Author: K.B.

Lëvizja Vetëvendosje dhe Partia Demokratike e Kosovës kanë arritur një marrëveshje për bashkëqeverisje në Komunën e Podujevës.

Si rezultat i kësaj marrëveshjeje, kandidati i PDK-së, Isak Shabani, është zgjedhur të hënën kryesues i Kuvendit Komunal të Podujevës.

Shabani ka marrë mbështetjen e 21 asamblistëve, ndërsa një votë ka qenë abstenim. Asamblistët e Lidhjes Demokratike të Kosovës nuk kanë marrë pjesë në procesin e votimit.

Pas zgjedhjes, Shabani ka deklaruar se këtë pozitë e sheh si një përgjegjësi ndaj qytetarëve dhe ka premtuar angazhim për një punë transparente dhe në përputhje me ligjin shkruan Tëvë1.

Bazuar në rezultatet e numërimit të votave të para të kandidatëve për deputetë kandidati i PDK-së për kryeministër Bedri Hamza ka marrë më së shumti vota, gjithsej 594 vota.

Në vendin e dytë renditet Sylejman Berisha me 263 vota, ndërsa i treti është Arben Mustafa.

Në vendin e katërt renditet Elmi Reçica me 247 vota, ndërsa në vendin e pestë Besim Ilazi me 227 vota.

Deri më tani janë numëruar votat nga 16 prej gjithsej 2 mijë e 557 vendvotimeve.

Paneli Zgjedhor për Ankesa dhe Parashtresa (PZAP) ka pranuar ankesën e subjektit politik “Kosovski Savez” kundër Listës Serbe për shkelje të Kodit të Mirësjelljes gjatë fushatës për Zgjedhjet e Parakohshme për Kuvendin e Kosovës më 28 dhjetor 2025.

Pas shqyrtimit të provave, PZAP konstatoi se Lista Serbe kishte vendosur materiale promovuese në hapësira publike pa lejen e autoriteteve, duke shkelur disa vendime të mëparshme të PZAP-it dhe Ligjin për Zgjedhjet e Përgjithshme (08/L-228).

Si pasojë, Lista Serbe është gjobitur me 45,000 euro dhe detyrohet ta paguajë gjobën brenda 15 ditëve nga dita e plotfuqishmërisë së vendimit.

PZAP thekson se shkeljet përfshijnë vendosje të materialeve zgjedhore në stacione autobusi, rrugë, ndërtesa dhe hapësira publike në Leposaviq, Zubin Potok, Graçanicë dhe Leshak, duke mos respektuar urdhrat për largimin e tyre nga vendet publike.

Paneli ka vlerësuar se pretendimet e Listës Serbe për përdorimin e fotografive të vjetra nuk e liruan nga përgjegjësia.

Kundër këtij vendimi, sipas ligjit, është e mundur të paraqitet ankesa në Gjykatën Supreme brenda 48 orëve nga marrja e vendimit.

Partia për Liri, Drejtësi dhe Mbijetesë (PLDM) e Nenad Rashiqit ka njoftuar të hënën se ka siguruar një ulëse në Kuvendin e Kosovës për katër vitet e ardhshme, pas fitimit të 4.600 votave në zgjedhjet e së dielës.

Në një njoftim të shpërndarë përmes Facebook-ut, PLDM ka shprehur mirënjohjen për besimin e dhënë nga qytetarët, duke e cilësuar këtë rezultat si një “nder të madh dhe një detyrim” për të qenë më të përkushtuar ndaj interesave të qytetarëve.

“Këtë besim e përjetojmë si një nder të madh, por edhe si një detyrim që të jemi edhe më të fortë, edhe më të pranishëm dhe edhe më të përkushtuar ndaj interesave të qytetarëve,” thuhet në postimin e PLDM-së.

Përkundër këtij suksesi, partia Listës Serbe, e cila mbështetet nga Beogradi dhe është partia kryesore e serbëve në Kosovë, ka pretenduar se ka fituar të gjitha 10 ulëset e rezervuara për komunitetin serb në Kuvendin e Kosovës, me 90 për qind të votave të fituara nga ky komunitet.

Megjithatë, kryetari i Listës Serbe, Zllatan Ellek, ka ngritur dyshime në lidhje me rezultatet e PLDM-së, duke thënë se ky subjekt ka marrë vota në zona ku serbët nuk jetojnë dhe ka kërkuar vlerësim të mëtejshëm nga Komisioni Qendror i Zgjedhjeve (KQZ).

Zyrtari tjetër i Listës Serbe, Igor Simiq, ka shtuar se numërimi i votave me kusht është ende në proces dhe se më shumë se 1.000 vota nga persona të zhvendosur janë ende për t’u përpunuar.

Sipas rezultateve preliminare të KQZ-së, Lista Serbe ka siguruar rreth 41.800 vota, ndërsa Aleanca Kosovare e Goran Marinkoviqit ka marrë rreth 550 vota.

Në zgjedhjet e mëparshme parlamentare të shkurtit 2025, Lista Serbe kishte pretenduar se kishte fituar të gjitha 10 mandatet e rezervuara për komunitetin serb, megjithatë një mandat përfundoi në duar të Nenad Rashiqit.

Rashiqi, ish-ministër për Komunitete dhe Kthim në qeverinë e kaluar të kryeministrit Albin Kurti, ishte emëruar në këtë pozitë pasi Lista Serbe i kishte braktisur institucionet e Kosovës në nëntor të vitit 2022.

Në këtë kuadër, Lista Serbe vazhdon të kundërshtojë përfaqësimin e Rashiqit, duke pretenduar se ai nuk ka mbështetje të mjaftueshme për të përfaqësuar komunitetin serb në Kuvend.

Gjithashtu, Lista Serbe kishte ngritur padi në Gjykatën Kushtetuese për të kundërshtuar zgjedhjen e Rashiqit si nënkryetar të Kuvendit, duke pretenduar se ishte shkelur Kushtetuta dhe Rregullorja e Punës e Kuvendit.

Sipas Kushtetutës së Kosovës, njëri nga nënkryetarët e Kuvendit duhet të jetë nga radhët e deputetëve që mbajnë vende të rezervuara për përfaqësuesit e komunitetit serb.

Po ashtu, sipas Rregullores së Punës, kandidatin për nënkryetar nga ky komunitet e propozon shumica e deputetëve serbë

Numërimi i votave në komunat me shumicë serbe ende nuk ka përfunduar plotësisht dhe pritet që KQZ të bëjë vlerësimin përfundimtar të rezultateve, duke përfshirë edhe votat me kusht dhe ato nga persona të zhvendosur.

Komisioni Qendror i Zgjedhjeve (KQZ) ka nisur publikimin e votave të kandidatëve për deputetë, pas procesimit të një pjese të vogël të votave.

Sipas të dhënave të publikuara, kur janë numëruar 0.63 për qind e votave për kandidatët për deputetë në Lidhjen Demokratike të Kosovës, kryeson kryetari i partisë, Lumir Abdixhiku, me 432 vota.

Në vendin e dytë renditet Vjollca Kadolli Halili me 324 vota, ndërsa pas saj vjen Halil Musliu me 249 vota.

Faruk Nura është i katërti me 232 vota, ndërsa në vendin e pestë renditet Hykmete Bajrami me 229 vota.

Ndërkohë, sipas rezultateve të përgjithshme të publikuara në faqen zyrtare të KQZ-së, kur janë procesuar 99.65 për qind e votave, Lidhja Demokratike e Kosovës ka siguruar 13.57 për qind të votave, respektivisht 118 mijë e 772 vota.

Në zgjedhjet e mbajtura më 28 dhjetor, të drejtë vote kanë pasur 1 milion e 999 mijë e 204 qytetarë.