Author: K.B.

Qindra persona nga fshatrat pranë Kakomesë në jug të vendit, emigrantë të ardhur nga Greqia, por edhe nga qytete të tjera të vendit i janë bashkuar protestës së thirrur ditë më parë në Gjirin e Kakomesë, ku u hoqën rrethimet dhe kabinat që mbanin të bllokuar atë zonë prej 22 vitesh.

Protesta ka përfshirë mesditën e së dielës edhe zonën e Kakomesë në hyrje të plazhit në një prej gjireve më të bukur bregdetar në jug të vendit.

Pjesëmarrësit në këtë protestë kanë shkulur dhe shembur çdo shenjë nga rrethimi i dikurshëm i kësaj zone, duke u shprehur se kanë çliruar Kakomenë.

Sakaq polica nuk ka patur asnjë konfrontim me protestuesit, duke u kujdesur për të mbajtur të lirë rrugën nacionale Sarandë-Himarë.

Ish-ministri i Jashtëm dhe një nga figurat e njohura të Partisë Socialiste, Ditmir Bushati, ka reaguar publikisht për protestat që po zhvillohen prej javësh, duke marrë distancë nga narrativat e artikuluara nga kryeministri Edi Rama për ndikime të huaja apo manipulime përmes rrjeteve sociale.

Në një mesazh të publikuar në rrjetet sociale, Bushati thekson se protestuesit “nuk janë të nxitur nga Irani, as nga algoritmet”, por janë “shqiptarë të revoltuar nga trajtimi i atdheut si plaçkë”.

Sipas tij, bëhet fjalë për qytetarë të ndërgjegjësuar për pasojat e aleancës mes politikës, oligarkisë, medias dhe krimit të organizuar, të cilët kërkojnë më shumë drejtësi, dinjitet, shpresë dhe mundësi për të gjithë.

“Çdo ditë që kalon e forcon bindjen se Shqipëria e Re nuk është thjesht një aspiratë, por një kapitull i pashmangshëm që duhet përqafuar. Ky është një moment që kërkon reflektim të thellë, urtësi dhe përgjegjësi”, shkruan Bushati.

Deklarata e ish-ministrit socialist vjen në një kohë kur protesta qytetare ka hyrë në javën e katërt dhe përbën reagimin më të drejtpërdrejtë deri tani nga një ish-anëtar i kabinetit Rama në mbështetje të kërkesave të protestuesve. Ajo përbën gjithashtu një kundërpërgjigje ndaj tezave të kryeministrit, i cili ka folur për ndikimin e algoritmeve dhe përpjekje për instrumentalizim të revoltës qytetare.

Një person ka pësuar lëndime trupore si pasojë e një aksidenti trafiku që ka ndodhur sot në fshatin Krushevë të Klinës.

Sipas Policisë së Kosovës, aksidenti ka ndodhur rreth orës 12:30 dhe në të kanë qenë të përfshira tri vetura.

Zëdhënësi i Policisë për rajonin e Pejës, Driton Rugova, ka konfirmuar se personi i lënduar është dërguar për trajtim mjekësor.

“Sot rreth orës 12:30, Policia është njoftuar për një aksident trafiku i cili ka ndodhur në fshatin Krushevë-Klinë. Në këtë aksident ishin të involvuara tri vetura dhe si pasojë e aksidentit një person ka pësuar lëndime trupore. I njëjti është dërguar në Spitalin Rajonal në Pejë për tretman mjekësor”, ka deklaruar Rugova për Klankosova.tv.
Njësitet relevante policore kanë dalë në vendin e ngjarjes dhe kanë nisur hetimet për të sqaruar rrethanat që çuan deri te aksidenti. Gjendja shëndetësore e personit të lënduar nuk është bërë e ditur.

Një numër i madh njerëzish që lëvizte në errësirën e natës drejt majës më të lartë të Kosovës krijoi një pamje të rrallë dhe një moment historik në bjeshkët e Gjeravicës.

Plot 273 të rinj e të reja, të organizuar nga klubi alpin PBA Peak Bound, realizuan një ngjitje rekord, duke shënuar numrin më të madh të pjesëmarrësve në një aktivitet të tillë në Gjeravicë.

Ngjitja u zhvillua natën e së dielës dhe, sipas organizatorëve, përveç dimensionit sportiv dhe aventurës, ajo mbarti edhe një mesazh simbolik.

Pjesëmarrësit ia kushtuan këtë aktivitet ish-krerëve të Ushtrisë Çlirimtare të Kosovës që po mbahen në Hagë.

“Ishte një pamje madhështore të shihje këtë lumë njerëzish duke ecur drejt majës më të lartë të Kosovës. Çdo hap ishte i mbushur me emocion, energji, vullnet dhe dashuri për natyrën e vendin tonë”, thuhet në mesazhin e organizatorëve pas përfundimit të ngjitjes.

Ata theksuan se gjatë gjithë rrugëtimit pjesëmarrësit kujtuan me respekt dhe krenari ata që e sakrifikuan jetën dhe lirinë për vendin.

“Këtë ngjitje ia kushtuam heronjve tanë, të cilët padrejtësisht po mbahen në Hagë. Në çdo hap drejt majës, i kujtuam me respekt dhe krenari për sakrificën e tyre”, u shprehën organizatorët.

Për mbarëvajtjen dhe sigurinë e grupit të madh u angazhua një ekip i veçantë, i përbërë nga Kastriot Kadrijaj, Riza Lekaj, Atdhe Kastrati, Lavdim Mehani, Bedri Bushi, Erion Maksutaj, Albin Dragusha, Agron Qajani, Milot dhe Agron Iberdemaj, të cilët u vlerësuan për përkushtimin e treguar gjatë gjithë aktivitetit.

Organizatorët falënderuan të gjithë pjesëmarrësit për kontributin në këtë ngjarje, duke e cilësuar atë si dëshmi të fuqisë së rinisë për t’u bashkuar rreth sfidave pozitive dhe aktiviteteve që promovojnë natyrën, sportin dhe solidaritetin.

“273 pjesëmarrës. Një majë. Një qëllim. Një rekord që do të mbahet mend gjatë”, ishte mesazhi përmbyllës i organizatorëve pas ngjitjes historike në Gjeravicë.

Organizata “Ta Pastrojmë Kosovën” ka ngritur shqetësimin për gjendjen e rënduar mjedisore në afërsi të digës së Liqenit të Badovcit, duke publikuar pamje që, sipas saj, dëshmojnë rikthimin e mbeturinave në një nga zonat më të rëndësishme ujore të vendit.

Sipas reagimit të organizatës, zona pranë liqenit është shndërruar sërish në vendgrumbullim mbeturinash, vetëm pak muaj pasi aty ishte organizuar një aksion i gjerë pastrimi në Ditën Botërore të Ujit, më 22 mars.

Ata bëjnë të ditur se në atë aksion morën pjesë vullnetarë, institucione, organizata, media dhe qytetarë, ndërsa u larguan sasi të mëdha mbeturinash. Megjithatë, gjendja aktuale tregon se problemi vazhdon të përsëritet.

“Ndotja nuk zgjidhet vetëm me aksione vullnetare. Pa masa konkrete nga institucionet përgjegjëse, ajo do të vazhdojë të rikthehet”, thuhet në reagim.

Organizata thekson se Liqeni i Badovcit furnizon me ujë të pijshëm një pjesë të madhe të Prishtinës dhe disa komuna të tjera, duke e cilësuar ndotjen jo vetëm si problem mjedisor, por edhe si rrezik për një burim jetik të ujit.

“Ta Pastrojmë Kosovën” ka kërkuar kontroll më të madh institucional, masa parandaluese, ndëshkim të ndotësve dhe zgjidhje të qëndrueshme për mbrojtjen e zonës.

Po ashtu, organizata ka paralajmëruar se së shpejti do të organizojë një aksion tjetër pastrimi, por ka theksuar se vullnetarët nuk mund të zëvendësojnë përgjegjësinë e institucioneve.

U është bërë thirrje qytetarëve që të mos hedhin mbeturina pranë liqeneve, lumenjve dhe burimeve të ujit, duke kujtuar se pasojat e ndotjes prekin të gjithë shoqërinë.

Ambasadorja e Izraelit në Shqipëri, Galit Peleg, ka reaguar pas incidentit të ndodhur gjatë protestës së mbrëmshme në Tiranë, ku protestuesit hoqën flamurin izraelit dhe e grisën atë, ndërsa turma brohoriste.

Në një deklaratë, ambasadorja tha se respekton të drejtën e qytetarëve shqiptarë për të protestuar, por e cilësoi grisjen e flamurit si një veprim që nuk i shërben debatit publik dhe dëmton imazhin e Shqipërisë.

“Si ambasadore e një shteti demokratik, unë besoj në të drejtën e popullit shqiptar për të ushtruar të drejtën e tij qytetare për të protestuar. Megjithatë, një veprim i tillë jo vetëm që nuk e çon përpara protestën publike, por gjithashtu turpëron popullin shqiptar dhe trashëgiminë e tij krenare”, u shpreh Peleg.

Ambasadorja falënderoi gjithashtu reagimin e zyrtarit të Ministrisë për Evropën dhe Punët e Jashtme, Fer Hoxha, i cili dënoi menjëherë aktin e përdhosjes së flamurit.

Në reagimin e bërë në rrjetet sociale, ajo shprehet: Mbrëmë në Tiranë protestuesit hoqën flamurin izraelit dhe e grisën atë, ndërsa turma e mbledhur në vendngjarje brohoriste.

Si ambasadore e një shteti demokratik, unë besoj në të drejtën e popullit shqiptar për të ushtruar të drejtën e tij qytetare për të protestuar. Megjithatë, një veprim i tillë jo vetëm që nuk e çon përpara protestën publike, por gjithashtu turpëron popullin shqiptar dhe trashëgiminë e tij krenare.

E falënderoj ministrin Hoxha për dënimin e tij të menjëhershëm dhe të qartë të këtij akti.

Dita ditës po afrohet momenti i shpalljes së aktgjykimit ndaj ish-krerëve të UÇK-së Hashim Thaçit, Kadri Veselit, Jakup Krasniqit dhe Rexhep Selimit, të cilët po gjykohen në Hagë.

Me këtë rast, Endriti, djali i ish-presidentit ka bërë një reagim të fuqishëm sot në rrjetin social Instagram.

Ai ka publikuar një foto me babain e tij duke lënë edhe një mesazh, duke shprehur bindjen e plotë se çlirimtarët do të kthehen në vendlindje.

“Ka ditë që kalojnë ngadalë kur pret dikë që e do. Por, tani çdo ditë po na ofron më pranë rikthimit tuaj. Me krenari ju presim. Kosova ju pret”, ka shkruar ai në Instastory transmeton Klankosova.tv.

Shpallja e vendimit pritet të bëhet më 20 korrik.

Kryeministri i Shqipërisë, Edi Rama do të zhvillojë nesër një takim me presidentin francez, Emmanuel Macron.

Rama do të udhëtojë drejt Parisit, ku më pas pritet të mbërrijë në orën 13:00 në Pallatin Elysee.

Sipas njoftimit të qeverisë franceze, ata pritet të diskutojnë rreth integrimit të Shqipërisë në BE si dhe për investimet franceze në Shqipëri.

“Ky takim zhvillohet në vijim të shkëmbimeve mes dy drejtuesve, të cilët janë takuar veçanërisht në Paris në prill 2024, si dhe në Tiranë në tetor 2023 dhe në maj 2025. Presidenti i Republikës dhe Kryeministri Edi Rama do të diskutojnë mbi perspektivën europiane të Shqipërisë dhe reformat e ndërmarra në këtë kuadër.”, thuhet në njoftim.

Sipas njoftimit, Macron do të rikonfirmojë mbështetjen e vazhdueshme të Francës për vijimin e procesit të anëtarësimit të Shqipërisë në Bashkimin Europian, në respekt të kërkesave dhe parimeve mbi të cilat ai bazohet.

Dy drejtuesit, thuhet në njoftim, do të diskutojnë gjithashtu zhvillimin e bashkëpunimit në fushat e arsimit, ekonomisë dhe energjisë, si dhe perspektivat e ofruara nga investimet franceze në Shqipëri.

Gjithashtu, tema të diskutimit do të jenë edhe bilanci i disa projekteve, nismat e mbështetura nga grupi AFD në fushat e energjisë dhe mjedisit, si edhe mundësitë e bashkëpunimit në sektorët e transportit, infrastrukturës dhe mbrojtjes.

Pishina e Gërmisë ka hapur dyert për vizitorët këtë të diel, duke shënuar nisjen e sezonit veror për një nga destinacionet më të frekuentuara në kryeqytet.

Lajmi është bërë i ditur nga faqja “Kryeqyteti” përmes një njoftimi në Facebook, ku janë publikuar edhe fotografi nga pishina.

“Dyert e Pishinës së Gërmisë janë hapur. Ju mirëpresim”, thuhet në njoftim.