Author: K.B.

Për të hyrë në operim në Klinikën e Kirurgjisë Abdominale në QKUK, pacientët duhet të kalojnë muaj të tërë në listat e pritjes.

Njëri prej tyre është Ismet Musa, i cili thotë se po përballet me dhimbje të forta e pavarësisht kësaj i është rekomanduar termin për ndërhyrje kirurgjikale.

Në raportin e tij mjekësor shkruan se ai ka “hernie inguinale”, e njohur si kilë në ijë, por me gjithë se është në gjendje të rëndë, ai për operimin duhet të presë gjashtë muaj.

“Kam shku në Emergjencë me dhimbje dhe më kanë thënë se brenda gjysmë ore duhet të futem në operacion. Kanë dashur të më fusin në operacion dhe kur i kam pyetur a do të ma vendosin rrjetën, më kanë thënë se duhet të shkoj në Kirurgji Abdominale. Kam shkuar, i kam bërë konsultat me mjekë, pesë mjekë më kanë kontrolluar dhe më kanë thënë se duhet të hyj në operacion, më së shumti brenda 10 ditësh. Kur shkova në Drejtori të Kirurgjisë Abdominale, më thanë se drejtori është në pushim dhe disa zëvendës të tij më thanë se duhet të pres 6 muaj”, ka thënë Musa.

E për të pritur gjashtë muaj, ai thotë se e ka të pamundur, sepse dhimbjet e forta që i shfaqen në momente të caktuara janë të vështira për t’u përballuar.

Musa thotë se nuk ka as mundësi financiare që t’i drejtohet sektorit privat.

“Nuk është ky rast që pret 6 muaj. Po të ishte rast që pret 6 muaj, do të ishte normale, por nuk është rast që mund të presë njeriu 6 muaj për një operacion, sepse kam shumë dhimbje. Sa më shpejt që të jetë e mundur duhet të operohem. Me një pagë veterani unë nuk mund të hyj privat, sepse kushton 700, 800 e deri në 1000 euro. Unë 204 euro i marr pension, çka me ba me to? Jam zhgënjyer shumë me Kirurgjinë Abdominale”, ka thënë ai.

Pas rekomandimit që të presë me muaj, ai thotë se ka mbetur pa zgjidhje.

KOHA ka biseduar edhe me pacientë të tjerë, të cilët kanë treguar se për t’iu nënshtruar operimit u është dashur të presin rreth pesë muaj. Ndërkaq, një pacient tjetër që gjatë javës së shkuar ka ardhur për të caktuar termin, ka thënë se është njoftuar nga personeli shëndetësor se termini mund t’i caktohet tek për në fillim të dhjetorit.

KOHA ka dërguar pyetje në Shërbimin Spitalor Klinik dhe Universitar të Kosovës për të mësuar arsyet e listave të pritjes në Kirurgjinë Abdominale por që nga e marta nuk ka marrë përgjigje.

Kompania për Distribuimin e Energjisë Elektrike në Kosovë (KEDS) ka bërë të ditur se sot, më 22 qershor 2026, do të realizohen punime të planifikuara për mirëmbajtjen dhe sigurinë e rrjetit energjetik në disa komuna të vendit.

Si pasojë e këtyre punimeve, pritet të ketë ndërprerje të përkohshme të furnizimit me energji elektrike në zona të ndryshme të Prishtinës, Fushë Kosovës, Pejës, Prizrenit, Ferizajt dhe Gjakovës.

Në rajonin e Prishtinës, pa energji do të mbesin fshatrat Koliq, Ballaban dhe Nishevc nga ora 10:00 deri në 15:30, ndërsa në kuadër të projekteve investive, ndërprerje do të ketë edhe në Prugovc, Lupq të Poshtëm, Vranidoll dhe Tenezhdoll nga ora 09:00 deri në 18:00.

Ndërkaq, në Fushë Kosovë janë planifikuar ndërprerje të shkurtra në dy termine, nga ora 09:00 deri në 09:15 dhe nga ora 15:45 deri në 16:00, ndërsa disa pjesë të qytetit do të mbeten pa energji nga ora 09:00 deri në 16:00 për shkak të punimeve në rrjet dhe energjizimit të kabllove të reja.

KEDS njofton se punime të ngjashme do të zhvillohen edhe në komuna të tjera, përfshirë Pejën, Prizrenin, Ferizajn dhe Gjakovën, ku ndërprerjet do të zgjasin kryesisht nga pesë deri në nëntë orë, varësisht nga natyra e punimeve.

Sipas kompanisë, punimet po realizohen në kuadër të mirëmbajtjes preventive, eliminimit të defekteve të identifikuara gjatë inspektimeve me dron, si dhe zbatimit të projekteve investive për përmirësimin e rrjetit energjetik.

KEDS u ka bërë thirrje konsumatorëve në zonat e prekura që të planifikojnë aktivitetet e tyre në përputhje me oraret e ndërprerjeve të paralajmëruara.

Kandidati për deputet nga AAK-ja, Avni Arifi, ka reaguar lidhur me përfshirjen e qytetarëve nga Kosova në zhvillimet e fundit politike në Shqipëri, duke kërkuar që liderët institucionalë dhe politikë të Kosovës t’u bëjnë thirrje qytetarëve të mos marrin pjesë në manifestime pro apo kundër Qeverisë së Shqipërisë.

Përmes një postimi në facebook, Arifi ka theksuar se çështjet politike në Shqipëri duhet të mbeten në duart e qytetarëve të atjeshëm dhe se askush nga Kosova nuk ka të drejtë të përfshihet në protesta apo zhvillime të brendshme politike në shtetin shqiptar.

“Flamuri i UÇK-së në protesta kundër qeverisë në Shqipëri është irritues dhe fyes. Përdorimi i flamurit të UÇK-së në protesta të brendshme politike në Shqipëri është i pavend, sepse synon të politizojë një simbol që i përket një kauze krejt tjetër.

Nuk i duhet askujt një përçarje e re dhe askush nuk ka të drejtë t’i fusë hundët në një çështje që u përket vetëm shqiptarëve që jetojnë në Shqipëri”, ka shkruar Arifi.

Pas dy orëve tubim para Kryeministrisë, protestuesit nisën marshimin masiv me ngjyra kuqezi në rrugët e Tiranës.

Një pjesë prej tyre qëndroi para Kryeministrisë, pasi raportohet ee ata nuk do largohen nga sheshi dhe do qëndrojnë 24 orë aty.

Marshimi u përcoll me thirrjet për dorëheqjen e kryeministrit Edi Rama, dhe me thirrjet “Rama n’burg, Berisha n’burg”.

Kjo është protesta e 22-të me radhë.

Autorët e krimit që u krye në mars të vitit 1998 mbi familjen Jashari, pritet që së shpejti të listohen në një aktakuzë nga Prokuroria Speciale e Kosovës.

55 persona mbetën të vrarë, 22 prej të cilëve, familjarë të ngushtë të komandantit legjendar Adem Jashari, i cili prej kohësh ishte bërë cak i shtetit serb.

Prokuroria Speciale e Kosovës, nuk ka ndarë shumë detaje rreth kësaj, por vetëm ka paralajmëruar se ky rast është duke u trajtuar me prioritet dhe se së shpejti do të finalizohet me ngritjen e aktakuzës.

“Prokuroria Speciale e Republikës së Kosovës ju njofton se rasti është duke u trajtuar me prioritet dhe se shumë shpejt, do të finalizohet me ngritjen e aktakuzës.”

Avokati Visar Rrecaj thotë se PSRK-ja tashmë ka marr dëshmitë e dëshmitarëve që janë ende gjallë, ndërkohë që thotë se është e rëndësishme përmbajtja që do ketë kjo aktakuzë.

“Rëndësia e një aktakuze të paralajmëruar nga Prokuroria Speciale është tejet e veçantë si në aspektin juridik po ashtu edhe kombëtar dhe në aspektin shtetëror që me i dhënë epilog ngjarjes së familjes Jashari të ndodhur më 1998, a është e vonuar për atë pjesë mund të diskutohet por për drejtësinë dhe sistemin e drejtësisë e rëndësishme është që të jetë e kompletuar në detaje që të mos i mungojë asgjë sepse epilogu përfundimtar do të proklamohet edhe në skenën ndërkombëtare”, ka thënë avokati, Visar Rrecaj.

Paralajmërimin për ngritjen e aktakuzës, për sulmin ndaj familjes Jashari e kanë mirëpritur në organizatën e veteranëve të UÇK-së, por thonë se është dashur të bëhet vite më parë.

“Është vonuar ky rast shumë jo vetëm ky rasti te lagjia Jashari dhe familja Jashari por në tërë Kosovën, janë vonuar gjykatat tona dhe supreme e Kosovës, por sido kudo unë e përshëndes dhe e mirëpres jemi mirënjohës shumë për drejtësinë që të hetohet rasti masakra në Prekaz në familjen Jasashri, që prokurorët tonë të marrin në dorë dhe të hetojnë”, ka thënë kreu i UÇK-së, Hysni Gucati.

Hetimi i krimeve të luftës, në të kaluarën është bërë nga UNMIK-u, më pas nga EULEX-i, ndërsa nga vitit 2018 kompetencat kanë kaluar tek Prokuroria Speciale e Kosovës e cila ka departamentin e veçantë për hetimin e tyre. /rtvdukagjini/

Instituti Hidrometeorologjik i Kosovës ka publikuar parashikimin e motit për pesë ditët e ardhshme duke njoftuar se fillimi i javës do të karakterizohet nga mot i paqëndrueshëm me reshje lokale shiu dhe shkarkime rrufesh, ndërsa nga dita e enjte pritet stabilizim gradual i kushteve atmosferike.

Sipas IHMK-së, me hyrjen në stinën astronomike të verës, Kosova do të ndikohet nga masa ajrore relativisht të paqëndrueshme që do të favorizojnë zhvillimin e vranësirave konvektive dhe reshjeve lokale gjatë ditëve të para të javës. Instituti vlerëson se këto reshje do të jenë të dobishme për sektorin e bujqësisë, pasi ndihmojnë në ruajtjen e lagështisë së tokës dhe përmirësimin e kushteve për kulturat bujqësore.

Të hënën dhe të martën parashikohet mot i vranët me intervale me diell, ndërsa gjatë ditës vende-vende priten reshje lokale shiu dhe shkarkime rrufesh. Kushte të ngjashme priten edhe të mërkurën, kur moti do të jetë i ndryshueshëm dhe jostabil.

Nga e enjtja pritet përmirësim i motit, me më shumë intervale me diell dhe gjasa të vogla për reshje, ndërsa e premtja parashihet kryesisht me diell dhe vranësira të shpërndara, duke krijuar kushte të favorshme për aktivitete në natyrë.

Temperaturat minimale gjatë javës do të lëvizin nga 13 deri në 16 gradë Celsius, ndërsa ato maksimale do të shënojnë rritje graduale, nga 26–29 gradë të hënën deri në 27–33 gradë Celsius të premten.

IHMK-ja ka bërë thirrje për kujdes gjatë intervaleve me diell, pasi indeksi UV do të jetë i lartë. Qytetarëve u rekomandohet të shmangin ekspozimin e zgjatur në diell gjatë orëve të mesditës dhe të përdorin masa mbrojtëse.

Parashikimi i IHMK-së:

Parashikimi i motit për javën e ardhshme (22–26 qershor 2026) ☀️🌦️⛈️

Me hyrjen në stinën astronomike të verës, vendi ynë do të ndikohet nga masa ajrore relativisht të paqëndrueshme, të cilat gjatë fillimit të javës do të favorizojnë zhvillimin e vranësirave konvektive, reshjeve lokale të shiut dhe shkarkimeve të rrufeve. Këto reshje janë të mirëpritura për sektorin e bujqësisë, pasi kontribuojnë në ruajtjen e lagështisë së tokës dhe përmirësimin e kushteve agrometeorologjike për kulturat bujqësore. 🌱🌦️

Kushtet biometeorologjike përgjithësisht do të jenë të favorshme për pjesën më të madhe të popullatës, megjithëse gjatë intervaleve me temperatura më të larta dhe para zhvillimit të stuhive lokale mund të ketë shqetësime të lehta te personat e ndjeshëm ndaj ndryshimeve atmosferike. 🌡️

☀️ Indeksi UV gjatë intervaleve me diell do të jetë i lartë, prandaj rekomandohet shmangia e ekspozimit të zgjatur në diell gjatë orëve të mesditës dhe përdorimi i masave mbrojtëse.

🌦️ E hënë (22.06.2026)

Do të mbajë mot i vranët me intervale me diell. Gjatë ditës, vranësirat parashihen të sjellin reshje lokale shiu dhe shkarkime rrufesh.

🌡️ Temperaturat minimale: 13–16°C
🌡️ Temperaturat maksimale: 26–29°C
💨 Era: nga veriperëndimi, 1–11 m/s

🌦️ E martë (23.06.2026)

Parashihet mot i vranët me intervale me diell. Gjatë pjesës së dytë të ditës pritet shtim i vranësirave, të cilat vende-vende do të krijojnë kushte për reshje lokale shiu dhe shkarkime rrufesh.

🌡️ Temperaturat minimale: 13–16°C
🌡️ Temperaturat maksimale: 26–30°C
💨 Era: nga verilindja, 1–9 m/s

⛈️ E mërkurë (24.06.2026)

Do të mbajë mot i ndryshueshëm dhe jostabil. Gjatë ditës parashihen reshje lokale shiu, të shoqëruara me shkarkime rrufesh.

🌡️ Temperaturat minimale: 13–16°C
🌡️ Temperaturat maksimale: 27–31°C
💨 Era: kryesisht nga verilindja, 1–9 m/s

🌤️ E enjte (25.06.2026)

Parashihet mot me diell dhe pjesërisht i vranët. Kushtet atmosferike do të jenë më të qëndrueshme, me gjasa të vogla për reshje.

🌡️ Temperaturat minimale: 13–16°C
🌡️ Temperaturat maksimale: 27–32°C
💨 Era: nga verilindja, 1–4 m/s

☀️ E premte (26.06.2026)

Do të mbajë mot me diell dhe vranësira të shpërndara. Moti do të jetë kryesisht i qëndrueshëm dhe i përshtatshëm për aktivitete në natyrë.

🌡️ Temperaturat minimale: 13–16°C
🌡️ Temperaturat maksimale: 27–33°C
💨 Era: nga veriperëndimi, 1–4 m/s

🔹 Përmbledhje: Java fillon me mot më të paqëndrueshëm dhe reshje lokale shiu, ndërsa nga dita e enjte pritet stabilizim gradual i kushteve atmosferike, me më shumë diell dhe rritje të temperaturave. ☀️🌡️🌿