Author: K.B.

Në fshatin Goriq të Malishevës është djegur mbrëmë një shtëpi dhe si pasojë ka mbetur e vdekur një grua mbi të 50-t.

Lajmin e ka konfirmuar drejtori rajonal i policisë në Gjakovë, Lumni Graishta i cili theksoi se shkaqet e zjarrit ende nuk dihen.

“Rasti i zjarrit është raportuar të ketë ndodhur në fshatin Goriq, Malishevë. Viktima rreth 53-54-vjeçare. Shkaku i zjarrit nuk dihet”, ka thënë Graishta.

Burri që vrau ish-kryeministrin e Japonisë, Shinzo Abe, është dënuar me burgim të përjetshëm, tre vjet e gjysmë pasi qëlloi për vdekje ish-liderin gjatë një tubimi në qytetin e Narës në vitin 2022.

Vetë Tetsuya Yamagami u deklarua fajtor për krimin në hapjen e gjyqit vitin e kaluar, por dënimi që ai meriton ka ndarë opinionin publik në Japoni.

Ndërsa shumë e shohin 45-vjeçarin si një vrasës gjakftohtë, disa simpatizojnë edukimin e tij të trazuar, transmeton Telegrafi.

Prokurorët thanë se Yamagami meritonte burgim të përjetshëm për “aktin e tij të rëndë”. Vrasja e Abes tronditi vendin ku praktikisht nuk ka krime me armë.

Duke kërkuar lehtësim, ekipi mbrojtës i Yamagamit tha se ai ishte viktimë e “abuzimit fetar”.

Përkushtimi i nënës së tij ndaj Kishës së Unifikimit e falimentoi familjen dhe Yamagami mbante mëri ndaj Abes pasi kuptoi lidhjet e ish-liderit me kishën kontroverse.

Gati 700 njerëz u rreshtuan jashtë gjykatës së distriktit të Narës të mërkurën për të marrë pjesë në seancën e dënimit.

Vdekja tronditëse e Abe-s ndërsa mbante një fjalim në mes të ditës nxiti hetime mbi Kishën e Unifikimit dhe praktikat e saj të dyshimta, duke përfshirë kërkimin e donacioneve financiarisht shkatërruese nga ithtarët e saj.

Çështja gjithashtu zbuloi lidhje me politikanë nga Partia Liberale Demokratike në pushtet në Japoni, dhe rezultoi në dorëheqjen e disa ministrave të kabinetit.

Gazetarja Eito Suzuki, e cila mbuloi të gjitha seancat gjyqësore të Yamagami-t përveç njërës, tha se Yamagami dhe familja e tij dukeshin “të mbingarkuar nga dëshpërimi” gjatë gjithë gjyqit.

Yamagami “shpërthente një ndjenjë lodhjeje nga bota dhe dorëheqjeje”, rrëfen Suzuki, e cila filloi të hetonte Kishën e Unifikimit shumë kohë para vrasjes tronditëse të Abe-s.

“Gjithçka është e vërtetë. Nuk ka dyshim se unë e bëra këtë”, tha Yamagami solemnisht në ditën e parë të gjyqit të tij në tetor 2025.

I armatosur me një armë të bërë në shtëpi të montuar duke përdorur dy tuba metalikë dhe shirit ngjitës, ai qëlloi dy herë drejt Abes gjatë një eventi të fushatës politike në qytetin perëndimor të Narës më 8 korrik 2022.

Vrasja e figurës publike më të njohur të Japonisë në atë kohë – Abe mbetet kryeministri me shërbimin më të gjatë në historinë japoneze – shkaktoi tronditje në të gjithë botën.

Duke kërkuar një dënim me burg jo më shumë se 20 vjet, avokatët e Yamagamit argumentuan se ai ishte viktimë e “abuzimit fetar”.

Ai e urrente kishën sepse nëna e tij i dhuroi asaj sigurimin e jetës së babait të tij të ndjerë dhe asete të tjera, në vlerë prej 100 milionë jen (828,750 dollarë singaporianë), dëgjoi gjykata.

Yamagami foli për ankesën e tij kundër Abes pasi pa mesazhin e tij video në një eveniment të lidhur me kishën në vitin 2021, por tha se fillimisht kishte planifikuar të sulmonte drejtuesit e kishës, jo Aben.

Suzuki kujton shikimin mosbesues të vejushës së Abe-s, Akie-s, kur Yamagami tha se ish-lideri nuk ishte objektivi i tij kryesor. Shprehja e saj “mbetet e ngulitur qartë në mendjen time”, thotë Suzuki.

“Përcolli një ndjesi tronditjeje, sikur po pyeste: A ishte burri im thjesht një mjet i përdorur për të shlyer një mëri ndaj organizatës fetare? A ishte vetëm kaq”, shtoi ai.

Në një deklaratë emocionale të lexuar në gjykatë, Akie Abe tha se hidhërimi për humbjen e burrit të saj “nuk do të lehtësohet kurrë”.

“Doja vetëm që ai të mbetej gjallë”, kishte thënë ajo.

E themeluar në Korenë e Jugut, Kisha e Unifikimit hyri në Japoni në vitet 1960 dhe kultivoi lidhje me politikanë për të rritur ndjekësit e saj, thonë studiuesit.

Operator Sistemi, Transmisioni dhe Tregu (KOSTT) ka bërë të ditur se si shkak i ngarkesës dhe mungesës së furnizimit nga KESCO, kanë ndodhur reduktimet me energjinë elektrike.

Në njoftim thuhet se mungesat e furnizimit janë plotësuar nga KEK’u me hyrjen në operim të bllokut B2.

Njoftimi i plotë:

KOSTT njofton se gjendja në sistemin elektroenergjetik është stabilizuar pas masave të koordinuara për balancimin e ngarkesës dhe përmirësimin e furnizimit me energji elektrike.

Mungesat e furnizimit nga KESCO janë plotësuar nga KEK me hyrjen në operim të bllokut B2, duke kontribuar në stabilitetin e furnizimit dhe ruajtjen e integritetit të sistemit, si dhe duke mundësuar ndërprerjen e kufizimit të ngarkesës (reduktimeve).

KOSTT u bën thirrje të gjitha palëve në treg të respektojnë rregulloret dhe të sillen me përgjegjësi, për të siguruar operim të qëndrueshëm dhe të sigurt të rrjetit.

KOSTT mbetet në gatishmëri dhe do të vazhdojë monitorimin e sistemit, duke ndërmarrë masat e nevojshme sipas kompetencave ligjore.

Instituti Kombëtar i Shëndetësisë Publike ka bërë përditësimin e fundit lidhur me situatën me ujin e pijshëm në vend, teksa ka thënë se po vazhdon ta monitorojë situatën.

Përmes një njoftimi në faqen zyrtare, IKSHP ka publikuar zonat ku uji nuk rekomandohet për pije.

Rajoni i Prishtinës:

ADVERTISING

Fabrika për trajtimin e ujit Badoc,

Vragoli.

Rajoni i Gjilanit:

Kamenicë – Stacioni i pompimit nr. 2, Bahqja dhe fshati Berivojcë.

Rajoni i Pejës:

Klinë – rrjeti nga puset dhe rrjeti nga burimi Jarinë.

Rajoni i Gjakovës:

Burimet – Hoçë e Madhe, Opterushë dhe Zaqishtë.

Rajoni i Prizrenit:

Malishevë.

Një ngjarje e rëndë ndodhur në fshatin Restelicë të Dragashit.

Dyshohet se një person i moshës 30 vjeçare e ka vrarë nënën e tij.

Shaqir Bytyqi, zëdhënës i policisë për rajonin e Prizrenit ka konfirmuar rastin për gazetën online Reporteri.net. Ai tha se i dyshuari është arrestuar.

“Me datën 21.01.2025, rreth orës 01:06, Policia është njoftuar për një rast të vdekjes së dyshimtë në fshatin Restelicë, Komuna e Dragashit. Sipas informatave fillestare, dyshohet se një person mashkull, rreth 30 vjeçar, e ka privuar nga jeta nënën e tij, rreth 60 vjeçare. I dyshuari, sipas të dhënave paraprake, ka pasur probleme të shëndetit mendor. Nga ekzaminimi fillestar në vendin e ngjarjes, nuk është vërejtur mjeti me të cilin dyshohet se është kryer vepra penale, ndërsa viktima ka pësuar disa lëndime në regjionin e kokës.

I dyshuari është arrestuar nga Policia dhe është ndaluar për procedura të mëtejme ligjore. Sektori Rajonal i Hetimeve, në bashkërendim me Prokurorin e Shtetit, është duke ndërmarrë të gjitha veprimet hetimore të nevojshme me qëllim të zbardhjes së plotë të rrethanave të këtij rasti”, deklaroi ai për Reporteri.net

Gjatë fjalimit të tij vjetor “Condition of the Guard 2026”, Gjeneral Major Stephen Osborn, vlerësoi mysafirët e veçantë që përfaqësuan partneritetin mes Gardës Kombëtare të Iowa-s dhe Forcës së Sigurisë së Kosovës (FSK).

Në këtë rast u përmendën Gjenerallejtënant Bashkim Jashari, Komandant i FSK-së, Komandant Rreshter Major Bedri Zuka, udhëheqësi më i lartë nënoficer, si dhe Drilon Zogaj, konsull i përgjithshëm i Republikës së Kosovës në Des Moines.

Sipas njoftimit të Gardës Kombëtare të Iowa-s, ky bashkëpunim ka ndërtuar gjatë viteve kapacitete dhe besueshmëri të ndërsjellë, duke përforcuar ndërveprimin dhe gatishmërinë e të dy forcave.

“Për më shumë se 15 vjet, ushtarët e Iowa-s kanë bashkëpunuar me Forcën e Sigurisë së Kosovës për të ndërtuar ndërveprimin dhe gatishmërinë. Vetëm në vitin 2025, partneriteti përfshiu 26 shkëmbime dypalëshe me mbi 500 pjesëmarrës në fusha si manovra, mjekësi, qëndrueshmëri, mbrojtje kibernetike dhe zhvillim profesional”, thuhet në njoftim.

Një arritje e veçantë e partneritetit u shënua kur një kompani këmbësorie e FSK-së u bashkua me Iowa 2nd Brigade Combat Team, 34th Infantry Division gjatë rotacionit të Qendrës së Përbashkët të Trajnimit të Gatishmërisë, duke shënuar pjesëmarrjen e parë të Kosovës në një mision trajnimi jashtë vendit.

Gjithashtu, në vitin 2025, Garda Kombëtare e Iowa-s regjistroi shtetasin e parë të Kosovës, Andren Gashi, i cili iu bashkua Gardës Kombëtare Ajrore të Iowa-s si ajror i forcave të sigurisë.

Ky partneritet, i cili tashmë zgjat mbi një dekadë, shërben si shembull i bashkëpunimit ndërkombëtar dhe ndërtimit të kapaciteteve të qëndrueshme mes dy vendeve.

Komisioni i Politikës së Sigurisë i Këshillit të Shteteve (CPS-S) në Zvicër, ka shprehur mbështetjen për zgjatjen e angazhimit të ushtarëve zviceranë në kuadër të KFOR-it në Kosovë deri në vitin 2029, si dhe për rritjen e numrit të tyre.

Sipas një njoftimi të shërbimeve parlamentare, komisioni vlerëson se “prania e KFOR-it dhe e kontingjentit zviceran Swisscoy në Kosovë mbetet e domosdoshme, pasi situata në terren, veçanërisht në pjesën veriore të vendit, vazhdon të jetë e brishtë”.

CPS-S, që është Dhoma e Lartë e Parlamentit të Zvicrës, thekson se prania e KFOR-it është “ende e nevojshme edhe për të kontribuar në garantimin e stabilitetit në Ballkanin Perëndimor”.

“Stabiliteti i Kosovës dhe i Ballkanit Perëndimor është edhe në interes të Zvicrës, ku jetojnë rreth 500 mijë persona me origjinë nga Evropa Juglindore, prej të cilëve mbi 150 mijë janë me origjinë kosovare”, u tha në njoftimin e shërbimeve parlamentare të Zvicrës.

Në këtë kuadër u tha se “CPS-S mbështet edhe rritjen e numrit të ushtarëve zviceranë në Kosovë nga 195 në 215”.

Po ashtu, sipas njoftimit, propozohet që Këshilli Federal të ketë kompetencë që, gjatë mandatit, ta rrisë kontingjentin me deri në 30 ushtarë shtesë, pa afat të caktuar, për t’iu përgjigjur nevojave të mundshme të ardhshme të KFOR-it.

Parashikohet edhe mundësia e angazhimit të përkohshëm të deri në 50 ushtarëve shtesë për mirëmbajtje, si për shembull të helikopterëve zviceranë, si dhe deri në 20 ushtarë shtesë për sigurinë e vetë kontingjentit.

Bëhen 20 vjet nga vdekja e presidentit Ibrahim Rugova. Ai ndërrojë jetë më 21 janar 2006.

Në 20 vjetorin e vdekjes së presidentit Ibrahim Rugova, nën organizimin e presidentes së vendit, Vjosa Osmani, do të mbahen një sërë aktivitetesh.

Sipas njoftimit të Presidencës, në orën 10:00, Osmani, organizohen homazhe tek varri i Presidentit Rugova, në Velani.

Në orën 12:00, nën patronatin e presidentes së Republikës së Kosovës, Vjosa Osmani, në amfiteatrin e Bibliotekës Qendrore Universitare, mbahet Akademi Përkujtimore me rastin e 20-vjetorit të ndarjes nga jeta të presidentit historik të Kosovës, Dr. Ibrahim Rugova.

Gjithashtu, nën përkujdesjen e kryetarit Lumir Abdixhiku, Lidhja Demokratike e Kosovës, ka njoftuar se, organizon “Akademi Përkujtimore në 20 vjetorin e ndarjes nga jeta të Atit Themeltar të Republikës së Kosovës, Presidentit Historik dr. Ibrahim Rugova”.

Akademia Përkujtimore do të mbahet sot (e mërkurë), në ora 11:00, në Sallën e Kuqe – Pallati i Rinisë, në Prishtinë.

Në Qendrën e Numërimit dhe Rezultateve është duke vazhduar numërimi i fletëvotimeve të zgjedhjeve të 28 dhjetorit për të cilat KQZ ka marrë vendimin që të rinumërohen në krejt Kosovën.

Sipas përditësimit të fundit të KQZ-së, deri më tani janë rinumëruar 832 vendvotime, apo 32,54% e votave.

Dallime të dukshme në vota po vazhdojnë të shpërfaqen përbrenda të gjitha partive.

Para një jave, KQZ-ja mori vendim që të çojë në rinumërim të gjitha vendvotimet e rregullta të Komunës së Prizrenit, pasi nga një proces verifikues i dy kutive me fletëvotime, ka gjetur dallim prej 714 votash.

Rinumërimi ka gjetur se 45 mijë e 709 vota u janë shtuar ose hequr kandidatëve gjatë numërimit fillestar vetëm në këtë komunë. Devijime të mëdha të votës nga rinumërimi në Prizren pati në PDK. Kandidati i kësaj partie për deputet, Fetah Paçarizi doli me mbi 6 mijë vota më pak.

Për pasojë, ditën e hënë, KQZ mori vendim për rinumërimin e të gjitha vendvotimeve në 28 komunat, si: Deçan, Gjakovë, Gllogoc, Gjilan, Istog, Klinë, Fushë Kosovë, Kamenicë, Mitrovicë e Jugut, Lipjan, Novobërdë, Obiliq, Rahovec, Pejë, Podujevë, Prishtinë, Shtërpcë, Suharekë, Viti, Zubin Potok, Zveçan, Malishevë, Junik, Hani i Elezit, Graçanicë, Partesh, Kllokot dhe Mitrovicë e Veriut. Ndërkaq, sipas vendimit të mëhershëm të KQZ-së, i datës 13 janar 2026, parashihej që në 10 komuna, si: Dragash, Kaçanik, Lespoaviq, Prizren, Skënderaj, Shtime, Ferizaj, Vushtrri, Mamushë dhe Ranillug.

Vendimi i KQZ-së për përfshirjen në rinumërim të të gjitha vendvotimeve, erdhi pas një raporti nga rinumërimi i më shumë se 500 vendvotimeve, sipas të cilit, tek votat e subjekteve politike, ndryshimet e identifikuara janë të papërfillshme, por për dallim prej tyre, të dhënat për kandidatët pas rinumërimit, paraqesin një shkallë të lartë të pasaktësive në numërim.

Vjedhje të votave të kandidatëve për deputetë janë shpërfaqur gjatë rinumërimit edhe në Podujevë, kësaj radhe brenda VV-së.