Author: K.B.

Avokati i njërit nga të intervistuarit nga Prokuroria e Gjakovës, për manipulim me vota në Malishevë, Egzon Doli, ka thënë se klienti i tij nuk ka qenë në rolin e komisionerit, dhe se me aq sa di ai, deri tash janë intervistuar, rreth 60 persona.

“Procedura është në fazë të hershme. Klienti im është në cilësi të anëtarit të komisonit. Klienti im e përfundoi intervistimin. Nëse nuk gaboj rreth 60 persona janë intervistuar. Roli i klientit tim ka qenë në rolin e anëtarit dhe jo të komisionerit, por megjithatë mbetet të shihet çfarë pretendon prokuroria.” – tha ai, raporton Nacionale.

Një fëmijë nga Gadimja e Lipjanit, Zejn Zejnullahu, ka humbur jetën dje pasi dyshohet se ka rënë në lumin e Gadimes, ndërsa rrethanat e rastit janë duke u hetuar nga organet e drejtësisë.

I mituri ishte raportuar i zhdukur nga familjarët e tij, pasi nuk ishte kthyer në shtëpi pas përfundimit të mësimit. Pas disa orësh kërkimi, ai u gjet në lumin e Gadimes dhe u dërgua me autoambulancë në Qendrën Klinike Universitare të Kosovës.

Nga QKUK është konfirmuar se fëmija kishte mbërritur pa shenja jete.

“Pacienti ka ardhë pa shenja jete. Përkundër masave reanimuese, pacienti ka ndërruar jetë”, ka deklaruar doktoresha Dafina Basholli.

Lidhur me rastin, detaje ka dhënë edhe Policia e Kosovës, e cila në raportin 24-orësh ka bërë të ditur se kërkimi për të miturin kishte nisur menjëherë pas raportimit të zhdukjes.

“Pas pranimit të informatës se viktima mashkull kosovar nuk është kthyer në shtëpi, është organizuar kërkimi, me ç’rast nga një dëshmitar viktima është gjetur në lumë. I njëjti është dërguar në QKUK, ku mjeku kujdestar ka konstatuar vdekjen”, thuhet në raportin policor.

Ndërkohë, Prokuroria Themelore në Prishtinë ka konfirmuar se është angazhuar menjëherë në rast dhe se trupi i pajetë është dërguar për autopsi.

“Prokurori i Shtetit në Departamentin për të Mitur, menjëherë pas marrjes së informatës, ka dalë në vendin e ngjarjes së bashku me hetuesit policorë. Prokurori ka autorizuar që trupi i pajetë të dërgohet për autopsi dhe aktualisht jemi në pritje të rezultateve”, ka deklaruar zëdhënësja e Prokurorisë Themelore në Prishtinë, Kaltrina Shala.

I ndjeri Zejn Zejnullahu ishte nxënës i shkollës fillore “Zejnel Hajdini” në Gadime. Ngjarja ka shkaktuar dhimbje të madhe në familje, shkollë dhe komunitet.

Ngushëllime për vdekjen e tij kanë shprehur edhe kryetari i Komunës së Lipjanit, Imri Ahmeti, si dhe ministrja në detyrë e Arsimit, Arbërie Nagavci.

Këshilli i Qytetit të Sarajevës miratoi një vendim në seancën e sotme, duke i dhënë pëlqimin Qytetit të Sarajevës për t’u bashkuar me procedurat penale që po zhvillohen para autoriteteve gjyqësore kompetente në Milano, Republika e Italisë, në lidhje me rastin “Sarajevo Safari”.

Me vendimin e miratuar, Qyteti i Sarajevës bashkohet me procedurat penale të filluara kundër personave që morën pjesë në të shtënat me snajper dhe të shtënat ndaj qytetarëve të Sarajevës gjatë rrethimit të qytetit.

Kjo autorizon Kryetarin e Bashkisë së Qytetit të Sarajevës dhe Zyrën e Prokurorit të Qytetit të Sarajevës, brenda juridiksionit të tyre, të ndërmarrin të gjitha veprimet e nevojshme ligjore, teknike dhe administrative në mënyrë që të bashkohen zyrtarisht me procedurat si palë e dëmtuar.

Vendimi përfshin gjithashtu zbatimin e të gjitha aktiviteteve të nevojshme për të mbledhur të dhëna dhe dokumentacion përkatës mbi qytetarët e Sarajevës që u vranë nga të shtënat me snajper gjatë rrethimit të qytetit.

Më 18 dhjetor 2025, Konsullata e Përgjithshme e Bosnjës dhe Hercegovinës në Milano, përmes Ministrisë së Punëve të Jashtme të BiH, i dërgoi një letër Qytetit të Sarajevës në lidhje me procedurat gjyqësore në Milano kundër snajperëve që vepronin në Sarajevë. Zyra e Prokurorit të Përgjithshëm të Qytetit të Sarajevës e mori letrën e lartpërmendur më 29 dhjetor 2025, dhe ajo deklaroi se kishte filluar procedurat para autoriteteve gjyqësore kompetente në Milano kundër personave – shtetas të Republikës së Italisë – të dyshuar për sulme snajperiste kundër qytetarëve të Sarajevës.

Procedimi penal u iniciua me iniciativën e gazetarit investigativ italian Ezio Gavazzeni, në bashkëpunim me ish-gjyqtarin e procedurës penale Guido Salvani. Hetimi po zhvillohet nga prokurori Alessandro Gobbis, ndërsa pala e dëmtuar përfaqësohet pro bono nga avokati Nicola Brigida, i cili i ka dërguar një kërkesë Qytetit të Sarajevës në lidhje me mundësinë e bashkimit me procedurën si palë e dëmtuar.

Në përputhje me dispozitat në fuqi të legjislacionit penal, pala e dëmtuar ka një pozicion të kufizuar procedural, por mund të ketë një rol të rëndësishëm në procedurë, varësisht nga faza e saj. Gjatë fazës së hetimit, pala e dëmtuar ka të drejtë të paraqesë një kërkesë për të drejtën pasurore, të propozojë paraqitjen e provave dhe të veprojë si ndihmës i prokurorit, duke marrë parasysh njohuritë për mjedisin në të cilin është kryer vepra penale, si dhe rrethanat që lidhen me palët e tjera të dëmtuara.

Gjatë fazës së shqyrtimit gjyqësor, roli i palës së dëmtuar fiton rëndësi shtesë, pasi ai ose ajo mund të thirret si dëshmitar, të paraqesë një kërkesë pasurore, të japë një fjalë përfundimtare dhe të apelojë vendimin.

Veprimet e snajperëve gjatë agresionit ndaj Bosnjës dhe Hercegovinës, të cilat përfshinin të shtënat sistematike të civilëve të paarmatosur, përfaqësojnë një traumë individuale dhe kolektive dhe një plagë të përhershme për qytetin e Sarajevës dhe qytetarët e saj. Gjatë rrethimit të qytetit, më shumë se 11,000 civilë humbën jetën, përfshirë një numër të madh fëmijësh.

Kryerja e procedurave penale kundër personave përgjegjës dhe dënimi përfundimtar i autorëve të krimit përfaqësojnë një kontribut të rëndësishëm në mbrojtjen e vlerave themelore shoqërore – të drejtës për jetë, integritetit personal dhe rendit publik – ruajtjen e rendit ligjor, si dhe përmbushjen e drejtësisë dhe mbrojtjen e të drejtave dhe interesave të viktimave dhe familjeve të tyre.

Me miratimin e këtij vendimi, Qyteti i Sarajevës si institucion mundësohet të marrë pjesë aktive në procedurat penale, duke kontribuar kështu në përcaktimin e së vërtetës, ruajtjen e kulturës së kujtesës dhe mbrojtjen e të drejtave të të gjithë qytetarëve të saj.

Nuk kërkohen burime shtesë financiare për zbatimin e vendimit të lartpërmendur. /Vijesti

Autoritetet shëndetësore në Indi po ndërmarrin masa për të frenuar një shpërthim të virusit Nipah në shtetin lindor të Bengalit Perëndimor, pasi janë konfirmuar pesë raste, përfshirë edhe personel mjekësor. Dhjetëra persona janë vendosur në karantinë, ndërsa pacientët po trajtohen në spitale në dhe përreth Kolkatës.

Virusi Nipah është një patogjen me rrezik të lartë, i listuar nga Organizata Botërore e Shëndetësisë (OBSH), dhe karakterizohet nga shkallë e lartë vdekshmërie.

Aktualisht nuk ka vaksinë dhe as trajtim specifik për këtë infeksion, shkruan Indepedent.uk

Simptomat

Infeksioni zakonisht nis me simptoma të përgjithshme, të ngjashme me gripin, si:

temperaturë,

dhimbje koke,

dhimbje muskujsh,

lodhje.

Në disa raste shfaqen edhe probleme respiratore, përfshirë kollë dhe vështirësi në frymëmarrje. Komplikimi më i rëndë është encefaliti (inflamacioni i trurit), i cili mund të shkaktojë konfuzion, kriza epileptike, humbje të vetëdijes apo komë. Periudha e inkubacionit varion nga 4 deri në 21 ditë.

Sa vdekjeprurës është?

Sipas të dhënave ndërkombëtare, shkalla e vdekshmërisë nga virusi Nipah varion nga 40 deri në 75 për qind, në varësi të shpërthimit dhe variantit të virusit. Disa të mbijetuar mund të përjetojnë pasoja afatgjata neurologjike.

Si përhapet?

Virusi Nipah transmetohet nga kafshët te njerëzit dhe nga njeriu te njeriu. Rezervuari kryesor janë lakuriqët e natës që ushqehen me fruta. Infeksioni mund të ndodhë përmes konsumimit të ushqimeve të kontaminuara ose kontaktit të drejtpërdrejtë me persona të infektuar dhe lëngjet e tyre trupore.

Ku është shfaqur më parë?

Virusi u identifikua për herë të parë në vitin 1999 në Malajzi dhe Singapor. Që atëherë, raste janë raportuar kryesisht në Indi dhe Bangladesh, me shpërthime të përsëritura, veçanërisht në zonat rurale.

Parandalimi

Meqë nuk ka vaksinë, parandalimi bazohet në:

shmangien e konsumit të frutave të kontaminuara,

higjienë të shtuar,

evitimin e kontaktit të drejtpërdrejtë me persona të infektuar,

masa mbrojtëse për personelin shëndetësor.

OBSH e konsideron virusin Nipah si një kërcënim prioritar dhe thekson nevojën për monitorim të vazhdueshëm dhe reagim të shpejtë shëndetësor.

Komuna e Prishtinës ka hapur konkurs publik për projektimin e Memorialit Përkujtimor kushtuar komandantit legjendar Adem Jashari dhe sakrificës së familjes së tij, për të cilin ka ndarë një buxhet prej 150 mijë eurosh.

Sipas dosjes së konkursit, ky memorial synon të përjetësojë sakrificën unike të familjes Jashari nga Prekazi i Skenderajt, e cila përfaqëson një nga rastet më kulminante të gatishmërisë për sakrificë mbinjerëzore për liri.

Rënia e komandantit të Ushtrisë Çlirimtare të Kosovës, Adem Jashari, së bashku me 58 anëtarë të familjes së tij, përfshirë fëmijë, gra dhe pleq, konsiderohet si një ngjarje e veçantë në historinë e njerëzimit në emër të idealit universal të lirisë.Sipas vizionit të projektit, memoriali do të vendoset në një nga hapësirat publike me potencial në kryeqytet, me qëllim që kjo sakrificë sublime të bëhet pjesë e pandashme e jetës së përditshme urbane dhe e manifestimit të lirisë në hapësirë publike, përmes ndërveprimit të vazhdueshëm me qytetarët.

Projekti është në përputhje edhe me vizionin e kryetarit të Prishtinës, Përparim Rama, për një kryeqytet bashkëkohor, gjithëpërfshirës dhe një fener të trashëgimisë kulturore.Memoriali përkujtimor i familjes Jashari pritet të kontribuojë në forcimin e identitetit kulturor dhe historik të qytetit.

Sa i përket lokacionit, memoriali parashihet të ndërtohet në qendër të Prishtinës, mes ndërtesës së Kuvendit të Republikës së Kosovës dhe Xhamisë së Gurit.Ai do të jetë pjesë e projektit për ndërlidhjen e shëtitores ekzistuese që përfundon me sheshin “Ibrahim Rugova” dhe vazhdimin e saj drejt pjesës së vjetër të qytetit, përmes nënkalimit në rrugën “Agim Ramadani”.

Sipas këtij projekti urban, rruga “Agim Ramadani” do të bëhet nëntokësore, ndërsa pjesa sipër saj do të shndërrohet në pllato për këmbësorë, duke mundësuar lidhjen funksionale mes bulevardit ekzistues dhe qytetit të vjetër. Pikërisht mbi këtë pllato është paraparë dizajnimi i memorialit dhe hapësirës përreth tij, që është edhe subjekt i konkursit.

Një gjykatë e Koresë së Jugut dënoi ish-zonjën e parë Kim Geun-hee me 20 muaj burgim, pasi u shpall fajtore për pranim ryshfeti nga zyrtarët e kishës së unifikimit në këmbim të favoreve politike.

Gjykata e liroi Kim nga akuzat për manipulim të çmimeve të aksioneve dhe shkelje të ligjit për financimin e partive politike. Dënimi i saj u njoftua pas burgosjes së bashkëshortit të saj, ish-presidentit Yoon Suk-yeol, i cili u shkarkua nga detyra vitin e kaluar për shkak të veprimit të tij për të shpallur gjendjen ushtarake në vitin 2024.

“E pandehura u dënua me një vit e tetë muaj burgim”, tha gjykatësi Woo In-sung i Gjykatës së Qarkut Qendror të Seulit.

Prokurorët kishin kërkuar një dënim me 15 vjet burgim dhe një gjobë prej 2.9 miliardë wonësh (2 milionë dollarë) për akuzat kundër saj, të cilat përfshinin pranimin e çantave luksoze Chanel dhe një gjerdan diamanti nga kisha e unifikimit në këmbim të favoreve politike.

Gjykata vendosi se nuk kishte prova të mjaftueshme për ta shpallur atë fajtore për manipulim të çmimeve të aksioneve dhe shkelje të ligjeve mbi financimin e partive politike.

Kim i kishte mohuar të gjitha akuzat. Avokati i saj tha se ekipi i tij do ta shqyrtonte vendimin dhe do të vendoste nëse do ta apelonte dënimin për ryshfet.

Presidentja e Kosovës, Vjosa Osmani, ka thënë se Kosova do të vazhdojë të ecë përpara dhe e palëkundur në rrugën e saj drejt familjes euroatlantike.

“Javën e kaluar, në pritjen vjetore për korin diplomatik, shpreha mirënjohjen e popullit tonë ndaj miqve tanë ndërkombëtarë për mbështetjen e tyre të vazhdueshme”, ka shkruar mes tjerash Osmani.

Postimi i plotë:

Kosova do të vazhdojë të ecë përpara, e palëkundur në rrugën e saj drejt familjes euroatlantike dhe duke ndërtuar partneritete të forta anembanë botës.

Javën e kaluar, në pritjen vjetore për korin diplomatik, shpreha mirënjohjen e popullit tonë ndaj miqve tanë ndërkombëtarë për mbështetjen e tyre të vazhdueshme.

Në Gjykatën Themelore në Prishtinë, me propozim të mbrojtësit të të akuzuarit Bedri Shabani, avokatit Besnik Berisha, është mbyllur për publikun seanca e së mërkurës në rastin ku Shabani bashkë me Muharrem Qerimin akuzohen për spiunazh.

Në këtë rast, Bedri Shabani dhe Muharrem Qerimi akuzohen për spiunazh. Qerimi akuzohet edhe për armëmbajtje pa leje, raporton “Betimi për Drejtësi”.

Avokati Berisha propozoi të mbyllet seanca për arsye se do të deklarohen ekspertët lidhur me gjetjet e ekspertizës psikiatrike për të akuzuarin Berisha.

“Me qëllim të mbrojtjes së dinjitetit të Bedri Shabanit, mbrojtjes së informatave, se ligjërisht klasifikohen si informacion i privilegjuar dhe nuk mund të ndahet me askënd pa pëlqimin e tij, propozojmë që kjo pjesë e shqyrtimit gjyqësor të mbahet e mbyllur për publikun”, tha Berisha.

Kryetari i trupit gjykues, Rrahman Beqiri tha se me shumicë votash, trupi gjykues aprovoi propozimin e Berishës, andaj seanca e sotme u mbyll.

Ndryshe, seanca e planifikuar për 20 nëntor 2025, ishte anuluar pasi ishte urdhëruar ekzaminim psikiatrik për të akuzuarin Bedri Shabani.

Aktakuza e Prokurorisë Speciale është konfirmuar nga Themelorja dhe Apeli.

Prokuroria Speciale e Republikës së Kosovës (PSRK) më 19 shkurt 2025 ka ngritur aktakuzë ndaj Bedri Shabanit dhe Muharrem Qerimit, të cilët i ngarkon se kanë mbledhur dhe dërguar informacione e dokumente tek BIA serbe lidhur me Ushtrinë Çlirimtare të Kosovës, eprorët e pjesëtarët e saj, Policinë, Agjencinë e Kosovës për Inteligjencë e Inspektoratin Policor të Kosovës, si dhe për ngjarje e objekte specifike, përfshirë edhe një masakër- atë të Reçakut.

Përmes këtyre veprimeve, PSRK thotë se synohej shkaktimi i një konflikti të gjerë ndëretnik në territorin e Republikës së Kosovës, të krijohej një narrativë e pavërtetë që ta ndërlidhë Spitalin Ushtarak të UÇK-së me të ashtuquajturën “Shtëpia e Verdhë” për kinse trafikim organesh dhe të vë në dyshim të vërtetën e masakrës.

Aktakuza ngarkon Shabanin e Qerimin për spiunazh. Kurse, Qerimi akuzohet dhe për armëmbajtje pa leje.

Sipas aktakuzës së siguruar nga “Betimi për Drejtësi”, në pikën e parë Bedri Shabani akuzohet se nga data e pacaktuar e deri në momentin e arrestimit më 5 qershor 2024, e ka ndihmuar Agjencinë e Intelegjencës dhe Sigurisë së Republikës së Serbisë (që njihet si BIA), në formën e mbledhjes dhe dërgimit të informacioneve, dokumenteve dhe materialeve që lidhen me Ushtrinë Çlirimtare të Kosovës, përfshirë eprorët e saj, si dhe me ngjarje dhe objekte specifike të tilla si Spitali Ushtarak i UÇK-së në fshatin Mollopolc të Shtimes dhe masakrën e Reçakut.

Aktakuza thotë se Shabani të dhënat dhe informacionet në fjalë, ua kishte transmetuar zyrtarit të lartë të BIA-s, Sërgjan Rosiç, përgjegjës për Regjionin e Pançevës, si dhe kolonel Bogoljub Janiçeviç, ish-komandant i Policisë së Serbisë për Regjionin e Ferizajt, gjatës kohës së luftës në Kosovë dhe udhëheqës i operacionit policor-ushtarak në masakrën e Reçakut përmes komunikimeve telefonike, postës elektronike dhe takimeve fizike të zhvilluara në territorin e Serbisë.

Andaj, thuhet se me këto veprime i akuzuari ka rrezikuar dhe dëmtuar rëndë rendin juridik kushtetues dhe sigurinë e Republikës së Kosovës, duke e ndihmuar po ashtu BIA-n në krijimin e një narrative të pavërtetë me qëllim që të ndërlidhë Spitalin Ushtarak të UÇK -së të Mollopolcit të Shtimes me të ashtuquajturën “Shtëpia e Verdhë” në Burrel të Shqipërisë, kinse janë bërë trafikime organesh, si dhe të vë në dyshim të vërtetën e masakrës së Reçakut, duke kërkuar nga zyrtari i BIA-s dhe Bogoljub Janiçeviç që të ndërmarrin veprime operacionale të cilat do të shkaktonin një konflikt të gjerë ndëretnik në territorin e Republikës së Kosovës.

Prandaj për këto veprime, Bedri Shabani ngarkohet me veprën penale “Spiunazh” nga neni 124, paragrafi 3 të Kodit Penal.

Kurse, në pikën e dytë të aktakuzës, Muharrem Qerimi akuzohet se nga viti 2012 e në vazhdimësi deri në arrestimin e tij më 5 qershor 2024, e ka ndihmuar Agjencinë e Intelegjencës dhe Sigurisë së Republikës së Serbisë (që njihet si BIA), në formën e mbledhjes dhe dërgimit të informacioneve, dokumenteve dhe materialeve të ndryshme që kanë të bëjnë me luftën dhe pjestarët e UÇK-së, emrat dhe eprorëve të Policisë së Kosovës, AKI-së, IPK-së, pastaj emrat e dëshmitarëve tashmë të njohur të Dhomave të Specializuara të Kosovës në Hagë në lidhje me veprat penale të krimit të organizuar, korrupsionin, e të cilat informacione ia ka transmetuar zyrtarit të lartë të BIA-s, Sërgjan Rosiç përgjegjës për Regjionin e Pançevës përmes komunikimeve telefonike dhe takimeve fizike që ka zhvilluar në territorin e Republikës së Serbisë.

Me këto veprime, i akuzuari Qerimi thuhet se ka rrezikuar dhe dëmtuar rëndë rendin juridik kushtetues dhe sigurinë e Republikës së Kosovës dhe qytetarëve të saj.

Prandaj për këto veprime, Qerimi ngarkohet me veprën penale “Spiunazh” nga neni 124, paragrafi 3 të Kodit Penal.

Ndërkaq, në pikën e tretë të aktakuzës thuhet se më 5 qershor 2024 të pandehurit Qerimi gjatë zbatimit të urdhëresës së Gjykatës për urdhër kontroll, i është gjetur në posedim pa autorizim një revole e tipit “Ekol Tuna”, një karikator, gjashtë fishekë, njëzet fishekë të tjerë me mbishkrimin 11/53, si dhe katër karikator të tjerë me shenjën e gjysmëhënës dhe një rrumbullak të cilat janë sekuestruar nga Policia e Kosovës.

Me këto veprime, Qerimi ngarkohet se ka kryer veprën penale “Mbajtja në pronësi, kontroll ose posedim të paautorzuar të armëve” nga nenin 366, paragrafi 1 të Kodit Penal./BetimipërDrejtësi/