Kandidatja e LDK-së për deputete, Janina Ymeri, e cila ka fituar edhe një mandat në zgjedhjet e 7 qershorit, ka ironizuar me projektin e pushtetit për gazifikimin e thëngjillit.
Ajo ka bërë me dije se Qeveria Kurti ende nuk i ka vendosur dy bateritë e premtuara në Ferizaj dhe Pejë.
Në profilin e saj në Facebook, Ymeri ka shkruar se pretendimet e VV-së janë të pavërtetat.
“Dy bateri s’i kanë vendos në Ferizaj e Pejë që sa vjet, e po e gazifikojnë thëngjillin. Hajde rrenë hajde!”, ka shkruar ajo.
Ministrja në detyrë e Drejtësisë, Donika Gërvalla, ka bërë të ditur, se në 70-vjetorin e lindjes së Heroit Sali Çekaj, ka nënshkruar vendimin për aktin nënligjor që rregullon ndarjen e çmimit me emrin e tij.
Sipas saj, çmimi “Sali Çekaj” dedikohet për personalitetet që kanë dhënë kontribut të veçantë në fushën e drejtësisë në Republikën e Kosovës.
Përmes një njoftimi në rrjete sociale, Gërvalla ka vlerësuar figurën e Sali Çekajt si një prej personaliteteve më të shquara të historisë së Kosovës, duke theksuar rolin e tij si “komandant i UÇK-së, politikan vizionar dhe jurist i dalluar”.
“Figura e Sali Çekajt, krahas figurës së komandantit të UÇK-së dhe politikanit vizionar, me përkushtim të parezervë për lirinë e vendit deri në flijim në ballë të frontit, rrezaton edhe si figurë e një juristi të rrallë, të guximshëm, mendjemprehtë e të vendosur. Figurë që frymëzon breza e breza juristësh në vendin tonë”, ka deklaruar Gërvalla.
Ajo shtoi se çmimi që mban emrin e Heroit Sali Çekaj synon të vlerësojë individët me kontribut të veçantë në drejtësi, duke shërbyer njëkohësisht si nderim për veprën dhe trashëgiminë e tij.
Komandant Sali Çekaj, që u vra më 19 prill 1999 në krye të detyrës, në Koshare, si komandant i Brigadës 134, konsiderohet si njëri ndër strategët më të shquar të luftës së Kosovës.
Një aksident i rëndë në autostradën A5 në Gjermani ka rezultuar fatal për dy vajza nga fshati Topanicë i Kamenicës, të cilat kanë humbur jetën si pasojë e përplasjes së automjeteve.
Viktimat janë identifikuar si E. Z, 23 vjeçare, dhe A. Z, 17 vjeçare, të cilat janë shtetase zvicerane, gjersa kanë ndërruar jetë në vendin e ngjarjes si pasojë e plagëve të marra.
Policia gjermane ka dhënë detaje lidhur me aksidentin, duke bërë të ditur se fillimisht janë raportuar dy aksidente në të njëjtin segment rrugor, raporton gazeta gjermane Blick.
Sipas autoriteteve, aksidenti i parë ka ndodhur të shtunën rreth orës 11:30, pranë zonës së pushimit Renchtal, kur dy automjete janë përplasur gjatë një manovre ndërrimi korsie nga korsia e mesme në atë të majtë.
“Për shkak të shpejtësisë së lartë, drejtuesit humbën kontrollin mbi automjetet, të cilat u ndalën në rrugë. Një person mbeti i plagosur rëndë”, kanë bërë të ditur autoritetet gjermane.
Si pasojë e pengesave të krijuara në rrugë, disa automjete që po qarkullonin pas tyre kanë frenuar papritur, duke shkaktuar një aksident të dytë të rëndë pranë nyjës së Appenweierit, ku janë përfshirë gjithsej pesë automjete.
Autoritetet kanë bërë të ditur se katër prej tyre nuk kanë pasur të lënduar, ndërsa dy vajzat që ndodheshin në një automjet tip Smart kanë humbur jetën në vendngjarje.
Për shkak të operacioneve të shpëtimit, hetimeve dhe pastrimit të rrugës, autostrada A5 në drejtim të veriut është mbyllur për disa orë, ndërsa më pas është rikthyer qarkullimi normal.
Hetimet për zbardhjen e plotë të rrethanave të aksidentit janë duke vazhduar, ndërsa dëmi material paraprak vlerësohet të jetë mbi 100 mijë euro.
Kryeministri britanik, Keir Starmer tha se, pasi të largohet nga “detyra më e madhe në vend”, do t’i kushtojë më shumë kohë “detyrës më të rëndësishme”, shkruan BBC.
“Të jem bashkëshorti më i mirë që mundem për bashkëshorten time të mrekullueshme, Vic (Victoria), e cila ka qenë një mbështetje e palëkundur pranë meje në kohë të mira dhe të këqija”, tha ai, duke u përpjekur të përmbahet nga emocionet e momentit.
“Dhe të jem babai më i mirë që mundem për fëmijët e mi të mrekullueshëm, të cilët janë krenaria dhe gëzimi im”, përfundoi ai.
Ai përqafon bashkëshorten e tij përpara se të largohej nga konferenca për shtyp.
Në zonën e Velipojë, tre shtetas kanë mbetur të bllokuar në det pasi mjeti i tyre lundrues pësoi avari teknike, duke rrezikuar mbytjen e tyre.
Menjëherë pas njoftimit për incidentin, shërbimet e Policia Kufitare e Shqipërisë u nisën drejt vendngjarjes dhe arritën të lokalizojnë mjetin lundrues, i cili drejtohej nga shtetasi I. H., me dy persona të tjerë në bord.
Sipas autoriteteve, mjeti nuk mund të vijonte lundrimin për shkak të një defekti teknik, duke krijuar rrezik për personat në bord. Për të shmangur çdo situatë të rrezikshme, efektivët e Policisë Kufitare kryen rimorkimin e mjetit deri në breg.
Të tre shtetasit u nxorën në tokë të sigurt dhe nuk pësuan asnjë dëmtim shëndetësor apo fizik. Pas përfundimit të operacionit, u konstatua se dokumentacioni i mjetit lundrues ishte i rregullt.
Biznesmeni kosovar Behgjet Pacolli i ka bërë thirrje Prokurorisë së Posaçme kundër Korrupsionit dhe Krimit të Organizuar në Shqipëri që të nisë hetime lidhur me, siç e ka cilësuar ai, një skandal të rëndë në Aeroportin e Vlorës.
Pacolli ka deklaruar se qytetarët nuk janë informuar për “gjendjen reale” në aeroport, duke kërkuar që të hetohen personat që, sipas tij, kanë vepruar në kundërshtim me ligjin.
“Koha për të zbardhur të vërtetën dhe për të vënë përgjegjësit para drejtësisë është tani”, ka shkruar Pacolli.
Pacolli ka kërkuar nga SPAK një hetim “të plotë, të pavarur dhe gjithëpërfshirës”, pa mbrojtje për askënd, pavarësisht pozitës apo ndikimit që mund të ketë.
“Për këtë arsye, i bëj thirrje urgjente SPAK-ut të nisë menjëherë hetime të plota mbi këtë skandal të rëndë, të krijuar dhe ushqyer nga individë që kanë vepruar dhe vazhdojnë të veprojnë në kundërshtim me ligjin, duke cenuar rëndë shtetin e së drejtës dhe sistemin juridik të Republikës së Shqipërisë”. Koha për të zbardhur të vërtetën dhe për të vënë përgjegjësit para drejtësisë është tani.”
Ai thotë se terminali i Aeroportit të Vlorës ka qenë i bllokuar dhe i uzurpuar për më shumë se dhjetë muaj, ndërsa ka thënë se kompania MABCO dhe nënkontraktorët e saj tashmë janë rikthyer në vendet e punës.
“Sot MABCO dhe nënkontraktorët tanë kanë mundur të rikthehen në vendet e tyre të punës. Në këto momente po kryhet verifikimi dhe evidentimi i dëmeve të shkaktuara nga vandalizmi, vjedhjet dhe shkatërrimet”, ka deklaruar ai.
Sipas Pacollit, dëmet përfshijnë inventarin e projektuar dhe instaluar për funksionimin e aeroportit, por edhe pajisje dhe mjete pune që u përkasin kompanive nënkontraktuese.
Ai ka ngritur dyshime edhe për mbështetje ose tolerim institucional ndaj personave që i ka akuzuar për veprime të paligjshme.
“Më shqetësues është fakti se veprimtaria e tyre dyshohet se është mbështetur ose toleruar nga individë që fshihen pas petkut institucional”, ka thënë Pacolli, duke shtuar se në disa raste, sipas tij, është tentuar të ndikohet edhe në procese gjyqësore.
Ai ka theksuar se duhet të identifikohet i gjithë zinxhiri i personave që mund të jenë përfshirë në ngjarjet e pretenduara, duke kërkuar gjithashtu masa për garantimin e sigurisë së punonjësve dhe kompanive kontraktuese në Aeroportin e Vlorës.
Policia e Kosovës ka publikuar pamje nga armët, municioni dhe pajisjet e tjera ilegale të sekuestruara në tri lokacione të ndryshme në komunën e Zubin Potokut.
Sipas njoftimit të Drejtorisë Rajonale të Policisë në Mitrovicën e Veriut, aksionet janë zhvilluar më 21 qershor pas informacioneve të pranuara nga qytetarët se në disa objekte mund të fshiheshin armë dhe mjete të tjera ilegale.
Gjatë kontrolleve në dy objekte në fshatin Presek dhe një objekt të pabanuar në fshatin Qeçevë, policia ka gjetur dhe konfiskuar tri pushkë të tipit M48, qindra fishekë të kalibrave të ndryshëm, karikatorë, pjesë të uniformave të kamufluara, bateri ndriçuese, si dhe pajisje për mbushjen e fishekëve të armëve të gjuetisë.
Në mesin e materialeve të sekuestruara janë gjetur edhe rreth 200 gramë barut dhe afër 2 kilogramë sfera metalike që përdoren për mbushjen e fishekëve.
Të gjitha veprimet janë kryer në koordinim me Prokurorin e Shtetit, i cili ka urdhëruar inicimin e rasteve për veprën penale “Mbajtje në pronësi, kontroll ose posedim të paautorizuar të armëve”.
Policia ka bërë të ditur se deri në këtë fazë të hetimeve nuk ka persona të arrestuar, ndërsa ka falënderuar qytetarët për bashkëpunimin dhe ndarjen e informacioneve që kontribuojnë në sigurinë publike.
Një person është shoqëruar në stacionin policor pasi i njëjti pas një mosmarrëveshje dyshohet se është përleshur me një person tjetër.
Sipas raportit 24 orësh të Policisë së Kosovës bëhet e ditur se rasti ka ndodhur të dielën rreth orës 17:25, në Obiliq.
Tutje bëhet e ditur se të njëjtit kanë pranuar tretman mjekësor, ndërsa gjatë kontrollit tek i dyshuari është gjetur dhe është sekuestruar një armë e ftohtë (thikë).
“Është shoqëruar në stacionin policor i dyshuari mashkull kosovar pasi që i njëjti pas një mosmarrëveshje dyshohet se është përleshur me viktimën mashkull kosovar. Të njëjtit kanë pranuar tretman mjekësor, ndërsa gjatë kontrollit tek i dyshuari është gjetur dhe është sekuestruar një armë e ftohtë (thikë). Me vendim të prokurorit pas intervistimit rasti vazhdon të trajtohet në gjendje të lirë”, thuhet në raport.
Komanda e Logjistikës në bashkëpunim me dy regjimentet e saj, realizoi garën ekipore “Forca 2026”, në kuadër të Planit Vjetor të Aktiviteteve për vitin 2026.
Gara u zhvillua në katër disiplina të ndryshme, me pjesëmarrjen e shtatë ekipeve nga Komanda e Logjistikës dhe njësitë e saj vartëse.
Qëllimi i kësaj gare ishte testimi i përgatitjes fizike dhe qëndrueshmërisë luftarake ndërmjet pjesëtarëve të njësive.
Gjatë zhvillimit të garës, pjesëmarrësit demonstruan nivel të lartë profesionalizmi, disipline, përkushtimi dhe gatishmërie fizike, duke dëshmuar rëndësinë e stërvitjes së vazhdueshme dhe të punës ekipore në përmbushjen e detyrave ushtarake.
Aktiviteti u përmbyll me shpalljen e ekipeve më të suksesshme dhe ndarjen e mirënjohjeve për pjesëmarrësit, duke reflektuar frymën e garës së ndershme, profesionalizmit dhe bashkëpunimit.
Dy motrat, E.Z dhe A.Z nga Topanica e Kamenicës, kanë humbur jetën tragjikisht pas një aksidenti të rëndë që ndodhi të shtunën në Gjermani.
Kryetari i Komunës së Kamenicës, Kadri Rahimaj, ka shprehur ngushëllime për familjen për këtë tragjedi.
Në një postim në Facebook, Rahimaj ka thënë se lajmi ka prekur rëndë komunën dhe gjithë komunitetin.
“Mëngjes i trishtë për Kamenicën. I prekur nga lajmi për aksidentin e rëndë që ka ndodhur në Gjermani, ku humbën jetën dy vajzat e Familjes Zubaku nga Topanica e Kamenicës”, ka shkruar Rahimaj.
Ai ka shprehur ngushëllime për familjen dhe të afërmit, duke theksuar bashkëndjenjën në këtë moment të rëndë.
“Në këto momente të rënda për familjen, shpreh ngushëllimet më të sinqerta dhe bashkëndiejmë me ju për dhimbjen që po e përjetoni. Ngushëllime edhe për miqtë dhe të gjithë ata që i njohën”, ka shkruar tutje ai.
Kryetari Rahimaj ka theksuar se përballimi i kësaj humbjeje kërkon forcë dhe durim.
“Duhet forcë, durim e kurajo për përballimin e kësaj humbjeje të madhe. Ngushëllime e qoftë i përhershëm kujtimi për to”, përfundon reagimi i tij.