Policia e Kosovës brenda intervalit kohor prej 24-të orësh ka shqiptuar 1701 gjoba trafiku për shkelësit e rregullave të trafikut rrugor.
Po ashtu gjatë kësaj kohe janë shkaktuar 51 aksidente rrugore ku prej tyre 22 me të lënduar dhe 29 me dëme materiale.
10 persona janë arrestuar dhe 5 janë dërguar në mbatje.
Plot 51 aksidente trafiku janë regjistruar brenda 24-orëve në vend.
Kështu u bë e ditur në raportin e Policisë, ku thuhet se 22 prej tyre kanë qenë me të lënduar e 29 aksidente të tjera me dëme materiale.
Njëherësh janë shqiptuar 1701 gjoba trafiku, e dhjetë persona kanë përfunduar në pranga gjatë një dite.
Gjatë kësaj fundjave në vendin tonë do të mbajë mot i vranët dhe me intervale me diell.
Sipas Institutit Hidrometeorlogjik të Kosovës, të shtunën dhe të dielën temperaturat minimale do të sillen nga -4 deri, kurse maksimalet do të arrijnë deri në 9 gradë Celzius.
“Të shtunën parashihet të mbajë mot i vranët dhe me intervale me diell, në mëngjes parashihet të ketë mjegull e cila në disa zona të thelle mbetet e qëndrueshme edhe gjatë ditës. Temperaturat minimale do të lëvizin ndërmjet -2 deri 0 gradë Celsius, ndërsa maksimalet e ditës parashihen të lëvizin ndërmjet 6-9 gradë Celsius.Do të fryjë erë nga veriperendimi me shpejtësi 1-4m/s”
“Të dielën parashihet të mbajë mot i vranët dhe me intervale me diell. Në mëngjes në shum zona parashihet mjegull e radiacionit.Temperaturat minimale do të lëvizin ndërmjet -4 deri -2gradë Celsius, ndërsa maksimalet e ditës parashihen të lëvizin ndërmjet 6-9gradë Celsius. Do të fryjë erë nga verilindja me shpejtësi 1-3m/s”, njofton ky institut.
Tether, aksioner minoritar i Juventusit ka njoftuar se ka paraqitur një ofertë për të blerë paketën shumicë të aksioneve të Exor dhe synon të blejë edhe pjesën e mbetur për të marrë pronësinë e plotë të klubit.
Tether, bleu për herë të parë një pjesë të vogël të aksioneve të Juventusit në shkurt të vitit 2025. Drejtori Paolo Ardoino është një tifoz i përjetshëm i Zonjës së “Vjetër”.
Në prill, Tether e rriti pjesëmarrjen e tij në klub, dhe asokohe raportohej se zotëronte 10.12 për qind të aksioneve dhe 6.18 për qind të të drejtave të votës.
Të premten mbrëma, Tether njoftoi se ka paraqitur një “propozim detyrues, plotësisht në para” për të blerë aksionet e Exor. Exor është kompania mbajtëse e kontrolluar nga familja Agnelli, e cila ka qenë pronare e Juventusit që nga viti 1923.
Aktualisht, Exor zotëron 65.4 për qind të aksioneve të Juventusit. Sipas Calcio e Finanza, Tether ka ofruar 2.66 euro për aksion, që përkthehet në rreth 1.1 miliardë euro gjithsej.
“Tether ka paraqitur një propozim detyrues, të gjitha në para, për Exor për të blerë gjithë paketën e tyre të aksioneve në Juventus Football Club”.
“Me kusht që të merren miratimet rregullatore, Tether synon të bëjë një ofertë publike edhe për aksionet e mbetura, me të njëjtin çmim, të financuar tërësisht me kapitalin e vet dhe të mbështetur nga një angazhim afatgjatë ndaj klubit”.
“Kjo ofertë pasqyron besimin se Juventusi është më shumë sesa një klub futbolli. Për breza me radhë, Juventus ka përfaqësuar disiplinë, ambicie dhe forcën e qetë të atyre që rindërtojnë sezon pas sezoni. Është një klub që ka formësuar identitetin sportiv italian dhe ka fituar besnikërinë e tifozëve në mbarë botën”.
Drejtori Ardoino shtoi: “Për mua, Juventusi ka qenë gjithmonë pjesë e jetës sime. U rrita me këtë skuadër. Si fëmijë, mësova çfarë do të thotë përkushtim, rezistencë dhe përgjegjësi duke parë Juven të përballet me suksesin dhe vështirësitë me dinjitet. Ato mësime më kanë ndjekur gjatë gjithë jetës”.
“Interesi ynë për Juventus vjen nga admirim dhe respekt i thellë. Juventusi është simbol i ekselencës italiane me prezencë globale, i ndërtuar ndër breza përmes punës së palodhur, ambicies dhe besnikërisë së tifozëve. Këto vlera përputhen me mënyrën se si kemi ndërtuar Tether – me durim, pavarësi dhe fokus tek qëndrueshmëria afatgjatë.
“Tether është në një pozicion të fortë financiar dhe synon ta mbështesë Juven me kapital stabil dhe vizion afatgjatë. Qëllimi ynë është të kontribuojmë pozitivisht në të ardhmen e klubit, të mbështesim performancën sportive në nivelin më të lartë.
“Kjo ofertë bëhet me përulësi dhe ndjenjë të thellë përgjegjësie ndaj klubit, tifozëve dhe trashëgimisë së tij. Ne besojmë se historia e Juventusit është ende duke u shkruar, dhe kapitujt e ardhshëm mund të përcaktohen nga forca, vazhdimësia dhe ambicia.”
“Propozimi parasheh blerjen e aksioneve të Exor, që përfaqësojnë 65.4% të kapitalit të lëshuar nga Juventusi. Përfundimi i transaksionit do të varet nga pranimi i Exor, nënshkrimi i dokumenteve përfundimtare dhe marrja e miratimeve rregullatore. Pas përfundimit, Tether synon të vazhdojë me një ofertë publike për të gjitha aksionet e mbetura me të njëjtin çmim për aksion.
“Në rast se transaksioni finalizohet, Tether është i përgatitur të investojë 1 miliard euro për mbështetjen dhe zhvillimin e klubit.
“Tether operon me filozofi investimi afatgjatë, të mbështetur nga bilanc i fortë dhe fokus në ndërtimin e institucioneve të qëndrueshme dhe me rëndësi globale. Përditësime të tjera do të jepen në përputhje me ligjet dhe rregulloret përkatëse”, thuhet ndër të tjera në komunikatë.
Policia e Kosovës ka zhvilluar me sukses një ushtrim të përbashkët me Ambasadën e Shteteve të Bashkuara në Prishtinë, në zonën e Ambasadës Amerikane në lagjen Arbëria.
Qëllimi i ushtrimit ishte vlerësimi i gatishmërisë institucionale, forcimi i kapaciteteve reaguese dhe koordinimi ndërmjet njësive të Policisë së Kosovës dhe personelit të sigurisë së Ambasadës Amerikane për situata krize dhe emergjencash.
Gjatë ushtrimit, i cili u trajtua me seriozitet të lartë, u angazhuan rreth 790 zyrtarë të profileve të ndryshme. Policia njofton se:
“Falë profesionalizmit të njësive të angazhuara dhe bashkëpunimit të qytetarëve, ushtrimi u realizua pa incidente, duke ofruar mundësi për të vlerësuar dhe përmirësuar qasjet operacionale të sigurisë.”
U demonstrua funksionimi efektiv i mekanizmave të komunikimit dhe reagimit të shpejtë, përdorimi i mjeteve të specializuara të sigurisë, testimi i procedurave operative dhe simulimi i skenarëve të ndryshëm të menaxhimit të krizave.
Policia e Kosovës falënderon qytetarët për mirëkuptim dhe pjesëmarrësit në trafik:
“Falënderojmë qytetarët dhe pjesëmarrësit në trafik, të cilët treguan kulturë të lartë dhe mirëkuptuan ndërprerjet përkohshme të qarkullimit të trafikut në zonën e ushtrimit.”
Ky ushtrim konfirmon partneritetin e fuqishëm ndërmjet Policisë së Kosovës, Ambasadës Amerikane dhe institucioneve të tjera:
“Ky ushtrim konfirmon edhe një herë partneritetin e fuqishëm dhe bashkëpunimin e vazhdueshëm ndërmjet Policisë së Kosovës, Ambasadës Amerikane dhe institucioneve të tjera, me synim garantimin e një ambienti sa më të sigurt për qytetarët, institucionet dhe stafin diplomatik në Republikën e Kosovës.”
Policia e Kosovës thekson se do të vazhdojë të organizojë aktivitete të ngjashme:
“Policia e Kosovës mbetet e përkushtuar për rritjen e kapaciteteve profesionale dhe forcimin e bashkëpunimit ndërkombëtar, ndërsa do të vazhdojë me aktivitete që rrisin ndjenjën e sigurisë dhe gatishmërinë institucionale për çdo situatë emergjente.”
Fushata zgjedhore për zgjedhjet parlamentare të 28 dhjetorit ka hyrë në fazën e prezantimit të mesazheve kryesore, ndërsa partitë politike kanë publikuar slloganet me të cilat synojnë t’i drejtohen elektoratit.
Lëvizja Vetëvendosje (LVV) ka dalë me slloganin “Siguri dhe begati. Mos lësho pe!”, duke u bërë thirrje qytetarëve që të këmbëngulin në kërkesën për siguri, zhvillim dhe mirëqenie.
LVV thekson se synon forcimin ekonomik të vendit, mbështetjen e familjeve punëtore dhe garantimin e sigurisë së përgjithshme në çdo aspekt të jetës.
Partia Demokratike e Kosovës (PDK) ka zgjedhur slloganin “Bashkë. Përpara.”, të shoqëruar me mesazhin “Për të gjithë qytetarët. Për Kosovën”, duke u fokusuar në unitetin politik dhe ecjen përpara me një vizion të përbashkët për vendin.
Lidhja Demokratike e Kosovës (LDK) ka prezantuar slloganin motivues “Zgjidh shpresën”. Zgjedhni punën. Zgjedhni LDK-në.”, duke synuar të tërheqë votuesit përmes ofertës së stabilitetit, punës dhe rikthimit të besimit në institucione.
Aleanca për Ardhmërinë e Kosovës (AAK) ka dalë me slloganin e shkurtër dhe emocional “Krah teje”, që synon të komunikojë afërsinë dhe mbështetjen ndaj qytetarëve në sfidat e përditshme.
Ndërsa Nisma Socialdemokrate ka vendosur të garojë me slloganin “me Fatmir Limaj”, duke e personalizuar fushatën rreth figurës së liderit të saj.
Ministri në detyrë i Infrastrukturës, Hysen Durmishi, ka njoftuar se nesër do të mbyllet përkohësisht segmenti Smrekonicë hyrja në Vushtrri (drejtimi për Prishtinë), për shkak të punimeve në asfaltimin e bypass-it të qytetit të Vushtrrisë.
Përmes një njoftimi në facebook Durmishi ka bërë të ditur se rruga do të jetë e mbyllur nga ora 08:00 deri në 14:00.
“Nesër, më 13.12.2025, për shkak të asfaltimit të bypass-it të Vushtrrisë, segmenti Smrekonicë – hyrja në Vushtrri (drejtimi për Prishtinë) do të jetë i mbyllur nga 08:00 – 14:00. Përdorni rrugën alternative nëpër qytetin e Vushtrrisë. Faleminderit për mirëkuptimin.”, ka shkruar Durmishi.
Pesë burra që ishin pjesë e një bande që përdhunonte dhe sulmonte seksualisht vajzat që takonin në një park janë burgosur me dënime që variojnë nga 18 muaj deri në 14 vjet.
Gjykata e Kurorës në Newcastle, Mbretëri e Bashkuar, dëgjoi se si katër burrat rumunë dhe një shqiptar shënjestruan vajza të cenueshme në Saltwell Park, Gateshead, midis viteve 2015 dhe 2019.
Një nga gjashtë viktimat ishte një vajzë 14-vjeçare e cila u bë e varur nga kokaina që i ishte dhënë nga burrat.
E quajtur Vajza B, për të mbrojtur identitetin e saj, ajo tha: “Nuk e di nëse do të jetoj ndonjëherë një jetë normale. Jam gjithë kohës në ankth, veçanërisht nëse jam vetëm”.
Ajo shtoi se ndihej e mbingarkuar dhe qante shpesh.
Banda e burrave ishte shpallur fajtore për veprat penale në një gjyq në tetor, shkruan BBC.
Codrin Dura, 27 vjeç, u dënua me 13 vjet burg për dy akuza për përdhunim, tre akuza për aktivitet seksual me një fëmijë, tentativë përdhunimi, shantazh dhe sulm seksual, të gjitha në lidhje me një vajzë të njohur si Vajza A për të mbrojtur identitetin e saj.
Dura u shpall gjithashtu fajtor për dy akuza për përdhunimin e një vajze të dytë, Vajzës B, dhe u dënua për organizimin e kryerjes së një krimi seksual me fëmijë dhe furnizimin me drogë të Klasit A.
Leanoard Paun, 24 vjeç, u dënua me pesë vjet e një muaj burg për aktivitet seksual me një fëmijë dhe një akuzë për përdhunim në lidhje me Vajzën B, dy akuza për organizim të kryerjes së një vepre penale seksuale me fëmijë, shpërndarje të një imazhi të pahijshëm të një fëmije dhe furnizim me drogë të Klasit A.
Bogdan Gugiuman, 44 vjeç, u dënua me 14 vjet burg për tre akuza për përdhunim që lidheshin me Vajzën B dhe u dënua për furnizim me drogë të Klasit A.
Gjykatësi tha se ai nuk tregoi “asnjë shprehje pendimi” për atë që i bëri vajzës, e cila ishte 14 vjeç në atë kohë.
Shtetasi shqiptar Klaudio Aleksiu, 28 vjeç, u dënua me gjashtë vjet burg për një akuzë për përdhunimin e vajzës B dhe furnizimin me drogë të Klasit A. Ai ishte 21 dhe 22 vjeç në kohën e kryerjes së veprave penale.
Stefan Ciuraru, 23 vjeç, u dënua me 18 muaj burg për katër akuza për sulm seksual ndaj vajzave B, C dhe D, aktivitet seksual me një fëmijë, vajzën E, dhe nxitje të një fëmije, vajzës F, për t’u angazhuar në aktivitet seksual.
Gjykatësi tha se kombësitë e të pandehurve ishin “të parëndësishme për procesin e dënimit” dhe mosha e shumicës së tyre në kohën e kryerjes së veprave penale vendoste “një kufizim të konsiderueshëm në dënimet që mund t’i shqiptoheshin.
Policia e Kosovës ka apeluar tek qytetarët që të tregohen të kujdesshëm në vozitje, pasi ka filluar shfaqja e mjegullës në vendet ku pozita gjeografike është më e ulët.
Në njoftimin e lëshuar për media, Policia u bën thirrje vozitësve që t’i përdorin dritat e mjegullës, por jo edhe ato me rreze të gjatë.
“Ngasja e automjetit me drita të gjata mund të reflektojë jashtë mjegullës dhe mund të kthehet në automjetin tuaj, e cila gjithashtu e bën të pamundur që shoferët e tjerë t’ju shohin”, thuhet në njoftim.
Lëvizja Vetëvendosje ka bërë publik sloganin e zgjedhjeve të parakohshme të 28 dhjetorit.
“Siguri dhe begati” është slogani i partisë që po synon të qeverisë edhe për 4 vjet të tjera, e që pohon se punon për pasuruar shtetin, shoqërinë dhe ata që nuk kanë.
Motoja e LVV-së bazohet mbi mos të lëshuarit pe.
“Ne punojmë për siguri dhe begati të vendit tonë. Ne nuk do të lëshojmë pe. Mos lëshoni dhe ju pe për Kosovën të begatë e të sigurtë” thuhet në njoftim.
Ky është postimi i plotë i partisë:
I ftojmë qytetarët tanë, kudo ku janë e punojnë që të mos lëshojnë pe nga kërkesa për begati e siguri.
Ne punojmë për ta pasuruar shtetin, shoqërinë, ata që nuk kanë, brezat e rinj, e mbi gjitha familjet, prindërit që punojnë çdo ditë me plot sakrifica.
Ne punojmë për ta pasur shtetin e sigurtë, ekonominë e forcuar, sigurinë e jetës, punës, familjes, sigurinë financiare çdo grua e burrë në vendin tonë.
Ne punojmë për siguri dhe begati të vendit tonë. Ne nuk do të lëshojmë pe. Mos lëshoni dhe ju pe për Kosovën të begatë e të sigurtë.