë edhe jo profesionale edhe të dëmshme edhe abuzuese”, u shpreh ai.
Ramadani deklaroi se kalimi i gradave pa meritë dhe pa një proces zinxhiror, përbën shkelje si ligjore ashtu edhe profesionale.
“Është krejt qartësisht që nuk ka bazë ligjore për një udhëzim të tillë, respektivisht për me e thjeshtësu, këta kanë dashur që përmes një udhëzimi t’i kalojnë gradat për persona që ata duan vetë, me i kalu gradat prej policit në toger automatikisht, ose me një lloj vendimi, i cili është edhe shkelje profesionale, edhe shkelje ligjore, por mbi të gjitha e dëmton policinë, sepse gradat nuk kalohen në polici, askund në botë në vendet demokratike, nuk kalohen pa meritë dhe pa një proces zinxhiror, për të cilin policia e dinë, unë e kuptoj që qeveria nuk e din, apo ka qëllime partiake, por jam habitur me drejtorin e policisë që e ka pranuar këtë dhe e ka përkrahur një udhëzim të tillë, të cilin në fund të fundit doli anti ligjor, sepse gjykata nuk ka se si ta pranojë një udhëzim të tillë, i cili edhe i demotivon policët, zyrtarët policorë të Kosovës, edhe i dëmton ata në karrierë dhe mbi të gjitha mos të harrojmë se në vitin 2024, më 9 korrik, policia është detyruar ta anulojë një konkurs për gradën rreshter, për shkak se ka pasur abuzim jashtëzakonisht të madh, pra keqpërdorim të konkursit dhe procesit të testimit, inspektorët policorë kanë dalë me gjetje dhe policia është detyruar ta anulojë, e sot e asaj dite, pra 2 vite prapa, askush s’ka dhënë përgjegjësi për ato shkelje”, tha ai.
Sipas Ramadanit, brenda Policisë së Kosovës janë tentuar të bëhen ndërhyrje partiake.
“Është qartë dhe dukshëm, është tentuar të partiazohet policia, që përmes vendimeve partiake në qeveri, apo në komitete partiake të zbatohen brenda Policisë së Kosovës, me gradime, në bazë të një udhëzimi jo ligjor, të cilin edhe gjykata e ndaloi së zbatuari”, tha ai.
Gjykata Supreme ka sqaruar se ky vendim është marrë vetëm në kuadër të shqyrtimit paraprak të çështjes dhe nuk paragjykon epilogun përfundimtar të padisë. Vendimi përfundimtar për ligjshmërinë e dispozitave të kontestuara të Udhëzimit Administrativ nr. 01/2026 do të merret pas shqyrtimit të plotë të rastit në procedurën gjyqësore përkatëse.
Eugen Cakolli nga KDI-ja, ka vlerësuar se ndarja përfundimtare e mandateve në Kuvend me raportin 53-22-18-7 tashmë është pothuajse e vendosur.
Sipas tij, se votat e mbetura nuk pritet të sjellin ndryshime të rëndësishme.
Cakolli pohon se as kutitë e mbetura të votave me postë dhe as 11,895 votat me kusht, së bashku me votat e personave me nevoja të veçanta që do të numërohen nesër, nuk pritet ta ndryshojnë ndarjen aktuale të mandateve, përveç në rast se shfaqen devijime të pazakonta nga trendet e deritanishme të votimit.
“Historikisht, votat me kusht kanë ndjekur më shumë trendin e vendvotimeve të rregullta, me dallime relativisht të vogla. Prandaj, përveç nëse rezultati i këtyre votave i afrohet dukshëm trendit të votave me postë, LVV nuk pritet të arrijë në 54 mandate” shkroi Cakolli, në Facebook.
Të gjithë pasionantët e librit takohen sot në Prishtinë në kryengjarjen e fushës së librit shqip, pasi Panairi i 26-të i Librit “Prishtina 2026” hap dyert me ceremoninë që fillon në orën 12:00.
Me moton “Libri hap botën”, në këtë panair marrin pjesë mbi 60 botues shqiptarë, ku numri i titujve të rinj është rreth 2000, derisa numri i titujve të viteve të fundit rreth 6000.
Edicioni i 26-të i Panairit përfshin mbi 40 aktivitete, ku i ftuar nderi është shkrimtari italo-francez Francesco Rapazzini. Ky panair përkon edhe me përvjetorë të rëndësishëm që do të shënohen me aktivitete, përkujtime e debate, do të jenë të pranishëm shkrimtarë ndërkombëtarë dhe kombëtarë, profesionistë të librit, botues, përkthyes e librar.
Panairin pritet ta vizitojnë rreth 30.000 vizitorë: studentë, nxënës të shkollave të mesme dhe fillore të Kosovës, qytetarë dhe personalitete të shquara nga jeta akademike, letrare, politike dhe intelektuale të Kosovës.
Panairi do të jetë i hapur për vizitorë çdo ditë nga 9:00-21:00, dhe do të mbyllet më 21 qershor në orën 19:00.
Edicioni i 26-të i Panairit të Librit, organizohet nga Shoqata e Botuesve të Kosovës, në bashkëpunim me Ministrinë e Kulturës, Rinisë dhe Sportit, Komunës së Prishtinës dhe Pallatit të Rinisë.
Një akt i jashtëzakonshëm guximi dhe profesionalizmi është regjistruar në plazhin e Bibiones në Itali, ku roja i plazhit Edoardo Bertani, 26 vjeç, shpëtoi dy persona që rrezikonin të mbyteshin në det.
Bertani, i cili punon si roje plazhi në Bibione dhe si fizioterapist në Conegliano, vuri re dy burra në vështirësi rreth 40 metra larg bregut dhe reagoi menjëherë.
Ai arriti te notarët, i nxori të dy në breg dhe i dha ndihmën e parë njërit prej tyre, i cili ndodhej në gjendje më të rëndë, deri në mbërritjen e ekipeve të emergjencës.
Veprimi i tij është vlerësuar si një shembull i lartë i humanizmit dhe përkushtimit ndaj jetës së njerëzve. Për këtë arsye, ai ka marrë edhe vlerësime publike nga autoritetet lokale.
“Nuk ke nevojë të jesh hero për të shpëtuar një jetë, mjafton të jesh aty në momentin e duhur”, është mesazhi që përcjell kjo histori frymëzuese.
Me veprimin e tij, Edoardo Bertani dëshmoi se profesionalizmi, guximi dhe gatishmëria për të ndihmuar mund të bëjnë diferencën mes jetës dhe vdekjes. /Albinfo
AL ARABIYA English ka siguruar një kopje të një marrëveshjeje me 14 pika, të cilën Uashingtoni dhe Teherani pritet ta nënshkruajnë të premten.
Sipas dokumentit, Irani dhe Shtetet e Bashkuara të Amerikës, së bashku me aleatët e tyre në luftën aktuale, do të shpallnin përfundimin e menjëhershëm dhe të përhershëm të luftës në të gjitha frontet, përfshirë Libanin.
Marrëveshja parashikon respektimin reciprok të sovranitetit, vazhdimin e negociatave për një marrëveshje përfundimtare brenda një afati maksimal prej 60 ditësh, heqjen e bllokadës detare amerikane, rikthimin e trafikut detar, tërheqjen e forcave amerikane nga zonat përreth pas arritjes së marrëveshjes përfundimtare, përjashtime për eksportin e naftës iraniane, lirimin e pasurive të ngrira të Iranit dhe një plan për rindërtimin ekonomik të Iranit me vlerë të paktën 300 miliardë dollarë, transmeton Telegrafi.
Në dokument, Irani do të përsëriste se nuk do të prodhojë kurrë armë bërthamore, ndërsa çështja e materialit të pasuruar dhe çështjet e tjera bërthamore do të zgjidheshin në marrëveshjen përfundimtare.
Deri atëherë, të dyja palët do të ruanin gjendjen ekzistuese: Irani programin e tij bërthamor, ndërsa SHBA-ja sanksionet dhe dislokimin ushtarak në rajon. Marrëveshja përfundimtare do të duhej të miratohej përmes një rezolute detyruese të Këshillit të Sigurimit të OKB-së.
Në këtë formë, marrëveshja duket si një fitore e rëndësishme për Iranin. Teherani do të përfitonte nga heqja e bllokadës detare, rikthimi i eksporteve të naftës, qasja në pasuritë e ngrira, perspektiva e heqjes së sanksioneve dhe një plan ekonomik prej të paktën 300 miliardë dollarësh, ndërsa në këtë fazë prej tij kërkohet vetëm përsëritja e zotimit se nuk do të prodhojë armë bërthamore dhe ruajtja e gjendjes aktuale të programit bërthamor deri në arritjen e një marrëveshjeje përfundimtare.
Marrëveshja në 14 pika:
Republika Islamike e Iranit dhe Shtetet e Bashkuara të Amerikës, së bashku me aleatët e tyre në luftën aktuale, përmes nënshkrimit të këtij memorandumi mirëkuptimi shpallin përfundimin e menjëhershëm dhe të përhershëm të luftës në të gjitha frontet, përfshirë Libanin. Palët zotohen se nga ky moment nuk do të ndërmarrin veprime armiqësore ndaj njëra-tjetrës dhe do të përmbahen nga kërcënimi ose përdorimi i forcës. Marrëveshja përfundimtare do t’i konfirmojë këto dispozita.
Irani dhe SHBA-ja zotohen të respektojnë sovranitetin dhe integritetin territorial të njëri-tjetrit dhe të mos ndërhyjnë në punët e brendshme të palës tjetër.
Të dyja palët zotohen të negociojnë dhe të arrijnë një marrëveshje përfundimtare brenda një periudhe maksimale prej 60 ditësh, me mundësi zgjatjeje me pëlqim të ndërsjellë.
Menjëherë pas nënshkrimit të memorandumit, SHBA-ja do të heqë bllokadën detare, do të ndalojë çdo pengesë ndaj Iranit dhe brenda 30 ditësh do të rikthejë trafikun detar në kapacitet të plotë. Trafiku do të jetë në nivelin e periudhës para luftës. SHBA-ja gjithashtu zotohen të tërheqë forcat e saj nga zonat përreth brenda 30 ditësh pas marrëveshjes përfundimtare.
Pas nënshkrimit të memorandumit, Irani do të ndërmarrë hapa për të rikthyer brenda 30 ditësh lëvizjen e anijeve tregtare nga Gjiri Persik drejt Detit të Omanit dhe anasjelltas, në nivelin para luftës, duke përfshirë heqjen e pengesave teknike dhe neutralizimin e minave.
SHBA-ja, së bashku me partnerët rajonalë, do të hartojë një plan gjithëpërfshirës për rindërtimin dhe zhvillimin ekonomik të Iranit, me financim prej të paktën 300 miliardë dollarësh.
SHBA-ja do të heqë, sipas një afati të dakorduar në marrëveshjen përfundimtare, të gjitha llojet e sanksioneve ndaj Iranit, përfshirë sanksionet e OKB-së, të Agjencisë Ndërkombëtare të Energjisë Atomike dhe masat e njëanshme amerikane.
Irani përsërit se nuk do të prodhojë kurrë armë bërthamore. Çështja e materialit të pasuruar dhe çështjet e tjera të programit bërthamor do të zgjidhen në marrëveshjen përfundimtare.
Deri në arritjen e marrëveshjes përfundimtare, palët do të ruajnë gjendjen aktuale: Irani do të vazhdojë me statusin aktual të programit të tij bërthamor, ndërsa SHBA-ja nuk do të vendosë sanksione të reja dhe nuk do të forcojë praninë ushtarake në rajon.
SHBA-ja do të japë menjëherë përjashtime për eksportin e naftës bruto iraniane, produkteve petrokimike dhe shërbimeve të lidhura me to, përfshirë bankat, sigurimet dhe transportin.
SHBA-ja do të lirojë fondet dhe pasuritë e ngrira ose të kufizuara të Iranit dhe do t’i vendosë ato në dispozicion të plotë.
Do të krijohet një mekanizëm zbatimi për të monitoruar zbatimin e suksesshëm të marrëveshjes përfundimtare dhe respektimin e detyrimeve.
Pas marrjes së garancive për fillimin e zbatimit të disa pikave të marrëveshjes, Irani dhe SHBA-ja do të hyjnë në negociata për marrëveshjen përfundimtare.
Marrëveshja përfundimtare do të miratohet përmes një rezolute detyruese të Këshillit të Sigurimit të Kombeve të Bashkuara.
Sllovenia aktualisht nuk ka plane për të reduktuar numrin e ushtarëve të saj në kuadër të misionit të KFOR-it në Kosovë, ka njoftuar Ministria e Mbrojtjes e Sllovenisë.
“Çdo vendim lidhur me përshtatjet e mundshme të angazhimit të ardhshëm të Forcave të Armatosura Sllovene në KFOR do të merret pas një vlerësimi gjithëpërfshirës, duke marrë parasysh nevojat e misionit dhe kapacitetet tona”, thuhet në deklaratën e ministrisë, të cituar nga agjencia sllovene e lajmeve STA.
Sipas Ministrisë së Mbrojtjes, aktualisht 106 pjesëtarë të Forcave të Armatosura të Sllovenisë janë të angazhuar në misionin e KFOR-it në Kosovë.