Author: K.B.

Deputetja e LDK-së, Hykmete Bajrami, ka reaguar pas vendimeve të Qeverisë në detyrë për rritjen e pensioneve dhe shtesave për fëmijë, duke i cilësuar si manovra politike në prag të zgjedhjeve të jashtëzakonshme.

Bajrami deklaroi se “Grupi Parlamentar i Vetëvendosjes që ka uzurpuar zyrat e Qeverisë aprovoi sot buxhetin për vitin 2026. Ka mundësi që buxheti të shkojë në 8 miliardë dhe pagat e pensionet të rriten disa fish në kohën kur pritet vendimi për shpalljen e zgjedhjeve të jashtëzakonshme. Shtetin po e çojnë drejt rrënimit.”

Ajo shtoi se Prokuroria Speciale ka mundur ta ndalë këtë maskaradë. Tash duhet ta ndalim me votë. E, do ta ndalim me votë.

Një person në Mitrovicë të Jugut është shpëtuar nga Policia e Kosovës pas një tentimi për vetëvrasje, që ndodhi në orët e para të ditës së premte. Falë ndërhyrjes së shpejtë dhe profesionale të autoriteteve, tragjedia është parandaluar në kohë. Personi është dërguar menjëherë në spital për trajtim mjekësor dhe mbështetje të mëtejshme, njofton Policia.

“Gjatë natës së datës 31 tetor 2025, Policia në Mitrovicën e Jugut ka pranuar informacion se një person i rritur kishte hapur dritaren e banesës së tij dhe kishte tentuar të hidhej nga lartësia”, thuhet në njoftim.

“Menjëherë pas marrjes së informacionit, zyrtarët policorë reaguan me shpejtësi dhe profesionalizëm, duke arritur ta lokalizojnë personin dhe të parandalojnë veprimin e tij. Falë ndërhyrjes së menjëhershme, një tragjedi e mundshme është shmangur. Personi është dërguar në spital për trajtim mjekësor dhe ndihmë të mëtejme”, bëhet e ditur.

Policia po ashtu falënderon qytetarët për bashkëpunim dhe i inkurajon ata që të raportojnë rastet e ngjashme sa më shpejt të jetë e mundur, për të parandaluar çdo pasojë të mundshme për jetën dhe shëndetin e qytetarëve.

Kryeministri në detyrë, Albin Kurti, gjatë mbledhjes së qeverisë që ka nisur pak më parë, ka bërë të ditur disa masa të rëndësishme sociale dhe ekonomike për vitin 2026. Ai ka njoftuar se në qeverinë e ardhshme, të gjithë punonjësit e sektorit publik do të përfitojnë pagën e 13-të, ndërkohë që shtesat për lehonat do të rriten ndjeshëm.

“Ashtu siç e parasheh ligji për financat publike, sot po miratojmë projektligjin për ndarje buxhetore për vitin fiskal 2026. Ky buxhet, me vlerë prej 4 miliardë euro, përfshin investime kapitale dhe përmirësime të rëndësishme sociale. Një nga risitë kryesore është dhënia e pagës së 13-të për të gjithë punonjësit e sektorit publik,” tha Kurti.

Ai shtoi se me këtë buxhet rriten edhe pensionet dhe, veçanërisht, shtesat për lehonat, duke ndihmuar familjet në fillim të jetës së fëmijës.

“Gjithashtu, do të zbatohet paga bazë me 0.5% për çdo vit përvojë pune, që përkthehet në rritje shtesë për secilin punonjës publik. Për vitin 2026, ky buxhet përfshin gjithashtu rritje të pensioneve, shtesave për fëmijë dhe pagesa për të rinjtë dhe gratë që angazhohen në punë të jashtëzakonshme,” shtoi Kurti.

Kryeministri në detyrë, Albin Kurti, ka njoftuar se Buxheti i Kosovës për vitin 2026 do të arrijë vlerën e 4 miliardë eurove. Ai bëri të ditur këtë gjatë mbledhjes së sotme të qeverisë, duke theksuar se një pjesë e konsiderueshme e këtij buxheti do të shkojë për investime kapitale.

“Është buxhet në vlerë 4 miliardë euro, ku një miliard euro janë të dedikuara për investime kapitale. Një nga risitë e këtij buxheti është dhënia e pagës së 13-të për të gjithë punonjësit e sektorit publik. Kjo do të thotë se kushdo që punon së paku 12 muaj në sektorin publik, në fund të vitit do të mund të përfitojë pagën e 13-të,” tha Kurti.

Ky lajm vjen si një përpjekje e qeverisë për të mbështetur punonjësit dhe për të rritur investimet në projekte që ndihmojnë zhvillimin ekonomik të vendit.

Kryetari i Aleancës Kosovare të Bizneseve (AKB), Agim Shahini, paralajmëron se rritja e menjëhershme e pagës minimale në 500 euro, siç po synon Qeveria në detyrë, mund të rrezikojë seriozisht bizneset dhe madje të çojë deri në mbyllje të tyre.

Në një intervistë për Ekonomia Online, Shahini tha se një vendim i tillë nuk mund të merret pa një analizë të thellë ekonomike dhe se Qeveria në detyrë nuk ka kompetenca të mjaftueshme për të marrë masa kaq të mëdha.

“Vendimet e Qeverisë së përkohshme, e cila nuk mund të marrë vendime të tilla madhore, duhet të bazohen në kritere ekonomike të qarta. Nuk kemi një analizë të thellë që të dijmë nëse janë plotësuar kushtet për rritjen e pagës minimale,” tha Shahini.

Ai shtoi se një vendim i tillë mund të rrisë informalitetin dhe të rëndojë gjendjen e bizneseve, të cilat tashmë po përballen me krizë ekonomike dhe përjashtime nga mekanizmat ndërkombëtarë financiarë.

“Premtimet e fushatës zgjedhore nuk mund të vendosen mbi realitetin ekonomik. Rritja e menjëhershme e pagës minimale do të rrisë informalitetin dhe do t’i vështirësojë bizneset për të paguar punëtorët, duke marrë parasysh krizën ekonomike, sanksionet dhe humbjet financiare që ka pëson Kosova, përfshirë më shumë se 2 miliardë euro të humbura nga fonde dhe projekte ndërkombëtare,” theksoi Shahini.

Ai nënvizoi gjithashtu se Kosova ka pagën minimale më të ulët në Ballkan, por nuk ka një shtet tjetër në rajon që të jetë nën sanksione ekonomike si vendi ynë.

“Ne nuk duam që bizneset të mbyllen apo të kalojnë në informalitet për shkak të rritjes së pagës minimale. Fitimet në mikro dhe të vogla janë të limituara dhe kjo masë do të thellojë krizën ekzistuese,” përfundoi kryetari i AKB-së.

Policia e Kosovës ka arrestuar të enjtën në Prishtinë një shtetas serb me urdhër ndërkombëtar.

Ai është dërguar në mbajtje, tha policia në raportin 24-orësh.

“Prishtinë / 30.10.2025 – 16:00. Është arrestuar i dyshuari mashkull shtetas serb pasi që i njëjti kishte urdhër arrest. Me vendim të prokurorit i dyshuari është dërguar në mbajtje”.

Sot, me fillim nga ora 10:00, në Pallatin e Drejtësisë do të mbahet seanca gjyqësore ndaj ministrit në detyrë të Punëve të Brendshme, Xhelal Sveçla, dhe deputetëve të Vetëvendosjes, Salih Zyba dhe Fitore Pacolli-Dalipi, të cilët akuzohen për hedhjen e gazit lotsjellës në Kuvendin e Kosovës në mars të vitit 2018.

Urdhëresa për sjellje me detyrim në Gjykatë për ministrin në detyrë dhe deputetët e VV-së mund të ekzekutohet nga Policia e Kosovës, e cila mbetet aktive, konfirmoi për Klankosova.tv zëdhënësja e Gjykatës Themelore të Prishtinës, Mirlinda Gashi.

“Ju njoftojmë se në Gjykatën Themelore në Prishtinë – Departamenti i Përgjithshëm Penal, është duke u zhvilluar procedura penale kundër të pandehurve, D.M., XH.S., S.Z., dhe F.P.D, për shkak që secili veç e veç kanë kryer veprën penale Përdorimi i armës apo mjetit të rrezikshëm, nga neni 375 paragrafi 1 dhe veprës penale Pengimi i personit zyrtar në kryerjen e detyres zyrtare nga neni 409 paragrafi i KPRK-së”.

“Gjyqtari i kësaj çështje penale, për shkak se të pandehurit F.P.D, S.Z., dhe XH.S kishin munguar në seancën e datës 16.09.2025 dhe mungesën e tyre nuk e kishin arsyetuar, ka vendosur jashtë seancës dhe ka lëshuar Urdhëresë për sjellje me detyrim kundër të pandehurve F.P.D, S.Z., dhe XH.S. Gjykata ka ndërmarrë të gjitha veprimet e duhura dhe ka urdhëruar Policinë e Kosovës që të ndërmarrë veprimet e mëtejshme procedurale për të siguruar prezencën e të pandehurve në seancën e radhës”, deklaroi Gashi.

“Urdhëresën do ta ekzekutoj Policia e Kosovës”.