Author: K.B.

Masa mjaft jo-stabile ajrore krijuan kushte për stuhi intensive ditëve të kaluara të cilat në disa zona shkaktuan probleme dhe dëme materiale.Këto masa ajrore tani janë dobësuar dhe po largohen nga rajoni ynë. Temperaturat po ashtu pësuan ulje të ndjeshme pas një valë të shkurt por të fuqishme tropikale.

Pas depërtimit të masave më të freskëta ajrore tani nuk priten rritje të mëdha të temperaturave përkundër stabilizimit të atmosferës. Kjo vlen për viset kontientale, sepse në viset mesdhetare të Shqipërisë do të jetë mjaftë nxehtë këtë fundjavë, por jo ndonjë i nxehtë ekstrem.

Nga tani edhe vranësirat po tërhiqën dhe kemi stabilizim gradual dhe të plotë të atmosferës në rajonin tonë, megjithatë do të kemi erëra të freskëta që herë pas here do të na freskojnë gjatë fundjavës, por pa reshje atmosferike.

E shtuna do të karakterizohet me diell dhe vranësira lokale. Vranësira do të ketë më shumë pjesë të Kosovës, veriut të Malit të Zi dhe pjesë të Maqedonisë së Veriut. Rrallë në ndonjë rajon mund të ketë ndonjë rigë ose rrebesh të shkurtër shiu. Në Shqipëri më shumë diell dhe vranësira të pakta në viset kontinentale.

Temperaturat maksimale në Kosovë rreth 27 apo 28 gradë Celsius, kurse në perëndim të Shqipërisë mbi 30 gradë Celsius.

Edhe dita e diel do të jetë pak a shumë e ngjashme, me më shumë diell dhe vranësira lokale të pakta. Temperaturat pa ndonjë ndryshim që vlen të theksohet. Shumë më nxehtë në gysmën perëndimore të Shqipërisë.

Fillimi i javë së re pritet të rikthejë zhvillimet e vranësirave dhe vende-vende parashihen rrebeshe lokale të shiut me vetëtima dhe bubullimë. Sipas parashikimeve aktuale nuk priten reshje shumë të mëdha, por të lokalizuara vetëm në disa zona. Nxehtë në perëndim të rajonit e më freskët në lindje e veri. Kjo mbetet ende të ndjeket gjendja sinoptike dhe zhvillimi i situatës./MeteoBallkan

Dy deputetët e Partisë Demokratike të Kosovës i janë drejtuar Gjykatës Supreme me ankesë kundër vendimit të Panelit Zgjedhor për Ankesa dhe Parashtresa (PZAP), duke kërkuar rinumërimin e votave, raporton Ekonomia Online.

Kandidatët për deputetë nga PDK-ja, Bekim Haxhiu dhe Qëndrin Kryeziu, thanë se ankesa bazohet në fakte të reja, të cilat sipas tyre dëshmojnë parregullsi të konsiderueshme në procesin e numërimit të votave.

Haxhiu tha se ankesa mbështetet në raportin e Sekretariatit të Komisionit Qendror të Zgjedhjeve (KQZ) për procedurën e rinumërimit, i cili, sipas tij, evidenton gabime të shumta në numërimin fillestar në Qendrën e Numërimit dhe Rezultateve.

“Siç kemi paralajmëruar, kemi dorëzuar ankesën në Gjykatën Supreme. Kjo ankesë bazohet në faktet e reja të cilat i kemi siguruar, e të cilat KQZ nuk i ka bërë publike. Është fjala për raportin e Sekretariatit të KQZ-së për procedurën e rinumërimit, në të cilin janë të evidentuara fakte të shumta për gabimet në procesin e numërimit fillestar në QNR (Qendrën e Numërimit dhe Rezultateve). Nuk janë gabime të vogla, sepse ato gabime prej 6% deri në 25% janë të evidentuara në komuna të caktuara. Ndërsa në total, si mesatare tek votat e Partisë Demokratike, ky gabim është 3.7% — një margjinë e madhe e gabimit. Ndonëse KQZ-ja është munduar që ta minimizojë këtë si gabim, duke e vlerësuar se tek votat preferenciale të kandidatëve është 1.4%, por nëse llogaritet atëherë në të gjitha votat preferenciale të Partisë Demokratike — që i bie në 147,594 vota të PDK-së të numëruara në Qendrën Kombëtare të Numërimit, herë 10 vota preferenciale, pra janë mbi 1 milion e 470 mijë vota preferenciale — me një margjinë gabimi prej 1.4%, i bie që mbi 20,600 vota preferenciale janë potencialisht të regjistruara gabimisht në Qendrën Kombëtare. Prandaj, rezultati zgjedhor nuk mund të certifikohet i pasaktë. Ligji është në këtë çështje i qartë dhe kërkon që të kemi një certifikim të rezultatit zgjedhor të saktë. Askund në ligj nuk shkruan që mund të certifikohet një rezultat zgjedhor me 1.4% gabime, e as me 25%, mirëpo ai duhet të jetë ashtu siç e ka dhënë votën qytetari”, tha Haxhiu.

Ai shprehu pritjen që Gjykata Supreme ta shqyrtojë ankesën në mënyrë të pavarur dhe të urdhërojë rinumërimin.

“Prandaj shpresojmë shumë në profesionalizmin e Gjykatës Supreme, e cila në shumë raste ka ditur të jetë e pavarur dhe të rrëzojë vendimet e PZAP-ës, dhe të urdhërojë rinumërimin. Sepse nuk mund të bëhesh deputet me votat e numëruesve, por duhet të bëhesh me votat e qytetarëve, ashtu siç i ka hedhur ditën e votimit”, tha ai.

Edhe kandidati tjetër për deputet nga PDK-ja, Qëndrin Kryeziu, tha se ankesa është plotësuar me prova shtesë, të cilat, sipas tij, nuk janë marrë parasysh nga PZAP-ja.

“Ne presim sepse kemi sjellë fakte shtesë. Edhe nuk e di pse PZAP-ja e ka rrëzuar kur i ka pasur tërë këto prova, të cilat i kemi sjellë sot për juve. Sepse nga 6.5% që është Mitrovica e Jugut, kemi deri në 25% ndryshim të votës. Dhe 25%, edhe marzhi 1.4% në qoftë se shkojmë në total të 725,000 votuesve, janë në pyetje 101,000 vota gabim. Vetëm për Partinë Demokratike diku janë rreth 22-23 mijë vota që është ndryshimi. Dhe 22-23 mijë vota nuk janë dy vota që po bëjmë hajgare. Kjo nuk është hajgare, me shku deputet me votat e numëruesve. Kështu që unë besoj shumë në drejtësinë e Kosovës, besoj shumë në institucionet e vendit tonë dhe besoj shumë që do të ketë rinumërim dhe do të ketë rezultat real për të gjithë kandidatët”, tha Kryeziu.

Takimi im i parë bilateral në nivel ministror jashtë Kosovës nuk mund të kishte një domethënie më të madhe. Ai u zhvillua pikërisht në Shqipëri – aty ku historia, gjuha dhe identiteti ynë kombëtar na kujtojnë se kufijtë nuk e ndajnë përkatësinë tonë.

Përtej përgjegjësisë shtetërore që mbaj, kjo vizitë kishte edhe një peshë të veçantë emocionale për mua. Gjatë këtij takimi m’u kujtua një thënie e babait tim: “Bëje ose vdis.” Pikërisht me këtë frymë po ndërtojmë ura bashkëpunimi mes Kosovës dhe Shqipërisë, duke afruar qytetarët tanë dhe duke hequr pengesat që kufijtë administrativë nuk duhet t’i krijojnë mes një kombi.

Sot, së bashku me Ministren e Ekonomisë dhe Inovacionit të Republikës së Shqipërisë, znj. Delina Ibrahimaj, nënshkruam Marrëveshjen e Bashkëpunimit për Mobilitetin në Punë.

Kjo marrëveshje forcon lidhjet ndërmjet Kosovës dhe Shqipërisë dhe krijon mundësi më të mëdha për qytetarët tanë në fushën e punësimit dhe zhvillimit profesional.

Një nga rezultatet kryesore është lehtësimi i qasjes në tregun e punës, duke mundësuar që qytetarët e të dy vendeve të kenë procedura më të thjeshta dhe më të shpejta për punësim në shtetin tjetër.

Kosova dhe Shqipëria nuk i bashkon vetëm historia dhe gjaku. Na bashkon edhe përgjegjësia për të ndërtuar një të ardhme me më shumë mundësi për qytetarët tanë.

Ky është vetëm një hap tjetër drejt këtij qëllimi të përbashkët.

Ish-kandidatja për deputete nga PDK-ja, Aida Dërguti, ka thënë që qytetarët e Kosovës duhet të organizohen në protesta masive dhe të bëjnë presion që të mos merret një vendim i padrejtë në Hagë ndaj ish-krerëve të Ushtrisë Çlirimtare të Kosovës.

Më tej, ajo tha se nuk mund të merret një vendim i padrejtë në emër të Kosovës.

“Prej sot duhet të ketë mobilizm mbarëkombëtar të të gjithë shqiptarëve pavarësisht bindjeve ideologjike që duhet të angazhohen dhe madje edhe të dalin në sheshe e me protesta për marrjen e vendimit të drejtë”, ka thënë Dërguti në Kosova Today të Klan Kosovës.

“Pra, duhet të bëhet presion”.

“Unë mendoj që duhet të ketë protesta para 16 shtatorit që t’u tregohet se këtu njerëzit nuk e pranojnë një vendim të padrejtë”.

Dërguti shtoi se populli nuk duhet të lejojë gjykatën që në emër të tyre, UCK-ja të quhet ndërmarrje e përbashkët kriminale.

“Ndërmarrje e përbashkët kriminale nuk mund të quhet kurrën e kurrës dhe duhet të jetë e papranueshme prej qytetarëve të këtij vendi, prej shqiptarëve”.

“Populli duhet t’i thotë: Në emër të popullit ju nuk e quani Ushtrinë Çlirimtare të Kosovës, ndërmarrje e përbashkët kriminale. Pikë“.

Vetëm pak javë pas ndarjes nga jeta të babait të saj, komandantit Sahit Jashari, Vlora Jashari ka përjetuar sot një moment krenarie, pasi bashkëshorti i saj, Denisi, ishte në mesin e 12 oficerëve të rinj që diplomuan me sukses dhe u graduan në ceremoninë e organizuar nga FSK.

Vlora Jashari ka ndarë edhe një mesazh emocional në rrjetin social Facebook, ku ka folur për lidhjen personale me trashëgiminë familjare dhe rrugëtimin e bashkëshortit të saj në ushtri.

“Që nga fëmijëria kam dashur të trashëgoj diçka nga babai im: idealin, përkushtimin dhe dashurinë për atdheun. Duke qenë se ai ishte ndër themeluesit e UÇK-së, rrugëtimi i tij ka qenë gjithmonë frymëzim për mua,” ka shkruar ajo.
Ajo ka shtuar se, ndonëse nuk e ka ndjekur vetë rrugën ushtarake, ka zgjedhur një partner që i shërben vendit me të njëjtin përkushtim.

“Ndoshta nuk e ndoqa vetë këtë rrugë, por zgjodha një partner që i shërben vendit me të njëjtin përkushtim e nder. Sot, teksa ai diplomohet në Akademinë Ushtarake, ndihem krenare jo vetëm për suksesin e tij, por edhe sepse shoh të vazhdojnë vlerat që kam admiruar gjithmonë,” ka shkruar ajo.

Një shtetas i Kosovës është arrestuar nga Serbia në pikën kufitare Mutivodë, gjatë kthimit nga vendlindja e tij, dhe më pas është dërguar në Prokurorinë për Krime Lufte në Beograd.

I arrestuari është Osman Selmani, i cili aktualisht po mbahet nga autoritetet serbe nën dyshimet për krime lufte.

Lajmin për arrestimin e tij e kanë bërë të ditur familjarët e tij.

Familjarët e tij i kanë hedhur poshtë akuzat, duke i cilësuar ato të pabazuara dhe të pavërteta, dhe kanë theksuar besimin në pafajësinë e tij.

“Ne besojmë në pafajësinë e tij dhe do të qëndrojmë pranë tij deri në zbardhjen e plotë të së vërtetës,” thuhet në reagimin e familjes.

Në Maqedoninë e Veriut 168 pacientë aktualisht presin për transplantim të veshkave, 37 për zemër, 12 për mëlçi dhe 23 për korne.

Ministri i Shëndetësisë Azir Aliu, së bashku me koordinatoren kombëtare për transplantim, Biljana Kuzmanovska, informuan për modulin e ri në sistemin “Termini Im”, përmes të cilit qytetarët do të jenë në gjendje të regjistrojnë vullnetin e tyre për dhurimin e organeve.

Me ndryshimet ligjore, çdo qytetar i rritur, kur viziton mjekun e tij të kujdesit parësor, do të jetë në gjendje të deklarojë nëse dëshiron apo jo të jetë dhurues i organeve dhe indeve për trajtim pas vdekjes. Vendimi do të nënshkruhet personalisht, do të certifikohet nga mjeku i zgjedhur dhe do të futet në sistemin elektronik kombëtar.

“Dhurimi i organeve sot është një temë besimi, vullneti personal, solidariteti dhe pjekurie të shoqërisë”, tha ministri Aliu.

Ministria thekson se qasja në të dhëna do të kontrollohet rreptësisht dhe do t’u lejohet vetëm personave të autorizuar. Qytetarët do të jenë në gjendje të ndryshojnë vendimin e tyre në çdo kohë, dhe deklarata e fundit e regjistruar do të jetë e vlefshme.

Sistemi i ri duhet të fillojë të funksionojë nga 1 tetori 2026, dhe deri atëherë, do të punohet për përgatitjen teknike, institucionale dhe të komunikimit.

Kuzmanovska theksoi se dhurimi i organeve mbetet plotësisht vullnetar dhe se qëllimi është që vullneti i qytetarit të vihet në qendër të sistemit.

Gjykata Themelore në Prishtinë ka vendosur në favor të gjyqtares Mejreme Memaj në një konflikt administrativ kundër Këshillit Gjyqësor të Kosovës (KGjK), duke e cilësuar të kundërligjshëm raundin e dytë të votimit për zgjedhjen e dy anëtarëve të rinj të KGJK-së nga radhët e Gjykatës Supreme dhe duke urdhëruar certifikimin e rezultatit të raundit të parë.

Rasti lidhet me procesin zgjedhor të mbajtur më 23 janar 2026, kur 34 nga 35 gjyqtarë të Gjykatës Supreme morën pjesë në votim për dy pozita në Këshill. Në raundin e parë, nga 34 fletëvotime, 33 ishin të vlefshme dhe një i pavlefshëm. Mejreme Memaj dhe Rrustem Thaqi kishin marrë nga 17 vota secili, ndërsa Bashkim Hyseni dhe Franciska Zhitia-Ymeri nga 16 vota.

Komisioni zgjedhor kishte konstatuar se asnjë kandidat nuk kishte arritur shumicën e nevojshme dhe kishte vazhduar me raundin e dytë të votimit. Në atë raund, Rrustem Thaqi dhe Franciska Zhitia-Ymeri kishin marrë nga 19 vota secili, ndërsa Mejreme Memaj dhe Bashkim Hyseni nga 15 vota, pas së cilës KGJK i kishte certifikuar Thaqin dhe Zhitia-Ymerin si anëtarë të rinj.

Mejreme Memaj, e përfaqësuar nga avokati Besnik Berisha, kishte paraqitur padi më 18 shkurt 2026, duke kërkuar anulimin e vendimit të KGJK-së të 29 janarit 2026 me të cilin ishte certifikuar rezultati përfundimtar i raundit të dytë.

Ajo kishte kërkuar gjithashtu që të njihej si i vlefshëm vetëm rezultati i raundit të parë, sipas të cilit ajo dhe Rrustem Thaqi duhej të shpalleshin fitues.

Memaj kishte argumentuar se në raundin e parë kishte fituar 51.52% të votave të vlefshme dhe se shumica duhej të llogaritej vetëm mbi votat e vlefshme, jo mbi votat e pavlefshme apo numrin total të pjesëmarrësve.

Sipas padisë, Komisioni zgjedhor kishte vepruar në mënyrë arbitrare kur kishte vendosur kalimin në raundin e dytë, duke shkelur Rregulloren për procedurën dhe kriteret e zgjedhjes së anëtarëve të KGjK-së dhe praktikat kushtetuese të përmendura në rastet KI34/17 dhe KI55/17.

Memaj kishte theksuar se ajo dhe Rrustem Thaqi kishin arritur shumicën e nevojshme në raundin e parë dhe se vendimi për të vazhduar me raund të dytë i kishte mohuar një të drejtë të fituar në proces zgjedhor.

Ajo kishte kërkuar gjithashtu pezullimin e zbatimit të vendimit të KGjK-së, duke argumentuar se ekzekutimi i tij do të shkaktonte dëm të pariparueshëm në integritetin profesional dhe të drejtat e saj kushtetuese.

KGjK kishte kundërshtuar padinë, duke pretenduar se shumica e nevojshme për zgjedhje ishte 18 vota dhe se kjo shumicë llogaritej mbi numrin e përgjithshëm të pjesëmarrësve në votim, përfshirë edhe votën e pavlefshme.

Sipas KGjK-së, asnjë kandidat nuk e kishte arritur këtë shumicë në raundin e parë, prandaj kalimi në raundin e dytë ishte i domosdoshëm dhe në përputhje me rregulloren.

Edhe personi i tretë, Franciska Zhitia-Ymeri, kishte mbështetur qëndrimin e KGjK-së, duke theksuar se vota e pavlefshme nuk mund të përjashtohej nga baza e llogaritjes së shumicës dhe se procesi ishte zhvilluar në mënyrë të rregullt dhe kushtetuese.

Gjykata Themelore në Prishtinë ka konstatuar se kërkesëpadia e Mejreme Memajt është e bazuar.

Në aktgjykim thuhet se interpretimi i KGjK-së për mënyrën e llogaritjes së shumicës ka qenë i gabuar dhe se nuk ka pasur bazë të mjaftueshme ligjore për zhvillimin e raundit të dytë të votimit.

Gjykata ka vlerësuar se në raundin e parë është krijuar rezultat i vlefshëm, ku Mejreme Memaj dhe Rrustem Thaqi kanë marrë nga 17 vota dhe kanë plotësuar kushtet për t’u konsideruar të zgjedhur.

Po ashtu, gjykata ka anuluar vendimet e KGjK-së nr. 38/2026 dhe nr. 39/2026 të datës 29 janar 2026, përfshirë edhe certifikimin e rezultatit të raundit të dytë.

Sipas aktgjykimit, KGjK obligohet që brenda 15 ditësh të nxjerrë vendim të ri administrativ dhe të certifikojë rezultatin e raundit të parë, sipas të cilit Mejreme Memaj dhe Rrustem Thaqi shpallen anëtarë të KGJK-së nga radhët e Gjykatës Supreme.

Gjykata ka urdhëruar gjithashtu KGJK-në që t’i kompensojë Mejreme Memajt shpenzimet e procedurës në vlerë prej 2,750.34 euro.

Vendimi nuk është i formës së prerë dhe ndaj tij lejohet ankesë në Gjykatën e Apelit brenda afatit ligjor prej 15 ditësh.

Gjyqtarja Mejreme Memaj kishte paditur Këshillin Gjyqësor të Kosovës (KGjK), duke kërkuar anulimin e vendimit me të cilin ishte certifikuar rezultati zgjedhor për dy anëtarë të Këshillit nga shkalla e tretë. Memaj kishte paraqitur edhe kërkesë për masë të sigurisë – pezullimin e zbatimit të vendimit të 29 janarit 2026.

Nga certifikimi i rezultatit zgjedhor, KGjK-ja kishte konstatuar se anëtarë të rinj të Këshillit nga radhët e Supremes janë Rrustem Thaqi dhe Franciska Zhitija-Ymeri. Dy të fundit ishin zgjedhur në raundin e dytë. Andaj, paditësja Memaj kërkon të certifikohet rezultati që doli nga raundi i parë dhe që ajo dhe Thaqi të zgjidhen anëtarë pasi kanë marrë shumicën e kërkuar të votave, raporton “Betimi për Drejtësi”.

Aty thuhet se më 23 janar 2026 u zhvillua procesi zgjedhor, në të cilin nga 35 gjyqtarë me të drejtë vote, të pranishëm ishin 34 gjyqtarë nga Supremja, dhe se nga 34 fletëvotime vetëm një u shpall i pavlefshëm. Dhe pas numërimit, Memaj kishte marrë 17 vota sa edhe Rrustem Thaqi, kurse nga 16 Bashkim Hyseni dhe Franciska Zhitia-Ymeri.

Ndryshe, në mbledhjen e mbajtur më 29 janar 2026, Këshilli kishte hudhur si i palejuar kundërshtimin e paraqitur nga kandidatja për anëtare të KGJK-së nga radhët e gjyqtarëve të Gjykatës Supreme, Mejreme Memaj, duke u certifikuar kështu rezultati zgjedhor i mbajur në këtë gjykatë dhe atë të Apelit.

Sipas kryesuesit Albert Zogajt, gjyqtarët Rrustem Thaqi dhe Franciska Zhitia-Ymeri fillojnë mandatin si anëtarë të KGjK-së më 9 mars 2026 nga radhët e gjyqtarëve të Gjykatës Supreme, ndërkaq gjyqtarja Afërdita Bytyqi po ashtu fillon mandatin më 9 mars 2026, për anëtare nga radhët e gjyqtarëve të Gjykatës së Apelit,

Ndryshe, procesi votimit për anëtarë ishte mbajtur më 23 janar 2026, ku pas përfundimit të raundit të dytë të votimit për dy anëtarët e rinj nga radhët e Supremes, gjyqtari Rrustem Thaqi dhe gjyqtarja Franciska Zhitia-Ymeri u zgjodhën anëtarë të rinj, duke nisur një mandat 5-vjeçar./BetimipërDrejtësi/